Outubro

Tikafika pa kumudziwa bwino Jezu, tin’dzatewezera makumbukidwe yace na kucita bzinthu ninga momwe iye akhacitira. Ifepano tingakhale pa uxamwali bwamphanvu na Jezu, tikamudziwa na kutewezera makumbukidwe yace. Kodi tingamutewezere tani? Onani ciratizo cibodzi. Jezu akhacita thupo kwene-kwene na kuthandiza winango, sikuti kucita bzinthu kuti abzikondwese iye yekha. (Mat. 20:28; Aro. 15:1-3) Thangwe ra makumbukidwe yamweya, iye akhacita ciri-centse kuti athandize winango ndipo akhawalekerera bzakuphonya bzawo. Ndipo wanthu akamulewa kuipa, iye akhathamangira lini kukalipa. (Ju. 1:46, 47) Iye akhabvuma lini kuti bzomwe munthu adaphonya kale-kale, bzimucitise kuwona munthuyo kuti an’cinja lini. (1 Tim. 1:12-14) Jezu adalewa kuti: ‘Wentse an’dzadziwa kuti ndimwe anyakupfunza wangu, mukambafunana.’ (Ju. 13:35) Bzibvunzeni kuti: “Kodi ndikutewezera Jezu mwa kucita ciri-centse comwe ningakwanise, kuti ndikhale pa mtendere na abale na mpfumakazi zangu?” w20.04 24 ¶11

Napo kuti tikukhala mu dziko lomwe lidadzala na wanthu omwe ambanama na kupswipiza dzina la Yahova, imwepo muna mwayi wakulewa cadidi cakuti Yahova ngwakucena, ngwakulungama, ngwabwino na walufoyi. Ndipo mungalatize kuti mukufuna kuti iye akhale Mtongi wanu, mwa kuthandiza wanthu winango kuti awone kuti utongi bwa Yahova n’bwakulungama kwene-kwene, ndipo ndiye yekha omwe an’dzabweresa mtendere na cikondweso kuna wanthu wentse. (Sal. 37:9, 37; 146:5, 6, 10) Tikambapfunzisa wanthu winango cadidi ca m’Bibliya, kawiri-kawiri timbawauza bza utongi bwa Mulungu ayai kuti iye ana ugo bwakutonga cirengedwe centse, ndipo bzimwebzi mpsacadidi. Napo mpsakufunika kupfunzisa wanthu malamulo ya Mulungu, koma cakulinga cathu cikulu ni kuwathandiza kuti ambafune na kukhulupira Yahova, omwe ni Baba wathu. Ndipopa pomwe tikuwapfunzisa tin’funika kumbatsindika makhalidwe yabwino ya Yahova na kuwauza bzomwe dzinali limbathandauza. (Zai. 63:7) Tikambawapfunzisa mwa njira imweyi, bzin’dzawacitisa kuti afune Yahova, ndipo an’dzafuna kukhala wakukhulupirika kwa iye na kupitiriza kumubvera. w20.06 6 ¶16; 7 ¶19

Ulupi bwa munthu budakonzedwa mwakudabwisa. Mwa ciratizo, pomwe imwepo mukhali m’mimba mwa mai wanu, ulupi bwanu bukhakula mwakubverana na momwe budakonzedwera, ndipo pa mphindi iri-yentse maselula ya ulupibo yakhakonzedwa. Adziwi wa nkhani ya zaumoyo ambalewa kuti ulupi bwa munthu mkulu buna maselula yakupambulika yakukwana mabidyau 100 yomwe yambacemeredwa neurônios. Yentse pabodzi yambalemera kilu ibodzi na meya. Cinthu cinango cakudabwisa comwe ulupi bwathu mumbacita ni luso lakulewalewa. Pa fala liri-lentse lomwe mumbalewa, ulupi bwanu bumbafunika kubveranisa minonfu 100 ya lirime, ngololo, miromo, bzibwano na nkhombe. Tsono kuti mafala yabveke bwino minonfu yentseneyi in’funika kuphata basa nthawe ibodzi na ibodzi. Bukhu linango lomwe lidacosedwa mu 2019 lidalatiza kuti tcece limbakwanisa kubva tsono limbalewalewa lini. Kafuku-fukuyu akuthandizira bzomwe anyakufufudza azinji ambakhulupira bzakuti wanthufe timbabadwa na luso lakuzindikira na kupfunza bzirewedwe. Kulewa mwakusaya kupenukira, luso lakulewalewa ni mphaso yomwe Mulungu adatipasa. w20.05 22-23 ¶8-9

Abalahamu akhana moyo wabwino mu mzinda wa Uri. Tsono iye adasiya bzinthu bzentse bzomwe akhanabzo. Thangwe ranyi? Thangwe iye akhadikhirira ‘mzinda wakukhala na aliserse caiyo.’ (Aheb. 11:8-10, 16) Mzinda omwe Abalahamu akhaudikhirira ni Umambo bwa Mulungu. Yahova adasankhula Jezu pabodzi na Akristau wakudzozedwa wakukwana 144 000 kuti akhale atongi wa Umambobo. Mpostolo Paulo adalewa kuti Umambobo bukuimira ‘mzinda wa Mulungu wa moyo, Jeruzalemu wa kudzulu.’ (Aheb. 12:22; Apok. 5:8-10; 14:1) Jezu adapfunzisa anyakupfunza wace kuti ambapembe kuti Umambo bubwere nakuti kufuna kwa Mulungu kucitike pa dziko la pantsi ninga momwe kukucitikira kudzulu. (Mat. 6:10) Kodi Abalahamu akhadziwa momwe bungadakhalira Umambo bwa Mulungu? Nee, iye akhadziwa lini. Thangwe kuyambira kale-kale nkhani imweyi ikhali ‘cintsintsi cakupambulika.’ (Aef. 1:8-10; Akol. 1:26, 27) Koma Abalahamu akhadziwa kuti wanthu wa m’badwo wace winango angadadzakhala wamambo, thangwe iye akhadauzidwa kale na Yahova.—Ciy. 17:1, 2, 6. w20.08 2-3 ¶2-4

Tin’funika kulamba bzipfunziso bza apanduki. Kuyambira pomwe lidayamba gwere lacikristau, Sathani akhala akupumpsa atumiki wakukhulupirika wa Mulungu. Na tenepo, tin’funika kuzindikira kuti cinthu cacadidi n’ciponi ndipo kunama nkuponi. Anyamadulanthaka wathu angaphatise basa interneti ayai mbuto zakucezera za pa interneti kuti ayeze kutepesa cikhulupiro comwe tinaco kwa Yahova na lufoyi lomwe tinalo kuna abale wathu. Lekani kubvuma bzimwebzi thangwe tikudziwa kuti bzikucokera kwa Sathani! (1 Ju. 4:1, 6; Apok. 12:9) Kuti tikwanise kupirira mapumpso ya Sathani, tin’funika kukulisa lufoyi lomwe tinalo kwa Jezu, ndipo tin’funikambo kukhulupira momwe Yahova akuphatisira basa Jezu kuti akwanirise cakulinga cace. Tin’funika pomwe kukhulupira wale omwe Yahova akuwaphatisa basa kuti atsogolere gulu lace. (Mat. 24:45-47) Ndipo tingakulise cikhulupiro cathu mwa kumbapfunza Fala la Mulungu nthawe zentse. Tenepo cikhulupiro cathuco cin’dzakhala ninga muti wakuthiriziridwa bwino ayai omwe una mizi yakuzika. Mpostolo Paulo adalewambo mafala yakundendemerana na yamweya pomwe iye adanemba mafala ya m’vesi la leroya. w20.07 23-24 ¶11-12

Pakuti ndife wakuperewera, tentsenefe tina msambo wa kumbayeruza winango thangwe ra mawonekedwe yawo. (Ju. 7:24) Ndipo tingakwanise lini kumudziwa bwino-bwino munthu kokha na bzomwe timbawona na maso. Mwa ciratizo, kumbukirani bza dotolo omwe ana luso kwene-kwene ndipo ambalidziwa bwino basa lacero. Kodi iye angakwanise kudziwa kuti munthu akuduwala matenda yanyi kokha na kundomuwona na maso? Ne. Cakuyamba, dotoloyo an’funika kumubvunza mtendayo kuti amufotokozere momwe akubvera na kuwawa komwe akubva, ndipo pomwe mtendayo akufotokoza, dotoloyo an’funika kumutetekera bwino-bwino. Bzikafunika pinango dotoloyo angakumbire kuti mtendayo abvunikidwe kuti awone momwe m’thupi mwace muliri. Tsono dotoloyo akasaya kucita bzimwebzi, angapase mtendayo mankhwala yomwe yakubverana lini na matendayo. Mpsibodzi-bodzimbo na ifepano, tingakwanise lini kudziwa bwino-bwino abale na mpfumakazi zathu mwakundowona mawonekedwe yawo. Koma tin’funika kudziwa momwe buliri unthu bwawo. Ndipo tingakwanise lini kudziwa bzomwe bziri mu mtima mwa munthu ninga momwe Yahova ambacitira. Napo bziri tenepo, tingacite ciri-centse kuti timutewezere. Iye ambatetekera atumiki wace, ambabvesesa momwe bzinthu bziriri pa moyo wawo ndipo ambawabvera ntsisi. w20.04 14-15 ¶1-3

Tin’funika kukhala wakubzicepesa thangwe wanthu wakubzikuza ambakumbuka lini ‘mwanzeru.’ Munthu wakubzikuza ambafuna kwene-kwene kunesana na anzace, ndipo ambabziwona kukhala wakufunika kuposa anzacewo. Kawiri-kawiri, bzomwe iye ambacita bzimbamalizira kumusunamisa na kusunamisambo anzace. Ndipo iye akasaya kucinja makumbukidwe yaceyo, Sathani an’dzamusoceresa. (2Ako. 4:4; 11:3) Munthu wakubzicepesa ambakumbuka mwanzeru. Iye ambabziwona mwakuthemera, ndipo ambazindikira kuti anzace ambamuposa mu njira zinango. (Afil. 2:3) Iye ambadziwa kuti ‘Mulungu ambatsutsa wanthu wakubzikuza, [ndipo] ambalatiza kudeka mtima kwace kukulu kwa wanthu wakubzicepesa.’ (1 Pe. 5:5) Munthu omwe ambakumbuka mwanzeru ambawona lini Yahova ninga nyamadulanthaka. Kuti tipitirize kukhala wakubzicepesa tin’funika kumbaphatisa basa malango ya m’Bibliya yomwe yambalewa kuti ‘[tikhundule unthu bwathu] bwakale na mabasa yace, ndipo [tibvale] unthu bupsa.’ Ndipo tin’funikambo kupfunza na ciratizo ca Jezu na kucita ciri-centse kuti timutewezere.—Akol. 3:9, 10; 1 Pe. 2:21. w20.07 7 ¶16-17

Ifepano tina mwayi ukulu kwene-kwene, omwe ni mwayi wakucita mbali mu gwere la Yahova. Ifepano timbakondwa na mtendere omwe tinawo na abale wathu thangwe ra kutumikira nawo pabodzi Yahova. Kodi imwepo ndimwe wakufunika m’gwere? Pa matsamba mpostolo Paulo adafuliziridwa na Mulungu kuti ayanembe, iye adandendemezera gwere na thupi la munthu. Mpostoloyo adandendemezerambo Mkristau ali-wentse m’gwere na bziwalo bza thupi. (Aro. 12:4-8; 1Ako. 12:12-27; Aef. 4:16) Cinthu cibodzi comwe tikupfunza na ciratizo ca Paulo, n’cakuti ali-wentse wa ifepano ana mbuto yakufunika m’banja la Yahova. Paulo adayamba ciratizo cace na mafala yakuti: ‘Pakuti thupi libodzi lina bziwalo bzizinji, tsono bziwalobzo bzimbacita lini basa libodzi-bodzi. Mwa njira ibodzi-bodziyi, napo ndife azinji, timbacita mbali ya thupi libodzi mwakuphatana na Kristu, ndipo ifepano ndife bziwalo bzomwe ciri-centse cimbafunikira cinzace.’ (Aro. 12:4, 5) Kodi Paulo akhafuna kulewanyi na mafalaya? Iye akhafuna kulewa kuti ifepano tina udindo bwakusiyana-siyana m’gwere, koma tentse ndife wakufunika. w20.08 20 ¶1-2; 21 ¶4

Abereki, kodi mungatewezere tani ciratizo ca Yahova pa nkhani ya kubzicepesa? Mungacite bzimwebzi mwakumbapasa mpata wana wanu kuti afotokozembo nzeru zawo pa nkhani inango. Ndipo penu bzomwe alewabzo bziri bwino, citani bzimwebzo. Yahova ni ciratizo cabwino pa nkhani imweyi, iye ambalatiza kupirira pomwe atumiki wace akufotokoza makumbukidwe yawo pa bzomwe iye akufuna kucita. Abalahamu akhalibe kubvesesa thangwe race Yahova akhafuna kupfudza mizinda ya Sodoma na Gomora, ndipo iye adafotokozera Yahova makumbukidwe yaceyo. Tenepo Yahovayo adamutetekera. (Ciy. 18:22-33) Sara adaseka pomwe Yahova adalewa kuti iye angadakhala na pathupi napo kuti akhadakalamba kale, koma Yahova alibe kukalipa ne kusunama. (Ciy. 18:10-14) M’mbuto mwace, Yahova adamudekera mtima. Kodi imwepo ndimwe pai ayai mkulu wa gwere? Kodi mungatewezere tani Yahova? Kumbukirani bzomwe imwepo mungacite penu mwana wanu ayai m’bale m’gwere walewa makumbukidwe yace pa bzinthu bzomwe imwepo mwacita. Kodi mungawatsimule, ayai mun’dzayeza kubvesesa makumbukidwe yawo? Wale omwe ana udindo akakhala wakubzicepesa ninga Yahova, mabanja pabodzi na magwere yan’dzagumana phindu. w20.08 10 ¶7-9

Kodi tikupfunza ciyani na ciratizo ca Paulo? Pomwe ifepano tidayamba kupfunza cadidi, tikhabvuma kuti winango atithandize thangwe tikhadziwa lini bzinthu bzizinji. Ifepano tikhabzibva ninga tuwana thangwe tikhana bzizinji kuti tipfunze. (1Ako. 3:1, 2) Tsono tani ntsiku zino? Penu mukutumikira Yahova kwa magole mazinji ndipo mumbadziwa bzinthu bzizinji, kodi mumbabvuma thandizo la winango? Pinango bzingakuneseni, maka-maka akakhala kuti munthu omwe an’funa kukupasani thandizoyo ana magole mang’ono-ng’ono m’cadidi kuposa imwepo. Koma nthawe zizinji Yahova ambaphatisa basa abale na mpfumakazi kuti atipase mphanvu zomwe tikufunikira. (Aro. 1:11, 12) Tenepo, penu tin’funa kuti Yahova atipase mphanvu tin’funika kubvuma thandizo lomwe abale na mpfumakazi ambatipasa. Bzimbafunikira lini kukhala na mphanvu za kuthupi, mapfunziro ya padzulu, kudziwika ayai kobiri, kuti bzinthu bzitifambire bwino. Koma ifepano tin’funika kukhala wakubzicepesa na kumbakhulupira Yahova. Tenepo, tentsenefe tin’funika (1) kukhulupira Yahova, (2) kupfunza na bziratizo bza atumiki wakale-kale, na (3) kubvuma thandizo la winango. Mukacita bzimwebzi, napo mucibzibva kukhala wakutepa, Yahova an’dzakuthandizani kukhala wa mphanvu! w20.07 14 ¶2; 19 ¶18-19

Bzingakhale bzakunesa kupirira pomwe tikupalizira wanthu wa m’banja mwathu omwe ni Mboni lini za Yahova. Koma nfundo yomwe iri pa Mpalizi 3:1, 7 ingatithandize. Iyo imbati: ‘[Pana] . . . nthawe yakunyamala na nthawe yakulewa-lewa.’ Makhalidwe yathu yabwino yangathandize wanthu wa m’banja mwathuwo kufuna kutetekera mafala yathu. Ndipo pa nthawe ibodzi-bodziyo tin’funika kukhala wakukonzeka kuwafotokozera bza Yahova. (1 Pe. 3:1, 2) Tin’funika kumbapirira na wanthu wentse, kuphatanidzambo wanthu wa m’banja mwathu pomwe tikuwapalizira na nyongo. Tingapfunze kupirira na bziratizo bza wanthu wakukhulupirika omwe ambalewedwa m’Bibliya na bza wanthu wa mu nthawe zathu zino. Mwa ciratizo, Habakuki akhafuna kuti bzinthu bzakuipa bzimale, tsono iye adalatiza kuti akhali munthu wakupirira, pomwe adalewa kuti: ‘Nin’dzaima pa mbuto yangu ya ulindiri.’ (Hab. 2:1) Mpostolo Paulo adalewa kuti akhafuna ‘kumaliza’ utumiki bwace. Napo bzikhali tenepo, iye mwakupirira adapitiriza ‘kupalizira mwakukwanira mafala yabwino ya kudeka mtima kukulu kwa Mulungu.’—Mab. 20:24. w20.09 12 ¶12-14

Jezu omwe ni munthu waciwiri wamphanvu pambuyo pa Yahova, alibe kukumbuka bza kukhala wakundendemerana na Yahovayo. Mwakutewezera Jezu, kubzicepesa komwe atumiki wa Yahova ambalatiza kumbacitisa kuti mu gwere mukhale na lufoyi, ndipo ni lufoyi limweri lomwe limbatidziwikisa kuti ndife gulu la Mulungu. (Luka 9:48; Ju. 13:35) Bzingacitike kuti gwere lanu likugumana na mabvuto, ndipo imwepo mukuwona kuti palibe comwe akulu wa gwere akucita kuti asamalire mabvutoyo. Kodi mungacite ciyani? M’mbuto mwakudandaula, khalani wakubzicepesa, mucithandizira omwe akutsogolera. (Aheb. 13:17) Comwe cingakuthandizeni ni kukumbukira mibvunzo iyi: ‘Kodi mabvuto yomwe ndikuwonaya ni makulu kwene-kwene mwakuti yan’funika kukonzedwa? Kodi ino ni nthawe yakuthemera kuti yakonzedwe? Kodi ni udindo bwangu kusamalira mabvutoya? Kodi ndikuyeza kubzicepesa mwakuthandizira ciphatano ca gwere, ayai ndikubziwonesera?’ Kwa Yahova kukhala wakubzicepesa n’kwakufunika kwene-kwene kuposa cidziwiso, ndipo ciphatano cathu n’cakufunika kwene-kwene kuposa basa. Tenepo citani nyongo kuti mumbatumikire Yahova mwakubzicepesa. Mwa njira imweyi imwepo mun’dzathandizira kuti gwere likhale lakuphatana.—Aef. 4:2, 3. w20.07 4-5 ¶9-11

Jezu adatenda thandizo lomwe adalitambira kucokera kwa akazi wakukhulupirika omwe akhamutumikira mwakuphatisa basa ‘cuma cawo.’ (Luka 8:1-3) Iye a adawapfunzisambo bzinthu bzakuzika bza cadidi. Mwa ciratizo, iye adawauza kuti angadadzafa ndipo angadalamusidwa. (Luka 24:5-8) Ndipo iye adakonzekeresa akaziwo ninga kuti akukonzekeresa apostolo, mwa kuwauza bzomwe bzingadamucitikira. (Marko 9:30-32; 10:32-34) Tenepo, pa nthawe yomwe apostolo adathawa Jezu, pomwe iye adaphatidwa na anyamadulanthaka wace, akazi winango omwe adamuthandiza, akhali kumbali yace pomwe iye akhafa pa muti wakuzunzidwira. (Mat. 26:56; Marko 15:40, 41) Akaziwo adakhala wakuyambirira kudziwa bza kulamusidwa kwa Jezu. Iye adauza akaziwo kuti akafotokozere apostolo kuti wamuka kwa anyakufa. (Mat. 28:5, 9, 10) Akazi akhalipombo pa Pentekosite wa mu 33 E.C., pomwe Akristau adadzozedwa na mzimu wakucena. Ndipo wentse m’mwemo adatambirambo luso lakulewalewa bzirewedwe bzomwe akhabzidziwa lini ndipo adauza winango ‘mabasa ya mphanvu ya Mulungu.’—Mab. 1:14; 2:2-4, 11. w20.09 23 ¶11-12

Basa lakupalizira ni basa lakupulumusa wanthu. Tikudziwa tani bzimwebzi? Pomwe Jezu adapereka lamulo lomwe liri pa Mateu 28:19, 20 iye adati: “Ndokoni, . . . kapfunziseni wanthu . . . , muciwabatiza.” Thangwe ranyi mpsakufunika kuti munthu abatizidwe? Thangwe kubatizidwa ndiko kun’dzacitisa wanthu kukhala na moyo wakusaya kumala. Wale omwe abzipereka kuti akabatizidwe an’funika kukhala na cikhulupiro cakuti an’dzapulumusidwa thangwe rakuti Jezu adafa kuti alombole wanthu nakuti adalamusidwa. Bzimwebzi ndibzo bzomwe Pedru adauza Akristau anzace, iye adati: “Ubatizo . . . tsapano bukukupulumusani . . . , mwa kulamusidwa kwa Jezu Kristu.” (1 Pe. 3:21) Ndipopa, nyakupfunza wa Bibliya akabatizidwa iye ambakhala pa mfolo wakuti adzapulumusidwe. Kuti tikhale apfunzisi wabwino, tin’funika kukulisa luso lathu lakupfunzisa. (2 Tim. 4:1, 2) Thangwe ranyi? Thangwe rakuti Jezu adatiuza kuti: “Ndokoni, ndipo kapfunziseni wanthu.” Ndipo mpostolo Paulo adalewambo kuti: “Tsungira kucita bzimwebzi, ndipo ukacita tenepo, un’dzabzipulumusa wekha pabodzi na wale omwe an’kutetekera.” w20.10 14 ¶1-2

Pedru akhakomedwa kukhala khombwe wakumbamedza wanthu. Ndipo pakuti Yahova adamuthandiza, iye adakhala na luso pa basa limweri. (Mab. 2:14, 41) Ifepano timbapalizira thangwe rakuti timbafuna Yahova. Limweri ni thangwe lakuyamba lomwe limbaticitisa kuphata basali. Lufoyi lathu kwa Yahova limbatithandiza kuuza winango bza iye, napo ticibzibva kuti ndife lini wakuthemera. Pomwe Jezu adacemera Pedru kuti akhale khombwe wa wanthu, iye adamuuza kuti: ‘Leka kugopa.’ (Luka 5:8-11) Pedru alibe kugopa kuti n’ciyani cingamucitikire akabvuma kukhala mteweri wa Jezu. M’mbuto mwace Pedru adadabwa na momwe Jezu adamuthandizira kupha ntsomba zizinji mwakudabwisa, ndipo bzimwebzo bzidamucitisa kubziwona kukhala wakusaya kuthemera kuphata basa na Jezu. Koma mwakusiyana na bzimwebzi, imwepo mungacite thupo mukazindikira bzomwe bzimbaphatanidza kupfunzisa wanthu kuti akhale anyakupfunza wa Jezu. Penu n’tenepo, limbisani lufoyi lomwe munalo kwa Yahova, Jezu na kwa wanthu winango. Bzimwebzi bzin’dzakuthandizani kubvuma mcemo wa Jezu mucikhala akhombwe wa wanthu.—Mat. 22:37, 39; Ju. 14:15. w20.09 3 ¶4-5

Ifepano timbakomedwa thangwe ra kuphatisa basa nthawe yathu, mphanvu zathu, na kobiri zathu kuti tigumane wale ‘omwe ana makumbukidwe yabwino yomwe yangawathandize kukagumana moyo wakusaya kumala.’ (Mab. 13:48) Tikambacita bzimwebzi, timbakhala tikutewezera ciratizo ca Jezu. Iye adalewa kuti ‘Cakudya cangu ni kucita kufuna kwa ule omwe adandituma na kumaliza basa lace.’ (Ju. 4:34; 17:4) Cimweci ndico cikhumbo cathu. Tikufuna kumaliza basa lomwe Jezuyo adatipasa. (Ju. 20:21) Ndipo tikufunambo kuti wanthu winango kuphatanidza wale omwe adadjedjera mwauzimu apitirize kucita nafe basali mwakupirira. (Mat. 24:13) Bziribe kupusa kucita bzomwe Jezu adatiuza kuti ticite. Koma napo bziri tenepo, tikucita lini tekha basali, thangwe Jezu adalewa kuti angadadzakhala nafe pabodzi pa basali. Tikakhala tikupfunzisa wanthu, timbakhala ‘anyabasa anzace wa Mulungu mwakubverana na Kristu.’ (1Ako. 3:9; 2Ako. 2:17) Tenepo ifepano tingamalize kucita basali. Kuna ifepano ni mwayi ukulu kwene-kwene kucita basali na kuthandizambo winango kuti acitembo bzibodzi-bodzi!—Afil. 4:13. w20.11 7 ¶19-20

Kawiri-kawiri, bzomwe abereki ambasankhula kucita bzimbatokonya wana wawo kwa nthawe itali. Tenepo, abereki akasankhula kucita cinthu cakuipa, cingabweresere mabvuto wana wawo. Tsono abereki akasankhula kucita bzinthu bzabwino, ambakhala akuthandiza wana wawowo kuti bzinthu bziwafambire bwino pa moyo wawo. Tsono wanawo an’funikambo kumbasankhula kucita bzinthu bzabwino. Kuposa bzentse, cinthu cabwino comwe munthu angasankhule kucita ndico kutumikira Baba wathu wakudzulu Yahova. (Sal. 73:28) Abereki wa Jezu adatsimikiza kuthandiza wana wawo kuti atumikire Yahova. Ndipo bzomwe iwo adacitabzo bzidathandiza wana wawowo kuwona kuti mpsabwino kwene-kwene kutumikira Yahova. (Luka 2:40, 41, 52) Ndipo Jezu adasankhulambo kucita bzinthu bzabwino bzomwe bzidamuthandiza kucita bzomwe Yahova akhafuna kuti iye acite. (Mat. 4:1-10) Jezu adakhala wakudeka mtima, wakukhulupirika na wakukhimwika. Abereki wentse omwe ambafuna Yahova angakomedwe kukhala na wana ninga momwe Jezu akhaliri. w20.10 26 ¶1-2

Onani bziratizo bzitatu bzakutewerabzi. Mpfumakazi yacikulire ikukumbukira bzinthu bzabwino bzomwe bzidamucitikira kale-kale pomwe akhali mwana. Ndipo tsapano napo kuti ikugumana na mabvuto yakusiyana-siyana pa moyo wace, koma ikucita ciri-centse comwe ingakwanise kuti ipitirize kutumikira Yahova. (1Ako. 15:58) Ntsiku zentse mpfumakaziyo imbakumbukira kuti iri mu paraizo na wanthu wa m’banja lace pabodzi na axamwali wace. Mpfumakazi inango ikukumbukira munthu omwe adamucitira cinthu comwe iribe kukomedwa naco m’gwere. Koma yasankhula kuleka kumukoyera cakumtima. (Akol. 3:13) M’bale akukumbukira bzomwe adaphonya, koma akupitiriza kucita bzomwe angakwanise kuti alimbise cikhulupiro cace kwa Yahova. (Sal. 51:10) Kodi pana kundendemerana kuponi pakati pa bzomwe Akristau atatuwa adacita? Abale atatuwa ambakumbukira bzinthu bzomwe bzidacitika kale-kale pa moyo wawo, koma nthawe zentse ambandokhala lini acikumbukira bzomwe bzidacitikabzo. M’mbuto mwace iwo ‘[ambanyang’anisisa] kutsogolo.’ Thangwe ranyi mpsakufunika? Thangwe munthu akakhala akufamba uku adanyang’anisa m’mbuyo, bzimbamunesa kufamba bwino. Bzimwebzi mpsibodzi-bodzimbo na basa lathu lakutumikira Yahova. Ifepano tingakwanise lini kupitiriza kutumikira Yahova tikakhala ticimbandokumbukira bzinthu bzomwe bzidacitika kale-kale pa moyo wanthu ayai bzinthu bzomwe tidacita.—Luka 9:62. w20.11 24 ¶1-3

M’makumbukidwe ya Goliyati, Davide akhawoneka ninga kuti alibe mphanvu. Onani kuti Goliyati akhali mkulu kuposa Davide, akhadabvala bzakubvala bza nkhondo ndipo akhadapfunzisidwa bwino kumenya nkhondo. Tsono Davide akhali tswaka lomwe likhalibe luso la kumenya nkhondo ndipo akhalibe kukonzekera kuti akamenye nkhondoyo. Koma Davide adakhulupira mphanvu za Yahova, ndipopa adakunda nyamadulanthaka wace. (1 Sam. 17:41-45, 50) Davide adalimbana na mphitca zinango zomwe zingadamucitisa kukhala wakutepa. Iye akhatumikira Sauli omwe akhali mambo wa Jirayeri wakuikhidwa na Mulungu. Pakuyamba mambo Sauli akhalemekeza Davide. Tsono na kupita kwa nthawe, thangwe ra kubzikuza, Sauli adayamba kucitira ntsanje Davide, ndipo adayamba kumuboneresa mpaka kufuna kumupha. (1 Sam. 18:6-9, 29; 19:9-11) Napo Davide akhacitiridwa bzinthu bzakusaya cirungamo na Sauli, iye adapitiriza kumulemekeza thangwe akhadziwa kuti akhali mambo wakuikhidwa na Mulungu. (1 Sam. 24:6) Davide adakhulupira kuti Yahova angadamupasa mphanvu zomwe iye akhafunikira kuti apirire mabvuto yentseyo.—Sal. 18:1. w20.07 17 ¶11-13

Mbali ikulu ya polofesiya yakulewa bza mambo wa kumpoto na mambo wa kummwera idakwanisika kale, ndipo tikupenukira lini kuti mbali yomwe yasala ya polofesiyayi in’dzakwanisikambo kutsogoloku. Kuti tibvesese bukhu la Danyeri kapitulo 11, tin’funika kukumbukira bzinthu bziwiri. Cakuyamba polofesiyayi imbalewa kokha bza wamambo na maboma yomwe yadatonga m’madziko yomwe wanthu wa Mulungu akhakhala. Kuyambira kale-kale, atumiki wa Mulungu ni thimu la wanthu an’gono-g’ono tikawandendemezera na wanthu wentse omwe ali pa dziko la pantsi pano. Napo bziri tenepo, iwo kawiri-kawiri ambawengedwa na maboma ya wanthu. Thangwe ranyi? Thangwe ndakuti Sathani na dziko laceri ana cakulinga cakufuna kupfudza wanthu omwe ambatumikira Yahova na Jezu. (Ciy. 3:15; Apok. 11:7; 12:17) Kuthumizira bzimwebzi, polofesiya ya Danyeri ikubverana na mapolofesiya yanango ya m’Bibliya. Tenepo, ifepano tingabvesese polofesiya ya Danyeri tikaindendemezera na mapolofesiya yanango ya m’Bibliya. w20.05 2 ¶1-2

Wanthu azinji ntsiku zino, ana makumbukidwe yakusiyana-siyana pa nkhani ya bzomwe bzimbacitika munthu akafa. Tsono, kodi Bibliya limbapfunzisa ciyani? Munthu akafa thupi lace limbabvunda. Koma ule omwe adakonza cirengedwe angamulamuse munthuyo acimupasa thupi lomwe iye akufuna. (Ciy. 1:1; 2:7) Mpostolo Paulo adaphatisa basa ciratizo kuti alatize kuti Mulungu angafunikire lini kulamusa munthu na thupi libodzi-bodziro. Kumbukirani bza ‘mbeu’ ayai ‘kubzala mbeu.’ Njere ikabzalidwa m’munda imbamera icikhala muti munango. Muti omwe wamerayo, umbasiyana na njereyo. Paulo adaphatisa basa ciratizoci kuti alatize kuti Mulengi wathu angapereke mawonekedwe ya thupi ‘malingana na momwe iye akufunira.’ Paulo adalewa pomwe kuti ‘pana mathupi ya kudzulu na mathupi ya pa dziko.’ Kodi iye akhathandauza ciyani na mafalaya? Iye akhafuna kulewa kuti pa dziko la pantsi pana mathupi ya nyama, koma kudzulu kuna mathupi yauzimu, ninga mathupi ya anjo.—1Ako. 15:36-41. w20.12 10 ¶7-9

Tentsenefe timbafuna kukhala na moyo wa mtendere ndipo palibe omwe ambafuna kukhala na thupo. Tsono nthawe zinango, ifepano tingakhale na thupo. Ndipopa tingangabzibvunze mbvunzo ninga omwe Mambo Davide adabvunza, mu vesi la lero. Pana bzinthu bzizinji bzomwe bzingaticitise kukhala na thupo, ndipo ifepano tiribe mphanvu yakuletsa bzinthubzo kucitika. Mwa ciratizo, ifepano tingacitise lini kuti cakudya, bzakubvala na nyumba za aluge bzireke kuumira pa gole liri-lentse. Ndipo tingakwanisembo lini kucitisa kuti anzathu wa ku basa, ayai wa ku xikola aleke kutiyeza kuti tikhale wakusaya kukhulupirika ayai kuti ticite upombo ayai uputa. Ndipo tingacitisembo lini kuti bzinthu bzaukapondo bzireke kucitika kumbuto yomwe timbakhala. Ifepano timbagumana na mabvuto yamweya thangwe rakuti tikukhala mu dziko lomwe lina wanthu omwe ana makumbukidwe yomwe yambabverana lini na mitemo ya m’Bibliya. Sathani omwe ni mulungu wa dzikoli, ambadziwa kuti wanthu azinji an’dzatumikira lini Yahova thangwe rakuti “bzinthu bza m’dzikoli” bzin’dzawacitisa kukhala na thupo kwene-kwene. (Mat. 13:22; 1 Ju. 5:19) Ifepano timbadabwa lini kuti dzikoli ladzala na mabvuto yomwe yambacitisa wanthu azinji kukhala na thupo. w21.01 2 ¶1, 3

Mpostolo Juwau adaticenjeza kuti tileke kumbawenga abale wathu. Tikasaya kuteweza malango yamweya bzin’dzakhala bzakusaya kunesa kuti Sathani atigwese. (1 Ju. 2:11) Bzimwebzi ndibzo bzomwe bzidacitika na wanthu winango kuphampha kwa magole 100 yakuyambirira. Sathani adacita ciri-centse kuti pakati pa wanthu wa Mulungu pakhale na mgawano. Ndipo pa nthawe yomwe Juwau adanemba matsamba yace, wanthu omwe akhana makumbukidwe mabodzi-bodzi na ya Sathani, adacitambo mbali ya gwere. Ndipo m’bodzi mwa wanthuwo akhali Diotrefe, omwe adacitisa kuti gwere libodzi likhale na migawano ya mphanvu. (3 Ju. 9, 10) Iye akhalemekeza lini akulu wakunyang’anira madera, omwe pa nthaweyo akhaimira bungwe lakutonga. Mpaka iye adayeza kucosa m’gwere wale omwe akhalatiza mtima wakutambira alendo kuna wanthu omwe iye akhawafuna lini. Diotrefe akhali munthu wakubzikuza kwene-kwene. Ntsiku zinombo Sathani akupitiriza kucita ciri-centse kuti acitise kuti pakati pa wanthu wa Mulungu pakhale na migawano. Tenepo, tin’funika lini kuwenga napang’onopo abale wathu na kusiya kuwathandiza. w21.01 11 ¶14

Pa nkhondo yakuyamba ya pa dziko lentse la pantsi, boma la Alemanha na boma la Grã-Bretanha, lidazunza atumiki wa Mulungu thangwe ra kulamba kumenya nkhondo. Ndipo boma la América lidafungira m’kawoko abale omwe akhatsogolera basa lakupalizira. Tenepo, cizunzo comwe abale adagumana nacoci, cidakwanirisa polofesiya ya pa Apokalipse 11:7-10. Na kupita kwa nthawe, m’magole ya 1930, maka-maka pa nkhondo yaciwiri ya pa dziko lentse la pantsi, mambo wa kumpoto adazunza atumiki wa Mulungu mwa kusaya kuwabvera ntsisi. Hitler na anzace adaletsa m’dzikomo basa lomwe atumiki wa Mulungu akhacita. Abale pafupi-fupi 1500 adaphedwa, ndipo azinji adafungiridwa m’kawoko. Polofesiya ya Danyeri idalewa kuti mambo wa kumpoto ‘angadadzapswipiza mbuto yakupambulika,’ ndipo ‘angadadzapfudza ntsembe zakuperekedwa nthawe zentse.’ Bzimwebzi bzidacitika pomwe boma la Alemanha lidaletsa basa lakupalizira. (Dan. 11:30b, 31a) Ndipo Hitler omwe akhatsogolera boma la Alemanha pa nthawe imweyire, adalumbira kupha atumiki wentse wa Mulungu wa ku Alemanhako. w20.05 6 ¶12-13

Tikambalatizana lufoyi cairo m’gwere, tin’dzabziwona lini kukhala wakufunika kwene-kwene kuposa winango. Kumbukiranimbo bzomwe Jonatani adacita, iye alibe kucitira njiru Davide ayai kuyeza kukhala mambo m’mbuto mwa Davideyo. (1 Sam. 20:42) Tenepo, tentsenefe tingatewezerembo ciratizo ca Jonatani. Lekani kumbacitira njiru anzanu wa ku basa thangwe ra luso lawo, koma mwakubzicepesa ‘mbawonani winango kukhala wakukuposani.’ (Afil. 2:3) Kumbukirani kuti munthu ali-wentse ana luso kuti athandizire gwere. Tikambakulisa khalidwe lakubzicepesa, tin’dzawona bzinthu bzabwino bzomwe abale na mpfumakazi zathu ambabzicita, ndipo tin’dzatewezerambo ciratizo cawo. (1Ako. 12:21-25) Tikambalatiza lufoyi cairo ifepano timbalimbisa abale na mpfumakazi zathu pomwe iwo akugumana na mabvuto. Ndipo timbawathandiza kutumikira Yahova mwakukondwa. Ifepano timbalatiza kuti ndife anyakupfunza wa Jezu, ndipo timbacitisa wanthu omwe ana mtima wabwino kufuna kutumikira Yahova. Ndipo kuposa bzentse, timbatumbiza Yahova, omwe ni “Baba wa ntsisi kwene-kwene na Mulungu omwe ambatsangalaza wanthu mu njira iri-yentse.”—2Ako. 1:3. w21.01 23 ¶14; 25 ¶16

Ntsiku zino wanthu winango ambatinyoza na kutiseka. Iwo ambakumbuka kuti atumiki wa Yahova mbakutepa na wakusaya basa. Thangwe ranyi? Thangwe rakuti ifepano timbabverana lini na makhalidwe yawo. Ifepano timbacita nyongo kuti tilatize makhalidwe ya kubzicepesa, kufatsa na kubvera. Mwakusiyana nafe, wanthu m’dzikoli ambakomedwa na wanthu wakubzikuza, wakubzibva na wakupanduka. Kuthimizira bzimwebzi timbapitira lini nkhani za ndale, ndipo timbayenda lini ku nkhondo. Ifepano timbacita lini mbali ya dziko, ndipopa wanthu ambatiwona ninga kuti ndife wakusaya basa. (Aro. 12:2) Napo kuti wanthu ku dzikoku ambatinyoza, koma Yahova ambatiphatisa basa kuti ticite bzinthu bzakudabwisa. Iye akuphatisa basa atumiki wace kuti acite kampanya yakupalizira pa dziko lentse la pantsi. Atumiki wace ntsiku zino akukonza mabukhu acigawira wanthu pa dziko lentse la pantsi, ndipo iwo akuphatisa basa Bibliya kuti athandize wanthu azinji kuti akhale na moyo wabwino. Yahova ni omwe ambacitisa kuti bzimwebzi bzikwanisike. w20.07 15 ¶5-6

Jezu ambalemekeza Yahova sikuti thangwe rakuti iye alibe nzeru ayai luso. Kupfunzisa kwace mwakubveka bwino kumbalatiza kuti Jezu ana nzeru na luso. (Ju. 7:45, 46) Yahova akhadziwa kuti Jezu ana luso kwene-kwene, ndipopa adabvuma kuti iye aphate naye basa pabodzi pakulenga bzinthu kudzulu na pa dziko la pantsi. (Mim. 8:30; Aheb. 1:2-4) Pomwe Yahova adalamusa Jezu, iye adamupasa “utongi bwentse, kudzulu na pa dziko la pantsi.” (Mat. 28:18) Napo kuti Jezu ana luso lakudziwa bzinthu bzizinji, iye ambathemba Yahova kuti amutsogolere. Thangwe ranyi? Thangwe ambafuna Baba wace. Amuna omwe ali pa banja an’funika kuwona bzimwebzo. Yahova ambafuna kuti akazi ambabvere azibayawo sikuti thangwe rakuti amunawo mbakufunika kwene-kwene kuposa akaziwo. Yahova ambalatiza kuti akaziwo mbakufunikambo mwa kuwasankhula kuti akatonge pabodzi na Jezu kudzulu. (Agal. 3:26-29) Yahova adalatiza kuti ambakhulupira Mwana wace mwakumupasa udindo. Mpsibodzi-bodzimbo, mwamuna wa nzeru ambalatiza kuti ambakhulupira mkazi wace mwa kumupasambo mabasa yanango. w21.02 10-11 ¶13-14

Fala la Mulungu liri ninga supedyo, iro limbatithandiza kudziwa bzomwe tin’funika kucita na momwe tingabzicitire. (Tiy. 1:23-25) Mwa ciratizo, tikamala kuwerenga Fala la Mulungu, ifepano tingazindikire kuti tin’funika lini kumbakalipa pafupi-pafupi. Na thandizo la Yahova ifepano timbapfunza kukhala wakuderekha pomwe wanthu ayai mabvuto yakuticitisa kukhala waukali. Timbakwanisa kukumbuka bwino na kusankhula bzinthu mwa nzeru. (Tiy. 3:13) Kuti tikwanise kucita bzimwebzi tin’funika kulidziwa bwino Bibliya. Nthawe zinango timbapfunza bzomwe tin’funika kutcenkha pomwe tacita kale bzinthu bzakuphonyeka. Njira yabwino yakugumanira nzeru ndiyo kupfunza bza wale omwe adacita bzinthu bzabwino na omwe adacita bzinthu bzakuphonyeka. Ndipopa Tiyago adatiuza kuti tipfunze bziratizo bza m’Bibliya bza wanthu ninga Abalahamu, Rahabi, Djobi, na Eliya. (Tiy. 2:21-26; 5:10, 11, 17, 18) Atumiki wakukhulupirika wa Yahovawa adakwanisa kupirira mabvuto yomwe yangadawacitisa kuti aleke kukhala wakukondwa. Bziratizo bzawo bzikulatiza kuti na thandizo la Yahova ifepano tingakwanisembo kucita bzibodzi-bodzibzi. w21.02 30 ¶12-13

Pakucitisa pfunziro la Bibliya, mpfunzisi ndiye omwe ana ugo bwakuyambirira bwakuthandiza nyakupfunza wa Bibliya kubvesesa Fala la Mulungu. Tsono m’bale ayai mpfumakazi akakukumbirani kuti mumuperekeze ku pfunziro lace, imwepo mun’funika kubzibva kuti muna ugo bwa kuthandizambo nyakupfunzayo kubvesesa Fala la Mulungu. (Mpal. 4:9, 10) N’ciyani comwe imwepo mun’funika kucita kuti mukhale mpfunzisi wabwino pomwe mukucitisa pfunziro la Bibliya? Konzekerani pomwe mukanati kuyenda kukacitisa pfunziro la Bibliya. Cakuyamba, bvunzani mwenekaciro pfunziroyo kuti akuuzeni bzinthu bzinango pakulewa bza nyakupfunza waceyo. Kodi moyo wa nyakupfunza wa Bibliyayo uli tani? Kodi tin’kapfunza naye msolo uponi? Kodi mukufuna kuti nyakupfunza wanu apfunze ciyani na msolo umweyu? Kodi pana cinthu comwe nin’kafunika kulewa ayai kusaya kulewa pomwe tikucitisa pfunzirolo? Kodi ningakathandize tani nyakupfunza kuti ayende patsogolo? Dziwani kuti mpfunzisi an’funika lini kuzimbula nkhani zacintsintsi za nyakupfunza waceyo, koma bzomwe iye angakuuzeni bzingakhale bzakuthandiza. Misiyonario unango wakucemeredwa Joy adati: “Bzinthu bzomwe nimbalewa bzimbathandiza munthu omwe akundiperekezayo kuti amudziwe nyakupfunzayo na kudziwambo bzomwe angalewe pomwe tikucitisa pfunzirolo.” w21.03 9 ¶5-6

Nthawe zinango timbawengedwa thangwe rakuti timbabvera mitemo ya Mulungu. Bzomwe Mulungu ambalewa kuti mpsabwino na bzakuipa, mpsakusiyana kwene-kwene na bzomwe wanthu wa dzikoli ambalewa kuti mpsabwino na bzakuipa. Mwa ciratizo, wanthu azinji ambawona lini kuti mpsakuphonyeka kucita malume ya pa mphasa ya mtundu uli-wentse, na makhalidwe yanango yakuipa, ninga yomwe yadacitisa kuti Mulungu apfudze mizinda ya Sodoma na Gomora! (Djuda 7) Thangwe ra kuti timbabvera mitemo ya m’Bibliya yakulewa bza nkhani imweyi, wanthu azinji ambatinyoza, ndipo ambatilewa kuti tidanesa. (1 Pe. 4:3, 4) Kodi n’ciyani cingatithandize kupirira, wanthu akambatiwenga na kutitukwana? Tin’funika kukhala na cikhulupiro camphanvu cakuti Yahova an’dzatithandiza. Cikhulupiro cathu ciri ninga mkhotco omwe ungathimise “misewe yakugaka ya nyakuipayo.” (Aef. 6:16) Koma tin’funikira pomwe cinthu cinango sikuti cikhulupiro cokha. Timbafunikirambo lufoyi. Thangwe ranyi? Thangwe lufoyi “limbakalipa lini kamangu.” Ndipo iro limbalekerera bzinthu bzentse na kupirira bzinthu bzentse bzakuwawa. (1Ako. 13:4-7, 13) Lufoyi lomwe tinalo kuna Yahova, kuna abale wathu, napo kuna anyamadulanthaka wathu lingatithandize kupirira tikambawengedwa. w21.03 21 ¶3-4

Nthawe zinango timbalatiza kuti timbafuna abale na mpfumakazi zathu kucokera pa bzinthu bzomwe timbacita lini. Mwa ciratizo, timbathamangira lini kukalipa iwo akaphonya kulewalewa. Kumbukirani bzomwe bzidacitika pa dziko la pantsi pano pomwe moyo wa Jezu ukhadasala pang’ono kufika kuphampha. Jezu adauza anyakupfunza wace kuti akhafunika kudya thupi na kumwa mulopa wace kuti adzatambire moyo. (Ju. 6:53-57) Pomwe anyakupfunzawo adabva mafalaya alibe kukomedwa nayo, ndipo azinji wa iwo adamusiya. Koma axamwali wace wakukhulupirika adapitiriza kukhala naye. Axamwali wacewo alibe kubvesesa bzomwe Jezu adalewa ndipo iwo adadabwa na bzomwe iye adalewabzo. Koma iwo alibe kuthamangira kukumbuka kuti bzikhali bzakuphonyeka bzomwe Jezu adalewabzo ndipo alibe ne kusunama nabzo. M’mbuto mwace, iwo adapitiriza kukhulupira Jezu thangwe iwo akhadziwa kuti nthawe zentse iye akhalewa cadidi. (Ju. 6:60, 66-69) Ifepanombo tin’funika lini kumbathamangira kukalipa na bzomwe axamwali wathu angalewe. Tenepo tikasaya kubvesesa bzomwe iwo alewa, tiwapase mpata kuti atifotokozere thandauzo lace.—Mim. 18:13. w21.01 11 ¶13