Onondaka Onongwa Pala Ovanthu Aveho

Etutilo lia Jesus liayawisile ekolelo nombili yovalongwa vae. Apostolu Paulu walingile oungendi motyilongo atyiho tyo Asia Menor, no Mediterrânio, okuonganeka omawaneno nokupameka Ovakristau opo vakale tyapama momuvo wovitateka, natyina vamoneswa emone. Namphila ankho vena ovitateka ovio, ovanthu ovanyingi vakala Ovakristau.

Konyima, Paulu apakwa mokaleya. Tyotyili, namphila ankho ekahi mokaleya, Paulu wahonekele omikanda pala okupameka nokuavela onondonga omawaneno Ovakristau. Walondolele okuti ovanthu ovanyingi mavayapuka metavelo liotyotyili. Nehongolelo liononkhono mba Huku, Paulu wapopile okuti pokati kavo mapanyingila “omahunyu omakalavi” avapopi “ovipuka viahaviukile” iya “avakokela ovalongwa kuvo.”​—Atos 20:29, 30.

Konthyulilo yotyita tyotete, ovanthu avahimbika okuyapuka motyili. Pomuvo opo omututiliswa Jesus waavelele apostolu João eholololo, otyilekeso tyovipuka mavikamoneka komutwe. Moluotyo, João wahonekele okuti, onondyale novalongesi vomatutu kamavetyivili okutyilika Huku okufuisapo etyi ankho ahandela ohi novanthu. “Omalongo aeho nomihoko, nomalaka, novanthu” mavekeiva onondaka onongwa konthele Youhamba wa Huku. (Revelação 14:6) Ohi maikakala vali Omphangu Yombembwa, iya aveho valinga ehando lia Huku vapondola okukakalamo!

Okuti kuove ombo “onondaka onongwa”? Inkha onondaka onongwa, lilongesa vali konthele yetyi Huku apopila ovanthu tyivasiwa Mombimbiliya, noñgeni upondola okupolako ouwa pahetyino nokomutue.

Upondola okutanga Ombimbiliya mo Internete www.jw.org. Tupu upondola okutalamo onombrochula A Bíblia​—Qual É a sua Mensagem?, Onondaka Onongwa mba Huku! nomukanda Oityi Ombimbiliya Tyili Ilongesa? nomikanda omikuavo vipopia omokonda yatyi tupondola okuyumba onthumbi Mombimbiliya, noñgeni tupondola okuundapesa onondonga mbayo mombunga no momuenyo wetu. Ine wiita Ombangi imwe ya Jeova opo ekukuateseko.

​—Yapolwa mu Atos, Efésios, Filipenses, Colossenses, Filêmon, 1 João, Revelação.