Setembro

Pedru adabveranisa bzomwe bzidacitikabzi na polofesiya ya Djoweri. (Mab. 2:16, 17) M’mbuto mwakuyamba na mafala yakuti ‘bzimwebzi bzikadzacitika,’ Pedru adayamba na mafala yakuti, ‘mu ntsiku zakumalizira.’ Mafalaya yakuimira nthawe yomwe mzinda wa Jeruzalemu na templo bzikhanati kupfudziwa. Ndipo mu ntsiku zakumalizirazo, mzimu wa Mulungu ungadaperekedwa kuna ‘mtundu uli-wentse wa wanthu.’ Bzimwebzi bzikulatiza kuti padapita nthawe kuti polofesiya ya Djoweri ikwanirisidwe. Pomwe Mulungu adapereka mzimu wace wakucena kwa akristau wa m’magole dzana yakutoma, iwo adayamba kucita basa lakupalizira lomwe na kupita kwa nthawe lingadadzacitidwa pa dziko lentse. Ndipo mu tsamba lomwe mpostolo Paulo adanembera Akristau wa ku Kolose mu gole la 61 E.C., iye adalewa kuti ‘cirengedwe centse’ cikhadapaliziridwa bzipsa bzabwino. (Akol. 1:23) Pomwe Paulo adalewa kuti “cirengedwe centse,” iye akhalewa bza magawo ya pa dziko la pantsi yomwe iye pabodzi na anzace akhayapalizira. Na thandizo la mzimu wakucena wa Yahova, ntsiku zathu zino, basa lakupalizira likucitidwa m’mbuto zakusiyana-siyana ndipo lafika “pa dziko lentse la pantsi.”—Mab. 13:47. w20.04 6-7 ¶15-16

Yahova ambafuna ali-wentse wa ifepano, kuphatanidzambo wale omwe ataika. (Mat. 18:12-14) Mulungu adalewa kuti an’nyang’ana mabira yace yakutaika aciyathandiza kukhala naye pomwe pa uxamwali. Ndipo iye adalewa bzomwe angadacita kuti ayagumane. Bzomwe iye angadacitabzo mpsibodzi-bodzi na bzomwe makabusa wa ku Jirayeri akhacita bira wace m’bobzi akataika. (Zakiy. 34:12-16) Cakuyamba, makabusayo akhayenda kukanyang’ana birayo, bzomwe bzikhafunika nthawe izinji na nyongo. Tenepo makabusayo akam’gumana birayo, akham’nyamula aciyenda naye kuna mabira yanzace. Ndipo birayo akakhala na cironda ayai na njala, makabusayo akhamusamalira mwalufoyi, kum’nyamula, kumanga bzironda bzace na kum’pasa cakudya. Tenepo amakabusa wa ‘mabira ya Mulungu,’ ayai kuti akulu, an’funika kucita bzibodzi-bodzibzi kuti athandize wale omwe aleka kutsonkhana. (1 Pe. 5:2, 3) Akulu ambanyang’ana mabirayo, ambayathandiza kuti yabwerere m’gwere mwa kuyathandiza kuti yakhale pomwe pa uxamwali na Yahova. w20.06 20 ¶10

Jezu adawona kuti minda ikhadacena kale ndipo ikhafunika kubvunidwa. Tsono bzimwebzi bzikufuna kulewa kuti iye akhakumbuka kuti wanthu azinji angadakhala ateweri wace? Ne na pang’onopo. Bzinembo bzikhadalewa kale kuti ni wanthu wakucepa omwe angadamukhulupira. (Ju. 12:37, 38) Jezu akhakwanisa kuwona bzomwe bzikhali mu mtima mwa wanthu. (Mat. 9:4) Napo bzikhali tenepo, iye akhalinga wanthu omwe angadamukhulupira ndipo akhapalizira wentse na nyongo. Penu Jezu omwe akhakwanisa kuwona bza mu mtima mwa wanthu, koma alibe kuwayeruza, tsono tani ifepano omwe tingakwanise lini kucita bzimwebzi? M’mbuto mwakuyeruza gawo ayai munthu omwe mukumupalizira, mbawonani kuti wanthuwo angakhale anyakupfunza wa Jezu. Kumbukirani bzomwe Jezu adauza anyakupfunza wace. Iye adalewa kuti, minda yacena kale ayai ikufunika kubvunidwa. Mafalaya yakulatiza kuti wanthu angacinje acikhala anyakupfunza wa Kristu ndipo Yahova ambawonambo tenepoyo. Iye ambawona kuti wanthu wa m’gawo lathu mbakufunika kwene-kwene. (Hag. 2:7) Tenepo tikambawona wanthu wa m’gawo lathu ninga momwe Yahova na Jezu ambawawonera, tin’dzakwanisa kudziwa momwe moyo wawo uliri na bzomwe iwo ambafuna. Ndipo tin’dzawawona lini ninga wanthu wacirendo, koma ninga omwe angakhale abale na mpfumakazi zathu. w20.04 13 ¶18-19

Kuti ifepano tikondwese Yahova, Bibliya limbalewa kuti tin’funika kumbafuna Jezu na kucita ciri-centse kuti lufoyiro lireke kumbombowa. Cinthu cibodzi comwe tingacite kuti tikhale axamwali wa Jezu ni kumudziwa bwino Jezuyo. Tingamudziwe mwa kuwerenga mabukhu ya m’Bibliya yomwe ni Mateu, Marko, Luka, na Juwau. Tikambakumbukira bzomwe Bibliya limbalewa pa nkhani ya moyo wa Jezu m’mabukhuya, timbapfunza bzomwe tingacite kuti tifune na kulemekeza Jezu, thangwe iye akhadekera mtima wanthu. Mwa ciratizo, napo kuti iye akhali Mbuya kwa anyakupfunza wace, Jezu akhawawona lini ninga akapolo. M’mbuto mwace, akhawafotokozera makumbukidwe yace nakuti akhawabisira lini cinthu. Ndipo anyakupfunza wace akasunama iye akhasunamambo, akalira iye akhalirambo. (Ju. 11:32-36) Napo anyamadulanthaka wa Jezu akhawona kuti iye akhali xamwali wa wentse omwe akhatetekera mafala yace. (Mat. 11:19) Tikambatewezera momwe Jezu akhacitira bzinthu na anyakupfunza wace, timbakhala pa mbverano wabwino na wanthu winango, timbakhala wakukondwa, ndipo lufoyi na kutenda kwathu Jezu bzimbathumizirika. w20.04 22 ¶9-10

Mu 1870, dziko la Grã-Bretanha lidakhala boma lamphanvu kwene-kwene pa dziko lentse la pantsi, ndipo lidakhalambo na anyankhondo wamphanvu kwene-kwene. Polofesiya ya Danyeri imbalewa bza nyanga ing’ono yomwe idakunda nyanga zitatu. Nyanga ing’onoyo ikuimira boma la Grã-Bretanha, ndipo nyanga zinangozo zikuimira maboma ya França, Espanha na Holanda. (Dan. 7:7, 8) Boma la Grã-Bretanha lidakhala mambo wa ku suli mpaka pa Nkhondo Yakuyamba ya pa Dziko Lentse la Pantsi. Pa nthawe ibodzi-bodziyo, boma la América lidakhala lakudala kwene-kwene pa dziko lentse la pantsi, ndipo lidayamba kubverana na boma la Grã-Bretanha. Pa nthawe ya Nkhondo Yakuyamba ya pa Dziko Lentse la Pantsi, boma la América lidaphatana na boma la Grã-Bretanha, ndipo mabomaya yadamenya nkhondo pabodzi, yacikhala yamphanvu kwene-kwene. Iyo yadaphatana, yacikhala boma libodzi lakutonga dziko lentse la pantsi, licidziwika na dzina la Potência Mundial Anglo-Americana. Polofesiya ya Danyeri idalewa kuti boma lakuphatanali ni mambo omwe an’dzakonkhanisa ‘gulu likulu la anyankhondo.’ Tenepo, kucokera pomwe ntsiku zakumalizira zidayamba, boma lakuphatana la Grã-Bretanha na América ndiro limbaimira mambo wa kummwera. w20.05 4 ¶7-8

Pa dziko la pantsi pana madzi thangwe rakuti dzuwa liri patali na madziyo. Bzingadakhala kuti dzuwalo liri pafupi na madzi, pa dzikoli pangadakhala palibe madzi ne camoyo ciri-centse. Ndipo bzingadakhala kuti dzikoli liri patali kwene-kwene na dzuwa, madzi yangadaphatana, ndipo lingadakhala cibola cikulu cakuuma (gelo). Tsono pakuti Yahova adaikha dziko la pantsi pa mbuto yakuthemera, madzi yambafamba ndipo yambathandiza camoyo ciri-centse. Kodi bzimbacitika tani? Kutentha kwa dzuwa kumbacitisa madzi ya m’nyanza, m’mikulo na m’mathawale kukwira m’mlenga-lenga yacikakonza mitambo. Masiyentista yambalewa kuti pa gole liri-lentse, madzi yomwe yambakwira m’mlenga-lenga thangwe ra kutentha kwa dzuwa, m’mazinji kwene-kwene kuposa madzi yomwe yambagumanika m’mathawale (lagos) yomwe yali pa dziko la pantsi. Ndipo madzi yomwe yambakwira m’mlenga-lengamo yambakakhala kumweko ntsiku khumi, pambuyo pace yambagwa mwa kucita kubvumba ayai mwakucita pfulere. Madziyo yakagwa yambabwerera pomwe m’nyanza, m’mikulo na m’mathawale ndipo yakamala yambakwira pomwe m’lenga-lenga. Yahova adakhazikisa njira imweyi ya kafambidwe ka madzi kuti dziko la pantsi likhale na madzi nthawe zentse, ndipo bzimwebzi bzikulatiza kuti Yahovayo ngwanzeru na wamphanvu kwene-kwene.—Djobi 36:27, 28. w20.05 22 ¶6

Jezu adatiuza kuti timbapembe nthawe zentse mwa kukumbira mzimu wakucena. (Luka 11:9, 13) Na mzimu wace wakucena, Yahova ambatipasa ‘mphanvu yakuposa yacibadwa.’ (2Ako. 4:7) Ndipo na thandizo la mzimu wa Mulungu, tingapitirize kupirira napo tigumane na mayezo. Mzimu wakucena umbatithandiza kukwanirisa utumiki bomwe tikucitira Mulungu. Ndipo umbatithandizambo kukulisa luso lomwe tinalo kale. Ndipopa bzinthu bzikatifambira bwino pa utumiki bomwe tikucitira Mulungu, timbazindikira kuti bziribe kucita na luso lathu, koma na thandizo la mzimu wakucena. Tingalatize kuti timbawona mzimu wakucena kukhala wakufunika tikambapemba kwa Mulungu kuti atipase mzimu wace kuti utithandize kuzindikira makumbukidwe ayai cikhumbo cakuipa comwe cingakhale mu mtima mwathu. (Sal. 139:23, 24) Na tenepo, tikazindikira kuti tina makumbukidwe ayai cikhumbo cakuipa, tin’funika kupemba na kukumbira mzimu wa Mulungu kuti utipase mphanvu kuti tikwanise kubzimalisa. Tikacita bzimwebzi, tin’dzabvuma lini kuti cinthu ciri-centse cititazise kutambira thandizo la mzimu wakucena.—Aef. 4:30. w20.05 28-29 ¶10-12

Tikambakhotcerera dzina la Mulungu, timbakhala tikutewezera bzomwe Jezu Kristu adacita. Jezu adadziwisa dzina la Baba wace, sikuti kundoliphatisa basa koma akhakhotcererambo mbiri ya Yahova. Mwa ciratizo, Afarizi akhaipisa mbiri ya Yahova. Iwo akhacitisa wanthu kukumbuka kuti Yahova ngwakuuma mtima, ambangingimiza wanthu kuti ambacite bzinthu bzomwe iye akufuna, ali kutali na wanthu ndipo alibe ntsisi. Koma Jezu adacita bzinthu mwakusiyana na Afariziwo. Iye adathandiza wanthuwo kuwona kuti Baba wace ngwabwino, ambapirira, ngwalufoyi ndipo ngwakulekerera. Ndipo na makhalidwe yabwino yomwe iye akhatewezera Baba wace, adathandiza wanthuwo kubvesesa momwe Yahova aliri. (Ju. 14:9) Ninga Jezu, ifepano tingauzembo wanthu bzomwe timbadziwa pakulewa bza Yahova na kuwapfunzisa kuti iye ni Mulungu walufoyi na wakudeka mtima. Tikacita bzimwebzi, tin’dzakhala tikugaza magunkha yomwe yambapswipiza dzina la Mulungu. Ifepano timbacenesa dzinalo ndipo timbathandiza winango kuti ambawone kuti iro ndakucena. Ndipo bzomwe timbalewalewa na bzomwe timbacita bzin’funika kumbalatiza kuti tikucenesa dzina la Mulungu. Ifepano timbacenesambo dzinalo mwa kuuza wanthu winango kuti adziwe cadidi ca Mulunguyo. w20.06 6-7 ¶17-18

Mpsakubveka kuti kuphatisa basa mbuto zakucezera za pa interneti kulibe kuipiratu, thangwe tingaziphatise basa kuti ticeze na adzinza na axamwali wathu omwe ali kutali. Napo bziri tenepoyo, kodi mumbakwanisa kuwona kuti wanthu omwe ambalatiza bzithunzi-thunzi pa mbuto zakucezera za pa interneti ambacita bzimwebzo na cakulinga cakufuna kubziwonesa? Bzikuwoneka kuti na bzithunzi-thunzi bzomwe iwo ambaikhabzo, ambakhala akulewa kuti “ndiwoneni ine!” Ndipo mpaka winango ambalewa mafala yapezi-pezi ayai mafala yakupasa manyazi, pakulewa bza bzithunzi-thunzi bzawo ayai bzithunzi-thunzi bza wanthu winango. Bzimwebzi bzimbabverana lini na malango yomwe Bibliya limbapereka kuna Akristau yakuti akhale wakubzicepesa na wakudeka mtima. (1 Pe. 3:8) Penu imwepo mumbaphatisa basa mbuto zakucezera za pa interneti, bzibvunzeni kuti: ‘Kodi bzithunzi-thunzi, mavidiyo na mafala yomwe nimbaikha kuti wanthu awone, bzimbalatiza kuti ndikufuna kubziwonesa? Kodi bzingacitise wanthu winango kukhala na njiru?’ Akristau an’funika lini kumbabziwonesa. Iwo ambateweza malango ya m’Bibliya yomwe yakugumanika mu vesi la lero. Kubzicepesa kun’dzatithandiza kuleka kuyambukiridwa na khalidwe la kubzikuza la dzikoli.—1 Ju. 2:16. w20.07 6-7 ¶14-15

Paulo pomwe akhanati kukhala nyakupfunza wa Jezu, iye akhali tswaka lomwe likhazunza ateweri wa Jezu. (Mab. 7:58) Pa nthaweyo Paulo akhadziwika na dzina lakuti Saulo, ndipo iye akhaboneresa kwene-kwene Akristau. Thangwe ra bzimwebzi Jezu adalewa-lewa naye kucokera kudzaulu, ndipo adamucitisa kukhala zimola. Kuti akwanise kuwona, Paulo adangingimizidwa kuti akakumbire thandizo kwa wale omwe iye akhawazunza. Mwakubzicepesa, Paulo adabvuma thandizo la nyakupfunza munango wakucemeredwa Ananiya omwe adamufungula maso yace. (Mab. 9:3-9, 17, 18) Na kupita kwa nthawe, Paulo adadzakhala mteweri wa Jezu, ndipo adadzakhala wakudziwika m’gwere lacikristau. Tsono iye alibe kuyebwa bzomwe Jezu adamucitira pa njira ya ku Damasko. Paulo adapitiriza kukhala wakubzicepesa, ndipo akhali wakukonzeka kubvuma kuthandizidwa na abale na mpfumakazi zace zacikristau. Paulo adazindikira kuti abalewo akhali ‘cinthu cakulimbisa’ kwa iye.—Akol. 4:10, 11. w20.07 18 ¶16-17

Napo kuti Yahova ni Wamphanvu-zentse, iye ambapasambo wanthu winango mabasa. Iye adaikha Jezu kukhala mambo wa Umambo bwace ndipo adapasa udindo wanthu wakukwana 144 000 omwe an’dzatonga pabodzi na Jezu kudzulu. N’cadidi kuti Yahova adapfunzisa Jezu kuti akhale mambo na mkulu wa antsembe. (Aheb. 5:8, 9) Ndipo iye adapfunzisambo wale omwe an’dzatonga pabodzi na Jezu. Koma Yahova ambawafambira lini m’mbuyo kuti awone penu iwo akukwanisa kucita basalo ayai nee. Iye ambakhulupira kuti iwo an’kwanisa kucita bzomwe iye akufuna. (Apok. 5:10) Penu Yahova omwe angafunikire lini kuthandizidwa na munthu ambapasa wanthu winango mabasa, tani pakulewa bza ifepano? Tin’funikambo kumbamutewezera. Kodi imwepo ndimwe msolo wa banja ayai ndimwe mkulu wa gwere? Penu munti inde, tewezerani Yahova: Pasani basa winango ndipo lekani kuwafambira m’mbuyo kuti muwone penu iwo akuphata bwino basalo ayai nee. Mukatewezera Yahova, mun’dzakondwa lini kokha pakuwona kuti basalo likufamba bwino, koma mun’dzakhala mukuwapfunzisa na kuwathandiza kuwona basalo kukhala lakufunika.—Zai. 41:10. w20.08 9 ¶5-6

Kodi Yahova akufuna kuti timbawawone tani atumiki wace omwe adataika? Tingapfunze na ciratizo ca Jezu. Iye akhadziwa kuti Yahova ambawona atumiki wace wentse kuti mbakufunika. Ndipopa iye adacita ciri-centse kuti athandize ‘mabira yakutaika ya m’nyumba ya Jirayeri’ kuti yabwerere kwa Yahova. (Mat. 15:24) Ninga makabusa wabwino, Jezu adacita ciri-centse kuti paleke kutaika ne bira m’bodzi wa Yahova. (Ju. 6:39) Mpostolo Paulo adalimbikisa akulu wa gwere la ku Efezo kuti atewezere ciratizo ca Jezu. Iye adanemba kuti: ‘Mun’funika kuthandiza wale omwe mbakutepa, mucimbakumbukira mafala ya Mbuya Jezu yakuti: “Kupasa kumbabweresa cikondweso cikulu kuposa kutambira.”’ (Mab. 20:17, 35) Kulewa mwakusaya kupenukira, ntsiku zino akulu wa gwere akucitambo basa libodzi-bodziri. Mkulu winango wa gwere ku Espanha, wakucemeredwa Salvador, adati: “Ndikakumbukira momwe Yahova ambacitira thupo na mabira yace yakutaika, nimbalimbikisidwa kucita ciri-centse kuti ndithandizembo mabirayo. Inepano nimbadziwa kuti Yahova akufuna kuti ndiyasamalire.” w20.06 23 ¶15-16

Yahova akudziwa kuti tin’dzakhala wanthu wakulungamiratu kuphampha kwa magole 1000. Tenepo, pomwe ikanati kufika nthawe imweyo, iye an’pitiriza kumbalekerera bzakuphonya bzathu. Ndipo ifepano tin’funika kutewezera Yahova mwa kumbawona bzabwino kwa abale wathu, ticimbapirira nawombo. Jezu na wanjo adakomedwa kwene-kwene pomwe dziko la pantsi lidalengedwa. Iwo an’dzakomedweratu kwene-kwene akadzawona kuti dziko ladzala na wanthu wakulungamiratu omwe ambatumikira Yahova. Ndipo anyakudzozedwa omwe an’dzatonga na Jezu kudzulu, an’dzakomedwa kwene-kwene akadzawona momwe basa lawo likuthandizira wanthu pa dziko la pantsi pano. (Apok. 4:4, 9-11; 5:9, 10) Ndipo kumbukiranimbo kukhala mu dziko lomwe misozi yomwe imbacoka thangwe ra kuwawidwa in’dzasanduka misozi ya cikondweso, ndipo matenda na kusunama kun’dzakhala kulibe pomwe. Pomwe mukudikhirira kuti ntsikuyo ifike, tsimikizani kulatiza lufoyi, nzeru na kupirira mwa kutewezera Yahova. Tikacita bzimwebzi, tin’dzapitiriza kukhala wakukondwa, bziribe basa mabvuto yomwe tigumane nayo. (Tiy. 1:2-4) Tenepo tin’funika kutenda Yahova thangwe ra kutipasa cidikhiro cakuti ‘wanthu an’dzalamusidwa!’—Mab. 24:15. w20.08 19 ¶18-19

Bibliya ni mphaso yomwe imbalatiza lufoyi lomwe Mulungu analo kuna ifepano. Baba wathu wakudzulu ambatifuna kwene-kwene ndipopa adafulizira wanthu kuti anembe Bibliya. Mwakuphatisa basa Bibliya, Yahova ambatawira mibvunzo yakufunika kwene-kwene yomwe timbakhala nayo, ninga yakuti: Kodi wanthufe tidacokera kuponi? Thangwe ranyi tina moyo? Kodi n’ciyani cin’dzacitika kutsogoloku? Yahova akufuna kuti wana wace wentse adziwe mitawiro ya mibvunzoyi. Tenepo, kuyambira kale-kale iye akulimbikisa wanthu kuti asandulizire Bibliya m’bzirewedwe bzakusiyana-siyana. Ntsiku zino, Bibliya lentse ayai bzipande bzace bzikugumanika m’bzirewedwe bzakupitirira 3000. Ndipo Bibliyalo ni bukhu lomwe likusanduliziridwa na kugawiridwa kwene-kwene pa dziko lentse la pantsi. Ifepano tingalatize kuti timbatenda Bibliya mwa kumbaliwerenga ntsiku zentse, kukumbukira bzomwe limbapfunzisa na kubziphatisa basa. Kuthimizira bzimwebzi, tingalatizembo kuti timbatenda Mulungu mwa kucita ciri-centse comwe tingakwanise kuti tiuze wanthu azinji mafala ya Mulungu.—Sal. 1:1-3; Mat. 28:19, 20. w20.05 24-25 ¶15-16

Ifepano tingapfunze bzinthu bzizinji na mpolofeta Jeremiya. Iye adatumikira mu gawo lomwe likhana wanthu wakunesa kwene-kwene. Ndipo iye nthawe inango adabzibva kuti atepa, ndipo akhafuna kusiya kupalizira. Tsono iye alibe kudzasiya. Thangwe ranyi? ‘Mafala ya Yahova’ yakhali ninga moto mu mtima mwa Jeremiya, ndipo iye akhakwanisa lini kuyabisa. (Jer. 20:9) Bzimwebzi bzimbacitikambo na ifepano tikadzaza Fala la Mulungu m’makumbukidwe mwathu na mu mtima mwathu. Bzimwebzi bzimbaphatanidza kupfunza Bibliya ntsiku zentse, ticimbakumbukira bzomwe tapfunzabzo. Tikacita bzimwebzi, tin’dzapitiriza kukhala wakukondwa mu utumiki, ndipo wanthu an’dzafuna kutitetekera. (Jer. 15:16) Tenepo, penu mukubzibva kukhala wakutepa, dandaulirani Yahova kuti akuthandizeni. Iye an’dzakuthandizani kulimbana na kutepa, kuperewera kwanu na pomwe mukuduwala. Iye an’dzakuthandizani kuti muwone mwakuthemera utumiki bomwe mumbapasidwa. Ndipo an’dzakuthandizanimbo kuti muwone mwakuthemera basa lakupalizira. Kuposa bzentse, pembani kwa Baba wanu walufoyi, ndipo muuzeni bwino-bwino momwe mukubvera. Mwakuthandizidwa na iye, imwepo mun’dzakunda kutepa. w20.12 27 ¶20-21

Mpfumakazi zinango zimbawona mitsonkhano kukhala mipata ya kumbakhala pabodzi na omwe ambanamata nawo. Tenepo, pa mitsonkhano ifepano tin’funika kumbalokotera mpata umweyu kuti timbawatambire, kuceza nawo na kumbalatiza kuti timbawakumbukira. Ninga Jezu, ifepano tin’funika kumbapambula nthawe kuti timbaceze na mpfumakazi zathu. (Luka 10:38-42) Tingacite bzimwebzi mwa kuwacemera kuti tidzadye nawo kumui kwathu na kucita nawo masenzeka. Pakucita bzimwebzi, mafala yathu yan’funika kukhala yakulimbikisa. (Aro. 1:11, 12) Akulu wa gwere ambacita bwino kwene-kwene kutewezera makumbukidwe ya Jezu. Iye akhadziwa kuti kukhala wakusaya kulowola ayai kusaya kulowodwa, bzingadakhala bzakunesa kwa winango. Koma napo bzikhali tenepo, iye adabvekesa bwino nfundo yakuti kulowola ayai kulowodwa na kukhala na wana ndiko lini komwe kumbabweresa cikondweso cakusaya kumala. (Luka 11:27, 28) M’mbuto mwace, ifepano tingakhale wakukondwa pokha-pokha tikatumikira Yahova. (Mat. 19:12) Akulu wa gwere an’funika kumbacita bzinthu na akazi wacikristau ninga mpfumakazi na azimai wawo omwe ambacita kufuna kwa Yahova. Bzimbakhala bwino akulu wa gwere akambapambula nthawe kuti ambaceze na mpfumakazi pomwe mitsonkhano ikanati kuyamba ayai ikamala. w20.09 21-22 ¶7-9

Mu nthawe ya Ajirayeri, pakhapita minyezi mitanthatu kuti mbeu zibale. Ndipo mulimi akhabzala mbeu zace mvula yakuyamba ikagwa, ndipo akhadzabvuna mvula yakumalizira ikamala. (Marko 4:28) Mpsabwino kuti titewezere kupirira kwa mulimi. Tsono bziribe kupusa. Kawiri-kawiri wanthu wakuperewera ambafuna kuwona bzakutewera bza basa lomwe iwo acita pa nthawe imweyoletu. Tsono mwakusiyana na bzimwebzi, penu ifepano tikufuna kuti munda wathu ubale bzisapo, tin’funika kukhala na nthawe ya kuusamalira, kuubzala, kuupalira na kuuthirizira. Mpsibodzi-bodzimbo na basa lakupfunzisa wanthu, iro limbafuna nyongo. Pambafunika nthawe izinji kuti tithandize anyakupfunza wathu wa Bibliya kuti apfunze kukhala wanthu wakusaya tsankhulo na walufoyi. Kupirira kwathu kun’dzatithandiza kuleka kubwerera m’mbuyo tikagumana na mabvuto. Tikagumana na wanthu omwe akufuna kutitetekera, tin’funika kupirira nawo. Tin’funika lini kungingimiza nyakupfunza wa Bibliya kukhala na cikhulupiro. Nthawe zinango anyakupfunza wa Jezu alibe kubvesesa thandauzo la bzomwe adawapfunzisa. (Ju. 14:9) Tileke kuyebwa kuti ifepano tingapalizire na kupfunzisa, tsono Mulungu ndiye omwe ambathandiza wanthu kuti akhale na cikhulupiro.—1Ako. 3:6. w20.09 11 ¶10-11

Tentsenefe tin’funa kuti anyakupfunza wathu wa Bibliya ayende pa tsogolo acifika pa kubatizidwa. Abale omwe ana luso lakupfunzisa, ambalewa kuti anyakupfunza wa Bibliya omwe ambafika pa mitsonkhano mwakukhazikika, bzimbawanesa lini kuyenda patsogolo. Ndipo winango mwa abalewo ambalewa kuti anyakupfunzawo ambapfunza bzinthu bzizinji pa mitsonkhanopo kuposa bzomwe ambapfunza pa pfunziro lawo la Bibliya. Muwerengereni Ahebereu 10:24, 25, ndipo mulatizeni phindu lomwe angaligumane akafika pa mitsonkhano. Muuzeni bzomwe mudakomedwa nabzo pa mtsonkhano omwe udamala ule. Iye akawona kuti mukukomedwa na bzomwe mudapfunzabzo an’dzafunambo kuyenda ku mitsonkhanoko. Akadzafika pa mitsonkhanopo, aciwona na kubva bzomwe bzimbacitika, an’dzakwanisa kudziwa kuti pana kusiyana na bzomwe akhawona m’bzipembedzo bzinango. (1Ako. 14:24, 25) Pa mitsonkhanopo iye an’dzagumana wanthu omwe ana makhalidwe yabwino yomwe angayatewezere, ndipo bzimwebzi bzin’dzamuthandiza kuyenda patsogolo acifika pa kubatizidwa. w20.10 10-11 ¶14-15

Mzimu wa Mulungu un’dzakuthandizani kuphatisa basa pa moyo wanu bzomwe mumbawerenga na kupfunza m’Fala la Mulungu. Pembani kwa Mulunguyo ninga momwe nyakunemba bukhu la Salimo adacitira. Iye adapemba kuti: ‘Ndipfunziseni Yahova bza njira yanu. Nin’dzafamba m’cadidi canu. Ndipaseni mtima wakusaya kugawanika kuti ndigope dzina lanu.’ (Sal. 86:11) Tenepo pitirizani kumbawerenga na kupfunza Bibliya pabodzi na mabukhu yanango yomwe gulu la Yahova limbatipasa. N’cadidi kuti cakulinga canu n’cakundofuna lini kukhala na cidziwiso, koma n’cakufuna kutsimikizira kuti cimweci n’cadidi ndipo mukufuna kuciphatisa basa pa moyo wanu. Mzimu wa Yahova ungakuthandizeni kucita bzimwebzi. Mun’funikambo kumbalimbikisa abale na mpfumakazi zanu. (Aheb. 10:24, 25) Thangwe ranyi? Thangwe iwo ni wanthu wa m’banja lanu lauzimu. Mukumbireni Mulungu kuti pa mitsonkhano mumbapereke mitawiro na mtima wanu wentse, na kumbacita ciri-centse comwe mungakwanise kuti mumbakwanirise mbali yanu pa mitsonkhano. Mukambacita bzimwebzi, mumbalatiza Yahova na Mwana wace kuti mumbafuna ‘mabira’ yawo yomwe njakufunika kwene-kwene. (Ju. 21:15-17) Tenepo, mbatetekerani Mpfunzisi wanu Mkululetu mwa kuphatisa basa bzinthu bzentse bzomwe iye ambatipfunzisa. w20.10 24-25 ¶15-17

Kodi n’ciyani comwe Jezu adacita pomwe apostolo wace akhadasunama? Pomwe adandolamusidwa, Jezu adauza anyakupfunza wace kuti: ‘Lekani kucita mantha, ndokoni mukauze abale wangu kuti ndalamusidwa.’ (Mat. 28:10a) Jezu alibe kusiya anyakupfunza wace, napo kuti iwo adamuthawa. Ndipo iye akhambawacemera kuti ‘abale wangu.’ Ninga Yahova, Jezu akhali wakudeka mtima na wakulekerera. (2 Wam. 13:23) Mpsibodzi-bodzimbo, ifepano timbacita thupo kwene-kwene na wale omwe adasiya kupalizira. Iwo ni abale na mpfumakazi zathu, ndipo timbawafuna kwene-kwene. Tenepo timbakumbukira basa lomwe adaliphata mwa nyongo, winango pinango adaphata basalo kwa magole mazinji kwene-kwene m’mbuyomu. (Aheb. 6:10) Kulewa cadidi, timbawasuwa kwene-kwene. (Luka 15:4-7) Tenepo, ifepano tingalimbikise omwe adadjedjera mwauzimu mwa kumbawacemera kuti ambafikembo pa mitsonkhano. Ndipo tikawona wale omwe adjedjera mwauzimu abwera pa Nyumba yathu ya Umambo, ifepano ndife omwe tin’funika kuyamba kuwauza kuti takutambirani na manja mawiri. w20.11 6 ¶14-17

Tiyago na Juwau na mai wawo adakumbira Jezu cinthu pomwe bukhali lini udindo bwace kupereka. Mwakusaya kukumbuka kawiri, Jezu adawalatiza kuti bukhali udindo bwa Baba wace kulata omwe an’dzakhala ku boko la madidi na boko lamadzere mu Umambo bwace. (Mat. 20:20-23) Jezu adalatiza kuti akhalemekeza malire yace. Iye akhali munthu wakubzicepesa. Ndipo alibe kucita bzinthu mwa kupitirira malire yomwe Yahova adamupasa. (Ju. 12:49) Kodi tingatewezere tani ciratizo cabwino ca Jezu? Ifepano tingatewezere kubzicepesa kwa Jezu mwakubvera malango ya mu vesi la lero. Tenepo munthu akatikumbira kuti timupase malango, tin’funika lini kuthamangira kumuuza bza mu msolo mwathu ayai bzomwe tikukumbuka. M’mbuto mwakucita bzimwebzi, bziri bwino kuti timupase malango munthuyo mwakuphatisa basa Bibliya na bzomwe mabukhu yathu yambalewa. Mwa njira imweyi timbalatiza kuti timbazindikira malire yathu. Kubzicepesa kumbaticitisa kutsimikiza kuti ‘katongedwe kakulungama’ ka Wamphanvu-zentse n’kabwino kwene-kwene kuposa malango yali-yentse yomwe tingapase munthu.—Apok. 15:3, 4. w20.08 11-12 ¶14-15

Penu imwepo mukukumbukambo bza kupasa xamwali wanu malango, kodi ni bzinthu bziponi bzomwe mun’funikambo kukumbukira? Pomwe mukanati kuceza naye xamwali wanuyo, bzibvunzeni kuti: “Kodi ndikubzicitisa kukhala ‘wakulungama mwakupitirira malire’?” Munthu omwe ambabzicitisa kukhala wakulungama mwakupitirira malire, ambayeruza anzace sikuti na mitemo ya Yahova, koma na makumbukidwe yace. Ndipo iye kawiri-kawiri ambakhala alibe ntsisi na anzace. Imwepo mukakumbukira mwakusamala mathangwe yomwe mun’funika kupasira malango xamwali wanuyo, mucibzibva kuti mun’funikadi kucita bzimwebzo, muuzeni bvutolo mwakumubvunza mibvunzo yomwe inimuthandiza kuwona bzomwe aphonyabzo. Ndipo kumbukirani kuti mulibe udindo bwakuyeruza xamwali wanuyo. Koma muthandizeni kuti abvesese momwe Yahova akubvera na bzomwe wacitabzo. (Aro. 14:10) Phatisani basa nzeru yakucokera m’Fala la Mulungu. Ndipo pomwe mukutsangalaza munthu mwanzanu, tewezerani ntsisi za Jezu. (Mim.ˊ3:5; Mat. 12:20) N’thangwe ranyi? Thangwe Yahova an’dzacita nafe bzibodzi-bodzi na momwe ticitire bzinthu na anzathuwo.—Tiy. 2:13. w20.11 22 ¶13

Kodi imwepo mungakomedwe wanthu acikuyeruzani thangwe ra mawonekedwe ya thupi lanu, nkhope yanu, msinkhu wanu, ayai thangwe rakuti mudawonda ayai mudanenepa? Bzikuwonekeratu kuti ne mungakomedwe lini. Mpsakutsangalaza kudziwa kuti Yahova ambacita lini bzimwebzi. Iye ambawona bzomwe bziri mu mtima mwa munthu. Mwa ciratizo, pomwe Samuweri adanyang’anisa wana wa Djese, iye alibe kuwona bzomwe Yahova adawona. Yahova akhadauza Samuweri kuti m’bodzi mwa wana wa Djese angadadzakhala mambo wa Jirayeri. Kodi ni mwana uponi? Pomwe Samuweri adawona Eliyabi omwe akhali mwana mkulu wa Djese, iye adati: ‘Kulewa cadidi, umweyu ndiye nyakudzozedwa wa Yahova.’ Thangwe ra mawonekedwe ya Eliyabi, Samuweri adawona kuti iye akhathemera kukhala mambo. ‘Tsono Yahova adamuuza Samuweri kuti: “Leka kuona kudeka kwa nkhope yace, ayai kutalimpha kwa msinkhu wace, pakuti inepano umweyu ndikumufuna lini.”’ Kodi tikupfunza ciyani? Yahova adapitiriza kulewa kuti: ‘Wanthu ambanyang’anisa mawonekedwe, tsono Yahova ambanyang’anisa [bzomwe bziri mu] mtima.’ (1 Sam. 16:1, 6, 7) Timbacita bwino kwene-kwene tikambatewezera Yahova pakucita bzinthu na Akristau anzathu. w20.04 14 ¶1; 15 ¶3

Pomwe Jezu akhali pa ulendo, adapita na m’minda yomwe ikhana mbeu, ndipo bzikuwoneka kuti mbeuzo zikhanati kukhwima. (Ju. 4:3-6) Ndipo ikhadasala minyezi minai kuti mindayo ibvunidwe. Tenepo, Jezu adalewa mafala yakunesa kubvesesa, iye adati: ‘Nyang’anisani m’mindamu, bzinthu bzakhuma kale kuti bzibvunidwe.’ (Ju. 4:35, 36) Kodi iye akhafuna kulewanyi na mafalaya? Bzikuwoneka kuti Jezu akhalewa lini bza kubvuna caiko, koma akhalewa bza kutsonkhanisa wanthu. Kumbukirani bzomwe bzikhadacitika akanati kulewa mafalaya. Napo kuti Adjuda akhabverana lini na Asamariya, Jezu adapalizira mkazi omwe akhali Msamariya ndipo mkaziyo adamutetekera! Pomwe Jezu adalewa kuti minda ‘[yacena] kale ndipo in’funika kubvunidwa,’ Asamariya azinji omwe akhadabva bza Jezu na mkazi ule, adayenda kuna Jezuyo kuti akapfunze bzizinji. (Ju. 4:9, 39-42) Pakufotokoza bza cakucitikaci, bukhu linango limbati: “Nyongo yomwe wanthu wale adacita kuti akagumane na Jezu na kubvesera mafala yace . . . bzidalatiza kuti iwo akhali ninga minda yomwe ikhafunika kubvunidwa.” w20.04 8 ¶1-2

Mitsonkhano yathu imbatithandiza kukhala apalizi wabwino na apfunzisi wabwino. Mwa ciratizo, timbapfunza momwe tingaphatisire bwino basa Bzinthu Bzomwe Timbapfunzisira. Tenepo, mbakonzekerani bwino mitsonkhano ya gwere. Pomwe mtsonkhano uli mkati, mbatetekerani mwatceru. Ndipo ukamala, mbaphatisani basa bzomwe mwapfunzabzo. Mukacita bzimwebzi, imwepo mun’dzakhala “mcikunda wabwino wa Kristu Jezu.” (2 Tim. 2:3) Timbathandizidwambo na anjo azinji wamphanvu. Kumbukirani bzomwe anjo m’bodzi angakwanise kucita! (Zai. 37:36) Tsapano kumbukiranimbo bzomwe gulu la acikunda wamphanvu wa anjo angakwanise kucita. Palibe munthu ayai dimonyo omwe angandendemerane na acikunda wamphanvu wa Yahova. Iye ngwamphanvu kwene-kwene. Tenepo, Yahova akakhala nafe, nthawe zentse ifepano tin’dzakhala wamphanvu kuposa anyamadulanthaka wathu. Bziribe basa penu iwo mbazinji. (Way. 6:16) Bzimwebzi mpsacadidi. Tenepo, mbakumbukirani bzimwebzi, pomwe mwatepa thangwe ra bzomwe anzanu wa ku basa, ku xikola ayai abale wanu omwe ni Mboni lini alewa ayai kucita. Kumbukirani kuti muli lini mwekha pa nkhondo imweyi. Imwepo mukuteweza malango ya Yahova. w21.03 29 ¶13-14

Mpostolo Paulo akhalewa bza mafala yomwe yali pa Zaiya 22:13, yomwe yambalewa bza makumbukidwe yomwe Ajirayeri winango akhanayo. M’mbuto mwakufenderera Mulungu, iwo adasankhula moyo wakundofuna kubzikondwesa okha. Makumbukidwe yawo yakhali yakuti “mbatidyeniletu lero, thangwe mangwana tinifa.” Ntsiku zino wanthu azinji ambakumbukambo bzibodzi-bodzibzi. Ifepano timbadziwa kuti Yahova an’dzalamusa wanthu wakufa. Tsono bzimwebzi bzin’funika kuticitisa kudziwa kusankhula bwino wanthu omwe tin’funa kuti akhale axamwali wathu. Abale wa ku Kolinto akhafunikira kutcenkha kucita uxamwali na wale omwe akhakhulupira lini cilamuso. Limweri ni pfunziro labwino kwene-kwene kwa ifepano ntsiku zino. Ifepano tikamala nthawe tikuceza na axamwali omwe alibe basa na bzomwe bzin’dzacitika kutsogolo, ndipo ambandofuna kucita bzinthu bza kubzikondwesa iwo okha, bzimwebzi bzin’dzaticitisa kukhala na makumbukidwe yakuipa. Penu Mkristau angamale nthawe yace akuceza na wanthu wa mtundu umweyu, iye angadzonge makhalidwe yace yabwino. Kulewa cadidi, bzimwebzi bzingamucitise kukhala na makhalidwe yomwe Mulungu ambayawenga. Tenepo Paulo adatilimbikisa kuti: ‘Yambani pomwe kukumbuka bwino, mucimbacita bzinthu bzakulungama ndipo lekani kucita pikado.’—1Ako. 15:33, 34. w20.12 9 ¶3, 5-6

Vesiri likulatiza momwe Yahova adalinganizira banja lace la kudzulu na la pa dziko la pantsi. Utsogoleri bumbaphatanidza bzinthu bziwiri bzakufunika kwene-kwene, ninga mphanvu yakutsogolera yomwe munthu ambapasidwa na kudziwa kuti ndiye an’dzatawira mulandu. Yahova ni “msolo,” ayai ana mphanvu ya kutsogolera, ndipo wana wace wentse kuyambira anjo na wanthu, ndiye omwe ambawanyag’anira. (Aro. 14:10; Aef. 3:14, 15) Yahova adapasa Jezu udindo bwa kunyang’anira gwere, tsono Jezuyo ambanyang’aniridwambo na Yahova mwa njira ya momwe iye ambacitira bzinthu na ifepano. (1Ako. 15:27) Yahova adapasambo mwamuna udindo bwakuti ambatsogolere mkazi pabodzi na wana wace. Kodi iye angakhakhale tani msolo wabwino wa banja? Cakuyamba an’funika kudziwa bzomwe Yahova ambafuna kuti mwamunayo acite. Iye an’funikambo kudziwa thangwe ranyi Yahova adakhazikisa utsogoleri ndipo maka-maka momwe iye angatewezerere ciratizo ca Yahovayo na Jezu. Thangwe ranyi bzimwebzi mpsakufunika? Thangwe Yahova adapasa misolo ya mabanja udindo bwakusamalira banja, ndipo iye ambadikhira kuti iwo abuphatise bwino basa.—Luka 12:48b. w21.02 2 ¶1-3

Tsono pana bzinthu bzinango bzomwe Yahova ambasankhula kuleka kubzikumbukira, napo kuti mphanvu yace yakukumbuka njakulungamiratu. Mwa ciratizo, tikakungula pikado yomwe tidacita, Yahova ambasankhula kutilekerera na kuyebwa pikadoyo. (Sal. 25:7; 130:3, 4) Ndipo iye akufuna kuti timbacitembo bzibodzi-bodzibzi mwanzathu akatikumbira kuti timulekerere bzomwe watiphonyera. (Mat. 6:14; Luka 17:3, 4) Kulewa mwakusaya kupenukira, ulupi ni mphaso yabwino kwene-kwene. Ifepano tingalatize kuti timbatenda mphasoyi mwa kuiphatisa basa kuti tilemekeze ule omwe adatipasa. Winango ambaphatisa basa mphaso imweyi kuti ambabzisankhulire okha bzabwino na bzakuipa. Koma pakuti Yahova ndiye omwe adatilenga, malamulo yace njabwino kwene-kwene kuposa malamulo yomwe tingabzikonzere tekha. (Aro. 12:1, 2) Tikambabvera malamulo yaceyo timbakhala pa mtendere. (Zai. 48:17, 18) Ndipo tikana moyopa tikambapfunza bzomwe Yahova ambafuna kuti ticite na kumulemekeza ninga Mulengi na Baba wathu, iye ambakomedwa kwene-kwene.—Mim. 27:11. w20.05 23-24 ¶13-14

Kodi tingakulise tani lufoyi cairo kuna abale na mpfumakazi zathu ntsiku zino? Ifepano tikawadziwa bwino abale wathu, bzin’dzakhala bzakupusa kuwabvesesa na kukulisa lufoyi cairo kuna iwo. Ifepano tingakhale nawo pa uxamwali napo penu iwo mbakulu msinkhu, ni maswaka ayai penu tidasiyana nawo mtundu. Kumbukirani kuti Jonatani akhana magole 30 yakubadwa kuposa Davide. Koma napo bzikhali tenepo, iye adakhala xamwali wa Davideyo. Kodi imwepo mungakhale pa uxamwali na munthu omwe ni mkulu ayai ni ng’ono kuposa imwepo? Mukacita bzimwebzi, imwepo mun’dzalatiza kuti mumbafuna “gulu lentse la abale.” (1 Pe. 2:17) Kodi kulatiza lufoyi cairo kuna abale wathu kumbathandauza kukhala xamwali wa munthu ali-wentse m’gwere? Nee, bzimwebzi bzingakwanisike lini. Nthawe zinango tingabverane kwene-kwene na wanthu winango ticisaya kubverana na winango. Bzimwebzi bzimbacitika thangwe rakuti omwe timbabverana nawowo ambafuna bzinthu bzomwe ifepano timbafunambo. Jezu adacemera apostolo wace kuti “axamwali,” koma iye akhafuna kwene-kwene mpostolo Juwau. (Ju. 13:23; 15:15; 20:2) Koma Jezu akhawona lini Juwau kukhala wakufunika kwene-kwene kuposa apostolo winangowo.—Marko 10:35-40. w21.01 23 ¶12-13

Paulo adapalizira wanthu omwe akhali lini Adjuda ku Atena. Tsono pomwe adapalizirira Adjuda m’nyumba yakunamatira iye adawapalizira mu njira yakusiyana. Cakuyamba iye adanyang’anisisa bzinthu bzomwe bzikhali mu mzindamo, ndipo adawona miyambo yomwe wanthuwo akhanayo pa kunamata. (Mab. 17:23) Patsogolo pace, Paulo adafufudza nkhani yomwe ingadabverana na kunamata komwe wanthuwo akhacita na bzomwe cadidi ca m’Bzinembo cikhalewera. Paulo akhali wakukonzeka kucinja njira zomwe akhaziphatisa basa pakupalizira. Iye adauza wanthu wa ku Atena kuti mafala yomwe akhapalizira, yakhacokera kwa ‘Mulungu wakusaya kudziwika,’ omwe iwo akhamunamata. Napo kuti wanthu omwe akhali lini Adjuda akhadziwa lini Bzinembo, Paulo alibe kukumbuka kuti iwo angadakhala lini Akristau. M’mbuto mwace, iye adawawona ninga minda yomwe ikhafunikira kubvunidwa. Bzimwebzi bzidacitisa Pauloyo kucinja njira zomwe akhaziphatisa basa pakupalizira mwakubverana na momwe wanthuwo akhaliri. Ninga Paulo, mukafika pamui pa munthu, mbawonani momwe paliri. Bzimwebzi bzin’dzakuthandizani kudziwa bzomwe wanthu wa m’gawo lanu ambakhulupira. Mwa ciratizo, kodi m’nyumba ayai m’kanderendere mwace muna bzinthu-thunzi bzakulatiza kuti iye ambapemphera? Kodi dzina lace, bzakubvala bzace na mafala yace, bzikulatiza gereja yomwe iye ambapemphera? w20.04 9-10 ¶7-8