Otyituwa Tyokutambula Nawa Ovaenda Tyakolela Unene!

1. Ovitateka patyi Ovakristau vakalele navio potyita tyotete?

MOKUEENDA kuenima 62 alo 64, apostolu Petulu wahonekela “onongendi ankho veliyandyana ko Pontu, no Galasia, no Kapadosia, no Asia, no Bitinia.” (1 Pedro 1:1) Ovakuatate ovo no nomphange ankho vatunda movilongo vielikalaila. Ankho vekahi “nokumoneswa ononkhumbi” iya ankho vesukisa okupamekwa nokuhongolelwa. Tupu ankho vekahi momuvo wepuiya. Petulu wahoneka okuti: “Onthyulilo yovipuka aviho ikahi popepi.” Ankho kuakamba vala omanima ehungi pekwi opo Jelusalei ihanyue-po. Oityi tyipondola okuvekuatesako okukoleleya momuvo oo wepuiya unene?—1 Pedro 4:4, 7, 12.

2, 3. Omokonda yatyi apostolu Petulu aavelele ondundo ovakuatate opo vakale notyituwa tyokutambula nawa ovaenda? (Tala olutalatu pefo pahimbikila onthele.)

² Otyipuka tyimwe apostolu Petulu aavelele ondundo ovakuatate vae opo vetyilinge, “okulitambula nawa kese umwe na mukuavo.” (1 Pedro 4:9) Mo Gregu, ondaka “okutambula nawa ovaenda” ihangununa “okukala nokankhenda novanthu uhei.” Mahi Petulu ankho ukahi nokuavela ondundo ovakuatate vae no nomphange, opo vakale notyituwa tyokulitambula nawa “kese umwe na mukuavo” namphila ankho velii-ale iya ankho valingila-le kumwe ovipuka. Oñgeni ankho otyituwa tyokutambula nawa ovaenda matyivekuatesako?

³ Otyo ankho tyipondola okuvekuatesako okukala omapanga. Iya ove? Okuti uhinangela oñgeni welitehelele etyi omukuatate umwe ekukonga meumbo liae? Tupu, etyi ove wakongele umwe meumbo liove, otyo tyapamekele oupanga wenyi. Onkhalelo ongwa yokunoñgonoka nawa ovakuatate vetu no nomphange, okuvetambula nawa. Ovakristau pomuvo wa Petulu ankho vesukisa okupameka oupanga wavo mokonda ovitateka ankho vikahi nokuliyawisa. Mononthiki mbuno “mbonthyulilo,” nonthue tuesukisa okulinga ngotyo.—2 Timóteo 3:1.

4. Omapulo patyi matulilongesa monthele ei?

⁴ Omononkhalelo patyi tupondola okulitambula nawa “kese umwe na mukuavo”? Oityi tyipondola okututyilika okutambula nawa ovaenda iya oñgeni tupondola okuvetambula monkhalelo ikahi vali nawa? Oityi tyipondola okutukuatesako okukala ovaenda vekahi nawa?

ONOMPHITILO MBOKUTAMBULA NAWA OVAENDA

5. Oñgeni tupondola okukala notyituwa tyokutambula nawa ovaenda momaliongiyo etu?

⁵ Momaliongiyo: Jeova kumwe neongano liae vetukonga opo tuende komaliongiyo. Onthue tuhanda ovanthu aveho veya komaliongiyo etu velitehelele nawa, haunene ovape. (Romanos 15:7) Ovape, navo ovaenda va Jeova, ngotyo tuna okuveliepesa nawa, tyihatale konkhalelo vekahi ine vavala. (Tiago 2:1-4) Inkha ove waimbuka okuti omunthu omupe weya aike meliongiyo, okuti upondola okumukonga opo upumphame nae? Mekupandula unene inkha umukuatesako okunoñgonoka oñgeni eliongiyo likahi, ine okuvasa onotestu mo Mbimbiliya. Oyo onkhalelo imwe yakolela “yokulandula otyituwa tyokutambula nawa ovaenda.”—Romanos 12:13.

6. Haunene, ovalie tuna okutambula nawa?

⁶ Vakalie meumbo lietu: Kohale, ovikando ovinyingi ovanthu ankho valekesa okuti vatambula nawa ovaenda mokuveavela okulia, iya otyo ankho tyilekesa okuti vahanda okukala omapanga avo, tupu vahanda okukala nombembwa navo. (Gênesis 18:1-8; Juízes 13:15; Lucas 24:28-30) Ovalie tuna okutambula vali nawa? Tuna okutambula vali nawa ovakuatate vomewaneno. Putyina ovivi viliyawisa, matusukisa okupameka oupanga wetu no vakuatate iya nokukala ovakuatyili kuvo. Mo 2011, Ononkhalamutwe mbo Nombangi mba Jeova vapilulula omuvo wokulilongesa Omutala Womulavi mombunga Yombetele yo mo Estados Unidos, ankho lilingwa ko 18:45, mahi pahe lilingwa ko 18:15. Omokonda yatyi? Omokonda otyo ankho matyikuatesako ovakuatate vaundapa mo Mbetele okupameka oupanga wavo tyina eliongiyo liamapu liwa. Ono Mbetele ononkhuavo nambo otyo mbalinga. Oyo, onkhalelo imwe ikahi nawa ovakuatate vaundapa mo Mbetele vapondola okulinoñgonoka vali nawa.

7, 8. Oñgeni tupondola okutambula nawa ovakuatate veya okulinga omalongomona mewaneno lietu?

⁷ Pamwe ovakuatate vo mawaneno omakuavo veya okulinga omalongomona mewaneno lietu. Vamwe ovatalelipo vomawaneno iya ovakuavo ovatumwa vo Mbetele. Okuti tupondola okuundapesa omuvo oo opo tutambule nawa ovakuatate? (Tanga 3 João 5-8.) Onkhalelo imwe ikahi nawa, okuvekonga opo tukalie navo meumbo lietu.

⁸ Omphange umwe wo ko Estados Unidos wapopia okuti: “Mokueenda kuomanima omanyingi, ame nomulume wange ankho tukonga ovakuatate veya okulinga omalongomona mewaneno lietu novakai vavo.” Omphange oo welitehelela okuti otyo tyapamekele unene ekolelo liavo iya ankho tyivehambukiswa unene. Ayawisako okuti: “Nalumwe tuelivelele.”

9, 10. (a) Pamwe ovalie tuesukisa okukala navo meumbo lietu omuvo umwe? (b) Okuti vana vena onondyuo ononthutu navo vapondola okukuatesako? Popia ongeleka.

⁹ Ovaenda vakala omuvo umwe: Kohale, ankho tyakaka unene ovaenda okukala omuvo umwe potyilongo tyimwe. (Jó 31:32; Filêmon 22) Hono, pamwe nonthue tuesukisa okulinga ngotyo. Ovatalelipo vomawaneno apeho vesukisa ondyuo omu vena okukala tyina vatalelapo ewaneno limwe. Ovakuatate valongeswa monosikola mbumwe Mbouhamba, na vana vatunga onondyuo Mbouhamba navo vesukisa ondyuo apa vena okukala. Iya vana vesala tyihena onondyuo mokonda yoviponga vimwe? Navo vesukisa apa vena okukala tyina onondyuo mbavo mbuviukiswa. Katupondola okusoka okuti vana vena onondyuo ononene ovo vala vena okuvetambula. Hamwe ovakuatate ovo vetyilingile-ale ovikando ovinyingi. Okuti upondola okutambula ovakuatate ovo mondyuo yove namphila onthutu?

¹⁰ Omukuatate umwe ukala ko Coréia do Sul, uhinangela etyi ovakuatate vamwe ankho vekahi nokulongeswa mosikola imwe Youhamba vakala omuvo umwe mondyuo yae. Wapopia okuti: “Ponthyimbi, ankho hihande mokonda tuelinepa vala pahe iya ondyuo yetu onthutu. Mahi okukala novakuatate ovo, ankho otyipuka tyihambukiswa unene. Mokonda ankho tuelinepa pahe, tuaimbuka oñgeni otyinepo tyipondola okukala vali nehambu tyina ovalinepi vaumbila kumwe Jeova, nokuovola ononkhalelo ononkhuavo mbokuundapa vali movilinga viae.”

11. Omokonda yatyi ovakuatate no nomphange ovape mewaneno liove vesukisa okutambulwa nawa?

¹¹ Ovakuatate ovape mewaneno lietu: Ovakuatate vamwe no nomphange ine onombunga mbumwe vapondola okuilukila mewaneno lietu. Hamwe mewaneno lietu muesukisa ekuateso. Ine hamwe ovakokoli-ndyila vatumwa opo vaundape mewaneno lietu. Olio epiluluko enene kuvo. Vena okutyiliya otyilongo otyipe, newaneno epe, iya alo umwe pamwe vena okulilongesa elaka epe novituwa ovipe. Okuti upondola okuvekonga opo veye okulia meumbo liove ine okukaenda-enda navo? Otyo matyivekuatesako okukala nomapanga omape iya avetyiliya onkhalelo omphe yomuenyo wavo.

12. Ongeleka patyi ilekesa okuti katyesukisile okupongiya ovipuka ovinyingi opo tutambule nawa ovaenda?

¹² Ove kuesukisile okupongiya ovipuka ovinyingi opo utambule nawa ovaenda. (Tanga Lucas 10:41, 42.) Omukuatate umwe uhinangela etyi tyaendele etyi vakala onomisionaliu. Wati: “Ankho tuvakuendye, tutupu ounongo iya ankho tuivaluka unene. Otyinthiki tyimwe omukai wange ankho waivaluka unene iya ankho hetyivilile okumukengelela. Etyi tyehika 19:30, omunthu umwe atotola pepito lietu. Ankho omuhikuena omulongwa wo Mbimbiliya weya okutuliepesa iya wetuetela omalalandya etatu. Atumupopila opo anyingile iya atumuavela okopo yomeva. Konyima atumuavela osaa no sokolate yatokota. Ankho katutyivili okupopia elaka lio Suaíli, tupu nae ankho ketyivili okupopia o Ingelesi.” Omukuatate wapopia okuti otyo tyevekuatesako okulinga oupanga novakuatate iya atyivekalesa nehambu.

UHAYEKE NATYIKE TYIKUTYILIKE OKUTAMBULA NAWA OVAENDA

13. Oñgeni okutambula nawa ovaenda tyipondola okukukuatesako?

¹³ Okuti nthiki imwe waanyene-ale okutambula omueenda? Inkha ongotyo, ove wapumbilwe omphitilo yokukala nehambu, nokulinga omapanga omanene. Okutambula nawa ovaenda onkhalelo yakolela opo uhakale nounye. No ngotyo, omokonda yatyi pamwe omunthu umwe aanyena okutambula ovaenda? Pena omahunga amwe.

14. Oityi tupondola okulinga inkha tutupu omuvo, nononkhono mbokutambula nawa ovaenda ine okutavela tyina tukongwa?

¹⁴ Omuvo, no nonkhono: Ovaumbili va Jeova vena ovilinga ovinyingi. Ovanthu vamwe velitehelela okuti vetupu omuvo utuuka opo vatambule ovaenda. Inkha ulitehelela ngotyo, hamwe wesukisa okupilulula ovipuka ulinga opo ukale nomuvo wokutambula nawa ovaenda, tupu nokutavela tyina ukongwa. Otyo tyakolela unene mokonda Ombimbiliya itulunda tukale ovanthu vokutambula nawa ovaenda. (Hebreus 13:2) Ngotyo, okutambula nawa ovaenda otyipuka otyiwa tuna okulinga. Mahi opo ulinge ngotyo, wesukisa okulityilika okupesela omuvo movipuka vihena esilivilo.

15. Omokonda yatyi vamwe velitehelela okuti kavapondola okutambula ovaenda?

¹⁵ Onkhalelo ove ulitehelela: Okuti nthiki imwe ankho uhanda umwe okutambula ovaenda mahi olitehelela okuti kuafuilepo? Hamwe omokonda kupopi unene iya usoka okuti ovaenda kamavelitehelela nawa. Ine hamwe utupu onombongo iya usoka okuti kumaavela etyi ovaenda vesukisa ngo vakuatate ovakuavo. Mahi hinangela okuti ondyuo yetu kayesukisile okukala novipuka oviwa unene. Ovaenda mavakala vala nehambu inkha eumbo liove liasukuka nawa, nokuaonganekwa nawa iya tupu inkha uyola navo.

16, 17. Oityi upondola okulinga inkha usukalala unene novaenda?

¹⁶ Inkha usukalala unene mokonda yokutambula ovaenda, haveko vala. Omukulu umwe wewaneno utiwa Britain wati: “Tyisukalalesa unene okulipongiya pala okutambula ovaenda. Mahi otyo tyikahi ngo kuumbila Jeova, ouwa utundililako omunene. Pamwe ankho ndyihambukwa mokonda vala yokunwa okafe novaenda, otyo tutomphola.” Apeho otyiwa okulekesa okuti tusuka novaenda. (Filipenses 2:4) Ovanthu ovanyingi vetyihole tyokupopia konthele yonongeleka mbavo iya onkhalelo imwe yokutehelela onongeleka mbavo o putyina tukala kumwe navo. Omukulu omukuavo wewaneno, wati: “Okukonga omapanga ange o mewaneno opo veye meumbo lietu tyankhuatesako okuvenoñgonoka vali nawa, haunene onkhalelo vanoñgonoka otyili.” Inkha ulekesa okuti wesuka novaenda, upondola okukala nonthumbi yokuti aveho mavapande unene etyi uvelingila.

¹⁷ Omphange umwe omukokoli-ndyila, ankho utambula ovakuatate valongeswa ko nosikola Mbouhamba, wati: “Ponthyimbi ankho nasukalala unene mokonda ndyitupu ovipuka ovinyingi iya mondyuo yange muna vala ovityuma ndyihole okupewa. Omphange umwe wanepua nomukuatate ulongesa monosikola Mbouhamba wamphameka. Wamphopila okuti mokonda yovilinga viavo, apeho valinga oungendi iya etyi vapanda vali moungendi valinga, okukala novakuatate vena oupanga wapama na Jeova, namphila vehena ovipuka ovinyingi. Wayawisako okuti ovakuatate ovo, vena olusoke ngo luetu luokuumbila Jeova, nokutualako okutyinda omuenyo wapola pokati. Etyi omphange oo apopia tyanthyinangelesa etyi me yange ankho etupopila puetyi ankho tuvana: ‘Hahe vali pana paliwa onombi, mahi otyo pena ohole.’” (Provérbios 15:17) Uhasukalale unene, mokonda tyakolela vali okulekesa ohole kovakuatate vetu.

18, 19. Oñgeni okutambula nawa ovaenda matyitukuatesako okulityilika omalusoke apenga konthele ya vakuetu?

¹⁸ Onkhalelo utala vakuenyi: Okuti mewaneno liove muna omukuatate ukunkhisa onyengo? Inkha kulingi ononkhono mbokukala nomalusoke aviuka konthele yae, omalusoke oo matualako. Ove kumakongo omunthu muhelivili nae opo eye meumbo liove. Ine hamwe omunthu umwe wekulingile otyipuka tyekunumanesile kohale iya pahe kukahi nokutyilimbwa.

¹⁹ Ombimbiliya ipopia okuti ove upondola okupameka oupanga wove na mukuenyi, alo umwe upondola okukala noupanga ukahi nawa nonondyale mbove, inkha uvetambula nawa. (Tanga Provérbios 25:21, 22.) Inkha ukonga omunthu umwe meumbo liove, tyipondola okukukuatesako okukala nolusoke luaviuka konthele yae iya amukala omapanga. Matyikukuatesako okumona ovituwa oviwa Jeova amona mwe etyi emukokela motyili. (João 6:44) Tyina ukonga meumbo liove omunthu ankho uhakevelela umukonge, mamukala noupanga wapama nae. Oñgeni upondola okukala nonthumbi yokuti ohole oyo ikahi nokukulunda okumukonga? Onkhalelo imwe okuendela monondonga tuvasa mu Filipenses 2:3: “Nomutima weliola, talei vakuenyi ngatyina ovanene vali kuonwe.” Tuna okusoka oñgeni ovakuatate vetu no nomphange ovanene vali kuonthue. Hamwe tuelilongesila konkhalelo yavo yokukoleleya, ine hamwe vena ovituwa vio Vakristau. Okusoka kovituwa oviwa ovakuatate vetu vena, matyiyawisa ohole tuna navo iya matyitupepukila okuvetambula nawa.

KALA OMUENDA UKAHI NAWA

20. Omokonda yatyi iya oñgeni tupondola okulekesa okuti tuyumbwa onthumbi tyina tukongwa?

²⁰ David wapulile okuti: “Ove Jeova, olie upondola okukala mondyuo yove?” (Salmo 15:1) Konyima, David apopi ovituwa Jeova ahandela vana vakala ovaenda mondyuo yae. Otyituwa tyimwe David apopia, okukala omunthu uyumbwa onthumbi, una “ufuisapo omulao wae, alo umwe tyina tyimuetela ovitateka.” (Salmo 15:4) Inkha tutavela tyina tukongwa, katupondola okuhafuisapo etyi tualaa inkha tutupu ehunga liakolela pala okutyilinga. Una wetukonga hamwe welipongiya-le opo etutambule nawa, ngotyo inkha katuende, ononkhono alinga opo apongiye ovipuka aviho mambupeseka. (Mateus 5:37) Vamwe kavaende oku vakongwa tete, mokonda vakongwa vali kokukuavo oku vasoka okuti kukahi vali nawa. Okuti ngotyo tukahi nokulesa ohole, nonthilo navakuetu? Tuna okupandula atyiho tupewa na vana vetukonga. (Lucas 10:7) Inkha katyitavela okuenda oku tuakongwa, matulekesa ohole, inkha tupopila una wetukonga okuti kamatuya.

21. Oñgeni okulekesa onthilo novituwa vio motyilongo tyitukuatesako okukala ovaenda vekahi nawa?

²¹ Tupu, tyakolela unene okulekesa onthilo novituwa vio potyilongo. Movilongo vimwe, ovanthu vatambula nawa ovaenda ankho vahakevelela. Mahi movilongo ovikuavo, tyakolela okupopila vana tuhanda okukatalelapo. Tupu movilongo vimwe, ovaenda vapewa okulia kukahi vali nawa tyipona vomeumbo. Mahi movilongo ovikuavo, ovaenda vatekulwa monkhalelo ike vala nombunga. Movilongo vimwe, ovaenda vaeta ovipuka vimwe tyina vakongwa. Mahi movilongo ovikuavo, vana vakonga kavahande ovaenda vaetelele otyipuka tyimwe. Movilongo vimwe, tyina ukongwa otyikando tyo tete no tya vali kupondola okutavela. Mahi movilongo ovikuavo, otyivi unene okuhetavela tyina ukongwa otyikando tyo tete. Apeho tuna okulinga ononkhono opo omunthu wetukonga akale nehambu liokutukonga.

22. Omokonda yatyi tyakolela unene ‘okutambula nawa ovaenda’?

²² Apostolu Petulu wati: “Onthyulilo yovipuka aviho ikahi popepi.” (1 Pedro 4:7) Apa katutu ononkhumbi ononene mambuhimbika. Putyina ovivi vitualako okuliyawisa, matusukisa okuyawisa ohole tuna novakuatate no nomphange. Haunene hono, tuesukisa okuendela monondonga mba apostolu Petulu mbati: “Tambulei nawa ovaenda.” (1 Pedro 4:9) Tyotyili, okutambula nawa ovaenda tyihambukiswa iya tupu tyilinga onthele yomuenyo wetu.