Oñgeni Tyilongeswa Nomukanda—Oityi Ombimbiliya Itulongesa?

Omukanda Ombimbiliya Itulongesa nomukanda Ombimbiliya Ilongesa vielifwa. Omikanda ovio vivali, oviti vietu viokulongesa viaonganekwa monkhalelo yelifwa. Mahi, omukanda Ombimbiliya Itulongesa una onondaka mbapepuka vali. Walingwa pala okukuatesako vana vahanoñgonoka nawa omukanda Ombimbiliya Ilongesa. Omukanda Ombimbiliya Itulongesa una outoi ukahi konthyulilo uhangununa onondaka mbumwe, mahi utupu o apendise. Konthyimbi yovikapitulu kutupu omapulo, ine oukasa wokupitulula. Konthyulilo yokapitulu kuna oukasa uhangununa otyili tyo Mbimbiliya tyapopiwa mokapitulu katyo. Omukanda Ombimbiliya Ilongesa, nomukanda Ombimbiliya Itulongesa vipondola okuawa kese muvo namphila havioko vikahi nokuawa mokueenda kuohanyi. Oñgeni tupondola okuundapesa oviti vikahi momukanda Ombimbiliya Itulongesa pokulongesa omunthu Ombimbiliya?

NOÑGONOKA NAWA: Mongeleka, tyina tuti pokulongesa omunthu Ombimbiliya tutanga opalagrafu momukanda Ombimbiliya Ilongesa, konyima atutange epulo lio palagrafu yatyo. Pahe, soka ñgeno omunthu ukahi nokulongesa ketyivili okupopia nawa elaka ine ketyivili okutanga nawa. Inkha ongotyo, upondola okumulongesa momukanda Ombimbiliya Itulongesa. Konyima okakasa kati noñgonoka nawa, ngako mulilongesila, omuavela ondundo opo ha atange ono palagrafu aike. Kese tyili tyo Mbimbiliya una okumulongesa-tyo mono minutu 15. Mokonda okakasa kati noñgonoka nawa kakapopi ovipuka ovinyingi vikahi mono palagrafu, omulongesi wesukisa okulifuiika nawa, asoko kuetyi matyikuatesako omulongwa. Inkha umulongesa okulandula ono palagrafu, okakasa kati noñgonoka nawa kapondola okulinga kokupitulula.

OUTOI UKAHI KONTHYULILO: Onondaka mbumwe, mbahangununwa ngo omu mbelilandulila. Omulongesi oe utyii inkha pokulilongesa mapopi outoi ukahi konthyulilo yomukanda Ombimbiliya Itulongesa.