Julho

Tin’funika kukhala pa uxamwali na Jezu kuti mipembo yathu imbatawiridwe. Bzimwebzi bzikuthandauza kuti tin’funika kucita bzizinji sikuti kuphampha kwa mpembo kumbandolewa mafala yakuti ‘m’dzina la Jezu.’ Tin’funika kumbabvesesa momwe Yahova ambaphatisira basa Jezu pakutawira mipembo yathu. Jezu adauza anyakupfunza wace kuti: ‘Ciri-centse comwe mukumbire m’dzina langu nin’dzacicita.’ (Ju. 14:13) Napo kuti ni Yahova omwe ambabva na kutawira mipembo yathu, koma iye adapasa Jezu udindo bwakuti ambaphate basa na bzomwe Yahovayo ambasankhula kucita na mitawiroyo. Pomwe Mulungu akanati kutawira mipembo yathu, cakuyamba ambawona penu tikuphatisa basa malango yomwe Jezu adapereka. Mwa ciratizo Jezu adati: ‘Mukambalekerera wanthu bzakuphonya bzawo, Baba wanu wakudzulu an’dzalekererambo bzakuphonya bzanu, tsono mukasaya kulekerera bzakuphonya bza winango, Baba wanu wakudzulu an’dzalekererambo lini bzakuphonya bzanu.’ (Mat. 6:14, 15) Bzimwebzi bzikulatiza kuti tin’funika kumbadekera mtima anzathu ninga momwe Yahova na Jezu ambaticitira! w20.04 22 ¶6

Mpostolo Paulo akhazindikira bzomwe wanthu omwe akhawapalizira akhafuna. Tenepo iye akhawapalizira mwakubverana na momwe iwo akhaliri. Mwa ciratizo, wanthu wa ku Listra akhadziwa pang’ono ayai akhadziwa lini na pang’onopo Bzinembo. Tenepo, Paulo adaphatisa basa njira yomwe idathandiza wanthuwo kubvesesa bzomwe iye akhalewa. Iye adalewa bza nkhani ya kubvuna na bzomwe iwo angadacita kuti akhale na moyo wabwino. Paulo adaphatisa basa mafala na bziratizo bzakusaya kunesa bzomwe bzidathandiza wanthuwo kubvesesa kamangu. Mbayezerani kuzindikira bzomwe wanthu wa m’gawo lanu ambafuna ndipo mbacinjani upalizi bwanu. Kodi mungadziwe tani bzomwe munthu omwe mukufuna kumupalizira ambafuna? Mukafika pamui pace, mbawonani momwe paliri ayai bzomwe iye akucita. Mwa ciratizo, pinango mungamugumane akuwerenga bukhu, akukonza kanderendere, ali m’dimba ayai akucita bzinthu bzinango. Bzikakwanisika, phatisani basa bzomwe iye akucitabzo kuti muyambise maceza. (Ju. 4:7) Napo bzakubvala bza munthu, bzingalatize dziko lomwe adabadwira, basa lomwe ambacita na thimu la masenzeka yomwe iye ambafunisisa. w20.04 11 ¶11-12

Abale na mpfumakazi winango omwe akulimbana na thupo lakunyanyirira ambabzibva lini bwino akakhala pafupi na winango. Kwa iwo bzimbakhala bzakunesa kukhala pa mthithi wa wanthu. Koma iwo ambagumanika pa mitsonkhano ya gwere, ya dera na ya cigawo. Bzimbakhalambo bzakunesa kwa iwo kuceza na wanthu wacirendo, koma napo bziri tenepo, iwo ambalewalewa na wanthu akakhala akupalizira. Penu bzimwebzi bzimbakucitikiranimbo, dziwani kuti muli lini mwekha. Wanthu azinji akulimbana na mabvuto ninga yamweya. Kumbukirani kuti Yahova akukomedwa kwene-kwene na nyongo yomwe mukucita. Ndipo kupirira kwanu kukulatiza kuti Yahova akukusimbani, ndipo akukupasani mphanvu zomwe mukufunikira. (Afil. 4:6, 7) Tenepo, penu mukupitiriza kutumikira Yahova napo mukuduwala ayai mukulimbana na bvuto la m’makumbukidwe, dziwani kuti Yahova akukomedwa namwe kwene-kwene. Ni tentse lini omwe tina thanzi labwino, tsono napo bziri tenepo, tikupirira basi. (2Ako. 4:16) Tenepo, na thandizo la Yahova, tentsenefe tin’thamanga mpaka kufika kuphampha! w20.04 31 ¶20-21

Tikambanyang’anisa momwe Mulungu adakonzera dzikoli, timbawona kuti iye ngwanzeru kwene-kwene. (Aheb. 3:4) N’cadidi kuti pana mapalaneta yomwe yambazungulira dzuwa, tsono dziko la pantsi ndakusiyana kwene-kwene, thangwe ni dziko lokhali lomwe lina bzinthu bzomwe bzimbathandiza wanthu kuti akhale na moyo. Tingandendemezere dzikoli na mwadiya omwe ukufamba pa nyanza ikulu. Mwa ciratizo, tiyezezere kuti wanthu omwe apakira m’mwadiyamo an’funika kukonza okha mphuwe yakupuma, cakudya na madzi, koma akutaya lini lixo yomwe ingagumanike m’mwadiyamo. Kodi ni nthawe zingasi zomwe iwo angakhale na moyo? Kulewa cadidi, wanthuwo angafe. Koma pana kusiyana kwene-kwene pakati pa mwadiya omwe udadzala wanthu, na dziko lathuli. Na tenepo, mwakusiyana na mwadiyayo, dziko la pantsi limbathandiza wanthu pabodzi na bzirombo kukhala na moyo. Dzikoli limbapereka mphuwe, cakudya na madzi yomwe timbafunikira, ndipo bzimwebzi bzimbakwanira wanthu wentse. Napo kuti lixo ikalipo pa dziko la pantsi, koma dzikolo likadapitiriza kukhala lakudeka na lakukhalika. Kodi bzimwebzi bzikukwanisika tani? Yahova adalenga dziko la pantsi na mphanvu yakuti imbacinje lixo kukhala cinthu cabwino comwe cingaphatisidwe pomwe basa. w20.05 20 ¶3-4

Sathani adapswipiza dzina la Mulungu, mwa kuuza Eva kuti Yahova ambanama. Mwa njira imweyi, Sathani adakhala dyabu ayai nyamagunkha. Eva adapumpsidwa na Sathani. (1 Tim. 2:14) Ndipo iye adakhulupira kwene-kwene Sathaniyo kuposa Yahova. Na bzimwebzi, bzidakhala bzakusaya kunesa kuti Eva acite cakusankhula cakuipa kwene-kwene. Iye adasankhula kuleka kubvera Yahova. Eva adayamba kudya cisapo comwe Yahova adamuletsa. Patsogolo pace adapasambo cisapoco Adamu. (Ciy. 3:6) Kumbukirani bzomwe Eva angadafunika kuuza Sathani. Tiyezezere kuti iye angadamutawira kuti: “Inepano nimbakudziwa lini iwepo, koma nimbadziwa Baba wangu Yahova, ndipo nimbamufuna na kumukhulipira. Bzentse bzomwe inepano na Adamu tinabzo ni Yahova omwe adatipasa. Kodi iwepo ndiwe yani kuti umulewe kuipa? Coka!” Bzingadakhala kuti Eva adatawira Sathani mwa kumuuza mafalaya, Yahova angadakomedwa kwene-kwene thangwe ra kubva mwana wace wa lufoyi na wakukhulupirika akulewa mafalayo! (Mim. 27:11) Koma Eva alibe kukhulupirika pakulatiza lufoyi kwa Yahova. Ndipo Adamu alibembo. Na thangwe limweri, iwo alibe kukwanisa kukhotcerera dzina la Baba wawo kuti lireke kupswipizidwa. w20.06 4 ¶10-11

Mpfumakazi zathu zidathemera kutendedwa pa basa lentse lomwe zikucita pa kutumikira Yahova. Basalo likuphatanidza basa lakumanga-manga na kucenesa Nyumba za Umambo, kupalizira na gulu mu bzirewedwe bzacirendo na kutumikira pa Beteli. Mpfumakazizo zimbathandizirambo pa basa lakuthandiza abale akagwedwa na tsoka la cirengedwe, ndipo zimbathandizira pomwe pa basa la kusandulizira mabukhu yathu, ndipo izo zimbacita upainiya na kutumikirambo ninga mamisiyonario. Kuthimizira bzimwebzi, omwe ali pa banja, ambathandiza amuna wawo kuti akwanirise udindo bwawo m’gwere na mu gulu la Yahova. Tenepo kulewa mwakusaya kupenukira, amuna wa udindowa bzingadakhala kuti akazawo ambawathandiza lini, bzingadawanesa kwene-kwene kucita bzimwebzo. (Aef. 4:8) Akulu wa gwere wanzeru ambabvesesa kuti mpfumakazi ni ‘thimu likulu la anyankhondo’ wakukonzeka kuphata basa, ndipo kawiri-kawiri mpfumakazizo zimbadziwa kupalizira bzipsa bzabwino. Kuthimizira bzimwebzi, akulu wa gwere ambazindikira kuti mpfumakazi zakukhulupirika zacikulire zimbadziwa kuthandiza mpfumakazi za citswaka kulimbana na mabvuto yawo. (Tito 2:3-5) Kulewa cadidi, timbafune mpfumakazi zathu na kumbazitenda! w20.09 23¶13-14

Yahova ambayebwa lini atumiki wace omwe adaleka kutsonkhana. Ndipo iye ambayebwambo lini mabasa yentse yomwe atumikiwo akhamucitira. (Aheb. 6:10) Mpolofeta Zaiya adanemba ciratizo cabwino kwene-kwene comwe cimbalatiza kuti Yahova ambafuna wanthu wace. Zaiya adati: ‘Ninga momwe ambacitira makabusa. Iye an’dzatsonkhanisa wana wa mabira, ndipo an’dzanyamulira mabirayo pa cifuwa.’ (Zai. 40:11) Kodi Yahova omwe ni m’Busa Mkulu, ambabzibva tani m’bodzi wa atumiki wace akasiya kumutumikira? Jezu adalatiza momwe Yahova ambabvera pomwe adabvunza anyakupfunza wace kuti: ‘Kodi imwepo munti tani? Penu munthu ana mabira 100 ndipo m’bodzi mwa mabirayo watayika, kodi iye angasiye lini mabira 99 ku mapiri aciyenda kukanyang’ana omwe watayikayo? Tsono ndikukuuzani kuti akamugumana, iye an’dzakomedwa kwene-kwene na bira wakutayikayo kuposa na mabira 99 yomwe yakhalibe kutayika.’—Mat. 18:12, 13. w20.06 19-20 ¶8-9

Ifepano timbawona kuti ni mwayi ukulu kutumikira Yahova. (Sal. 27:4; 84:10) Timbakomedwa kwene-kwene tikawona kuti m’bale akubzipereka kuti athandizire mabasa manango m’gwere. Tsono m’bale akapasidwa udindo m’gwere iye an’funika lini kundobzikumbukira yekha basi. (Luka 17:7-10) Iye an’funika kukhala na cakulinga cakumbathandiza anzace mwakubzicepesa. (2 Ako. 12:15) M’Bibliya muna bziratizo bza wanthu omwe akhambandokhalira kukumbukira bza iwo wokha basi. Diotrefe akhali lini wakubzicepesa, iye akhafuna ‘kukhala pa mbuto yakuyamba’ m’gwere. (3 Ju. 9) Thangwe ra kubzikuza, Uziya adafika pakucita basa lomwe Yahova akhadapereka kwa antsembe. (2 Nkha. 26:16-21) Abisalomu akhafuna kukhala mambo, ndipo iye adayamba kupseterera wanthu kuti akhale kumbali yace. (2 Sam. 15:2-6) Bziratizo bzimwebzi bzimbatipfunzisa kuti Yahova ambakomedwa lini na wanthu omwe ambafuna kubzinyang’anira mbiri. (Mim. 25:27) Ndipo na kupita kwa nthawe, wanthu wakubzikuza na wakufuna kuwonekera ambabzibweresera mabvuto. —Mim. 16:18. w20.07 4 ¶7-8

Mabanja yanango yadafulukira dziko linango kuti yakanyang’ane mbuto yakukhotcerereka na basa. Pinango wana wawo angakhale akupfunza ku xikola yomwe imbaphatisa basa cirewedwe ca m’dzikolo. Ndipo pinango aberekiwo kuti agumane basa angafunikembo kupfunza cirewedweco. Tsono tani penu m’dzikolo muna gwere ayai kagulu ka abale wa cirewedwe ca ku dziko lawo? Kodi banjalo lingafunikire kukatsonkhana mu gwere la cirewedwe ca m’dzikolo ayai ca ku dziko lawo? Ni msolo wa banja omwe an’funika kusankhula komwe banja lace lingakatsonkhane. Pakuti cimweci ni cakusankhula ca ali-wentse payekha, iye an’funika kukumbukira bzomwe bzingathandize banja lacero. Ifepano tin’funika kumbalemekeza cakusankhula ca msolo wa banja. Bziribe basa kuti angasankhule bziponi, ifepano tin’funika kubvuma bzomwe iye wasankhulabzo, ticiritambira banjalo mwalufoyi m’gwere mwathu.—Aro. 15:7. w20.08 30 ¶17-18

Penu tikufuna kuti Yahova atipase mphanvu, tin’funika kudziwa kuti mphanvu za kuthupi, mapfunziro ya padzulu, kudziwika ayai kobiri ni bzinthu bzakusaya kufunika. Bzinthu bzimwebzi bzimbaticitisa lini kukhala wakufunika kwa Yahova. Kulewa cadidi, pakati pa wanthu wa Mulungu ‘mbazinji lini omwe ana nzeru ninga momwe wanthu ambawawonera ndipo mbazinji lini omwe ana mphanvu ninga omwe adabadwa m’banja la wanthu wakubvekera.’ (1Ako. 1:26) Lekani kuwona kuti kusaya bzinthu bzizinji kungakutaziseni kutumikira Yahova. M’mbuto mwace lokoterani mpata umweyu kuti mulatize kuti mumbakhulupira Yahova. Mwa ciratizo, penu imwepo mumbacita mantha na wale omwe ambanyoza bzomwe imwepo mumbakhulupira, pembani kwa Yahova kuti mukhale wakukwimika mucikhotcerera bzomwe mumbakhulupira. (Aef. 6:19, 20) Penu muna matenda yomwe yakunesa kumala, kumbirani Yahova thandizo kuti akupaseni mphanvu kuti mucite mbali yanu pa basa lace. Mukambawona Yahova akutawira mipembo yanu bzindzacitisa cikhulupiro canu kukhala cakulimba. w20.07 16 ¶9

Penu tin’funa kuikha Umambo pa mbuto yakuyamba pa moyo wathu, tin’funika kukhala ninga Abalahamu, omwe adacita bzomwe adakwanisa kuti akondwese Mulungu. (Marko 10:28-30; Aheb. 11:8-10) Lekani kudikirira kuti moyo wanu un’khala wakusaya mabvuto. Napo wale omwe ambaphatisa basa moyo wawo kuti atumikire Yahova, an’funika kulimbana na mabvuto yomwe angagumane nayo. (Tiy. 1:2; 1 Pe. 5:9) Ntsiku zino, ifepano tina mathangwe mazinji yomwe yambatithandiza kukumbukira bza kutsogolo. Mwakusaya kupenukira, bzinthu bzomwe bzikucitika m’dzikoli bzikulatiza kuti tiri kuphampha kwa ntsiku zakumalizira zakumala kwa dzikoli. Cinthu cibodzi pa bzinthu bzizinji bzomwe bzin’dzatikondwesa mu Umambo bwa Mulungu ni kuwona kulamusidwa kwa abale wathu omwe adafa. Ndipo pa nthawe imweyo, Yahova an’dzasimba Abalahamu thangwe ra cikhulupiro na kupirira kwace, mwa kumulamusa pabodzi na banja lace kuti adzakhale pomwe na moyo. Kodi imwepo mun’dzakhala mulipombo pa nthawe imweyo kuti mudzamutambire? Penu munti inde, khalani ninga Abalahamu mwa kukhala wakukonzeka kucita ciri-centse comwe mungakwanise kuti muthandizire Umambo bwa Mulungu, pitirizani kukhala na cikhulupiro napo mugumane na mabvuto, ndipo pfunzani kudikhirira Yahova mwakupirira.—Mik. 7:7. w20.08 5-6 ¶13-14; 7 ¶17

Ifepano timbadziwa kuti napo anyamadulanthaka wathu atiphe, Yahova an’dzatimusa kwa anyakufa. Tina citsimikizo centse cakuti anyamadulanthakawo an’dzatifundusa lini kwa Yahova. (Aro. 8:35-39) Mpsabwino kwene-kwene kuti Yahova adatipasa cidikhiro ca kulewa bza kumuka kwa anyakufa! Thangwe ra cidikhiro cimweci, Yahova wacosa cinthu comwe Sathani ambatigopswa naco, yomwe ni mantha yakugopa kufa, ndipo pa nthawe ibodzi-bodziyo iye watipasa cinthu kuti citikhotcerere comwe ni: kukhwimika. Kodi anyamadulanthaka wa Yahova akakugopswani kuti ankuphani, imwepo mun’dzacita ciyani? Kodi mun’dzakhulupira piciro la Yahova lakuti an’dzakumusani kwa anyakufa? Njira ibodzi yomwe ingakudziwiseni kuti mumbakhulupira Mulungu, ndiyo kubzibvunza kuti: ‘Kodi nimbalatiza kuti nimbakhulupira Yahova napo pa kucita bzakusankhula bzing’ono-bzing’ono?’ (Luka 16:10) Mbvunzo unango nguyu: ‘Kodi bzomwe nimbacita pa moyo wangu bzimbalatiza kuti nimbakhulupira kuti ningaikha Umambo patsogolo, Yahova an’dzandipasa bzinthu bzentse bzomwe ningafunikire?’ (Mat. 6:31-33) Penu mwatawira kuti ‘inde’ pa mibvunzo imweyi, bzimwebzi bzikulatiza kuti imwepo mudakonzeka pa mayezo yentse yomwe yabwere kutsogoloku.—Mim. 3:5, 6. w20.08 17-18 ¶15-16

Ifepano tin’funika kudziwa momwe tingaphatisire basa Fala la Mulungu mwa luso. Pa mitsonkhano yathu ni pomwe tingapfunze momwe tingakhalire na luso limweri. Ndipo penu ifepano tikufuna kuthandiza wanthu kukhulupira kuti Bibliya lingacinje moyo wawo, tin’funika kumbalipfunza ntsiku zentse. Tin’funika kuphatisa basa Fala la Mulungu kuti tilimbise cikhulupiro cathu. Bzimwebzi bzikuthandauza lini kumbandowerenga kokha Bibliya. Koma bzin’funa kulewa kuti tin’funika kumbakumbukira bzomwe timbawerenga na kufufudza m’mabukhu yathu kuti tikwanise kubvesesa na kuphatisa basa bzinembo. (1 Tim. 4:13-15) Tenepo tikacita bzimwebzi tin’dzakwanisa kuphatisa basa Fala la Mulungu kuti tipfunzise wanthu. Bzimwebzi bzikuthandauza kuti tin’funika lini kumbandowerenga mavesi ya m’Bibliya basi. Ifepano tin’funika kuthandiza abveseri wathu kubvesesa mavesiyo na kuwona momwe angayaphatisire basa. Tenepo tikambapfunza Bibliya ntsiku zentse, tin’dzakhala apfunzisi wabwino.—2 Tim. 3:16, 17. w20.09 28 ¶12

Tingapitirize kucita basa lakupalizira tikakumbukira bzinthu bzentse bzomwe Yahova ambatipasa kuti tikwanise kucita basali. Mwa ciratizo, iye ambatipasa cakudya cizinji cauzimu comwe cimbaphatanidza mabukhu yakucita kudinda na mabukhu ya pa interneti, maaudiyo na mavidiyo pabodzi na programa za JW Broadcasting. Kumbukirani ibzi: Pa webisaite yathu pakugumanika nkhani zakupitirira bzirewedwe 1000! (Mat. 24:45-47) Njira inango yomwe ingatithandize kuti tipitirize kupalizira ni kutewezera ciratizo ca Jezu. Iye alibe kubvuma kuti cinthu ciri-centse cimutazise kupalizira bzipsa bzabwino. (Ju. 18:37) Ndipo iye alibe kubvuma kupumpsika pomwe Sathani adalewa kuti angadamupasa ‘maumambo yentse ya pa dziko la pantsi na mphanvu zawo zentse,’ ndipo iye alibembo kubvuma kupumpsika na wanthu omwe akhafuna kuti Jezuyo akhale mambo. (Mat. 4:8, 9; Ju. 6:15) Iye alibe kutengeka na makumbukidwe ya kufuna kukhala wakudala, ndipo alibe kugopa anyamadulanthaka wace. (Luka 9:58; Ju. 8:59) Tenepo, cikhulupiro cathu cikayezedwa, tin’funika kukumbukira malango ya mpostolo Paulo yomwe yali m’vesi la leroya. w20.09 10 ¶6-7

Timbakomedwa kwene-kwene thangwe ra kukhala na mpfumakazi zomwe zimbaphata basa na nyongo m’gwere mwathu! Izo zimbagumanika pa mitsonkhano na mu utumiki bwakumunda. Ndipo zinango zimbathandizira pa basa la kucenesa Nyumba ya Umambo, ndipo zimbalatiza kuti zimbakumbukira abale na mpfumakazi. Napo bziri tenepo, izo zimbagumana na mabvuto. Zinango zimbasamalira aberiki wawo wakukalamba. Mpfumakazi zinango zimbapirira mayezo yakucokera kwa wacibale wawo. Ndipo zinango zimbacita nyongo ya kufuwa zokha wana wawo. Thangwe ranyi tin’funika kumbathandiza mpfumakazi zathu? Thangwe rakuti dziko limbalemekeza lini akazi ninga momwe iwo ambafunikira. Tsono Bibliya limbatiuza kuti timbathandize akazi. Mwa ciratizo, mpostolo Paulo adauza gwere la ku Roma kuti litambire Febe na ‘kumupasa bzomwe angafunikire.’ (Aro 16:1, 2) Paulo akhacita mbali ya gulu la wanthu omwe akhawona akazi ninga wakusaya kufunika. Tsono pomwe iye adakhala Mkristau, adatewezera Jezu ndipo adayamba kumbalemekeza akazi. w20.09 20 ¶1-2

Kuti tithandize anyakupfunza wathu wa Bibliya kuti akhale na cikhumbo cakupalizira bzipsa bzabwino tingawabvunze mibvunzo ninga iyi: “Kodi moyo wanu wacinja tani thangwe ra kuphatisa basa bzomwe Bibliya limbapfunzisa? Kodi imwepo mukuwona kuti pana wanthu winango omwe akufuna kubva mafalaya? Kodi mungawathandize tani?” (Mim. 3:27; Mat. 9:37, 38) Lekani kuyebwa kuti Jezu adatiuza kuti tikapfunzise wanthu winango kuti abvere ‘bzinthu bzentse’ bzomwe iye adalewa. Bzinthubzo bzimbaphatanidza malamulo mawiri, kufuna Mulungu na kufuna munthu mwanzathu. Bzimwebzi bzimbabverana na basa lakupalizira na kupfunzisa wanthu. (Mat. 22:37-39) Kulewa cadidi, lufoyi ndiro lomwe limbaticitisa kuphata basa la kupalizira. Mpsakubveka kuti kuna anyakupfunza winango wa Bibliya, basa lakupalizira lingawacitise kukhala na mantha na wanthu. Tenepo ifepano tin’funika kuwatsimikizira kuti na thandizo la Yahova, iwo pang’ono na pang’ono an’dzacita lini pomwe mantha na wanthu.—Sal. 18:1-3; Mim. 29:25. w20.11 3 ¶6-8

Pomwe mukukonzekera pfunziro la Bibliya, yambani kupemba kwa Yahova kuti athandize nyakupfunza wanuyo pabodzi na bzomwe iye akufunikira. Mukumbireni Yahova kuti akuthandizeni kucitisa pfunziro la Bibliyalo mu njira yomwe ingatokonye mtima wa nyakupfunza wanuyo. Kumbukirani kuti cakulinga canu n’cakufuna kumuthandiza kuti ayende pa tsogolo acibatizidwa. Nyakupfunzayo an’funika kumbaceza na Yahova. Kodi angacite tani bzimwebzi? Mwa kumbatetekera na kulewalewa na Yahova. Iye angacite bzimwebzi mwa kumbawerenga Bibliya ntsiku zentse. (Djos. 1:8; Sal. 1:1-3) Iye angambalewelewe na Yahova mwa kumbapemba kwa iye ntsiku zentse. Pakucitisa pfunziro mbayambani na mpembo, ndipo mukamaliza mbapembani pomwe. Mbapembani pabodzi na nyakupfunza wanu ndipo mbagumani dzina lace pa kupembapo. Iye akambatetekera mipembo yanu, an’dzapfunza momwe angambapempherere kwa Yahova na mtima wace wentse mu dzina la Jezu Kristu. (Mat. 6:9; Ju. 15:16) Nyakupfunza wa Bibliya an’funika kumbatetekera Yahova mwakumbawerenga Bibliya ntsiku zentse. Ndipo an’funikambo kumbalewalewa na Yahovayo mwa kumbapemba kwa iye!—Tiy. 4:8. w20.10 8 ¶8; 9 ¶10-11

Ntsiku zino gulu la Yahova likucita nyongo yakuthandiza magwere yacikristau kuti yapitirize kukhala yakulinganizika na ya mtendere. (Mab. 16:4, 5) Mwa ciratizo: Imwepo muciyenda kukatsonkhana na gwere linango pa pfunziro la Ntsanza ya Mulindiri, napo penu muli ku dziko linango, mun’kakwanisa kuwona kuti momwe pfunzirolo likufambira pabodzi na nkhani yomwe ikupfunzidwa, bziribe kusiyana na bzomwe bzimbacitikambo m’gwere mwanu. Ndipo mun’kabzibva ninga kuti muli mu gwere lanu basi. Ni mzimu wakucena omwe umbacitisa kuti atumiki wentse wa Mulungu akhale wakuphatana. (Sof. 3:9) Kodi n’ciyani comwe mungacite? Bzibvunzeni kuti: ‘Kodi nimbalimbikisa ciphatano na mtendere m’gwere? Kodi nimbabvera omwe akutsogolera? Kodi nimbakhala wakukonzeka kuthandiza winango na kuwatumikira?’ (Tiy. 3:17) Penu mukuwona kuti mun’kwanisa kucita bzimwebzi, pembani kwa Mulungu kuti akupaseni mzimu wace wakucena. Ndipo imwepo mukabvuma kuti bzimwebzi bzicinje unthu bwanu, abale na mpfumakazi m’gwere mwanu an’dzakutendani kwene-kwene. w20.10 23 ¶12-13

Fala la Mulungu liri ninga supedyo kuna ifepano. (Tiy. 1:23-25) Azinji wa ifepano tikafuna kucoka pamui timbayamba kubzidinga pa supedyo. Na bzimwebzi timbakwanisa kuwona penu pana mbali inango yomwe tin’funikira kubzikonza-konza pomwe wanthu winango akanati kutiwona. Mpsibodzi-bodzimbo, tikambawerenga Bibliya ntsiku zentse, tin’dzakwanisa kuwona njira zomwe zin’dzatithandiza kucinja makumbukidwe na makhalidwe yathu. Azinji ambawerenga vesi la ntsiku macibese yali-yentse pomwe akanati kucoka pamui, ndipo iwo ambalewa kuti bzimwebzi mpsakuthandiza. Iwo ambabvuma kuti bzomwe awerengabzo bzitokonye makumbukidwe yawo. Ndipo pa ntsikuyo, iwo ambanyang’ana njira zomwe zingawathandize kuphatisa basa malango yakucokera m’Fala la Mulungu. Mwakubverana na bzimwebzi, ifepanombo tin’funika kumbapfunza na kumbakumbukira ntsiku zentse bzomwe tawerenga m’Fala la Mulungu. Bzingawoneke ninga kuti bziribe kunesa kucita bzimwebzi, koma ibzo mpsakufunika kwene-kwene kuti bzitithandize kupitiriza kufamba mu mseu wakupapatiza omwe ukutitsogolera ku moyo. Mwa njira imweyi, Fala la Mulungu limbaphata basa ninga raio-X, yomwe ni makina yakuwonera matenda yomwe tingakwanise lini kuyawona tekha m’thupi mwathu tikakhala tiribe makinayo. Tenepo tin’funika kukhala wanthu wakubzicepesa kuti tigumane phindu na malango yakucokera m’Bibliya, ayai yakucokera kuna wanthu omwe adasankhulidwa na Mulungu kuti ambatitsogolere. w20.11 18 ¶3; 20 ¶8

Napo kuti Akristau wakuyambirira akhazunzidwa kawiri-kawiri, iwo adakhala pa nthawe ya mtendere. Kodi iwo adacita ciyani pa nthawe imweyi? Amuna na akazi wakukhulupirikawa adapalizira bzipsa bzabwino mwakusaya kulekeza. Cinembo ca mabasa cimbalewa kuti iwo ‘akhalatiza kuti akhagopa Yahova.’ Iwo adapitiriza kupalizira bzipsa bzabwino, ndipo ninga bzakutewera bzace, ‘gwere lidapitiriza kukula.’ Yahova adasimba nyongo yomwe iwo adalatiza mwakupalizira pa nthawe ya mtendere. (Mab. 9:26-31) Akristau wakuyambirira adalokotera mpata uli-wentse kuti apalizire bzipsa bzabwino. Pomwe mpostolo Paulo adazindikira kuti akhafunika kupalizira wanthu azinji mu mzinda wa Efezo, iye adakhala m’mwemo ndipo adayamba kuwapalizira. (1Ako. 16:8, 9) Anyakupfunza adapalizira na nyongo ‘mafala yabwino ya Yahova.’ (Mab. 15:30-35) Kodi n’ciyani cidadzacitika patsogolo pace? Vesi la lero latiuza bzomwe bzidacitika. w20.09 16 ¶6-8

Pomwe Adamu adacita pikado iye adabzibweresera infa pabodzi na mbadwo zace. Ndipo ifepano tikupitiriza kubonera thangwe ra kusaya kubvera kwace. Tsono pakuti Mulungu adalamusa mwana wace kwa anyakufa, ifepano tingakhale na tsogolo la bwino! Thangwe ranyi tikulewa tenepo? Thangwe ‘kumusidwa kwa anyakufa kun’citikambo thangwe ra munthu m’bodzi,’ Jezu. ‘Pakuti ninga mwa Adamu wentse ambafa,’ Paulo adapitiriza kunemba kuti: ‘Tenepombo mwa Kristu wentse an’dzapasidwa moyo.’ (1Ako. 15:22) Kodi Paulo akhafuna kulewanyi pomwe adalewa kuti ‘mwa Adamu wentse ambafa’? Paulo akhafuna kulewa kuti wanthu wentse omwe adatambira pikado na kuperewera kucokera kwa Adamu, anifa. (Aro. 5:12) Adamu ambacita lini mbali ya wanthu omwe ‘an’dzapasidwa moyo.’ Cakulombolera ca Kristu ciribe kuphata basa kuna Adamu, thangwe rakuti iye akhali kale munthu wakulungamiratu pomwe adasankhula kuphonyera Mulungu. Bzomwe bzidacitikira Adamu mpsibodzi-bodzimbo na bzomwe bzin’dzacitikira wale omwe an’dzayeruzidwa na ‘mwana wa munthu’ kuti ni ‘mbuzi,’ bzomwe bzikuthandauza kuti iwo an’dzatambira lini ‘moyo wakusaya kumala.’—Mat. 25:31-33, 46; Aheb. 5:9. w20.12 5 ¶13-14

Penu mukanati kupasidwa udindo bomwe mukubufuna kwene-kwene, kumbukirani bza ciratizo cabwino ca anjo wakukhulupirika. Pa nthawe inango Yahova adakumbira anjo kuti afotokozembo njira za momwe angapumpsire nazo mambo wakuipa, Akabe. Anjo winango adafotokoza makumbukidwe yawo. Koma pa wentsewo, Mulungu adalewa kuti ni m’bodzi yekha omwe adafotokoza bzinthu bzomwe bzingadaphata basa. (1 Wam. 22:19-22) Kodi anjo winango wakukhulupirikawo adasunama, acikumbuka kuti, ‘Thangwe ranyi ndamala nthawe papezi kufotokoza makumbukidwe yangu?’ Nee, alibe. Anjo mbakubzicepesa, ndipo iwo ambafuna kuti mbiri yentse iyende kuna Yahova. (Way. 13:16-18; Apok. 19:10) Kumbukirani kuti mwayi ukulu omwe tinawo, ni kukhala m’bodzi wa Mboni za Yahova na kupalizira mafala yabwino ya Umambo. Udindo bumbaticitisa lini kukhala wakufunika kwa Mulungu. Koma khalidwe la kubzicepesa ndiro limbaticitisa kukhala wakufunika kwa Yahova na kuna abale. Tenepo, mukumbireni Yahova kuti akuthandizeni kupitiriza kukhala wakubzicepesa. Kumbukirani bziratizo bzabwino bzomwe bzikugumanika m’Bibliya bza atumiki wakukhulupirika wa Yahova. Khalani wakukonzeka kutumikira abale wanu ninga momwe mungakwanisire.—1 Pe. 5:5. w20.12 26 ¶16-17

Kapaseti ya cipulumuso ni cidikhiro comwe Yahova ambatipasa, cidikhiro cakuti iye an’dzatipulumusa ku infa ndipo an’dzasimba wale omwe ambacita bzomwe iye ambafuna. (1 Ates. 5:8; 1 Tim. 4:10; Tito 1:1, 2) Cidikhiro ca cipulumuso cimbakhotcerera makumbukidwe yathu. Cidikhiroco cimbatithandiza kupitiriza kukumbukira bzinthu bzomwe Yahova adalewa kuti an’dzaticitira kutsogolo, ndipo cimbatithanizambo kuleka kuluza mphanvu pomwe tikugumana na mabvuto. Ifepano timbabvala kapaseti imweyi mwa kupitiriza kukhala na makumbukidwe yomwe yambabverana na makumbukidwe ya Mulungu. Mwa ciratizo, timbaikha cidikhiro cathu, sikuti pa cuma cakusaya kutsimikizirika, koma pa Mulungu. (Sal. 26:2; 104:34; 1 Tim. 6:17) Mphanga ya mzimu ni Fala la Mulungu, Bibliya. Mphanga imweyi ina mphanvu ya kugaza magunkha yomwe yambacitisa wanthu kukhala pa ukapolo bwa bzipfunziso bzakunama na bzicito bzakuipa. (2Ako. 10:4, 5; 2 Tim. 3:16, 17; Aheb. 4:12) Timbapfunza kuiphatisa bwino basa, mwa kumbacita pfunziro lathu la patekha na kumbatambira mapfunziso na gulu la Mulungu.—2 Tim. 2:15. w21.03 26 ¶4; 28-29 ¶10-11

Napo pomwe Juwau akhali m’kawoko, iye adalatiza kuti akhafuna anzace. Mwa ciratizo, pomwe Juwau akhali pa ntsuwa ya Patimo, adanemba bukhu la Apokalipse, ndipo adalitumiza kuna magwere kuti yadziwe “bzinthu bzomwe bzin’funika kucitika mwakamfulumize.” (Apok. 1:1) Na kupita kwa nthawe, pomwe Juwau adadzacosedwa m’kawoko adanemba nkhani yakulewa bza moyo wa Jezu pabodzi na utumiki bwace. Ndipo iye adanembambo matsamba matatu kuti alimbise nayo abale pabodzi na mpfumakazi zace. Imwepo mungatewezere moyo wakubzipereka omwe Juwau akhanawo ndipo bzomwe imwepo mumbasankhula kucita pa moyo wanu, bzingalatize kuti mumbafuna wanthu ayai ne. Dziko la Sathaniri likufuna kuti imwepo mumbandobzikumbukire mwekha, mumbamale nthawe yanu na mphanvu zanu, kuti mukhale na kobiri zizinji ndipo mubvekere. Koma m’mbuto mwakucita bzimwebzi Akristau kuzungulira dziko lentse la pantsi, ambamala nthawe yawo akupalizira mafala yabwino ndipo ambathandiza wanthu anzawo kuti akhale pa uxamwali na Yahova. w21.01 10 ¶9-10

Jonatani angadacitira njiru Davide. Pakuti Jonatani akhali mwana wa Mambo Sauli, pinango iye angadakumbuka kuti ndiye akhathemera kuti akhale mambo pambuyo pa Babace. (1 Sam. 20:31) Koma Jonatani akhali wakubzicepesa ndipo akhali wakukhulupirika kwa Yahova. Tenepo, iye adathandizira nzeru ya Yahova yakuti Davide adzakhale mambo kutsogolo. Ndipo iye akhali wakukhulupirikambo kwa Davide, napo kuti bzimwebzi bzidakalipisa Sauli. (1 Sam. 20:32-34) Jonatani akhana lufoyi cairo kuna Davide, ndipopa iye alibe kumucitira njiru. Jonatani akhana luso lakuthusa misewe ndipo akhali mcikunda wakukhwimika. Iye na pai wace Sauli akhadziwika kuti ‘akhali wa luwiro kuposa mphungu’ ndipo ‘akhali wamphanvu kuposa mphondolo.’ (2 Sam. 1:22, 23) Tenepo, Jonatani angadabzitumbiza thangwe ra bzinthu bzakudabwisa bzomwe akhacita. Koma iye alibe kucita bzimwebzi, ne kucitira njiru Davide thangwe ra bzinthu bzabwino bzomwe Davideyo akhacita. M’mbuto mwace, iye akhadabwa thangwe ra kukhwimika kwa Davide pabodzi na kukhulupira kwace Yahova. Mwa ciratizo, pomwe Davide adapha Goliyati, Jonatani adamufuna kwene-kwene. w21.01 21 ¶6; 22 ¶8-9

Akristau wentse ambabvera utsogoleri bwa Kristu, omwe ni mtsogoleri wakulungamiratu. Tenepo, mkazi wacikristau akalowodwa iye an’funika kubvera utsogoleri bwa mwamuna wace, omwe ni munthu wakuperewera. Bziribe kupusa kucita bzimwebzi nthawe zentse. Tenepo, pomwe mkazi akukumbukira bza kulowodwa na m’bale, an’funika kubzibvunza kuti: ‘Kodi n’ciyani cikulatiza kuti m’bale umweyu angadzakhale msolo wa banja wabwino? Kodi kutumikira Yahova ambakuwona kukhala cinthu cakufunika pa moyo wace? Penu nee, kodi n’ciyani comwe cikundicitisa inepano kukumbuka kuti umweyu angadzakhale munthu omwe angadzandithandize kupitiriza kukhala pa uxamwali na Yahova pambuyo pa kulowolana?’ Ndipo bzingakhale bwino kuti mpfumakaziyo ibzibvunzembo kuti: ‘Kodi ni makhalidwe yaponi yomwe ndinayo yomwe yangadzathandize banja lathu? Kodi ndine munthu wakupirira na wakupasa? Kodi ndiri pa uxamwali bwakulimba na Yahova?’ (Mpal. 4:9, 12) Mkazi akakumbuka kucita bzinthu mwa nzeru pomwe akanati kulowodwa, bzimwebzi bzin’dzamuthandiza kuti bzinthu bzidzamufambire bwino m’banja, ndipo an’dzakhala wakukondwa. Mpfumakazi zathu zizinji zacikristau ni bziratizo bzabwino pa nkhani yakubvera azibayawo. Ndipo tikuwatenda thangwe ra kucita bzimwebzo! w21.02 8 ¶1-2

Kuyambira magole yamalaya mpaka pano, apalizi azinji asankhula kupfunza cirewedwe cipsa na cakulinga cakuti apalizire wanthu azinji. Ndipo kuti akwanise kucita bzimwebzi adafunika kufulukira mu gwere lomwe likhalibe apalizi azinji. Kucinjako ni cakusankhula comwe iwo adacita kuti athimizire utumiki bwawo kwa Yahova. Napo kuti pangatenge nthawe kuti iwo adziwe cirewedwe cipsaco, koma iwo ambathandiza kwene-kwene. Makhalidwe yawo yabwino pabodzi na bziratizo bzawo bzimbalimbikisa gwere. Tikupenukira lini kuti abale wakubziperekawa mbakufunika kwene-kwene kwa ifepano! Bungwe la akulu wa gwere lin’funika lini kulewa kuti m’bale an’themera lini kutumikira ninga mtumiki wakuthandiza ayai mkulu wa gwere thangwe rakuti ambadziwa lini kulewalewa cirewedwe ca gwerelo. Akuluwo an’funika kuphatisa basa nfundo za m’Bibliya kuti awone penu m’baleyo an’themera kukhala mkulu ayai mtumiki wakuthandiza, sikuti penu m’baleyo ambadziwa ayai ambadziwa lini kulewalewa cirewedweco.—1 Tim. 3:1-10, 12, 13; Tito 1:5-9. w20.08 30 ¶15-16

Wanthu azinji ambakumbuka kuti angakhale wakukondwa kokha akakhala na thanzi labwino, kobiri zizinji, na banja lakukondwa. Tsono cikondweso comwe Tiyago adanemba cimbacita mbali ya cisapo ca mzimu wa Mulungu, ndipo cimbathemba lini momwe bzinthu bziriri pa moyo wa munthu. (Agal. 5:22) Mkristau angakhale wakukondwa akadziwa kuti akutumbiza Yahova ndipo akutewezera ciratizo ca Jezu. (Luka 6:22, 23; Akol. 1:10, 11) Cikondweso cathu tingacindendemezere na moto omwe ukugaka m’kandiyero. Motoyo umbakhala wakukhotcerereka ndipo umbathima lini thangwe ra mphepo ayai nvula. Mpsibodzi-bodzimbo na ifepano, tingapitirize kukhala wakukondwa bziribe basa mabvuto yomwe tikugumana nayo pa moyo wathu. Napo tiduwale ayai tikhale na kobiri zing’ono-ng’ono, ifepano tingapitirize kukhala wakukondwa. Ndipo tin’dzapitirizambo kukhala wakukondwa napo penu wanthu akutinyoza, ayai penu wanthu wa m’banja mwathu caiwo akutizunza. Ndipo ifepano tin’dzakhala wakukondwa kwene-kwenetsa pomwe wanthu an’dzayezera kutitazisa kukhala wakukondwa. Mabvuto yomwe ifepano timbagumana nayo thangwe ra cikhulupiro, yambalatiza kuti ifepano ndifedi anyakupfunza wacadidi wa Kristu. (Mat. 10:22; 24:9; Ju. 15:20) Ndipopa Tiyago adanemba mafala ya mu vesi la lero. w21.02 28 ¶6

Mukagumana mavesi ya m’Bibliya yomwe yakulatiza kufunika kwa kupitiriza kukhala wakuderekha na kukhulupira Yahova, mbayakoyani kuti mumbayakumbukire. Tsono kuti mumbayakumbukire, mun’funika kumbayawerenga mwakukuwa ayai mungayanembe pa tsamba kuti mumbayawerenge kawiri-kawiri. Yahova adauza Djosuwe kuti ambawerenge bukhu la Malamulo ntsiku zentse mwapantsi-pantsi, kuti limuthandize kucita bzinthu mwanzeru. Bzomwe iye akhawerengabzo, bzidamuthandiza kuleka kukhala na mantha, acikhala wakukhwimika kuti akwanise kutsogolera wanthu wa Mulungu. (Djos. 1:8, 9) Mavesi mazinji yakugumanika mu Fala la Mulungu, yangakuthandizeni kukhala wakuderekha pa nkhani zakusiyana-siyana, zomwe kawiri-kawiri zingakucitiseni kukhala na thupo. (Sal. 27:1-3; Mim. 3:25, 26) Ndipo pa mitsonkhano yathu, timbagumana phindu na nkhani zomwe timbabva, mitawiro ya abale, pabodzi na maceza yakulimbisa yomwe timbakhala nayo na abale pabodzi na mpfumakazi zathu. (Ahe. 10:24, 25) M’gwere, ifepano tingalimbisidwembo na axamwali wathu pomwe tikuwafotokozera bzomwe bzimbaticitisa thupo. w21.01 6 ¶15-16

Pomwe imwepo mudabatizidwa, mudalatiza kuti muna cikhulupiro cakulimba ndipo mumbathemba Yahova. Ndipo Yahovayo adakomedwa kukutambirani kuti mucite mbali ya banja lace. Tsapano cinthu comwe mun’funika kucita, ni kupitiriza kuthemba Yahovayo. Bzikuwoneka kuti bziribe kunesa kuthemba Yahova pomwe mukufuna kusankhula kucita bzinthu bzakufunika kwene-kwene pa moyo wanu. Tsono nthawe zinango mun’dzafunika kucita ciyani? Mpsakufunika kwene-kwene kumbathemba Yahova pomwe mukufuna kusankhula kucita bzinthu, bzomwe bzikuphatanidza nyimbo zomwe mukufuna kuzibva, basa lomwe mukufuna kuphata na bzomwe mukufunisisa pa moyo wanu. Lekani kumbathemba nzeru zanu zokha. M’mbuto mwace, mbathembani mitemo ya m’Bibliya yomwe ingakuthandizeni kusankhula kucita bzinthu bzabwino, ndipo mbabvumani mitemoyo kuti ikutsogolereni pa bzomwe mukufuna kucitabzo. (Mim. 3:5, 6) Mukacita bzimwebzi, mun’dzakondwesa Yahova ndipo abale m’gwere mwanu an’dzakulemekezani. Tikupenukira lini kuti imwepo ndimwe wakuperewera ninga ifepano, ndipo nthawe zinango mumbaphonyambo. Tsono napo bziri tenepo, bzimwebzi bzingakutaziseni lini kucita bzentse bzomwe mungakwanise pa basa la kutumikira Yahova. w21.03 5-6 ¶14-15

Kodi wanthu wa m’banja mwanu ambakuzunzani thangwe rakuti mukutumikira Yahova? Kodi mukukhala mu dziko lomwe basa la Mboni za Yahova limbaletsedwa? Penu bziri tenepo, imwepo mungalimbisidwe mwakumbawerenga 2 Timotio 1:12-16 na 4:6-11, 17-22. Mpostolo Paulo adanemba mavesiya pomwe akhali m’kawoko. Pomwe mukanati kuwerenga, mufotokozereni Yahova mabvuto yanu na momwe mukubvera. Muzimbulireni bzomwe mukufuna. Ndipo mukamala mukumbireni kuti akuthandizeni kugumana nfundo zakulewa bzomwe bzidacitika pa moyo wa Paulo zomwe zingakuthandizeni kudziwa bzomwe mungacite pa mabvuto yomwe mukugumana nayo. Yahova adacenjeza mpostolo Paulo kuti iye angadadzagumana na mabvuto thangwe ra kukhala Mkristau. (Mab. 21:11-13) Kodi Yahova adathandiza tani Paulo? Iye adatawira mipembo yace, ndipo na kupita kwa nthawe adamupasa mphanvu. Paulo adauzidwa kuti angadatambira mabaibai thangwe ra kuphata basa na nyongo kuti ayatambire. Ndipo Yahova adaphatisa basa axamwali wakukhulupirika wa Paulo kuti amuthandize mu njira zakuwoneka na maso. w21.03 18 ¶14-15, 19