Março

“Mabira” yomwe yakufotokozedwa mu ciratizo ca pa Mateu 25:31-36 yakuimira wanthu wakulungama mu ntsiku zakumalizira zino omwe ana cidikhiro cakudzakhala pa dziko la pantsi, omwe ni mabira manango. Iwo ambathandizira mwakukhulupirika abale wace wa Kristu omwe akali pa dziko la pantsi pakucita basa lakupalizira na kupfunzisa wanthu pa dziko lentse la pantsi. (Mat. 24:14; 28:19, 20) Gole liri-lentse pakakhala pakusala midzinga ming’ono-ng’ono kuti Cikumbuso cicitike, mabira manango yambalatiza kuti yambathandizira abale wace wa Kristu mwakucita kampanya yakucemerera wanthu omwe akufuna kudziwa bzizinji kuti adzagumanike pa Cikumbuso. Iwo ambathandizambo mwakucita makonzedwe kuti msinda wa Cikumbuso udzacitike m’magwere yentse ya pa dziko la pantsi, napo kuti m’magwere mazinji mulibe anyakudzozedwa. Wa mabira manangowo ambafunisisa kuthandiza abale wace wa Kristu mwa njira imweyi. Mabiraya yambadziwa kuti Jezu ambawona bzomwe iwo akucitira abale wace wakudzozedwa ninga kuti akucitira iye. — Mat. 25:37-40. w22.01 22 ¶11-12

Tingatewezere makhalidwe ya Jezu na momwe iye akhacitira bzinthu na wanthu winango. Mwa ciratizo, Jezu adadekera mtima nyamapere, adabvera ntsisi mkazi omwe akhaduwala matenda makulu, ndipo iye adabverambo ntsisi wale omwe adafedwa adzinza wawo. Tikambatewezera Jezu, timbakhala tikutewezerambo Yahova. (Marko 1:40, 41; 5:25-34; Ju. 11:33-35) Tenepo, tikambatewezera kwene-kwene makhalidwe ya Yahova, uxamwali bwathu na iye bumbalimba. Kutewera nzayo za Jezu kumbatithandiza kuleka kutengeka na dziko lakuipali. Usiku bwakumalizira bwa moyo wa Jezu pa dziko la pantsi, iye adakwanisa kulewa kuti: “Ine ndalikunda dziko.” (Ju. 16:33) Iye akhathandauza kuti adalamba kutengeka na makumbukidwe, bzakulinga pabodzi na bzicito bza dzikoli. Jezu alibe kuyebwa thangwe lomwe adatumizidwira pa dziko la pantsi, lomwe ni kucenesa dzina la Yahova. Tanimbo pakulewa bza ifepano? M’dziko lino, muna bzinthu bzizinji bzomwe bzingatitazise kutumikira Yahova. Tsono, ninga Jezu, ifepano tikapitiriza kucita bzomwe Yahova ambafuna, tin’dzakundambo dziko. — 1 Ju. 5:5. w21.04 3 ¶7-8

Mpostolo Paulo akhayadziwambo mafala ya Jezu yakuti ‘ali-wentse omwe alatize cikhulupiro kuna Jezu an’dzakhala na moyo wakusaya kumala.’ (Ju. 3:16; Aro. 6:23) Inde, Paulo akhali m’bodzi wa wanthu omwe akhakhulupira ntsembe ya cakulombolera. Iye akhana citsimikizo centse cakuti Yahova ngwakukonzeka kulekerera wanthu omwe acita pikado ikulu akakungula. (Sal. 86:5) Paulo akhakhulupira kuti Mulungu akhamufuna thangwe ra kuti Mulunguyo adatumiza Jezu kuti adzamufere. Onani mafala yakumalizira ya cinembo ca Agalatiya 2:20 yomwe yakutsimikizira bzimwebzi. Paulo adalewa kuti: “Mwana wa Mulungu, . . . adandifuna, acibzipereka thangwe ra ine.” Paulo alibe kubzibva kuti akhali munthu wakuipa mwakuti Mulungu angadamufuna lini. Ndipo iye alibe kukumbuka kuti: ‘Yahova ambafuna abale wangu, tsono inepano pinango pentse ambandifuna lini.’ Paulo adakumbusa Akristau wa ku Roma kuti: “Pomwe tikhali wanthu wa pikado, Kristu adatifera.” (Aro. 5:8) Palibe cinthu comwe cingatazise Mulungu kutifuna! Paulo akhadziwa kuti lufoyi la Mulungu ndamphanvu kwene-kwene. Ndipo iye akhadziwa momwe Yahova adacitira bzinthu mwakupirira na mtundu wa Ajirayeri. w21.04 22 ¶8-10

Mukambapfunzisa wanthu Bibliya, mbathandizani anyakupfunza wanuwo kuti ambafune Yahova. Kodi mungacite tani bzimwebzi? Nyang’anani mipata kuti muthandize nyakupfunza wanu kuti apfunze makhalidwe ya Yahova, aciwonambo kuti iye ni Mulungu wakukondwa, omwe ambathandiza wanthu omwe ambamufuna. (1 Tim. 1:11; Aheb. 11:6) Muuzeni nyakupfunza wanu kuti an’dzagumana phindu akambaphatisa basa bzomwe akupfunza, nakuti phindu lomwe an’dzaligumanalo limbalatiza kuti Yahova ambamufuna. (Zai. 48:17, 18) Lufoyi lomwe nyakupfunza wanu analo kuna Yahova likakula, iye an’dzafunisisa kucinja bzinthu pa moyo wace. Kuti nyakupfunza ayende patsogolo mpaka kufika pa kubatizidwa, iye an’funika kucita bzinthu bzinango pa moyo wace napo bzikhale bzakunesa. Anyakupfunza winango angafunike kusiya bzinthu bzinango. Azinji angafunike kumalisa uxamwali bomwe anabo na wanthu omwe ambafuna lini Yahova. Winango angalambidwe na adzinza wawo omwe ambafuna lini Mboni za Yahova. Jezu adalewa kuti wanthu omwe an’dzamutewera an’dzasunama lini, thangwe an’dzasimbidwa mwa kukhala na abale wauzimu omwe ambafunana kwene-kwene. — Marko 10:29, 30. w21.06 4-5 ¶8-9

Mpostolo Paulo adandendemezera basa lakupfunzisa wanthu na basa la kulima. Bzomwe bzikufuna kulewa kuti ifepano tin’funika kucita bzizinji sikuti kundobzala basi. Iye adakumbusa Akolinto kuti: “Ine ndidabzala ndipo Apolo adathirizira . . . Imwepo ndimwe munda wa Mulungu omwe ukulimidwa.” (1 Ako. 3:6-9) Ninga alimi wa “munda wa Mulungu,” ifepano timbandobzala lini mbeu koma timbazithirizira na kuwona momwe mbeuzo zikukulira. Tsono timbadziwa kuti omwe ambazikulisa ni Mulungu. Tina mwayi ukulu kwene-kwene wa kupalizira na kupfunzisa wanthu cadidi ca m’Bibliya. Basa limweri limbatidekera kwene-kwene. Mpostolo Paulo, omwe adathandiza wanthu azinji ku Tesalonika kuti akhale anyakupfunza, adafotokoza momwe iye akhabvera pomwe adalewa kuti: ‘Kodi n’ciponi cidikhiro cathu, cikondweso ayai korowa yakusekerera kubwera kwa Mbuya wathu Jezu? Kodi ndimwepo lini? Kulewa cadidi, imwepo ndimwe mbiri na cikondweso cathu.’ — 1 Ates. 2:19, 20; Mab. 17:1-4. w21.07 3 ¶5; 7 ¶17

Yahova adakwewera kwa iye ali-wentse wa ifepano. (Ju. 6:44) Kumbukirani thandauzo la mafala yamweya. Pomwe Yahova akhanyang’anisisa wanthu azinji pa dziko la pantsi, iye adawona cinthu cakufunika kwa imwepo. Iye adawona kuti imwepo ndimwe wabwino ndipo mungamufune. (1 Nkha. 28:9) Yahova ambakudziwani, ambakubvesesani ndipo ambakufunani. Bzimwebzi mpsakutsangalaza kwene-kwene! Yahova ambacita namwe thupo, ndipo ambacitambo thupo na abale pabodzi na mpfumakazi zanu zentse. Kuti tibvesese bzimwebzi, Jezu adandendemezera Yahova na makabusa. Kodi n’ciyani comwe makabusa ambacita bira m’bodzi akataika pa mthithi wa mabira 100? Iye ambasiya ‘mabira 99 ku mapiri aciyenda kukanyang’ana omwe watayikayo.’ Iye akagumana birayo ambamukalipira lini, koma ambakomedwa kwene-kwene. Kodi tikupfunza ciyani pamwepa? Tikupfunza kuti bira ali-wentse ngwakufunika kwa Yahova. Jezu adati: ‘Baba wangu omwe ali kudzulu akufuna lini kuti m’bodzi pa wana ang’onowa ataike.’ — Mat. 18:12-14. w21.06 20 ¶1-2

Tikambakumbukira kuti cidikhiro cathu cakutsogolo n’cakutsimikizika nakuti lufoyi lomwe Mulungu analo kuna ifepano ndakusaya kumala, lufoyi lathu kwa Yahova limbakula ndipo uxamwali bwathu na iye bumbakhala bwakulimba. (Aro. 8:38, 39) Timbalimbikisidwa kutewezera ciratizo ca Jezu. (1 Ped. 2:21) Zikakhala kuti zasala ntsiku zing’ono-ng’ono kuti Cikumbuso cicitike, timbawerenga nkhani za m’Bibliya zomwe zimbalewa bza mdzinga wakumalizira wa Jezu pa dziko la pantsi, kufa kwace na kulamusidwa kwace. Ndipo pa ntsiku ya msindayo, nkhani ya Cikumbuso imbatikumbusa bza lufoyi la Jezu kwa ifepano. (Aef. 5:2; 1 Ju. 3:16) Tikambawerenga na kukumbukira bza ntsembe ya Jezu, timbakhala wakutsimikiza “kucita bzinthu ninga momwe Jezu akhacitira.” (1 Ju. 2:6) Timbafunisisa kupitiriza kukhala axamwali wa Yahova. (Djuda 20, 21) Timbapitiriza kufunidwa na Mulungu tikambacita bzentse bzomwe tingakwanise kuti timubvere, kuti ticenese dzina lace na kumukondwesa. (Mim. 27:11; Mat. 6:9; 1 Ju. 5:3) Kugumanika pa Cikumbuso kumbaticitisa kufunisisa kukhala na moyo omwe umbalatiza kuna Yahova kuti tikufuna ntsiku zentse kupitiriza kufunidwa na iye mpaka kale-kale! w22.01 23 ¶17; 25 ¶18-19

Yahova adatipasa mphaso ya ufulu bwakusankhula. Ifepano tingasankhule kucita bzomwe tikufuna pa moyo wathu. Mulungu wathu wa lufoyi ambakomedwa tikambasankhula kumutumikira. (Sal. 84:11; Mim. 27:11) Ifepano tingaphatise bwino basa ufulu bwathu bwakusankhula mu njira zizinji. Tikatewezera ciratizo ca Jezu, ifepano tingasankhule kuikha pa mbuto yakuyamba bzomwe anzathu ambafuna sikuti bzomwe timbafuna. Ntsiku inango pomwe Jezu na apostolo wace akhadaneta kwene-kwene, iwo adayenda ku mbuto inango ya okha-okha kuti akapume. Tsono bzimwebzi bziribe kucitika. Thimu la wanthu lidawagumana kumweko, ndipo wanthuwo akhafunisisa kupfunzisidwa na Jezu. Tsono Jezu alibe kubva nawo ciya wanthuwo, koma adawabvera ntsisi. Tenepo, kodi Jezu adacita ciyani? ‘Iye adayamba kuwapfunzisa bzinthu bzizinji.’ (Marko 6:30-34) Tikambatewezera Jezu mwakuphatisa basa nthawe yathu na mphanvu zathu kuti tithandize nazo anzathu, timbatumbizisa Baba wathu wa kudzulu. — Mat. 5:14-16. w21.08 3 ¶7-8

Yahova ambakomedwa kuwona bzinthu bzakusiyana-siyana. Umboni bwa bzimwebzi ni bzinthu bzomwe iye adalenga, kuphatanidzambo wanthu. Ali-wentse wa ifepano adasiyana na mwanzace. Ndipopa Yahova ambakundendemezerani lini na wanthu winango. Iye ambawona mtima wanu na unthu bwanu. (1 Sam. 16:7) Iye ambadziwa bzomwe mungakwanise kucita, bzomwe mungakwanise lini kucita na momwe imwepo mudaleredwera. Ndipo iye ambakukumbirani lini kuti mucite bzinthu bzomwe mungakwanise lini kucita. Ifepano tin’funika kutewezera Yahova mwa kumbabziwona ninga momwe iye ambatiwonera. Tikacita bzimwebzi, tin’dzabzikuza lini ayai kubziwona ninga kuti tiribe na basalo. (Aro. 12:3) Ifepano tingapfunze na bziratizo bzabwino bza abale na mpfumakazi zathu wakukhulupirika omwe bzinthu bzikuwafambira bwino mu utumiki. (Aheb. 13:7) Ndipo tingapfunze nawo momwe tingakulisire luso lathu lakupalizira mu utumiki. (Afil. 3:17) Tsono pana kusiyana pakati pa kutewezera bzinthu bzabwino bzomwe munthu akucita na kubzindendemezera na munthuyo. w21.07 20 ¶1-2

Imwepo mungakulise cikhulupiro canu cakuti Mulengi alipo mwa kumbawona bzirombo, miti na nyenyezi. (Sal. 19:1) Mukambapfunza kawiri-kawiri bzinthu bzimwebzi, ibzo bzin’dzakuthandizani kutsimikiza kuti Yahova ni Mulengi. Pomwe mukupfunza bza cirengedwe, mbakhalani tceru kwene-kwene kuti muwone umboni bomwe bukulatiza kuti Mulengi alipo. (Aro. 1:20) Mwa ciratizo, dzuwa limbagaka na kupereka ceza kuti pa dziko la pantsi pakhale na bzinthu bza moyo. Tsono kupsa kunango kwa dzuwa kungadzonge bzinthu. Ndipo wanthufe timbafuna kukhotcereredwa kuti kupsa kumweku kuleke kutidzonga. Ndipo timbakhotcereredwadi! Kodi timbakhotcereredwa tani? Dziko la pantsi lidazunguliridwa na cinthu cakucemeredwa camada de gás ozônio, ndipo cinthuco cimbacepesa mphanvu yakupsako. Pomwe kupsa kwa dzuwa kukuthimizirika, mphanvu yakutikhotcererayo imbathimizirikambo. Tsapano, kodi imwepo mukukhulupira lini kuti alipo munthu omwe adakonza bzimwebzi omwe ni Mulengi walufoyi na wa nzeru? w21.08 17 ¶9-10

Pambuyo pa munthu kubatizidwa, ifepano tin’funika kupitiriza kumufuna na kumulemekeza. (1 Ju. 4:20) Kodi tingacite tani bzimwebzi? Tingacite bzimwebzi mwakuleka kumupenukira. Mwa ciratizo, tikasaya kubvesesa thangwe lomwe acitira cinthu cinango, tin’funika lini kukumbuka kuti iye acita cinthuco na mtima wakufuna kubziwonesa. M’mbuto mwace, tin’funika kumulemekeza m’bale wathuyo na kumuwona kukhala wakutiposa. (Aro. 12:10; Afil. 2:3) Latizani ntsisi na kudeka mtima kuna wanthu wentse. Penu tikufuna kucita mbali ya banja la Yahova mpaka kale-kale, tin’funika kuphatisa basa Fala la Mulungu pa moyo wathu. Mwa ciratizo, Jezu adapfunzisa kuti tin’funika kulatiza ntsisi na kudeka mtima kuna wanthu wentse na anyamadulanthaka wathu kubodzi. (Luka 6:32-36) Tsono nthawe zinango bzimwebzi bzingatinese kucita. Penu n’tenepo, tin’funika kupfunza kukumbuka na kucita bzinthu ninga momwe Jezu akhacitira. Tikambacita ciri-centse comwe tingakwanise kuti tibvere Yahova na kutewezera Jezu, timbalatiza Baba wathu wa kudzulu kuti tikufuna kucita mbali ya banja lace mpaka kale-kale. w21.08 6 ¶14-15

Pfunzani kumbathemba Yahova. Iye akulewa kuti an’dzaticitira bzinthu bzizinji tikamuthemba na kucita nyongo pa kumutumikira. M’Bibliya muna bziratizo bzizinji bza wanthu omwe adabzipereka kuti acite basa la Yahova. Bziratizo bzizinji bzimbalatiza kuti iwo adafunika kucita cinthu pomwe akhanati kutambira bzisimbo bza Yahova. Mwa ciratizo, pomwe Abalahamu akhanati kusimbidwa na Yahova, adasiya mui wace ‘ndipo iye adayenda napo akhadziwa lini komwe akhayendako.’ (Aheb. 11:8) Pomwe Djakobo akhanati kusimbidwa, iye adayamba kumenyana na anjo acisimbidwa bwino. (Ciy. 32:24-30) Pomwe Ajirayeri akhadasala pang’ono kupita mu Dziko Lakupiciridwa, antsembe adafunika kuyamba kuponda m’madzi kuti madziyo yaphwe mu Mkulo wa Joridano kuti wanthu ayambuke. (Djos. 3:14-16) Imwepo mungagumanembo phindu na bziratizo bza abale wa ntsiku zino omwe adathemba Yahova acikwanirisa cakulinga cawo. w21.08 29-30 ¶12-14

Abale na mpfumakazi zacikuliremwe, imwepo mumbadziwa momwe bzinthu bzikhacitikira kale-kale ndipo mumbawonambo kuti mpsakufunika kuzolowera kucinja komwe kukucitika ntsiku zino. Acikulire omwe mwabatizidwa tsapanopa mungathandizembo mu njira zizinji. Maswaka yan’dzakomedwa kubva nkhani zakulewa bza moyo wanu na bzinthu bzomwe mudapfunza. Imwepo “mukakhala wakupasa” mwakuphatisa basa bzomwe mudapfunza pa moyo wanu kuti mupfunzise winango, Yahova an’dzakusimbani kwene-kwene. (Luka 6:38) Acikulire mukakhala wakubverana na maswaka, imwepo mun’dzakwanisa kuthandizana. (Aro. 1:12) Ali-wentse ana cinthu cakufuna comwe mwanzace alibe. Acikulire ana nzeru ndipo ambadziwa bzinthu bzizinji thangwe rakuti adabadwa kale-kale, tsono maswaka yana mphanvu. Maswaka na acikulire akambaphata basa pabodzi mwakubverana, iwo ambatumbizisa Baba wathu wa kudzulu ndipo ambacitisa kuti bzinthu bzifambe bwino m’gwere. w21.09 8 ¶3; 13 ¶17-18

Thangwe ranyi Adjuda azinji adalamba Jezu thangwe ra kafedwe kace? Kuna iwo, Jezu kufera pa muti wakuzunzidwira kukhalatiza kuti ni kapondo na nyapikado, sikuti Mesiya. (Bzak. 21:22, 23) Adjuda omwe adalamba Jezu alibe kuzindikira kuti iye akhali munthu wakusaya kuphonya, akhanamiziridwa ndipo akhacitiridwa bzinthu bzakusaya cirungamo. Ndipo omwe adatonga mulandu wa Jezu, alibe kucita bzinthu bza cirungamo. Ayeruzi wa nyumba ikulu ya mphala ya Adjuda, adafulumiza kutonga mulandu wa Jezu ndipo alibe kuteweza malamulo yakutongera mirandu. (Luka 22:54; Ju. 18:24) M’mbuto mwa kubva mbali zentse za mulandu omwe Jezu akhanamiziridwa na kukhala na umboni bwacadidi, ayeruziwo adanyang’ana ‘umboni bwakunama kuti [aphere] Jezu.’ (Mat. 26:59; Marko 14:55-64) Pomwe Jezu adalamusidwa kwa anyakufa, ayeruzi wakusaya kulungamawo adapereka kobiri zizinji za prata kwa acikunda wa Aroma, omwe akhalindira thenje lace kuti amwaze nkhani yakunama yakufotokoza bzomwe bzidacitika kuti m’thenje mukhale mulibe munthu. — Mat. 28:11-15. w21.05 11 ¶12-13

Yahova angadafuna, angadapfudza dziko lakuipali pa nthawe iri-yentse. Tsono kupirira kwace kukutithandiza kwene-kwene. Kumbukirani ibzi! Mbadwe zentse za Adamu na Eva, izo zimbabadwa zakuperewera. Napo bziri tenepo, Yahova ambazifuna ndipo ambazisamalira ndipo iye adalewa kuti an’dzapfudza dziko lakuipali. (1 Ju. 4:19) Ndipo iye akudziwa kale nthawe yomwe an’dzamalisa kuboneraku. Kodi lufoyi la Yahova limbaticitisa lini kufuna kupitiriza kupirira naye pabodzi? Yahova ni ciratizo cabwino pa nkhani yakupirira. Jezu adatewezera kupirira kwa Baba wace. Pomwe iye akhali pa dziko la pantsi, adapirira pomwe akhalewedwa mafala yakuipa, bzinthu bzakupasisa manyazi na kupirirambo pomwe akhali pa muti wakuzunzidwira kuti atipulumuse. (Aheb. 12:2, 3) Ciratizo ca kupirira kwa Yahova cidalimbikisa Jezu kuti apirire ndipo cingatilimbikisembo. w21.07 12-13 ¶15-17

Ntsiku zentse ifepano timbakwanisa kuwona kuti Baba wathu wa kudzulu ngwa ntsisi. (Sal. 103:10-14) Ateweri wa Jezu akhali wakuperewera, napo bzikhali tenepo, iye akhawabvera ntsisi na kuwalekerera. Iye adakhala wakukonzeka kupereka moyo wace kuti pikado zathu zilekereredwe. (1 Ju. 2:1, 2) Lufoyi lomwe liripo pakati pathu limbakhala lakulimba “[tikambalekererana] na mtima wentse.” (Aef. 4:32) Tsono nthawe zinango bzimbatinesa kulekerera anzathu, tenepo timbafunikira kucita nyongo kuti tikwanise kucita bzimwebzi. Mpfumakazi inango idagumana phindu pomwe idawerenga nkhani ya mu Ntsanza ya Mulindiri yomwe ikhana msolo wakuti “Muzikhululukirana ndi Mtima Wonse.” Mpfumakaziyi idati: “Nkhaniyo idalewa kuti ukalekerera anzako bzin’funa lini kulewa kuti ukukomedwa na bzomwe iwo acitabzo ayai kuti bziribe kukuwawa. Koma kulekerera kumbathandauza kuleka kukoyera cakumtima mwanzako thangwe ra bzomwe aphonyabzo ucipitiriza kukhala na mtendere mu mtima mwako.” Ifepano tikambalekerera abale na mpfumakazi zathu na mtima wentse, timbalatiza kuti timbawafuna ndipo timbatewezera Baba wathu, Yahova. w21.09 23-24 ¶15-16

Jezu akhafuna cadidi cakulewa bza Mulungu na bzomwe iye an’dzacita kutsogolo. Jezu akhakhala na moyo mwakubverana na cadidico ndipo iye adadziwisambo wanthu winango cadidico. (Ju. 18:37) Ateweri wacadidi wa Jezu akhafunambo kwene-kwene cadidi. (Ju. 4:23) Ndipopa Pedru adalewa kuti kunamata kwacikristau ni ‘njira ya cadidi.’ (2 Ped. 2:2) Thangwe ra kufuna kwene-kwene cadidi, Akristau wakuyambirira akhalamba nzeru ya magereja, miyambo na nzeru za wanthu zomwe zimbabverana lini na cadidi ca m’Bibliya. (Akol. 2:8) Ninga momwe adacitira Akristau wakuyambirira, ntsiku zino Akristau wacadidi ambacita nyongo yakufamba m’cadidi mwakuteweza bzomwe ambakhulupira na kucita bzinthu mwakubverana na Fala la Yahova. (3 Ju. 3, 4) Mboni za Yahova zimbalewa lini kuti zimbabvesesa bwino-bwino bzentse bzomwe Bibliya limbalewa. Nthawe zinango izo zidafotokoza kale mwakuphonyeka bzomwe Bibliya limbapfunzisa ayai ziribe kulinganiza bwino bzinthu m’gwere. Tsono nkhaniyo ikafufuzidwa bwino icibveseseka, izo zimbacinja kabvesesedwe kace. w21.10 22 ¶11-12

Ninga momwe malitsito ya mizinda yakale-kale yakhakhotcererera anyakukhala mu mzindamo, tenepombo mabasa ya lufoyi lacadidi ya Yahova yadatizungulira kuti yatikhotcerere mwauzimu ku bzinthu bza ngozi bzomwe bzingayeze kukhulupirika kwathu. Kuthimizira bzimwebzi, lufoyi lacadidi la Yahova limbamucitisa kutifenderera. (Jer. 31:3) Nyakunemba salimo Davide adaphatisa basa ciratizo cinango kuti atithandize kubvesesa momwe Mulungu ambakhotcererera wanthu wace. Iye adanemba kuti: ‘Mulungu ni mbuto yangu yakuthawira, Mulungu omwe ambandilatiza lufoyi lacadidi.’ Pakulewa bza Yahova, Davide adalewa pomwe kuti: ‘Iye ambandilatiza lufoyi lacadidi ndipo ambandikhotcerera, [ni] mbuto yangu yakuthawira na munthu wakundipulumusa, ni cakukhotcera cangu na mbuto yangu yakuthawira.’ (Sal. 59:17; 144:2) Thangwe ranyi Davide adandendemezera lufoyi lacadidi la Yahova na mbuto yakukhotcerereka? Ni thangwe rakuti bziribe basa kuli-kwentse komwe tingakhale pa dziko la pantsi, tikakhala atumiki wace, Yahova nthawe zentse an’dzatikhotcerera kuti tipitirize kukhala pa uxamwali bwabwino na iye. w21.11 6 ¶14-15

Pomwe Jezu na anyakupfunza wace adaphatidwa na conzi mu nyanza, Jezu adaphatisa basa bzomwe bzidacitikabzo kuti awathandize kubvesesa kufunika kwa kulimbisa cikhulupiro. (Mat. 8:23-26) Pomwe conzi ca mphanvu cidayamba ndipo madzi yadayamba kupita m’mwadiya, Jezu akhagona. Pomwe anyakupfunzawo thangwe ra mantha adayenda kukamuuza kuti awapulumuse, Mbuyayo adawatsimula kuti: “Kodi thangwe ranyi mukucita mantha tenepa wanthu wacikhulupiro cakucepamwe?” Kodi imwepo mukugumana na “conzi camphanvu” pa moyo wanu? Pinango imwepo mukubonera thangwe ra malengwa ya pantsi. Ayai pinango mukugumana na conzi cakuyezezera, ninga bvuto likulu la matenda lomwe likukucitisani kukhala na thupo na kusaya kudziwa bzakucita. Tsono lekani kubvuma kuti thupolo likucitiseni kusiya kutumikira Yahova. Mufenderereni mwakucita mpembo na mtima wentse. Limbisani cikhulupiro canu mwa kumbakumbukira nthawe zomwe Yahova adakuthandizani kale m’mbuyomu. (Sal. 77:11, 12) Imwepo mungatsimikize kuti iye an’dzakusiyani lini, ne tsapano, ne kutsogolo. w21.11 22 ¶7, 10

Wanthu winango angakumbuke kuti akacita ciri-centse kuti aleke kutenga cinthu comwe n’cawo lini, iwo ambakhala akubvera lamulo limweri. Tsono, iwo angakhale akuba mu njira zinango. Mwa ciratizo, nyamalonda omwe ambaphatisa basa balantsa ayai mphimo zakusaya kulungama kuti anamize makiliyenti yace, tingalewe kuti akuwabera. Cinembo ca Mwambo 19:13 cimbalatiza kubverana komwe kulipo pakati pa kuba na kukhala wakusaya kulungama pakucita malonda, mwakulewa kuti: “Lekani kubera mwanzanu mwakucita kumunamiza.” Tenepo, kucita bzinthu bzakusaya kulungama pakucita malonda kukundendemezeredwa na kuba. Napo kuti lamulo lacisere limbandofotokoza bza kuba, nfundo zakuthimizirika zakugumanika m’bukhu la Mwambo zimbatithandiza kubvesesa momwe tingaphatisire basa nfundo ikulu ya lamulo limweri. Ifepano tingagumane phindu tikakumbukira momwe Yahova ambaiwonera nkhani yakukhala wakusaya kulungama na kuba. Tin’funika kubzibvunza tekha kuti: ‘Mwakubverana na nfundo za pa Mwambo 19:11-13, kodi pana cinthu pa moyo wangu comwe ciri lini bwino? Kodi nin’funika kucinja momwe nimbacitira malonda yangu ayai momwe nimbaphatira basa?’ w21.12 9-10 ¶6-8

Pomwe mukucita mpembo wa pamwekha, mbakumbukirani bzinthu bzomwe mwaphonya ntsiku imweyo, ndipo mbakumbirani Yahova kuti akulekerereni. Tsono mukacita pikado ikulu, mun’funika kukumbira akulu kuti akuthandizeni. Akuluwo an’dzakutetekerani, ndipo mwa lufoyi an’dzakupasani malango yakucokera m’Fala la Mulungu. Iwo an’dzapemba namwe pabodzi, acikumbira kuti Yahova akulekerereni mwakuphatisa basa ntsembe ya Jezu kuti ‘mucirisidwe’ mwauzimu. (Tiy. 5:14-16) Ndipo bzingakhalembo bwino kumbakumbukira bza cakulombolera. Imwepo bzingakuwawenimbo mukakumbukira kuti Mwana wa Mulungu adabonera kwene-kwene. Tsono mukakumbukira ntsembe yomwe Jezu adapereka, lufoyi lanu kwa iye na kwa Baba wace lin’dzakula kwene-kwene. Gole liri-lentse timbakulisa kutenda kwathu cakulombolera mwa kugumanika pa msinda wakukumbukira infa ya Jezu, na mwakuphata basa na nyongo pa kucemerera wanthu azinji kuti adzagumanikembo pa msindayo. Yahova adatipasa mwayi ukulu kwene-kwene wakuti timbapfunzise wanthu winango pakulewa bza Mwana wace! w21.04 18-19 ¶13-16

Kumbukirani kuti Jezu adabva tani pomwe wanthu adabwera kuna iye pa phiri. Jezu adaphuphudza akupemba. Bzikuwoneka kuti akhadaneta kwene-kwene, tsono pomwe adawona wanthuwo, iye adawabvera ntsisi thangwe akhali wakusauka ndipo pinango winango akhaduwala. Iye alibe kundolimbisa omwe akhaduwala koma adafotokozera wentse nkhani yakulimbikisa kwene-kwene, kuposa nkhani zentse, yomwe imbacemeredwa kuti Nkhani ya pa Phiri. (Luka 6:12-20) Jezu akhacezambo na wanthu napo pa nthawe yomwe akhafuna kukhala payekha. Kodi mukukumbuka kuti Jezu adabva tani pomwe adabva kuti xamwali wace, Juwau Batista, aphedwa? Bibliya limbalewa kuti: “Pomwe adabva bzimwebzi [bzakuti Juwau wafa], Jezu adacoka kumweko na mwadiya aciyenda kwa yekha-yekha.” (Mat. 14:10-13) Tsono mthithi ukulu wa wanthu udafikiratu komwe iye akhayendako pomwe iye akhanati kufika. (Marko 6:31-33) Jezu adazindikira kuti wanthuwo akhafuna kuthandizidwa na kutsangalazidwa na mafala ya Mulungu ndipopa iye adayambiratu kucita bzimwebzo. — Luka 9:10, 11. w22.02 21 ¶4, 6

Kodi n’ciyani comwe tin’funika kucita tikazindikira kuti takalipisa m’bale wathu wacikristau? Ifepano tin’funika kupemba kwa Yahova na mtima wathu wentse kuti asimbe nyongo yathu yakufuna kukhazikisa mtendere na m’bale wathuyo. Tin’funika kukhala na nthawe yakukumbukira bzomwe tin’funika kucita. Tingabzibvunze mibvunzo ninga iyi: ‘Kodi ndine wakukonzeka kulewa kuti ndaphonya ndine, ticikhazikisa mtendere? Kodi Yahova na Jezu an’dzabva tani inepano ndikayambisa maceza yakukhazikisa mtendere na m’bale wangu ayai mpfumakazi yangu?’ Mitawiro yathu ingaticitise kubvera Jezu ndipo mwakubzicepesa tingafenderere m’bale wathu wacikristau kuti tikhazikise mtendere. Pomwe tikuyenda kukafotokozerana na m’bale wathu bzomwe taphonyerana, tin’funika kucita bzimwebzo na mtima wakubzicepesa. (Aef. 4:2, 3) Ifepano tin’funika kufenderera munthu omwe tamukalipisayo na cakulinga cakufuna kumalisa ukali bwace. Kumbukirani kuti kukhazikisa mtendere na m’bale wanu n’kwakufunika kwene-kwene kuposa kuyezera kudziwa kuti mbani ana lazau ndipo mbani waphonya. — 1 Ako. 6:7. w21.12 26 ¶13-16

Jezu akhadasunama thangwe akhadziwa kuti napo akhadatambiridwa bwino mu Jeruzalemu, Adjuda azinji angadabvuma lini mafala ya Umambo yomwe iye akhapalizira. Thangwe ra bzimwebzi, mzinda wa Jeruzalemu ungadapfudzidwa ndipo Mdjuda ali-wentse omwe angadapulumuka angadakhala kapolo. (Luka 21:20-24) Ndipo bzakupasa ntsisi mpsakuti bzentse bzomwe Jezu adalewa bzidacitikadi tenepo. Kodi n’ciyani comwe wanthu azinji ambacita kwanuko mukawapalizira mafala ya Umambo? Penu mbang’ono-ng’ono omwe ambabvuma cadidi comwe mumbapalizira, kodi n’ciyani comwe imwepo mungapfunze na kulira komwe Jezu adacita? Yahova ambacita thupo na wanthu. Kulira komwe Jezu adacita kumbatithandiza kuwona kuti Yahova ambacita thupo kwene-kwene na wanthu. Iye “an’funa lini kuti munthu ali-wentse adzapfudzidwe, koma an’funa kuti wanthu wentse akungule.” (2 Ped. 3:9) Ntsiku zino, ifepano tingalatize kuti timbafuna anzathu mwa kucita nyongo yakupalizira mafala yabwino mwakuphata mtima. — Mat. 22:39. w22.01 16 ¶10-12

Cikhulupiro canu cin’dzalimba mukambakumbukira momwe Yahova adathandizira wanthu wace na momwe iye adakuthandiziranimbo kale m’mbuyomu. Tsono kuposa khalidwe liri lentse, lufoyi lin’dzaticitisa kubvera Yahova, kucita ciri-centse kuti timukondwese na kupirira mabvuto yentse yomwe timbagumana nayo. (Mat. 22:37-39; 1 Ako. 13:4, 7; 1 Ju. 5:3) Palibe cinthu cakufunika kwene-kwene kuposa kukhala pa uxamwali bwakulimba na Yahova! (Sal. 63:1-8) Kumbukirani kuti kupemba, kupfunza na kukumbukira bzimbacita mbali ya kunamata kwathu. Ninga Jezu, mbanyang’anani nthawe na mbuto yakuderekha kuti mumbapembe, kupfunza na kukumbukira. Cosani bzinthu bzomwe bzimbakuceukisani. Mbakumbirani Yahova kuti akuthandizeni kumbakhala tceru pomwe mukucita bzinthu bzauzimu. Imwepo mukaphatisa bwino basa nthawe yanu tsapano lino, Yahova an’dzakusimbani na moyo wakusaya kumala mu dziko lipsa la Mulungu. — Marko 4:24. w22.01 31 ¶18-20

Bzomwe ifepano timbacita bzimbatsogoleredwa na nzeru zathu. Ndipopa Jezu adatipfunzisa kuti tileke kumbakumbuka bzinthu bzomwe bzingaticitise kucita pikado ikulu. (Mat. 5:21, 22, 28, 29) Ifepano tin’funa kukondwesa Baba wathu wakudzulu, ndibzo lini? Ndipopa, tin’funika kucoseratu nzeru zakuipa zomwe zingabwere mu mtima mwathu! Jezu adalewa kuti: “Ciri-centse comwe cimbacoka na pa mulomo cimbacokera mu mtima.” (Mat. 15:18) Mafala yathu yambalatiza unthu bwathu. Ndipopa bzibvunzeni kuti: ‘Ndikabvunzidwa nkhani, kodi nimbalewa cadidi, napo kuti kucita bzimwebzo kungacitise kuti bzinthu bzileke kundifambira bwino? Kodi nimbatcenkha kulewa mafala yomwe yangalatize kuti nimbafuna munthu omwe ni mwamuna ayai ni mkazi lini wangu? Kodi nimbatcenkha kulewa mafala yakutukwana? Munthu akandikalipisa, kodi nimbamutawira mwakugwa mpfuwa?’ Kukumbukira bwino-bwino mibvunzo imweyi kun’dzakuthandizani kwene-kwene. Mukambalewalewa mafala yakuipa bzingakhale ninga mukusona cakubvala ca unthu bwakale. Mukacita bzimwebzi mun’dzapitiriza kukhala na unthu bwakalebo. Tsono mukambacita nyongo yakutcenkha mafala yakutukwana na yakunama pomwe mukuceza, mun’dzakwanisa kukhundula unthu bwakale. w22.03 5 ¶12-14

Wanthu omwe ambanyang’ana malango bzinthu bzin’dzawafambira bwino kusiyana na omwe ambacita kudikhira kupasidwa malango. Ndipopa, citani ciri-centse kuti mumbakumbire malango. Kodi ni pa nthawe iponi pomwe tingakumbire malango kwa Akristau anzathu? Kumbukirani ibzi: (1) Mpfumakazi ikukumbira mpfumakazi inango yomwe ina luso kuti acitise nayo pabodzi pfunziro la Bibliya. Pomwe amala kucitisa pfunziro la Bibliyalo, iyo ikukumbira mpfumakazi yomwe ina lusoyo kuti ifotokoze bzomwe angacite kuti akhale mpfunzisi wabwino. (2) Mpfumakazi yomwe iri lini pa banja ikufuna kugula bzakubvala, ndipopa, iyo ikukumbira mpfumakazi inango yomwe njakukhwima mwauzimu kuti imuthandize kuwona penu bzakubvalabzo mpsabwino ayai ne. (3) M’bale wauzidwa kuti akafotokoze nkhani ya m’Bibliya kakuyamba. Iye akukumbira m’bale omwe ana luso, kuti amutetekere bwino-bwino pomwe iye akufotokoza nkhani yace, nakuti akamala, amuuze bzinthu bzomwe an’funika kucita kuti ambafotokoze bwino nkhani. Napo m’bale omwe wamala magole mazinji akufotokoza nkhani, angacite bwino kumbakumbirambo abale winango omwe ana luso kuti amupase malango, aciphatisa basa malango yawoyo. — Mim. 19:20. w22.02 13 ¶15-17

Yahova ambatifuna ndipo ambatithandiza ninga momwe adafunira Jezu na kumuthandiza pa nthawe yomwe akhagumana na mabvuto pomwe akhacita utumiki bwace pa dziko la pantsi. (Ju. 5:20) Iye adathandiza Jezu kuti apitirize kukhala na cikhulupiro cakulimba na kumupasa bzomwe akhafunikira. Yahova adauza Mwana wace kuti ambamufuna na kukomedwa naye. (Mat. 3:16, 17) Jezu alibe kubzibva kuti akhali yekha thangwe akhakhulupira kuti Baba wace walufoyi angadamuthandiza. Tentsenefe timbawona momwe Yahova ambatilatizira lufoyi mu njira zakusiyana-siyana, ninga momwe adacitira na Jezu. Ndokumbukirani: Yahova adatibvuma kuti tikhale axamwali wace ndipo adatipasa abale na mpfumakazi azinji wa lufoyi omwe ambatikondwesa na kutilimbikisa tikakhala tidasunama. (Ju. 6:44) Yahova ambatipasambo bzinthu bzomwe timbafuna kuti tipitirize kukhala na cikhulupiro cakulimba. Ndipo iye ambatithandizambo kugumana bzinthu bzomwe timbafunikira pa moyo wathu kuti tikhale na moyo. (Mat. 6:31, 32) Tikambakumbukira kuti Yahova ambatifuna, lufoyi lathu kuna iye limbathumizirika. w21.09 22 ¶8-9

Kodi moyo wanu ukhali tani pomwe mukhanati kuyamba kupfunza Bibliya na Mboni za Yahova? Azinji wa ifepano timbafuna lini na pang’onopo kukumbukira nthawe imweyo. Pa nthaweyo ifepano tikhatewezera wanthu wa m’dzikoli. Bzomwe iwo akhalewa kuti mpsabwino ifepano tikhabziwona ninga bzabwino ndipo bzomwe akhalewa kuti mpsakuipa tikhabziwonambo ninga bzakuipa. Ndipopa, tingalewe kuti ‘tikhalibe cidikhiro ndipo tikhalibe Mulungu m’dzikoli.’ (Aef. 2:12) Tsono pomwe tidayamba kupfunza Bibliya moyo wathu udacinja! Pomwe imwepo mukhapfunza Bibliya, mudazindikira kuti muna Baba omwe ambakhala kudzulu, omwe ambakufunani kwene-kwene. Ndipo mudazindikirambo kuti penu mun’funa kukondwesa Yahova na kucita mbali ya atumiki wace, mun’funika kucinja moyo wanu na nzeru zanu. Imwepo mudayamba kupfunza bzomwe Yahova ambafuna na kutcenkha kucita bzakuipa. (Aef. 5:3-5) Yahova ni Mulengi wathu na Baba wathu, ndipopa iye ana ugo bwakutiuza bzakucita. Iye ambafuna kuti pomwe tikanati kubatizidwa, “[tikhundule] unthu bwakale na bzicito bzace.” w22.03 2 ¶1-3

Mabira manango yambakomedwa kuyenda ku Cikumbuso, kuwona bzomwe bzikucitika na kukumbukirambo bza cidikhiro cawo. Iwo ambafunisisa kubva nkhani ya Cikumbuso, napo kuti nkhaniyo imbafotokoza kwene-kwene bzomwe Kristu na amambo anzace wakukwana 144 000 an’dzacitira wanthu wakukhulupirika mkati mwa Utongi bwa Magole 1000. Mwakutsogoleredwa na Mambo Jezu Kristu, wale omwe an’dzatonga naye pabodzi an’dzathandiza kukonza dziko la pantsi kuti likhale paraizo na kuthandiza wanthu wakubvera kukhala wakulungama. Mpsakudekeza kwene-kwene kuna mamidyau ya wanthu kugumanika pa Cikumbuso kuti akumbukire bza kukwanisika kwa mapolofesiya ya m’Bibliya, ninga yomwe yali pa Zaiya 35:5, 6; 65:21-23; na Apokalipse 21:3, 4. Iwo akambabzikumbukira kuti ali mu dziko lipsa pabodzi na adzinza wawo, ambalimbisa cidikhiro cawo ca kutsogolo na kufunisisa kwawo kupitiriza kutumikira Yahova. — Mat. 24:13; Agal. 6:9. w22.01 21 ¶5-7

Kodi cakulombolera n’ciyani? Cakulombolera ni pereso yomwe Jezu adapereka kuti alombole moyo omwe Adamu adaluza. (1 Ako. 15:22) Thangwe ranyi tikhafunikira cakulombolera? Thangwe ra mitemo yakulungama ya Yahova, ninga yomwe ikhali mu lamulo lomwe iye akhadalipereka kwa Ajirayeri lakuti moyo kulipira moyo. (Kuf. 21:23, 24) Adamu adaluza moyo wace wakulungamiratu. Kuti ateweze cilungamo ca Mulungu, Jezu adapereka moyo wace wakulungamiratu. (Aro. 5:17) Mwa njira imweyi, iye angadakhala ‘Baba Wamuyaya’ kuna wentse omwe ambakhulupira cakulombolera. (Zai. 9:6; Aro. 3:23, 24) Jezu adakhala wakukonzeka kupereka moyo wace thangwe ra lufoyi likulu kuna Baba wace na kuna ifepano kubodzi. (Ju. 14:31; 15:13) Na lufoyi limweri, iye adatsimikiza kupitiriza kukhala wakukhulupirika mpaka moyo wace wentse, kuti bzomwe Baba wace akhafuna bzikwanisike. Bzomwe Jezu adacitabzi, bzidacitisa kuti bzomwe Yahova akhafuna kuna wanthu pa dziko la pantsi bzikwanisike. w21.04 14 ¶2-3