Abari omu Myaka ya Bukuru—Muri ab’Omuhendo omu Kibiina
“Ku ndikuteekateeka aha by’enyima nintangaara kureeba ebi naabaire nimbaasa kukora nkiri muto. Kwonka hati ahabwa bukuru, tinkibaasa kubikora.”—Connie ow’emyaka 83.
Obundi naiwe ahabw’emyaka ya bukuru tokibaasa kukora ebi waabaire nookora okiri muto. N’obu oraabe oheereize Yehova omu bwesigwa kumara emyaka mingi, noobaasa kutandika kwegiraho ebiteekateeko bibi ahabw’okugira ngu tokibaasa kukora ebi waabaire nookora okiine amaani. Nk’eky’okureeberaho, noobaasa kutandika kugyeragyeranisa ebi orikukora hati n’ebi waabaire nookora enyima. Kyaba nikwo kiri, niki eki orikubaasa kukora kubaasa kusingura emiteekateekyere nk’egyo?
EKI YEHOVA ARIKUKUSHABA KUKORA
Yebuuze oti: ‘Niki eki Yehova arikunshaba kukora?’ Noobaasa kuhuumurizibwa ebigambo ebiri omu Eky’Ebiragiro 6:5, ebirikugira biti: “Kandi ogume okunde [Yehova] Ruhanga waawe n’omutima gwawe gwona, n’amagara gaawe goona n’amaani gaawe goona.”
Kurugiirira aha mushororongo ogwo, Yehova naakushaba kumuheereza n’omutima gwawe gwona n’amaani gaawe goona. Ekyo nikibaasa kukuhwera kwetantara kwegyeragyeranisa n’abandi, nari kugyeragyeranisa ebi orikukora hati n’ebi waabaire noobaasa kukora enyima.
Teekateeka ahari eki: Obu waabaire okiri muto, okaba nooha ki Yehova? Abaheereza ba Yehova abaingi nibagarukamu ngu bakaba nibamuha ekirikukirayo oburungi. Kandi naiwe nikyo waabaire nookora obu waabaire okiri muto. Mbwenu shi niki eki orikubaasa kuha Yehova obunaku obu? Na hati noomuha ekirikukirayo oburungi kurugiirira aha mbeera ezi orimu, nari ebi orikubaasa kukora obunaku obu. Waateekateeka omu muringo ogwo, noija kwetegyereza ngu na hati nooha Yehova kyenyini eki waabaire noomuha enyima. Okaba noomuha ekirikukirayo oburungi, kandi na hati nikyo orikumuha.
Okaha Yehova ekirikukirayo oburungi obu waabaire okiri muto kandi oriyo noomuha ekirikukirayo oburungi n’omu myaka yaawe ya bukuru
NOOBAASA KUHWERA ABANDI
Yetegyereze enshonga endiijo: Omu mwanya gw’okureeba emyaka yaawe nk’erikukuremesa, noobaasa kuteeraho kugireeba nk’omugisha. Ahabw’okugira ngu ori Omukristaayo okuzire, hariho ebintu ebi orikubaasa kukora hati ebi waabaire otarikubaasa kukora obu waabaire okiri muto. Nk’eky’okureeberaho noobaasa kukora ebi:
Gambira abandi ebi oyegire omu kuheereza Yehova. Teekateeka aha ki Baibuli erikugamba omu mishororongo egi:
Omugabe Daudi: “Nkaba ndi omutsigazi, mbwenu ndi omugurusi, kwonka tinkareebaga ohikiriire atsigirweho, n’obu baakuba abaana be nibashaba ak’okurya.”—Zab. 37:25.
Yoshua: “Kandi reeba eri izooba naaza kugyenda nk’oku ab’ensi boona bagyenda, kandi mwena nimumanya gye omu mitima yaanyu n’omu magara gaanyu, ku hatariho kintu na kimwe ekirabuzire aha birungi byona ebi [Yehova] Ruhanga waanyu yaabaraganiise, byona bikabahikaho, tihariho kintu na kimwe ekitarabaireho.”—Yos. 23:14.
Obundi naiwe oragambire ebigambo nibyo bimwe. Daudi na Yoshua bakagamba barikwihirira aha bi baarabiremu. Ahabw’okugira ngu abaheereza ba Yehova abeesigwa abo bakaba nibagamba ebi baareebire n’ebi bahuriire kumara emyaka mingi, ebigambo byabo biine amakuru maingi.
Waaba otwire nooheereza Yehova kumara emyaka mingi, naiwe noobaasa kugambira abandi ebi Yehova akukoreire n’ebi oreebire naakorera abandi. Noijuka obwire obu waareebire omugisha gwa Yehova aha bantu be? Kyaba nikwo kiri, oteeziringa kugambira abandi. Waabagambira nikibaasa kubahuumuriza nk’oku naiwe otwire noohuumurizibwa. Abandi baahurira ebirungi ebi otungire omu kuheereza Yehova nikibaasa kwongyera kubagumya.—Rom. 1:11, 12.
Omuringo ogundi ogu orikubaasa kugumya abandi n’okubaho omu nteerane butunu nk’oku orikubaasa. Waakora ekyo noobaasa kugumya ab’eishe-emwe, kandi nabo bakugumye. Connie owaaba yaagambirweho naagira ati: “Okuza omu nteerane butunu nikimpwera kutahwamu amaani. Tindikubaasa kugira amaganya naaba nyine abantu abarikukunda aha Kyombeko ky’Obukama. Niinteeraho kworeka abandi ngu nimbasiima ndikubaha ebirabo. Kandi niinteeraho kwejumba omu by’omwoyo ndi hamwe n’ab’eishe-emwe na banyaanyazi-itwe.”
YEHOVA NAAKUSIIMA AHABW’OKUMUHEEREZA OMU BWESIGWA
Ebyahandiikirwe birimu eby’okureeberaho bingi eby’abantu abaabaire nibakundwa Yehova n’obu embeera zaabo zaabaire zitarikubabaasisa kukora ebintu ebimwe. Teekateeka aha Mwisraeli omugurusi Simeoni owaabaire ariho obu Yesu yaazaarwa. Obu yaabaire aza aha hekalu, naabaasa kuba yaabaire areebayo abatsigazi barikukora emirimo. Kwonka omu mireebere y’abantu, naabaasa kuba yaateekateekire ngu takiine mugasho omu maisho ga Yehova ahabw’okuba omugurusi. Kwonka Yehova akaba naareeba enshonga omu muringo ogundi. Akaba naareeba Simeoni nk’omushaija owaabaire ari ‘ohikiriire [kandi] orikutiina Ruhanga’ n’ahabw’ekyo akamuha omugisha gw’okureeba Yesu akiri omwereere. Kandi Yehova akamukoresa kuha obunabi ngu Yesu akaba naija kuba Mesia owaaraganisiibwe. (Luk. 2:25-35) Buzimazima Yehova akaba atarikureeba Simeoni nk’omugurusi, kureka nk’omushaija owaabaire aine okwikiriza kandi owaabaire “ariho omwoyo ogurikwera.”
Yehova akaha Simeoni omugisha gw’okureeba Yesu akiri omwereere n’okumugambaho obunabi ngu akaba naija kuba Mesia owaaraganisiibwe
Naiwe noobaasa kugira obuhame ngu Yehova naakusiima ahabw’okumuheereza omu bwesigwa n’obu oraabe otakibaasa kukora ebintu ebimwe. Omu maisho ge, ekirikukirayo oburungi n’eki omuntu arikuhayo nk’oku arikubaasa beitu kutari nk’oku atarikubaasa.—2 Kor. 8:12.
N’ahabw’ekyo, guma otaire omutima aha bi orikubaasa kukora. Nk’eky’okureeberaho, haine emiringo y’okubuurira ei orikubaasa kwejumbamu obundi kumara obwire bukye? Noobaasa kuhwera abandi orikubateerera esimu nari orikubahandiikira kaada? Ebikorwa bikye bya rukundo nk’ebyo nibibaasa kukwata munonga aha b’eishe-emwe bagyenzi baawe, ahabw’okugira ngu nibiba byaruga aha w’eishe-emwe oheereize Yehova kumara emyaka mingi.
Abamwe nibateganisibwa amagara mabi. Shwijuma eky’okureeberaho kimwe kuruga omuri East Africa omu kabokusi “Kikakiza Amagara Ge.”
Guma noijuka ngu ebyafaayo byawe by’okwikiriza n’obwesigwa bwawe nibabaasa kuhiga abandi. Okugumisiriza kwawe n’eky’okureeberaho aha abandi kandi noobaasa kugira obwesigye ngu ‘Ruhanga t’otahikiriire kwebwa emirimo [yaawe] n’okukunda oku waayorekire aha iziina rye, obu waaheereza abarikwera, abu okirikuheereza na hati.’—Heb. 6:10.
GUMA OINE BINGI BY’OKUKORA NK’OKU KIRIKUBAASIKA
Okucondooza nikworeka ngu abashaija n’abakazi abari omu myaka ya bukuru abarikwejumba omu kuhwera abandi baine amagara marungi, nibateekateeka gye, kandi nibatuuraho emyaka mingi.
Amazima gari ngu okukorera abandi ebirungi tikirikwihaho oburemeezi oburikureetwa emyaka ya bukuru. Obukama bwa Ruhanga bwonka nibwo burihireho kimwe obutahikiirira bwaitu oburikureetaho bukuru n’okufa.—Rom. 5:12.
Kwonka nabwo okuheereza Yehova orikuhwera abandi kumumanya nikikuhwera kuguma noohamya amatsiko gaawe, kandi nikibaasa n’okugasira amagara gaawe obunaku obu. Nyabura mwe abari omu myaka ya bukuru, mumanye ngu Yehova naasiima ebi murikukora kumuheereza, kandi ekibiina nikireeba eky’okureeberaho ky’okwikiriza kwanyu nk’eky’omuhendo.