Maio

Pomwe Jezu akhali pantsi pano, adasankhula kubvera abereki wace.Iye alibe kunyoza abereki wace thangwe ra kukumbuka kuti akhadziwa bzinthu bzizinji kuposa iwo. Ndipo tikupenukira lini kuti pomwe Jezu adadzakula, adakwanirisa udindo bwace ninga mwana wakuyamba kubadwa. Iye adacita nyongo pa kuphata basa laukaripintero lomwe Zuze adamupfunzisa, ndipo na basalo iye adakwanisa kusamalira wanthu wa m’banja mwace. Abereki wa Jezu pinango akhakomedwa kumufotokozera bza kubadwa kwace, na bzomwe Fala la Mulungu likhadaleweratu kale bza iye. (Luka 2:8-19, 25-38) Tsono mpsimwebzi lini bzokha bzomwe Jezu akhapfunza. Iye akhapfunzambo bzinembo payekha, aciwonambo momwe angabziphatisire basa pa moyo wace. Kodi tikudziwa tani kuti Jezu akhali nyakupfunza wabwino wa bzinembo? Tikudziwa thangwe rakuti pomwe iye akhali tswaka, mu Jeruzalemu apfunzisi omwe akhamutetekera, ‘akhambadabwa kwene-kwene na mitawiro yace.’ (Luka 2:46, 47) Pomwe akhana magole 12 yakubadwa, Jezu adalatiza kuti Yahova ni Baba wace.—Luka 2:42, 43, 49. w20.10 29-30 ¶13-14

Kukhulupira kuti Jezu adalamusidwa, ni thangwe lomwe tinalo lakukhulupirambo kuti wanthu winango an’dzalamusidwa. Pomwe Paulo adayamba kunemba nkhani ya kumusidwa kwa anyakufa, iye adaguma bzinthu bzitatu, bzomwe ni: (1) ‘Kristu adafera pikado zathu.’ (2) ‘Iye adapendesedwa.’ (3) ‘Iye adalamusidwa ntsiku ya citatu ninga momwe bzinembo bzimbalewera.’ (1Ako. 15:3, 4) Kodi kufa kwa Jezu, kupendesedwa kwace, na kulamusidwa kwace bzimbathandauza ciyani kwa ifepano? Mpolofeta Zaiya adalewa kuti Mesiya ‘adacosedwa ku dziko la wanthu wa moyo’ ndipo ‘adaikhidwa mu thenje pabodzi na wanthu wakuipa.’ Tsono cinthu cinango cingadacitika pomwe. Zaiya adalewa pomwe kuti Mesiya angadanyamula ‘pikado za wanthu azinji.’ Jezu adacita bzimwebzi pomwe adapereka moyo wace ninga cakulombolera. (Zai. 53:8, 9, 12; Mat. 20:28; Aro. 5:8) Tenepo, kufa, kupendesedwa, na kulamusidwa kwa Jezu bzimbatipasa mathangwe yakubveka yakukhulupira kuti tin’dzakhala wakutsudzuka ku pikado na infa ndipo tin’dzakhala pomwe pabodzi na abale wathu omwe adafa. w20.12 2-3 ¶4-6; 5 ¶11

Kawiri-kawiri, mpostolo Paulo akhapalizira m’nyumba zomwe Adjuda akhanamatira. Mwa ciratizo, pomwe Paulo akhali pa nyumba yakunamatira ku Tesalonika, iye ‘adamala ntsiku zitatu za Sabudu akuceza na [Adjuda] mwakuphatisa basa Bzinembo.’ (Mab. 17:1, 2) Bzikuwoneka kuti Paulo bzikhamunesa lini kupalizira pa nyumba yakunamatira, thangwe iye akhadaleredwa ninga Mdjuda. (Mab. 26:4, 5) Paulo akhawadziwa bwino Adjuda, ndipopa akhawapalizira mwakutsudzuka. (Afil. 3:5) Pomwe adathawa wanthu omwe akhamutsutsa ku Tesalonika na wa ku Bereya, iye adayenda ku Atena. Kumweko, ‘adayamba kuceza na Adjuda pabodzi na wanthu winango omwe akhanamata Mulungu m’nyumba yakunamatira.’ (Mab. 17:17) Koma pomwe Paulo adayenda kukapalizira m’bazali, iye adagumana na wanthu wakusiyana-siyana. Winango mwa wanthuwo akhali wale omwe akhakhulupira nzeru za wanthu ndipo winango akhali lini Adjuda. Iwo akhawona kuti bzomwe Paulo akhapfunzisa bzikhali ‘bzacirendo.’ Tenepo iwo adamuuza kuti: ‘Bzomwe iwepo ukulewabzi, ifepano tikubzibvesesa lini.’—Mab. 17:18-20. w20.04 9 ¶5-6

Lekani kumbabzipasa mulandu mukakhala kuti mudatepa. Kumbukirani kuti palibe ne na m’bodzi wa ifepano omwe angakwanise kukhala wakulungama pamaso pa Mulungu. Tentsenefe timbafunikira kudeka mtima kukulu kwa Mulungu, komwe iye adakulatiza mwakutipasa cakulombolera. (Aef. 1:7; 1 Ju. 4:10) Abale na mpfumakazi zathu za m’gwere angatilimbikise! Iwo angatitetekere tikakhala tikulalewa ndipo angatilimbikise. (Mim. 12:25; 1 Ates. 5:14) Mpfumakazi inango ya ku Nigéria yakucemeredwa Joy, yomwe ikhalimbana na kutepa, idalewa kuti: “Ningadasaya kuthandizidwa na abale palibe comwe ningadacita. Thandizo lomwe abale na mpfumakazi adandipasa, lidandicitisa kuwona kuti Yahova akhatawira mipembo yangu. Inepano ndidapfunza kucokera kwa iwo momwe ningathandizire wanthu winango omwe adatepa.” Tin’funika kukumbukira kuti ni nthawe lini zentse pomwe abale na mpfumakazi zathu ambadziwa kuti tikufunika kulimbikisidwa. Tenepo, tin’funika kuyamba ndifepano kufenderera abale wakukhwima mwauzimu ticiwakumbira thandizo. w20.12 23-24 ¶7-8

Kawiri-kawiri, kuti mukhale pa uxamwali na munthu bwakuti ponda ndipondembo, mun’funika kukhala na nthawe yakumbaceza pabodzi. Pakucezapo mumbapasana nzeru, mumbafotokozerana bzomwe winango adagumana nabzo pa moyo wace, ndipo bzimwebzi bzimbacitisa kuti mukhale pa uxamwali. Nthawe zinango, bzingawoneke ninga kuti mpsakunesa kukhala xamwali wa Jezu. Thangwe ranyi? Thangwe rakuti tikanati kumuwona Jezu maso na maso. Bzimwebzi bzidacitikambo na Akristau azinji wa m’magole dzana yakutoma. Napo bzikhali tenepo, mpostolo Pedru adawauza kuti: ‘Napo mulibe kumuwona, imwepo mumbamufuna. Napo tsapano mukumuwona lini, imwepo mumbamukhulupira.’ (1 Pe. 1:8) Bzimwebzi bzikulatiza kuti ifepano tingakhale pa uxamwali bwakulimba na Jezu, napo kuti tiribe kumuwona maso na maso. Thangwe linango ndakuti ifepano timbakwanisa lini kulewalewa na Jezu. Tikambapemba, timbaceza na Yahova basi. N’cadidi kuti pakupemba timbaphatisa basa dzina la Jezu, koma timbaceza lini naye. Ndipo Jezuyo ambafuna lini kuti timbapembe kwa iye. Thangwe ranyi? Thangwe mpembo ni njira ibodzi yakunamatira, ndipo omwe adathemera kunamatidwa ni Yahova yekha. (Mat. 4:10) Napo bziri tenepo, tingalatize lufoyi lomwe tinalo kuna Jezu. w20.04 20 ¶1-3

Anyakucita masenzeka yakuthamanga ku Geresiya wakale, akhafunika kupirira mabvuto yanango ninga kuneta na kubva kuwawa m’thupi. Tsono kuti iwo akwanise kupirira, akhafunika kuthemba mapfunziso yomwe akhatambira na mpfunzisi wawo na mphanvu zomwe akhanazo. Ninga anyakucita masenzekawo, ifepano timbatambirambo mapfunziso na Yahova kuti tikwanise kuthamanga mapici yomwe tikucita ninga Akristau. Koma ifepano tidasiyana na iwo. Thangwe ranyi? Thangwe ndakuti Yahova ambatipasa mphanvu zakusaya malire kuti tikwanise kupitiriza kuthamanga. Tenepo, tikapitiriza kuthemba Yahova, iye an’dzatipfunzisa lini kokha, koma an’dzatithandizambo kukhala wamphanvu! Mpostolo Paulo adapirira mabvuto mazinji. Kuthumizira pa kutukwaniwa na kuzunzidwa, iye nthawe zinango akhabzibva kukhala wakuneta. Ndipo akhalimbanambo na mabvuto yomwe iye akhayalewa kuti yakhali ninga ‘munga m’thupi.’ (2Ako. 12:7) Paulo akhawona lini mabvutoyo ninga mathangwe yomwe yangadamutazisa kutumikira Yahova. Koma akhayawona ninga mpata wakuti athembe Yahova. (2Ako. 12:9, 10) Thangwe ra kukhala na makumbukidwe yamweya, Paulo adathandizidwa na Yahova kupirira mayezo yentse yomwe akhagumana nayo. w20.04 29 ¶13-14

Kuphata basa na Yahova, Jezu na wanjo ni mphaso yakusaya kuwoneka. (2Ako. 6:1) Kodi timbacita tani bzimwebzi? Mwa kupfunzisa wanthu kuti akhale anyakupfunza wa Kristu. Mpostolo Paulo adalewa bza iye na bza wale omwe ambapalizira mafala ya Mulungu kuti: ‘Ndife anyabasa anzace wa Mulungu.’ (1Ako. 3:9) Kuthumizira bzimwebzi, kupalizira kumbaticitisa kukhala anyabasa anzace wa Jezu. Pomwe iye adapereka lamulo lakuti: ‘Ndokoni, ndipo kapfunziseni wanthu wa mitundu yentse,’ Jezu adalewa pomwe kuti: “Ine nin’dzakhala namwe ntsiku zentse.” (Mat. 28:19, 20) Tsono tani pakulewa bza wanjo? Tikayenda kukapalizira wanthu mafala ya Mulungu, wanjo ambatitsogolera. Umweyu ni mwayi ukulu kwene-kwene! (Apok. 14:6) Na thandizo lomwe Yahova, Jezu na wanjo ambatipasa, ifepano timbakwanisa kuphata basa la kubzala mafala yakulewa bza Umambo bwa Mulungu. Ndipo zinango mwa mbeuzo zimbagwera mitima yabwino ziciyamba kukula. (Mat. 13:18, 23) Kodi mbani omwe ambacitisa kuti mbeu zacadidi zikule na kubala bzisapo? Jezu adafotokoza bzimwebzi mu vesi la lero. w20.05 30 ¶14-15

Mabanja mazinji ntsiku zino yambamala thangwe ra kulambana. Ndipo mabanja manango napo kuti yambakhala nyumba ibodzi, yambalatizana lini lufoyi. Muyeruzi munango wa mabanja adalewa kuti: “Mai, pai na wana ambabverana lini pamui thangwe ali-wentse ambakhala akucita bzace pa komputadori, pa tablet, pa telefoni, ayai akubzina videogame.” Napo kuti ambakhala nyumba ibodzi, iwo ambadziwana lini bwino-bwino. Ifepano tin’funika lini kukhala wakusaya lufoyi ninga momwe wanthu wa m’dzikoli aliri. M’mbuto mwace tin’funika kukulisa lufoyi sikuti kwa wanthu wa m’banja mwathu okha, koma kwa abale na mpfumakazi zathu m’gwere. (Aro. 12:10) Kodi lufoyi cairo n’ciyani? Ni mtundu wa lufoyi omwe wanthu wa m’banja ambalatizana. Umweyu ndiwo mtundu wa lufoyi omwe tin’funika kulatiza kuna abale na mpfumakazi zathu m’gwere. Tikambalatiza lufoyi cairo, timbathandiza m’bale ali-wentse ayai mpfumakazi kutumikira nafe Yahova mwakukondwa.—Mik. 2:12. w21.01 20 ¶1-2

Thimu la bola kuti liwine lin’funika kukhala lakubverana. Mpsibodzi-bodzimbo na mtima wathu. Mtimayo ungawine kokha penu makumbukidwe na bzikhumbo bzikubverana na kutumikira Yahova. Tenepo lekani kuyebwa kuti Sathani akufuna kwene-kwene kugawanisa mtima wanu. Ndipo iye akufunambo kuti makumbukidwe yanu, bzomwe mumbafuna na momwe mumbabvera, bzipitane na mitemo Yahova. Tsono kuti imwepo mukwanise kutumikira Yahova, mun’funika kubzipereka kwa iye na mtima wanu wentse. (Mat. 22:36-38) Tenepo lekani kubvuma kuti Sathani agawanise mtima wanu! Pembani kwa Yahova ninga momwe Davide adacitira, iye adati: ‘Ndipaseni mtima wakusaya kugawanika.’ Citani ciri-centse comwe mungakwanise kuti muphatise basa mafalaya pa moyo wanu. Ndipo pa cinthu ciri-centse comwe mungafune kucita, napo cikhale cing’ono ayai cikulu mbalatizani kuti mumbalemekeza dzina la Mulungu. Mukacita bzimwebzi, mun’dzakhala m’bodzi wa Mboni za Yahova omwe ambalemekezesa dzinali. (Mim. 27:11) Ndipo tentsene pabodzi na mpolofeta Mikeya tin’dzalewa kuti: ‘Ife tin’dzafamba m’dzina la Yahova Mulungu wathu, mpaka kale-kale.’—Mik. 4:5. w20.06 13 ¶17-18

Pomwe mambo wa kumpoto mwakuthandizidwa na maboma yanango ya pa dziko la pantsi an’dzamukira atumiki wa Mulungu, bzimwebzi bzin’dzacitisa kuti Mulungu Wamphanvu-zentse akalipe nabzo, ndipo nkhondo ya Armagedo in’dzayamba. (Apok. 16:14, 16) Pa nthawe imweyi, mambo wa kumpoto na mitundu inango yomwe ikucita mbali ya Gogi wa Magogi an’dzapfudziwa, ndipo pan’dzawoneka lini ‘nyakumuthandiza.’ (Dan. 11:45) Pa Danyeri 12:1 pambafotokoza momwe tin’dzapulumusidwira pabodzi na momwe an’dzapfudzidwira mambo wa kumpoto na madziko yomwe yakumuthandizira. (Dan. 12:1) Kodi vesiri likuthandauza ciyani? Migeli ni dzina linango la Mambo wathu, Jezu Kristu. Iye akuthandiza atumiki wa Mulungu kuyambira mu 1914, pomwe adayamba kutonga kudzulu. Tsapanopapa Migeli an’pfudza anyamadulanthaka wace wentse pa nkhondo ya Armagedo. Nkhondoyo in’dzakhala cakucitika cakumalizira comwe Danyeri adalewa kuti ni nthawe ya ‘matsautso makulisa’ yomwe yakanati kuwoneka kuyambira pomwe wanthu adalengedwa.—Apok. 6:2; 7:14. w20.05 15-16 ¶15-17

Pomwe Zuze akhali kapolo na pomwe akhali m’kawoko, palibe comwe angadacita kuti bzinthu bzicinje pa moyo wace. Kodi n’ciyani comwe cidamuthandiza kuti akhale na makumbukidwe yabwino? M’mbuto mwakukumbukira kucita bzinthu bzentse bzomwe iye angadakwanisa lini kucita, Zuze adacita nyongo ya kuphata basa lomwe adapasidwa m’kawokomo. Iye adapitiriza kuwona Yahova kukhala munthu wakufunika kwene-kwene pa moyo wace. Na tenepo Yahova adasimba bzinthu bzentse bzomwe Zuzeyo akhacita. (Ciy. 39:21-23) Nkhani ya Zuze ikutikumbusa kuti dzikoli lidaipa, ndipo wanthu wace an’dzaticitira bzinthu bzakusaya cirungamo. Napo m’bale ayai mpfumakazi, angaticitire bzinthu mwakusaya kukhulupirika. Tsono tikambawona Yahova ninga tsendwa lathu, ayai pakuthawira pathu tin’dzasiya lini kumutumikira. (Sal. 62:6, 7; 1 Pe. 5:10) Kumbukiranimbo kuti pomwe Yahova adalotesa Zuze, Zuzeyo akhana magole 17 yakubadwa. Ndipo napo kuti iye akhali mwana, Yahova adamukhulupira. Ntsiku zinombo alumbwana azinji ali ninga Zuze, iwo ambakhulupirambo Yahova. Winango wa iwo adacitiridwa bzinthu bzakusaya cirungamo acifungiridwa m’kawoko thangwe ra kukhala wakukhulupirika kwa Mulungu.—Sal. 110:3. w20.12 16 ¶3; 17 ¶5, 7

Mpostolo Pedru na Juwau akhawona kuti kuzunzidwa thangwe ra kukhala mteweri wa Jezu na kupalizira bzipsa bzabwino cikhali cinthu cakuthemera. (Mab. 4:18-21; 5:27-29, 41, 42) Anyakupfunza wa Jezu akhalibe mathangwe yakukhalira na manyazi. Akristauwo adacita bzinthu bzizinji bza kuthandiza winango kuposa anyamadulanthaka wawo. Mwa ciratizo, mabukhu ya m’Bibliya yomwe Akristauwo adanemba, yakadapitiriza kuthandiza wanthu azinji na kuwapasa cidikhiro. Umambo bomwe iwo adapalizira, bwayamba kale kutonga, ndipo tsapanopapa buniyamba kutonga dziko lentse la pantsi. (Mat. 24:14) Ndipo maboma makulu-makulu yomwe yadazunza Akristau wakuyambirira yadamala kale kupfudzika. Sikuti bzokhabzo, anyakupfunza wakukhulupirika wale, tsapano ni wamambo kudzulu. Tsono, wanthu omwe akhawatsutsa wale adamala kufa, ndipo napo acidzalamusidwa, iwo an’funika kudzabvera Umambo bomwe bukhapaliziridwa na Akristau omwe iwo akhawawenga.—Apok. 5:10. w20.07 15 ¶4

Abalahamu akhana cikhulupiro cakulimba pa bzomwe Mulungu adalewa kuti angadadzacita ndipo bzikhandokhala ninga kuti iye akuwona ule omwe angadadzakhala Mambo wa Umambo bwa Mulungu, Nyakudzozedwa ayai Mesiya. Ndipopa Jezu adauza Adjuda wa mu nthawe yace kuti: ‘Abalahamu pai wanu adakomedwa kwene-kwene pomwe akhadikhirira kuwona ntsiku yangu ndipo iye adaiwona, acikomedwa.’ (Ju. 8:56) Kulewa mwakusaya kupenukira, Abalahamu akhadziwa kuti mbadwo zace zingadakhala wamambo omwe angadadzathandizidwa na Yahova, ndipo iye akhali wakukonzeka kudikhirira Yahovayo kukwanirisa bzomwe akhadalewa. Kodi Abalahamu adalatiza tani kuti akhadikhiriradi mzinda, ayai Umambo bwakukhazikisidwa na Mulungu? Cakuyamba, Abalahamu alibe kucita tsantsa na maboma ya wanthu. Abalahamu adakhala m’mbuto zakusiyana-siyana, koma alibe kuthandizira boma liri-lentse la wanthu. Kuthimizira bzimwebzi, Abalahamu alibe kulinga kukhala na umambo bwace. M’mbuto mwace, Abalahamu adapitiriza kubvera Yahova acidikhirira kuti iye akwanirise bzomwe adalewa. Mwakucita bzimwebzi, Abalahamu adalatiza kuti cikhulupiro comwe akhanaco kwa Yahova cikhali cakulimba kwene-kwene. w20.08 3 ¶4-5

Yahova akutiuza kuti m’dziko lipsa palibe omwe an’dzalewa kuti: ‘Ndikuduwala’. (Zai. 33:24) Tenepo, wale omwe an’dzalamusidwa an’dzakhala na thanzi labwino. Tsono iwo an’dzakhala akanati kukhala wakulungamiratu. Thangwe iwo acilamusidwa wakulungamiratu ifepano tingakwanise lini kuwazindikira. Bzikuwoneka kuti mkati mwa utongi bwa Kristu bwa magole 1000, wanthuwo an’dzakhala wakulungamiratu mwa pang’ono na pang’ono. Ndipo kuphampha kwa magole 1000, Jezu an’dzabwezera Umambobo kwa Baba wace. Pa nthawe imweyo, Umambobo bun’dzakhala bwakwanirisa kale cakulinga cace, comwe ni kucitisa wanthu wentse kukhala wakulungamiratu. (1Ako. 15:24-28; Apok. 20:1-3) Kodi mun’dzacita ciyani mukadzawona kuti adzinza wanu ayai axamwali wanu alamusidwa? Kodi mun’dzalira ayai mun’dzasekerera? Kodi mun’dzaimba nyimbo yakutenda Yahova? Comwe ifepano tikudziwa n’cakuti kumuka kwa anyakufa kun’dzathimizira lufoyi lomwe munalo kale kwa Yahova na Jezu. w20.08 17 ¶9-10

Mpostolo Paulo adalimbikisa Mkristau kubzipenda kuti awone penu angasankhulembo kubakatumikira Mulungu akali khowa. (1Ako. 7:8, 9) Kulewa cadidi, Paulo akhakumbuka lini kuti Akristau wakusaya kulowola ayai kulowodwa akhasalira m’mbuyo. Ndipopa iye adasankhula Timotio, omwe akhanati kulowola kuti asamalire maudindo yakufunika kwene-kwene. (Afil. 2:19-22) Bzimwebzi bzikulatiza kuti mpsakuphonyeka kukumbuka kuti m’bale an’themera lini kupasidwa maudindo thangwe rakuti akanati kulowola. (1Ako. 7:32-35, 38) Jezu na Paulo alibe kungingimiza Akristau kulowola ayai kukhala wakusaya kulowola. Tsono, kodi nfundo njiponi pa nkhani imweyi? Ntsanza ya Mulindiri ya 1 Outubro, 2012, idalewa bwino bza nkhani imweyi, Iyo idati: “Mbali zentse ziwirizi, [kulowola na kusaya kulowola] zingalewedwe kuti ni mphaso zakucokera kwa Mulungu. . . . Yahova ambawona lini nkhani yakusaya kulowola ayai kulowodwa ninga cinthu cakupasa manyazi.” Tenepo, wale omwe akanati kulowola ayai kulowodwa ana mbuto yawo m’gwere la Mulungu, ndipo ifepano tin’funika kulemekeza bzimwebzo. w20.08 28 ¶8-9

M’madziko mazinji, wanthu akabva bzipsa bzabwino, ambafuna kupfunza bzizinji. Bzimwebzi ndibzo bzomwe iwo ambakhala akudikhirira kubva! Tsono m’madziko yanango, wanthu ambalatiza kuti alibe basa na Mulungu ayai na Bibliya. Tani pakulewa bza wanthu wa komwe mumbakhala? Bziribe basa momwe bzinthu bziriri, Yahova an’funa kuti ifepano tipitirize kupalizira mpaka iye adzalewe kuti bzakwana. Nthawe yace ikakwana, Yahova an’dzaimisa basa lakupalizira, ndipo ‘cimaliziro cin’dzafika.’ (Mat. 24:14) Jezu adauza anyakupfunza wace makhalidwe yomwe wanthu angadakhala nayo pabodzi na bzomwe bzingadadzacitika mu ntsiku zakumalizira. Ndipo iye adawauza pomwe kuti ‘pitirizani kukhala tceru.’ (Mat. 24:42) Pa nthawe ya Nowa, pakhana bzinthu bzizinji bzomwe bzidatazisa wanthu kubvera cenjezo lomwe Nowayo adawapasa. Bzimwebzi bzingaticitikirembo ntsiku zino. (Mat. 24:37-39; 2 Pe. 2:5) Ndipopa ifepano tin’funika kupitiriza kucita basa lomwe Yahova atipasa. w20.09 8 ¶1-2, 4

Sathani ana ‘ukali bukulu,’ ndipo ifepano tingakhale tikubzinamiza tikakumbuka kuti tingatcenkhe ukali bwacebo. (Apok. 12:12) Mwakusaya kucedwa tentsene tin’dzagumana na bzinthu bzomwe bzin’dzayeza cikhulupiro cathu. Kutsogoloku kukubwera ‘citsautso cikulu comwe cikanati kucitika kale kucokera pa ciyambi ca dziko mpaka pano.’ (Mat. 24:21) Pa nthawe imweyo wanthu wa m’banja mwathu angadzatizonde, ndipo pinango basa lathu lakupalizira lingadzamale. (Mat. 10:35, 36) Ninga Mambo Aza, kodi tin’dzakhulupira kuti Yahova an’tithandiza na kutikhotcerera? (2 Nkha. 14:11) Ntsiku zino Yahova ambatikonzekeresa kuti cikhulupiro cathu cikhale cakulimba. Iye akuphatisa basa ‘kapolo wakukhulupirika na wanzeru’ kuti ambatipase ‘cakudya pa nthawe yace’ comwe cimbatithandiza kupitiriza kukhala na cikhulupiro cakulimba. (Mat. 24:45) Tsono ifepano tin’funika kucitambo mbali yathu kuti tikhale na cikhulupiro cakulimba kwa Yahova.—Aheb. 10:38, 39. w20.09 18 ¶16-18

Mwakubverana na kufuna kwace, Yahova angaphatise basa mzimu wace wakucena kuti acitise atongi kucita bzomwe iye akufuna. Wanthu ambakonza mgero kuti madzi yambapite na m’mwemo. Mpsibodzi-bodzimbo, Yahova angaphatise basa mzimu wace kuti acitise atongi kucita bzomwe iye akufuna. Bzimwebzi bzikacitika wanthu omwe ali pa utongi, ambatokonyedwa ndipo ambacita bzinthu bzomwe bzimbathandiza atumiki wa Mulugu. (Ndendemezerani na Ezara 7:21, 25, 26.) Kodi n’ciyani comwe tingacite? Tin’funika kupempherera ‘amambo na atongi wentse,’ akakhala akusankhula kucita bzinthu bzomwe bzingatokonye moyo wathu na utumiki bwathu. (1 Tim. 2:1, 2; Neh. 1:11) Ninga momwe adacitira Akristau wakuyambirira, ifepanombo tin’funika kupemba kwa Mulungu kuti athandize abale na mpfumakazi zathu omwe ali mkawoko.—Mab. 12:5; Aheb. 13:3. w20.11 15 ¶13-14

Penu imwepo ndimwe omwe mukhapfunzisa munthuyo, mumbakhala wakukondwa mukawona nyakupfunza wanuyo akubatizidwa! (1 Ates. 2:9, 20) Anyakupfunza wa Bibliya omwe abatizidwa tsapanopa, ambakhala na ‘matsamba yakubzitumbiza nayo’ sikuti na omwe adawacitisa pfunziro, koma na gwere lentse. (2Ako. 3:1-3) Mpsakudekeza kwene-kwene kuwona kuti mkati mwa magole manayi mbogo ya anyakupfunza wa Bibliya ikhali ya mamidyau 10 mwezi uli-wentse pa dziko lentse la pantsi. Ndipo pa gole liri-lentse mbogo ya wanthu wakupitirira 280 000 akhabatizidwa acikhala Mboni za Yahova. Kodi tingathandize tani pomwe mamidyau ya anyakupfunza winango wa Bibliya kuti afike pa kubatizidwa? Pakuti Yahova akadapereka nthawe yace na mpata kwa wanthu kuti akhale anyakupfunza wa Jezu, ifepano tin’funika kucita ciri-centse kuti tiwathandize kuti afike pakubatizidwa. Thangwe rakuti nthawe yasala pang’ono!—1Ako. 7:29a; 1 Pe. 4:7. w20.10 6 ¶1-2

Mambo Sauli alibe kubvera Yahova. Ndipo pomwe mpolofeta Samuyeri adauza Sauli kuti waphonya, iye alibe kubvuma kuphonya kwaceko. M’mbuto mwace iye adayeza kubzikhululukira mwa kulewa kuti bzomwe akhadacitabzo bzikhali lini bvuto likulu, ndipo adalewa pomwe kuti ni wanthu omwe adamungingimiza kucita bzimwebzo. (1 Sam. 15:13-24) Sauli akhadacita kale bzinthu bzakundendemerana na bzomwe adacitabzo. (1 Sam. 13:10-14) Ndipo bzakupasa ntsisi mpsakuti iye adabvuma kuti mtima wace ukhale wakubzikuza. Sauli alibe kucinja makumbukidwe yace, tenepo Yahova alibe kumubvuma, koma adamulamba. Pomwe tikupfunza bza Sauli, tingabzibvunze mibvunzo iyi: ‘Ndikakhala kuti ndikuwerenga malango yakucokera m’Fala la Mulungu, kodi nimbakhala na mtima wakufuna kubzikhululukira? Kodi nimbakumbuka kuti bzomwe ndikucita bziribe kuipa kwene-kwene? Kodi nimbapasa mulandu wanthu winango pa bzomwe ndikucita?’ Penu mtawiro ngwakuti inde pa mibvunzo yentseneyi, tin’funika kucinja makumbukidwe pabodzi na makhalidwe yathu. Tikasaya kucita bzimwebzi, mtima wathu un’dzakhala wakubzikuza ndipo Yahova an’dzatiwona lini ninga axamwali wace. w20.11 20 ¶4-5

Maswaka sankhulani omwe mukufuna kumutumikira. Imwepo mun’funika kudziwa Yahova, cakulinga cace na kuwona momwe mungaphatisire basa bzomwe iye ambafuna pa moyo wanu. (Aro. 12:2) Tenepo mukacita bzimwebzi, imwepo mun’dzakwanisa kucita cakusankhula cakufunika kwene-kwene pa moyo wanu, comwe ni kusankhula kutumikira Yahova. (Djos. 24:15) Ndipo mukapitiriza kuteweza m’ndandanda yanu yakumbawerenga Bibliya ntsiku zentse, lufoyi lomwe munalo kuna Yahova lin’dzapitiriza kukula, ndipo cikhulupiro canu cin’dzakhala cakulimba. Sankhulani kuikha pa mbuto yakuyamba bzomwe Yahova ambafuna. Dziko la Sathaniri limbalewa kuti mukaphatisa basa luso lanu kuti mugumane bzomwe mukufuna mun’dzakhala wakukondwa. Tsono dziwani kuti wentse omwe ambalinga bzinthu bzakuthupi ‘abzibweresera wokha mabvuto mazinji’ pa moyo wawo. (1 Tim. 6:9, 10) Koma mwakusiyana na bzimwebzi, imwepo mukabvera Yahova na kusankhula kucita bzomwe iye ambafuna, moyo wanu un’dzakufambirani bwino ndipo ‘mun’dzacita bzinthu mwanzeru.’—Djos. 1:8. w20.10 30-31 ¶17-18

Mu nthawe ya Akristau wakuyambirira, mafala yomwe Jezu adapalizira, yadacitisa wanthu kukhala na cidikhiro. Iye adauza ateweri wace kuti apitirize kucita basa lomwe iye adaliyambisa. Basa la kupalizira ‘mpaka mbuto zakutali za pa dziko la pantsi.’ (Mab. 1:8) Tsono ateweriwo angadakwanisa lini kucita basalo mwa iwo okha. Jezu adalewa kuti iwo angadzatambira mzimu wakucena ninga ‘mthandizi’ kuti uwathandize. (Ju. 14:26; Zak. 4:6) Ateweri wa Jezu adatambira mzimu wakucena pa Pentekosite wa mu 33 E.C. Na thandizo la mzimu wakucenayo iwo adayamba kupalizira. Ndipo pa nthawe ing’ono-ng’ono wanthu azinji adabvuma mafala ya Mulungu. (Mab. 2:41; 4:4) Pomwe wanthu adayamba kuwazunza, iwo alibe kubva mantha ayai kusiya kupalizira. M’mbuto mwace, iwo adakumbira Yahova kuti awathandize. Tenepo, anyakupfunzawo adapemba kwa Yahovayo kuti: ‘Bvumani kuti atumiki wanu apitirize kulewalewa mafala yanu mwakukhwimika.’ Iwo adadzala na mzimu wakucena ndipo adapitiriza ‘kulewalewa mafala ya Mulungu mwakukhwimika.’—Mab. 4:18-20, 29, 31. w20.10 21 ¶4-5

Thangwe ranyi ifepano tingatsimikize kuti Yahova adalamusa Jezu acikhala pomwe na moyo? Pambuyo pa Jezu kulamusidwa, wanthu azinji adamuwona ndipo adauzambo wanthu winango. (1Ako. 15:5-7) Mpostolo Paulo adalewa kuti munthu wakuyamba pa wanthuwo ni Pedru (Kefa). Thimu la anyakupfunza lidalewambo kuti Pedru adawona Jezu pambuyo pa kulamusidwa. (Luka 24:33, 34) Kuthumizira bzimwebzi Paulo adalewambo kuti: ‘Apostolo 12’ adawonambo Jezu pambuyo pa iye kulamusidwa. Kristu ‘adawonekera kuna abale wakupitirira 500 pa nthawe ibodzi’ pa mtsonkhano wakudekeza omwe umbagumidwa pa Mateu 28:16-20. Jezu ‘adawonekerambo kwa Tiyago’ pinango pentse akhali m’bale wace omwe pakuyamba akhakhulupira lini Jezuyo ninga Mesiya. (Ju. 7:5) Pambuyo pakuwona kulamusidwa kwa Jezu, Tiyago adatsimikiza kuti Jezu akhalidi Mesiya. Mpsabwino kudziwa kuti mu gole la 55 E.C., pomwe Paulo adanemba tsamba laceri, wanthu azinji omwe adawona Jezu pambuyo pa iye kulamusidwa, akhana moyo ndipo wanthu omwe akhapenukira bza nkhani ya kulamusidwa kwa anyakufa, akhana mwayi wakubvunza wanthu amwewo kuti akhale na umboni. w20.12 3 ¶5, 7-8

Tikakhala tikubva lini bwino m’thupi, ayai tikakhala tikuduwala kwa nthawe itali, bzimbakhala bzakunesa kukhala na makumbukidwe yabwino. Tenepo kumbirani thandizo Yahova. Napo kuti iye angaticize lini mwakudabwisa, koma angatitsangalaze na kutipasa mphanvu kuti tikwanise kupirira. (Sal. 94:19) Mwa ciratizo, iye angaphatise basa abale na mpfumakazi zathu kuti atithandize mabasa ya pa mui, ayai kuti atithandize kuyenda kukagula bzinthu. Iye angacitise abale wathu kutipempherera ayai angatikumbuse mavesi yakutsangalaza yakugumanika m’Bibliya ninga yale yakulewa bzacidikhiro ca kudzakhala na moyo wakulungama, wakusaya matenda, kubva kuwawa mu dziko lipsa. (Aro. 15:4) Nthawe zinango tingabzibve kuti tatepa thangwe ra kusaya kukwanisa kupalizira ninga momwe tikhacitira kale-kale. Mpfumakazi yakucemeredwa Laurel, idamala magole 37 ikupuma na makina yakupumira. Mpfumakaziyo, ikhaduwala Cancro, ikhadacitidwa kale operação kazinji kentse, ndipo ikhabva kuwawa thupi lentse. Mpfumakaziyo ikhapalizira adotolo na wentse omwe akhabwera kudzaizungira ndipo idathandiza wanthu 17 kudziwa cadidi ca m’Bibliya! w20.12 24 ¶9; 25 ¶12

Mpostolo Paulo akhafunikira thandizo. Mu gole la 56 E.C., thimu la wanthu lidapfuwira Paulo kunja kwa templo ku Jeruzalemu ndipo adayeza kumupha. Mangwana yace pomwe Paulo adayendesedwa ku Sinedriyo, thimu la wanthu lire likhafuna kumupha. (Mab. 21:30-32; 22:30; 23:6-10) Pa nthawe imweyi, pinango iye adabzibvunza kuti: “Nin’funikira kupirira bzimwebzi mpaka lini?” Kodi Paulo adatambira thandizo liponi? Usiku bomwe Paulo adamangidwa, ‘Mbuya’ Jezu adaima patsogolo pace acimuuza kuti: ‘Khala wakukhwimika! Pakuti ninga momwe wandicitira umboni bwakukwanira ku Jeruzalemu, iwepo un’funikambo kukandicitira umboni ku Roma.’ (Mab. 23:11) Mafala yamweya yadamulimbikisa Paulo! Jezu adatenda Paulo thangwe ra umboni bomwe adacitira ku Jeruzalemu, ndipo Jezuyo adalimbikisa Paulo kuti afike ku Roma kuti akacitirembo umboni. Iye adalimbikisa Paulo mwa kumuuza kuti an’fika ku Roma kuti akacitirembo umboni. Pambuyo pa kulimbisidwako, Paulo adabzibva wakukhotcerereka ninga momwe mwana ambabvera akakhala ali m’manja mwa Pai wace. w20.11 12 ¶1, 3; 13 ¶4

Cidikhiro cathu ca Umambo ciri ‘ninga ndangula ya moyo,’ yomwe imbatithandiza kukhala wakuderekha napo pa nthawe yomwe tikugumana na mabvuto ayai tikucita thupo. Kumbukirani bzomwe Yahova adalewa kuti bzin’dzacitika kutsogolo. Pa nthaweyo, palibe ne na m’bodziyo omwe an’dzacita thupo na cinthu ciri-centse. (Zai. 65:17) Kumbukiranimbo mtendere omwe tin’dzakhala nawo m’dziko lipsa, momwe mun’dzacitika lini bzinthu bzakuipa. (Mik. 4:4) Imwepo mungalimbisembo cidikhiro canu, mwakumbafotokozera anzanu bzomwe bzin’dzacitika m’dziko lipsa. Tenepo, citani bzentse bzomwe mungakwanise pa basa lakupalizira na kupfunzisa wanthu kuti akhale anyakupfunza. Mukacita bzimwebzi, mun’dzakhala na “citsimikizo centse ca cidikhiro mpaka kuphampha.” (Aheb. 6:11) Pakuti tiri ku phampha kwa ntsiku zakumalizira za dzikoli, ifepano tin’gumana na mabvuto mazinji yomwe yangaticitise kukhala na thupo. Ifepano tin’dzakwanisa kupirira mabvutoyo ticipitiriza kukhala wakuderekha, sikuti mwa ife tekha, koma mwakuthemba Yahova. Mbatilatizeni mwa bzicito bzathu, kuti timbakhulupira mafala yomwe Yahova adalewa yakuti: ‘Mun’dzakhala wamphanvu mukapitiriza kukhala wakuderekha na wakukhulupirika.’—Zai. 30:15. w21.01 7 ¶17-18

Onani kuti Tiyago 5:11 ambalewa bza lufoyi cairo la Yahova pabodzi na khalidwe linango lomwe limbaticitisa kumufenderera, lomwe ni ntsisi zace. (Kuf. 34:6) Njira ibodzi ya momwe Yahova ambalatizira ntsisi kwa ifepano, ndiyo kutilekerera bzomwe timbamuphonyera. (Sal. 51:1) M’Bibliya, fala lakuti ntsisi limbathandauza bzinthu bzizinji sikuti kundolekerera munthu akaphonya. Ntsisi ni momwe munthu ambabvera mu mtima mwace akawona munthu munango adasunama, ndipo ambacita ciri-centse kuti athandize munthuyo. Yahova akutiuza kuti ana cikhumbo cikulu cakufuna kutithandiza, kuposa comwe mai ambakhala naco kwa mwana wace. (Zai. 49:15) Tikakhala tidasunama, ntsisi za Yahova zimbamucitisa kuti atithandize. (Sal. 37:39; 1Ako. 10:13) Ifepano tingalatize ntsisi kwa abale na mpfumakazi zathu mwa kuwalekerera akatiphonyera, na kuleka kuwakoyera ca ku mtima. (Aef. 4:32) Koma njira yakuyamba ya momwe tingalatizire ntsisi, ndiyo kuthandiza abale na mpfumakazi zathu akakhala kuti akugumana na mabvuto. Na tenepo, timbakhala tikutewezera Yahova omwe ngwalufoyi cairo.—Aef. 5:1. w21.01 21 ¶5

Msolo wa banja an’funika lini kumbamala nthawe izinji akuphata basa mpaka kucita kutazira kumbathandiza banja lace kukhala na cikhulupiro cakulimba na kumbalilatiza lufoyi ndipo an’funikambo kumbawapfunzisa. Yahova ambatipfunzisa na kutithandiza, thangwe iye ambadziwa bzomwe mpsabwino kuna ifepano. (Aheb. 12:7-9) Jezu ambatewezera Pai wace mwakupfunzisa mwalufoyi wale omwe ali pantsi pa utongi bwace. (Ju. 15:14, 15) Iye ambapereka malango ya mphanvu, koma mwakudeka mtima. (Mat. 20:24-28) Ndipo iye ambabvesesa kuti ifepano ndife wanthu wakuperewera, ndipo kawiri-kawiri timbacita bzinthu bzakuphonyeka. (Mat. 26:41) Msolo wa banja omwe ambatewezera Yahova na Jezu, ambakhala munthu wakubvesesa. Ndipo iye ambabvesesa kuti wanthu m’banja lace, ni wanthu wakuperewerambo. Tenepo iye ambathamangira lini kukalipira mkazace pabodzi na wana wace. (Akol. 3:19) M’mbuto mwace, iye ambateweza malango yomwe yali pa Agalatiya 6:1 ndipo ambayezera kuthandiza banja lacero na ‘[mtima] wakuderekha,’ ndipo iye ambakumbukira kuti iye ni munthu wakuperewerambo. Tenepo ninga Jezu, iye ambazindikira kuti ciratizo cace cabwino ndiyo njira yabwino yakupfunzisira. w21.02 6-7 ¶16-18

Yahova adagula moyo wa munthu ali-wentse m’gwere pabodzi na moyo wa wentse omwe ambakhulupirambo Jezu na cakulombolera. (Marko 10:45; Mab. 20:28; 1Ako. 15:21, 22) Tenepo, mpsakubveka kuti Yahova adasankhula Jezu omwe adapereka moyo wace ninga cakulombolera kuti akhale msolo wa gwere. Ndipopa Jezu ana mphanvu yakukhazikisa malamulo yakulewa bzomwe wanthu, mabanja pabodzi na abale wentse wa m’gwere an’funika kucita. Ndipo iye ana ugo pomwe bwa kuwona kuti ifepano tikubvera malamuloyo ayai ne. (Agal. 6:2) Koma Jezu ambacita bzinthu bzizinji sikuti kundokhazikisa malamulo basi. Iye ambatisamalira na kutifuna. (Aef. 5:29) Mpfumakazi zimbalatiza kuti zimbalemekeza Kristu mwa kumbabvera utsogoleri bomwe iye adapasa amuna omwe adawasankhula kuti ambazitsogolere. Abale ambalatiza kuti ambabvesesa makonzedwe ya utsogoleri mwa kumbalemekeza mpfumakazi. Wanthu wentse m’gwere, akabvesesa na kulemekeza mtemo wakulewa bza utsogoleri, m’gwere mumbakhala na mtendere. Ndipo cinthu cakufunika kwene-kwene, timbatumbizisa Baba wathu wa lufoyi, Yahova. w21.02 18-19 ¶14-17

Pa nthawe yomwe Davide na acikunda wace akhathawa Sauli mu dziko la Afiristi, iwo adasiya mabanja yawo pamui aciyenda kukamenya nkhondo. Ndipo pomwe iwo akhali ku nkhondoko, anyamadulanthaka wawo winango adabwera kudzatenga mabanja yawoyo aciyenda nayo ku ukapolo. Pakuti Davide akhadziwa kumenya nkhondo, bzingadamunesa lini kuyenda kukalombola mabanjayo. Tsono m’mbuto mwa kubzithemba, iye adakumbira Yahova kuti amutsogolere. Davide adabvunza Yahova kuti: ‘Kodi nditewere thimu la akapondoli?’ Yahova adamutawira kuti atewere thimulo ndipo bzentse bzingadamufambira bwino. (1 Sam. 30:7-10) Kodi tikupfunza ciyani na bzomwe bzidacitikabzi? Mukafuna kusankhula kucita cinthu, mbayambani kukumbira anzanu kuti akuthandizeni. Maswaka mbabvunzani abereki wanu. Ndipo akulu wa gwere omwe ambadziwa bzizinji, angakuthandizenimbo na malango yabwino. Yahova ambakhulupira amuna omwe adawasankhulawa, ndipo imwepo mungawakhulupirembo. Yahova ambawona amunawa ninga “mphaso” za gwere. (Aef. 4:8) Imwepo mun’dzagumana phindu mukambatewezera cikhulupiro cawo na kumbateweza malango yomwe iwo ambakupasani. w21.03 4 ¶10-11

Jezu adalewa kuti tikambasaya kuphatisa basa bzomwe tapfunza, timbakhala ninga munthu omwe amanga nyumba yace pa mcenga. Iye ambaphata basa na nyongo, tsono nyongo yaceyo imbayenda papezi. Thangwe ranyi? Thangwe conzi na kusefukira kwa madzi bzikamenya nyumba yaceyo, iyo in’dzagwa. (Mat. 7:24-27) Mwa njira ibodzi-bodziyi, tikasaya kuphatisa basa bzomwe tikupfunza, nyongo yathu yentse in’dzayenda papezi. Ndipo tikagumana na mabvuto ayai tikazunzidwa, cikhulupiro cathu cin’dzakhala lini cakulimba. Tsono mwakusiyana na bzimwebzi, tikambapfunza na kuphatisa basa bzomwe tikupfunzabzo, timbasankhula kucita bzinthu bzabwino, timbakhala na mtendere kwene-kwene ndipo cikhulupiro cathu cimbakhala cakulimba. (Zai. 48:17, 18) Kuti tipitirize kukhala wakukhulupirika kwa Yahova pomwe tikugumana na mabvuto, tin’funika kupitiriza kupemba kwa iye na kumbapfunza Fala lace ntsiku zentse. Ndipo tin’funikambo nthawe zentse kumbakumbukira kuti cinthu cakufunika kwene-kwene comwe tingacite ni kutumbizisa Yahova Mulungu wathu. Tenepo, mbatitsimikizeni kuti Yahova an’dzatisiya lini ndipo palibe munthu na m’bodziyo omwe angaphe lufoyi lomwe iye analo kuna ife.—Aheb. 13:5, 6. w21.03 15 ¶6; 18 ¶20