Oku Yesu Arikutwara Eiziina rya Yehova

1-2. (a) Yesu akakora ki omu kiro eki yaakwatiirweho? (b) Nituza kugarukamu bibuuzo ki omu kicweka eki?

RUKABA ruri Orwakana omu mwabazyo gwa Nisani 14, 33 Y.A.K., kandi Yesu akaba yaaheza kurya ekiihuro ky’omutaano n’abeegi be abeesigwa omu kishengye eky’ahaiguru. Omwe aha beegi be akaba ari haihi kumureebya, akacwerwa orubanja, akabonabonesibwa, kandi akaitwa. Bwanyima y’ekiihuro, Yesu akagambira abeegi be ebigambo by’ahamuheru eby’okubagumya. Kandi bari hakye kuruga omu kishengye ekyo, Yesu akashaba arikukoresa ebigambo bikuru munonga ebi Entumwa Yohaana yaahandikire omuri Yohaana eshuura 17.

² Kurugiirira aha kushaba okwo, niki eki Yesu yaabaire ayerarikiriireho omu bwire obwo? Kandi niki eki yaabaire naatwara nka kikuru omu buheereza bwe bwona omu nsi? Ka tushwijume eby’okugarukamu by’ebibuuzo ebyo.

“NKABAMANYISA EIZIINA RYAWE”

3. Yesu akagamba ki aha eiziina rya Yehova, kandi akaba naamanyisa ki? (Yohaana 17:​6, 26)

³ Obu Yesu yaabaire naashaba akagira ati: “Nkabamanyisa eiziina ryawe.” Enshonga nkuru egi akagigambaho emirundi ebiri. (Shoma Yohaana 17:​6, 26.) Mbwenu shi akaba naamanyisa ki? Tugire ngu abeegi be bakaba batarikumanya eiziina eryo? Ngaaha, abeegi be bakaba bari Abayudaaya n’ahabw’ekyo bakaba nibamanya eiziina rya Ruhanga Yehova. Eiziina eryo rikaba rihandiikirwe omu Bihandiiko by’Oruheburaayo emirundi mingi. N’ahabw’ekyo Yesu akaba atarikugamba aha eiziina eryo kyonka, kureka aha ki eiziina eryo ririkujwekyera. Yesu akahwera abeegi be kwongyera kumanya Yehova, ebigyendererwa bye, ebi yaakozire, n’emitwarize ye, kukira omuntu ondiijo weena.

4-5. (a) Shoboorora oku eiziina ry’omuntu ririkubaasa kwongyera kuba rikuru ahariiwe? (b) Ni miringo ki eyaahwereire abeegi ba Yesu kwongyera kumanya eiziina rya Yehova?

⁴ Teekateeka aha ky’okureeberaho eki, ka tugire ngu omu kibiina kyanyu harimu omureeberezi orikwetwa David kandi n’omushaho. Obundi otwire noomumanya kumara emyaka mingi. Kwonka eizooba rimwe ohikwaho embeera erikwetengyesa obujanjabi bw’ahonaaho. Reero bakutwara omu irwariro ahu ow’eishe-emwe ogwo arikukorera, kandi ahabw’okugira ngu n’omushaho omukugu, ajuna amagara gaawe. Kuruga aha izooba eryo, David nooba otakimureeba nk’omureeberezi kyonka kureka nk’omushaho owaajunire amagara gaawe.

⁵ Omu muringo nigwo gumwe, abeegi ba Yesu bakaba nibamanya eiziina rya Yehova. Kwonka eiziina eryo rikoongyera kugira amakuru ahari bo obu Yesu yaabaire ari omu nsi. Ahabw’enki turikugira tutyo? Ahabw’okuba Yesu akooreka gye emitwarize y’Ishe omuri buri kimwe eki yaakozire n’eki yaagambire. N’ahabw’ekyo entumwa ze bakoongyera kumanya gye Yehova barikureeba oku Yesu yaabaire naayegyesa, n’okwetegyereza oku yaabaire naatwariza abantu.—Yoh. 14:9; 17:3.

‘EIZIINA RYAWE ERI WAMPAIRE’

6. Yesu akaheebwa eiziina rya Yehova mu muringo ki? (Yohaana 17:​11, 12)

⁶ Obu Yesu yaabaire naashabira abeegi be akagira ati: “Obarindire omu iziina ryawe eri wampaire.” (Shoma Yohaana 17:​11, 12.) Mbwenu shi ekyo kikaba nikimanyisa ngu Yesu akaba naaza kutandika kwetwa eiziina Yehova? Ngaaha. Yetegyereze ngu obu yaabaire naashaba akagamba ahari Yehova ati “eiziina ryawe.” N’ahabw’ekyo Yesu tareetsirwe eiziina rya Yehova. Mbwenu shi akaba naamanyisa ki obu yaagira ngu akaheebwa eiziina rya Ruhanga? Eky’okubanza, Yesu akaba ari omujwekyerwa wa Yehova kandi Omugambirizi we. Akaija omu iziina ry’Ishe kandi yaakora n’eby’okutangaaza omu iziina eryo. (Yoh. 5:43; 10:25) Kandi ekindi, eiziina Yesu riine amakuru ngu “Yehova n’okujunwa.” N’ahabw’ekyo eiziina rya Yehova riine akakwate n’eiziina rya Yesu.

7. Shoboorora oku Yesu yaabaire naagamba omu iziina rya Yehova.

⁷ Nk’eky’okureeberaho, ahabw’okugira ngu omujwekyerwa w’eihanga naaba naajwekyera omwebembezi w’eihanga eri arikurugamu, naabaasa kugamba omu iziina rye. N’ahabw’ekyo ebigambo bye nibiba biine obushoboorozi oburikwingana n’obw’omwebembezi w’eihanga eri arikujwekyera. Omu muringo nigwo gumwe, Yesu akajwekyera Yehova, kandi yaagamba n’abantu omu iziina rye.—Mat. 21:9; Luk. 13:35.

8. Eiziina rya Yehova rikaba riri omuri Yesu rita atakaizire omu nsi? (Okuruga 23:​20, 21)

⁸ Omu buheereza bwe nka Kigambo, Yesu aheereize nk’omugambirizi wa Yehova arikuha baamaraika hamwe n’abantu obutumwa n’eby’okukuratira. (Yoh. 1:​1-3) Yesu naabaasa kuba niwe maraika ou Yehova yaayohereize kuhwera Abaisraeli obu baabaire bakiri omu ihamba. Yehova ku yaabaire naagambira Abaisraeli kworobera maraika ogwo, akagira ati: “Ahabw’okuba eiziina ryangye riri omuriwe.”a (Shoma Okuruga 23:​20, 21.) Eiziina rya Yehova rikaba riri omuri Yesu ahabw’okugira ngu naamujwekyera, kandi niwe arikwebembera omu kweza eiziina ry’Ishe.

“TAATA, HIMBISA EIZIINA RYAWE”

9. Eiziina rya Yehova rikaba riri rikuru rita ahari Yesu? Shoboorora.

⁹ Nk’oku twaheza kureeba, n’obu Yesu yaabaire atakaizire omu nsi, eiziina rya Yehova rikaba riri rikuru munonga ahariwe. Niyo nshonga ahabw’enki byona ebi yaakozire omu nsi byabaire biine akakwate n’eiziina rya Yehova! Obu Yesu yaabaire ari haihi kuhendera obuheereza bwe omu nsi, akashaba ati: “Taata, himbisa eiziina ryawe.” Ahonaaho, Ishe akamugarukamu omu iraka rihango kuruga omu iguru naagira ati: “Naarihimbisa, kandi ndyagaruka ndihimbise.”—Yoh. 12:28.

10-11. (a) Yesu akahimbisa ata eiziina rya Yehova? (Reeba n’ekishushani.) (b) Ahabw’enki eiziina rya Yehova riine kwezibwa kandi rikajuririrwa?

¹⁰ Yesu nawe akahimbisa eiziina ry’Ishe. Mu muringo ki? Akahwera abantu kwongyera kumanya emitwarize ye erikushemeza n’eby’amaani ebi akozire. Kwonka akakora ekirikukira aha kuhimbisa eiziina eryo. Eiziina rya Yehova rikaba riine kwezibwa kandi rikajuririrwa.b Yesu akooreka oku ekyo kiri kikuru omu kushaba kw’eky’okureeberaho oku yaayegyeise abakuratsi be obu yagira ati: ‘Tataitwe ow’omu iguru, eiziina ryawe ka ryezibwe.’—Mat. 6:9.

¹¹ Ahabw’enki eiziina rya Yehova riine kwezibwa kandi rikajuririrwa? N’ahabw’okugira ngu omu musiri Edeni, Sitaane Omuregi akashiisha eiziina rya Yehova arikumugambaho ebishuba. Akagira ngu Yehova n’omubeihi kandi ngu haine ebirungi ebi yaabaire asherekire Adamu na Haawa. (Kut. 3:​1-5) Sitaane akaba naamanyisa ngu omuringo ogu Yehova arikukoramu ebintu tiguhikire. Ebishuba bya Sitaane ebyo bikaba bigyendereire kushiisha eiziina rya Yehova butunu. Bwanyima omu bwire bwa Yobu, Sitaane akagira ngu abantu nibaheereza Yehova ahabw’ebirungi ebi arikubaha. Kandi akagira ngu tihariho omuntu orikubaasa kugumizamu naaheereza Yehova yaahikwaho oburemeezi. (Yob. 1:​9-11; 2:4) Hakaba haine kuhinguraho obwire kubaasa kumanya ohikire, yaaba ni Sitaane nari Yehova.

“NIMPAYO AMAGARA GANGYE”

12. Yesu akaba ayeteekateekire kukora ki ahabwa rukundo ei yaabaire ainiire eiziina rya Yehova?

¹² Ahabwa rukundo ei Yesu yaabaire ainiire Yehova, akaba ayeteekateekire kukora kyona eki arikubaasa kweza n’okujuririra eiziina rya Yehova. Akagira ati:‘Nimpayo amagara gangye.’ (Yoh. 10:​17, 18) Ekyo nikihamya ngu akaba ayeteekateekire kufeera eiziina rya Yehova.c N’obu Adamu na Haawa baabaire bahikiriire, bakagomera Yehova baaza aha rubaju rwa Sitaane. Kwonka, Yesu we akaikiriza kwija omu nsi yaayoroba kandi akooreka ngu naakunda Yehova arikuguma ari omwesigwa. (Heb. 4:15; 5:​7-10) Akaguma ari omwesigwa ahari Yehova kuhika aha kufeera aha muti. (Heb. 12:2) Okukora ekyo, akooreka rukundo ei ainiire Yehova na iziina rye.

13. Ahabw’enki Yesu niwe yaabaire naabaasa kuhamya ngu Sitaane n’omubeihi? (Reeba n’ekishushani.)

¹³ Omuri byona ebi Yesu yaakozire, akahamya ngu Sitaane niwe omubeihi beitu atari Yehova. (Yoh. 8:44) Yesu akaba naamanya gye Yehova kukira ondiijo weena. Ku ogire ngu ebi Sitaane yaagambire ahari Yehova gakaba gari amazima, Yesu akaakimanyire. Kwonka akaguma amaririire kujuririra eiziina rya Yehova. Obu yaabaire ari haihi kufa, Yehova taramurinzire kutabonabonesibwa. Kwonka nabwo akaba ayeteekateekire kufa omu mwanya gw’okugomera Ishe owa rukundo.—Mat. 27:46.d

“OMURIMO OGU WAMPAIRE KUKORA NGUHIKIRIIZE”

14. Yehova akashumbuusha ata Yesu ahabw’obwesigwa bwe?

¹⁴ Yesu omu kushaba kwe ari haihi kwitwa, akagira ati: “Omurimo ogu wampaire kukora nguhikiriize.” Akaba aine obwesigye ngu Yehova naija kumushumbuusha ahabw’obwesigwa bwe. (Yoh. 17:​4, 5) Yesu akaba ahikire kwesiga Ishe ahabw’okuba taramwikiriize kuguma omu kituuro. (Byak. 2:​23, 24) Akamuzoora kandi yaamuha omwanya mukuru omu iguru. (Fil. 2:​8, 9) Bwanyima, akatandika kutegyeka nk’Omugabe w’Obukama bwa Ruhanga. Obukama obwo nibwija kuhikiiriza ki? Omu kushaba kw’eky’okureeberaho Yesu akagira ati: ‘Obukama bwawe bwije. Ebi [Yehova] akunda, bikorwe omu nsi nk’oku bikorwa omu iguru.’—Mat. 6:10.

15. Niki ekindi eki Yesu araakore?

¹⁵ Omu bwire butari bwa hare, Yesu naija kucwekyereza abazigu ba Ruhanga hamwe n’ababi omu rutaro Haramagedoni. (Kush. 16:​14, 16; 19:​11-16) Bwanyima y’ekyo naija kunaga Sitaane omu “kiina ekitaine bugarukiro,” obutagaruka kuteganisa abantu bundi. (Kush. 20:​1-3) Yesu naija kugaruraho obusingye n’okuhikiirira ahansi y’Obutegyeki bwe obw’Emyaka Rukumi. Naija kuzoora abafu kandi ahindure ensi yoona paradiso. Obwo nibwo ekigyendererwa kya Ruhanga kiraahikiirire.—Kush. 21:​1-4.

16. Ni mbeera ki eziraabeho bwanyima y’Obutegyeki bw’Emyaka Rukumi?

¹⁶ Embeera niziija kuba ziri zita aha muheru gw’Obutegyeki bw’Emyaka Rukumi? Ekibi n’obutahikiirira nibiija kuba bitakiriho, n’ahabw’ekyo abantu nibaija kuba batakyetenga kushaba okusaasirwa ahabw’ebibi byabo kurabira omu kitambo n’obu yaakuba omuhikaanisa nari omunyamurwa. Kandi ‘omuzigu oraahereruke kwihwaho ni rufu.’ Ebituuro nibiija kutsigaramu busha ahabw’okuba abaafiire nibaija kuzooka bagaruke babe abahuriire. Buri omwe omu nsi naija kuba ahikiriire.—1 Kor. 15:​25, 26.

17-18. (a) Niki ekiraabeho aha muheru gw’Obutegyeki bw’Emyaka Rukumi? (b)  Yesu naija kukora ki aha muheru gw’obutegyeki bwe? (1 Abakorinso 15:​24, 28) (Reeba n’ekishushani.)

¹⁷ Aha muheru gw’Obutegyeki bw’Emyaka Rukumi, nihaija kubaho ekintu ekindi eky’omutaano. Enshonga eine akakwate n’okweza iziina rya Yehova neija kuhendera. Ahabw’enki nitugira tutyo? Omu musiri Edeni, Sitaane akagira ngu Yehova n’omubeihi kandi tarikutegyeka abantu omu muringo gwa rukundo. Kuruga obu ekyo kyabaho, eiziina rya Yehova ritwire niryezibwa abarikumuhimbisa n’abarikumuha ekitiinisa kandi bakamujuririra. N’ahabw’ekyo aha muheru gw’Obutegyeki bw’Emyaka Rukumi, eiziina rya Yehova niriija kwezibwa omu bwijwire. Naija kuba ayorekire butunu ngu ni Tataitwe ow’omu iguru owa rukundo.

¹⁸ Aha muheru gw’Obutegyeki bw’Emyaka Rukumi, nikiija kureebwa butunu ngu Sitaane n’omubeihi. Mbwenu shi Yesu naija kukora ki aha muheru gw’Obutegyeki bwe? Naija kutooreza Sitaane agomere Yehova? Ngaaha! (Shoma 1 Abakorinso 15:​24, 28.) Yesu naija kugaruriza Ishe Obukama reero ayete ahansi y’Obutegyeki bwe. Buzima Yesu ayeteekateekire kuhayo buri kimwe eki aine ahabwa rukundo ei ainiire Yehova, eki Sitaane yaaremirwe kukora.

19. Yesu naatwara ata eiziina rya Yehova?

¹⁹ Tikirikutangaaza kureeba ngu Yehova akaba ayeteekateekire kuha Yesu eiziina rye! Yesu akakyoreka butunu ngu niwe yaabaire ahikire kujwekyera Ishe. Mbwenu shi Yesu naatwara ata eiziina rya Yehova? Naaritwara nka rikuru munonga okukira ekindi kintu kyona. Akaba ayeteekateekire kurifeera, kandi ayeteekateekire kugarurira Yehova buri kimwe aha muheru gw’Obutegyeki bwe obw’Emyaka Rukumi. Nitubaasa kutooreza Yesu tuta? Nituza kugarukamu ekibuuzo ekyo omu kicweka ekiraakurateho.