Abril

Jezu adalatiza lufoyi likulu mwa kupereka moyo wace kuti atipulumuse. (Ju. 15:13) Tingakwanise lini kubwezera lufoyi lomwe Yahova na Jezu adatilatiza. Koma tingalatize kutenda kwathu mwa bzomwe timbacita pa moyo wathu ntsiku zentse. (Akol. 3:15) Cakulombolera ni cinthu cakufunika kwene-kwene kuna anyakudzozedwa, thangwe ico cimbacitisa kuti iwo akhale na cidikhiro cakuyenda kudzulu. (Mat. 20:28) Thangwe ra kukhulupira ntsembe ya Kristu, Yahova ambawawona kuti mbakulungama ndipo adawacitisa kukhala wana wace. (Aro. 5:1; 8:15-17, 23) Mabira manango yambatendambo cakulombolera. Pakuti ana cikhulupiro pa ntsembe ya Kristu, iwo ambawonedwa kuti mbakucena pamaso pa Mulungu, mwakuti angamucitire mabasa yakucena ndipo ana cidikhiro ca kudzapulumuka pa “citsautso cikulu.” (Apok. 7:13-15) Magrupo mawiriya yambalatiza kutenda cakulombolera mwa kuyenda ku Cikumbuso gole liri-lentse. w22.01 23 ¶14-15 Kuwerenga Bibliya pa nthawe ya Cikumbuso: (Bzomwe bzidacitika pa ntsiku ya: Nisani 10) Mateu 21:18, 19; 21:12, 13; Juwau 12:20-50

Jezu adawawidwa na bzinthu bzomwe adanamiziridwa kuti aphedwe. Iye adanamiziridwa kuti akhanyoza Mulungu, ayai dzina la Mulungu. (Mat. 26:64-66) Bzimwebzi bzidamuwawa kwene-kwene, mwakuti iye adakumbira Baba wace kuti aleke kulekerera wanthu kuti amupasise manyazi mwa njira imweyi. (Mat. 26:38, 39, 42) Jezu akhafunikira kufa kuti atsudzule Adjuda thangwe ra themberero lawo. (Agal. 3:10) Adjuda adakhala wakutembereredwa thangwe rakuti iwo akhadalewa kuti angadabvera lamulo la Mulungu. Tsono iwo alibe kudzateweza lamulolo. Na thangwe limweri, kuthimizira pa nkhani yakuthemera kufa thangwe ra kukhala mbadwe za Adamu, Adjudawo adabzikolomolera pomwe pikado inango. (Aro. 5:12) Lamulo la Mulungu likhalewa kuti munthu omwe an’cita pikado yakuthemera kufa, akhafunika kuphedwa. Patsogolo pace, thupi la munthuyo likhafunika kumanikidwa pa muti. (Bzak. 21:22, 23; 27:26) Tenepo, kumanikidwa kwa Jezu pa muti, kudacitisa kuti Adjudawo agumane phindu na ntsembe yace. w21.04 16 ¶5-6

Kumbukirani ntsiku yakumalizira ya moyo wa Jezu pa dziko la pantsi. Aroma adamumenya kwene-kwene. (Mat. 26:52-54; Ju. 18:3; 19:1) Iwo adamupfumbula na ntcamu omwe adaukonza, omwe ukhacitisa kuti thupi la Jezu litemeke-temeke kwene-kwene. Napo kuti kumbuyo kwa Jezu kukhadatemeka-temeka, acikundawo adamungingimiza kunyamula muti wakulemera kwene-kwene. Jezu adayamba kukwekweta mutiyo kuti ayende nawo ku mbuto yomwe angadamuphera. Tsono mu njira, acikunda wa Aromawo adauza mwamuna munango kuti anyamule mutiyo. (Mat. 27:32) Pomwe Jezu adafika pa mbuto yomwe angadafera, acikundawo adamukhomerera manja na minyendo pa mutipo. Kulemera kwa thupi la Jezu kudacitisa kuti bzironda bzomwe akhadakhomereredwa na maperego bzikule. Axamwali wace adadandaula, mai wace adalira, tsono atongi wa Adjuda akhamuseka na kumunyoza. (Luka 23:32-38; Ju. 19:25) Jezu adamala nthawe izinji akubva kuwawa kwene-kwene. Thangwe ra momwe thupi lace likhaliri, mtima na masapi yace bzikhaphata lini bwino basa, ndipo akhatazira kupuma bwino-bwino. Pomwe iye akhadasala pang’ono kumalizika, adacita mpembo wace wakumalizira. Ndipo patsogolo pace, iye adatsulimisa msolo wace acimalizika. (Marko 15:37; Luka 23:46; Ju. 10:18; 19:30) Tikupenukira lini kuti infa ya Jezu idakhala ya pang’ono-pang’ono, yakuwawa na yakupasa manyazi! w21.04 16 ¶4

Jezu adauza apostolo 11 wakukhulupirika bza mipangano miwiri, mpangano upsa na mpangano wa Umambo. (Luka 22:20, 28-30) Mipangano imweyi idafungula njira yakuti apostolowo na wanthu winango adzakhale amambo na antsembe kudzulu. (Apok. 5:10; 14:1) Anyakudzozedwa wakusala, omwe ambacita mbali ya mipangano imweyi, ndiwo an’funika kudya pau na kumwa vinyu pa Cikumbuso. Yahova adawapasa cidikhiro cabwino kwene-kwene, cakukakhala kudzulu na moyo wakusaya kufa ne kudzongeka, kukaphata basa pabodzi na Jezu omwe adalamusidwa, kukaphata basa pabodzi na anzawo wa 144 000 omwe ali kale kudzulu, ndipo kuposa bzentse, kukakhala pabodzi na Yahova Mulungu! (1 Ako. 15:51-53; 1 Ju. 3:2) Anyakudzozedwa ambadziwa kuti an’funika kupitiriza kukhala wakukhulupirika mpaka kufa kwawo. — 2 Tim. 4:7, 8. w22.01 21 ¶4-5

Akapondo awiri akhadakhomereredwambo pa miti yakuzunzidwira pabodzi na Jezu. (Luka 23:40, 41) M’bodzi wa iwo adawuza Jezu kuti: ‘Mudzandikumbukirembo ine mukadzapita mu Umambo bwanu.’ (Luka 23:42) Thangwe ra kudziwa kuti pai wace ngwantsisi, Jezu adauza kapondo omwe akhadasala pang’ono kufayo mafala yomwe yadamupasa cidikhiro. (Sal. 103:8; Aheb. 1:3) Yahova ngwakukonzeka kutilekerera na kutibvera ntsisi tikakungula bzinthu bzakuipa bzomwe tidacita m’mbuyo. Tsono kuti iye acite bzimwebzi, ifepano tin’funika kukhala na cikhulupiro cakuti an’tilekerera pikado zathu kucokera mu ntsembe ya Jezu Kristu. (1 Ju. 1:7) Pinango wanthu winango bzingawanese kukhulupira kuti Yahova angawalekerere. Penu nthawe zinango imwepo mumbabzibvambo tenepoyo, kumbukirani ibzi: Pomwe Jezu akhadasala pang’ono kufa, iye adabvera ntsisi kapondo omwe adalatiza kuti akhayamba kumukhulupira. Tsono tani pakulewa bza Yahova, kodi iye angabverembo lini ntsisi atumiki wace wakukhulupirika? — Sal. 51:1; 1 Ju. 2:1, 2. w21.04 9 ¶5-6

Thangwe ra kukhala wakukhulupirika mpaka infa, Jezu adacita bzinthu bzizinji. Cakuyamba, iye adalatiza padeca kuti Sathani ni nyakunama. Jezu adalatiza kuti munthu wakulungamiratu angadapitiriza kukhala wakukhulupirika napo aciyezedwa tani na Sathani. Caciwiri, Jezu adapereka moyo wace ninga cakulombolera. Mwakucita bzimwebzi, Jezu adacitisa kuti bzikwanisike kuti wanthu wakuperewera akhale axamwali wa Mulungu, acikhala na cidikhiro cakudzakhala mpaka kale-kale. Cacitatu, Jezu adalatiza kuti Yahova ni mtongi wakulungama, ndipo adakhotcerera dzina lace kuti lireke kupswipizidwa. Ntsiku iri-yentse yomwe muna moyo mun’funika kumbawona kukhala ninga ntsiku yanu yakumalizira yakulatiza kuti ndimwe wakukhulupirika kwa Yahova na wakuthemera moyo wakusaya kumala!” Napo tife, tin’dzakwanisa kulewa kuti: “Yahova inepano ndidacita ciri-centse comwe ndidakwanisa kuti ndipitirize kukhala wakukhulupirika kwa imwe nakuti ndilatize kuti Sathani ni nyakunama, ndipo ndidakhotcerera mbiri yanu na kuthandizirambo utongi bwanu!” w21.04 12 ¶13-14

Jezu adanamiziridwa mulandu omwe alibe kuucita. Patsogolo pace adasekedwa, adaboneresedwa mwakuti bwerani mudzawone, acikhomereredwa pa muti wakuzunzidwira. Adamukhomerera manja na minyendo yace. Thangwe ra bzimwebzi, bzikhamunesa kupuma na kulewalewa. Tsono iye akhafunika kulewalewa thangwe ra kuti akhana bzinthu bzakufunika kuti alewe. Kulewa cadidi, tingapfunze cinthu cakufunika kwene-kwene na mafala yakumalizira ya Jezu! Mafalayo yambatikumbusa kuti tin’funika kumbalekerera wanthu winango akatiphonyera na kukhulupira kuti Yahova an’dzatilekererambo tikaphonya. Tina mwayi ukulu wakukhala na abale na mpfumakazi omwe mbakukonzeka kutithandiza. Tenepo, tikawona kuti tikufunikira thandizo, tin’funika kuwakumbira kuti atithandize. Ifepano timbadziwa kuti Yahova an’dzatithandiza kupirira mabvuto yali-yentse yomwe yangabwere. Tawona kuti ntsiku iri-yentse yomwe tin’khala na moyo, timbawone kukhala ninga mwayi wathu wakumalizira wakulatiza kuti ndife wanthu wakukhulupirika, ticikhulupirambo kuti moyo wathu udakhotcerereka m’manja mwa Yahova. w21.04 8 ¶1; 13 ¶17

Kutewera nzayo za Jezu kun’dzatithandiza kukhala na moyo wakusaya kumala. Pomwe tswaka lakudala lidabvunza bzomwe likhafunika kucita kuti lidzatambire moyo wakusaya kumala, Jezu adalitawira kuti: ‘Ubwere udzakhale mteweri wangu.’ (Mat. 19:16-21) Jezu adauza Adjuda winango omwe akhamukhulupira lini kuti: “Mabira yangu . . . yambanditewera. [Ndipo] nin’dzayapasa moyo wakusaya kumala.” (Ju. 10:24-29) Ifepano timbalatiza kuti timbakhulupira Jezu mwa kuphatisa basa bzomwe iye adapfunzisa, na kutewezera bzomwe iye adacita. Tikacita bzimwebzi, ifepano tin’dzapitiriza kufamba mu njira yomwe ikuyenda ku moyo wakusaya kumala. (Mat. 7:14) Tikanati kutewera nzayo za Jezu na pafupi, cakuyamba tin’funika kumudziwa. Kudziwa Jezu ni cinthu comwe tin’funika kupitiriza kumbacita pa moyo wathu. Tin’funika kupitiriza kupfunza bzinthu bzizinji pakulewa bza iye, bzomwe bzimbaphatanidza kudziwa makhalidwe yace, makumbukidwe yace na momwe akhacitira bzinthu. Bziribe basa kuti tamala nthawe itali tani tikutumikira Yahova, tin’funika kupitiriza kumudziwa bwino Yahova pabodzi na Mwana wace. w21.04 4 ¶9-10

Pa nthawe inango mpostolo Paulo alibe kubzibva bwino thangwe ra kukumbukira bzinthu bzomwe adacita pomwe akhanati kukhala Mkristau. Ndipopa iye adabzilewa kuti akhali ‘nyapikado mkululetu.’ (1 Tim. 1:15) Pomwe Paulo akhanati kupfunza cadidi iye adaboneresa Akristau m’mizinda yakusiyana-siyana. Winango wa iwo adawaikha m’kawoko ndipo adatawiriza kuti winango aphedwe. (Mab. 26:10, 11) Kodi mukukumbukira momwe Paulo angadabvera bzingadakhala kuti awona Mkristau tswaka, omwe abereki wace adaphedwa thangwe rakuti iye adabvuma kuti bzimwebzo bzicitike? Paulo adakhumbula thangwe ra bzinthu bzakuipa bzomwe iye adacitabzi, tsono iye akhadziwa kuti palibe comwe angadacita kuti acinje bzimwebzo. Pauloyo adabvuma kuti Kristu adafera iye, ndipopa iye adanemba mwakutsimikiza kuti: ‘Mwa kudeka mtima kukulu kwa Mulungu ndidakhala ninga momwe ndiririmu.’ (1 Ako. 15:3, 10) Kodi tikupfunza ciyani na nkhani imweyi? Bvumani kuti Kristu adakuferani, ndipo adacitisa kuti bzikwanisike kuti imwepo mukhale pa uxamwali na Yahova. (Mab. 3:19) Bzinthu bzakufunika kwa Mulungu, ni bzomwe tikucita tsapano na bzomwe tin’dzacita kutsogolo, sikuti bzomwe tidaphonya kale-kale. — Zai. 1:18. w21.04 22 ¶11

Napo kuti Adjuda azinji mu nthawe ya Jezu akhadikhirira lini kuti Mesiya akhafunika kufa, onani bzomwe Bzinembo bzikhadalewa kale: ‘Iye adataya moyo wace mu infa ndipo adawonedwa ninga m’bodzi wa anyakuphonya, iye adanyamula pikado za wanthu azinji ndipo adapirira kuti athandize anyakuphonya.’ (Zai. 53:12) Tenepo, Adjuda akhalibe mathangwe yakulambira Jezu pomwe iye akhaphedwa ninga nyapikado. Ntsiku zino, ifepano tingatcenkhe kuluza cikhulpiro cathu mwa kukhala na umboni bwa cadidi pa nkhani yomwe tabva. Pa nkhani yace ya pa phiri, Jezu adauza wanthu omwe akhamutetekera kuti ‘wanthu winango an’dzalewa bzinthu bzakuipa bzakusiyana-siyana’ pakulewa bza iwo. (Mat. 5:11) Bzinthu bzakunamabzo bzimbacokera kwa Sathani. Iye ambaphatisa basa apanduki kuti amwaze magunkha pakulewa bza wanthu omwe ambafuna cadidi. (Apok. 12:9, 10) Tin’funika kumbalamba magunkha yomwe yambamwazidwa na anyamadulanthaka wathu. Ndipo tin’funikambo lini kubvuma kuti magunkhayo yaticitise kukhala na mantha ayai kutitazisa kukhala na cikhulupiro cakulimba. w21.05 11 ¶14; 12 ¶16

Thandizani nyakupfunza wanu wa Bibliya kuti ambathembe Yahova. Jezu adauza anyakupfunza wace kuti Yahova angadadzawathandiza thangwe ambawafuna. (Mat. 10:19, 20, 29, 30) Kumbusani nyakupfunza wanu kuti Yahova an’dzamuthandizambo. Imwepo mungamuthandize nyakupfunza wanu mwa kumbapemba naye pabodzi, muciguma cakulinga comwe iye anaco. Franciszek, omwe ambakhala ku Polônia, adalewa kuti: “Nthawe zizinji mpfunzisi wangu akhambaguma mu mpembo bzinthu bzomwe ndikufuna kucita. Pomwe ndidawona kuti Yahova akhatawira mipembo ya mpfunzisi wangu, mwakamfulumize ndidayambambo kumbapemba. Ndidawona kuti Yahova adandithandiza pomwe ndidakumbira kuti ndileke kumbayenda ku basa ntsiku zinango kuti nimbayende ku mitsonkhano ya gwere na ku mtsonkhano wacigawo.” Yahova ambacita thupo kwene-kwene na nyakupfunza wathu wa Bibliya. Iye ambatenda kwene-kwene basa lomwe atumiki wace ambalicita na nyongo kuti athandize wanthu kuti akhale naye pa uxamwali ndipo Yahovayo ambafuna atumiki wacewo thangwe ra bzomwe ambacitabzi. (Zai. 52:7) Penu mukalibe pfunziro la Bibliya, imwepo mungathandize nyakupfunza wa Bibliya kuyenda patsogolo acifika pa kubatizidwa mwa kuperekeza anzanu ku mapfunziro yawo ya Bibliya. w21.06 7 ¶17-18

Ifepano tingalatize kuti timbatenda mwayi umweyu wakukhala na Bibliya tikambaliwerenga nthawe zentse. Tin’funika kukhala na ndandanda yakumbawerenga na kupfunza Bibliya, sikuti kumbaliwerenga tikakhala na nthawe. Tikambapfunza Bibliya nthawe zentse, cikhulupiro cathu cin’dzapitiriza kukhala cakulimba. Mwakusiyana na ‘wanthu wanzeru na wakuzindikira’ wa dzikoli, ifepano tina cikhulupiro cakucokera m’Fala la Mulungu. (Mat. 11:25, 26) Bibliya limbatiuza thangwe race bzinthu bzikuyenda bziciipiratu pa dziko la pantsi na bzomwe Yahova an’dzacita na bzinthubzo. Tenepo, mbatitsimikizeni kulimbisa cikhulupiro cathu na kucita ciri-centse comwe tingakwanise kuti tithandize wanthu azinji kukhulupira kuti Mulengi alipo. (1 Tim. 2:3, 4) Ndipo mbatipitirizeni kunyang’ana kutsogolo pa nthawe yomwe wanthu wentse pa dziko la pantsi an’dzatumbiza Yahova mwakulewa mafala ya pa Apokalipse 4:11 yakuti: “Ndimwe wakuthemera imwe Yahova Mulungu wathu, kupasidwa ulemerero . . . thangwe mudalenga bzinthu bzentse.” w21.08 19 ¶18-20

Pakuti akulu wa gwere ni abusa, iwo ana udindo bwakupereka malango bzikafunikira. Iwo angayezere kupereka malango yabwino na yomwe yan’dzacitisa kuti “mtima ukondwe.” (Mim. 27:9) Akulu wa gwere ambafuna abale na mpfumakazi zawo. Ndipo nthawe zinango, iwo ambalatiza lufoyi limweri mwakupereka malango kwa munthu omwe akucita cinthu comwe cingamuyendese mu njira yakuipa. (Agal. 6:1) Tsono pomwe mkulu wa gwere akanati kulewalewa na munthuyo, iye an’funika kukumbukira bzomwe mpostolo Paulo adalewa pa nkhani ya lufoyi. Iye adati: “Lufoyi limbapirira ndipo ndakudeka mtima. . . . Limbampsinkha bzinthu bzentse, limbakhulupira bzinthu bzentse, limbadikhira bzinthu bzentse ndipo limbapirira bzinthu bzentse.” (1 Ako. 13:4, 7) Kukumbukira bwino-bwino mavesi yamweya kun’dzathandiza mkuluyo kuwona thangwe lomwe akuperekera malangoyo na kuwona penu akuyapereka thangwe ra lufoyi. M’bale omwe akuuzidwa malangoyo akawona kuti mkuluyo akupereka malango thangwe rakuti ambacita naye thupo, bzingamunese lini kuyaphatisa basa. w22.02 14 ¶3; 15 ¶5

Yahova adalenga wanjo wace na wanthu wakulungamiratu. Tsono Sathani (kuthandauza kuti “Nyakutsutsa”) adapandukira Yahova, ndipo iye adapumpsa Adamu na Eva kuti apandukirembo Yahovayo. Wanjo na wanthu winango adacitambo bzibodzi-bodzibzi. (Djuda 6) Yahova adabzibva kuti adaphindukiridwa. Napo bziri tenepo, iye akupitiriza kupirira ndipo an’pitiriza kucita bzimwebzi mpaka nthawe yomwe an’dzapha wentse omwe adamupandukira. Bzimwebzi bzin’dzabweresa bzisimbo kwa atumiki wace omwe akupirira naye pabodzi bzinthu bzakuipa m’dzikoli! Sathani adanamizira Djobi, mtumiki wakukhulupirika wa Yahova, mwakulewa kuti atumiki wentse wakukhulupirika wa Yahova ambatumikira Mulungu thangwe ra psete. (Djobi 1:8-11; 2:3-5) Dyabu akadapitiriza kunamizira atumiki wa Yahova mpaka ntsiku zino. (Apok. 12:10) Tsono tingalatize kuti Sathani ngwakunama mwa kupitiriza kupirira mabvuto na kupitiriza kukhala wakukhulupirika kwa Yahova thangwe ra lufoyi. w21.07 9 ¶7-8

Mpostolo Paulo adandendemezera kucinja makhalidwe yathu na kukhomerera unthu bwathu bwakale “pa muti.” (Aro. 6:6) Iye adacita bzimwebzi kuti atithandize kuwona kufunika kwa kucinja makhalidwe yathu. Kulewa kunango, tingati ifepano tin’funika kutewezera bzomwe Kristu adacita. Iye akhali wakukonzeka kukhomereredwa pa muti kuti Yahova akomedwe naye. Ifepanombo tin’funika kucita ciri-centse kuti titcenkhe makhalidwe yomwe Yahova ambayawenga. Kucita bzimwebzi ndiko kun’dzaticitisa kuti tibzibve bwino mu mtima mwathu nakuti tidzakhale na mwayi wakudzakhala na moyo wakusaya kumala. (Ju. 17:3; 1 Ped. 3:21) Yahova an’dzacinja lini mitemo yace kuti ifepano tikomedwe. Koma ifepano ndife tin’funika kucinja unthu bwathu kuti bubverane na mitemo yace. (Zai. 1:17, 18; 55:9) Napo pambuyo pa kubatizidwa, imwepo mun’funika kucita nyongo kuti muleke kukundidwa na makhalidwe yakuipa. Pembani kwa Yahova kuti akuthandizeni, ndipo thembani mzimu wace sikuti kubzithemba mwekha. (Agal. 5:22; Afil. 4:6) Penu tikufuna kukhundula unthu bwakale, tin’funika kucita nyongo kwene-kwene. w22.03 6 ¶15-17

Yahova adalewa kuti an’dzatipasa cakudya, bzakubvala na mbuto yakukhala tikaikha pa mbuto yakutoma Umambo bwace pa moyo wathu na kubvera mitemo yace yakulungama. (Mat. 6:33) Tikakhulupira mafala yamweya, tin’dzakumbuka lini kuti bzinthu bza m’dzikoli bzingatikhotcerere na kutikhalisa wakukondwa. Ifepano timbadziwa kuti comwe cingatipase mtendere caiwo, ndiko kucita bzomwe Yahova ambafuna. (Afil. 4:6, 7) Napo penu tingakwanise kugula bzinthu bzizinji, tin’funika kuwona penu tingakhale na nthawe pabodzi na mphanvu yakubziphatisa basa na kubzikonzesa. Kodi makumbukidwe yathu yambandokhala pa bzinthu bzomwe tinabzo? Mbakumbukirani kuti Mulungu adatipasa basa kuti ticite m’banja lace. Bzimwebzi bzikufuna kulewa kuti tin’funika lini kubvuma kuti cinthu ciri-centse citiviringize. Kulewa cadidi, tikufuna lini kukhala ninga mwamuna omwe adaluza mwayi wakutumikira Yahova na kukhala m’bodzi wa wana wa Mulungu thangwe ra kufunisisa bzinthu bza m’dziko! — Marko 10:17-22. w21.08 6 ¶17

Mukambapfunza Bibliya, imwepo mun’dzayadziwa bwino makhalidwe ya Yahova, ndipo mun’dzawona kuti makhalidweyo yambawonekera pa bzinthu bzomwe iye adalenga. Kupfunza bza makhalidwe ya Yahova kun’dzatitsimikizira kuti iye alipodi. (Kuf. 34:6, 7; Sal. 145:8, 9) Mukamudziwa bwino Yahova, cikhulupiro canu cin’dzakula, lufoyi lanu kuna iye lin’dzathimizirika, ndipo uxamwali bwanu na iye bun’dzakhala bwakulimba. Uzani wanthu winango bzomwe mumbakhulupira pakulewa bza Mulungu. Tsono, tani penu munthu omwe imwepo mukupalizira akucitani mbvunzo wakuti kodi Mulungu alipo, ndipo imwepo mukudziwa lini kuti mungamutawire tani? Yezerani kugumana mtawiro wa mbvunzoyo m’Bibliya mwakuphatisa basa mabukhu yathu ndipo mukamala kamufotokozereni munthuyo bza nkhaniyo. Ndipo mungakumbirembo m’bale ayai mpfumakazi kuti akuthandizeni kutawira mbvunzoyo. Penu munthuyo an’bvuma ayai ne mtawiro wakucokera m’Bibliya, imwepo mun’dzagumana phindu thangwe ra kufufudzako. Cikhulupiro canu cin’dzakhala cakulimba. w21.08 18 ¶14-15

Mpsakufunika lini kucita kusiya bzentse bzomwe tingakhale nabzo kuti tikondwese Yahova. (Mpal. 5:19, 20) Tsono, tikasaya kucita bzinthu bzizinji pa basa la Yahova thangwe rakuti tikufuna lini kusiya bzinthu bzinango bzomwe timbabzifunisisa, tingacite cinthu cakuphonyeka ninga comwe mwamuna wa mu ciratizo ca Jezu adacita. Iye adaphata basa na nyongo kuti akhale na bzinthu bzizinji bzabwino tsono akhalibe basa na Mulungu. (Luka 12:16-21) Tikagumana na mabvuto, timbapemba kuti tikumbire thandizo Yahova kuti tidziwe bzomwe tingacite kuti tikwanise kukunda mabvutoyo. (Mim. 3:21) Yahova ambatisimba mu njira zizinji. Ifepano tingalatize kuti timbatenda bzisimbobzo mwa kucita ciri-centse comwe tingakwanise kuti timutumbizise. (Aheb. 13:15) Bzimwebzi bzingaphatanidze kuthumizira utumiki bwathu. Tikacita bzimwebzi, Yahova an’dzatipasa bzisimbo bzinango bzizinji. Tenepo, nthawe zentse bwerani tinyang’ane njira kuti ‘[tilawidze, ticiwona] kuti Yahova ngwabwino.’ (Sal. 34:8) Tikacita tenepo, tin’dzakhala ninga Jezu, omwe adalewa kuti: “Cakudya cangu ni kucita kufuna kwa ule omwe adandituma na kumaliza basa lace.” — Ju. 4:34. w21.08 30-31 ¶16-19

Sathani akufuna kuti ifepano tikhale wanthu wakubzikuza. Iye akudziwa kuti ifepano tikakhala na khalidwe limweri, tin’dzakhala ninga iye ndipo tin’dzaluza mwayi wakudzatambira moyo wakusaya kumala. Ndipopa mpostolo Paulo adacenjeza kuti munthu angabzikuze thangwe ra kusamwa ‘acitambira nyathwa yakundendemerana na yomwe Dyabu adatambira.’ (1 Tim. 3:6, 7) Bzimwebzi bzingacitikire ali-wentse wa ifepano bziribe basa kuti tapfunza tsapanopa cadidi ayai kuti papita magole mazinji tikutumikira Yahova. Wanthu wakubzikuza ambandobzifuna okha. Sathani ambayezera kuticitisa kuti timbabzikumbukire tekha kwene-kwene, kusiyana na momwe timbakumbukirira Yahova, maka-maka tikakhala kuti tiri pa mabvuto. Mwa ciratizo, kodi imwepo mudanamiziridwa kale cinthu comwe mulibe kucita? Ayai kodi mudacitiridwa kale bzinthu bzakusaya cirungamo? Sathani angakomedwe kukuwonani kuti muna ukali na Yahova ayai na abale wanu. Ndipo Sathaniyo akufuna kuti imwepo mumbakumbuke kuti njira yabwino yakumalisira mabvuto yanu ndiyo kucita bzinthu bza mu msolo mwanu, sikuti kuteweza malango yomwe Yahova ambayapereka m’Fala lace. — Mpal. 7:16, 20. w21.06 15 ¶4-5

Yahova adapasa mpolofeta Hagai basa lakufunika kwene-kwene kuti iye acite. Hagai akhali m’bodzi wa wanthu omwe adabwerera ku ukapolo ku Babiloniya mu gole la 537 AEC. Pomwe adandoti fikeni ku Jeruzalemu, anamati wakukhulupirika wa Yahova adayamba kumanga nyumba ya Yahova ayai templo. (Eza. 3:8, 10) Tsono pomwe padandopita ka nthawe kang’ono-ng’ono, padacitika cinthu comwe alibe kukomedwa naco. Iwo alibe kukhala pomwe na mphanvu thangwe ra kuti akhaletsedwa kucita basalo ndipo adadzalisiya. (Eza. 4:4; Hag. 1:1, 2) Tenepo, mu 520 AEC, Yahova adauza Hagai kuti athandize Adjuda kukhala pomwe na nyongo na kuwalimbikisa kuti amalize kumanga templo. (Eza. 6:14, 15) Basa la Hagai likhali lakulimbikisa Adjuda kuti akhulupire Yahova. Pinango mafala yakuti ‘Yahova wa anyankhondo’ yadatsangalaza wanthuwo. Yahova ambatsogolera anyankhondo wace azinji omwe ni anjo. Tenepo, Adjuda akhafunika kukhulupira iye kuti bzinthu bziwafambire bwino. w21.09 15 ¶4-5

Ntsiku zino, pa dziko lentse la pantsi Mboni za Yahova zimbalatiza kuti zimbafunana ndipo zimbabverana. Ifepano ndife wakusiyana na magereja manango thangwe rakuti tiri ninga banja libodzi, napo kuti ndife wa madziko yakusiyana-siyana, na bzikhalidwe bzakusiyana-siyana. Timbakwanisa kuwona umboni bwa lufoyiro pa mitsonkhano ya gwere, mitsonkhano ya dera na mitsonkhano ya cigawo. Umboni bumwebu bumbatithandiza kutsimikiza kuti kanamatidwe kathu ndiko komwe Yahova ambakomedwa nako. (Ju. 13:34) Bzinembo bzimbatiuza kuti: “Mbafunanani na mtima wentse.” (1 Ped. 4:8) Njira ibodzi yomwe timbalatizira lufoyi ndiyo kumbalekerera anzathu na kuyebwa bzomwe atiphonyera. Timbanyang’anambo mipata yakuti tikhale wanthu wakupasa na kutambira alendo kuna wentse m’gwere napo kuna wale omwe atiphonyera. (Akol. 3:12-14) Tikambacita bzimwebzi, timbalatiza kuti ndife Akristau wacadidi. w21.10 22 ¶13-14

Kodi kucosa munthu omwe alibe kukungula m’gwere kungamuthandize kucinja? Inde kungamuthandize. Abale na mpfumakazi zizinji omwe adacita pikado ikulu, adalewa kuti kucosedwa m’gwere kudawathandiza kuzindikira bzinthu bzakuipa bzomwe adacita, kukungula na kucinja makhalidwe yawo acibwerera kwa Yahova. (Aheb. 12:5, 6) Mbatiyezezereni tenepa. Makabusa awona kuti bira wace m’bodzi akuduwala. Tsono kuti akwanise kulapa birayo, iye awona kuti bzin’funika kucosa bira wakuduwalayo pa thimu la mabira manango. Mabira yambafuna kukhala pabodzi na mabira yanzace, ndipo yangabzibve lini bwino yakakhala payokha. Tsono makabusa akapambula bira m’bodzi kuti amulape, bzin’funa kulewa kuti iye ngwakuuma mtima? Ne. Iye akudziwa kuti akalekerera bira wakuduwalayo kukhala pabodzi na mabira manango, mabira manangoyo yangatakanyidwembo na matendayo. Tsono akapambula bira wakuduwalayo ambakhala akukhotcerera mabira manangoyo. w21.10 10 ¶9-10

Tina mwayi ukulu wakucita mbali ya banja la abale na mpfumakazi omwe ambafunana. Ifepano tikufuna kuti wanthu azinji anamate nafe pabodzi Mulungu wathu. Tenepo, tin’funika lini kucita bzinthu bzomwe bzingalewese kuipa Yahova ayai wanthu wace. Ndipopa nthawe zentse tin’funika kumbalatiza makhalidwe yabwino yomwe yangacitise wanthu azinji kufunambo kupfunza bza Yahova na kumutumikira. Nthawe zinango, wanthu angatinyoze ayai kutiboneresa thangwe rakuti timbabvera Baba wathu wa kudzulu. Kodi n’ciyani comwe tingacite penu tikubva mantha kufotokozera wanthu winango bzomwe timbakhulupira? Tin’funika kukhulupira kuti Yahova na Mwana wace an’tithandiza. Jezu adauza anyakupfunza wace kuti aleke kukhala na thupo kuti an’kalewa ciyani na momwe angadakalewera. Thangwe ranyi adawauza tenepoyo? Jezu adawauza kuti: “Pa nthawe imweyo, mun’dzapasidwa bzomwe mudzalewe; thangwe omwe an’dzalewalewa ndimwepo lini mwekha, koma mzimu wa Baba wanu ndiye omwe un’dzalewalewa mwa imwepo.” — Mat. 10:19, 20. w21.09 24 ¶17-18

Mozeji adaphatisa basa mafala mabodzi-bodziya pakulewa bza mbuto yakuthawira. (Sal. 90:1) Pomwe Mozeji akhadasala pang’ono kufa, iye adalewa pomwe mafala yakundendemezeraya kuti: ‘Mulungu ni mbuto yakuthawira kuyambira kale-kale, iwepo udakhala m’manja yace yakusaya kumala.’ (Bzak. 33:27) Kodi mafala yakuti ‘iwepo udakhala m’manja yace yakusaya kumala’ yambatiuza ciyani pakulewa bza Yahova? Yahova akakhala mbuto yathu Yakuthawira timbakhala wakukhotcerereka. Nthawe zinango tingabzibve kuti tidawofoka ndipo bzingatinese kusiya kubva tenepoyo. Pa nthawe ningati zimwezi, kodi n’ciyani comwe Yahova an’dzaticitira? (Sal. 136:23) Iye an’dzatiikha m’manja mwace, an’dzatidzusa mwakudeka mtima, acitithandiza kumuka na minyendo yathu. (Sal. 28:9; 94:18) Momwe timbagumanira phindu: Kudziwa kuti Yahova angatithandize nthawe zentse, kumbaticitisa kukumbukira kuti ndife wakusimbidwa mu njira ziwiri. Yakuyamba, kuli-kwentse komwe tingakhale, tina mbuto yakuthawira yakukhotcerereka. Yaciwiri, Baba wathu walufoyi ambatifuwa bwino. w21.11 6 ¶15-16

Jezu akhadziwa kuti kusaya cirungamo kungadayeza cikhulupiro ca anyakupfunza wace. Kuti iye awathandize kupirira bzinthu bzimwebzi, adafotokoza ciratizo comwe cimbagumanika m’bukhu la Luka. Jezu adafotokoza nkhani ya mamsiwa omwe adapitiriza kulirira mtongi wakusaya cirungamo kuti amucitire cirungamo. Mkaziyo akhakhulupira kuti angadapitiriza kumulirira, mtongiyo angadamuthandiza. Patsogolo pace, mtongiyo adathandiza mkazi mamsiwayo. Kodi tikupfunza ciyani? Yahova ambacita lini bzinthu mwakusaya cirungamo. Ndipopa Jezu adalewa kuti: “Kodi Mulungu omwe ambapirira na wanthu wace wakusankhulidwa, an’dzawonesesa lini kuti wale omwe ambamudandaulira usiku na masikati acitiridwa cirungamo?” (Luka 18:1-8) Ndipo Jezu adalewa pomwe kuti: “Tsono Mwana wa munthu akadzafika, kodi an’dzagumanadi cikhulupiro pa dziko la pantsi?” Pomwe tikucitiridwa bzinthu bzakusaya cirungamo, tin’funika kulatiza kupirira mwakulatiza cikhulupiro cakulimba ninga ca mamsiwa ule. Na cikhulupiro cimweci, ifepano tingatsimikize kuti ziwande ayai zicepe ntsiku Yahova an’dzatithandiza. Ndipo tin’funikambo kukhulupira kuti mpembo una mphanvu kwene-kwene. w21.11 23 ¶12; 24 ¶14

Maswakamwe, kodi imwepo nthawe zinango mumbabzibva ninga kuti mitemo ya Yahova ikukupherani ufulu bwanu? Bzimwebzi ndibzo bzomwe Sathani ambafuna kuti mukumbuke. Iye ambafuna kuti imwepo mukumbukire kwene-kwene bzomwe akucita wanthu omwe akufamba mu mseu wakhwankhwa thangwe bzimbawoneka ninga kuti iwo ana moyo wabwino. Iye angaphatise basa bzomwe anzanu wa ku xikola ambacita ayai bzomwe mumbawona pa interneti kuti akucitiseni kubzibva ninga kuti mukuluza cinthu cabwino. Sathani ambafuna kuti imwepo mukumbuke kuti mitemo ya Yahova ikukutazisani kupfatsa pa moyo. Tsono kumbukirani ibzi: Sathani an’funa lini kuti wanthu omwe akufamba pa mseuyo adziwe bzomwe bziniwacitikira kuphampha kwa ulendo bwawo. (Mat. 7:13, 14) Koma Yahova adakuthandizani kale kubvesesa bzomwe an’dzapasa wanthu omwe ambafamba pa mseu wakuyendesa ku moyo. — Sal. 37:29; Zai. 35:5, 6; 65:21-23. w21.12 23 ¶6-7

Ifepano timbadziwa kuti kulekerera ni cinthu cabwino comwe tin’funika kucita. Tsono nthawe zinango bzingatinese kucita bzimwebzi. Mpostolo Pedru adabzibvambo tenepo nthawe zinango. (Mat. 18:21, 22) Kodi n’ciyani comwe cingatithandize? Cakuyamba, kumbukirani kuti Yahova adakulekererani kale kangasi. (Mat. 18:32, 33) Ifepano tiribe kuthemera kulekereredwa naye, tsono iye ambatilekerera fovolo. (Sal. 103:8-10) Tenepo, ifepano tin’funikambo kumbafunana. Ndipopa, kulekerera ni cinthu lini comwe tingacite kusankhula kucita ayai kusaya kucita. Bzinese bzitani tin’funika kulekerera abale na mpfumakazi zathu. (1 Ju. 4:11) Caciwiri, kumbukirani bzomwe bzimbacitika tikambalekerera winango. Tingathandize munthu omwe atiphonyerayo, kucitisa kuti gwere likhale lakuphatana, kukhotcerera uxamwali bwathu na Yahova ticikhalambo wakupepukidwa. (2 Ako. 2:7; Akol. 3:14) Cakumalizira, pembani kwa Yahova omwe akukukumbirani kuti mumbalekerere. Lekani kubvuma kuti Sathani akutaziseni kukhala pa mtendere na Akristau anzanu. (Aef. 4:26, 27) Penu tin’funa lini kupita mu gango la Sathani tin’funika kuthemba Yahova kuti atithandize. w21.06 22 ¶11; 23 ¶14

Davide akhathawa kuti apulumuse moyo wace thangwe Sauli, mambo wamphanvu mu Jirayeri, akhafuna kumupha. Pomwe Davide akhafunikira thandizo, iye adaima mu mzinda wa Nobe, komwe adakumbira pau zixanu. (1 Sam. 21:1, 3) Patsogolo pace, iye na acikunda wace adathawira kucimphako. (1 Sam. 22:1) Kodi n’ciyani cidacitika kuti Davide akabisalike kucimphakoko? Sauli akhawenga kwene-kwene Davide thangwe ra kubvekera kwace na kukunda kwace nkhondo zizinji. Sauli akhadziwambo kuti kusaya kubva kwace ndiko kudacitisa kuti Yahova amucose pa mpando wace wa umambo, nakuti Yahovayo asankhule Davide kuti akhale mambo. (1 Sam. 23:16, 17) Tsono pakuti akhanati kucoka pa mpando, Sauli akhana thimu la anyankhondo likulu na anyakumuthandiza azinji, ndipopa Davide akhathawa kuti apulumuse moyo wace. Kodi Sauli akhakumbuka kuti angadakwanisa kutazisa bzomwe Mulungu akhafuna kuna Davide? (Zai. 55:11) Bibliya limbalewa lini, koma tingakhale na citsimikizo centse cakuti: Sauli akhaikha moyo wace pa ngozi. Thangwe wale omwe ambalimbana na Mulungu nthawe zentse ambaluza! w22.01 2 ¶1-2

Jezu akhapalizira na nyongo. Iye akhalatiza lufoyi lace kwa wanthu mwakuphatisa basa mpata uli-wentse omwe akhakhala nawo kuti awapfunzise. (Luka 19:47, 48) Kodi thangwe ranyi iye adacita bzimwebzi? Thangwe rakuti Jezu akhawabvera ntsisi. Nthawe zinango, wanthu azinji akhafuna kubva bzomwe Jezu akhapfunzisa mwakuti iye na anyakupfunza wace akhalibe “nthawe kuti adye” cakudya. (Marko 3:20) Iye akhakhalambo wakutsudzuka kupfunzisa usiku, nthawe yomwe ikhali yabwino kwa munthu omwe akhamupfunzisayo. Wanthu azinji omwe akhatetekera pomwe Jezu akhapfunzisa alibe kukhaliratu anyakupfunza wace pa nthawe imweyo. Koma tingalewe kuti wanthu wentse omwe adamutetekera adacitiridwa umboni mwakukwanira. Ntsiku zino, ifepano tin’funika kupereka mpata kwa wanthu wentse kuti abve mafala yabwino. (Mab. 10:42) Kuti tikwanise kucita bzimwebzi, tin’funika kucinja-cinja momwe timbapalizirira. Tin’funika lini kumbapalizira pa nthawe yomwe tikuwona kuti njabwino kwa ifepano. Koma tin’funika kukhala wakukonzeka kucinja ndondomeko yathu kuti tipalizire pa nthawe yomwe tingagumane wanthu. Tikacita bzimwebzi, tingakhale na citsimikizo cakuti Yahova an’dzakomedwa. w22.01 17 ¶13-14

Ntsiku zino wanthu azinji bzimbawanesa kukhulupira wanthu omwe ambawatsogolera. Iwo ambawona kuti maboma na malamulo kawiri-kawiri yambakhotcerera wanthu wakudala na wamphanvu yacilamba kuthandiza wanthu wakusauka. Ndipo atsogoleri winango wa bzipembedzo ambacita bzinthu bzakuipa, bzomwe bzimbacitisa wanthu kuleka kukhulupira Mulungu. Ndipopa munthu akabvuma kupfunza nafe Bibliya, mpsakufunika kumupfunzisa kukhulupira Yahova na wanthu omwe iye ambawaphatisa basa kuti atitsogolere. Ni anyakupfunza lini okha wa Bibliya omwe an’funika kupfunza kukhulupira Yahova na gulu lace. Napo ifepano omwe tikutumikira Yahova kuyambira kale-kale tin’funikambo kupitiriza kulimbisa cikhulupiro cathu cakuti cinthu ciri-centse comwe Yahova ambacita n’cakulungama. Nthawe zinango, kuthemba kwathu Yahova kungayezedwe pa nkhani imweyi. w22.02 2 ¶1-2