Janeiro

Timotio adakhala na cikhulupiro cakulimba sikuti thangwe rakuti iye akhafuna kwene-kwene wanthu, koma cadidico ndico cidamucitisa kukhala xamwali wa Yahova. Mukambawerenga Bibliya imwepo mun’funikambo kumbafufudza cadidi. Bzimwebzi bzindzakuthandizani kukhala na citsimikizo cakuti bzomwe mumbapfunza pakulewa bza Yahova mpsacadidi. Ifepano tin’funika kubzitsimikizira bzinthu bzitatu pakulewa bza cadidi ca m’Bibliya. Cakuyamba, Yahova ni Mulungu omwe adalenga bzinthu bzentse. (Kuf. 3:14, 15; Aheb. 3: 4; Apok. 4:11) Caciwiri, Bibliya ni Fala lomwe Mulungu adapereka kuna wanthu. (2 Tim. 3:16, 17) Cacitatu, Yahova ana gulu la wanthu wakulinganizidwa omwe ambatsogoleredwa na Jezu, ndipo gululo ni Mboni za Yahova. (Zai. 43:10-12; Ju. 14:6; Mab. 15:14) Kuti mutsimikizire bzimwebzi, imwepo mun’funika lini kudziwa bzentse pakulewa bza Bibliya. Cakulinga canu cikhale cakufuna kuphatisa basa ‘lanu lakukumbuka’ kuti mukhale na citsimikizo cakuti mumbacidziwadi cadidi.—Aro. 12:1. w20.07 10 ¶8-9

Polofesiya yomwe iri m’bukhu la Apokalipse imbalewa bza thimu la dzombe lomwe lina nkhope ninga za amuna ndipo pa msolo pace pana cinthu comwe “cikhawoneka ninga korowa za oro.” (Apok. 9:7) Kwa minyezi mixanu yomwe dzombero limbakhala na moyo, iro limbagopswa wanthu ‘omwe alibe cidindo ca Mulungu pa mikuma yawo,’ ayai anyamadulanthaka wa Mulungu. (Apok. 9:4) Bzikuwoneka kuti polofesiyayi ikulewa bza atumiki wakudzozedwa wa Yahova. Mwa kukhwimika iwo ambadziwisa bza ciyeruzo comwe Mulungu an’dzapereka pa dziko lakuipali. Ndipopa omwe ali kumbali ya dzikoli ambaipidwa na cidziwisoco. Kodi bzimwebzi bzikufuna kulewa kuti ‘dzombe’ lakufotokozedwa pa Djoweri 2:7-9 na la pa Apokalipse ndakusiyana? Inde. Nthawe zinango, Bibliya limbaphatisa basa fala libodzi pakufuna kulewa bzinthu bzakusiyana. Ndipo thandauzo la falalo limbathemba nkhani yomwe ikulewedwa. Mwa ciratizo, pa Apokalipse 5:5, pambalewa kuti Jezu ni “mphondolo ya dzinza la Djuda.” Koma pa 1 Pedru 5:8, pambalewa kuti Dyabu ali ninga “ninga mphondolo yomwe ikulirima.” w20.04 3 ¶8; 5 ¶10

Hagari, kapolo wa Sarai adacita bzinthu mwakusaya kukumbuka bwino pomwe adakhala mkazi wa Abalahamu. Pomwe Hagari adakhala na mimba, adayamba kunyoza Sarai thangwe ra kusaya kubereka. Tenepo Sarai adayamba kuzunza Hagari, ndipo pomwe bzinthu bzidafika pakuipa, Hagariyo adathawa pamui. (Ciy. 16:4-6) Thangwe ra kuperewera, pinango tingakumbuke kuti Hagari akhali mkazi wakuipa ndipo akhathemera kutambira cirango. Tsono Yahova alibe kumukumbukira tenepo, ndipopa iye adatumiza anjo wace kuti akatsangalaze Hagari. Pomwe anjoyo adagumana na Hagari, adamuthandiza kucinja makumbukidwe yace ndipo adamusimba. Tsono pomwe Hagari adawona bzomwe anjoyo adamucitira, adazindikira kuti Yahova akhamusamalira ndipo akhadziwa bza bvuto lace. Ndipopa Hagari adalewa kuti: ‘Mulungu omwe mumbawona, . . . ndawonadi ule omwe ambandiwona.’ (Ciy. 16:7-13) Kodi n’ciyani comwe Yahova adawona kuna Hagari? Yahova akhadziwa momwe moyo wa Hagari ukhaliri na bzinthu bzomwe akhadapirira pa moyo wace. Napo kuti Yahova akhadziwa kuti bzikhali bzakuphonyeka Hagari kusaya kulemekeza Sarai, iye adadekera mtima Hagariyo thangwe akhabvesesa makumbukidwe yace na momwe bzinthu bzikhaliri pa moyo wace. w20.04 16 ¶8-9

Mpostolo Paulo adalewa kuti Akristau wentse wacadidi ali pa mapici yakuthamanga. (Aheb. 12:1) Ndipo tentsenefe, maswaka ayai acikulire, wamphanvu ayai wakuneta, tin’funika kupirira mpaka kuphampha kuti tikatambire mabaibai yomwe Yahova akufuna kutipasa. (Mat. 24:13) Paulo adakwanisa kupereka malango yakulewa bza kuthamanga mwakupirira thangwe iye ‘[akhadamaliza] mapici yakuthamanga.’ (2 Tim. 4:7, 8) Kodi ni mapici yaponi yakuthamanga yomwe Paulo adalewa? Nthawe zinango, Paulo adanemba bzinthu bzinango bzomwe bzikhacitika pa masenzeka ya ku Geresiya wakale kuti apfunzise nkhani zakufunika. (1Ako. 9:25-27; 2 Tim. 2:5) Nthawe zizinji, iye akhandendemezera moyo wa Cikristau na mapici yakuthamanga. (1Ako. 9:24; Agal. 2:2; Afil. 2:16) Munthu ambayamba ‘kuthamanga [mapiciya]’ akabzipereka kwa Yahova acibatizidwa. (1 Pe. 3:21) Ndipo iye an’dzamaliza mapiciyo Yahova akadzamupasa mabaibai yakukhala na moyo wakusaya kumala.—Mat. 25:31-34, 46; 2 Tim. 4:8. w20.04 26 ¶1-3

“Mbuya ngwakukhulupirika, ndipo iye an’dzakulimbikisani acikukhotcererani kwa nyakuipa.” (2 Ates. 3:3) Kodi Yahova ambatikhotcerera tani? Yahova ambatipasa bzifuzo bzentse bza nkhondo kuti bzitikhotcerere ku mapumpso yentse ya Sathani. (Aef. 6:13-17) Bzifuzobzo mpsamphanvu ndipo bzimbatithandiza. Tsono kuti bzitikhotcerere, ifepano tin’funika kubvala bzifuzo bzentse bza nkhondo ticibziphatisisa. Mwa ciratizo, bande la cadidi limbathandauza cadidi comwe cimbagumanika m’Fala la Mulungu, Bibliya. Thangwe ranyi ifepano timbafunikira kubvala bande limweri? Thangwe Sathani “ni baba wakunama.” (Ju. 8:44) Iye akhala akucita magunkha kuyambira kale-kale, ndipo akhala akupumpsa wanthu pa “dziko lentse la pantsi.” (Apok. 12:9) Tsono cadidi comwe ciri m’Bibliya cimbatikhotcerera kuti tireke kupumpsidwa. Kodi timbabvala tani bande la kuyezezerali? Timbalibvala mwa kupfunza cadidi ca Yahova, mwa kumunamata “mwakutsogoleredwa na mzimu na cadidi,” na mwa kucita bzinthu bzentse mwakukhulupirika.—Ju. 4:24; Aef. 4:25; Aheb. 13:18. w21.03 26-27 ¶3-5

Dziko lomwe likulewedwali, likhali lakudeka thangwe rakuti wanthu wa m’dzikolo akhanamata Yahova. Tsono kuyambira pa cikondweso ca Pentekosite ca mu gole la 33 E.C., dzikolo likugumanika lini pomwe ku mbuto iri-yentse. Bzimwebzi mpsakubveka thangwe atumiki wa Yahova akugumanika pa dziko lentse la pantsi. Tsono kodi ‘dziko Lakudekalo’ likuimira ciyani ntsiku zino? Likuimira gulu la Yahova. Gululo liri ninga dziko lomwe atumiki wa Yahova ambakhala m’mwemo mwakuphatana na kucita mabasa yawo yomwe yambabverana na kunamata kwacadidi. Mu ntsiku zakumalizira zino, mambo wa kumpoto wapita mwakubwereza-bwereza mu ‘dziko Lakudeka.’ Mwa ciratizo, pomwe boma la Alemanha likhali mambo wa kumpoto, lidapita mu ‘dziko Lakudekalo’ mu njira yakuzunza na kupha atumiki azinji wa Mulungu. Adacita bzimwebzi maka-maka pa nthawe ya Nkhondo Yaciwiri ya pa Dziko Lentse la Pantsi. Ndipo, pomwe boma la União Soviética lidadzakhalambo mambo wa kumpoto, lidapitambo mu ‘dziko Lakudeka’ mu njira yakuzunza na kufungira m’kawoko atumiki wa Mulungu. w20.05 13 ¶7-8

Kumbukirani wanthu winango omwe adakhala pa uxamwali na Mulungu Jezu akanati kubwera pantsi pano. Abalahamu akhali munthu omwe akhana cikhulupiro cakulimba. Tsono pomwe padapita magole 1000 kucokera pomwe Abalahamu adafa, Yahova adamucemera kuti ‘xamwali wangu.’ (Zai. 41:8) Bzimwebzi bzikuthandauza kuti napo infa ingamalise lini uxamwali bomwe bulipo pakati pa Yahova na axamwali wace wa pa mtima. Ndipo bzimwebzi bzikulatiza kuti m’makumbukidwe mwa Yahova Abalahamu akana moyo. (Luka 20:37, 38) Munthu winango ni Djobi. Pomwe wanjo wentse adatsonkhana kudzulu, Yahova adalewalewa na mtima wentse bza Djobi. Yahova adalewa kuti iye akhali ‘munthu wakusaya mathangwe, wakulungama, ambagopa Mulungu na kutcenkha kucita cakuipa.’ (Djobi 1:6-8) Munthu winango ni Danyeri, omwe adatumikira Mulungu mwakukhulupirika kwa magole 80 m’dziko lomwe likhana wanthu omwe akhatumikira lini Mulungu. Ndipopa, katatu kentse wanjo adalimbikisa mwamuna wakukalambayu mwa kumuuza kuti akhali ‘munthu wakufunika kwene-kwene’ kuna Mulungu. (Dan. 9:23; 10:11, 19) Tikupenukira lini kuti Yahova akudikhirira na mtima wentse nthawe yomwe an’dzalamusa axamwali wace wa pa mtimawa.—Djobi 14:15. w20.05 27 ¶3-4

Nyakupfunza wabwino angapfunze malamulo ya Mulungu ndipo angakomedwe nayo. Koma akasaya kufuna Yahova, bzingamunese kubvera malamuloyo. Kumbukirani bza Eva. Iye akhadziwa lamulo lomwe Mulungu adamupasa, koma akhafuna lini Mulunguyo. Ndipo Adamu adacitambo bzibodzi-bodzibzi. (Ciy. 3:1-6) Ndipopa tin’funika kucita bzizinji sikuti kundopfunzisa wanthu winango malamulo na mitemo yakulungama ya Yahova. Malamulo na mitemo yomwe Yahova ambatipasa njaphindu ndipo njabwino kwene-kwene kwa ifepano. (Sal. 119:97, 111, 112) Ndipo nyakupfunza wa Bibliya angagumane phindu limweri akawona lufoyi la Yahova pakutipasa malamuloyo. Tenepo, pomwe mukucitisa pfunziro nyakupfunza wanu, mubvunzeni kuti: “Thangwe ranyi mukukumbuka kuti Mulungu ambatiuza kuti ticite ibzi, ibzi ne? Kodi bzimwebzi bzikutipfunzisa ciyani pakulewa bza Mulunguyo?” Mibvunzo ninga imweyi imbatokonya kwene-kwene nyakupfunza, thangwe imbamuthandiza kukumbukira bza Mulungu na kufuna dzina lace. Nyakupfunzayo an’dzafuna sikuti kokha malamulo, koma an’dzafunambo Nyakupereka malamuloyo. Cikhulupiro cace cin’dzalimba kwene-kwene, ndipo an’dzakhala wakukonzeka kulimbana na mayezo yomwe an’dzagumana nayo.—1Ako. 3:12-15. w20.06 10 ¶10-11

Tin’funika kupirira thangwe pambatenga nthawe kuti munthu abwerere kwa Yahova. Abale azinji omwe akhadadjedjera mwauzimu adazindikira kuti adakwanisa kubwerera kwa Yahova thangwe ra kuzungiridwa mwakubwereza-bwereza na akulu wa gwere na abale winango. Mpfumakazi ya ku Ásia, yakucemeredwa Nancy idanemba kuti: “Xamwali wangu wa m’gwere wa ponda ndipondembo adandithandiza kwene-kwene! Iye akhandifuna kwene-kwene ndipo akhandiwona ninga mng’ono wace. Iye adandithandiza kukumbukira nthawe zabwino zomwe tikhacita bzinthu pabodzi. Iye akhanditetekera mwatceru pomwe ndikhamufotokozera bza mu mtima mwangu, ndipo akhazeza lini kundipasa malango. Iye adalatiza kuti akhali xamwali wacadidi, wakukonzeka kuthandiza nthawe iri-yentse.” Ntsisi ziri ninga mankhwala yamphanvu kwene-kwene yomwe yangathandize munthu kubzibva bwino. Abale winango wakudjedjera ambakoyera cakumtima mwanzawo wa m’gwere kwa magole mazinji, ndipo bzimwebzi bzingacitise abalewo kusaya kufuna kubwerera pomwe kwa Yahova. Ayai winango angawone kuti adacitiridwa bzinthu bzakusaya cirungamo. Abale wakudjedjerawa ambafunikira munthu omwe angawatetekere na kubvesesa makumbukidwe yawo. w20.06 26-27 ¶10-11

Kukhala wakulimba pa mayezo yomwe mungagumane nayo, kungakuthandizeni kudzakhala wakulimba pa mayezo yomwe mungadzagumane nayo kutsogolo. Lekani kuyebwa kuti nzeru zakuipa pa nkhani ya kugonana zidayambisidwa na Sathani. Tenepo mukambalamba kupumpsidwa, mumbakhala ‘mukukunda nyakuipayo.’ Ifepano timbazindikira kuti Yahova ndiye omwe adathemera kutiuza bzomwe mpsabwino na bzomwe mpsakuipa. Ndipo timbacita nyongo yakutcenkha kucita pikado. Tsono tikacita pikado, ifepano timbamufotokozera Yahova mu mpembo. (1 Ju. 1:9) Ndipo tikacita pikado ikulu, timbakumbira thandizo kwa akulu wa m’gwere. Iwo adaikhidwa na Yahova kuti ambatithandize. (Tiy. 5:14-16) Tsono, tin’funika kusamala kuti tileke kumbandobzipasa mulandu pa pikado zomwe tidacita kale-kale, thangwe Baba wathu wa lufoyi adapereka mwana wace ninga ntsembe kuti atilekerere pikado zathu. Ndipo Yahova akalekerera munthu omwe wakungula, iye cipo acikumbukira pomwe pikado yaceyo. Bzimwebzi bzimbatithandiza kutumikira Yahova na cikumbu-mtima cakucena.—1 Ju. 2:1, 2, 12; 3:19, 20. w20.07 22-23 ¶9-10

Pakuyamba Yahova akhali yekha-yekha. Tsono iye akhali lini wakupsoma, thangwe ambakwanisa kubzitsangalaza yekha. Napo bziri tenepo, Yahova adafuna kuti awoneke wanthu kuti akondwe na moyo. Ndipo thangwe ra lufoyi, iye adayamba kukonza bzinthu. (1 Ju. 4:19) Pakuyamba, Yahova adalenga Mwana wace Jezu kuti ambaphate naye basa. Ndipo mwa Jezuyo ‘bzinthu bzinango bzentse bzidalengedwa’, kuphatanidzambo wanjo. (Akol. 1:16) Ndipo Jezu adakomedwa kwene-kwene na mwayi omwe adakhala nawo wakuphata basa pabodzi na Baba wace. (Mim. 8:30) Ndipo wanjo akhanayombo mathangwe yakubveka yakukhalira wakukondwa. Iwo adakhala na mwayi wakuwona Yahova na Jezu pomwe akhalenga kudzulu na dziko la pantsi. Kodi wanjowo adatokonyedwa tani na bzimwebzo? Iwo ‘adayamba kuwombera m’manja’ pomwe dziko likhakonzedwa, ndipo iwo akhapitiriza kucita bzimwebzi Yahova akamaliza kulenga cinthu ciri-centse. Bzikuwoneka kuti wanjo adakomedwa kwene-kwene pomwe Yahova adadzamaliza na kulenga munthu pa dziko la pantsi. (Djobi 38:7; Mim. 8:31) Cakulengedwa ciri-centse cidalatiza lufoyi na nzeru za Yahova.—Sal. 104:24; Aro. 1:20. w20.08 14 ¶1-2

Yahova adatilenga kuti timbafune anzathu na kuti iwo ambatifunembo. Tenepo, munthu akambatiwenga bzimbatiwawa, ndipo nthawe zinango timbabva mantha. M’bale munango adanemba kuti: “Pomwe acikunda adandimenya, kunditukwana, na kundigopswa thangwe rakuti ndine Mboni ya Yahova, ndidabva mantha ndipo ndidabziwona kuti ndine munthu wakusaya kufunika.” Bzimbatiwawa kwene-kwene wanthu akambatiwenga, tsono bzimwebzi bzimbatidabwisa lini. Jezu akhadalewa kale kuti tingadadzawengedwa. Thangwe ranyi dziko limbawenga ateweri wa Jezu? Thangwe ninga Jezu, ifepano timbacita lini “mbali ya dziko.” (Ju. 15:17-19) Ndipopa, napo kuti timbalemekeza maboma, ifepano timbalamba kuyanamata, ayai kunamata bzizindikiro bzomwe bzimbaimira mabomayo. Timbanamata Yahova basi. Timbathandizira malamulo yakulungama ya Mulungu, yakulewa bza kutonga wanthu, tsono Sathani na ‘mbeu’ zace, ambanyoza ugo bomwe Mulungu anabo bwakutonga wanthu. (Ciy. 3:1-5, 15) Timbapalizira kuti ni Umambo bwa Mulungu bokha bomwe bun’dzamalisa mabvuto ya wanthu, ndipo mwakusaya kucedwa bun’dzapfudza wentse omwe ambanyoza Umambobo. (Dan. 2:44; Apok. 19:19-21) Imweyi ni nkhani yabwino kuna wanthu wakuderekha, tsono ni nkhani yakuipa kuna wanthu wakuipa. w21.03 20 ¶1-2

Yahova ambalatiza kuti ambalemekeza mpfumakazi mwa kuzipasa mbuto yabwino m’gwere. Iwo ambakumbukiridwa kucokera pa ciratizo cawo ca nzeru, cikhulupiro, nyongo, kukhwimika, kupasa na mabasa yawo yabwino. (Luka 8:2, 3; Mab. 16:14, 15; Aro. 16:3, 6; Afil. 4:3; Aheb. 11:11, 31, 35) Timbakomedwambo thangwe ra kukhala na abale wacikulire m’gwere. Iwo pinango akulimbana na mabvuto ya thanzi thangwe ra kukalamba. Napo bziri tenepo, abale wacikulirewa ambapalizira ninga momwe angakwanisire ndipo ambaphatisa basa mphanvu zawo kuti alimbikise na kupfunzisa anzawo. Ndipo tingapfunze bzinthu bzizinji na bzomwe iwo adapfunzambo pa moyo wawo. Abale na mpfumakazi zathu zacikulire mbakufunika kwa Yahova na kuna ifepano. (Mim. 16:31) Kumbukiranimbo bza maswaka yathu. Mpsakunesa kuna iwo kukulira m’dziko lomwe likutongedwa na Sathani Dyabu, pabodzi na nzeru za wanthu. Napo bziri tenepo ifepano timbalimbikisidwa tikambawona maswaka yathu yakupereka mitawiro pa mitsonkhano, yakucita mbali pa basa la kupalizira, na kukhotcerera mwakukhwimika bzomwe iwo ambakhulupira. Inde maswakamwe muna mbuto yakupambulika mu gwere la Yahova!—Sal. 8:2. w20.08 21-22 ¶9-11

Tikayamba kupalizira na kuuzambo anzathu kuti ndife Mboni za Yahova, tingagumane na bzinthu bzomwe tikubzidikhirira lini. Mwa ciratizo, wanthu wa m’banja lathu angakomedwe lini nafe, axamwali wathu angatiseke ndipo wanthu winango angafune lini kutitetekera. Kodi mungakhale tani wakukhwimika pa kupalizira? Cakuyamba, tsimikizani kuti ni Jezu omwe akutsogolera basali. (Ju. 16:33; Apok. 14:14-16) Caciwiri, limbisani cikhulupiro canu cakuti Yahova an’dzakusamalirani. (Mat. 6:32-34) Cikhulupiro canu cikakhala cakulimba, ni pomwe mun’dzakhala wakukhwimika kwene-kwene. Imwepo mumbalatiza kuti muna cikhulupiro cakulimba pomwe mumbauza axamwali na wanthu wa m’banja mwanu kuti mwayamba kupfunza Bibliya na Mboni za Yahova ndipo mumbatsonkhana nazo! Tikupenukira lini kuti imwepo mwacinja bzinthu bzizinji pa moyo wanu kuti mukhale na moyo wakubverana na mitemo yakulungama ya Yahova. Mwakwanisa kucita bzimwebzi thangwe ra cikhulupiro na kukhala wakukhwimika. Mukapitiriza kukhala wakukhwimika, mungatsimikize kuti ‘Yahova, Mulungu [wanu], an’dzakhala [namwe] kuli-kwentse komwe [muyendeko].’—Djos. 1:7-9. w20.09 5 ¶11-12

Mambo Aza ni ciratizo cabwino ca munthu omwe adacita bzinthu mwanzeru na kukhulupira Yahova na mtima wentse. Iye adatumikira Yahova sikuti pa nthawe ya mabvuto yokha, koma na pa nthawe ya mtendere. Pa moyo wace wentse, ‘Aza adatumikira Yahova na mtima wentse.’ (1 Wam. 15:14) Iye adacita bzimwebzi, mwakumalisa kunamata kwakunama mu Djuda. Ndipo Bibliya limbalewa kuti iye ‘adapfudza maguwa ya ntsembe ya mirungu yakunama na mbuto zakupambulika, adagwesa mbiru zakupambulika ndipo adagwesambo mitanda yakupambulika.’ (2 Nkha. 14:3, 5) Mpaka iye adacosa yavu wace Maaka omwe akhali pa mpando ninga mambo mkazi mu umambo bwace. Thangwe ranyi? Thangwe rakuti yavu wacewo akhalimbikisa wanthu kuti ambanamate bzifanikiso. (1 Wam. 15:11-13) Aza adacita bzinthu bzizinji sikuti kundopfudza bzifanikiso bzokha. Iye adalimbikisa kunamata kwa cadidi, ndipo adathandiza Adjuda kubwerera pomwe kwa Yahova. Yahova adasimba Aza na Adjuda mwakuwapasa mtendere. Kwa magole yakukwana 10 yomwe Aza akhatonga ninga mambo, ‘dzikolo likhali pa mtendere.’—2 Nkha. 14:1, 4, 6. w20.09 14 ¶2-3

Kawiri-kawiri ifepano timbapasa wanthu winango bzinthu bzathu bzakufunika kuti atikoyerembo. Ndipo nthawe zinango, timbakakoyesa kobiri yathu ku Banco. Tikacita bzimwebzi timbakhala na cikhulupiro cakuti kobiri yathuyo in’khotcerereka ndipo in’taika lini ne kubedwa. Mpostolo Paulo adakumbusa Timotio cinthu cakufunika comwe adatambira, comwe cikuimira kudziwa bwino cakulinga comwe Mulungu anaco kuna wanthu. Ndipo Timotio adapasidwambo mwayi ‘[wakupalizira] fala’ na kucita ‘basa la mpalizi.’ (2 Tim. 4:2, 5) Paulo adauza Timotio kuti akoye bzinthu bzomwe adapasidwa. Ninga Timotio, ifepano tidapasidwambo bzinthu bzakufunika. Yahova mwakudeka mtima, adatipasa cidziwiso ca cadidi comwe ciri m’Fala lace, Bibliya. Cadidi cimweci n’cakufunika kwene-kwene thangwe rakuti cimbatipfunzisa momwe tingakhalire pa uxamwali bwakulimba na Yahova. Cadidico cimbatifotokozera momwe tingakhalire wakukondwa pa moyo wathu. Ndipo ifepano tikabvuma cadidico na kuciphatisa basa pa moyo wathu, timbapumpsidwa lini na bzipfunziso bzakunama pabodzi na bzicito bzakuipa.—1Ako. 6:9-11. w20.09 26 ¶1-3

Nyakupfunza wanu an’funika kuwona kuti mumbafuna ndipo mumbakhulupira bzomwe Bibliya limbapfunzisa. Bzimwebzi, bzin’dzacitisa nyakupfunza wanuyo kufuna kuphatisisa bzomwe akupfunzabzo. Tenepo bzikakwanisika, mufotokozereni momwe Bibliya limbakuthandizirani pa moyo wanu. Ndipo iye akabva bzimwebzo, an’dzazindikira kuti Bibliya lingamuthandizembo pa moyo wace. Penu nyakupfunza wanu akugumana na mabvuto, pakucitisa pfunziro la Bibliya mufotokozereni bziratizo bza abale omwe adagumanambo na mabvuto ninga yaceyo acifika pa kuyakunda. Tenepo pakuyenda kukacitisa pfunzirolo, mungayendembo na m’bodzi mwa abale omwe adagumanambo na mabvutoyo, kuti pfunziro lanulo likagumanembo phindu. Thandizani nyakupfunza wanu wa Bibliya kuwona kuti bziri bwino kuphatisa basa mitemo ya m’Bibliya pa moyo wace. Penu nyakupfunza wanu ana banja, kodi mwanzace omwe adamanga naye banjalo akupfunzambo Bibliyalo? Penu ne, m’cemereni kuti adzakhalembo pa pfunziropo. Ndipo mulimbikiseni nyakupfunza wa Bibliya kuti ambafotokozerembo abale wace pabodzi na axamwali wace bzomwe akupfunza.—Ju. 1:40-45. w20.10 16 ¶7-9

Zuze na Mariya adakuza Jezu acifika pakubvumidwa na Mulungu. Aberekiwo adateweza malango ya Yahova yakuyenda kuna abereki. (Bzak. 6:6, 7) Zuze na Mariya akhafuna kwene-kwene Yahova, ndipo cakulinga cawo cikhali cakuthandiza wana wawo kuti akhalembo na lufoyi libodzi-bodziro. Zuze na Mariya pabodzi na wana wawo akhambanamata Yahova ntsiku zentse. Ndipo pa mdzinga uli-wentse iwo akhambayenda kumitsonkhano yomwe ikhambacitikira mu Sinagoga ku Nazaleti. Ndipo gole liri-lentse iwo akhambayenda ku Jeruzalemu kukacita Paskwa. (Luka 2:41; 4:16) Pinango iwo akhambapfunzisa Jezu pabodzi na abale wace pa ulendo bwa kuyenda ku Jeruzalemu bza moyo wa atumiki wa Yahova. Tenepo, pinango pentse iwo pakuyendapo akhazungira mbuto zinango zomwe zimbafotokozedwa m’Bibliya. Tsono pomwe iwo adadzakhala na wana azinji, bzidadzakhala bzakunesa kupitiriza kunamata Yahova ntsiku zentse. Koma onani phindu lomwe iwo adakhala nalo. Pakuti iwo adaikha Yahova pa mbuto yakuyamba pa moyo wawo, banja lawo lidakhala pa uxamwali bwakulimba na Yahovayo. w20.10 28 ¶8-9

M’bale ayai mpfumakazi akakucemerani kuti mumuperekeze ku pfunziro lace, bzingakhale bwino kuyamba kukonzekera nkhani yomwe mun’kacezerana. Dorin omwe ni mpainiya wakupambulika adalewa kuti: “Nimbakomedwa munthu wakundiperekeza ku pfunziro langu, akambakonzekera nkhani yomwe tin’kapfunza na nyakupfunza, thangwe iye an’kalewa mafala yakuthandiza pa pfunzirolo.” Ndipo kuthimizira bzimwebzi nyakupfunzayo an’dzakwanisa kuwona kuti mwentse mudakonzekera bwino, ndipo bzimwebzi bzin’dzakhala ciratizo cabwino kwa nyakupfunzayo. Napo kuti imwepo mungakwanise lini kukonzekera nkhani yentse, pambulani nthawe kuti muwerenge pang’ono nkhaniyo kuti mukwanise kudziwa nfundo ikulu yomwe mun’kacezerana na nyakupfunzayo. Mpembo ni cinthu cakufunika pa pfunziro liri-lentse la Bibliya. Tenepo kumbukirani bzomwe mungalewe pomwe mwenekaciro pfunziroyo an’kukumbirani kuti mucite mpembo. Mukacita bzimwebzi, mpembo wanu un’dzakhala wa thandauzo. (Sal. 141:2) Hanae, omwe ambakhala ku Japão, akadakumbukira mpembo omwe mpfumakazi yomwe ikhaperekeza mpfunzisi wace wa Bibliya idaucita. Iye adati: “Inepano ndidawona kuti iye akhali pa uxamwali na Yahova, ndipo ndidafuna kukhalambo ninga iye. Ndipo ndidabzibvambo kuti ndine wakufunika pomwe iye adaguma dzina langu mu mpembo.” w21.03 9-10 ¶7-8

Jezu adauza mpostolo Paulo kuti angadayenda ku Roma, koma Adjuda winango mu Jeruzalemu adacita makonzedwe yakuti aphate Paulo kuti amuphe. Pomwe mkulu wa acikunda wa Roma wakucemeredwa Claudiyo Silisiya adadziwa bzimwebzi, iye adapulumusa Paulo. Mwakamkulumize Claudiyo adatumiza acikunda, kuti aperekeze Paulo pakuyenda ku Kaesarea. Kumweko, mtongi Felix adalewa kuti Paulo ‘aikhidwe m’kawoko m’nyumba ya Herode acimulindira.’ Adjuda omwe akhafuna kupha Paulo, alibe kukwanisa kumufikira kuti amucite cinthu cakuipa kumweko. (Mab. 23:12-35) Tsono, Festo ndiye omwe adadzakhala mtongi mupsa ku Kaesarea m’mbuto mwa Felix, omwe ‘pakufuna kuti Adjuda akomedwe naye,’ iye adabvunza Paulo kuti: ‘Kodi iwepo un’funa kuyenda ku Jeruzalemu kuti ukatongedwe pamaso pangu thangwe ra bzinthu bzimwebzi?’ Paulo akhadziwa kuti angadayenda ku Jeruzalemu angadaphedwa. Tenepo, iye adatawira kuti: ‘Ndikukumbira kuti ndikatongedwe na Seza!’ Festo adatawira kuti: Pakuti ‘iwepo wakumbira kuti ukatongedwe na Seza, uniyenda kukatongedwa na Seza.’ Na kupita kwa nthawe, Paulo adadzayenda ku Roma komwe kukhali kutali na komwe Adjuda omwe akhafuna kumupha wale akhakhala.—Mab. 25:6-12. w20.11 13 ¶4; 14 ¶8-10

Nthawe zinango tentsenefe timbabzipasa mulandu. Mwa ciratizo, winango ambabzipasa mulandu thangwe ra bzinthu bzomwe adacita pomwe akhanati kupfunza cadidi. Ndipo winango ambabzipasa mulandu thangwe ra bzinthu bzomwe adacita pambuyo pakubatizidwa. (Aro. 3:23) Mpsakubveka kuti tentsenefe timbafuna kucita bzinthu bzabwino. Tsono ‘tentsenefe timbaphonya kazinji kentse.’ (Tiy. 3:2; Aro. 7:21-23) Napo kuti timbakomedwa lini tikambabzipasa mulandu, koma bzimwebzi nthawe zinango mpsabwino. Thangwe ranyi tikulewa tenepo? Thangwe makumbukidwe yakumbabzipasa mulandu yangatithandize kucinja moyo wathu ticileka kudzabwerezera kucita bzinthu bzakuphonyeka (Aheb. 12:12, 13) Nthawe zinango ifepano tingabzipase mulandu mwakupitirira malire pa bzinthu bzomwe tidakungula Yahova acitilekerera. Kubzipasa mulandu kumweku kungakhale kulibe na basalo. (Sal. 31:10; 38:3, 4) Tsono tin’funika kucita mphole kuti tireke kumbabzipasa mulandu mwakupitirira malire. Thangwe ranyi? Thangwe ndakuti tikacita bzimwebzi, tingafike pakusiya kutumikira Yahova, ndipo Sathani angakomedwe kwene-kwene bzimwebzi bzikacitika. Yahova ambatifuna kwene-kwene ndipo iye ambatilekerera tikakhala tamuphonyera.—Ndendemezerani na 2 Akolinto 2:5-7, 11. w20.11 27 ¶12-13

Mlevi omwe adanemba Salimo linango adayamba kucitira njiru wanthu wakuipa, na wanthu wakubzikuza. Sikuti thangwe rakuti iye akhafuna kucita bzinthu bzakuipa, koma thangwe iye akhawona kuti wanthu wakuipawo akhana moyo wabwino kusiyana na moyo wace. (Sal. 73:2-9, 11-14) Mleviyo akhafunika kuwona bzinthu ninga momwe Yahova ambawonera. Mwa kucita tenepo, iye alibe kudzakhala pomwe wakutepa ndipo adasiya kucitira njiru wanthu omwe akhawoneka kuti akhana moyo wabwino. Bzomwe iye adacitabzi, bzidamuthandiza kuti akhale pomwe na mtendere, ndipo adakhala wakukondwa. Iye adalewa kuti: ‘Kupambula Yahova palibe comwe ndikukhumba pa dziko la pantsi.’ (Sal. 73:25) Mpsibodzi-bodzimbo na ifepano, tin’funika lini kumbacitira njiru wanthu wakuipa omwe akuwoneka ninga kuti moyo ukuwafambira bwino. Cikondweso cawo n’cakanthawe. (Mpal. 8:12, 13) Tikambawacitira njiru wanthuwo, ifepano tin’dzatepa, ndipo uxamwali bwathu na Yahova bun’dzamala. Tenepo, mukawona kuti mukuyamba kucitira njiru wanthu wakuipa, tewezerani bzomwe Mlevi ule adacita. Bverani malango yomwe Yahova ambatipasa mwa lufoyi, ndipo tsonkhanani na wanthu omwe ambacita bzomwe iye akufuna. Imwepo mukambafuna kwene-kwene Yahova kuposa cinthu ciri-centse, mun’dzagumana cikondweso cacadidi. Ndipo mun’dzagumanambo ‘moyo caiwo.’—1 Tim. 6:19. w20.12 19-20 ¶14-16

Pomwe mukufotokozera thupo lanu Yahova mu mpembo, mbamutendanimbo. Mpsakufunika kumbakumbukira bzinthu bzabwino bzomwe tinabzo, napo kuti tikugumana na mabvuto mazinji. Tsono n’ciyani comwe mungacite mukakhala kuti mukudziwa lini momwe mungamufotokozerere Yahova momwe mukubvera? Kumbukirani kuti Yahova ambatawira mipembo, napo ire yomwe ifepano tingandolewe kuti: ‘Ndaphata minyendo, ndithandizeni.’ (2 Nkha. 18:31) Mbathembani nzeru za Yahova, sikuti nzeru zanu. Mu nthawe za mpolofeta Zaiya, wanthu wa ku Djuda akhana mantha na Asiriya. Tsono pakuti Adjudawo akhagopa kukundidwa na Asiriya, iwo adayenda kukakumbira Aedjipito kuti awathandize. (Zai. 30:1, 2) Tsono Yahova adawacenjeza kuti kukhulupira Aedjipito kungadawabweresera mabvuto. (Zai. 30:7, 12, 13) Mwakuphatisa basa Zaiya, Yahova adauza Adjudawo momwe iwo angadakhalira wakukhotcerereka. Iye adati: ‘Mun’dzakhala wamphanvu mukapitiriza kukhala wakuderekha na wakukhulupirika kwa Yahova.’—Zai. 30:15b. w21.01 3-4 ¶8-9

Ninga cisimbo thangwe ra kukhulupirika kwawo, abale wa Kristu wakudzozedwawa an’dzakhala amambo na wantsembe na Kristuyo kudzulu. (Apok. 20:6) Yahova, Jezu pabodzi na anjo, an’dzakondwa kwene-kwene pakuwona anyakudzozedwa wa 144 000 akutambira mabaibai yawo kudzulu. Pomwe Juwau adamala kulewa bza wamambo na wantsembe wakukwana 144 000, iye adawona pomwe “thimu likulu la wanthu” lomwe lin’dzapulumuka pa nkhondo ya Armagedo. Mwakusiyana na thimu lakuyamba lire, thimu laciwiriri lina wanthu azinji kwene-kwene, ndipo ifepano timbadziwa lini bwino-bwino mbogo yawo. (Apok. 7:9, 10) Wanthuwo akhadabvala “bzakubvala bzicena.” Bzimwebzi bzikulatiza kuti iwo adapitiriza “kukhala wakusaya kupswipizidwa” m’dziko la Sathaniri ndipo adapitirizambo kukhala wakukhulupirika kwa Mulungu na Kristu. (Tiy. 1:27) Iwo ambalewa mwakukuwa kuti adapulumusidwa thangwe ra bzomwe Yahova na Jezu, omwe ni Mwana wa Bira wa Mulungu, adawacitira. Wanthuwo adaphata mithambi ya kanjedza m’manja mwawo, bzomwe bzikulatiza kuti iwo mwakukondwa ambabvuma kuti Jezu adasankhulidwa na Yahova kuti akhale Mambo.—Ndendemezerani na Juwau 12:12, 13. w21.01 15-16 ¶6-7

Mwamuna angakhale msolo wa banja wabwino mwa kutewezera momwe Yahova na Jezu ambaphatisira basa utsogoleri bwawo. Mwa ciratizo, onani khalidwe la kubzicepesa lomwe Yahova analo. Iye ni munthu wa nzeru kwene-kwene m’cirengedwe centse. Napo bziri tenepo, iye ambatetekera makumbukidwe ya atumiki wace. (Ciy. 18:23, 24, 32) Yahova ngwakulungamiratu, koma napo bziri tenepo, iye ambadikhirira lini kuti ifepano timbacite bzinthu mwakulungamiratu. M’mbuto mwace, iye ambathandiza atumiki wace kuti ambacite bzinthu bzomwe bziniwabweresera phindu. (Sal. 113:6, 7) Ndipopa Bibliya limbalewa kuti Yahova ni ‘mthandizi’ wathu. (Sal. 27:9; Aheb. 13:6) Mambo Davide adazindikira kuti adakwanisa kucita basa lomwe adapasidwa, thangwe ra kubzicepesa kwa Yahova. Onani ciratizo ca Jezu. Iye akhali mpfunzisi na Mbuya wa anyakupfunza wace. Napo bzikhali tenepo, iye adatsuka nzayo za anyakupfunzawo. Jezu caiyeyo adalewa kuti: “Ndakupasani ciratizo kuti mucitembo ndendende ninga momwe ine ndacitiramu.” (Ju. 13:12-17) Napo kuti Jezu akhana udindo, iye alibe kudikhira kutumikiridwa. M’mbuto mwace, iye akhatumikira winango.—Mat. 20:28. w21.02 3-4 ¶8-10

Maswaka imwepo muna bzinthu bzizinji bzakucita m’gwere. Azinji wa imwepo muna mphanvu kwene-kwene. Imwepo mungacite bzizinji pa kuthandiza abale na mpfumakazi zanu. Pinango imwepo mukufuna kukhala mtumiki wakuthandiza, tsono pinango mumbakumbuka kuti wanthu ambakuonani kuti mukali mwana ndipo mukanati kukonzeka kuti mupasidwe mabasa manango m’gwere. Napo kuti mukali mwana, koma pana bzinthu bzomwe mungacite kuti abale ambakuthembeni na kukulemekezani m’gwere mwanu. Maswakamwe, kodi muna luso lomwe mungaliphatise basa kuti muthandize winango m’gwere? Azinji wa imwepo munalo. Mwa ciratizo, imwepo mumbawona kuti abale wacikulire ambakomedwa kwene-kwene mukawathandiza kuphatisa basa matableti yawo ayai mitcini minango, pakucita pfunziro lawo la pa okha ayai pa mitsonkhano. Imwepo mumbakwanisa kuthandiza abale wacikulirewo thangwe rakuti mumbadziwa kuphatisa basa mitcini ya nzeru. Kuposa bzentse bzomwe mumbacita, mbakondwesani Baba wanu wa kudzulu. w21.03 2 ¶1, 3; 7 ¶18

Napo penu mkazi adapfunza kwene-kwene kuposa mwamuna wace, mwamunayo ndiye ana ugo bwakutsogolera kunamata ninga banja na bzinthu bzinango m’banjamo. (Aef. 6:4) Mkazi an’funika kumbabvera mwamuna wace. Koma iye an’funika kumbacitambo nyongo kuti alimbise uxamwali bwace na Yahova. Tenepo, iye an’funika kumbapambula nthawe kuti ambacite pfunziro lace la pa yekha na kumbakumbukira bzomwe akupfunzabzo. Bzimwebzi bzin’dzamuthandiza kukulisa lufoyi lomwe analo kuna Yahova na kumbamulemekeza, ndipo iye an’dzakhala wakukondwa akambabvera bayace. Akazi omwe ambabvera azibayawo thangwe ra lufoyi lomwe analo kuna Yahova, an’dzakhala wakukondwa kwene-kwene kusiyana na wale omwe ambalamba utsogoleri bomwe Yahova adabukhazikisa. Iwo ni ciratizombo cabwino kuna alumbwana na atsikana wacikristau. Ndipo bzomwe iwo ambacitabzo bzimbacitisa kuti m’banja mwawo na mu gwere mukhale na lufoyi pabodzi na mtendere. (Tito 2:3-5) Ntsiku zino, atumiki wa Yahova azinji ni akazi.—Sal. 68:11. w21.02 13 ¶21-23

Mpostolo Paulo adapereka ciratizo cabwino pakulewa bza kukhwimika na kupirira. Nthawe zinango iye akhabzibva kukhala wakutepa. Koma iye adakwanisa kupirira thangwe akhathemba Yahova kuti amupase mphanvu zomwe akhafunikira. (2Ako. 12:8-10; Afil. 4:13) Tikazindikira mwakubzicepesa kuti tikufunikira thandizo la Yahova, ifepano tin’dzakhala wakukhwimika na wa mphanvu. (Tiy. 4:10) Ifepano tingakhale na citsimikizo cakuti mayezo yomwe tikugumana nayo ni cirango lini ca Yahova. Nyakupfunza Tiyago akutitsimikizira kuti: “Munthu akakhala kuti akubonera, aleke kulewa kuti: ‘Mulungu ndiye omwe akundiboneresa’ pakuti Mulungu angayezedwe lini na bzinthu bzakuipa ndipo Iye ambayeza lini munthu na bzinthu bzakuipa.” (Tiy. 1:13) Tikatsimikiza kuti bzimwebzi mpsacadidi, timbakhala axamwali wabwino wa Baba wathu wakudzulu. Yahova “ambacinja lini.” (Tiy. 1:17) Iye adathandiza Akristau wakuyambirira pa mayezo yawo, ndipo an’dzathandizambo ali-wentse wa ifepano ntsiku zino. Pembani kwa Yahova na mtima wentse kuti akuthandizeni kukhala na nzeru, cikhulupiro na kukhwimika. Ndipo iye an’dzatawira mipembo yanu. w21.02 31 ¶19-21

Imwepo mungalimbikise nyakupfunza wa Bibliya omwe ambafika pa mitsonkhano mwakulatiza kuti mumbamukumbukira. (Afil. 2:4) Yezerani kumbaceza naye kuti mumudziwe bwino. Pa kucezapo, mungamuuze kuti mukukomedwa thangwe ra kuwona kucinja komwe akucita, ndipo mungamubvunze momwe likufambira pfunziro lace la Bibliya, banja lace pabodzi na basa lace. Koma lekani kumubvunza mibvunzo yomwe ingamupasise manyazi. Maceza yamweya, yangakuthandizeni kuti mukhale naye pa uxamwali. Mukakhala axamwali wa nyakupfunza wa Bibliya, mun’dzamuthandiza kuti ayende patsogolo acifika pa kubatizidwa. Nyakupfunza akapitiriza kuyenda patsogolo na kucinja bzinthu pa moyo wace, muthandizeni kuti abzibve kuti ambacita mbali ya gwere. Imwepo mungacite bzimwebzi mwa kukhala na mtima wa kumbatambira alendo. (Aheb. 13:2) Nyakupfunza wa Bibliya akakhala mpalizi wakusaya kubatizidwa, mukumbireni kuti muyende naye pabodzi kukapalizira. Diego, omwe ni mpalizi wa ku Brasil adalewa kuti: “Abale azinji akhambandikumbira kuti ndiyende nawo mu utumiki. Imweyi ikhali njira yabwino yakuti ndidziwane nawo. Tenepo, pomwe ndidacita bzimwebzi ndidapfunza nawo bzinthu bzizinji, ndipo ndidabzibva kukhala wakufendererana na Yahova pabodzi na Jezu.” w21.03 12 ¶15-16

Jezu adauza ateweri wace kuti ambafune anyamadulanthaka wawo. (Mat. 5:44, 45) Kodi bzimwebzi bzidapusa kucita? Ne, bziribe kupusa. Tsono mwakuthandizidwa na mzimu wakucena wa Mulungu, bzimbakwanisika. Cisapo ca mzimu cimbaphatanidza lufoyi, kupirira, kudeka mtima, kuderekha, na kubziphata. (Agal. 5:22, 23) Makhalidwe yamweya yambatithandiza kupirira pomwe tikuwengedwa. Wanthu azinji omwe ambatizunza ambacinja mtima wawo thangwe ra kuwona kuti mwamuna, mkazi, mwana, ayai vizinyu, omwe ambatumikira Yahova, akulatiza makhalidwe yabwino yamweya. Wanthu azinji omwe ambatizunza ambadzakhala abale na mpfumakazi zathu. Tenepo, penu imwepo mumbatumikira Yahova, ndipo mukuwona kuti bzikukunesani kulatiza lufoyi kuna wale omwe ambakuwengani, pembani kuna iye kuti akupaseni mzimu wakucena. (Luka 11:13) Ndipo khulupirani kuti nthawe zentse kubvera Mulungu n’kwabwino. (Mim. 3:5-7) Ciwengo cingakhale camphanvu na cakuwawa, koma lufoyi nda mphanvu kwene-kwene. Tikambalatiza lufoyi kwa winango, iwo angacinje momwe ambatiwonera, ndipo angasiye kutizunza. Ndipo bzimwebzi bzimbakondwesa mtima wa Yahova. Tsono napo anyakutizunza acipitiriza kutiwenga, ifepano tingapitirize kukhala wakukondwa. w21.03 23 ¶13; 24 ¶15, 17

Polofesiya ya Djoweri ikulewa bza nkhondo yomwe acikunda angadacita. (Djow. 2:1, 8, 11) Yahova adalewa kuti angadadzalanga Ajirayeri wakusaya kubvera, mwakuphatisa basa ‘gulu [lace] la nkhondo’ (ayai acikunda wa Babulo). (Djow. 2:25) Gululo lingadacemeredwa ule ‘omwe akubwera kucokera kumpoto’ thangwe Babulo adapfudza Jirayeri kucokera kumpoto. (Djow. 2:20) Gululo limbandendemezeredwa na thimu la dzombe lakukonzekeresedwa bwino. Pakulewa bza gululo, Djoweri adati: ‘[Mcikunda] ali-wentse ambafamba m’njira yace. . . . Ambaphotcola mu mzinda. . . . Ambakwira nyumba, ambapita na pa janera ninga mbava.’ (Djow. 2:8, 9) Kodi mukukwanisa kuwona bzimwebzi m’makumbukidwe mwanu? Acikunda ali pentse-pentse. Palibe mbuto yakubisalikira. Ndipo palibe omwe angathawe acikunda wa Babulo! Mu gole la 607 pomwe Jezu akhanati kubwera pano pa dziko la pantsi, Ababulo (ayai Akalideya) adapita mwamphanvu mu mzinda wa Jeruzalemu ninga dzombe. Bibliya limbati: ‘Mambo wa Akalideya . . .  alibe kubvera ntsisi alumbwana ne atsikana, nkhalamba ne atenda.’—2 Nkha. 36:17. w20.04 5 ¶11-12