OITYI MATYITUKUATESAKO OPO TUAHAYALE VAKUETU

4 | Huku Mekukuatesako Opo Wahayale Vakuenyi

Ombimbiliya Ipopia Okuti:

“Ovinyango viononkhono mba Huku ovievi: ohole, ehambu, ombembwa, oumphua-lundo, okankhenda, ouwa-tima, nekolelo, nomapole, nokulikondola omutima.” — OVA GALATA 5:22, 23.

Otyo Tyihangununa-tyi?

Okulipola oundyale tyivilwa vala kononkhono mba Huku. Ononkhono mba Huku mbutukuatesako okukala novituwa ñgeno ankho tuehevili okukala navio kononkhono mbetu. Naina, tyina uhanda okulipola oundyale, wehetyilinge vala kononkhono mbove muene, mahi ita Huku ekukuateseko. Inkha ulinga ngotyo, molitehela nga apositolu Paulu wapopile okuti: “Movipuka aviho ndyina ononkhono mokonda ya una undyavela epondolo.” (Ova Filipu 4:13) Tupu, noove muene upondola okupopia okuti: “Unkhuatesako vala o Siovaa.” — Salmo 121:2.

Oityi Ove Upondola Okulinga?

“Siovaa oe wankhuatesako okukala omunthu wombembwa.” — WALDO

Likuambela ku Siovaa, omuiti ekukuateseko nononkhono mbae. (Luka 11:13) Muiita ekukuateseko utyivile okukala novituwa oviwa. Lilongesa etyi Ombimbiliya ipopia tyayemba kovituwa oviwa, ngetyi oluembia, nombembwa noumphwa-lundo, nokulikondola omutima. Soka oñgeni upondola okukala vali novituwa ovio momuenyo wove. Liwaneka na vana valinga ononkhono mbokukala novituwa ovio. Ovanthu ovo vapondola okukuavela “ondundo yokukala nohole nokulinga ovilinga oviwa.” — Ova Hebeleu 10:24.

Etyi Tyaendele na Umwe—WALDO

Wetyivila Okulipola Oukalavi

Omulume umwe utiwa o Waldo ankho omukalavi mokonda watekulilwe onya. Wapopia okuti: “Apeho ankho ndyilipaka vala momaluei nonongangala, iya atee umwe pamwe ankho mbuhanda okundyipaa. Nthiki imwe, ovanthu ovo avaovola ongangala imwe indyipae, mahi andyityivili okukalomboka, tyatomwa like nomoko.”

Waldo kahambukilwe etyi omukai wae ahimbika okulilongesa Ombimbiliya no Nombangi mba Siovaa. Wapopia okuti: “Ame ankho ndyiyele unene Onombangi mba Siovaa, iya pamwe ankho ndyivepopia omapita. Mahi, vana ankho kavapopi-ale natyike, ovanthu vombembwa.”

Etyi pakala, Waldo nae ahimbika okulilongesa Ombimbiliya. Wati: “Katyapepukile okueendela muetyi ankho ndyikahi nokulongeswa. Atee umwe ankho ndyisoka okuti ndyitupuale onthiki mandyityivili okupiluluka.” Mahi otyipuka tyimwe elilongesile, atyimukuatesako unene.

Waldo wati: “Nthiki imwe, omulongesi wange Wombimbiliya utiwa o Alejandro, amphopila ndyitange Ova Galata 5:22, 23. . . . Otesitu oyo ipopia okuti ovinyango viononkhono mba Huku “ohole, ehambu, ombembwa, oumphua-lundo, okankhenda, ouwa-tima, nekolelo, omapole, nokulikondola omutima.” Alejandro apopi okuti, opo ndyikale novituwa ovio, ankho ndyina vala okukuatesuako nononkhono mba Huku. Otyipuka otyo atyipilulula onkhalelo yange yokusoka.”

Mokonda wayumbile onthumbi mu Huku, Waldo etyivili umwe okulipola oundyale momutima wae. Wapopia okuti: “Ombunga yange nomapanga, avahuvu unene etyi vamona oñgeni napiluluka.” Nkhele wapopia vali okuti: “Siovaa oe wankhuatesako okukala omunthu wombembwa.”