Junho

Apfunzisi an’funika kumbalatiza kuti ambakumbukira anyakupfunza wawo ndipo an’funika kumbawona anyakupfunzawo kuti angan’dzakhale abale ayai mfumakazi zawo za m’gwere. Bziribe kupusa kuna iwo kusiya axamwali wawo wa kudziko acicita ciri-centse kuti akwanise kutumikira Yahova. Mpfunzisi wabwino wa Bibliya akambadziwikisa anyakupfunza wawo kuna abale wa m’gwere, abalewo ambawathandiza anyakupfunzawo kuti akhale pa uxamwali na Yahova. Ndipo anyakupfunzawo angakomedwe kukhala pa ciphatano na atumiki wa Mulungu, abale na mpfumakazi omwe angawathandize kulimbisa uxamwali bwawo na Yahova, ndipo angawathandizembo akakhala kuti agumana na mabvuto. Ifepano tin’funa kuti nyakupfunza wathu abzibve kuti ambafunidwa na abale pabodzi na mpfumakazi zathu zacikristau. Tenepo tikamuthandiza, bzin’dzamunesa lini kusiya kubverana na wanthu omwe angamuthandize lini kufuna Yahova. (Mim. 13:20) Ndipo penu wanthu omwe akhali axamwali wace kale-kale angamunyoze, iye an’dzadziwa kuti ni mu gulu la Yahova momwe angagumane axamwali wacadidi.—Marko 10:29, 30; 1 Pe. 4:4. w20.10 17 ¶10-11

Ifepano tin’funika kukhala axamwali wa Jezu. Thangwe ranyi? Pana mathangwe mawiri. Thangwe lakuyamba ni lomwe Jezu adauza anyakupfunza wace kuti: ‘Baba caiyeyo ambakufunani, thangwe imwepo mumbandifunambo.’ (Ju. 16:27) Iye adalewa pomwe kuti: ‘Palibe munthu omwe angayende kwa Baba, acisaya kupita na kuna ine.’ (Ju. 14:6) Kuyezera kukhala xamwali wa Yahova mwakusaya kukhala pa uxamwali bwamphanvu na Jezu, mpsibodzi-bodzimbo na kuyezera kupita m’nyumba mwakusaya kuphatisa basa msuwo. Jezu adaphatisa basa ciratizo cibodzi-bodzici pomwe adabzilewa kuti ni ‘msuwo wa mabira.’ (Ju. 10:7) Thangwe laciwiri ndakuti Jezu adatewezera ndendende makhalidwe ya Baba wace. Iye adauza anyakupfunza wace kuti: ‘Ule omwe an’ndiwona ine ambakhala akuwonambo Baba.’ (Ju. 14:9) Tenepo njira yabwino yomwe ingatithandize kumudziwa bwino Yahova, ni kupfunza bza moyo wa Jezu. Ndipo tikambapfunza bza Jezu, lufoyi lathu kwa iye limbathumizirika. Tenepo, tikambafuna kwene-kwene Jezu, lufoyi lomwe tinalo kwa Baba wathu limbakhala lamphanvu. w20.04 21-22 ¶5-6

Kodi imwepo mudapunduka? Kodi minyendo yanu mumbaibva kukhala yakusaya mphanvu ayai mumbawona mwakubonerera? Penu bziri tenepo, kodi mungakwanise kuthamanga na omwe ana thanzi labwino? Inde mungakwanise! Acikulire azinji pabodzi na atenda akuthamanga mu njira yomwe ikuwatsogolera ku moyo. Iwo ambadziwa kuti akuthamanga lini na mphanvu zawo zokha, koma akuthemba mphanvu zomwe Yahova ambawapasa. Napo abalewo akugumana na mabvuto yakusiyana-siyana pa moyo wawo, iwo ambacita ciri-centse kuti afike pa mitsonkhano. Ndipo akakhala ali ku nyumba ya ulapi, iwo ambapalizira adotolo, alapi na abale wawo omwe ambabwera kudzawawona. Lekani kubvuma kuti msunamo ayai bvuto la thanzi lanu bzikucitiseni kuwona kuti mun’kwanisa lini kuthamanga mu njira yomwe ikukutsogolerani ku moyo. Yahova ambakufunani thangwe ambawona cikhulupiro comwe munaco mwa iye, na kupirira komwe mukucita pa mabvuto yomwe mukugumana nayo. Imwepo mun’funikira thandizo lace kuposa kale-kale, ndipo iye an’dzakusiyani lini. (Sal. 9:10) M’mbuto mwace, iye an’dzakufendererani. w20.04 29; 30 ¶16-17

Kodi ni nkhani ziponi zomwe mungaceze na munthu omwe ambapemphera kale? Cezani naye nkhani yomwe imwepo na iye mumbakhulupira. Pinango iye ambakhulupira kuti Mulungu ni m’bodzi, ambakhulupirambo kuti Jezu ni Mpulumusi wathu ayai pinango ambakhulupira kuti tikukhala mu ntsiku zakunesa ndipo mwakusaya kucedwa mabvutoya yan’mala. Mwakuphatisa basa bzomwe imwepo na munthuyo mumbakhulupira, mulatizeni bzomwe Bibliya limbalewa pa nkhaniyo mu njira yomwe ingamutokonye. Dziwani kuti wanthu ambakhulupira lini bzinthu bzentse bzomwe gereja yawo imbapfunzisa. Tenepo, mukadziwa gereja ya munthu omwe mukuceza naye, yezerani kudziwa bzomwe iye ambakhulupira. M’misiyonario munango ambawona kuti wanthu omwe ambalewa kuti ambakhulupira Utatu, ayai mirungu mitatu yakuphatana, ambakhulupira lini kuti Baba, Mwana na mzimu wakucena ni Mulungu m’bodzi. Iye adalewa kuti: “Ndikazindikira kuti munthu omwe ndikuceza naye ambakhulupira lini bzinthu bzentse bzomwe ambapfunzisidwa ku gereja kwace, bzimbakhala bzakusaya kunesa kuceza naye nkhani yomwe inepano na iye timbakhulupira.” Tenepo, mbayezerani kudziwa bzomwe wanthu omwe mumbawapalizira ambakhulupira. Ninga mpolostolo Paulo, imwepo mun’dzakhala ‘bzinthu bzentse kwa wanthu wa mtundu uli-wentse.’—1Ako. 9:19-22. w20.04 10 ¶9-10

Tin’funika lini kubva mantha na bzomwe bzin’dzacitika kutsogoloku. Thangwe ranyi? Thangwe ndakuti polofesiya ya Danyeri na ya Juwau imbatitsimikizira kuti wale omwe akutumikira Yahova na Jezu an’dzapulumuka pa citsautso cikulu. Danyeri adalewa kuti madzina ya omwe an’dzapulumuka yan’dzakhala ‘[yadanembedwa] m’bukhu.’ Kodi tingacite ciyani kuti madzina yathu yanembedwembo m’bukhumo? Tin’funika kutsimikizira kuti timbakhulupira Jezu, omwe ni Mwana wa Bira wa Mulungu. (Ju. 1:29) Tin’funikambo kubzipereka kwa Mulungu, ticibatizidwa. (1 Pe. 3:21) Ndipo tin’funikambo kumbalatiza kuti tikuthandizira Umambo bwa Mulungu mwa kupfunzisa winango bza Yahova. Tsapano ni nthawe yakuti tilimbise cikhulupiro cathu kwa Yahova na gulu lace lomwe lina wanthu wakukhulupirika. Ino ni nthawe yakuti tithandizire Umambo bwa Mulungu. Tikacita bzimwebzi, tin’dzapulumuka pomwe Umambo bwa Mulungu bun’dzapfudza mambo wa kumpoto na mambo wa kummwera. w20.05 16 ¶18-19

Adamu na Eva akhadziwa kuti Yahova ni dzina la Mulungu, ndipo akhadziwambo bzinthu bzizinji kwene-kwene pakulewa bza iye. Mwa ciratizo, iwo akhadziwa kuti Yahova ni Mulengi, ndipo bzentse bzomwe akhanabzo ninga moyo, paraizo wakudeka na banja lawo, ni Yahova omwe akhadawapasa. (Ciy. 1:26-28; 2:18) Kodi iwo adapitiriza kukumbukira bzinthu bzentse bzabwino bzomwe Yahova adawacitira? Kodi iwo adalatiza lufoyi na kutenda kuna mwenekaciro dzinalo? Mitawiro ya mibvunzoyi idawonekera pomwe iwo adayezedwa na nyamadulanthaka wa Mulungu. Mwakuphatisa basa nyoka, Sathani adabvunza Eva kuti: ‘Kodi n’cadidi kuti Mulungu adalewa kuti lekani kudya cisapo ca muti na ubodziyo wa m’zundemu?’ (Ciy. 2:16, 17; 3:1) Sathani adacita mbvunzo omwe ukhanamizira kwene-kwene Mulungu. Thangwe ranyi? Thangwe ndakuti Mulungu akhadauza Adamu na Eva kuti adye bzisapo bza miti yentse, kupambula muti ubodzi. (Ciy. 2:9) Tsono Sathani akhafuna kuti wanthu akhale na makumbukidwe yakuti Mulungu ambamana. Tenepo, Eva pinango adakumbuka kuti: ‘Kodi pana cinthu cabwino comwe Mulungu akundiletsa kukhala naco?’ w20.06 3-4 ¶8-9

Atumiki winango wa Yahova ambasunama m’bale ayai mpfumakazi ya m’gwere ikacita bzinthu bzakuphonyeka. Mpostolo Paulo adazindikira kuti nthawe zinango timbakhala na mathangwe yakubveka ‘yakudandaulira’ m’bale ayai mpfumakazi. Napo kuti tidacitiridwa bzinthu bzakusaya cirungamo, koma tikasaya kusamala, tingayambe kukoya bza mu mtima. Ndipo na kupita kwa nthawe, ukali bungacitise munthu kutalikirana na gulu la Yahova. Pablo m’bale omwe ambakhala ku América do Sul, adanamiziridwa kuti adacita cinthu cakuphonyeka ndipo adaluza udindo bomwe akhanabo m‘Gwere. Kodi Pablo adacita ciyani? Iye adati: “Bzidandiwawa kwene-kwene, ndipo pang’ono na pang’ono ndidaleka kutsonkhana.” Abale winango ambabzipasa mulandu thangwe ra pikado zomwe adacita kale-kale. Iwo ambakumbuka kuti ambafunidwa lini na Mulungu. Napo kuti adakungula ndipo Yahova adawalekerera, iwo ambabzibva kuti an’themera lini kukhala atumiki wa Yahovayo. Kodi imwepo mumbawawona tani abale na mpfumakazi omwe ambagumana na bzinthu ninga bzomwe bzalewedwabzi? w20.06 19 ¶6-7

Ifepano, tin’funika kuzindikira ngozi yomwe ingabwere na kucita ciri-centse kuti tiitcenkhe. (Aheb. 5:14) Tenepo tin’funika kumbasankhula bwino masenzeka yathu. Mwa ciratizo, programa za pa TV na mafilme, kawiri-kawiri bzimbalatiza bzinthu bza maika. Bzinthu bzimwebzi Mulungu ambakomedwa lini nabzo thangwe bzimbabweresa mabvuto kwa wanthu. Mwakubverana na bzimwebzi, ifepano timbatcenkha masenzeka yomwe pang’ono na pang’ono yangatiphere lufoyi lomwe tinalo kwa Mulungu. (Aef. 5:5, 6) Ifepano tin’funika kumbazindikira mabvuto yomwe yangabwere thangwe ra nkhani zakunama zomwe zimbamwazidwa na apanduki ninga nkhani zakunama pakulewa bza abale wathu ayai kuticitisa kupenukira gulu la Yahova. (1 Tim. 4:1, 7; 2 Tim. 2:16) Bzimwebzi bzingatepese cikhulupiro cathu. Tenepo tin’funika lini kupumpsika na nkhani zakunamazo. Thangwe ranyi? Thangwe rakuti nkhani ninga zimwezi zimbamwazidwa na ‘wanthu wakudzongeka nzeru na wakusaya kudziwa cadidi.’ Cakulinga cawo cimbakhala cakufuna ‘kunesana na wanthu.’ (1 Tim. 6:4, 5) Iwo ambafuna kuti timbakhulupire mafala yawo yakunama na kuyeza kutitazisa kukhulupira abale wathu. w20.09 29 ¶13, 15

Mwamuna na mkazi an’funika kumbafunana na kumbalemekezana. (Aef. 5:33) Bibliya limbatipfunzisa kuti kupasa kuli bwino kuposa kutambira. (Mab. 20:35) Kodi n’ciyani cingathandize anyakulowolana kuti ambalatizane lufoyi na kumbalemekezana? Ni kubzicepesa. Kubzicepesa kumbathandiza amuna na akazi wacikristau kukhala wakukondwa m’banja mwawo. Mwa ciratizo, mwamuna winango wakucemeredwa Steven adati: “Imwepo mukakhala wakuphatana, mun’dzaphata basa pabodzi, maka-maka mukagumana na mabvuto. Tenepo, m’mbuto mwakukumbuka kuti: ‘Kodi n’ciponi cinthu cakufunika kuna inepano?’, imwepo mun’dzakumbuka kuti: ‘Kodi n’ciponi cinthu cakufunika kuna ifepano?’” Stephanie omwe ni mkazi wa Steven ambakumbukambo bzibodzi-bodzibzi. Iye adalewa kuti: “Palibe munthu omwe angafune kukhala pabodzi na nyamadulanthaka wace. Tenepo, tikasaya kubverana pa cinthu cinango, ifepano timbanyang’ana comwe canyosa nzou pa mthunzi. Tikamala, timbapemba, timbafufudza ndipo timbacezerana bza bvutolo. Ifepano timbalimbana na bvutolo, m’mbuto mwa kulimbana tekha-tekha.” Mwakusaya kupenukira, mwamuna ayai mkazi omwe ambabzikumbukira lini yekha, ambakhala wakukondwa kwene-kwene. w20.07 3-4 ¶5-6

Lekani kuthemba mphanvu zanu ayai luso lomwe munalo kuti mutumikire Yahova. Mpostolo Paulo adatambira mapfunziro na mkulu m’bodzi wacidjuda na wakulemekezeka kwene-kwene wa nthawe imweyire wakucemeredwa Gamaliyeli. (Mab. 5:34; 22:3) Nthawe inango Paulo akhabverana kwene-kwene na Adjuda. (Mab. 26:4) Koma Paulo akhabzithemba lini yekha. M’mbuto mwace, iye akhafunisisa kusiya bzinthu bzomwe bzikhamucitisa kukhala wakufunika kuposa winango. (Afil. 3:8) Paulo adabonera thangwe ra kukhala mteweri wa Jezu ndipo mpaka iye adafika pakuwengedwa na mtundu wace. (Mab. 23:12-14) Iye adamenyedwa aciikhidwa mkawoko na abale wace omwe akhali nzika za Roma. (Mab. 16:19-24, 37) Kuthumizira bzimwebzi, Paulo akhabonera thangwe ra makumbukidwe yace. (Aro. 7:21-25) Tsono Paulo alibe kubvuma kuti wanthu omwe akhamutsutsa ayai bzakuphonya bzace bzimugwese. M’mbuto mwace iye adati: ‘Nimbakomedwa pa kutepa.’ Thangwe ranyi iye adalewa bzimwebzo? Thangwe nthawe zentse zomwe Paulo akakhala wakutepa, iye akhawona mphanvu ya Mulungu ikumuthandiza pa moyo wace.—2Ako. 4:7; 12:10. w20.07 15-16 ¶7-8

Ntsiku zino, ifepano tin’funika kumbawona basa lakupalizira bzipsa bzabwino bza Umambo kukhala lakufunika kwene-kwene pa moyo wathu. Jezu adauza anyakupfunza wace kuti iwo angadapitiriza kupalizira pambuyo pa infa yace, ndipo iwo angadadzapalizira kuposa momwe iye adacitira pomwe akhana moyo. Pomwe Jezu adalamusidwa, iye adacita pomwe bzakudabwisa ndipo adathandiza anyakupfunza wace winango kuphata ntsomba. Pomwe adamala kucita bzimwebzi, iye adawatsimikizira kuti basa lakupalizira na kupfunzisa wanthu ndakufunika kwene-kwene kuposa basa liri-lentse. (Ju. 21:15-17) Pomwe Jezu akhadasala pang’ono kubwerera kudzulu, iye adauza anyakupfunza wace kuti basa lakupalizira lomwe iye adaliyambisa lingadadzacitidwa sikuti kokha mu Jirayeri, koma pa dziko lentse la pantsi. (Mab. 1:6-8) Ndipo pomwe padapita magole, Jezu adawonesa mpostolo Juwau matsomphenya ya bzomwe bzingadadzacitika pa ‘ntsiku ya Mbuya.’ Cinthu cibodzi pa bzinthu bzomwe Juwau adawona, cikhali matsomphenya ya wanjo omwe akhana ‘nkhani yabwino yakusaya kumala’ bzomwe bzikhapaliziridwa kwa ‘kwa mtundu uli-wentse, dzinza, cirewedwe na mbumba.’ (Apok. 1:10; 14:6) Kulewa cadidi, Yahova akufuna kuti ntsiku zino ifepano tiphate basa lakupalizirali mpaka iye adzalewe kuti basali lamalira pano. w20.09 9 ¶5

Bzikuwoneka kuti moyo wa Abalahamu ukhali wakunesa kwene-kwene. Mkazace Sara akhabereka lini. Ndipo iwo adapirira mabvutoyo kwa magole mazinji. Tenepo, Sara adapereka nyabasa wace Hagari kuna Abalahamu kuti akhale mkazace. Mwa njira imweyi, Sara adakumbuka kuti iye na bayace angadakhala na wana kucokera kwa nyabasa waceyo. Tsono pomwe Hagari adakhala na mimba ya Jimayeri, iye adayamba kunyoza Sara. Bzinthu bzidafika pakuipa mpaka Sara adafika pa kuthamangisa Hagari pamui. (Ciy. 16:1-6) Na kupita kwa nthawe, Sara adadzakhala na mimba aciberekera Abalahamu mwana omwe iye adamupasa dzina lakuti Izaki. Abalahamu akhafuna kwene-kwene wana wace awiri, Jimayeri na Izaki. Tsono Jimayeri akhanyoza Izaki, tenepo Abalahamu adathamangisa Jimayeriyo pabodzi na Hagari. (Ciy. 21:9-14) Na kupita kwa nthawe, Yahova adakumbira Abalahamu kuti apereke ntsembe mwana wace Izaki. (Ciy. 22:1, 2; Aheb. 11:17-19) Pa bzakucitika bziwiribzi, Abalahamu akhafunika kukhulupira kuti Yahova an’dzakwanirisa mpangano wakulewa bza wana wace omwe Yahovayo adacita na iye. w20.08 4 ¶9-10

Imwepo mun’dzakomedwa kuwona kuti wale omwe an’dzalamusidwa akusiya unthu bwawo bwakale, aciyamba kuteweza malamulo ya Mulungu! Wale omwe an’dzabvuma kucinja an’dzakhala na moyo wakusaya kumala. Tsono wale omwe an’dzalamba kucinja, an’dzabvumizidwa lini kudzonga mtendere na nkhomeko wa mu dziko lipsalo. (Zai. 65:20; Ju. 5:28, 29) Umambo bukadzayamba kutonga dziko lentse la pantsi, atumiki wentse wa Mulungu an’dzatawiriza mafala ya pa Mimwani 10:22 yomwe yambati: ‘Bzisimbo bza Yahova ndibzo bzimbadaza, ndipo Iye ambathumizira lini kuwawa.’ Mwakuthandizidwa na mzimu wakucena, atumiki wa Mulungu an’dzadala mwauzimu, ayai kuti, an’dzakhala wakundendemera na Kristu, ndipo an’dzakhala wakulungamiratu. (Ju. 13:15-17; Aef. 4:23) Ntsiku iri-yentse mathupi yawo yan’dzakhala ya thanzi, ndipo iwo an’dzawoneka bwino kwene-kwene. Moyo un’dzakhala wakudekeza!—Djobi 33:25. w20.08 17 ¶11-12

Mpsabwino kukumbuka kuti Akristau winango ali lini pa banja thangwe acita kufuna. Alipo winango omwe akufuna banja, koma akanati kugumana mwanzawo wakuthemerana naye. Ndipo alipombo winango omwe adafedwa mwanzawo wa m’banja. Bziribe basa penu adafedwa ayai nee, kodi bzingakhale bzakuthemera abale wa m’gwere kumbakhala acibvunza abale omwe ali lini pa banja kuti thangwe ranyi an’saya kulowola ayai kulowodwa, ayai kumbanyang’ana njira zakuthandizira abalewo kugumana munthu kuti amange naye banja? Tsono tani penu iwo alibe kukumbira thandizo, kodi mun’kumbuka kuti iwo angabzibve tani winango akalewa kuti aniwanyang’anira munthu basi? (1 Tim. 5:13) Bzomwe abale na mpfumakazi omwe akanati kulowola ayai kulowodwa ambafuna mpsakuti gwere limbawalemekeze thangwe ra makhalidwe yomwe iwo anayo, sikuti na momwe aliri. M’mbuto mwakuwabvera ntsisi tin’funika kumbawalemekeza thangwe ra kukhulupirika kwawo. Tikambacita bzimwebzi, abale na mpfumakazi omwe akanati kulowola ayai kulowodwa an’dzabzibva lini kuti tikuwauza kuti: ‘Ndiribe namwe basa.’ (1Ako. 12:21) M’mbuto mwace, iwo an’dzawona kuti timbawalemekeza ndipo timbalemekezambo mbuto yomwe iwo anayo m’gwere. w20.08 29 ¶10, 14

Na kupita kwa nthawe Jezu adadzawonekera kwa Paulo. (1Ako. 15:8) Paulo (Saulo) pomwe iye akhali mu njira yakuyenda ku Damasko adabva fala la Jezu kucokera kudzulu ndipo adawona Jezuyo m’matsomphenya. (Mab. 9:3-5) Bzomwe bzidacitikira Paulo bzidakhala umboni mwakuti n’cadidi Jezu adalamusidwa. (Mab. 26:12-15) Wanthu winango angadafunisisa kudziwa bzomwe Paulo adalewa, thangwe pomwe Jezu akhanati kuwonekera kwa iye, Pauloyo, akhazunza Akristau. Pambuyo pa iye kukhulupira kuti Jezu adalamusidwa, Paulo adaphata basa na nyongo kuti athandizembo wanthu winango kukhulupirambo cadidi cimweci. Iye adamenyedwa, adaikhidwa m’kawoko, ndipo adapirira mabvuto yomwe akhagumana nayo pomwe akhapalizira kuti Jezu adalamusidwa ndipo ana moyo. (1Ako. 15:9-11; 2Ako. 11:23-27) Paulo adatsimikiza kuti Jezu adalamusidwa kwa anyakufa, ndipo Pauloyo akhali wakukonzeka kukhotcerera cikhulupiro cace mpaka infa. Umboni bwa Akristau wakuyambirira omwe akhadziwa kuti Jezu adalamusidwa kwa anyakufa bumbatithandiza kukhulupirambo bzimwebzi, ndibzo lini? Ndipo umboni bumwebu bukutithandiza kutsimikiza kuti n’cadidi kuti wanthu anyakufa an’dzalamusidwa kutsogolo, n’tenepo lini? w20.12 3 ¶8-10

Tin’funika kumbabzibvunza kuti: ‘Kodi inepano nimbagumanika pa mitsonkhano ya gwere nthawe zentse?’ Pa mitsonkhano ifepano timbagumana mphanvu kuti tipitirize kutumikira Yahova, ndipo abale na mpfumakazi zathu ambatilimbikisambo. (Mat. 11:28) Ndipo tin’funika kubzibvunza pomwe kuti: ‘Kodi inepano nimbapfunza Bibliya ntsiku zentse?’ Penu mumbakhala na banja lanu, kodi mumbacita kunamata ninga banja pa mdzinga uli-wentse? Ayai penu mumbakhala mwekha, kodi mumbapambula nthawe kuti mupfunze ninga kuti muna banja? Ndipo mumbacitambo nyongo yakupalizira na kupfunzisa winango? Thangwe ranyi tin’funika kubzibvunza mibvunzoyi? Bibliya limbatiuza kuti Yahova ambafufudza makumbukidwe yathu na bzomwe bziri mu mtima mwathu, tenepo ifepano tin’funika kumbacitambo bzibodzi-bodzibzi. (1 Nkha. 28:9) Ifepano tikawona kuti tin’funika kucinja bzakulinga bzathu, bzicito, ayai makumbukidwe yathu, tin’funika kukumbira Yahova kuti atithandize kucinjako. Tsapano ni nthawe yakuti tikonzekere mayezo yomwe yakubwera kutsogoloku. w20.09 19 ¶19-20

Jezu adaphatisa basa ciratizo cinango, pakufuna kulewa bzomwe munthu an’funika kucita kuti akhale nyakupfunza wace. Iye adalewa bza munthu omwe akufuna kumanga ntsanza na bza mambo omwe akufuna kuyenda ku nkhondo. Jezu adalewa kuti nyakumangayo an’funika “[kuyamba] wakhala pantsi na kulewenga kobiri zomwe adzonge” kuti akwanise kumaliza kumanga ntsanzayo, ndipo mambo ‘cakutoma [an’funikambo] kukhala pantsi, “aciyamba kuwona penu [anawo] acikunda” omwe angakwanise kukakwanirisa bzomwe iwo an’funa kukacita. (Luka 14:27-32) Mwakundendemerana na bzimwebzi, Jezu ambadziwa kuti munthu omwe akufuna kukhala nyakupfunza wace ambafunikira kuwonesesa bzomwe iye an’funika kucita kuti akhaledi nyakupfunza wace. Ndipopa ifepano tin’funika kumbalimbikisa anyakupfunza wathu wa Bibliya kuti ambapfunze nafe sumana iri-yentse. Penu ndimwe mpfunzisi, mun’funika kumbayamba mwakonzekera pfunziro liri-lentse. Kumbukirani nyakupfunza wanuyo, ndipo onani momwe mungakafotokozere nkhaniyo mu njira yakusaya kunesa na mwakubveka bwino, kuti nyakupfunza wanuyo akabvesese na kubziphatisa basa.—Neh. 8:8; Mim. 15:28a. w20.10 7 ¶5; 8 ¶7

Malamulo ya Jezu ngakusaya kunesa kubvesesa. Tin’funika kupfunzisa wanthu bzomwe iye adalewa. Koma tin’funika lini kuyebwa cinthu cakufunika kwene-kwene. Jezu alibe kulewa kuti: ‘Apfunziseni bzinthu bzentse bzomwe ndidakuuzani.’ M’mbuto mwace iye adalewa kuti: ‘Apfunziseni kubvera bzinthu bzentse bzomwe ndidakuuzani.’ Kuti abvere lamulo la Jezu, tin’funika kupfunzisa anyakupfunza wathu wa Bibliya bzomwe angacite na momwe angacitire bzinthubzo. (Mab. 8:31) Kodi tingathandize tani munthu kuti ‘abvere’ lamulo la Jezu? Pomwe tikupfunza Bibliya na wanthu winango timbawapfunzisa bzomwe Mulungu akufuna kuti ticite. Koma tin’funika kucita bzinthu bzizinji. Tin’funika kupfunzisa anyakupfunza wathu wa Bibliya kuti aphatise basa pa moyo wawo bzentse bzomwe ali kupfunza. (Ju. 14:15; 1 Ju. 2:3) Mwa ciratizo, tin’funika kuthandiza anyakupfunza wathu wa Bibliya kuti awone momwe angaphatisire basa Cadidi comwe akupfunza m’Bibliya ku xikola, ku basa, na pomwe akucita masenzeka. Tikakhala kuti tiri pabodzi na anyakupfunza wathu tingapembe kwa Yahova ticimukumbira mzimu wakucena kuti uthandize anyakupfunza wathuwo.—Ju. 16:13. w20.11 2-3 ¶3-5

Anyakupfunza wa Jezu adagumana na mabvuto. Mwa ciratizo, iwo akhana bzinembo bzing’ono-ng’ono ndipo akhalibe mabukhu yomwe yangadawathandiza kubvesesa Bibliya ninga momwe ifepano timbacitira ntsiku zino. Ndipo anyakupfunzawo akhafunika kupalizira wanthu omwe akhalewalewa bzirewedwe bzakusiyana-siyana. Napo kuti anyakupfunza wa nyongowo adagumana na mabvuto yentseneya, iwo adacita cinthu comwe cikhawoneka ninga kuti angadakwanisa lini kucita mkati mwa magole 30. Anyakupfunzawo adapalizira mafala ya Mulungu kuna ‘cirengedwe centse ca pa dziko la pantsi.’ (Akol. 1:6, 23) Mu nthawe yathu ino, Yahova akupitiriza kutsogolera wanthu wace, ndipo akupitiriza kuwapasa mphanvu kuti apitirize kucita bzomwe iye ambafuna. Yahova akutsogolera wanthu wace mwa kuphatisa basa Bibliya lomwe lidafuliziridwa na mzimu wace wakucena. Tikambawerenga Bibliyalo, limbatiuza bza utumiki bwa Jezu na lamulo lomwe adalipereka kuna ateweri wace, lamulo lakuti apitirize kucita basa lomwe iye adaliyambisa. (Mat. 28:19, 20) Bzimwebzi bzikulatiza kuti Yahova alibe tsankhulo. Iye adaleweratu kuti mafala yace yan’dzapaliziridwa kuna wanthu wa ‘mtundu uli-wentse, dzinza, cirewedwe na mbumba.’ (Apok. 14:6, 7) Tenepo, iye akufuna kuti wanthu wentse abve mafala ya Umambo. w20.10 21 ¶6-8

Mambo Davide akhali muntu omwe akhafuna ‘malango ya Yahova.’ (Sal. 1:1-3) Davide akhadziwa kuti Yahova ambapulumusa wanthu wakubzicepesa, koma ambaipidwa na wanthu wakubzikuza. Tenepo, Davide adabvuma kuti cakutonga ca Mulungu cimuthandize kucinja makumbukidwe yace. Iye adanemba kuti: ‘Ndin’dzatumbiza Yahova omwe ambandipasa malango. Napo usiku, makumbukidwe yangu yambandilungamiza.’ (Sal. 16:7) Tikakhala wanthu wakubzicepesa, tin’dzabvuma kuti Fala la Mulungu litithandize kucinja makumbukidwe yakuipa pomwe yakanati kutifikisa pakucita bzinthu bzakuipa. Fala la Mulungu limbatiuza kuti: ‘Njira njiyi. Fambani m’mwemo.’ Falalo limbaticenjeza kuti tireke kupambukira ku boko lamadzere ayai la madidi pomwe tikufamba mu mseu omwe ukutisogolera ku moyo. (Zai. 30:21) Tikatetekera Yahova, tin’dzagumana phindu mu njira zakusiyana-siyana. (Zai. 48:17) Mwa ciratizo, tin’dzabva lini manyazi munthu akatitsimula, ndipo tin’dzakhala pa uxamwali bwamphanvu na Yahova thangwe ra kudziwa kuti iye ambatisamalira ninga wana wace wakufunidwa.—Aheb. 12:7. w20.11 20 ¶6-7

Kunyoza kwawoku pinango kudatokonya wanthu winango omwe akhakhala ku Kolinto. (1Ako. 15:12) Winango pinango akhakumbuka kuti nkhani ya kulamusidwa kwa anyakufa njakunama. Pinango iwo angadakumbuka kuti wanthu angadacemeredwa ‘wakufa’ thangwe ra pikado zawo, ndipo wanthu omwe angadakhala Akristau, angadacemeredwa ‘wamoyo’ thangwe rakuti adalekereredwa pikado zawo. Bziribe basa thangwe lomwe likhacitisa wanthuwa kuleka kukhulupira nkhani ya kumusidwa kwa anyakufa, cikhulupiro cawo cikhali capezi-pezi. Penu Mulungu alibe kulamusa Jezu kwa anyakufa ndiye kuti palibe cakulombolera comwe cidaperekedwa ndipo wanthu wentse adapitiriza kukhala na pikado. Tenepo, wale omwe akhanyoza nkhani ya kulamusidwa kwa anyakufa, akhalibe cidikhiro cacadidi. (1Ako. 15:13-19; Aheb. 9:12, 14) Mpostolo Paulo akhadziwa kuti ‘Kristu adalamusidwa kwa anyakufa.’ Kulamusidwa kumweku, kudakhala kwakupambulika kwene-kwene kuposa kwa wanthu omwe adalamusidwa bzimwebzi bzikanati kucitika, thangwe wanthuwo na kupita kwa nthawe adadzafa pomwe. Paulo adalewa kuti Jezu akhali ‘cisapo cakuyambirira ca wale omwe adagona mu infa.’ Thangwe rakuti iye adakhala munthu wakuyambirira kulamusidwa na thupi lauzimu, ndipo pa wanthu wentse iye adakhala wakuyambirira kuyenda kudzulu.—1Ako. 15:20; Mab. 26:23; 1 Pe. 3:18, 22. w20.12 5 ¶11-12

Mu nthawe ya Akristau wakuyambirira mu Jeruzalemu, bungwe lakutonga lidaphata basa mwakuphatana kuti wanthu wa Mulungu akhale wakulinganizika na wa mtendere. (Mab. 2:42) Mwa ciratizo, pakati pa gole la 49 E.C., Akristau azinji akhana makumbukidwe yakusiyana-siyana pa nkhani ya mgwatidwe. Tsono mwakutsogoleredwa na mzimu wakucena, bungwe lakutonga lidacezerana bza nkhaniyo. Iwo adacita bwino kucezerana nkhaniyo, thangwe angadasaya kucezerana bzingadakhala bzakunesa kucita bwino-bwino basa lakupalizira. Napo kuti iwo akhali Adjuda, apostolo pabodzi na acikulire alibe kutengeka na bzipfunziso bza Adjudawo. M’buto mwace, iwo adathemba Fala la Mulungu acikumbira mzimu wakucena kuti uwathandize kuwona bzakucita pa nkhaniyo. (Mab. 15:1, 2, 5-20, 28) Kodi n’ciyani cidadzacitika? Yahova adasimba bzomwe iwo adasankhula kucita ndipo mtendere na ciphatano pabodzi na basa lakupalizira bzidayenda patsogolo. (Mab. 15:30, 31; 16:5) Mu nthawe yathu ino, gulu la Yahova likuthandiza atumiki wa Yahova kuti akhale wakulinganizika na wa mtendere. w20.10 22-23 ¶11-12

Pana mathangwe mazinji yomwe yangaticitise kuleka kutambira udindo mu gulu la Yahova. Mwa ciratizo, tingatambire lini udindobo thangwe ra kukalamba, kusaya thanzi labwino ayai thangwe ra momwe bzinthu bziriri pa moyo wathu. Pa nkhani imweyi, ifepano tingapfunze na ciratizo ca Mambo Davide. Pomwe iye adauzidwa kuti alibe kusankhulidwa kuti adzamange templo ya Mulungu, Davide adacita cinthu cinango, iye adathandiza munthu omwe adasankhulidwa na Mulungu kuti adzamange temployo. Davide adathandizira kwene-kwene basalo. Cimweci ni ciratizo cabwino kwene-kwene kwa ifepano kuti ticitewezere! (2 Sam. 7:12, 13; 1 Nkha. 29:3-5) M’bale Hugues wa ku França, adaima kutumikira ninga mkulu thangwe ra kuduwala-duwala, ndipo tsapano iye ambakwanisambo lini kucita mabasa manango pamui. M’baleyo adanemba kuti: “Pakuyamba ndikhadatepa kwene-kwene, ndipo ndikhabziwona kuti ndiribe na phindulo. Tsono pa nthaweyo ndidayamba kukumbukira kuti mpsakufunika kuti inepano ndileke kusunama thangwe ra kutazira kucita bzinthu bzomwe ningakwanise lini kubzicita. Tenepo, ndidayamba kukhala wakukondwa thangwe ra bzinthu bzomwe nimbakwanisa kucita pa kutumikira Yahova. Ninga Gidiyoni na acikunda wace 300 omwe akhadaneta, koma adapitiriza kumenyana na anyamadulanthaka wawo, inepano nin’pitirizambo kumenyana na bvuto langu la thanzi!”—Way. 8:4. w20.12 25 ¶14-15

Pakulewa bza moyo wa Jezu, Juwau adaphatisa basa kwene-kwene fala lakuti “lufoyi” na “kufunana” kuposa bukhu la Mateu, Marko na Luka. Mafala yakufuliziridwaya, yambatipfunzisa kuti bzentse bzomwe ifepano tingacite timbabzicite mwa lufoyi. (1 Ju. 4:10, 11) Koma padatenga nthawe kuti Juwau apfunze bzimwebzi. Pomwe Juwau akhali tswaka, nthawe zinango iye akhalatiza lini lufoyi. Mwa ciratizo, pa nthawe inango, Jezu pabodzi na anyakupfunza wace adapita na ku Samariya pomwe akhayenda ku Jeruzalemu. Wanthu wa m’mudzi munango ku Samariyako alibe kuwatambira. Juwau adabvunza Jezu penu bzingadakwanisika kubweresa moto kucokera kudzulu, kuti upfudze wanthu wentse m’mudzimo. (Luka 9:52-56) Ndipo nthawe inango Juwau pabodzi na m’bale wace Tiyago, adauza mai wawo kuti akakumbire Jezu, kuti adzawapase mipando yakupambulika ku mbali kwace mu Umambo bwa Mulungu kudzulu. Pomwe apostolo winangowo adadziwa bzomwe Juwau na Tiyago adacita, iwo adakalipa kwene-kwene! (Mat. 20:20, 21, 24) Koma Jezu alibe kusiya kulatiza lufoyi kwa Juwau thangwe ra bzomwe iye adacitabzo.—Ju. 21:7. w21.01 8-9 ¶3-4

Yahova pakusankhula kucita bzinthu, iye ambakumbukirambo ubwino bwa wanthu winango. Mwa ciratizo, iye adasankhula kulenga moyo, sikuti thangwe ra kufuna kugumana phindu la iye yekha, koma thangwe ra kufuna kuti ifepano tikhalembo na moyo wakukondwa. Ndipo palibe omwe adamungingimiza kupereka moyo wa Mwana wace kuti adzatitsudzule ku pikado. Yahova adacita bzimwebzi thangwe ra kukumbukira bzomwe bzingadadzakhala bzabwino kuna ifepano. Ndipo Jezu adasankhulambo kucita bzinthu mwa kukumbukira ubwino bwa winango. Mwa ciratizo, pomwe Jezu akhadaneta kwene-kwene, m’mbuto mwakupuma, iye adapfunzisa mthithi wa wanthu. (Marko 6:31-34) Msolo wa banja wabwino, ambadziwa kuti cinthu cakunesa kwene-kwene, ni kusankhula kucita bzinthu bzomwe bzingabweresere phindu banja lace. Ndipo iye ambawona kuti nkhaniyi njakusenzeka lini nayo. Tenepo iye ambacita nyongo ya kuleka kusankhula kucita bzinthu akakhala alibe mathangwe yabwino yakucitira bzinthubzo, ayai kondocita thangwe ra momwe akubvera pa nthaweyo. M’mbuto mwace, iye ambabvuma kuti Yahova amuthandize kusankhula kucita bzinthu bzabwino. (Mim. 2:6, 7) Mwa njira imweyi, iye ambakumbukira bzomwe mpsabwino kuna banja lace, sikuti bza iye yekha. (Afil. 2:4) Penu msolo wa banja ambacita nyongo yakutewezera ciratizo ca Yahova na Jezu, bzinthu bzin’dzamufambira bwino. w21.02 7 ¶19-21

Mambo Aza pomwe akhali tswaka, akhali wakubzicepesa na wakukhwimika. Mwa ciratizo, pambuyo pa infa ya pai wace Abiya, iye adadzakhala mambo acipfudza bzifanikiso. ‘Iye adauza Adjuda kuti alinge Yahova Mulungu wa abereki wawo, ndipo adawauzambo kuti ateweze Lamulo.’ (2 Nkha. 14:1-7) Pomwe Zera wa ku Etiyopia na acikunda wace 1 000 000 adabwera ku Djuda kuti adzamenye nkhondo na Aza, Azayo adakumbira Yahova kuti amuthandize. Iye adati: ‘Yahova, bziribe basa penu wanthu omwe mukuthandiza mbazinji ayai mbakutepa. Tithandizeni Yahova, Mulungu wathu, pakuti ifepano timbakhulupira imwepo.’ Mafala yabwinoya, yakulatiza kuti Aza akhakhulupira kwene-kwene kuti Yahova angadamupulumusa pabodzi na wanthu wace. Aza adakhulupira Baba wace wakudzulu, ndipo ‘Yahova adakunda a Etiyopia.’ (2 Nkha. 14:8-12) Bzikhali bzakupasa mantha pomwe Zera adabwera na acikunda wace 1 000 000 kudzamenya nkhondo na Aza. Koma thangwe ra kuthemba Yahova, Aza adakunda nkhondoyo. w21.03 5 ¶12-13

M’Bibliya mumbagumanika nkhani za wanthu wakuperewera omwe adalatiza lufoyi cairo. Onani ciratizo ca Jonatani na Davide. Bibliya limbalewa kuti: ‘Atamaliza kucezerana pakati pa Davide na Jonatani, padakhala uxamwali bwa mphanvu kwene-kwene ndipo Jonatani adayamba kumufuna Davide ninga momwe akhabzifunira yekha.’ (1 Sam. 18:1) Yahova adasankhula Davide kuti akhale mambo m’mbuto mwa Sauli. Thangwe ra bzimwebzi, Sauli adacitira njiru Davide ndipo akhafuna kumupha. Koma mwana wa Sauli, Jonatani alibe kuthandiza pai wace pomwe akhafuna kupha Davideyo. Jonatani na Davide adalumbira kukhala pa uxamwali nakuti ambathandizane nthawe zentse. (1 Sam. 20:42) Lufoyi cairo lomwe likhalipo pakati pa Jonatani na Davide, limbawonekera tikawona bzinthu bzinango bzomwe bzingadatazisa uxamwali bwawobo. Mwa ciratizo, Jonatani akhali mkulu kwa magole 30 kuposa Davide. Iye pinango angadakumbuka kuti akhalibe bzinthu bzakundendemerana na Davideyo, ndipo pakhalibe bzinthu bzomwe angadapfunza na iye, pakuti akhali mwana. Koma Jonatani alibe kukumbuka bzimwebzi. Iye akhamulemekeza kwene-kwene Davide. w21.01 21-22 ¶6-7

Jezu adauza ateweri wace kuti iwo angadadzakhala wakukondwa kwene-kwene. Ndipo iye adacenjezambo wale omwe ambamufuna kuti iwo angadadzagumana na mabvuto. (Mat. 10:22, 23; Luka 6:20-23) Ifepano timbakondwa thangwe ra kukhala anyakupfunza wa Kristu. Tsono timbabzibva tani wanthu wa m’banja mwathu akambatiletsa kutumikira Yahova, maboma yakambatizunza, anzathu wa ku basa ayai wa ku xikola akambatiuza kuti ticite cinthu cakuphonyeka? Tikakumbukira bzinthu bzimwebzi tingakhale na thupo. Wanthu azinji ambawona lini cizunzo kukhala thangwe la kulekera kukhala wakukondwa. Bzimwebzi ni bzomwe Fala la Mulungu limbatiuza kuti ticite. Mwa ciratizo, nyakupfunza Tiyago adanemba kuti tin’funika lini kusunama, pomwe tikugumana na mabvuto, koma tikhale wakukondwa. (Tiy. 1:2, 12) Ndipo Jezu adalewa kuti tin’funika kukhala wakukondwa napo pomwe tikuzunzidwa. (Mat. 5:11) Yahova adafulizira Tiyago kuti awanembere Akristauwo malango yomwe yangadawathandiza kupitiriza kukhala wakukondwa napo kuti iwo akhagumana na mabvuto. w21.02 26 ¶1-2; 27 ¶5

Mu nthawe ya Timotio, Akristau winango alibe kulemekeza mwayi omwe iwo akhanawo wakukhala anyabasa anzace wa Mulungu, ninga Dema, Fijelo, Hermojene, Himeneu, Alexandre na Fileto. (1 Tim. 1:19, 20; 2 Tim. 1:15; 2:16-18; 4:10) Wanthu wentsenewa akhafuna Yahova, koma na kupita kwa nthawe iwo adasiya kuwona kukhala bzakufunika bzinthu bzomwe Yahovayo akhadawapasa. Kodi Sathani ambayezera tani kutiphumisa bzomwe Yahova adatipasa? Onani bzomwe Sathaniyo ambacita. Iye ambaphatisa basa masenzeka, bzithunzi-thunzi na mavidiyo, nkhani za pa TV, ndipo iye ambayeza kutigopswa na bzomwe wanthu ambatilewa, ayai ambaticitisa kukumbuka kuti tikagumana na cizunzo tin’dzasiya kupalizira. Ndipo ambayezerambo kutingingimiza kutetekera bzipfunziso bza apanduki ‘bzomwe ambati ni “cidziwiso”’ kuti tisiye cadidi. Tikasaya kusamala tingasiye cadidi pang’ono na pang’ono.—1 Tim. 6:21. w20.09 27 ¶6-8

Kodi xamwali ayai munthu wa m’banja mwanu adakucitirani bzinthu bzomwe bzidakuwawani? Penu mukuti inde, cinthu comwe cingakuthandizeni, ndico kupfunza bzomwe bzidacitika na Mambo Davide pomwe mwana wace Abisalomu adacita bzinthu bzomwe Davideyo adawawidwa nabzo. (2 Sam. 15:5-14, 31; 18:6-14) Pomwe mukukumbukira nkhaniyo, pembani kwa Yahova ndipo mufotokozereni momwe mukubvera na bzinthu bzakuipa bzomwe munthu adakucitirani. (Sal. 6:6-8) Kumbukirani momwe Davide adabvera na bzentse bzomwe bzidacitikabzo. Iye akhafuna mwana wace Abisalomu ndipo akhakhulupira Ahitofeli. Wanthu awiriwa adamupandukira mpaka adafika pakufuna kumupha. Bzimwebzi bzingadacitisa Davide kuleka kukhulupira axamwali wace winango thangwe ra kukumbukira kuti iwombo angadakhala ku boko la Abisalomu. Pinango iye angadandokumbukira bza iye yekha aciyezera kuthawa yekha m’dzikomo. Ayai iye angadasunama acitazira kucita ciri-centse. M’mbuto mwace, iye adapemba kwa Yahova kuti amuthandize, ndipo adakumbirambo axamwali wace kuti amuthandize. Kuthimizira bzimwebzi, iye alibe kucedwa kuphatisa basa bzomwe adasankhula kucita. Tenepo, iye adapitiriza kukhulupira Yahova na axamwali wace. w21.03 15 ¶7-8; 17 ¶10-11