Fevereiro

Yezerani kuwadziwa bwino abale na mpfumakazi zanu. Kodi mungawadziwe tani? Mbacezani nawo pomwe mitsonkhano ikanati kuyamba ayai pambuyo pace, mbapalizirani nawo pabodzi, ndipo bzikakwanisika acemereni kuti mukadye nawo pabodzi. Mukacita bzimwebzi, pinango mun’dzazindikira kuti mpfumakazi yomwe imbawoneka ninga yakutepa, njamanyazi; ndipo m’bale omwe mumbamuwona kuti ambafunisisa kwene-kwene kobiri, ambadziwa kutambira bwino alendo; ndipo banja lomwe nthawe zizinji limbacedwa kufika pa mitsonkhano, likugumana na mabvuto mazinji. (Djobi 6:29) Cadidi n’cakuti ifepano tin’funika lini ‘[kumbapitira] nkhani za wene.’ (1 Tim. 5:13) Napo bziri tenepo, bzimbakhala bwino kudziwa momwe moyo wa abale wathu uliri na mabvuto yomwe akugumana nayo. Tikacita bzimwebzi tin’dzawadziwa bwino abalewo. Pinango pana m’bale ayai mpfumakazi yomwe imbacita bzinthu bzomwe bzimbakudekerani lini tsono mukamudziwa bwino-bwino, mungayambe kumudekera mtima. Kuti muwadziwe bwino abale na mpfumakazi zanu pambafunika nyongo. Ndipo mukateweza malango ya m’Bibliya, imwepo mun’dzatewezera Yahova, omwe ambafuna ‘wanthu wa mtundu uli-wentse.’—1 Tim. 2:3, 4; 2Ako. 6:11-13. w20.04 17 ¶10-12

Usiku bwakuti mangwana yace Jezu angadaphedwa, iye adakumbusa anyakupfunza wace kuti ambafunane. Iye akhadziwa kuti lufoyi lingadawathandiza kukhala wakuphatana na kupirira, pomwe akuwengedwa na dziko. Onani ciratizo ca gwere la ku Tesalonika. Pa nthawe yomwe gwerelo likhakhazikisidwa, abale wa kumweko akhazunzidwa. Koma napo kuti bzikhali tenepo, abale na mpfumakazi za kumweko adakhala bziratizo bzabwino bza kukhulupirika, kupirira na lufoyi. (1 Ates. 1:3, 6, 7) Paulo adawauza kuti apitirize kulatiza lufoyi, “mwakuthumizirika.” (1 Ates. 4:9, 10) Lufoyi lidawacitisa kutsangalaza anyakusunama na kuthandiza anyakutepa. (1 Ates. 5:14) Ndipo iwo adateweza malango ya Paulo yomwe yali mu tsamba lace laciwiri lomwe lidanembedwa gole libodzi patsogolo pace. Paulo adawauza kuti: “Lufoyi lomwe mumbalatizana likuthumizirika.” (2 Ates. 1:3-5) Lufoyi lawo lidawathandiza kupirira pomwe akhazunzidwa. w21.03 22 ¶11

Ifepano kuti tidzatambire moyo wakusaya kumala, tin’funika kuteweza njira yakuthemera ayai kuteweza bzomwe Akristau an’funika kucita. (Mab. 20:24; 1 Pe. 2:21) Koma Sathani pabodzi na wanthu wace ambafuna lini kuti ifepano ticite bzimwebzo. M’mbuto mwace, iwo ambatipumpsa kuti ‘[tithamange] nawo pabodzi.’ (1 Pe. 4:4) Iwo ambatiseka thangwe ra kuteweza bzomwe timbapfunza m’Bibliya, ndipo ambalewa kuti bzomwe iwo ambateweza mpsabwino kwene-kwene ndipo bzimbawapasa ufulu bwakucita bzomwe akufuna. Tsono bzomwe iwo ambalewa ni gunkha lakuti bwerani mudzawone. (2 Pe. 2:19) Mpsakufunika kumbateweza njira yakuthemera. Sathani akufuna kuti tentsenefe tileke kuthamanga mu njira yakupanikiza yomwe ‘[ikuyendesa wanthu] ku moyo,’ koma iye akufuna kuti tipite mu njira ikulu yakupfaladza yomwe wanthu azinji wa m’dzikoli akupita. Njirayo njakusaya kunesa kuipita ndipo wanthu akufamba mwakusaya kupsindizana. Koma napo bziri tenepo, njira imweyi ‘[ikuyendesa wanthu] ku infa.’ (Mat. 7:13, 14) Kuti tireke kusoceresedwa pa njira yakuyendesa ku moyo, tin’funika kuthemba Yahova na kubvera bzomwe ambatiuza. w20.04 26 ¶1; 27 ¶5, 7

M’magole yano, boma la Rússia pabodzi na madziko yomwe yambabverana nalo, adapitambo mu ‘dziko la Lakudeka.’ (Dan. 11:41) Mwa njira iponi? Mu 2017, boma la Rússia lidaletsa mabasa ya Mboni za Yahova, ndipo lidafungira m’kawoko abale na mpfumakazi. Ndipo adawaletsambo kuphatisa basa mabukhu yathu pabodzi na Bibliya la Tradução do Novo Mundo. Kuthimizira bzimwebzi, bomalo lidafunga Beteli ya ku Rússia pabodzi na nyumba zathu zakucitira mitsonkhano. Pomwe bzimwebzi bzidacitika, mu 2018 Bungwe Lakutonga lidalewa kuti boma la Rússia pabodzi na madziko yomwe yambabverana nalo ni mambo wa kumpoto. Tsono, napo kuti atumiki wa Mulungu akuzunzidwa kwene-kwene, iwo ambawenga lini bomalo ne kucita bzinthu kuti licinjidwe. M’mbuto mwace iwo ambateweza malango ya m’Bibliya yakulewa kuti tin’funika kumbapempherera ‘wentse omwe ali m’mbuto zapadzulu,’ maka-maka akatonga kuti basa lathu lireke kucitidwa. w20.05 14 ¶9

Abereki, kuti wana wanu atsimikizire kuti ambacidziwa cadidi, iwo an’funika kukhala pa uxamwali na Mulungu, acibzitsimikizira okha kuti mapfunziso ya m’Bibliya njacadidi. Penu mun’funa kupfunzisa wana wanu cadidi ca m’Bibliya, mun’funika kukhala ciratizo cabwino kwa iwo mwa kumbapfunza Bibliya. Imwepo mun’funika kumbapambula nthawe kuti amumbakumbukire bzentse bzomwe mumbapfunza. Mukacita bzimwebzo mun’dzapfunzisa wanawo kucitambo bzibodzi-bodzibzo. Imwepo mun’funika kumbalatiza wana wanu momwe angaphatisire basa bzinthu bzakuthandiza kupfunza Bibliya, ninga momwe mumbacitira na anyakupfunza wanu wa Bibliya. Mwa njira imweyi, imwepo mun’dzathandiza wana wanu kufuna Yahova na kukhulupira cakudya cauzimu comwe timbapasidwa na kapolo wakukhulupirika na wanzeru. (Mat. 24:45-47) Apfunzisenimbo wana wanu ‘bzinthu bzakuzika bza Mulungu’ mwakubverana na msinkhu wawo pabodzi na luso lawo. Mukacita bzimwebzi imwepo mun’dzawathandiza kuti cikhulupiro cawo cikhale cakulimba.—1Ako. 2:10. w20.07 11 ¶10, 12-13

Kodi ni wanthu angasi wakuperewera omwe ali pa uxamwali bwamphanvu na Yahova? Alipo bzulu na bzulu. Wanthuwo ambakwanisa kukhala pa uxamwali na Yahovayo thangwe ra kukhulupira ntsembe ya Jezu. Ndipo na cikhulupiroci, mwakudeka mtima Yahova ambabvuma kuti tibzipereke kwa iye ticibatizidwa. Tikacita bzimwebzi, timbakhala m’gulu la bzulu na bzulu bza Akristau wakubzipereka na wakubatizidwa omwe akukomedwa thangwe ra kukhala pa ‘uxamwali bwakulimba’ na Munthu wapadzulu kwene-kwene pa cirengedwe centse! Kodi tingalatize tani kuti timbatenda uxamwali bomwe tinabo na Mulungu? Ninga Abalahamu na Djobi omwe adapitiriza kutumikira Mulungu mwakukhulupirika kwa magole yakupitirira 100, ifepano tin’funika kupitiriza kumutumikirambo mwakukhulupirika, bziribe basa magole yomwe tikutumikira Yahova mu dziko lakuipali. Ndipo tin’funikambo kutewezera ciratizo ca Danyeri. Kwa iye, kukhala pa uxamwali na Yahova cikhali cinthu cakufunika kwene-kwene kuposa moyo wace. (Dan. 6:7, 10, 16, 22) Na thandizo la Yahova, ifepano tingapirire mayezo yakusiyana-siyana ticipitiriza kukhala axamwali wace.—Afil. 4:13. w20.05 27 ¶5-6

Mambo Davide adawona mkazi wa mwenekaciro akusamba. Iye akhadziwa lamulo la Yahova lakuti: ‘Leka kusirira mkazi wa mwenekaciro.’ (Kuf. 20:17) Napo bzikhali tenepo, Davide adapitiriza kunyang’anisisa mkaziyo. Ndipo mtima wace udagawanika pakati pa kufuna mkazi ule, Bateseba na kufuna kukondwesa Yahova. Napo kuti akhafuna Yahova na kumugopa, Davide adacita bzinthu bzakuipa. Ninga bzakutewera bzace, iye adapswipiza dzina la Mulungu, adaphesa wanthu wakusaya wakuphonya, kuphatanidzambo wanthu wa m’banja mwace. (2 Sam. 11:1-5, 14-17; 12:7-12) Yahova adatsimula Davide ndipo Davideyo adakhala pomwe pa uxamwali bwakulimba na Yahovayo. (2 Sam. 12:13; Sal. 51:2-4, 17) Davide adakumbukira mabvuto yomwe yadabwera thangwe ra kulekerera kuti mtima wace ugawanike. Kodi Yahova adathandiza Davide kukhala pomwe na mtima wakusaya kugawanika? Inde, thangwe Bibliya na kupita kwa nthawe lidalewa kuti Davide adatumikira ‘Yahova, Mulungu wace na mtima wentse.’—1 Wam. 11:4; 15:3. w20.06 11 ¶12-13

Bibliya limbandendemezera lufoyi lomwe Yahova analo kuna wanthu wace na cingwe. Kodi lufoyi la Yahova liri ninga cingwe mwa njira iponi? Kumbukirani cakucitika ici: Yezezerani kuti mwagwa m’madzi pa nyanza ndipo mukumira. Ndipo munthu winango wakuthusirani cigubu cakusaya madzi kuti cikuthandizeni kusaya kumira. Kulewa mwakusaya kupenukira, imwepo munitenda kwene-kwene munthuyo thangwe cigubuco cin’kuthandizani kuyengama. Koma cigubuco cin’kupulumusani lini. Tsono kuti mupulumuke bzin’funika kuti munthu abwere na barco akuthusireni cingwe acikupfuwani ndipo akuikheni m’barcomo. Ninga momwe Yahova adalewera m’mafala ya m’vesi la leroya, iye adapitiriza kutsogolera Ajirayeri omwe akhadasiya kumutumikira ‘mwakudeka mtima na mwalufoyi.’ Mulungu ambabvambo bzibodzi-bodzi na wale omwe adaleka kumutumikira ndipo tsapano akubonera na mabvuto na thupo. Iye akufuna kuti wanthuwo adziwe lufoyi lomwe iye analo kuna iwo ndipo akufunambo kuwapfuwa kuti abwerere kuna iye. Ndipo Yahova angaphatisire basa imwepo kuti alatize lufoyi lace kuna wale omwe adadjedjera mwauzimu. Mpsakufunika kuti timbauze omwe adadjedjera mwauzimu kuti Yahova ambawafuna ndipo ifepano timbawafunambo. w20.06 27-28 ¶12-13

Pomwe nyakupfunza Sitefano adaphedwa, Akristau azinji adathawa ku Jeruzalemu ndipo wentse adabalalikira m’bzigawo bza Djudeya na Samariya, ndipo kumweko pinango kukhali kutali ninga ku Chipre na ku Antiyokiya. (Mab. 7:58–8:1; 11:19) Akristauwo adagumana na mabvuto mazinji kwene-kwene. Koma napo bzikhali tenepo, iwo adakhala wakukonzeka kupalizira mafala yabwino ya Umambo, ndipo wanthu azinji adakhala Akristau ndipo mbuto zizinji za ku Roma zidakhala na magwere. (1 Pe. 1:1) Koma pambuyo pa bzimwebzi Akristauwo adadzakhala pomwe pa nthawe yakunesa kwene-kwene. Akristau wakuyambirira adapirira mabvuto yakusiyana-siyana. Mwa ciratizo, m’magole ya 50 E.C., mtongi wa cigawo ca Roma adatonga kuti Adjuda wentse acoke mu mzinda wa Roma. Tenepo, Adjuda omwe akhadandokhala tsapanopa Akristau adangingimizika kusiya nyumba zawo acikakhala ku mbuto zinango. (Mab. 18:1-3) M’magole ya 61  E.C., mpostolo Paulo adadzanemba kuti Akristau anzace adatukaniwa pakati pa wanthu azinji, adaikhidwa m’kawoko ndipo wanthu adawabera bzinthu bzawo. (Aheb. 10:32-34) Ninga wanthu azinji, Akristau winango akhali wakusauka ndipo akhabonerambo na matenda.—Aro. 15:26; Afil. 2:25-27. w21.02 26-27 ¶2-4

Mkristau akacita ciri-centse kuti akhale na cikhulupiro cakulimba, Sathani na wanthu wace angakwanise lini kumuphingiza kuti aleke kupitiriza kufamba m’cadidi. (2 Ju. 8, 9) Tikudikhirira kuwengedwa na dziko. (1 Ju. 3:13) Mpostolo Juwau ambatikumbusa kuti ‘dziko lentse liri m’manja mwa nyakuipayo.’ (1 Ju. 5:19) Pakuti tikufendera kuphampha kwa dzikoli, ukali bwa Sathani bun’thimizirika kwene-kwene. Iye ambaphatisa lini basa kokha njira zakusaya kuwonekera padeca, ninga mwa ciratizo, kugonana kwakusaya kubvumizika ayai magunkha ya omwe ambakhulupira lini Mulungu kuti atilekese kutumikira Mulungu. Iye ambaphatisambo basa njira yakuwonekera padeca yomwe ni cizunzo. Sathani ambadziwa kuti ana kanthawe kang’ono-ng’ono kuti ayeze kuimisa basa lathu lakupalizira na kutepesa cikhulupiro cathu. Ndipopa timbadabwa lini tikambawona basa lathu likuimisidwa ayai likuletsedwa m’madziko yakusiyana-siyana. Napo bziri tenepo, abale na mpfumakazi zathu m’madziko yamweya akupitiriza kupirira. Bzomwe abalewo akucita bzikulatiza kuti bziribe basa kuti ni mabvuto yaponi yomwe Sathani angatibweresere, ifepano tin’pitiriza kukunda. w20.07 24 ¶12-13

Yahova akhafuna kuti wanthu akhale na moyo wakusaya kumala mu dziko labwino lomwe iye adalenga. Adamu na Eva adalamba kubvera Baba wawo wa lufoyi, ndipo thangwe ra bzimwebzo pikado na infa bzidafikira wanthu wentse. (Aro. 5:12) Tsono n’ciyani comwe Yahova adacita? Pa nthawe ibodzi-bodziyo, iye adalewa bzomwe angadacita kuti apulumuse wanthu. (Ciy. 3:15) Iye adalewa kuti an’dzapereka mwana wace Jezu ninga ntsembe yakulombolera nayo wanthu, ndipo wana wentse wa Adamu na Eva angadadzatsudzulidwa ku pikado na infa. Munthu ali-wentse angadakhala na ufulu bwakusankhula kutumikira Yahova, acitambira moyo wakusaya kumala. (Ju. 3:16; 1Ako. 15:21, 22) Mu dziko lipsa, Yahova an’dzaphatisa basa Mwana wace Jezu kuti adzalamuse wanthu azinji omwe adafa. Tsono tingalewe kuti iwo an’dzalamusidwa lini wentse kabodzi na kabodzi. Thangwe ranyi? Thangwe wanthu akadzawanda mwakamfulumize pa dziko la pantsi, bzingadzanese kuti bzinthu bzifambe bwino. Timbadziwa kuti Yahova ambacita lini bzinthu mwa bvanganya-bvanganya. Iye ambadziwa kuti bzinthu bzimbafunikira kucitika mwakulinganizika bwino, kuti bzifambe mwa mtendere.—1Ako. 14:33. w20.08 14 ¶3; 15 ¶5

Nyakupfunza, pambuyo pakupfunza kwa minyezi yakucepa na kuwonekera pa mitsonkhano, iye an’funika kubvesesa kuti cakulinga cathu n’cakumuthandiza kuti akhale bodzi wa Mboni za Yahova. Pang’ono na pang’ono nyakupfunza wanu wa Bibliya an’dzakulisa cikhumbo cace cakufuna kubatizidwa. Cakuyamba, nyakupfunzayo ambafunika kudziwa na kufuna Yahova na kulatiza cikhulupiro kwa Yahovayo. (Ju. 3:16; 17:3) Iye ambakhala xamwali wa Yahova na wa abale na mpfumakazi m’gwere. (Aheb. 10:24, 25; Tiy. 4:8) Bzimwebzi kawiri-kawiri bzimbathandiza nyakupfunza kukungula na mtima wace wentse, acisiya bzinthu bzakuipa bzomwe akhacita. (Mab. 3:19) Ndipo cikhulupiro cace cimbamucitisa kuuzambo wanthu winango bzomwe ambakhulupira. (2Ako. 4:13) Na kupita kwa nthawe iye ambabzipereka kwa Yahova acibatizidwa. (1 Pe. 3:21; 4:2) Ntsiku yakubatizidwa imbakhala yacikondweso kwa wanthu wentse. Tenepo nyakupfunza wanu wa Bibliya akakhala na cakulinga cakufuna kubatizidwa mulimbikiseni kuti aleke kubwerera m’mbuyo. w20.10 17-18 ¶12-13

Kubzindendemezera na abale winango m’gwere kungakutaziseni kubziwona kuti ndimwe wakufunika. Pinango m’gwere mwanu mungakhale na abale omwe ana luso lakupfunzisa, kutsogolera ayai kucita ulendo bwa ubusa. Tenepo imwepo mungakumbuke kuti mulibe luso lakucitambo bzomwe iwo akucitabzo. Makumbukidwe yamweya yali bwino, thangwe yakulatiza kuti imwepo ndimwe wakubzicepesa na wakugwa nfuwa. (Afil. 2:3) Tsono mucite mphole. Thangwe ranyi? Thangwe imwepo mukabzindendemezera na abale wa m’gwere omwe ana maluso mazinji, mun’dzamalizira kubziwona ninga kuti mulibe na basalo. Ninga momwe mposotolo Paulo adalewera, imwepo mungayambe kukumbuka kuti ndimwe lini wakufunika m’gwere. Yahova adapasa Akristau wakuyambirira mphaso zakusiyana-siyana zakucita bzakudabwisa, koma wentse alibe kutambira mphaso zibodzi-bodzi. (1Ako. 12:4-11) Napo bziri tenepo, iye akhawawona wentse kuti mbakufunika. Ntsiku zino timbatambira lini mphaso zakucita bzakudabwisa na mzimu wakucena. Koma Yahova ambapereka basi maluso mwakusiyana-siyana. Ifepano tina maluso yakusiyana-siyana, koma tentse ndife wakufunika kwa Yahova. w20.08 23 ¶13-15

Imwepo mukapemba kuti mukhale wakukhwimika,Yahova an’dzakutawirani ndipo an’dzakusiyani lini mwekha. (Mab. 4:29, 31) Ndipo iye nthawe zentse ngwakukonzeka kukuthandizani. Kumbukirani momwe iye ambakuthandizirani kukunda bzineso, acikupasani mphanvu kuti mukwanise kucinja makhalidwe yanu yakuipa. Kulewa cadidi, ule omwe adatsogolera wanthu kupita na pa nyanza ifuira angakuthandizenimbo kuti mukhale nyakupfunza wa Kristu. (Kuf. 14:13) Mungakhale na cikhulupiro ninga comwe nyakunemba bukhu la Salimo akhanaco, omwe adalewa mafala ya m’vesi la tsiku lero. Yahova angathandize mpalizi mupsa kukhala wakukhwimika. Onani ciratizo ca mpfumakazi yakucemeredwa Tomoyo. Pomwe mpfumakaziyi ikhapalizira nyumba na nyumba, pa nyumba yakuyamba iyo idagumana mkazi omwe alibe kuitambira bwino, mkaziyo adakuwa kuti: “Nin’funa lini kuceza na Mboni za Yahova!” Ndipo adafunga msuwo mwamphanvu. Tomoyo alibe kubva mantha, ndipo adabvunza mwanzace kuti: “Wabvambo bzimwebzi? Inepano ndiribe kulewa na falalo, koma iye wakwanisa kuzindikira kuti ndine m’bodzi wa Mboni za Yahova. Ndine wakukondwa kwene-kwene!” Tsapano Tomoyo akutumikira ninga mpainiya wakukhazikika. w20.09 6 ¶13-14

Aza adauza wanthu kuti ni Yahova omwe ‘[adawapasa] mpumulo pakati pa anyamadulanthaka [wawo].’ (2 Nkha. 14:6, 7) Aza alibe kukumbuka kuti nthawe yomwe akhali pa mtendere ire ikhali yakuti andokhalembo tenepo. M’mbuto mwace, iye adayamba kumanga mizinda, malitsito, ntsanza, na misuwo. Iye adauza Adjuda kuti: ‘dziko liri m’manja mwathu.’ Kodi Aza akhafuna kulewanyi na mafalaya? Iye akhafuna kulewa kuti wanthuwo angadakwanisa kufamba-famba, na kucita ciri-centse comwe akhafuna thangwe mu dzikomo mukhalibe anyamadulanthaka wawo. Iye adalimbikisa wanthuwo kuti aphatise basa bwino mwayi omwe akhanawo, wakukhala pa mtendere. Aza adaphatisa pomwe basa nthawe yomwe akhali pa mtendere kuti akonzekerese acikunda wace. (2 Nkha. 14:8) Kodi bzimwebzi bzikufuna kulewa kuti iye alibe kuthemba Yahova? Ne. M’mbuto mwace, adadziwa kuti iye ninga mambo, bukhali udindo bwace kukonzekeresa wanthu ku mabvuto yomwe yangadadzabwera kutsogolo. Aza akhadziwa kuti napo kuti iwo akhali pa mtendere, koma mtendereyo ukhali wakusaya kukhalisa. w20.09 15 ¶4-5

Na makumbukidwe ya bwino, mkulu ali-wentse angakhazikisembo malamulo yomwe akuyakumbukira kuti akhotcerere mabira ya Mulungu. Tsono pana kusiyana kukulu pakati pa udindo bwa mkulu wa gwere na ugo bwa msolo wa banja. Mwa ciratizo, Yahova adapasa akulu wa gwere udindo bwakuti ambacite bzinthu ninga ayeruzi, ndipo adawapasambo ugo bwakumbacosa m’gwere omwe ambacita pikado acisaya kukungula. (1Ako. 5:11-13) Kusiyana kunango n’kwakuti Yahova adapasa misolo ya mabanja ugo bunango bomwe alibe kupasa akulu wa gwere. Mwa ciratizo, Yahova adapasa msolo wa banja ugo mwakukhazikisa malamulo na kutsimikiza kuti wentse m’banja akubvera malamuloyo. (Aro. 7:2) Ndipo iye ana ugo pomwe bwakuuza wana wace nthawe yomwe wanawo an’funika kubwerera kumui kukadoka. Ndipo iye ana ugombo bwa kulanga wanawo akasaya kubvera lamulolo. (Aef. 6:1) Napo bziri tenepo, msolo wa banja omwe ana lufoyi, pomwe akanati kusankhula kucita cinthu m’banjamo, ambayamba kubvunza mkazace, thangwe awiriwo “ni thupi libodzi.”—Mat. 19:6. w21.02 16-18 ¶10-13

Thangwe libodzi lomwe likulatiza kuti cadidi ca m’Fala la Mulungu n’cakufunika, ndakuti Yahova ambathandiza wanthu wakubzicepesa omwe ana ‘makumbukidwe yabwino.’ (Mab. 13:48) Ndipo wanthu wakubzicepesa amwewa ambabvuma kuti kapolo wakukhulupirika na wanzeru awapfunzise ntsiku zino. (Mat. 11:25; 24:45) Ifepano tingakwanise lini kubvesesa Bibliya mwakusaya kuthandizidwa, ndipo palibe cinthu cakufunika kwene-kwene kuposa kubvesesako. (Mim. 3:13) Yahova adatipasambo mwayi wakupfunzisa wanthu cadidi ca m’Bibliya pakulewa bza iye na kufuna kwace. (Mat. 24:14) Mafala yomwe timbapfunzisa wanthu njakufunika kwene-kwene thangwe yambathandiza wanthuwo kucita mbali ya banja la Yahova na kuwapasa mwayi wa kudzagumana moyo wakusaya kumala. (1 Tim. 4:16) Bziribe basa penu tikupalizira kwene-kwene ayai pang’ono, ifepano tikuthandizira basa lakufunikali kuti licitike pa nthawe ino. (1 Tim. 2:3, 4) Ni mwayi ukulu kukhala anyabasa anzace wa Mulungu!—1Ako. 3:9. w20.09 26-27 ¶4-5

Pomwe mpostolo Paulo adacita ulendo bwakuyenda ku Roma, Yahova adaphatisa basa abale na mpfumakazi kuti amuthandize. Mwa ciratizo, axamwali wa Paulo awiri wakukhulupirika omwe ni Aristako na Luka, adayenda pabodzi na Paulo ku Roma. Bibliya limbalewa lini kuti Jezu akhadalewa kale kuti Aristako na Luka angadafika ku Roma mwakukhotcerereka. Koma napo bzikhali tenepo, iwo adaikha moyo wawo pa ngozi mwa kucita ulendo bwakugoswa bule. Pomwe iwo adaima mu mzinda wa Sidoni, Juliyo adabvumiza Paulo ‘kuyenda kwa axamwali wace kuti akamuthandize.’ (Mab. 27:1-3) Ndipo na kupita kwa nthawe ku mzinda wa ku Putewoli, Paulo na omwe akhamuperekeza adagumana ‘abale ndipo iwo adatingigimiza kuti tikhale nawo pabodzi kwa ntsiku 7.’ Akristauwa adapasa bzinthu bzomwe Paulo na anzacewo akhafunikira, ndipo tikupenukira lini kuti Pauloyo adakondwesa abale wacewo mwa kuwalimbikisa na bzomwe bzidamucitikira.—Ndendemezerani na Mabasa 15:2, 3. w20.11 15-16 ¶15-17

Abereki pfunzisani wana wanu mwa bzicito na mafala kuti imwepo mumbawona kuti mpsakufunika kwene-kwene kufuna Yahova. Kumbukirani kuti kupfunzisa wana wanu kuti ambafune Yahova, ni mphaso ikulu kwene-kwene yomwe mungapase wanawo. Cinthu comwe mungacite kuti mupfunzise wana wanu, n’kuwathandiza kuti ambawerenge Bibliya ntsiku zentse, kupemba, kugumanika pa mitsonkhano na kucita nawo kunamata kwa pa banja. (1 Tim. 6:6) Ndipo kuthimizira bzimwebzi, mbawapasanimbo wana wanuwo bzinthu bzakuthupi. (1 Tim. 5:8) Tsono kumbukirani kuti bzinthu bzomwe bzin’dzathandiza wana wanu kukhala pa uxamwali bwakulimba na Yahova, ni bzinthu lini bza kuthupi bzomwe mungawapase. Mwa ciratizo, bzinthubzo bzin’dzawathandiza lini kupulumuka, dziko la Sathaniri likadzapfudzidwa ndipo bzin’dzawathandizambo lini kupita mu dziko lipsa la Mulungu. (Zakiy. 7:19) Mpsabwino kuwona kuti abereki azinji wacikristau akuthandiza wana wawo kuti akhale pa uxamwali bwakulimba na Yahova. Tenepo, wana omwe ambakulira m’mabanja yamweya, ambakula na makhalidwe yabwino, ndipo ambadzakhumbula lini akadzakula!—Mim. 10:22. w20.10 28-29 ¶10-11

Nthawe zinango Pedru adalewa ayai kucita bzinthu bzomwe adadzakhumbula nabzo. Pa nthawe inango pomwe Jezu adauza apostolo wace kuti iye angadadzaboneresedwa aciphedwa, Pedru adamutsimula mwakumuuza mafala yomwe yali m’vesi la leroya. (Mat. 16:21-23) Koma Jezu adathandiza Pedruyo. Pomwe thimu la wanthu lidabwera kudzaphata Jezu, Pedru adacita bzinthu mwakusaya kukumbuka. Iye adagwata khutu la nyabasa wa mkulu wa antsembe. (Ju. 18:10, 11) Pa nthawe imweyi Jezu adathandiza pomwe mpostolo waceyi. Kuthumizira bzimwebzi, Pedru adalumbira kuti napo apostolo winango angadathawa Jezu, iye angadamusiya lini! (Mat. 26:33) Tsono thangwe ra kutepa, Pedru adakhala na mantha na wanthu, ndipo adalamba mbuya wace katatu kentse. Iye adasunama kwene-kwene thangwe ra bzomwe bzidacitikabzo ndipo “adabula panja, acikalira mwakuwawidwa mtima. (Mat. 26:69-75) Pinango Pedru akhabzibvunza penu Jezu angadamulekerera bzomwe adaphonyabzo. Pedru alibe kutepa kwene-kwene mpaka kufika pa kusiya kutumikira Yahova. Pambuyo pa kucita bzinthu bzakuphonyeka, iye adakungula ndipo adapitiriza kutumikira Yahova pabodzi na apostolo anzace.—Ju. 21:1-3; Mab. 1:15, 16. w20.12 20-21 ¶17-18

Penu msolo wa banja ngwakubzicepesa, iye ambalatiza khalidweri mu njira zakusiyana-siyana. Mwa ciratizo, iye ambadikhirira lini kuti mkazace na wana wace akhale wakulungamiratu pakucita bzinthu. Napo wanthu wa m’banja mwace akakhala kuti akubverana lini na bzomwe alewa, iye ambakhala wakukonzeka kutetekera makumbukidwe yawo. Amuna wakubzicepesa ambakhala wakukonzeka kuphatambo mabasa ya pamui, napo wanthu alewe kuti mabasayo ngaamuna lini. Bziribe kupusa kucita bzinthu mwakubzicepesa. Thangwe ranyi? Mpfumakazi yakucemeredwa Rachel idalewa kuti: “Komwe inepano ndidacokera, mwamuna akathandiza mkazace kutsuka bzombo na kupukuta m’nyumba, avizinyu pabodzi na abale wace ambabzibvunza penu iye ni mwamunadi. Iwo ambakumbuka kuti iye an’kwanisa lini kutonga mkazace.” Penu bzimwebzi bzimbacitikambo komwe imwepo mumbakhala, kumbukirani kuti Jezu adatsuka nzayo za anyakupfunza wace, napo kuti limweri likhali basa la akapolo. Msolo wa banja wabwino, ambakhala lini na thupo lakuti wanthu animuwona tani, koma iye ambakhala na thupo la momwe angathandizire mkazi pabodzi na wana wace kukhala na moyo wabwino. w21.02 2 ¶3; 4 ¶11

Makumbukidwe yabwino ni mphaso yakucokera kwa Yahova, ndipo bziribe basa kuti moyo wathu ukhali tani kale-kale. Mu dziko lipsa tin’dzakhala na moyo wabwino kwene-kwene. Wanthu winango angatisunamise, koma tikawalekerera bzakuphonya bzawo, timbakwanisa kupitiriza kutumikira Yahova. Kubzipasa mulandu mwakupitirira malire kungatitazise kutumikira Yahova mwakukondwa. Tsono, ninga mpostolo Paulo, ifepano tin’funika kukhulupira kuti Yahova ambatilekerera pikado zathu. (1 Tim. 1:12-15) Ifepano tina cidikhiro cakudzakhala na moyo wakusaya kumala. Ndipo mu dziko lipsa tin’dzakumbukira lini cinthu ciri-centse comwe cimbatisunamisa. Pakulewa bza nthawe imweyo, Bibliya limbati: ‘Bzinthu bzakale bzin’dzakumbukiridwa lini pomwe.’ (Zai. 65:17) Kumbukirani ibzi: Winango wa ifepano atumikira Yahova mpaka kukalamba kwawo, tsono mu dziko lipsa, tentsenefe tin’dzakhala pomwe maswaka. (Djobi 33:25) Tenepo, mbatitsimikizeni kuleka kumbakumbukira moyo omwe tikhanawo kale-kale. M’mbuto mwace, mbatimbakumbukireni bzomwe bzin’dzacitika mu dziko lipsalo, ndipo mbaticiteni ciri-centse comwe tingakwanise kuti tidzakhalembo mu dzikolo! w20.11 24 ¶4; 29 ¶18-19

Kodi n’ciyani cin’dzacitika kutsogolo? Pa nthawe ya citsautso cikulu, Yahova an’dzatipulumusa mu njira ziwiri zakudabwisa. Yakuyamba, iye an’dzapulumusa atumiki wace wakukhulupirika pa nthawe yomwe an’dzacitisa maboma ya wanthu kupfudza Babulo Mkulu, lomwe ni likulu la magereja yentse yakunama. (Apok. 17:16-18; 18:2, 4) Patsogolo pace, iye an’dzapulumusa wanthu wace pa nthawe yomwe an’dzapha wanthu wakusalira wa Sathani pa nkhondo ya Armagedo. (Apok. 16:14, 16) Tikapitiriza kukhala pa uxamwali na Yahova, Sathani an’dzaticita lini na cinthuco. Kulewa cadidi, Sathani ndiye omwe an’dzaphedwa ndipo an’dzawoneka lini pomwe. (Aro. 16:20) Tenepo, pitirizani kubvala bzifuzo bzentse bza nkhondo ndipo lekani kubzikhundula! Lekani kuyezera kumenya mwekha nkhondo yomwe tinayo na Sathani pabodzi na wanthu wace. Thandizani abale na mpfumakazi zanu. Ndipo bvumani kuti Yahova akutsogolereni. Mukacita bzimwebzi, mun’dzakhala na citsimikizo centse cakuti Baba wanu wa kudzulu, an’dzakupasani mphanvu ndipo an’dzakukhotcererani.—Zai. 41:10. w21.03 30 ¶16-17

Kodi ni pa nthawe iponi yomwe tingalatize kuti timbathemba Yahova? Ni pomwe tingaphatise basa malango yomwe Yahova ambatipasa. M’Bibliya muna nkhani zizinji zakulatiza kufunika kwa kupitiriza kukhala wakuderekha na kukhulupira Yahova. Tenepo, mukambapfunza nkhanizo, mbakumbukirani momwe atumiki wa Mulungu adapitirizira kukhala wakukhulupirika, napo kuti akhaboneresedwa na wanthu. Mwa ciratizo, pomwe nyumba ya mphala ya Adjuda idauza apostolo kuti asiye kupalizira, iwo alibe kubva mantha, koma mwakukhwimika iwo adalewa kuti: “Tin’funika kubvera Mulungu ninga mtongi sikuti wanthu.” (Mab. 5:29) Ndipo napo pambuyo pakupfumbulidwa, apostolowo alibe kubva mantha. Thangwe ranyi? Thangwe iwo akhadziwa kuti Yahova akhali kumbali yawo. Yahovayo akhakomedwa nawo, tenepo iwo adapitiriza kupalizira bzipsa bzabwino. (Mab. 5:40-42) Mpsibodzi-bodzimbo na Sitefano. Pomwe iye akhafuna kuphedwa, adapitiriza kukhala wakuderekha ndipo “nkhope yace ikhawoneka ninga nkhope ya anjo.” (Mab. 6:12-15) Thangwe ranyi? Thangwe iye akhadziwa kuti Yahova akhadekedwa naye. w21.01 4 ¶10-11

Bzimwebzi bzikufuna kulewa kuti iwo ana makumbukidwe yakucena ndipo Yahova ambakomedwa nawo. (Zai. 1:18) Wanthuwo mbakristau wakubzipereka na kubatizidwa, omwe ana cikhulupiro camphanvu pa ntsembe ya Jezu, ndipo iwo ali pa uxamwali bwamphanvu na Yahova. (Ju. 3:36; 1 Pe. 3:21) Ndipopa Mulungu ambakomedwa nawo, ndipo iwo akumucitira ‘mabasa yakupambulika usiku na masikati,’ pa dziko la pantsi pano. (Apok. 7:15) Napo ntsiku zino, iwo mbanyongo ndipo akucita bzizinji pa basa lakupalizira Umambo bwa Mulungu na kupfunzisa wanthu. Iwo akucita bzimwebzi thangwe rakuti Umambo bwa Mulungu ni nkhani yakufunika kwene-kwene pa moyo wawo. (Mat. 6:33; 24:14; 28:19, 20) Thimu likulu la wanthu omwe apulumuka pa citsautso cikulu, ana citsimikizo cakuti Mulungu an’dzapitiriza kuwasamalira thangwe “Ule omwe adakhala pa mpando wa umambo an’dzakonza tendi kuti awakhotcerere.” Ndipo bzomwe wanthu omwe ambaimira mabira manango akudikhirira kudzawona, bzin’dzacitikadi bzakuti “[Mulungu] an’dzapukuta misozi yentse m’maso mwawo.”—Apok. 21:3, 4. w21.01 16 ¶9-10

Timbakomedwa kucita mbali ya banja la Yahova ndipo timbacita ciri-centse kuti timbalemekeze wale omwe Yahova adawapasa maudindo. Bibliya limbalewa kuti Yahova ambawona amuna na akazi kuti wentse mbakufunika. Mwa ciratizo, mu nthawe ya apostolo, Yahova adapasa mzimu wace wakucena amuna na akazi kuti acite bzinthu bzakudabwisa, ninga kulewalewa bzirewedwe bzakusiyana-siyana. (Mab. 2:1-4, 15-18) Iwo ana cidikhiro cakudzatonga pabodzi na Kristu. (Agal. 3:26-29) Amuna pabodzi na akazi an’dzatambira mabaibai yawo ya kudzakhala na moyo pa dziko la pantsi. (Apok. 7:9, 10, 13-15) Ndipo wentse ana basa lakupfunzisa na kupalizira mafala yabwino. (Mat. 28:19, 20) Mwa ciratizo, bukhu la Mabasa limbalewa bza mpfumakazi yakucemeredwa Prisila, yomwe idathandiza bayace Akila kufotokoza bwino cadidi kuna Apolo omwe akhali munthu omwe akhadapfunza kwene-kwene.—Mab. 18:24-26. w21.02 14 ¶1, 4

Akulu, imwepo muna udindo bwakuthandiza apalizi kuti ambapalizire bwino mu utumiki, nakuti ambacitise bwino mapfunziro yawo ya Bibliya. Penu m’bale akubva manyazi kucitisa pfunziro lace la Bibliya pomwe imwepo muli pamwepo, bziperekeni kuti mucitise ndimwepo pfunzirolo. Akulu angacite bzinthu bzizinji kuti athandize na kulimbisa apfunzisi wa Bibliya pomwe akucita basa lawo. (1 Ates. 5:11) Napo ifepano pakhale palibe pakucitisa pfunziro la Bibliya, tingathandize munthu kuti ayende patsogolo mpaka kufika pa kubatizidwa. Napo kuti mpsakufunika lini kumbalewalewa kwene-kwene pakucitisa pfunziro, ifepano tikakhala takonzekera bwino-bwino, nfundo zathu zingathandize mpfunzisi pa pfunziro liri-lentse. Tingakhale axamwali wa anyakupfunza wa Bibliya pomwe iwo akubwera ku Nyumba ya Umambo, ndipo tingakhalembo ciratizo cabwino kuna iwo. Akulu angathandizembo anyakupfunza wa Bibliya mwa kumbapambula nthawe ya kumbaceza nawo, ndipo angathandize pomwe apfunzisi wa Bibliya, mwa kuwapfunzisa na kumbawatenda. Ifepano timbakhala wakukondwa tikambacita cinthu, napo cikhale tani cing’ono kuti tithandize munthu kuti afune Yahova acimutumikira. w21.03 13 ¶18-19

Davide adalatiza pa moyo wace wa ntsiku na ntsiku kuti iye akhali munthu wakuthembeka. Mwa ciratizo, pomwe akhali tswaka adaphata basa na nyongo pa kuusa mabira ya pai wace. Limweri likhali basa la kugopswa kwene-kwene. Patsogolo pace Davide adafotokozera Mambo Sauli kuti: ‘Mbuya wangu, ndine makabusa wa mabira ya babangu. Padabwera mphondolo na cimbalangondo ndipo pomwe ciri-centse mwa bzirombobzi cidatenga bira pa mkumbi wa mabirayo, ndidatewera ciromboco ndipo ndidacikantha, ndicipulumusa birayo mkamwa mwace.’ (1 Sam. 17:34, 35) Davide akhadziwa kuti akhana udindo bwa kukhotcerera mabira yale. Mwakutewezera Davide, maswaka yangaphate basa na nyongo pakucita basa lomwe apasidwa. Davide pomwe akhali tswaka, iye adakulisa uxamwali bwace na Yahova. Uxamwali bomwe iye akhanabo na Yahova bukhali bwakufunika kwene-kwene kuposa kukhwimika kwace ayai luso lace la kudziwa kuimba. Yahova akhali lini Mulungu wa Davide basi, koma iye akhalimbo Xamwali wace wa pa mtima. Maswaka, cinthu cakufunika kwene-kwene comwe mun’funika kucita, ndico kulimbisa uxamwali bwanu na Baba wanu wa kudzulu. w21.03 3 ¶4-5