Okuti Upondola Okuyumba Onthumbi Mongeleya Konthele Yovita?
Alberto wakala movita omanima alamba pekwi. Wati: “Onkhalamutwe yetu yongeleya ankho utuyamba, ati, ‘Huku akale noonwe.’ Mahi ame ankho ndyilipula okuti: “Ame ndyikaipaa, mahi Ombimbiliya yati “kupondola okuipaa.”’”
Ray ankho etolopa liomelunga Movita Viavali Viouye Auho. Wapula onkhalamutwe yokapela okuti: “Ove uya muno mombapolo iya olikuambelelako omatolopa opo afinde. Okuti onondyale navo hatyo vekahi nokulinga?” Onkhalamutwe yokapela akumbulula okuti Tatekulu ulinga ovipuka monkhalelo tuehevili okunoñgonoka.
Inkha ekumbululo olio kaliekuhambukisilwe, have vala.
OITYI OMBIMBILIYA ILONGESA?
Jesus wapopile okuti otyitumino tya Huku tyavilapo vali otyetyi, “kala nohole na mukuenyi ngetyi ulihole ove muene.” (Marcos 12:31) Okuti Jesus ankho wati tuna okukala vala nohole namunthele yetu tyina twii apa akala ine otyilongo tyae? Au. Watolela ovalongwa vae okuti: “Moluotyo, ovanthu aveho mavaimbuka okuti muvalongwa vange inkha mukala nohole pokati kenyi.” (João 13:34, 35) Ohole vena navakuavo ankho yakolela unene, ankho ipondola okutalwa ngatyina enyingilikilo. Ankho vafuapo pala okuava omuenyo wavo opo vayovole vakuavo tyipona okuveipaa.
Ovakristau votete ankho vaendela monondaka mba Jesus. Omukanda umwe upopia konthele yonongeleya wati: “Ovohe votete vongeleya, okukutikinyamo Tertullian na Origen, ankho vapopia okuti Ovakristau vahongiliywa okuipaa ovanthu, otyo ankho vehelipakela movita vio Roma.”
ONOMBANGI MBA JEOVA VALINGA ÑGENI?
Onombangi mba Jeova vekahi movilongo aviho, moluotyo tyina omalongo evali eliyele, Onombangi mba Jeova momalongo oo vamona emone. Mahi nongotyo, valinga atyiho vevila opo vatualako nenyingilikilo liavo liohole.
Okuti ononkhalamutwe mbonongeleya valongesa ohole yotyotyili Yovakristau?
Mongeleka, menima 1994 etyi mo Ruanda muakalele ovilwa pokati kova Hutu nova Tutsi, Onombangi mba Jeova kavelipakele movilwa ovio. Onombangi vomuhoko umwe vapakele omuenyo wavo motyiponga pala okuamena Onombangi vomuhoko omukuavo. Etyi Onombangi vevali ova Hutu vokuaholekele ovakuatate vavo ova Tutsi vavasiwa, omatolopa ova Hutu Interahamwe vati: “Onwe muna okuipawa mokonda muakuatesako ova Tutsi okuenda nkholo.” Iya Onombangi ovo vevali ova Hutu avaipawa.—João 15:13.
Oityi usoka: Okuti etyi Onombangi mba Jeova valinga tyelikuata nonondaka mba Jesus konthele yokukala noluembia luotyotyili?