Omukanda W’Ononkhalamutwe mb’Onombangi mba Siovaa

“Onwe pahe ñgeno ñgaa muvalongesi.” (Heb. 5:12) Nkhele soka! Siovaa, Omulongesi omunene mouye auho, utwiita tulongese vakwetu tyiyemba kwe! Otyilinga twamapewa tyokulongesa otyili tyiyemba ku Siovaa, mombunga, mewaneno, no movilinga viokwivisa, elao limwe enene, twesukisa okutyifwisapo. Oityi matulingi tutyifwisepo?

Ekumbululo tulivasa monondaka omutumwa Paulu ahonekelele Timotiu, mbati: “Wahayekeko lipaka umwe mo tyokutangela povaunyingi, nokulondola, nokulongesa, atee ame ndyiya.” Paulu tupu ati vali: “Okutyilinga otyo, matyiti umwe noove mwene moyovoka, naava vekutehelela mavayovoka.” (1 Tim. 4:13, 16) Onondaka una mbuyovola ovanthu, usukisa okumbupopila vakwenyi. Otyo wesukisila okulilonga okutanga nokulongesa. Ombulusula ei yalingwa opo ikukwateseko okutyilinga. Tala etyi tyikahi ombulusula ei.

Otesitu ivasiwa ponthyimbi ya kese nthele, yelikwata nelongeso liatyo, pamwe ipopia etyi tyalingile omunthu umwe kohale

Siovaa “Omulongesi Omunene.” (Isa. 30:20) Namphila ombulusula ei maikukwatesako okulilonga okutanga nokulongesa, wahalimbweko, etyi tulongeswa tyitunda ku Siovaa, weeta ovanthu kwe. (Swau 6:44) Ngotyo, apeho likwambela omwiiti ononkhono mbae. Longesa apeho n’Ondaka ya Huku. Kwatesako ovanthu vasoke ku Siovaa, avahatale vala mwoove. Kwatesako ovateheleli vahumbe Siovaa.

Ove wapewa elao liokulongesa otyipuka tyimwe otyinene, tyehenepewale omunthu. Twayumba-ko onthumbi, ine utala vala “kononkhono mbutunda ku Huku,” motyivili. — 1 Pet. 4:11.

Ovalongesi vakwenyi,

Ononkhalamutwe mb’Onombangi mba Siovaa