Agosto

Omwe an’dzagumana phindu na ntsembe ya Jezu ya cakulombolera, ni okhawo omwe ali pa uxamwali bwamphanvu na Jezuyo. Jezu adalewa kuti ‘[an’dzapereka] moyo wace thangwe ra axamwali wace.’ (Ju. 15:13) Wanthu omwe adatumikira Yahova acikhala na moyo pomwe Jezu akhanati kubwera pano pa dziko la pantsi, akadzalamusidwa an’dzakhala na mwayi wakupfunza bza Jezuyo na kukulisa lufoyi lawo kwa iye. Amuna na akazi an’dzalamusidwa, tsono kuti adzakhale na moyo wakusaya kumala, iwo an’dzafunika kukhala pa uxamwali bwakulimba na Jezu. (Ju. 17:3; Mab. 24:15; Aheb. 11:8-12, 24-26, 31) Ifepano timbakomedwa thangwe ra kuphata basa pabodzi na Jezu, lomwe ndakupalizira na kupfunzisa wanthu bzipsa bzabwino bza Umambo. Pomwe Jezu akhali pa dziko la pantsi, akhali mpfunzisi. Kucokera pomwe Jezu adabwerera kudzulu, iye adakhala msolo wa gwere ndipo akupitiriza kutsogolera basa lakupalizira na lakupfunzisa wanthu. Jezu ambawona ndipo ambatenda bzentse bzomwe mumbacita pa kuthandiza wanthu azinji kuti akwanise kudziwa iye na Baba wace. Kulewa cadidi, ifepano tikukwanisa kucita basa limweri thangwe tikuthandizidwa na Yahova na Jezu.—Ju. 15:4. w20.04 22 ¶7-8

Pakuyambirira dzina lakuti ‘mambo wa kumpoto’ likhaperekedwa kwa wamambo omwe akhanyang’anira bzigawo bza kumpoto kwa Jirayeri, ndipo dzina lakuti ‘mambo wa kummwera’ likhaperekedwa kwa wamambo omwe akhanyang’anira bzigawo bza kummwera kwa Jirayeri. (Dan. 10:14) Kodi mbani omwe akhali wanthu wa Mulungu? Mpaka pa Pentekosite wa mu gole la 33 E.C., ukhali mtundu wa Jirayeri. Pambuyo pa Pentekosite, Yahova adalatiza padeca kuti anyakupfunza wakukhulupirika wa Jezu adakhala wanthu wace. Ndipopa, mbali ikulu ya polofesiya ya Danyeri kapitulo 11 ikulewa bza anyakupfunza wa Kristu, sikuti mtundu wa Ajirayeri. (Mab. 2:1-4; Aro. 9:6-8; Agal. 6:15, 16) Na kupita kwa nthawe, maboma ya wanthu yakhala na udindo bwa kukhala mambo wa kumpoto na mambo kummwera. Napo bziri tenepo ifepano tingawadziwe wamambowo kucokera pa bzinthu bzitatu bzakundendemerana bzomwe iwo adacita: (1) wamambowo akhatonga madziko yomwe wanthu wa Mulungu akhakhala, (2) bzomwe iwo akhacita na wanthu wa Mulungu, bzikhalatiza kuti akhawenga Mulungu wacadidi omwe ni Yahova, ndipo (3) wamambo akhamenyana thangwe ra kupokerana mpando. w20.05 3 ¶3-4

Yahova akakhala na cakulinga, iye ambabzicitisa kukhala cinthu comwe cikufunika kuti akwanirise cakulingaco. Ndipo Yahova angacitisembo atumiki wace wakuperewera kukhala comwe cikufunika kuti amutumikire na kukwanirisa cakulinga cace. (Zai. 64:8) Tenepo, Yahova ambacita ciri-centse kuti cakulinga cace cikwanirisidwe ndipo palibe cinthu comwe cingamutazise. (Zai. 46:10, 11) Ifepano tingatende kwene-kwene Baba wathu wakudzulu tikambakumbukira bzomwe iye adacita na bzomwe akutithandiza kucita. Mwa ciratizo, tikambakumbukira bzinthu bzentse bzomwe iye adalenga, tin’dzadabwa kwene-kwene na cinthu ciri-centse comwe iye adakonza. (Sal. 8:3, 4) Ndipo tikambakumbukira momwe Yahova adatithandizira kuti tikwanirise cakulinga cace, tin’dzamulemekeza kwene-kwene. Mwakusaya kupenukira, dzina lakuti Yahova lin’funika kulemekezedwa kwene-kwene! Dzina limweri limbaphatanidza momwe Baba wathu aliri, bzomwe iye adacita kale na bzomwe an’dzacita kutsogoloku.—Sal. 89:7, 8. w20.06 9-10 ¶6-7

Mphepo yabwino (Oxigênio) imbacitisa wanthu na bzirombo kukhala na moyo. Masiyentista yawona kuti pa gole liri-lentse, cirengedwe centse ca moyo cimbapuma mphuwe izinji kwene-kwene. Pambuyo pa cirengedweci kukwewa mphepo, ico cimbacosa mphuwe yakucemeredwa gás carbônico. Napo bziri tenepo, cirengedwe cimbasaya lini mphepo yabwino yakupuma, ndipo m’mlenga-lenga mumbadzala lini na mphuwe. Thangwe ranyi? Thangwe ndakuti Yahova adalenga miti yakusiyana-siyana yomwe imbakwewambo gás carbônico, ndipo imbacosa mphepo yabwino ninga momwe likulewera vesi la lero. Kodi tingatende tani Yahova thangwe ra dziko lakudekali na bzinthu bzentse bzabwino bzomwe m’dzikoli? (Sal. 115:16) Njira ibodzi ndiyo kukumbukira bzinthu bzomwe iye adalenga. Tikacita bzimwebzi tin’dzalimbikisidwa kuti timbatende Yahova pa bzinthu bzentse bzomwe iye ambatipasa ntsiku na ntsiku. Timbalatizambo kuti timbatenda dzikoli mwa kucita ciri-centse kuti timbacenese mbuto yomwe timbakhala. w20.05 22 ¶5, 7

Yahova akulimbana na Sathani mwanzeru, mwakupirira na mwacirungamo. Ndipo iye ambalatiza kuti ngwamphanvu kwene-kwene mu njira zakusiyana-siyana. Kuposa bzentse, iye ambalatiza lufoyi pa bzentse bzomwe ambacita. (1 Ju. 4:8) Kulewa mwakusaya kupenukira, Yahova akupitiriza kucenesa dzina lace. Ntsiku zino Sathani akupitiriza kulewa magunkha kuti apswipize dzina la Mulungu. Iye akucitisa wanthu kupenukira kuti Mulungu ngwamphanvu, ngwacirungamo, ngwanzeru ndipo ngwalufoyi. Mwa ciratizo, Sathani ambapumpsa wanthu kuti ambakumbuke kuti Yahova ni Mulengi lini. Napo wanthuwo ambakhulupira kuti Mulungu alipo, Sathani ambawacitisa kuti ambakumbuke kuti malamulo ya Mulunguyo ngakusaya kulungama ndipo yambawaphera ufulu. Sathani ambapfunzisambo kuti Yahova ni Mulungu wakuipa, alibe ntsisi na wanthu thangwe ambawatentha ku moto. Ndipo thangwe ra kukhulupira magunkhaya, wanthu ambalamba utongi bwakulungama bwa Yahova. Sathani an’pitiriza kuyeza kukupumpsani kuti mukhale ku mbali yace mpaka pa nthawe yomwe an’dzakundidwa. Kodi iye an’kwanisa? w20.06 5-6 ¶13-15

M’magwere mazinji muna abale na mpfumakazi omwe akucita nyongo ikulu kuti apfunze cirewedwe cipsa. Kuna iwo bzingakhale bzakunesa kufotokoza bzomwe akukumbuka. Tsono tikaleka kumbandokumbukira bzomwe iwo ambaphonya pakulewalewa cirewedwe cathu, tin’dzakwanisa kuwona lufoyi lomwe iwo analo kwa Yahova na mtima wakufunisisa kumutumikira. Ndipo tikakhala tceru pa makhalidwe yabwino yomwe abale na mpfumakazi zathu anayo, tin’dzawawona kukhala wakufunika ndipo tin’dzawalemekeza kwene-kwene. Ndipo kutazira kwawo kulewalewa bwino cirewedwe cathu lin’dzakhala lini thangwe lakulewera kuti: ‘Ndiribe namwe basa.’ (1Ako. 12:21) Yahova ambatipasa mwayi ukulu wakukhala na mbuto mu gulu lace. Kuna iye bziribe basa penu ndife amuna ayai akazi, penu tina banja ayai tiribe, penu ndife wana ayai akulu, ne penu timbadziwa kulewalewa cirewedwe cipsa ayai penu bzimbatinesa. Tentse ndife wakufunika kwa Yahova ndipo ndifembo wakufunika kuna winango. (Aro. 12:4, 5; Akol. 3:10) Mbatinyang’aneni njira zakulemekezera mbuto yomwe Yahova adapasa ifepano na winango m’gwere. w20.08 31 ¶20-22

Wanthu wa mu mzinda wa ku Atena akhambanamata bzifanikiso, akhacita upombo ndipo akhakhulupira kwene-kwene nzeru za wanthu. Koma Paulo alibe kuleka kuwapalizira napo kuti iwo akhamutukwana. Thangwe ranyi iye adacita bzimwebzo? Thangwe adakumbukira kuti napo iyembo ‘[akhanyoza] Mulungu na kuzunza atumiki wace’ pomwe akhanati kukhala Mkristau. (1 Tim. 1:13) Ninga momwe Jezu adawonera kuti Paulo angadakhala nyakupfunza wace, Paulo adawonambo kuti wanthu wa ku Atena angadakhala anyakupfunza wa Jezu. Bzomwe Pauloyo adacita bzidakhala bza phindu. (Mab. 9:13-15) M’magole dzana yakutoma, wanthu wa mtundu uli-wentse adakhala anyakupfunza wa Jezu. Pomwe Paulo adanembera tsamba Akristau omwe akhakhala mu mzinda wa Girego ku Kolinto, iye adalewa kuti Akristau winango wa m’gwerelo, pomwe akhanati kukhala Akristau akhali akapondo ayai akhacita bzinthu bzinango bzakuipa. Iye adalewa pomwe kuti: ‘Winango wa imwepo mukhacita bzimwebzi. Tsono mudasambisidwa, mucicenesedwa.’ (1Ako. 6:9-11) Wanthu wa mu mzinda wa Kolinto adacinja acikhala anyakupfunza wa Kristu. Bzingadakhala kuti imwepo mukhalipombo mu mzindamo, kodi mungadawona kuti wanthuwo adathemera kukhaladi anyakupfunza? w20.04 12 ¶15-16

Akulu an’funika lini kuthamangira kuyeruza munthu omwe ayamba kukumbuka kuti kutumikira Yahova kulibe phindu. M’mbuto mwakumuyeruza, akuluwo an’funika kubvesesa thangwe lomwe lamucitisa kulewa ayai kukumbuka tenepo. Akuluwo akacita bzimwebzi, an’dzakwanisa kuphatisa basa Bibliya kuti alimbikise munthuyo. Mpolofeta Eliya adathawa Mambo-mkazi Jezabeli. (1 Wam. 19:1-3) Iye adakumbuka kuti kukhali bwino kufa. (1 Wam. 19:10) Yahova adabvesesa makumbukidwe yace. Ndipo adamutsimikizira kuti akhali lini yekha, akhafunika kukhulupira mphanvu za Mulungu nakuti pakhana basa lizinji lomwe angadacita. Mwakudeka mtima Yahova adatetekera Eliya pomwe akhafotokoza makumbukidwe yace ndipo adamupasa basa linango kuti acite. (1 Wam. 19:11-16, 18) Kodi tikupfunza ciyani? Tentsenefe, maka-maka akulu wa gwere tin’funika kumbasamalira mabira ya Yahova mwakudeka mtima. Munthu akalewa kuti adakalipa ayai akalewa kuti an’themera lini kulekereredwa na Yahova pa cinthu comwe aphonya, akulu wa gwere an’funika kumucitisa kukhala wakutsudzuka kufotokoza makumbukidwe yace acimutetekera. Akamala amuthandize kuwona kuti iye ngwakufunika kwene-kwene kwa Yahova. w20.06 22 ¶13-14

Yahova ambafuna kuti timbakhale wakukondwa na adzinza wathu, pabodzi na axamwali wathu. (Sal. 133:1) Jezu akhana axamwali wabwino. (Ju. 15:15) Bibliya limbalewa bza phindu la kukhala na axamwali wacadidi. (Mim. 18:24) Ndipo iro limbalewa kuti bziri lini bwino kumbabzipambula. (Mim. 18:1) Wanthu azinji ambakumbuka kuti interneti ni njira ibodzi yakukhalira na axamwali azinji kuti tileke kukhala wakupsoma. Tsono tin’funika kusamala kwene-kwene tikambaphatisa basa mbuto zakucezera za pa interneti. Kafukufuku winango ambalewa kuti wanthu azinji omwe ambamala nthawe izinji akuwona bzithunzi-thunzi na nkhani zinango pa mbuto zakucezera za pa interneti, ambadzamalizira kukhala wakupsoma na wakusunama. Thangwe ranyi? Thangwe likulu ndakuti bzithunzi-thunzi bzomwe wanthu ambaikha pa interneti, kawiri-kawiri bzimbalatiza bzomwe iwo adacita na momwe uliri moyo wawo. Tenepo, munthu omwe ambawona bzithunzi-thunzibzo, ambayamba kundendemezera moyo wace na moyo wa wanthuwo, ndipo ambawona kuti moyo waceyo ulibe na phindulo. w20.07 5-6 ¶12-13

Onani bzomwe Ntsanza ya Mulindiri ya 1 Outubro, 1988 idalewa, iyo idati: “Akulu wa gwere an’dzazindikira kuti Kristu mwakuphatisa basa mzimu wakucena, angatsogolere makumbukidwe ya mkulu ali-wentse wa gwere wa bungwe la akulu kuti afotokoze nfundo zakufunika za m’Bibliya, kuti adziwe bzomwe angacite pa nkhani iri-yentse ayai kucita cakusankhula cakufunika kwene-kwene. (Mab. 15:7-15) Mzimu wakucena umbathandiza akulu wentse wa gwere, sikuti mkulu m’bodzi.” Mkulu wa gwere omwe ambalemekeza akulu anzace ambayezera lini nthawe zentse kukhala wakuyambirira kulewalewa akakhala akucezerana pa mtsonkhano wawo wa akulu. Iye ambalewalewa lini kwene-kwene kuposa anzace, ndipo ambakumbuka lini kuti bzentse bzomwe alewabzo ndibzo bziri bwino kuposa bzomwe anzace alewambo. M’mbuto mwace, iye ambalewa bzomwe akukumbuka mu njira yakubzicepesa na mwakudeka mtima. Ndipo anzace akakhala akulewalewa bzomwe akukumbuka, iye ambawatetekera bwino ndipo ambawagwata lini mafala. Kuposa bzentse, iye ambakhala wakukonzeka kugawana na anzacewo nfundo za m’Bibliya na kuteweza malango yakucokera kwa ‘kapolo wakukhulupirika na wanzeru.’ (Mat. 24:45-47) Akulu wa gwere akambalatizana lufoyi na kumbalemekezana pa nthawe yakucezerana, mzimu wakucena umbakhala nawo pabodzi ndipo umbawatsogolera kuti acite bzakusankhula bzabwino.—Tiy. 3:17, 18. w20.08 27 ¶5-6

Anyamadulanthaka wa mpostolo Paulo akhana mphanvu kwene-kwene kuposa iye, ndipo akhamuwengambo kwene-kwene. Nthawe zizinji iwo akhamumenyesa acimuikhisa mkawoko. Ndipo Paulo adaboneresedwambo na wanthu omwe akhali axamwali wace. Napo wanthu winango wa m’gwere lacikristau akhamutsutsambo. (2Ako. 12:11; Afil. 3:18) Koma Paulo adakwanisa kukunda wanthu wentse omwe akhamutsutsa. Kodi adakwanisa tani? Iye adapitiriza kupalizira napo kuti akhatsutsidwa. Ndipo iye adapitirizambo kukhala wakukhulupirika kuna abale na mpfumakazi napo kuti nthawe zinango iwo akhumukalipisa. Kuposa bzentse, iye adakhala wakukhululupirika kwa Mulungu mpaka kufa. (2 Tim. 4:8) Paulo adakunda mphitca zikulu-zikuluzi sikuti na mphanvu zace, koma thangwe rakuti akhakhulupira kwene-kwene mphanvu za Yahova. Kodi imwepo mudagumana kale na mphitca zakusiyana-siyana ninga kutukwanidwa na kuzunzidwa? Cakulinga canu ni kufuna kuthandiza wanthu kuti akoye Fala la Mulungu m’mitima na m’makumbukidwe mwawo. Imwepo mungacite bzimwebzi mwakumbakhulupira Bibliya pakumbatawira mibvunzo ya wanthu, kulatiza ulemu na kudeka mtima kwa wale omwe ambakucitirani bzinthu bzakuipa na kucitira bzinthu bzabwino wanthu wentse kuphatanidza anyamadulanthaka wanu.—Mat. 5:44; 1 Pe. 3:15-17. w20.07 17-18 ¶14-15

Kodi tingalewe kuti Yahova ngwakubzicepesa? Inde. Ninga momwe Davide adalewa mu vesi la leroli. (Sal. 18:35) Pomwe Davide adalewa mafalaya, pinango iye akhakumbukira bza nthawe yomwe mpolofeta Samuyeri adayenda kumui kwa pai wace kuti akadzoze mambo mupsa wa Jirayeri. Davide akhali wakumalizira pa abale wace 8, koma napo bzikhali tenepo, Yahova adamusankhula kuti apite m’mbuto mwa mambo Sauli. (1 Sam. 16:1, 10-13) Davide akhana makumbukidwe mabodzi-bodzi na ya munthu omwe adanemba masalimo omwe pakulewa bza Yahova, adati: ‘Iye ambabuluka m’nyantsi kuti awone kudzulu na dziko la pantsi, ambadzusa wakubzicepesa ku pfumbi. Ambakwiza munthu wakusauka mwa kumucosa pa dotha.’ (Sal. 113:6-8) Tingapfunze bzizinji mwakuwona momwe Yahova ambacitira bzinthu na atumiki wace wakuperewera. Yahova ambatibvuma lini kokha ninga atumiki wace, koma ambatiwona kuti ndife axamwali wace. (Sal. 25:14) Kuti tikhale naye pa uxamwali, Yahova adatumiza mwana wace kuti adzatifere kuti pikado zathu zilekereredwe. Bzimwebzi bzikulatiza kuti Yahova ana ntsisi na wanthu. Ndipo bzimwebzi bzikulatizambo kuti iye ni Mulungu wakubzicepesa. w20.08 8 ¶1-3

Yahova adaikha kale ntsiku na nthawe kuti adzamalise dziko la kuipali. (Mat. 24:36) Iye an’pfudza lini dzikoli pomwe nthawe ikanati kukwana. Iye akupirira napo kuti akufunisisa kudzalamusa anyakufa. (Djobi 14:14, 15) Iye akudikhira nthawe yomwe adaitala kale kuti adzalamuse anyakufawo. (Ju. 5:28) Timbapenukira lini kuti kupirira kwa Yahova kumbatipfunzisa bzinthu bzizinji. Onani kuti thangwe ra kupirira kwa Yahova, wanthu azinji akhala na mwayi wakucinja makhalidwe yawo yakuipa, kuphatanidzambo ifepano. Yahova akufuna kuti wanthu azinji adzatambire moyo wakusaya kumala. Ndipopa, tin’funika kulatiza kuti timbatenda kwene-kwene Yahova thangwe ra kupirira kwace. Kodi tingalatize tani kutendako? Mwa kucita nyongo yakunyang’ana ‘wentse [ana] makumbukidwe yabwino yomwe [yangawathandize kudzagumana] moyo wakusaya kumala’ ticiwathandizambo kufuna Yahova na kumutumikira. (Mab. 13:48) Mwa njira imweyi iwo an’dzasimbidwa thangwe ra kupirira kwa Yahova, ninga ifepano. w20.08 18 ¶17

Ifepano tin’funa kuti nyakupfunza wathu wa Bibliya afike pa kumudziwa Yahova. Tsono bzomwe iye ambapfunzabzo bzin’funika kutokonya mtima wace kuti ayambe kubziphatisa basa pa moyo wace. Mwa ciratizo, Jezu adapfunzisa wanthu bzinthu bzizinji ndipo wanthuwo akhakomedwa kwene-kwene kupfunzisidwa naye. Iwo akhamutewera thangwe ra kutokonyedwa na bzomwe akhapfunzisidwabzo. (Luka 24:15, 27, 32) Nyakupfunza wanu an’funika kuwona Yahova ninga munthu caiye, omwe angakwanise kukhala naye pa uxamwali. Ndipo an’funikambo kumuwona ninga Baba wace, Mulungu wace na xamwali wace. (Sal. 25:5) Pomwe mukupfunza naye Bibliya, muthandizeni kuwona makhalidwe yabwino yomwe Mulungu wathu anayo. (Kuf. 34:5, 6; 1 Pe. 5:6, 7) Bziribe basa kuti mukupfunza nkhani iponi, muthandizeni kubvesesa momwe Yahova aliri. Ndipo pakupfunza nayepo muthandizeni kubvesesa makhalidwe yakufunika yomwe Yahova anayo, yomwe ni lufoyi, kudeka mtima na ntsisi. Jezu adalewa kuti: ‘Cakutonga cikululetu na cakutoma’ n’cakuti ‘umbafune Yahova, Mulungu wako.’ (Mat. 22:37, 38) Thandizani anyakupfunza wanu kuti ambafune Yahova na mtima wace wentse. w20.10 10 ¶12

Jezu akhalemekeza kwene-kwene akazi. (Ju. 4:27) Jezu akhalemekezadi akazi, maka-maka wale omwe akhacita kufuna kwa Baba wace. Bzimwebzi bzikulatiza kuti iye akhawawona ninga mpfumakazi zace, ndipo adawaikha mu gulu la amuna omwe akhacita mbali ya banja lace la uzimu. (Mat. 12:50) Jezu akhali xamwali wabwino kuna izo. Onani uxamwali bomwe bukhalipo pakati pa iye na Mariya pabodzi na Marta, omwe akhali wakusaya kulowodwa. Mwa mafala pabodzi na bzicito, Jezu adathandiza akaziwa kukhala wakutsudzuka. Mwa ciratizo, Mariya adabzibva kukhala wakutsudzuka pomwe adakhala naye pafupi ninga nyakupfunza wace. Tsono Marta pomwe adawona kuti Mariya akumuthandiza lini kukonzekera cakudya ca kumaulo, iye alibe kukomedwa ndipo adakhala wakutsudzuka kuuza Jezu bzomwe akhakumbuka. Pa nthawe imweyo, Jezu adakhala wakukonzeka kuthandiza mpfumakazi zacezo. (Luka 10:38-42) Iye adalatiza kuti akhacita nawo thupo pabodzi na m’bale wawo Lazaro, pomwe adadzawazungira pa nthawe inango. (Ju. 12:1-3) Tsono pomwe Lazaro adaduwala kwene-kwene, Mariya na Marta adadziwa kuti Jezu angadawathandiza.—Ju. 11:3. w20.09 20 ¶3; 21 ¶6

Anyakupfunza wa Jezu akhadikhirira kuti Umambo bwa Mulungu ‘bungadabwera nthawe imweyoletu’ buciwapulumusa ku utongi bwa Roma. Ifepano tikufuna kuti Umambo bwa Mulungu bumalise bzinthu bzakuipa na kukhazikisa dziko lipsa lakudzala na wanthu wakulungama omwe ambabvera Yahova. (2 Pe. 3:13) Napo bziri tenepo, ifepano tin’funika kupitiriza kupirira. Yahova adabvuma kuti Nowa amale nthawe izinji akumanga cingalawa, nakuti akhalembo ‘mpalizi wa cirungamo.’ (2 Pe. 2:5; 1 Pe. 3:20) Yahova adatetekera Abalahamu pomwe akhamubvunza mwakubwereza-bwereza bzakupfudzidwa kwa wanthu wa m’mizinda ya Sodoma na Gomora. (Ciy. 18:20-33) Kwa magole mazinji, Yahova adalatiza kupirira kuna mtundu wakusaya kukhulupirika wa Ajirayeri. (Neh. 9:30, 31) Umboni bwakuti Yahova ngwakupirira, bumbawonekera pa mpata omwe iye akuupereka kuna wanthu omwe an’funa kukhala axamwali wace. (2 Pe. 3:9; Ju. 6:44; 1 Tim. 2:3, 4) Ciratizo ca Yahova cikutipasa mathangwe yabwino yakuti tipirire pomwe tikupitiriza kupalizira na kupfunzisa wanthu. w20.09 10 ¶8-9

Yahova akadzalamusa munthu, iye an’dzabwezeresa makumbukidwe na makhalidwe ya munthuyo, ndipo iye an’dzakhala ninga momwe akhaliri kale pomwe akhanati kufa. Thangwe ranyi Yahova an’dzacita bzimwebzi? Thangwe ambatifuna kwene-kwene, ndipo iye ambacita thupo pa bzentse bzomwe timbakumbuka, bzomwe timbabva, bzomwe timbalewa na bzomwe timbacita. Ndipo Yahova acifuna kukumusani kwa anyakufa, mwakusaya kupenukira iye angakwanise kukumbukira nzeru zanu, bzicito bzanu na mawonekedwe yanu. Mambo Davide akhadziwa kuti Yahova ambacita thupo kwene-kwene na ali-wentse wa ifepano. (Sal. 139:1-4) Tawona kuti Yahova ambatidziwa bwino, tsono bzimwebzi bzikutipfunzisa ciyani? Kukumbukira kuti Yahova ambatidziwa bwino, kumbatithandiza kuleka kukhala na thupo kwene-kwene. Lekani kuyebwa kuti Yahova ambakufunani kwene-kwene. Iye ambakomedwa na makhalidwe yanu yomwe yambakusiyanisani na winango. Iye ambawona mwa tceru bzomwe bzimbakucitikirani pa moyo wanu, na bzomwe bzimbakucitisani kukhala ninga momwe mulirimo. Mpsabwino kudziwa bzimwebzi, ndibzo lini? Tenepo, lekani kubzibva kuti muli mwekha. Yahova nthawe zentse ali namwe, ndipo ambacita ciri-centse kuti akuthandizeni.—2 Nkha. 16:9. w20.08 17 ¶13-14

Yahova ambafuna kupfunzisa wanthu wace. Iye akufuna kuti atumiki wacewo amudziwe na kumufuna ninga wana wace omwe ambawafuna. Tsono bzentsenebzi bzingakwanisike lini bzikakhala kuti Yahovayo ambawapfunzisa lini. (Ju. 17:3) Mwa ciratizo, Yahova adaphatisa basa atumiki wace wakuyambirira kuti apfunzise wanthu wace. (Akol. 1:9, 10) Mzimu wakucena omwe ni ‘mthandizi’ omwe Jezu adalewa udathandizambo anyakupfunza. (Ju. 14:16) Mzimu wakucena udathandiza anyakupfunzawo kubvesesa Fala la Mulungu na kukumbukira bzomwe Jezu adalewa na kucita. Ndipo na kupita kwa nthawe iwo adabziwerenga m’mabukhu ya Mavanjedyo. Bzomwe iwo adawerengabzo bzidalimbikisa cikhulupiro ca Akristau wakuyambirira, bzidalimbikisa lufoyi lomwe akhanalo kuna Mulungu pabodzi na kuna Mwana wace ndipo bzidawalimbikisambo kuti iwo ambafunane. Yahova adaleweratu kuti mu ‘ntsiku za kumalizira’ wanthu an’dzayenda pa phiri lace lakuyezezera kuti akapfunzisidwe njira zace. (Zai. 2:2, 3) Ndipo ifepano tikuwona polofesiya imweyi ikukwanirisidwa mu ntsiku zathu zino. w20.10 24 ¶14-15

Kodi n’ciyani cingacitise munthu kulamba malango yakucokera kwa xamwali wace walufoyi? N’khubzikuza. Wanthu wakubzikuza ambandofuna kubva ‘bzakuwadekera m’makhutu mwawo. Iwo [ambasiya] kutetekera cadidi kuti ambatetekere nkhani zakunama.’ (2 Tim. 4:3, 4) Ndipo thangwe ra kubziwona kukhala wa nzeru na wakufunika kwene-kwene kuposa winango, iwo ambakumbuka kuti ambafunikira lini kupasidwa malango. Tsono mpostolo Paulo adanemba kuti: ‘Penu munthu akubziwona kuti ngwakufunika pomwe n’tenepo lini, akubzinamiza yekha.’ (Agal. 6:3) Mambo Salomau adafotokoza bwino-bwino bzimwebzi. Iye adanemba kuti: ‘Mulumbwana wakusauka koma acikhala wa nzeru, ali bwino kusiyana na mambo wakukalamba na wapezi-pezi omwe alibe makumbukidwe yakufuna kubvera malango.’ (Mpal. 4:13) Kumbukirani bzomwe Pedru adacita pomwe adatsimulidwa na Paulo pakati pa wanthu azinji. (Agal. 2:11-14) Pedru angadakalipa na bzomwe Paulo adalewa na momwe adalewera, ndipo angadakalipambo thangwe ra kutsimulidwa pakati pa wanthu azinji. Koma Pedru akhali munthu wa nzeru. Tenepo iye adabvuma kutambira malango yomwe Paulo adamupasa ndipo alibe kumukoyera cakumtima. M’mbuto mwace Pedruyo na kupita kwa nthawe adadzalewa kuti Paulo ni ‘m’bale wakufunidwa.’—2 Pe. 3:15. w20.11 21 ¶9, 11-12

Kodi anyakupfunza wa Bibliya angayende tani patsogolo mwauzimu? Angayende patsogolo mwa kumbafika pa mitsonkhano yathu yacikristau. Nyakupfunzayo akambafika pa mitsonkhano an’dzapfunza bzizinji, an’dzakulisa cikhulupiro cace, ndipo mitsonkhanoyo in’dzamuthandiza kukulisa lufoyi lace kuna Mulungu. (Mab. 15:30-32) Mpaliziyo angafotokozerembo nyakupfunzayo bzomwe bzidamucitisa kukulisa lufoyi lace na Yahova acibvera mitemo yace. (2Ako. 7:1; Afil. 4:13) Ndipo anyakupfunza wa Bibliya akawona bziratizo bzabwino bza apalizi wakukhulupirika, iwo ambapfunza na bziratizo bzawo bzomwe bzimbathandauza kubvera mitemo ya Kristu, kufuna Mulungu pabodzi na wanthu winango. (Ju. 13:35; 1 Tim. 4:12) Ndipo akawona mpalizi omwe adagumanambo na bzineso ningati bzawo, iwo ambazindikira kuti mpsakukwanisika kucinja acikhala mteweri wa Kristu. (Bzak. 30:11) Munthu ali-wentse wa m’gwere angathandizire mu njira iri-yentse kuti nyakupfunza wa Bibliya akule mwauzimu.—Mat. 5:16. w20.11 5 ¶10-12

Pinango iye akhalewa bzakumenyana na bzirombo mu mbuto ya masenzeka ku Efezo. (2Ako. 1:8; 4:10; 11:23) Ayai pinango iye akhalewa bza Adjuda omwe akhamuzunza, omwe akhali ninga ‘bzirombo.’ (Mab. 19:26-34; 1Ako. 16:9) Bziribe basa bzomwe iye akhathandauza, bzomwe tikudziwa mpsakuti Paulo adagumana na mabvuto yakugopswa, koma iye adapitiriza kukhulupira kuti kutsogolo angadadzakhala na moyo wakukondwa. (1Ako. 15:30, 31; 2Ako. 4:16-18) Ifepano tikukhala mu ntsiku zakugopswa. Abale wathu winango ambacitiridwa ciwembo, winango ambakhala m’madziko yomwe yakucitika nkhondo, ndipo ambabzibva kuti ali lini wakukhotcerereka ndipo winango akutumikira Yahova m’madziko yomwe basa lathu lakupalizira ndakuletsedwa napo acidziwa kuti angamangidwe ayai kuphedwa. Napo bziri tenepo, abale na mpfumakazi amwewa akupitiriza kukhala wakukhulupirika pa kutumikira Yahova. Ndipo cimweci ni ciratizo cabwino kwene-kwene kwa ifepano. Kudziwa bzimwebzi kumbawakhotcerera, thangwe ambadziwa kuti napo aluze moyo wawo ntsiku zino, Yahova akulewa kuti an’dzawapasa bzinthu bzabwino kutsogoloku. w20.12 9 ¶3-4

Kodi imwepo nthawe zinango mumbatepa thangwe rakuti wanthu wa mu gawo lanu akufuna lini kubva mafala yabwino? Ayai, kodi mumbatepa thangwe rakuti wanthu omwe ambagumanika pamui mbang’ono-ng’ono? Kodi pa nkhani ninga imweyi mungapitirize tani kukhala wakukondwa? Mpsabwino kukhala na makumbukidwe yabwino ya utumiki. Kodi bzimwebzi bzikuphatanidza ciyani? Pitirizani kukhala na cakulinga cakupitiriza kupalizira bza dzina la Mulungu na Umambo bwace. Jezu adaleweratu kuti ni wanthu ang’ono-ng’ono omwe angadzakhala anyakupfunza wace. (Mat. 7:13, 14) Ifepano tikakhala tikupalizira timbakhala tikuphata basa na Yahova, Jezu pabodzi na anjo. (Mat. 28:19, 20; Apok. 14:6, 7) Yahova akunyang’ana wanthu wale omwe akufuna kumutumikira. (Ju. 6:44) Tenepo, munthu akasaya kutetekera mafala yabwino pa nthawe imweyi, iye pinango pa nthawe inango angadzabvume kuti ticeze naye. Mpfumakazi inango yakucemeredwa Deborah idati: “Sathani ambaphatisa basa kutepa ninga cifuzo camphanvu kwene-kwene kuti atigwese.” Koma Yahova Mulungu ngwamphanvu kwene-kwene kuposa Sathani na bzifuzo bzace. w20.12 26-27 ¶18-19, 21

Akristau azinji ambamala ntsiku yentse akuphata basa kuti akwanise kubzidyesa na kudyesambo banja lawo. Koma napo bziri tenepo, abale wakukhulupirikawa ambacita ciri-centse comwe angakwanise, kuti athandizire gulu la Mulungu. Mwa ciratizo, winango ambathandizira pakakhala pagwa malengwa ya pantsi, winango ambathandizira basa la bzakumanga-manga, ndipo ali-wentse ana mwayi wakucita bzakupereka kuti bzithandizire basa la pa dziko lentse. Iwo ambacita bzimwebzi thangwe ra kufuna kulatiza kuti ambafuna Mulungu pabodzi na abale wawo. Pa sumana iri-yentse, timbalatiza kuti timbafuna abale na mpfumakazi zathu mwa kugumanika pa mitsonkhano na kucitambo mbali pa mitsonkhanopo. Napo tinete tani timbayenda basi kumitsonkhanoko, napo tikakhala kuti tikugopa kupereka mtawiro, koma timbatawira basi. Napo tigumane tani na mabvuto timbalimbisana, pomwe mitsonkhano ikanati kuyamba ayai kuphampha kwa mitsonkhanoyo. (Aheb. 10:24, 25) Ndipo timbatenda bzentse bzomwe abale na mpfumakazi zathu ambacita. w21.01 10 ¶11

Wanthu wakubzikuza mbakusiyana na wanthu wakubzicepesa. Wanthu wakubzikuza bzimbawanesa kutenda anzawo, koma ambandofuna kuti ambatendedwe ndiwo basi. Iwo ambakhala na msambo wakubzindendemezera na anzawo ndipo ambakulisa khalidwe la mpikisano. M’mbuto mwakupfunzisa anzawo na kuwapasambo basa, makumbukidwe yawo yambandokhala yakuti: “Penu un’funa kuti bzinthu bzifambe bwino, cita wekha.” Nkhani njakuti, kuti iwo awone kuti cinthu cafamba bwino, bzentse bzin’funika kucitika ninga momwe iwo akufunira. Kuthimizira bzimwebzi, wanthu wakubzikuza kawiri-kawiri ambakhala wanthu wakubziwonesa na wanjiru. Tikazindikira kuti tina ka msambo kakufuna kubziwonesa, tin’funika kukumbira Yahova kuti atithandize ‘kucinja makumbukidwe yathu.’ Tenepo ka mtima kakufuna kubzikuza kan’dzawoneka lini mu mtima mwathu. (Aro. 12:2) Timbatenda kwene-kwene thangwe ra ciratizo comwe Yahova ambatipasa! (Sal. 18:35) Timbawona kubzicepesa kwa Yahova kucokera pa bzomwe iye ambacita na atumiki wace, ndipo ifepano tin’funikambo kumutewezera. Ndipo kuthimizira bzimwebzi tin’funikambo kutewezera bziratizo bza m’Bibliya bza wanthu omwe adalatiza khalidwe la kuzindikira malire pakufamba na Yahova. Tikacita bzimwebzi, tin’dzalemekeza Yahova na kumupasa mbiri yomwe iye an’themera.—Apok. 4:11. w20.08 13 ¶19-20

Malowozi ni mphaso yakupambulika na yakulungama yakucokera kwa Mulungu, tsono wanthufe ndife wakuperewera. (1 Ju. 1:8) Ndipopa Fala la Mulungu limbacenjeza anyakulowolana kuti iwo “an’dzagumana na mabvuto mazinji pa moyo wawo.” Yahova akudikhirira kuti amuna wacikristau asamalire mabanja yawo mwa kumbayapasa bzomwe iyo yambafunikira na kuyathandiza kupitiriza kunamata Yahovayo. (1 Tim. 5:8) Napo bziri tenepo, mpfumakazi zomwe ziri pa banja zin’funika kumbapambula nthawe kuti zimbawerenge Fala la Mulungu ntsiku zentse, kukumbukira, na kumbapemba kwa Yahova na mtima wawo wentse. Tsono, bzingakhale bzakunesa kucita bzimwebzi. Akazi ambakhala adatanganidwa, tsono mpsakufunika kuti iwo ambacite bzimwebzi. Thangwe ranyi? Thangwe Yahova akufuna kuti ali-wentse wa ifepano akulise lufoyi ndipo apitirize kukhala naye pa uxamwali. (Mab. 17:27) Mpsakubveka kuti mkazi an’funika kucita nyongo kuti abvere mwamuna wace. Ndipo Bibliya limbapereka mathangwe yabwino yakuti mkazi ambabvere mwamuna wace. Tenepo, iye akabvesesa na kubvuma bzomwe Bibliya limbapfunzisa pa nkhaniyi, bzin’dzamunesa lini kucita bzimwebzi. w21.02 8 ¶3; 9 ¶6-7

Mabvuto yangakhale ninga moto omwe umbaphatisidwa basa pakusulira simbi. Pomwe simbiyo yamala kusulidwa icidjedjeresedwa m’madzi imbadzakhala yakulimba kwene-kwene. Mwakundendemerana na bzimwebzi, ifepano tikambapirira mabvuto, cikhulupiro cathu cimbakhala cakulimba kwene-kwene. Ndipopa Tiyago adanemba kuti: “Imwepo mukapitiriza kupirira, bzimwebzi bzin’dzakupfunzisani, ndipo imwepo mun’dzaphonya lini m’bzinthu bzentse.” (Tiy. 1:4) Tikambawona mabvuto yakucitisa cikhulupiro cathu kukhala cakulimba, ifepano tin’dzapirira mabvutoyo mwakukondwa. Tiyago mu tsamba lace, adanemba bzinthu bzinango bzomwe bzingatitazise kukhala wakukondwa. Cibodzi ca bzinthubzo ni pomwe tikudziwa lini cakucita. Tikakhala tikugumana na mabvuto, tin’funika kukumbira Yahova kuti atithandize kusankhula kucita bzinthu bzomwe bzingamutumbizise, bzomwe bzingabwerese phindu kuna abale na mpfumakazi zathu na kutithandiza kupitiriza kukhala wakukhulupirika kwa Yahova. (Jer. 10:23) Ifepano timbafunikira nzeru kuti tidziwe bzakucita na kuwona bzomwe tingalewe kuna wale omwe ambatinyoza. Tsono tikakhala kuti tikudziwa lini bzakucita, ifepano tingasuname ticileka kukhala wakukondwa. w21.02 28 ¶7-9

Yahova ambatipasa ciratizo pa nkhani imweyi. Iye ambatifuna na mtima wentse, mwakuti tikakhala wakukhulupirika kwa iye, palibe cinthu comwe cingacitise Yahova kuleka kutifuna. (Aro. 8:38, 39) Fala la cigirego lomwe lidasanduliziridwa kuti ‘na mtima wentse’ limbathandauza munthu omwe ambacita nyongo ikulu kuti alatize lufoyi. Nthawe zinango, ifepano timbafunikira kucita nyongo na kulimbikira kuti tilatize lufoyi cairo kuna abale na mpfumakazi zathu. Wanthu winango akatiphonyera, ifepano tin’funika kupitiriza kumbapirirana mwa lufoyi ticimbacita nyongo kuti tikhale wakuphatana mwa mzimu na mwa mtendere ninga cingwe cakutimangiridza. (Aef. 4:1-3) Tin’dzandokhalira lini kuwona bzakuphonya bzawo. Koma tin’dzacita ciri-centse comwe tingakwanise kuti timbawone abale wathuwo ninga momwe Yahova ambawawonera. (1 Sam. 16:7; Sal. 130:3) Nthawe zizinji bzimbakhala lini bzakupusa kulatiza lufoyi cairo kuna abale na mpfumakazi zathu, maka-maka tikakhala kuti tiri kuwona bzakuphonya bzawo. Pinango bzimwebzi, bzidacitikirambo Akristau wa m’magole dzana yakuyambirira ninga momwe bzidacitikira na Evodiya na Sintike Mpostolo Paulo adawacenjeza ‘kuti akhale na makumbukidwe mabodzi mwa Mbuya.’—Afil. 4:2, 3. w21.01 22 ¶10-11

Acikulire ambatenda maswaka yomwe yakutumikira Yahova ‘mwakuphatana’ nawo. (Sof. 3:9) Maswakamwe, acikulire ambatenda nyongo yanu ndipo iwo ambakomedwa namwe kwene-kwene. Maswakamwe, lekani kuyebwa kuti Yahova ambakufunani ndipo ambakukhulupirani. Yahova akhadalewa kale kuti maswaka yangadadzakhala acikunda wakukonzeka kubzipereka mwakufuna kwawo. (Sal. 110:1-3) Yahova ambadziwa kuti imwepo mumbamufuna ndipo mukucita ciri-centse kuti mumutumikire. Tenepo, khalani wakupirira ndipo mbapiriranimbo na wanthu winango. Ndipo mukaphonya, bvumani kupfunzisidwa, na malango yomwe munthu angakupaseni. Ndipo mbawonani malangoyo kuti yakucokera kwa Yahova. (Aheb. 12:6) Mbacitani nyongo yakukwanirisa utumiki bwanu. Ndipo kuposa bzentse bzomwe mumbacita, mbakondwesani Baba wanu wa kudzulu.—Mim. 27:11. w21.03 7 ¶17-18

Pana bzinthu bzizinji bzomwe bzingatitepese. Ndipo kutepa kunango kungawoneke na maso, kunango kungawoneke lini. Bzinthu bzimwebzi bzimbaphatanidza, bzomwe timbaphonya, bzomwe timbatazira kucita ayai matenda. Pinango tingatepe thangwe rakuti tiribe kutambira udindo bomwe tikhafuna mu gulu la Yahova, ayai pinango tikupalizira ku mbuto komwe wanthu akufuna lini kubva mafala yathu. Mpsakusaya kunesa kubziwona kuti ndife wapezi-pezi thangwe ra bzakuphonya bzomwe timbacita. Na bzimwebzi, ifepano tingayambe kukumbuka kuti thangwe ra bzomwe timbacitabzo, Yahova angabvume lini kuti tidzapite mu paraizo. Mpsakuphonyeka kukumbuka tenepoyo. Bibliya limbalewa kuti wanthu wentse ‘adaphonya’ kupambula munthu m’bodzi yekha, Jezu Kristu. (Aro. 3:23) Koma Yahova ambandokhalira lini kuwona bzakuphonya bzathu, ayai kudikhira kuti tikhale wakulungama. M’mbuto mwace, iye ni Baba walufoyi omwe ambafuna kutithandiza. Ndipo Yahovayo ambapirira nafe. Iye ambadziwa momwe ifepano timbacitira nyongo kuti tireke kumbaphonya. Ndipo iye ngwakukonzeka kutithandiza.—Aro. 7:18, 19. w20.12 22 ¶1-3

Ifepano tiri paulendo. Ndipo cakulinga cathu n’cakuti tikapite mu dziko lipsa lomwe lin’dzatongedwa na Yahova mwa lufoyi. Ntsiku iri-yentse timbayeza kufamba mu mseu omwe ukutsogolera ku moyo. Koma ninga momwe Jezu adalewera, mseuyo ngwakupapatiza ndipo nthawe zinango bzimbatinesa kuuteweza. (Mat. 7:13, 14) Pakuti ndife wanthu wakuperewera, mpsakupusa kucoka mu mseumo. (Agal. 6:1) Penu ifepano tin’funa kufamba mu mseu wakupapatiza, tin’funika kucinja makumbukidwe yathu, makhalidwe yathu na bzomwe timbacita. Mpostolo Paulo ambatiuza kuti tin’funika ‘kucinja bzinthu bzomwe [tin’funikira] kucinja.’ Bziribe kupusa kuna ifepano kudinga makumbukidwe yathu na momwe timbabvera. Thangwe ranyi? Thangwe mtima umbapumpsa ndipo bzingakhale bzakunesa kudziwa komwe ukutiyendesa. (Jer. 17:9) Mpsakupusa kuna ifepano kubzinamiza tekha na ‘nzeru zakunama.’ (Tiy. 1:22) Ndipopa kuti tikwanise kumbabzidinga tekha tin’funika kumbaphatisa basa Fala la Mulungu. Fala la Mulungu limbatithandiza kuzindikira unthu bwathu kuphatanidzambo ‘makumbukidwe na bzakufuna bza mtima’ wathu.—Aheb. 4:12, 13. w20.11 18 ¶1-3

Tikakhala wakubzicepesa na wakuzindikira malire, timbakondwa kwene-kwene. Thangwe ranyi? Thangwe rakuti tikadziwa malire yathu, timbatenda ndipo timbakhala wakukondwa thangwe ra thandizo liri-lentse lomwe wanthu winango angatipase. Mwa ciratizo, kodi mukukumbukira pomwe Jezu adapoza anyamapere khumi wale? Ni m’bodzi yekha omwe adabwerera kukatenda Jezu thangwe ra kumupoza matenda yakuipa yale. Iye angadakwanisa lini kubzipoza yekha mwakusaya kuthandizidwa na Jezu. Kubzicepesa na kuzindikira malire kwa munthu ule bzidamucitisa kutenda na kupasa mbiri Mulungu thangwe ra thandizo lomwe adapasidwa. (Luka 17:11-19) Munthu wakubzicepesa na wakuzindikira malire ambakhala bwino na anzace ndipo ambakhala na axamwali wa pa mtima. Thangwe ranyi? Thangwe wanthu omwe ana makhalidwe yamweya bzimbawanesa lini kuzindikira makhalidwe yabwino ya anzawo na kuwakhulupira. Wanthu wakubzicepesa na wakuzindikira malire ambakhala wakukondwa akawona kuti moyo wa anzawo ukuwafambira bwino pa utumiki bomwe iwo akucita. Ndipo iwo ambazeza lini kutenda anzawo ayai kuwalemekeza. w20.08 12 ¶17-18