Momuvo Wehinangelo—Omphitilo Pala Okuyawisa Ovilinga Vietu!
1. Omahunga patyi tuna opo tuyawise ovilinga vietu viokuivisa mokueenda kuo nohanyi mba Tyitalale, Tyikukutu, na Kapepo?
1 Okuti upondola okuyawisa ovilinga viove viokuivisa mokueenda kuo nohanyi mba Tyitalale, Tyikukutu, na Kapepo? Kovilongo ovinyingi, pomuvo oo ekumbi kalinyingila liwa iya tyitavela okuundapa vali unene movilinga viokuivisa. Ovaivisi vamwe mavakala monofelia movilinga ine kosikola iya vapondola okuundapesa omuvo oo movilinga viokuivisa. Okuhimbikila mu 2 ya Tyikukutu, matuundapa movilinga viokukonga ovanthu opo veye Kehinangelo Liononkhia mba Tatekulu mu 17 ya Tyikukutu. Moluotyo, tulingei ononkhono opo tuvatele ovanthu vokualekesa esuko ankho vekahi Pehinangelo nokuvekonga opo veye okutehelela elongomona liakolela malilingwa mokueenda kuo simano 25 ya Tyikukutu. Tyotyili, pena omahunga omanyingi opo tuyawise ovilinga vietu viokuivisa mokueenda kuo nohanyi mba Tyitalale, Tyikukutu, na Kapepo.
2. Onkhalelo patyi ongwa tuna yokuundapa unene movilinga viokuivisa?
2 Okuundapa Ngomukokoli-ndyila Wapola Pokati: Onkhalelo imwe ongwa yokuundapa unene okukala omukokoli-ndyila wapola pokati. Mokonda atuho tuna ovilinga ovinyingi, tuesukisa okulipongiya nokulinga omapiluluko moprograma yetu. (Pro. 21:5) Hamwe upondola okuyekapo okulinga ovipuka vimwe vihesukisile unene. (Fil. 1:9-11) Omokonda yatyi wahapopila vakuenyi mewaneno okuti uhanda okukala omukokoli-ndyila wapola pokati, opo navo vaundapa nove movilinga ovio?
3. Oñgeni onombunga mbupondola okuovola okuyawisa ovilinga viavo viokuivisa?
3 Mokueenda Kuelilongeso Liombimbiliya Mombunga mamulingi mosimano maiya, otyiwa okutomphola etyi ombunga mailingi. (Pro. 15:22) Inkha amuho mombunga muundapela kumwe, vamwe mombunga vapondola okukala ovakokoli-ndyila vapola pokati ohanyi ike ine onombali. Iya inkha utala okuti kamatyitavela? Ombunga nkhele ipondola okuovola okuyawisa ovilinga viavo viokuivisa pokuundapa ononthiki mbumwe kokangulohi ine okuenda apeho movilinga viokuivisa Tyasapalo no Tyalumingu.
4. Ouwa patyi matukala nao tyina tuundapa vali movilinga viokuivisa monohanyi Mbehinangelo?
4 Jeova utala atyiho tulinga opo tumuumbile iya upanda ononkhono tulinga. (Heb. 6:10) Ehambu litundilila kokuavela Jeova navakuetu. (1 Crô. 29:9; Atos 20:35) Okuti upondola okuundapa vali movilinga viokuivisa monohanyi ombu Mbehinangelo, nokupolako ouwa nehambu?