Oku Orikubaasa Kutebeekanisa Omukoro gw’Okugaitwa Oguraahaise Yehova Ekitiinisa

1-2. Yehova naakwenza ki aha izooba rwawe ry’okugaitwa?

ORIYO nooyetebeekanisiza okugaitwa? Ku kiraabe nikwo kiri, buzima oine kuba oshemereirwe munonga. Kandi noobaasa kuba oriyo nookora bingi kwetebeekanisiza eizooba eryo. Yehova naayenda ngu ogire okushemererwa aha izooba ry’okugaitwaa kwawe, kandi ogire obushwere burungi n’omukundwa waawe.—Enf. 5:18; Kyesh. 3:11.

² Yehova aine kuheebwa ekitiinisa aha izooba ry’okugaitwa kwawe. Ahabw’enki ekyo ni kikuru, kandi noobaasa kukikora ota? N’obu ekicweka eki kiraabe nikigamba aha mushaija n’omukazi abarikwetebeekanisa kugaitwa, emisingye eraagambweho neebaasa kutuhwera kuhaisa Yehova ekitiinisa, twaba twesirwe aha bugyenyi, nari twaba tushabirwe kuhwera omu kutebeekanisa.

AHABW’ENKI YEHOVA AINE KUHEEBWA EKITIINISA?

3. Omushaija n’omukazi Abakristaayo baine kuta omutima ahari ki baaba nibetebeekanisa kugaitwa, kandi ahabw’enki?

³ Omushaija n’omukazi Abakristaayo abarikutebeekanisa obugyenyi bw’okugaitwa baine kuteekateeka aha misingye ya Yehova eri omu Baibuli. Ahabw’enki? Ahabw’okugira ngu Yehova niwe yaatandikireho obushwere, kandi niwe yaatebeekaniise okugaitwa okwabaireho omurundi gw’okubanza okwa Adamu na Haawa. (Kut. 1:28; 2:24) N’ahabw’ekyo abarikutebeekanisa okugaitwa baine kwebemberwa emiteekateekyere ya Yehova.

4. Niki ekindi ekirikuhiga omushaija n’omukazi kuhaisa Yehova ekitiinisa aha mukoro gwabo gw’okugaitwa?

⁴ Ahabw’okugira ngu Yehova ni Sho ow’omu iguru, kandi munywani waawe orikukirayo, ni kikuru kushwijuma emiteekateekyere ye waaba nootebeekanisa omukoro gw’okugaitwa. (Heb. 12:9) Hatariho kubangaanisa nooba nooyenda ngu agume ari munywani waawe. N’ahabw’ekyo tiwakwenzire ekintu kyona aha izooba eryo kumugwisa kubi. (Zab. 25:14) Ku orikuteekateeka ahari byona ebi Yehova akukoreire n’ebi araije kukorera, tikirikukuhiga kwenda kumuhaisa ekitiinisa aha izooba ry’okugaitwa kwawe?—Zab. 116:12.

NIMUBAASA KUHAISA MUTA YEHOVA EKITIINISA?

5. Baibuli neebaasa kuhwera eta omushaija n’omukazi kutebeekanisa okugaitwa kwabo?

⁵ Baibuli terikutuha ebiragiro ebirikworeka oku Abakristaayo tushemereire kutebeekanisa obugyenyi bw’okugaitwa. N’ahabw’ekyo omushaija n’omukazi nibabaasa kutebeekanisa obugyenyi bwabo barikwihirira aha kubaasa kwabo, ebi barikukunda n’entwaza y’ekicweka kyabo. Kandi abaheereza ba Yehova ab’amazima nibateeraho kworobera ebiragiro by’eihanga eri barikutuuramu. (Mat. 22:21) Amazima gari ngu waatebeekanisa obugyenyi bw’okugaitwa orikukuratira emisingye ya Baibuli, nibwija kuhaisa Yehova ekitiinisa kandi bumushemeze. Mbwenu shi oshemereire kukuratira misingye ki?

6. Ahabw’enki ni kikuru omushaija n’omukazi kworobera ebiragiro bya gavumenti ebirikukwata aha bushwere?

⁶ Yorobera ebiragiro bya gavumenti. (Rom. 13:​1, 2) Amahanga maingi gaine ebiragiro ebi omushaija n’omukazi baine kworobera batakataahire omu bushwere. N’ahabw’ekyo omushaija n’omukazi baine kubanza kuteeraho kwetegyereza ebiragiro ebyo. Waaba oine ebibuuzo aha ku orikubaasa kworobera ebiragiro ebyo, noobaasa kushaba abareeberezi obuhwezi.b

7. Omushaija n’omukazi nibabaasa kuhamya bata ngu omukoro gwabo gw’okugaitwa gwaba ogw’ekitiinisa?

⁷ Hamya ngu omukoro gwaba ogw’ekitiinisa. (1 Kor. 10:​31, 32) Teeraho kutebeekanisa omukoro oguraayorekye omwoyo gwa Ruhanga beitu gutari ogw’ensi. (Gal. 5:​19-26) Kandi okuhikaana n’omusingye gwa Baibuli ogurikukwata aha mutwe gw’eka, omushaija niwe arikujunaanizibwa aha kuhamya ngu okugaitwa kwaba okw’okushemererwa, kandi okw’ekitiinisa. Mbwenu shi niki ekirikubaasa kumuhwera kuhikiiriza ekyo? Orubazo orw’okugaitwa rwayegamira ahari Baibuli, rukaheebwa omu muringo gwa rukundo kandi ogw’ekitiinisa, niruhwera abarikuruhurira kusiima entebeekanisa ya Ruhanga ey’obushwere. Kandi boona abarikuba bari aha mukoro ogwo nibongyera kumanya obukuru bw’okugaitwa. Obumwe omushaija n’omukazi nibabaasa kucwamu kugira omukoro gw’okugaitwa aha Kyombeko ky’Obukama kyaba nikibaasika. Mwaba nimwenda kukoresa Ekyombeko ky’Obukama nimubaasa kumanyisa akakiiko k’abareeberezi murikubahandiikira ebaruha bukiri kare.

8. Niki ekirikubaasa kukuhwera kutebeekanisa obugyenyi oburaahaise Yehova ekitiinisa?(Abarooma 13:13)

⁸ Shoma Abarooma 13:13. Waacwamu kukora obugyenyi, noobaasa kutebeekanisa ota kugira ngu butakayoreka omwoyo gw’ensi? Ekigambo ky’Orugriika ekyavunwirwe ‘nk’okujagarara’ kikaba nikitwariramu amagyenyi agaabaire gabaho okunywa amaarwa ekirenga n’okuteera ebyoma by’okuzina kuhitsya omu kiro munonga. Waacwamu kugabura amaarwa aha mukoro gwawe, oine kutebeekanisa gye kugira ngu hatagira owaanywa ekirenga.c Kandi waacwamu kuteera ebyoma by’ebyeshongoro, teeraho kutabitunguura munonga kikaremesa abari aha mukoro kugaaniira hamwe. Kandi shwijuma gye ekika ky’ebyeshongoro ebiraateerwe n’ebigambo ebirimu kugira ngu bitateeza entsibo abaija aha mukoro.

9. Omushaija n’omukazi baine kwijuka ki aha bikwatiraine n’ebiraagambweho aha mukoro n’eby’okweshemeza?

⁹ Haine abaraije kugira eki baagamba aha mukoro nari kubaho emizaano, vidiyo nari ebindi eby’okushemeza abantu? Buzima ebintu ebyo nibibaasa kwongyera kushemeza omukoro. Kwonka teeraho kureeba ngu ebiraabeho nibyombeka. (Fil. 4:8) Yebuuze oti: ‘Nikiija kuhaisa abandi ekitiinisa? Nikiija kuhaisa entebeekanisa y’obushwere ekitiinisa?’ Kandi okukira munonga noobaasa kwebuuza oti: ‘Nikiija kuhaisa Yehova ekitiinisa?’ N’obu kiraabe kiri kirungi kugamba ebirikushetsya, teeraho kwetantara kukoresa ebigambo ebitashemeire nk’ebiine akakwate n’obushambani. (Efe. 5:3) Hamya ngu abanyabuzaare n’abanywani baawe nibaha ekitiinisa ebi ocwiremu baaba baine ebi barikwenda kugamba aha mukoro gwawe.

10. Ahabw’enki omushaija n’omukazi we baine kutebeekanisa omukoro guringaniire? (1 Yohaana 2:​15-17)

¹⁰ Kora omukoro guringaniire. (Shoma 1 Yohaana 2:​15-17.) Yehova naashemererwa abaheereza be bateeraho kumuhaisa ekitiinisa omu mwanya gw’okwetaho omutima. N’ahabw’ekyo Abakristaayo nibateeraho kukora omukoro guringaniire barikwetantara kukoresa esente nyingi nari kukora ebintu ahabw’okwenda kweyoreka. Noija kugasirwa ota waakora omukoro guringaniire? Obundi omukoro gwawe nigubaasa kuba nk’ogw’ow’eishe-emwe Mike owa Norway. Naagira ati: “Tukeetantara amabanja, kandi kyatuhwera kugumizamu nituheereza nka baapayoniya. Omukoro gwaitu gw’okugaitwa gukaba guringaniire kwonka gukabonera kandi gukaba nigushemeza.” Munyaanyazi-itwe Tabitha ow’omuri India naagira ati: “Tukeetantara okwerarikirira ekirenga. Ahabw’okukora omukoro guringaniire, tukaba tutaine bingi by’okutebeekanisa kandi tituragizire obutaikirizana bw’amaani.”

11. Omushaija n’omukazi nibabaasa kujwara bata aha mukoro gwabo gw’okugaitwa? (Reeba n’ebishushani.)

¹¹ Waacwiremu eki oraajware? Amazima gari ngu, nooyenda ngu oreebeke gye. Nangwa n’omu bwire bwa Baibuli, omushaija n’omukazi bakaba nibafayo munonga aha ndeebeka yaabo aha izooba ry’okugaitwa kwabo. (Isa. 61:10) Kwonka nabwo, n’obu ebi oraajware biraataane n’ebi orikujwara butoosha, biine kuba biringaniire. (1 Tim. 2:9) Otaikiriza ebijwaro nari endeebeka yaawe kuba nikyo waataho munonga omutima aha mukoro gwawe.—1 Pet. 3:​3, 4.

12. Ahabw’enki omushaija n’omukazi baine kwangira emigyenzo erikukira kubaho omu kicweka kyabo?

¹² Yangira emigyenzo etarikuhikaana n’Ebyahandiikirwe. (Kush. 18:4) Ensi ya Sitaane ereeteire emikoro y’okugaitwa kubamu emigyenzo y’obukaafiire n’obufumu. Kwonka Yehova naaturabura kwetantarira kimwe emigyenzo nk’egyo etashemeire. (2 Kor. 6:​14-17) N’ahabw’ekyo omu kicweka kyanyu haaba harimu emigyenzo erikubaho aha bugyenyi, teeraho kushwijuma obukomooko bw’emigyenzo egyo n’emisingye ya Baibuli eraakuhwere kucwamu gye.

13. Omushaija n’omukazi nibabaasa kutooreza bata Yehova aha bikwatiraine n’ebiconco?

¹³ Omu kicweka kyanyu, abarikwija aha mukoro nibakira kuha abagore ebiconco? Kyaba nikwo kiri, ijuka ngu abaraije aha bugyenyi nibahayo eki barikubaasa kurugiirira aha ntaatsya yaabo. Amazima agari ngu, butoosha Abakristaayo nibahigwa kugaba, kandi ekyo nikibareetera okushemererwa. (Enf. 11:25; Byak. 20:35) Kwonka, titurikwenda kureetera abaija aha mukoro kugyemeserezibwa kuhayo, nari kureetera omuntu kwehurira kubi ahabw’okuhayo ekiconco kitari ky’esente nyingi. Nituteeraho kutooreza emiteekateekyere ya Yehova, turikwikiriza abandi kuhayo kurugiirira aha bi baine baihire aha mutima.—2 Kor. 9:7.

OKWETANTARA OBUREMEEZI N’OKUBUSINGURA

14. Abarikutebeekanisa kutaaha omu bushwere nibatunga buremeezi ki?

¹⁴ Noobaasa kugira oburemeezi waaba nooteeraho kutebeekanisa omukoro gw’okugaitwa oguraahaise Yehova ekitiinisa. Nk’eky’okureeberaho, nikibaasa kukugumira kutebeekanisa omukoro guringaniire. Charlie, owa Solomon Islands naagira ati: “Ahabw’okugira ngu twine abanywani baingi, kikaba kigumire munonga kumanya ou twine kweta aha mukoro. Kandi omu ntwaza yaitu buri munywani naaba aine amatsiko ngu naija kwetwa.” Tabitha, owaaba yaagambirweho naagira ati: “Omu kyanga kyaitu nibakunda kukora omukoro muhango. Kikatwara obwire, abazaire baitu kwikirizana n’okucwamu kwaitu kw’okweta abantu nka 100 bonka.” Sarah, owa India, naagira ati: “Abantu abamwe nibakira kuta omutima aha kurangaanwa. Omwe aha banyabuzaare bangye akakora omukoro muhango gw’okugaitwa, n’ahabw’ekyo naanye nkaba ningyemeserezibwa kukora omukoro ogurikukira ogwabo.” Niki ekirikubaasa kukuhwera kusingura oburemeezi nk’obwo?

15. Ahabw’enki okushaba kiri kikuru mwaba nimutebeekanisa omukoro gw’okugaitwa?

¹⁵ Mushabe Yehova mwaba nimutebeekanisa omukoro. Noobaasa kugambira Yehova omu kushaba enshonga yoona erikubeerarikiriza n’oku murikwehurira. (Fil. 4:​6, 7) Mushabe Yehova kubahwera kucwamu gye, kuguma mwikaikaine mwayerarikirira, n’okworeka obumanzi kyayetengyesa. (1 Pet. 5:7) Kandi mwareeba oku arikubahwera nimwija kwongyera kumwesiga. Tabitha, owaaba yaagambirweho naagira ati: “Nyowe n’omukundwa wangye tukaba twerarikirire aha butaikirizana oburaabeho ahagati yaitu n’ab’eka zaitu. N’ahabw’ekyo buri kuza kutebeekanisa obugyenyi bwaitu, tukaba tutandika n’okushaba. Buzima Yehova akatuhwera kwikaikana n’okugira obusingye n’ab’eka zaitu.”

16-17. Okugaaniira gye nikibaasa kubahwera kita mwaba nimutebeekanisa omukoro?

¹⁶ Mugaaniire omu muringo gw’ekitiinisa, kandi ogw’obwengye. (Enf. 15:22) Omushaija n’omukazi nibaba baine bingi by’okucwamu aha bikwatiraine n’omukoro gwabo gw’okugaitwa. Ebi nibitwariramu, eizooba ry’okugaitwa, esente ezirikwetengyesa, abu baraayete aha mukoro, n’ebindi bingi. Mutakacwiremu, mubanze mushwijume ebi murikubaasa kukora, kandi muhikaanise ebiteekateeko aha misingye ya Baibuli hamwe n’obuhabuzi bw’Abakristaayo abakuzire omu by’omwoyo. Waaba noohayo ekitenso kyawe, kigambe omu muringo gw’embabazi, ogw’obwengye, kandi yetantare kuremera aha nshonga. Bamwe aha b’eka yaawe nk’abazaire baahayo ekitenso ekitarikuhenda emisingye ya Baibuli, teeraho kubahurikiza. Ahakuba omukoro ogwo niguba guri mukuru n’aharibo. Waaba otaikirizaine n’eki baakushaba, baashoboororere omu muringo gw’obwengye. (Kol. 4:6) Hwera ab’eka yaawe kwetegyereza ngu ekigyendererwa kyawe ekikuru n’okugira omukoro murungi ogurikuhaisa Yehova ekitiinisa.

¹⁷ Okushoboororera abazaire baawe ebi orikwenda kukora na munonga baaba batari mu mazima nikibaasa kuguma, kwonka noobaasa kusingura. Ow’eishe-emwe Santhosh kuruga India naagira ati: “Ab’eka zaitu bakaba nibenda ngu tukore emigyenzo ya Hindu aha bugyenyi bwaitu.” N’ahabw’ekyo, kikatutwarira obwire kubashobororera ebi tucwiremu. Kwonka tukabaasa kukora bimwe aha ebi baabaire nibenda, ebitarikugwisa kubi Yehova. Nk’eky’okureeberaho, tukahindura omu bi twabaire nitwenda kuteeka, twateeka ebi baabaire nibakunda kandi twashazamu okweshongora, n’okuzina ahakuba bakaba batabimanyiriire.”

18. Niki ekirikubaasa kubahwera kuhamya ngu omukoro gw’okugaitwa gwagyenda gye? (1 Abakorinso 14:40) (Reeba n’ekishushani.)

¹⁸ Mutebeekanisa gye. Okukora ekyo, nikiija kukuhwera kuteerarikirira ekirenga aha eizooba ry’okugaitwa. (Shoma 1 Abakorinso 14:40.) Wayne, kuruga Taiwan, naagira ati: “Harikuburayo ebiro bikye obugyenyi kubaho, tukagira orukiiko n’abaabaire nibaija kutuhwera aha mirimo y’okutebeekanisa omukoro. Tukagaaniira aha ntebeekanisa ezikozirwe kandi twayegyezamu oku turaatwaze omu bintu ebimwe kuhamya ngu buri kimwe nikiija kugyenda gye.” Kubaasa kworeka ngu nooha abagyenyi baawe ekitiinisa, teeraho nk’oku orikubaasa kukwata obwire.

19. Niki ekirikubaasa kukuhwera kuhamya ngu omukoro gwawe gwagyenda gye?

¹⁹ Waateekateeka bukiri kare aha buremeezi bwingi oburikubaasa kubaho, nikiija kukuhwera kubwetantara. (Enf. 22:3) Nk’eky’okureeberaho, waaba nootuura omu kicweka ahu abantu barikukira kwija aha mukoro bateetsirwe, shwijuma eki orikubaasa kukora kuremesa ekyo kubaho. Hamya ngu abanyabuzaare baawe abatari mu mazima nibamanya eki orikwenda, kandi obashoboororere emiteekateekyere ei oine aha migyenzo emwe erikubaho aha kugaitwa. Noobaasa kubooherereza ekicweka “What Happens at a Wedding of Jehovah’s Witnesses?” ekiri aha jw.org. Kubaasa kuhamya ngu buri kimwe kyagyenda gye aha izooba ry’omukoro, noobaasa kutoorana ow’eishe-emwe okuzire omu by’omwoyo oraakore ‘nka mukuru w’obugyenyi.’ (Yoh. 2:8) Waamugambira entebeekanisa zaawe, naabaasa kukuhwera kuhamya ngu omukoro gwawe gwagyenda gye nk’oku obaire ogutebeekaniise.

20. Omushaija n’omukazi bashemereire kwijuka ki aha izooba ryabo ry’okugaitwa?

²⁰ Noobaasa kwerarikirira waateekateeka ahari byona ebiraatwarirwe omu kutebeekanisa mukoro gw’okugaitwa. Kwonka, ijuka ngu omukoro n’ogw’eizooba rimwe. Niyo ntandikiro y’okwesiimira amagara hamwe murikuheereza Yehova. Teeraho kugira omukoro guringaniire, kandi ogw’ekitiinisa. Yesigye Yehova. Ahabw’obuhwezi bwe, noija kutebeekanisa omukoro gw’okugaitwa oguraakureetere kushemererwa n’okuteefuuza waagwijuka.—Zab. 37:​3, 4.