Omokonda Yatyi Huku Ayekela Ovatumini Valinge Onya Ovanthu?

Ombimbiliya ipopia konthele yovanthu vamwe valingilwe onya novatumini. Ongeleka imwe oya Nabote.a Akabe, ankho ohamba yo Isilayeli motyita 10 P.K.E., wayekele omukai wae Jezabele aipae Nabote novana vae opo ohamba ipinge omivinyu viae. (1 Reis 21:1-16; 2 Reis 9:26) Omokonda yatyi Huku ayekela ohamba oyo ilinge ngotyo?

Tutale ehunga limwe liakolela: Huku kapondola okukemba. (Tito 1:2) Oñgeni otyo tyelikuata notyituwa otyivi tyokulinga onya ovanthu? Konthyimbi, Huku walondolele ovanthu okuti oumphuki maweeta ononkhia. Ngetyi Huku apopile, tunde poumphuki walingilue motyikunino tyo Endene, ovanthu vekahi nokunkhia. Omulume wotete wankhia mokonda yokualingwa onya o Abele, etyi aipawa nomukulu wae Kaim.​—Gênesis 2:16, 17; 4:8.

Ondaka ya Huku yapopia konthele yetyi ovanthu vekahi nokulinga tunde pomuvo opo okuti: “Omunthu utumina omunthu mukuavo pala okulimonesa ononkhumbi.” (Eclesiastes 8:9) Okuti otyo otyili? Jeova walondolele ovanthu vae, elongo lio Isilayeli okuti maveliyave kwe mokonda yonya mavalingwa no nohamba mbavo. (1 Samuel 8:11-18) Alo umwe Ohamba Salomau walingile unene onya ovanthu vae. (1 Reis 11:43; 12:3, 4) Onohamba ononkhalavi, nga Akabe, valingile vali unene onya ovanthu. Pahe tala: Inkha Huku watyilikile ovatumini, opo vahalinge onya vakuavo, okuti ñgeno ngotyo kakembele?

Tupu, hinangela okuti Satanasi wapopia okuti ovanthu vaumbila vala Huku mokonda yelungavi. (Jó 1:9, 10; 2:4) Inkha Huku uyakulila ovaumbili vae konya valingwa, okuti ñgeno katyalekesile okuti Satanasi wapopia otyili? Tupu inkha Huku uyakulila ovanthu konya valingwa, okuti ñgeno hae uvelwa onombei mokonda yomatutu a Satanasi? Inkha ovanthu vayakulililwe ngotyo, ñgeno ovanyingi vahimbika okupopia okuti, ovanthu vapondola okulitumina nawa tyehena Huku. Mahi Ondaka ya Huku ipopia okuti ovanthu kavetyivili okulitumina. (Jeremias 10:23) Tuesukisa Ouhamba wa Huku mokonda oo vala maukamanako onya ovanthu valingwa.

Okuti otyo tyilekesa okuti Huku kesuku tyina tulingwa onya? Au. Tala ovipuka vivali alinga: Tete, uhololola omokonda yatyi ovanthu valingila onya vakuavo. Mongeleka, Ondaka yae ihololola atyiho Jezabele alinga opo aipae Nabote. Ombimbiliya ipopia okuti ovituwa ovio ovivi vilingwa nomutumini umwe omunene uhahande okulihololola. (João 14:30; 2 Coríntios 11:14) Mahi Ombimbiliya yemuhololola, utiwa o Satanasi Eliapu. Etyi Huku ahololola ovivi, nonya, nou uvietako, wetukuatesako opo tulityilikevio. Ngotyo, ukahi nokutuyakulila opo tukakaleko apeho.

Vali, Huku walaa okuti onya maikapuako. Onkhalelo Huku ahololola ekoyeso, nehitiso lia Akabe na Jezabele, no liovanthu ovanyingi valingile ngavo, itukalesa nonthumbi yokuti nthiki imwe makahanyako ovanthu aveho onondingavivi. (Salmo 52:1-5) Tupu, Huku walaa okuti apa katutu, vana vemuhole mekeveyovola kononkhumbi ambuho mbutuka kovivi noko onya ovanthu valingwa.b Omulume wekolelo Nabote, apa katutu makamona vali ovana vae momphangu yombembwa pano pohi, iya makakalako apeho mouye muhena vali ovivi.​—Salmo 37:34.