Março

Ifepano timbasankhula lini kuwengedwa. Ndipo timbakomedwa lini tikambazunzidwa thangwe ra cikhulupiro cathu. Tsono, thangwe ranyi tin’funika kukomedwa tikambawengewa? Mbatiwoneni mathangwe matatu. Cakuyamba, tikambapirira, Mulungu ambakomedwa nafe. (1 Pe. 4:13, 14) Caciwiri, cikhulupiro cathu cimbakhala cakulimba ndipo timbakhala na mphanvu. (1 Pe. 1:7) Ndipo cacitatu, tin’dzatambira mabaibai, omwe ni moyo wakusaya kumala. (Aro. 2:6, 7) Pomwe Jezu adalamusidwa, mwakusaya kucedwa apostolo adakhala wakukondwa, ninga momwe iye akhadawauzira. Pambuyo pakupfumbulidwa na kuuzidwa kuti aleke kupalizira, iwo adakondwa. Thangwe ranyi? “Thangwe adakhala na mwayi wakunyozedwa thangwe ra dzina la Jezu.” (Mab. 5:40-42) Iwo adafuna kwene-kwene Mbuya wawo kuposa kukhala na mantha na kuwengedwa na anyamadulanthaka wawo. Iwo adalatiza lufoyi lawo mwa kupalizira mafala ya bwino na nyongo. Abale wathu azinji ntsiku zino, akupitiriza kutumikira Mulungu mwakukhulupirika, napo kuti akugumana na mabvuto. Iwo ambadziwa kuti Yahova an’dzayebwa lini basa lawo na lufoyi lomwe iwo adalilatiza pa dzina lace. w21.03 25 ¶18-19

Akristau wakudzozedwa ambabadwa lini na cidikhiro ca kukakhala kudzulu. Koma Mulungu ndiye omwe ambawapasa cidikhiro cimweci. Iwo ambakumbukira bza cidikhiro cawoci, ambacipempherera ndipo ambadikhirira mwakukomedwa kudzatambira mabaibai yawo kudzulu. Iwo ambadziwa lini kuti mathupi yawo yan’dzakhala tani kudzuluko. (Afil. 3:20, 21; 1 Ju. 3:2) Napo bziri tenepo, iwo akufunisisa kukakhala m’mbuto zawo mu Umambo bwa Mulungu. Akristau wa mabira manango ambakomedwa na cidikhiro comwe munthu ali-yentse ambakhumba kukhala naco, comwe ni kukhala na moyo wakusaya kumala pa dziko la pantsi. Iwo ambadikhirira na mtima wentse ntsiku yomwe an’dzathandizira kukonza dzikoli kuti likhale paraizo. Ndipo akudikhirirambo na mtima wentse ntsiku yomwe an’dzamanga nyumba zawo, kulima minda yawo, na kulera wana wawo pomwe ana thanzi labwino. (Zai. 65:21-23) Iwo akudikhirirambo kudzazungira mbuto zizinji pa dziko la pantsi, kudzawona mapiri, mathengo yakudeka, nyanza, na kupfunza bzinthu bzentse bzomwe Yahova adalenga. Kuthumizira bzimwebzi, comwe cimbawakondwesa kwene-kwene ni kudziwa kuti uxamwali bwawo na Yahova bun’dzapitiriza kukula. w21.01 18-19 ¶17-18

Pomwe Ababulo adapita mu mzindamo acipfudza wentse, wanthu adalewa kuti: ‘Dziko lino liribe wanthu ne bzirombo, ndipo lidaperekedwa kwa Akalideya.’ (Jer. 32:43) Pambuyo pa magole 200 kucokera pomwe Djoweri adalewa bza polofesiya ya dzombe, Yahova adaphatisa basa Jeremiya kuti alewe bzomwe bzingadadzacitika pomwe, pa nkhondo ya Ababulo. Jeremiya adalewa kuti Ababulowo angadafufudza mwakusamala Ajirayeri omwe akhacita bzinthu bzakuipa, aciwaphata wentse aciyenda nawo ku ukapolo. Ndipo Yahova adalewa kuti: ‘“Nin’tsonkhanisa akhombwe azinji wa ntsomba, ndipo iwo an’dzawamedza. Patsogolo pace, nin’dzawatumizira asodzi azinji wa nyama, ndipo iwo an’dzawasodza m’mapiri mwentsene, na m’mphako za matsendwa. . . . Ine nin’dzawabwezera bzakuphonya bzawo pabodzi na pikado zawo.”’ Bzimwebzi bzikulatiza kuti Ajirayeri wakusaya kubverawo angadakwanisa lini kugumana mbuto yakuthawira cirango ca Yahova.—Jer. 16:16, 18. w20.04 5 ¶12-13

Pomwe Loti akhali pa nthawe yakunesa ya moyo wace, iye adacedwa kuteweza malango yomwe Yahova akhadamupasa. Pinango tingakumbuke kuti Loti akhalibe nabzo basa bzomwe Yahova adamuuza kuti acite, ayai akhali munthu wakusaya kubvera. Koma Yahova adapitiriza kumuthandiza kuti apulumuke. Tenepo ‘thangwe ra ntsisi za Yahova,’ anjo adaphata boko la Loti na la wanthu wa m’banja lace acikawasiya kunja kwa mzinda. (Ciy. 19:15, 16) Yahova akhana mathangwe mazinji yomwe yadamucitisa kubvera ntsisi Loti. Pinango Loti akhacita mantha na wanthu omwe akhali kunja kwa mzinda wa Sodoma, ndipopa alibe kucoka mwakamfulumize pamui pace. Pakhana ngozi zinango. Pinango Loti akhadziwa bza wamambo awiri omwe akhadagwera m’micera yomwe ikhana phula m’cigwa comwe cikhali pafupi na mzindayo. (Ciy. 14:8-12) Ninga msolo wa banja, Loti akhana thupo na banja lacero. Kuthimizira bzimwebzi, iye akhadadala ndipo akhana nyumba yakudeka kwene-kwene ku Sodoma. (Ciy. 13:5, 6) N’cadidi kuti palibe ne cinthu cibodzi pa bzomwe bzafotokozedwabzi cingadacitisa Loti kuleka kubvera cenjezo la Yahova mwakamfulumize. Tsono Yahova alibe kundonyang’anisisa kuphonya kwa Loti, koma adamuwona ninga ‘munthu wakulungama.’—2 Pe. 2:7, 8. w20.04 18 ¶13-14

Pambatenga nthawe kuti wale omwe adakudziwani pomwe mukhali mwana abvume kuti tsapano mwakula. Tsono, tsimikizani kuti Yahova ambawona lini kokha mawonekedwe yanu yakunja, iye ambadziwa momwe imwepo muliri na bzomwe mungakwanise kucita. (1 Sam. 16:7) Limbisani uxamwali bomwe munabo na Mulungu. Davide adacita bzimwebzi mwa kumbanyang’anisisa bzomwe Yahova adalenga. Ndipo Davideyo adakumbukira kwene-kwene bzomwe akhapfunza na cirengedweco pakulewa bza Mulengi. (Sal. 8:3, 4; 139:14; Aro. 1:20) Cinthu cinango comwe mungacite, ni kukumbira Yahova kuti akupaseni mphanvu zomwe mukufunikira. Mwa ciratizo, kodi anzanu wa kuxikola ambakusekani thangwe ra kukhala m’bodzi wa Mboni za Yahova? Penu bziri tenepo, pembani kwa Yahova kuti akuthandizeni kupirira bvutolo. Ndipo phatisani basa malango yomwe yakugumanika m’Fala lace, m’mabukhu yathu na m’mavidiyo. Pa nthawe iri-yentse yomwe munim’kumbira Yahova kuti akuthandizeni mukakhala mukugumana na mabvuto, cikhulupiro canu cin’dzakhala cakulimba. Anzanuwo an’dzawona kuti mumbathemba Yahova ndipo iwo an’dzakukhulupirani. w21.03 3 ¶7

Mphaso inango yakusaya kuwoneka ni mpembo. Wanthu omwe ali pa uxamwali bwakuti ponda ndipondembo ambafuna kucezerana bzomwe ambagumana nabzo pa moyo wawo. Kodi bzimwebzi bzimbacitikambo na uxamwali bomwe tinabo na Yahova? Inde! Mwa kuphatisa basa Fala lace, Yahova ambatiuza makumbukidwe yace na momwe ambabvera. M’mipembo yathu tingalewelewe naye ticimuuza makumbukidwe yathu na bzinthu bzomwe bziri mu mtima mwathu. Tenepo, ninga xamwali walufoyi, Yahova ambandotetekera lini kokha mipembo yathuyo koma ambaitawira. Nthawe zinango, iye ambatawira mwakamfulumize, koma nthawe zinango timbafunika kumbapempherera nkhaniyo mwakubwereza-bwereza. Napo bziri tenepo, ifepano tin’funika kutsimikiza kuti mtawiroyo uniperekedwa pa nthawe yabwino na mwa njira yakuthemera. Nthawe zinango, mtawiro wa Mulungu ungakhale wakusiyana na omwe tikhadikhirira. Mwa ciratizo, m’mbuto mwakumalisa mayezo yomwe tikugumana nayo, iye angatipase nzeru na mphanvu ‘[kuti tikwanise kuyapirira.]’ (1Ako. 10:13) Kulewa mwakusaya kupenukira, mpembo ni mphaso ya fovolo. Kodi tingalatize tani kuti timbatenda mphaso imweyi? Mwa kubvera malango ya Yahova yakuti: ‘Mbapembani nthawe zentse.’—1 Ates. 5:17. w20.05 27-28 ¶7-8

Omwe ambacita mapici yakuthamanga ya ntantho utali, kuti aleke kukhukhumudwa pomwe akuthamanga ambafunika kunyang’anisa komwe akuyenda. Tsono akagwa, iye ambalamuka mwakamfulumize aciyamba pomwe kuthamanga. Thangwe ranyi iye ambacita tenepoyo? Iye ambayang’anisa komwe akuyenda na mabaibai yomwe anitambira, sikuti cinthu comwe camukhukhumudwisaco. Pa mapici yathu yakuthamanga kuti tikatambire moyo, nthawe zizinji tingakhukhumudwe thangwe ra kulewalewa ayai tikacita cinthu cakuphonyeka. Ayai mwanzathu omwe tikuthamanga naye pabodzi angaticitire cinthu comwe cingatikalipise. Bzimwebzi bzikacitika tin’funika lini kudabwa. Thangwe tentsenefe ndife wakuperewera ndipo tikuthamanga mu njira ibodzi yakupanikiza yakuyenda ku moyo. Tenepo, mpsakubveka kuti nthawe zinango tingalewe ayai tingacite bzinthu bzomwe bzingakalipise winango acikhala na ‘mathangwe yakudandaulira.’ (Akol. 3:13) Tenepo, tikakhukhumudwa tin’funika lini kunyang’anisa comwe catikhukhumudwisaco, koma tinyang’anise mabaibai yomwe tin’dzatambira kutsogolo, ndipo mbatipitirizeni kuthamanga. Tsono tikabvuma kuti ukali butitazise kulamuka ticipitiriza kuthamanga, tin’dzakwanisa lini kufika kuphampha ndipo tin’dzatambira lini mabaibai. Kuthumizira bzimwebzi, tingakhale ninga cakukhukhumudwisa kwa omwe akuyezera kuthamanga mu njira yakupanikiza kuti akatambire moyo. w20.04 26 ¶1; 28 ¶8-9

Mpolofeta Danyeri adalewa bza cifanikiso cikulu comwe mbali za thupi lace n’za bzitsulo bzakusiyana-siyana. Ndipo mbali iri-yentse ikhaimira boma lomwe lingadatonga m’dziko lakukhalidwa na atumiki azinji wa Mulungu. Boma liri-lentse lingadatonga mu nthawe zakusiyana-siyana. Minyendo ya cifanikisoco nja simbi yakusanganizidwa na dongo. Minyendoyo imbaimira boma lakumalizira lakufotokozedwa na Danyeri, lomwe ni boma lakuphatana la Grã-Bretanha na América. Polofesiya ya Danyeriyi imbalatiza kuti boma limweri lin’dzakhala likadatonga pomwe Umambo bwa Mulungu bun’dzabwera kudzapfudza maboma yentse ya wanthu. Mpostolo Juwau adalewambo bza maboma yomwe yangadadzatonga madziko yakukhalidwa na atumiki azinji wa Mulungu. Mu polofesiya ya Juwau mabomaya yakuimira cirombo comwe cina misolo minomwe. Msolo wacinomwe wa ciromboci ukuimira boma lakuphatana la Grã-Bretanha na América. Mpsakufunika kwene-kwene kudziwa bzimwebzi, thangwe umweyu ni msolo wakumalizira wa ciromboci. Msolo wacinomwe wa ciromboci un’dzakhala ukadatonga pomwe Kristu pabodzi na anyankhondo wakudzulu an’dzabwera kudzapfudza sikuti msolo okhayo, koma cirombo centseneco.—Apok. 13:1, 2; 17:13, 14. w20.05 14 ¶11-12

Mafalaya yambatikumbusa cadidi cakuti, Mulungu ni ntsantsa ya moyo na lufoyi. Yahova ambatifuna ndipo lufoyi lacero, limbaticitisa kubzibva kukhala wakukhotcerereka, wakukondwa ndipo limbaticitisambo kukhala na moyo wathandauzo. Akristau an’funika lini kucita kusankhula kulatiza lufoyi ayai ne. Thangwe rakuti limweri ni lamulo. (Mat. 22:37-40) Tikafika pakumudziwa bwino Yahova tin’dzawona kuti mpsakusaya kunesa kubvera lamulo lakuyamba. Kuthimizira bzimwebzi Yahova ngwakulungama, ndipo iye ambatisamalira na kuticitira bzinthu bzabwino. Tsono pinango bzinganese kubvera lamulo laciwiri. Thangwe ranyi? Thangwe ndakuti abale na mpfumakazi zathu omwe tinawo pabodzi, mbakuperewera. Nthawe zinango, iwo angalewe ayai kuticitira bzinthu bzakulatiza kusaya ntsisi ayai lufoyi. Yahova akhadziwa kuti tingadadzagumana na bzimwebzi, ndipopa iye adacitisa anembi winango wa Bibliya, kunemba malango yakulewa kuti thangwe ranyi tin’funika kulatiza lufoyi kwa winango na momwe tingalatizire lufoyiro. M’bodzi wa anembiwo ni mpostolo Juwau.—1 Ju. 3:11, 12. w21.01 8 ¶1-2

Bziribe basa kuti tina magole mangasi tikutumikira Yahova, tin’funika kubzibvunza kuti: ‘Kodi ndine wakukonzeka kulimbana na mayezo ya Sathani yomwe yangagawanise mtima wangu?’ Kodi n’ciyani comwe mumbacita mukawona kuti pa TV ayai pa interneti pabwera bzithunzi-nthunzi bzomwe bzingakucitiseni kukhala na makumbukidwe yakuphonyeka? Winango ambalewa kuti: ‘Cithunzi-thunzici ayai vidiyoyi ikulatiza lini bzinthu bzamaika.’ Kodi Sathani akuphatisa lini basa cithunzi-thunzico kuti agawanise mtima wanu? Kumbukirani cakucitikaci: Munthu akafuna kubadula nkhuni, ambaphatisa basa tcezo. Ndipo mwakuphatisa basa martelo, munthuyo ambakhomerera tcezoyo pa nkhuni yomwe akufuna kubadulayo. Ndipo iye akakhala akukhoma tcezo, nkhuniyo imbabaduka pang’ono na pang’ono mpaka kumalizika yentsene. Bzimwebzi ni bzomwe bzithunzi-thunzi bzakuipa bzimbacitambo mu mtima mwathu. Pinango bzithunzi-thunzibzo bzingawoneke ninga kuti bziribe kuipa ndipo bzingadzonge lini, ninga momwe imbakhalira ntsonga ya tcezo. Koma mwakusaya kucedwa bzithunzi-thunzibzo, bzingagawanise mtima wa munthu na kumucitisa pikado, ndipo bzingamudzongere uxamwali bomwe anabo na Yahova. Tenepo tcenkhani cinthu ciri-centse cakuipa comwe cingagawanise mtima wanu. Ndipo pitirizani kukhala na mtima wakusaya kugawanika kuti mumbalemekeze dzina la Mulungu. w20.06 11-12 ¶14-15

Tikagumana omwe adadjedjera mwauzimu tin’funika kupitiriza kuwathandiza na kuwalimbikisa. Ninga mwana wakutaika wa m’ciratizo ca Jezu, pinango iwo angakhale na bzinthu bzizinji bzakukumbuka, tenepo pangatenge nthawe kuti ayebwe. (Luka 15:17-24) Ndipo thangwe ra bzinthu bzomwe agumana nadzo m’dziko la Sathaniri, pinango uxamwali bwawo na Yahova bungakhale lini bwakulimba ninga momwe bukhaliri pakuyamba. Ndipopa, tin’funika kuthandiza omwe adjedjera mwauzimu kuti alimbise cikhulupiro cawo kwa Yahova. Mu ciratizo ca Jezu cakulewa bza bira wakutaika, iye adalewa kuti makabusa adaikha bira wace paphewa acimuyendesa kuna mabira yanzace. Makabusayo akhadamala kale mphanvu na nthawe izinji pakunyang’ana birayo. Koma iye akhadziwambo kuti birayo angakwanise lini kufamba yekha, ndipo makabusayo angafunikire kumunyamula pakuyenda naye komwe kukhana mabira yanzaceko. (Luka 15:4, 5) Pinango tingafunike nthawe na mphanvu kuti tithandize omwe adadjedjera mwauzimu kumalisa mabvuto yawo. Koma na thandizo la mzimu wa Mulungu, Fala lace na mabukhu yanango, ifepano tingakwanise kuwathandiza kuti alimbise uxamwali bwawo na Yahova. Nipopa akulu akakumbirani kuti mucitise pfunziro munthu omwe adadjedjera mwauzimu, imwepo mun’funika kubvuma mwayi umweyu. w20.06 28 ¶14-15

Ali-wentse wa ifepano an’funika kulatiza lufoyi, thangwe iro limbadziwikisa Akristau wacadidi. Ifepanombo tin’funika kukhala na ‘cidziwiso caico pabodzi na kuzindikira bzinthu mwakukwanira.’ (Afil. 1:9) Tikasaya kucita bzimwebzi tin’dzandogwinyidwa na ‘mphepo iri-yentse ya bzipfunziso bzakunama thangwe ra kucenjera kwa wanthu’, kuphatanidzambo wale omwe adapanduka. (Aef. 4:14) Pomwe anyakupfunza azinji wa Jezu adasiya kumutewera, Pedru adalewa mwakutsimikiza kuti Jezu akhana ‘mafala ya moyo wakusaya kumala.’ (Ju. 6:67, 68) Napo Pedru akhabvesesa lini bzomwe mafalayo yakhathandauza, iye adapitiriza kukhala wakukhulupirika thangwe akhabvesesa cadidi cakulewa bza Kristu. Tenepo, limbisani cikhulupiro canu pa bzomwe Bibliya limbapfunzisa. Mukacita bzimwebzo cikhulupiro canu cin’dzagwededzeka lini mukagumana na mayezo, ndipo mun’dzathandizambo anzanu kukhala na cikhulupiro cakulimba.—2 Ju. 1, 2. w20.07 8 ¶2; 13 ¶18

Kuti tithandize abale wathu kuti apitirize kufamba m’cadidi, ifepano tin’funika kumbawabvera ntsisi. (1 Ju. 3:10, 11, 16, 17) Ndipo tin’funikambo kumbalatizana lufoyi sikuti pa nthawe yomwe bzinthu bziri bwino, koma na pa nthawembo ya mabvuto. Mwa ciratizo, kodi imwepo mukudziwa m’bale omwe afedwa ndipo akufunikira kutsangalazidwa ayai akufunikira kuthandizidwa mwa njira inango? Kodi mukuwadziwa abale omwe agwedwa na malengwa ya pantsi omwe akufunikira kumangiridwa nyumba za Umambo ayai nyumba zawo caizo? Ifepano timbalatiza kuti timbafuna abale na mpfumakazi zathu ndipo timbawabvera ntsisi sikuti na mafala yokha, koma na bzomwe timbacita. Tikambalatizana lufoyi, timbakhala tikutewezera Baba wathu wakudzulu, Yahova. (1 Ju. 4:7, 8) Njira ibodzi yakufunika kwene-kwene yakulatizira lufoyi, ndiyo kumbalekererana. Mwa ciratizo, munthu angatiphonyere acitikumbira kuti timulekerere. Tingalatize kuti timbafuna munthuyo mwa kumulekerera na kuyebwa bzomwe iye atiphonyera.—Akol. 3:13. w20.07 24 ¶14-15

Kodi wanthu omwe an’dzalamusidwawo, ali-wentse an’dzakhala na mpfunzisi wace-wace, ninga momwe bzimbacitikira ntsiku zino? Kodi wanthu omwe an’dzalamusidwawo an’dzapasidwa gwere kuti ambatsonkhane, ndipo kodi an’dzauzidwa kuti adzapfunzisembo wale omwe an’dzalamusidwa patsogolo pawo? Tikudikhirira kudzacita kuwona bzimwebzi. Tsono comwe ifepano tikudziwa n’cakuti, kuphampha kwa utongi bwa Jezu ‘dziko la pantsi lin’dzadzala na wanthu wakudziwa Yahova.’ (Zai. 11:9) Ifepano tin’dzakhala na bzizinji bzakucita mkati mwa magole 1000, ndipo bzin’dzakhala bzakudekeza! Mkati mwa utongi bwa Kristu bwa magole 1000, atumiki wentse wa Yahova wa pa dziko lentse la pantsi an’dzafunikira kucinja bzinthu bzinango kuti Yahova akomedwe. Tenepo, iwo an’dzafunika kupirira pakupfunzisa wale omwe an’dzalamusidwa, thangwe iwo ambadziwa kale kuti pambafunikira nyongo kuti munthu akunde makhalidwe yakuphonyeka, acilatiza makhalidwe yomwe Yahova ambakomedwa nayo. (1 Pe. 3:8) Mwakusaya kupenukira, wale omwe an’dzalamusidwa an’dzafuna kucita mbali ya atumiki wakubzicepesa wa Yahova, ndipo akadzacita bzimwebzo an’dzakhala akulatiza kuti akufuna kupumusidwa.—Afil. 2:12. w20.08 15-16 ¶6-7

Tikateweza malango ya mpostolo Paulo ticiwona bzakucita bzathu, tin’dzazindikira kuti ifepano tina mphaso na maluso yakupambulika. Mwa ciratizo, bzingacitike kuti mkulu wa gwere lanu ambafotokoza lini bwino nkhani, koma iye ana luso lakupfunzisa bwino anyakupfunza wace wa Bibliya. Ayai bzingacitike kuti iye ambacita bzinthu mwakusiyana na momwe akulu winango ambacitira, koma iye angadziwike kuti ni mkulu wa lufoyi na wakufikirika, omwe ambacitisa abale kukhala wakutsudzuka kumufenderera kuti amukumbire malango ya m’Bibliya. Ayai pinango iye angadziwike thangwe ra khalidwe lace lakutambira bwino alendo. (Aheb. 13:2, 16) Ifepano tikakwanisa kuzindikira maluso na mphaso zomwe Yahova adatipasa timbakhala wakukondwa. Timbazindikirambo kuti tingacite bzizinji kuti tithandize gwere. Ndipo pa nthawe ibodzi-bodzi, bzimwebzi bzimbatithandiza kuti tileke kucitira njiru abale omwe ana maluso yakusiyana na yathu. Bziribe basa mbuto yomwe tinayo m’gwere, ali-wentse wa ifepano an’funika kukulisa luso pa basa lomwe ambacitira Yahova. w20.08 23-24 ¶16-18

Nkhani ya msolo wakuti “The Great Multitude” (‘Thimu Likulu’) idafotokozedwa mu gole la 1935 na m’bale J. F. Rutherford, pa mtsonkhano wacigawo ku Washington, D.C., ku Estados Unidos. Mu nkhani yace, m’bale Rutherford adafotokoza bza wale omwe akucita mbali ya “thimu likulu” lakufotokozedwa pa Apokalipse 7:9. Kucokera pomwe akhanati kubva nkhaniyi, Anyakupfunza wa Bibliyawo akhakumbuka kuti pakhana thumu laciwiri la wanthu omwe angadadzayenda kudzulu, omwe akhana cikhulupiro cakucepa kusiyana na anyakudzozedwa. M’bale Rutherford adaphatisa basa bzinembo kuti afotokoze kuti wanthu omwe ambacita mbali mu thimu likululi alibe kusankhulidwa kuti akakhale kudzulu, koma iwo ni mabira manango ya Kristu, omwe an’dzapulumuka pa “citsautso cikulu” ndipo an’dzakhala na moyo pa dziko la pantsi pano mpaka kale-kale. (Apok. 7:14) Jezu adalewa kuti: “Ndina mabira manango yomwe njathanga lini limweri. Mabira yamweyo nin’funikambo kuyabweresa ndipo yan’dzatetekera fala langu. Mabirayo yan’dzakhala thimu libodzi na makabusa m’bodzi.” (Ju. 10:16) Akristau omwe ambacita mbali ya mabira manangowa akuimira Mboni za Yahova zakukhulupirika, omwe ana cidikhiro cakudzakhala na moyo wakusaya kumala m’paraizo pantsi pano.—Mat. 25:31-33, 46. w21.01 14 ¶1-2

Ifepano tin’funika kukhala wakubziretsa kuti tikwanise kupirira na kumaliza kucita basa lathu la kupalizira. (Mat. 28:19, 20) Ifepano tiribe kubadwa na khalidwe la kubziretsa. Ndipopa kawiri-kawiri timbafuna kucita bzinthu mu njira yakusaya kunesa. Koma nthawe zinango, bzimbakhala bzakunesa kucita bzinthu bzakufunika kwene-kwene mu njira yakusaya kunesa. Tenepo, timbafunika kupfunza kuti tikhale na khalidwe la kubziretsa. Yahova ambatithandiza mwakuphatisa basa mzimu wace wakucena. (Agal. 5:22, 23) Mpostolo Paulo akhali munthu wakubziretsa. Koma iye adazindikira kuti akhafunika kumbamenya thupi lace kuti akwanise kucita bzinthu bzabwino. (1Ako. 9:25-27) Ndipo iye adalimbikisambo winango kuti akhalembo wakubziretsa nakuti ambacite bzinthu bzentse mwakuthemera na ‘mwakulinganizika.’ (1Ako. 14:40) Tin’funika kucita nyongo kuti tipitirize kunamata Yahova, bzomwe bzimbaphatanidza kucita basa la kupalizira.—Mab. 2:46. w20.09 6-7 ¶15-17

Ntsiku zino ifepano tikupalizira m’madziko mazinji mwakusaya kuphingizidwa. Kodi imwepo mumbakhala mu dziko libodzi mwa madziko yomwe yambaletsa lini basa lathu lakupalizira? Penu munti inde, bzibvunzeni kuti: ‘Kodi ndikuphatisa basa ufulu bwangu?’ Ntsiku zakumalizirazi, n’zakupambulika kuna atumiki wa Yahova thangwe iwo adatanganidwa na basa likulu kwene-kwene, lomwe ni basa lakupalizira na la lakupfunzisa wanthu, ndipo iwo akucita basalo pa dziko lentse la pantsi. Pana bzinthu bzizinji bzomwe ifepano tingacite pa basa limweri. Kodi imwepo mungagumane tani phindu na nthawe ya mtendere? (2 Tim. 4:2) Kodi bzingakhale lini bwino kupenda momwe bzinthu bziriri pa moyo wanu kuti mubziwone, ayai muwone m’bodzi wacibale wanu kuti mucinje mucithimizira utumiki bwanu, ninga kuyamba kucita upaiyiniya? Ino ni nthawe lini yakubzigwezekera bzinthu bzakuthupi, thangwe bzin’dzaphata lini basa pa nthawe ya citsautso cikulu. (Mim. 11:4; Mat. 6:31-33; 1 Ju. 2:15-17) Apalizi azinji ambapfunza cirewedwe cipsa kuti akwanise kupalizira na kupfunzisa wanthu bza Yahova. Gulu la Mulungu limbawapasa bzinthu bzomwe bzimbawathandiza kupalizira mu bzirewedwe bzakupitirira 1000! w20.09 16 ¶9-11

N’cikunda wabwino ni n’cikunda wakukhulupirika. Iye ambamenya nkhondo na nyongo kuti akhotcerere omwe ambawafuna ayai bzinthu bzomwe ambabziwona kuti mpsakufunika. Paulo adalimbikisa Timotio kuti abzipereke kwa Mulungu, bzomwe bzikuthandauza kutumikira Mulunguyo mwakukhulupirika. (1 Tim. 4:7) Tikafuna kwene-kwene Mulungu na kubzipereka kwa iye, tin’dzakwanisa kuphatisisa cadidi. (1 Tim. 4:8-10; 6:6) N’cikunda wabwino ambafunikambo kukhala wakubziretsa kuti akhale wakukonzeka kumenya nkhondo. Timotio adapitiriza kukhala wakukhwima mwauzimu thangwe ra kuteweza malango yomwe mpostolo Paulo adamupasa, ndipo iye adacita nyongo kuti akwanise kukunda bzinthu bzapezi-pezi, kukulisa makhalidwe yabwino na kumbapambula nthawe yakuti ambaceze na abale na mpfumakazi zace. (2 Tim. 2:22) Iye akhafunika kubziretsa kuti akwanise kucita bzimwebzi. Ifepano tin’funika kumbakhala wakubziretsa kuti tikunde nkhondo yakumenyana na makumbukidwe yakuipa. (Aro. 7:21-25) Kuthimizira bzimwebzi, ifepano tin’funika kukhala wakubziretsa kuti tipitirize kucinja unthu bwathu kuti tikhale na makhalidwe yabwino. (Aef. 4:22, 24) Ndipo tikakhala taneta kuphampha kwa ntsiku, tingafunikire mphanvu kuti tikwanise kugumanika pa mitsonkhano.—Aheb. 10:24, 25. w20.09 28 ¶9-11

Tin’funika kupirira kuti tikwanise kuthandiza nyakupfunza wa Bibliya kuti ayende patsogolo acifika pa kubatizidwa. Koma tin’funika kupenda kuti tiwone penu iye akufunadi kutumikira Yahova Mulungu ayai ne. Kodi mumbawona bzizindikiro bzakulatiza kuti nyakupfunza wanuyo ambabvera bzomwe Jezu adalewa? Ayai ambandofuna kupfunza nkhani za m’Bibliya? Nthawe zentse, mbawonani nyongo yomwe nyakupfunza wanu wa Bibliya akucita. Mwa ciratizo, kodi iye ambalewa bza lufoyi lomwe analo kuna Yahova? Kodi ambapemba kwa Yahova? (Sal. 116:1, 2) Iye ambakomedwa na kuwerenga Bibliya? (Sal. 119:97) Kodi iye ambafika pa mitsonkhano kawiri-kawiri? (Sal. 22:22) Kodi iye asiya bzomwe akhacita kale-kale ndipo akuphatisa basa bzomwe akupfunza? Kodi iye wayamba kufotokozera abale wace pabodzi na axamwali wace bzomwe akupfunzabzo? (Sal. 9:1) Cinthu cakufunika kwene-kwene, kodi iye akufunadi kukhala m’bodzi wa Mboni za Yahova? (Sal. 40:8) Penu nyakupfunzayo akucita lini nyongo pa bzinthu bzentsenebzi yezerani kuceza naye mwakudeka mtima kuti mukwanise kuwona bvuto lomwe likumucitisa kusaya kuyenda patsogolo, koma mu njira yakuthemera. w20.10 18 ¶14-15

Yahova Pai wace wa Jezu, nthawe zentse ambasankhula kucita bzinthu bzabwino. Ndipo abereki wace omwe adamulera pantsi pano akhacitambo bzakusankhula bzabwino. Napo kuti bziri tenepo, pomwe Jezu adakula, iye akhafunikambo kucita bzakusankhula bzace. (Agal. 6:5) Ndipo mwakundendemeranambo na ifepano, iye akhana ufulu bwakusankhula kucita bzomwe akhafuna. Tenepo iye angadafuna, angadasankhula kucita bzakufuna bzace bzokha. Tsono m’mbuto mwace, Jezu adasankhula kukhala pa uxamwali bwakulimba na Yahova. Jezu adakhala wakukonzeka kucita bzomwe Pai wace adamuuza kuti acite. Ndipo iye adacitadi bzimwebzo. (Ju. 6:38) Iye akhadziwa kuti angadadzawengedwa na wanthu azinji, koma alibe kubvuma kuti bzimwebzi bzimutazise kubvera Yahova. Tenepo, iye adapitiriza kubvera Yahova. Pomwe Jezu adabatizidwa mu gole la 29 E.C., cinthu cakufunika kwene-kwene pa moyo wace cikhali kucita bzomwe Pai wace ambafuna. (Aheb. 10:5-7) Napo pomwe iye akhali pa muti wakuzunzidwira, adatsimikiza kucita bzomwe Baba wace ambafuna.—Ju. 19:30. w20.10 29 ¶12; 30 ¶15

Kodi m’gwere mwanu muna abale ayai mpfumakazi omwe ali kubonera thangwe ra matenda ayai akulimbana na mabvuto yakusiya-siyana ayai adafedwa m’bale wawo? Tikabva kuti pana m’bale ayai mpfumakazi omwe akufunikira thandizo, tingakumbire Yahova kuti atithandize kuwona bzakulewa ayai kuwacitira bzinthu mwakudeka mtima na mwa lufoyi. Mafala yathu na bzakucita bzathu bzin’funika kukhala bzire bzomwe bzinilimbikisa abale na mpfumakazi zathu. (1 Pe. 4:10) Ifepano timbadziwa kuti tingakhale wakukhwimika thangwe rakuti Yahova, anafe pabodzi. Iye ambatithandiza mwakuphatisira basa Jezu na anjo. Ndipo mwakubverana na kufuna kwace Yahova angatithandizembo mwakuphatisira basa wanthu omwe ali mu utongi. Azinji wa ifepano takwanisa kuwona kuti Yahova ambaphatisa basa mzimu wace wakucena kuti acitise abale na mpfumakazi kuti atithandize. Tenepo ninga mpostolo Paulo, ifepano tina mathangwe yakubveka yakulewera kuti: ‘Yahova ni mthandizi wangu, nin’dzagopa lini cinthu. Kodi munthu angandicitenyi.’—Aheb. 13:6. w20.11 17 ¶19-20

Apostolo akhana umboni bwakuti Yahova akhali kumbali yawo. Mwa ciratizo, iye akhadawapasa mphanvu kuti ambacite bzakudabwisa. (Mab. 5:12-16; 6:8) Tsono, iye ambacita lini bzimwebzi na ife ntsiku zino. Koma napo bziri tenepo, Yahova ambatitsimikizira mwakuphatisa basa Fala lace, kuti tikakhala kuti tikuzunzidwa thangwe ra kucita bzinthu bzakulungama, iye ambakomedwa nafe ndipo mzimu wace umbakhala nafe. (1 Pe. 3:14; 4:14) Tenepo, tin’funika lini kucita thupo na bzomwe tin’dzacita kutsogolo tikadzazunzidwa, m’mbuto mwace, tin’funika kulimbisa cikhulupiro cathu cakuti Yahova an’dzatithandiza na kutipulumusa. Ifepano tin’funika kukhulupira mafala ya Jezu yakuti: “Nin’dzakuthandizani kudziwa bzomwe mudzalewe, ndipo anyamadulanthaka wanu an’dzakwanisa lini kukutawirani.” Ndipo Jezu adatitsimikizira kuti: “Mukapirira mpaka kuphampha, mun’dzapulumusa moyo wanu.” (Luka 21:12-19) Lekani kuyebwa kuti Yahova ambakumbukira napo kacinthu kang’ono-ng’ono, komwe atumiki wace wakukhulupirika omwe adafa adacita na cakulinga cakuti adzawalamuse. w21.01 4 ¶12

Mpostolo Paulo ni munthu lini wakuyamba omwe adalewa bza nkhani ya kulamusidwa kwa anyakufa. Djobi adalewambo bza nkhani ibodzi-bodziyi. Iye akhana cikhulupiro cakuti Mulungu angadadzamukumbukira acimulamusa kuti akhale pomwe na moyo. (Djobi 14:7-10, 12-15) ‘Kumuka kwa anyakufa’ ni mbali ya ‘cipfunziso cakuyambirira’ comwe Akristau akhakhulupira. (Aheb. 6:1, 2) Nkhani ya Paulo yakulewa bza kulamusidwa kwa anyakufa, ikugumanika pa 1 Akolinto kapitulo 15. Bzomwe iye adanemba bzidalimbikisa Akristau wakuyambirira. Kapitulo imweyi ingatithandize ndipo ingalimbise cidikhiro cathu cakuti nkhani imweyi in’dzacitikadi. Kulamusidwa kwa Jezu kumbatitsimikizira kuti abale wathu omwe adafa, an’dzalamusidwambo. Napo ifepano tifembo tin’dzalamusidwa. Nkhani imweyi idakhala ‘bzipsa bzabwino’ bzomwe Paulo adapalizira wanthu wa ku Kolinto. (1Ako. 15:1, 2) Ndipo iye adalewa kuti Mkristau akasaya kukhulupira nkhani imweyi ya kulamusidwa kwa anyakufa, cikhulupiro cace n’cakusaya basa.—1Ako. 15:17. w20.12 2 ¶2-4

Kodi n’ciyani cidathandiza Pedru kukhala pomwe na mphanvu? Cinthu comwe cidamuthandiza n’kukumbukira kuti Jezu akhadapempherera kale Pedruyo kuti cikhulupiro ca cileke kuthima. Yahova adatawira mpemboyo. Na kupita kwa nthawe, Jezu adadzawonekera kuna Pedru, ndipo tikupenukira lini kuti iye adacita bzimwebzi kuti amulimbikise. (Luka 22:32; 24:33, 34; 1Ako. 15:5) Ndipo Jezu adawonekerambo kuna apostolo wentse usiku bomwe iwo alibe kupha ne na ntsombayo. Pa nthawe imweyo, Jezu adapasa Pedru mpata wakuti amuuze kuti ambamufuna kwene-kwene. Jezu adalekerera xamwali wace omwe akhamufunayu ndipo adamukhulupira kwene-kwene mwakumupasa mabasa yanango kuti acite. (Ju. 21:15-17) Bzomwe Jezu adacitira mpostolo Pedru bzikulatiza kuti iye ngwa ntsisi kwene-kwene ninga momwe Baba wace aliri. Tenepo, ifepano tikaphonya, tin’funika lini kumbakumbuka kuti Yahova an’dzatilekerera lini na pang’onopo. Lekani kuyebwa kuti Sathani an’funa kuti timbakumbuke tenepoyo. Tsono bwerani timbakumbuke kuti Yahova ambatifuna ndipo ambabvesesa malire yathu, ndipo iyembo ngwakukonzeka kutilekerera tikamuphonyera. Tenepo tin’funika kumutewezera bzikakhala kuti an’dzathu aticitira bzinthu bzomwe tiribe kukomedwa nabzo.—Sal. 103:13, 14. w20.12 20-21 ¶17-19

Ifepano tingapfunze na bziratizo bza wale omwe adatazira kupiritiza kukhala wakuderekha na kukhulupira Yahova. Ndipo kupfunza bziratizobzo, kun’tithandiza kutcekha kucita bzinthu bzakuipa bzomwe iwo adacita. Pomwe Aza adagumana na mabvuto ulendo bwakuyamba, iye adathemba Yahova. Tsono na kupita kwa nthawe, iye alibe kuthemba Mulungu wace kuti amuthandize, m’mbuto mwace, iye adabzithemba yekha kuti amalise mabvuto yaceyo. (2 Nkha. 16:1-3, 12) Pakuyamba, nzeru ya Aza yakuyenda kukakumbira thandizo kwa wanthu wa ku Siriya kuti amuthandize ikhawoneka ninga kuti ingadaphata basa, tsono iribe. Ndipo mwakuphatisa basa mpolofeta wace, Yahova adauza Aza kuti: ‘Pakuti imwepo mwathemba mambo wa ku Siriya m’mbuto mwa kuthemba Yahova Mulungu wanu, gulu la anyankhondo la mambo wa Siriyayo lathawa m’manja mwanu.’ (2 Nkha. 16:7) Ifepano tin’funika lini kumbabzithemba tekha pomwe tikugumana na mabvuto, m’mbuto mwace, timbathembe Yahova kuti atitsogolere na kutithandiza mwakuphatisa basa Fala lace. Napo pa nthawe yomwe tingafunike kucita bzakusankhula mwakamfulumize, tin’funika kukhala wakuderekha na kuthemba Yahova, ndipo iye an’dzatithandiza kuti bzinthu bzitifambire bwino. w21.01 6 ¶13-15

Atumiki winango wa Yahova ambabonera na njala thangwe ra kusaya kobiri zakuti agulire cakudya ayai thangwe ra mabvuto yomwe yambabwera thangwe ra nkhondo. Ndipo winango adafungiridwa m’kawoko thangwe ra cikhulupiro cawo. Koma napo bziri tenepo, wale omwe ambacita mbali ya thimu likulu ambakomedwa thangwe ra kudziwa kuti akadzapulumuka pa kupfunzidwa kwa dziko lakuipali, iwo nthawe zentse an’dzakhala na cakudya cizinji pabodzi na mapfunziso mazinji yakucokera kwa Yahova. Ndipo Yahovayo akadzapfudza dziko la Sathaniri, thimu likulu la wanthu lin’dzabva lini “kutentha kuli-kwentse” thangwe ukali bwa Yahova bun’dzawafikira lini. Cikadzamala citsautso cikulu, Jezu an’dzatsogolera wanthu omwe an’dzakhala pa dziko la pantsiwo ku “madzi ya moyo” wakusaya kumala. (Apok. 7:17) Bzimwebzi bzikulatiza kuti thimu likulu lina cidikhiro cabwino kwene-kwene. Ndipo wanthu azinji omwe an’dzakhala na moyo pa nthawe imweyo, angadzafe lini! (Ju. 11:26) Akristau wa mabira manango ana cidikhiro cabwino ndipo thangwe ra cidikhiroco iwo ambatenda Yahova na Jezu! w21.01 16-17 ¶11-12

Usiku bwakumalizira bwa Jezu pa dziko la pantsi pano, iye akhakumbukira mabvuto yentse yomwe anyakupfunza wace angadadzagumana nayo. Thangwe ra lufoyi lomwe akhanalo kuna axamwali wacewo, Jezu adakumbira Baba wace kuti “[awanyang’anire] thangwe ra nyakuipayo.” (Ju. 17:14, 15) Jezu akhadziwa kuti pambuyo pa iye kubwerera kudzulu, Sathani Dyabu angadapitiriza kucita nkhondo na wale omwe angadadzafuna kutumikira Yahova. Ndipopa, atumiki wa Yahova ambafunikira kukhotcereredwa. Ntsiku zino, ifepano timbafunikira kukhotcereredwa kwene-kwene na Yahova kuposa kale-kale. Sathani adathothedwa kudzulu “ndipo adakalipa kwene-kwene.” (Apok. 12:12) Iye akucitisa wanthu winango omwe ambatizunza kukumbuka “kuti akucita basa lakupambulika la Mulungu.” (Ju. 16:2) Wanthu winango omwe ambakhulupira lini Mulungu, ambatizunza thangwe rakuti ndife wanthu wakusiyana na wanthu winango m’dzikoli. Tsono bziribe basa kuti wanthu ambatizunza, ifepano tiribe mantha. Thangwe ranyi? Mtawiro wace uli pa vesi la ntsiku ya lero. w21.03 26 ¶1, 3

Bzinthu bzentse bzomwe Yahova ambacita, ni thangwe ra lufoyi. Ndipo iye ambalatiza kuti ambatifuna mwakutipasa bzomwe timbafunikira. Ndipo thangwe ra lufoyi likulu lomwe iye analo kuna ifepano, Yahova adatipasa cakulombolera. Jezu adalatizambo kuti ambatifuna mwa kupereka moyo wace kuti atipulumuse. (Ju. 3:16; 15:13) Palibe comwe cingaphe lufoyi lomwe Yahova na Jezu analo kuna wale omwe mbakukhulupirika. (Ju. 13:1; Aro. 8:35) Bzentse bzomwe msolo wa banja ambacita, an’funika kumbabzicita mwalufoyi. Thangwe ranyi bzimwebzi mpsakufunika? Mpostolo Juwau akutawira kuti: “Omwe ambafuna lini m’bale wace [ayai banja lace] omwe ambamuwona, angakwanise lini kufuna Mulungu omwe ambamuwona lini.” (1 Ju. 4:11, 20) Msolo wa banja omwe ambafuna mkazace na wana wace, iye ambawapasa bzomwe ambafunikira kuti akhale pa uxamwali na Yahova, ndipo ambawapasambo bzomwe iwo ambafunikira mwakuthupi. (1 Tim. 5:8) Iye ambapfunzisa wana wace ndipo ambawatsimula. Iye ambasankhula kucita bzinthu bzomwe bzimbatumbizisa Yahova na kupasa phindu banja lace. w21.02 5 ¶12-13

Baba wathu wakudzulu, ambadziwa kuti bzinthu bzakuipa bzomwe bzidaticitikira m’mbuyo bzingaticitise kukumbuka kuti ndife wanthu wapezi-pezi. Koma iye ambawona bzinthu bzabwino bzomwe bziri mu mtima mwathu, ndipo ambawonambo makhalidwe yabwino yomwe ifepano timbakwanisa lini kuyawona tekha. (1 Ju. 3:19, 20) Munthu angacite nyongo kuti asiye kucita bzinthu bzakuipa, koma iye angabwerezere pomwe kucita bzinthu bzakuipabzo ndipo angatepe. N’cadidi kuti nthawe zinango, mpsakubveka kuti tingabzipase mulandu thangwe ra bzinthu bzakuipa bzomwe tacita. (2Ako. 7:10) Napo bziri tenepo, tin’funika lini kumbabzipasa mulandu mwakupitirira malire mwakumbakumbuka kuti ndine munthu wapezi-pezi, ndipo Yahova cipo acidzandilekerera. Makumbukidwe yamweya ngakuphonyeka ndipo yangaticitise kusiya kutumikira Yahova. Tenepo, bwerani timbamufotokozere mu mpembo Yahova nkhani zathu, ndipo timbamukumbire kuti atilekerere. (Zai. 1:18) Yahova akawona kuti imwepo mwakungula, ndipo mukucita nyongo kuti mucinje, iye an’dzakulekererani. Kuthumizira bzimwebzi, kumbirani thandizo la akulu wa gwere. Iwo mwakupirira an’dzakuthandizani kukhala pomwe wakulimba mwauzimu.—Tiy. 5:14, 15. w20.12 23 ¶5-6

Jezu akhalemekeza akazi. Jezu alibe kutewezera Afarizeu omwe akhanyoza akazi. Afarizeu akhambaceza lini na akazi padeca ne kuwafotokozera bzinembo. Tsono mwakusiyana na Afarizeuwo, Jezu akhambaceza na akazi ninga momwe akhambacezera na amuna pakulewa bza cadidi ca m’Bibliya. (Luka 10:38, 39, 42) Jezu akhabvumambo kufamba na akazi mu upalizi bwace. (Luka 8:1-3) Ndipo iye adapasa akaziwo mwayi wakuti akafotokozere apostolo kuti iye walamusidwa kwa anyakufa. (Ju. 20:16-18) Mpostolo Paulo adakumbusa Timotio kuti ambalemekeze akazi. Paulo adazindikira kuti Timotio adayamba kupfunzisidwa bzinembo na mai wace pabodzi na yavu wace. (2 Tim. 1:5; 3:14, 15) Mu tsamba lomwe Paulo adanembera Akristau wa ku Roma, iye adapereka kulimba kuna mpfumakazi mwakucita kuziguma madzina. Paulo akhawona bzomwe mpfumakazizo zikhacita ndipo iye adatenda basa lomwe izo zikhacitalo.—Aro. 16:1-4, 6, 12; Afil. 4:3. w21.02 15 ¶5-6