Oku Twine Kutwara Eiziina rya Yehova

1-2. Niki ekirikworeka ngu Yesu akaba naatwara eiziina rya Yehova nka rikuru?

YESU akaba naatwara eiziina rya Yehova nka rikuru kandi niwe arikukirayo kweza eiziina eryo. Nk’oku tureebire omu kicweka eky’enyima, Yesu akaba ayeteekateekire kufeera eiziina rya Yehova. (Mak. 14:36; Heb. 10:​7-9) Kandi bwanyima y’Obutegyeki bwe obw’Emyaka Rukumi, Yesu naija kuba ayeteekateekire kugaruriza Yehova obushoboorozi bwona kubaasa kwongyera kweza eiziina rye. (1 Kor. 15:​26-28) Rukundo ei Yesu ainiire eiziina rya Ruhanga neeyoreka omukago guhami ogu aine nawe, kandi ekyo nikituhamiza ngu naamukundira kimwe.

² Yesu akaija omu nsi kujwekyera Ishe. (Yoh. 5:43; 12:13) N’ahabw’ekyo akamanyisa abakuratsi be eiziina rya Yehova. (Yoh. 17:​6, 26) Akeegyesa abantu, yaakora n’eby’okutangaaza omu iziina rya Yehova. (Yoh. 10:25) Kandi akashaba Ishe kurinda abeegi be ahabw’eiziina rye. (Yoh. 17:11) Mbwenu shi Yesu ku araabe nikwo yaabaire naatwara atyo eiziina ry’Ishe, omuntu yaaba atarikumanya eiziina rya Yehova kandi atarikurikoresa, naabaasa ata kugira ngu n’Omukristaayo owaabuzima?

3. Nituza kugamba ki omu kicweka eki?

³ Itwe Abakristaayo abaabuzima nituteeraho kugyendera omu bigyere bya Yesu n’ahabw’ekyo naitwe nitutwara eiziina ry’Ishe nk’ery’omuhendo. (1 Pet. 2:21) Omu kicweka eki, nituza kureeba oku abarikubuurira amakuru marungi g’Obukama barikwetererwa eiziina rya Yehova. (Mat. 24:14) Nituza n’okugamba aha ku buri omwe ahariitwe ashemereire kutwara eiziina rya Yehova.

ABANTU ‘ABARIKWETERERWA EIZIINA RYE’

4. (a) Ni bujunaanizibwa ki obu Yesu yaahaire abakuratsi be atakagarukire omu iguru? (b) Nitubaasa kwebuuza kibuuzo ki?

⁴ Obu Yesu yaabaire atakagarukire omu iguru, akagambira entumwa ze ati: ‘Nimwija kuheebwa amaani, omwoyo ogurikwera ku guriheza kubaijaho, kandi nimwija kuba baakareebi bangye omuri Yerusaalemu, n’omuri Buyudaaya yoona, n’omuri Samaria, n’okuhitsya aha muheru gw’ensi.’ (Byak. 1:8) N’ahabw’ekyo amakuru marungi gakaba nigaija kubuurirwa n’aheeru ya Israeli. Empereruka, abantu kuruga omu mahanga goona bakaba nibaija kutunga omugisha gw’okuba abakuratsi ba Kristo. (Mat. 28:​19, 20) Kwonka Yesu akagira ati: ‘Nimwija kuba baakareebi bangye.’ Mbwenu shi abakuratsi ba Yesu abasya bakaba baine kumanya eiziina rya Yehova, nari bakaba nibaija kujurira Yesu wenka? Ebirikugambwaho omu Ebyakozirwe eshuura 15 nibituhwera kugarukamu ekibuuzo ekyo.

5. Entumwa n’abakuru omuri Yerusaalemu bakooreka bata ngu abantu boona bakaba baine kumanya eiziina rya Yehova? (Reeba n’ekishushani.)

⁵ Omu gwa 49 Y.A.K., entumwa n’abakuru omuri Yerusaalemu bakeeteeranira hamwe kuhaajaana aha ki Abanyamahanga abatashazirwe baabaire baine kukora kubaasa kuba Abakristaayo. Aha kuhendera kw’ekigaaniiro, Yakobo, murumuna wa Yesu, akagira ati: “[Petero] yaaheza kubateekyerereza oku Ruhanga yaatandikire kutaayaayira Abanyamahanga okutoorana abantu omuribo kuba eihanga eririkwetererwa eiziina rye.” Yakobo akaba naamanyisa eiziina riiha? Arikujuriza ebigambo bya nabi Amosi akoongyeraho ati: “Ngu abantu abaahonokireho basherure Mukama, hamwe n’Abanyamahanga boona abarikwetererwa eiziina ryangye, nikwo [Yehova] arikugira.” (Byak. 15:​14-18) Abeegi abasya bakaba nibaija kwega ebirikukwata ahari Yehova kandi ‘beetererwe eiziina rye.’ Eki nikimanyisa ngu bakaba nibaija kumanyirwa aha eiziina eryo.

6-7. (a) Ahabw’enki Yesu yaizire omu nsi? (b) Ni nshonga ki endiijo enkuru eyaabaire netwarirwa omu kucungura abantu?

⁶ Eiziina rya Yesu nirimanyisa ngu “Yehova n’Okujunwa.” Ekyo nitukihamya ahabw’okugira ngu Yehova niwe arikukoresa kujuna abarikumwikiririzamu. Yesu akaija omu nsi kuhayo amagara ge ahabwaitu. (Mat. 20:28) Ekyo kikabaasisa abantu kucungurwa n’okutunga amagara agatahwaho.—Yoh. 3:16.

⁷ Ahabw’enki abantu baabaire baine kucungurwa? N’ahabw’ekyabaireho omu musiri Edeni. Nk’oku kyorekirwe omu kicweka eky’enyima, abazaire baitu ab’okubanza bakagomera Yehova, baafeerwa omugisha gw’okutuuraho ebiro byona. (Kut. 3:​6, 24) Kwonka, hariho enshonga endiijo eyaabaire netwarirwamu. Eiziina rya Yehova rikaba risiisirwe. (Kut. 3:​4, 5) N’ahabw’ekyo okucungurwa kw’abaijukuru ba Adamu na Haawa kukaba kwine akakwate n’enshonga enkuru, ey’okweza eiziina rya Yehova. Ahabw’okugira ngu Yesu akaba ajwekyeire Yehova, akakora kihango omu kweza eiziina rye.

8. Boona abarikwikiririza omuri Yesu bakaba baine kumanya ki?

⁸ Abayudaaya n’Abanyamahanga abaabaire nibaija kwikiririza omuri Yesu, bakaba baine kumanya obukomooko bw’okucungurwa kwabo, niwe Yehova Ruhanga, Ishe wa Yesu. (Yoh. 17:3) Ekindi, nka Yesu bakaba nibaija kumanyirwa aha iziina rya Yehova. Bakaba baine n’okumanya ahabw’enki ni kikuru kweza eiziina eryo. Ekyo nikyo kyabaire nikiija kubabaasisa kucungurwa. (Byak. 2:​21, 22) N’ahabw’ekyo bakaba baine kwega ebirikukwata ahari Yehova na Yesu. Niyo nshonga ahabw’enki Yesu yaahendeire okushaba kwe okuri omuri Yohaana 17 n’ebigambo ebi: ‘Nkabamanyisa eiziina ryawe, kandi ninyija kurimanyisa, ngu okukunda oku waankunzire, kube omuribo, naanye mbe omuribo.’—Yoh. 17:26.

“MURI BAAKAREEBI BANGYE”

9. Nitubaasa kworeka tuta ngu eiziina rya Yehova ni rikuru ahariitwe?

⁹ Abakuratsi ba Yesu abaabuzima, baine kuteeraho kweza eiziina rya Yehova. (Mat. 6:​9, 10) Baine kurireeba nk’eririkukira amaziina agandi goona. Eki nikimanyisa ngu baine kugira eki baakoraho. Mbwenu shi nitubaasa kukora ki kubaasa kweza eiziina rya Yehova nari kurihaho enziro ezi Sitaane yaarisiigire?

10. Ni kooti ya muringo ki erikugambwaho omuri Isaaya eshuura 42-44? (Isaaya 43:9; 44:​7-9) (Reeba n’ekishushani.)

¹⁰ Obujunaanizibwa bwaitu bw’okweza eiziina rya Yehova nibugambwaho omuri Isaaya eshuura 42-44. Eshuura ezo nizigamba aha kooti y’akamanyiso ahu enshonga y’obwa ruhanga yaabaire neegambwaho. Yehova akashaba boona abarikweyeta baaruhanga kuha obuhame oburikworeka ngu ni baaruhanga abaabuzima. Kandi ngu bareete baakareebi b’okuha obwamushinja. Kwonka tihaine owaabaire naabaasa kukikora!—Shoma Isaaya 43:9; 44:​7-9.

11. Nk’oku kirikworekwa omuri Isaaya 43:​10-12 Yehova akagambira abaheereza be kukora ki?

¹¹ Shoma Isaaya 43:​10-12. Yehova naagamba aha bantu be ati: “Muri baakareebi b’okuhamya ebyangye, . . . niinye” Yehova. Ari nk’orikubuuza ati: “Hariho Ruhanga ondiijo okwihaho nyowe?” (Isa. 44:8) N’ahabw’ekyo, twine omugisha gw’okugarukamu ekibuuzo ekyo. Tuta shi? Turikujuririra Yehova Ruhanga omwe ow’amazima omu bi turikugamba n’omu bi turikukora. Eiziina rye nirikira agandi goona. N’obu Sitaane yaakutugyemesereza ata, nitworeka ngu buzima nitukunda Yehova kandi tumuhamiireho. Twakora tutyo, nituba nituhwera omu kweza eiziina rye.

12. Obunabi oburikushagwa omuri Isaaya 40:​3, 5 bukahikiirira buta?

¹² Twayejumba omu kweza eiziina rya Yehova, nituba nitutooreza Yesu Kristo. Isaaya akagamba obunabi oburikukwata aha waabaire naija kushemeza nari kutebeekanisa omuhanda gwa Yehova. (Isa. 40:3) Obunabi obwo bukahikiirira obu Yohaana Omubatiza yaatebeekanisiza Yesu omuhanda owaizire omu eiziina rya Yehova, kandi akeegyesa omu iziina eryo. (Mat. 3:3; Mak. 1:​2-4; Luk. 3:​3-6) Isaaya akoongyeraho ati: ‘Ekitiinisa kya [Yehova] nikiija kushuuruurwa.’(Isa. 40:5) Ekyo kikahikiirira kita? Yesu ku yaizire omu nsi, akajwekyera Yehova omu muringo guhikiriire orikushusha ngu Yehova niwe yaizire omu nsi.—Yoh. 12:45.

13. Nitubaasa kutooreza Yesu tuta?

¹³ Nka Yesu, naitwe turi abajurizi ba Yehova. Nitwetererwa eiziina rye, kandi tugambira abandi aha birungi ebi akozire. Kwonka kubaasa kuhikiiriza ekyo, twine kugambira abandi omwanya ogu Yesu aine omu kweza eiziina rya Yehova. (Byak. 1:8) Yesu niwe aine omwanya gw’okubanza omu kujuririra eiziina rya Yehova, n’ahabw’ekyo nitumutooreza turikukora nikyo kimwe. (Kush. 1:5) Mbwenu shi buri omwe ahariitwe ashemereire kutwara ata eiziina rya Yehova?

OKU TWINE KUTWARA EIZIINA RYA YEHOVA

14. Nk’oku kirikworekwa omuri Zaaburi 105:​3, eiziina rya Yehova niritureetera kwehurira tuta?

¹⁴ Nitwesimisa eiziina rya Yehova. (Shoma Zaaburi 105:3.) Nikishemeza Yehova twayehimbisiza omu iziina rye. (Yer. 9:​23, 24; 1 Kor. 1:31; 2 Kor. 10:17) ‘Okwehimbisiza omuri Yehova’ nikimanyisa okwesiima ahabw’okugira ngu Yehova ni Ruhanga waitu. Nitugureeba nk’omugisha okuhaisa eiziina rye ekitiinisa n’okwejumba omu kuryeza. Titwine kukwatwa enshoni kumanyisa abantu ngu turi Abajurizi ba Yehova otwariiremu abu turikushoma nabo, abu turikukora nabo, n’abataahi baitu. Sitaane naayenda ngu turekyere aho kugambira abandi aha iziina rya Yehova. (Yer. 11:21; Kush. 12:17) Kandi we na baanabi be ab’ebishuba nibateeraho kwebesa abantu eiziina eryo. (Yer. 23:​26, 27) Kwonka rukundo ei twiniire eiziina rya Yehova neetuhiga kuryehimbisizamu “eizooba ryona.”—Zab. 5:11; 89:16.

15. Okutakira eiziina rya Yehova nikitwariramu ki?

¹⁵ Titurikurekyera aho kutakira eiziina rya Yehova. (Yoel. 2:32; Rom. 10:​13, 14) Okutakira eiziina rya Yehova nikikira aha kurimanya n’okurikoresa. Nituteeraho kumumanya gye, kumwesiga, kandi nitumushaba obuhwezi n’obuhabuzi. (Zab. 20:7; 99:6; 116:4; 145:18) Nitumanyisa abantu eiziina rye n’emitwarize ye, kandi tubahiga kweteisa n’okugira eki baakora kugira ngu babaase kusiimwa Yehova.—Isa. 12:4; Byak. 2:​21, 38.

16. Nitworeka tuta ngu Sitaane n’omubeihi?

¹⁶ Tweteekateekire kubonabonesibwa ahabw’eiziina rya Yehova. (Yak. 5:​10, 11) Twaguma tuhamiire ahari Yehova n’obu twakuba nitubonabona, nitworeka ngu Sitaane n’omubeihi. Omu bwire bwa Yobu, Sitaane akagamba enshonga erikukukwata aha baheereza ba Yehova boona arikugira ati: “Ebi omuntu atungire byona, akaabihayo ahabw’amagara ge.” (Yob. 2:4) Sitaane akagira ngu abantu nibaheereza Yehova omu mbeera nungi zonka, kandi nibamutsigaho baahikwaho oburemeezi. Yobu omushaija omwesigwa akooreka ngu ekyo tikihikire. Nka Yobu, naitwe twine omugisha gw’okworeka ngu ekyo tikihikire turikuguma tuhamiire ahari Yehova n’obu Sitaane yaakutuhitsyaho buremeezi ki. N’ahabw’ekyo nitubaasa kugira obwesigye ngu Yehova naija kuturinda ahabw’eiziina rye.—Yoh. 17:11.

17. Nk’oku kirikworeka omuri 1 Petero 2:​12, ni muringo ki ogundi oku turikubaasa kuhaisa eiziina rya Yehova ekitiinisa?

¹⁷ Nitworeka ngu nituha eiziina rya Yehova ekitiinisa. (Enf. 30:9; Yer. 7:​8-11) Ahabw’okugira ngu nitujwekyera Yehova kandi nitwetererwa eiziina rye, nitubaasa kurihaisa ekitiinisa, nari kurijumisa. (Shoma 1 Petero 2:12.) N’ahabw’ekyo, nitwenda kukora kyona eki turikubaasa kuhimbisa Yehova omu migambire yaitu n’ebi turikukora. Twakora tutyo, nitwija kuhaisa eiziina rya Yehova ekitiinisa n’obu turaabe tutahikiriire.

18. Ni muringo ki ogundi oku turikubaasa kworeka ngu eiziina rya Yehova ni rikuru ahariitwe? (Reeba n’obugambo obw’ahansi.)

¹⁸ Nituta munonga omutima aha eiziina rya Yehova kukira oku abandi barikutureeba. (Zab. 138:2) Ahabw’enki ekyo ni kikuru? N’ahabw’okugira ngu rukundo ei twiniire Yehova neebaasa kureetera abandi kutugiraho emiteekateekyere etahikire.a Yesu akaba ayeteekateekire kufa omu muringo ogurikuhemurana nk’enkozi y’ebibi kugira ngu abaase kuhaisa eiziina rya Yehova ekitiinisa. ‘Akagaya enshoni’ ekirikumanyisa ngu tarataire omutima aha bi abandi baabaire nibamuteekateekaho. (Heb. 12:​2-4) Kureka, akaba ataire omutima aha kuhikiiriza ekigyendererwa kya Ruhanga.—Mat. 26:39.

19. Eiziina rya Yehova nirikureetera kwehurira ota, kandi ahabw’enki nooyehurira otyo?

¹⁹ Nitwesimisa eiziina rya Yehova, kandi nitukitwara nk’eky’omuhendo kwetwa Abajurizi be. Ahabw’enshonga egyo, tweteekateekire kwemera okujumwa kwona okurikutuhikaho. Eiziina rya Yehova ni rikuru munonga ahariitwe kukira oku abandi barikutureeba. N’ahabw’ekyo, ka tumariirire kuhaisa eiziina rya Yehova ekitiinisa n’obu Sitaane yaakuteeraho kuturemesa. Twakora ekyo, nka Yesu, naitwe nitwija kworeka ngu eiziina rya Yehova niryo ririkukirayo obukuru ahariitwe.