Okuti Ovinyama Maviende Keulu?

Etyi Ombimbiliya Ipopia

Ombimbiliya ilongesa okuti povitungwa viatyo aviho vili kombanda yohi, pena vala ovanthu vehehi vakoywa-po mavaende keulu. (Eholololo 14:1, 3) Mavakatumina ngonohamba novanakwa na Sesusi. (Luka 22:28-30; Eholololo 5:9, 10) Ovanthu ovanyingi-nyingi vatyo mavakatutiliswa avakakala pano pohi mouye omupe. — Oviimbo 37:11, 29.

Ombimbiliya itupu apa yati kuna eulu liovimbwa, lievi vitekulwa — ina umwe etyi yehetyipopilile. Mokonda ovinyama vitupu onondunge mbokulinga etyi tyivitisa viata-mo ‘mokwiihanenwa keulu.’ (Ova Hembeleu 3:1) Ovipuka viatyo ovio viati umwe okukala nenoñgonoko, okukala neyumba-nthumbi, nokutavela ovitumino vya Huku. (Mateusi 19:17; Swau 3:16; 17:3) Ovanthu ovo vala vatungwa nolusoko lwokukalako apeho. — Ehimbikilo 2:16, 17; 3:22, 23.

Opo ovitungwa via pano pohi, viende keulu, vina okututiliswa. (1 Ova Kolindu 15:42) Ombimbiliya ipopia ovanthu ovanyingi vatutailisilwe. (1 Onohamba 17:17-24; 2 Onohamba 4:32-37; 13:20, 21; Luka 7:11-15; 8:41, 42, 49-56; Swau 11:38-44; Ovilinga 9:36-42; 20:7-12) Mahi momatutilo atyo oo ovanthu vala vatutilisilwe, havinyama-ko.

Okuti ovinyama vina ohande?

Au. Ombimbiliya yati ovinyama, ovanthu, aviho ohande. (Onombalulo 31:28) Etyi omulume wotete Andau atungwa, kapelwe ohande, mahi ‘wakala omunthu una ohande.’ (Ehimbikilo 2:7, okatoi) Ohande yalingwa novipuka evi vivali: “ombundu yeheke, nomphepo yomwenyo.”

Okuti onohande mbunkhia?

Eenga, Ombimbiliya ilongesa okuti onohande mbunkhia. (Levitiku 21:11, okatoi; Isekiyele 18:20) Tyati vala omunthu, otyinyama, tyina viamankhi vikondoka peheke apa viatunda. (Omupopi 3:19, 20) Otyo okuti, kavikalako vali.a

Okuti ovinyama vilinga onkhali?

Au. Okulinga onkhali tyihangununa okusoka, okulinga tyimwe tyihelikwatele novitumuno via Huku. Opo otyitungwa tyilinge onkhali, tyina okusoka atyikoyo-po etyi matyilingi, mahi ovinyama otyo kavityivili okutyilinga vitupu onondunge mbokusoka. Mwene ovinyama mokamuvo vina omwenyo, kavilingi ovipuka nonondunge, vitupu tyokuti visoka. (2 Petulu 2:12) Tyina omuvo wavio wokukala nomwenyo wamapu vinkhia, namphila viahalingi nkhali.

Okuti vipondola vala okutekulwa onya?

Au. Huku wapa ovanthu tyokutumina ovinyama, kevepele tyokuvitekula onya. (Ehimbikilo 1:28; Oviimbo 8:6-8) Huku usuka umwe novinyama aviho — noviila umwe ovitutu. (Sona 4:11; Mateusi 10:29) Waavelele ovanthu vae otyitumino tyokutekula nawa ovinyama. — Okutunda 23:12; Epalukununo 25:4; Omihe 12:10.

Onoteisitu mb’Ombimbiliya mbupopia ovinyama

Ehimbikilo 1:28: “Huku evepe elao [ovanthu votete], ati: ‘Lityitei, kalei ovanyingi; yulisei ohi amwiitumina; tuminei ombisi melunga, neevi vivavala meulu, novipuka aviho vina omwenyo vieenda-enda kombanda yohi.”’

Otyo okuti: Huku waavela ovanthu otyilinga tyokutumina ovinyama.

Onombalulo 31:28: ‘Povipuka waeta kovilwa . . . , elilimu, povanthu 500 upola-po wike, no ponongombe, no povimbulu, no ponongi.”

Otyo okuti: Tyati ovanthu, ovinyama, aviho vala onohande.

Omihe 12:10: “Omuviuki utekula nawa ovipako viae.”

Otyo okuti: Ovanthu vokukahi nawa vatekula nawa ovinyama, neevi umwe viokutekulwa.

Mateusi 10:29: “Oviila vivali ovitutu, kavilandeswa vala ombongo ike yotyivela yehesilivila-le? Mahi soka, poviila ovio natyike tyitokela pohi Tate yenyi ehetyimono.”

Otyo okuti: Huku ovinyama uviete, usuka navio — noviila umwe ovitutu.

a Opo utyinoñgonoke vali tanga okapitulu 6 momukanda Oityi Ombimbiliya Itulongesa?