Maio

Kuti atithandize kudziwa bwino Mwana wace, Yahova mwa lufoyi adacitisa kuti m’Bibliya munembedwe mabukhu manai, (Mateu, Marko, Luka na Juwau) yakulewa bza moyo wa Jezu. M’mabukhu yamweya mumbagumanika nkhani zakulewa bza moyo wa Jezu na utumiki bwace. Nkhani zimwezo zimbatiuza bzomwe Jezu adalewa na bzomwe adacita, ndipo zimbatiuzambo momwe iye akhabvera. Mabukhuya yambatithandiza kukumbukira bwino-bwino bzomwe Jezu adacita. Bzimwebzi bzin’funa kulewa kuti mabukhuya yana nzayo zomwe Jezu adazisiya m’mbuyo. Ndipopa tikambapfunza mabukhu yamweya, ifepano tin’dzafika pa kumudziwa bwino Jezu. Ndipo tin’dzakwanisa kutewera nzayo zace na pafupi. Kuti tigumane phindu na mabukhu manai yamweya, tin’funika kucita bzinthu bzizinji sikuti kundoyawerenga basi. Tin’funika kupambula nthawe kuti timbayapfunze mwakuderekha, na kukumbukira bzomwe tapfunzabzo. (Ndendemezerani na Djoswe 1:8.) Citisani kuti nkhani za m’mabukhuya zikhale na moyo. Phatisani basa makumbukidwe yanu kuti muwone, mutetekere na kubva bzomwe bzikhacitika. Comwe cingakuthandizeni ndico kufufudza m’mabukhu yomwe gulu la Yahova limbatipasa. w21.04 4-5 ¶11-13

Pomwe kukhadasala magole mazinji kuti Jezu abwere pa dziko la pantsi, Yahova akhadaleweratu m’Fala lace kuti Mesiya angadadzagulisidwa na kobiri 30 za prata. (Zak. 11:12, 13) Ndipo nyakumugulisayo angadadzakhala m’bodzi mwa axamwali wace wa ponda ndipondembo. (Sal. 41:9) Mpolofeta Zakariya akhadanembambo kuti: ‘Pweteka makabusa ndipo mabira yanibalalika.’ (Zak. 13:7) M’mbuto mwakukhukhumudwa na bzomwe bzidacitikabzi, wanthu wa mitima yabwino angadalimbikisidwa pakuwona kukwanisika kwa mapolofesiya yakulewa bza Jezu. Kodi ntsiku zino timbagumanambo na bvuto ninga limweri? Inde. Mu nthawe yathu ino, abale winango asiya cadidi acikhala apanduki, ndipo akuyezera kupumpsa abale winango kuti asiyembo cadidi. Iwo ambamwaza nkhani zakunama, nkhani zomwe ziribe umboni bwa cadidi pakulewa bza Mboni za Yahova mwakuphatisa basa majornale, radio, TV na interneti. Tsono wanthu wa mitima yabwino ambabvuma lini kupumpsidwa. M’mbuto mwace, iwo ambadziwa kuti Bibliya likhadalewa kale kuti bzinthu bzimwebzi bzingadadzacitika. — Mat. 24:24; 2 Ped. 2:18-22. w21.05 11 ¶12; 12-13 ¶18-19

Bzinembo bzimbalatiza padeca kuti cidziwiso cimbathimizirika na kupita kwa nthawe. (Akol. 1:9, 10) Yahova ambazimbula cadidi pang’ono na pang’ono ndipo ifepano tin’funika kukhala wakukonzeka kudikhirira nthawe yomwe tidzabvesese bwino-bwino cadidico. Omwe akutsogolera akazindikira kuti pana kabvesesedwe komwe kan’funika kucinja, iwo ambacita lini manyazi kucinja kabvesesedweko. Magereja mazinji ntsiku zino yambacinja bzinthu bzomwe yambapfunzisa thangwe ra kufuna kuti wanthu wawo akomedwe nawo, ayai kuti dziko likomedwe nawo. Tsono Mboni za Yahova zimbacinja bzinthu thangwe ra kufuna kufendererana na Mulungu na kumunamata ninga momwe Jezu adacitira. (Tiy. 4:4) Ifepano timbacinja bzinthu sikuti thangwe ra kucinja kwa nzeru za wanthu m’dzikoli, koma ni thangwe ra kubvesesa bwino Bibliya. Ifepano timbafuna cadidi! — 1 Ates. 2:3, 4. w21.10 22 ¶12

Kodi n’ciyani comwe mungacite mukabzibva kuti muli mwekha? Mbakumbukirani momwe Yahova ambakuthandizirani. (Sal. 55:22) Bzimwebzi bzin’dzakuthandizani kuwona kuti muli lini mwekha. Mbakumbukiranimbo momwe Yahova akuthandizira abale na mpfumakazi omwe ambabzibva kuti ali okha. (1 Ped. 5:9, 10) M’bale Hiroshi, omwe adamala magole mazinji ali yekha Mboni ya Yahova m’banja mwace, adalewa kuti: “Kudziwa kuti tikucita bzomwe tingakwanise kuti titumikire Yahova, kungalimbikise wanthu omwe m’banja mwawo ndiwo okha Mboni ya Yahova.” Nthawe zentse mbapembani, mbawerengani Bibliya na kuyenda ku mitsonkhano. Bzimwebzi bzikuphatanidzambo kumbakhala wakutsudzuka kumufotokozera bwino-bwino Yahova momwe mukubvera. Mpsakufunika kwene-kwene kumbawerenga Bibliya ntsiku zentse mucimbakumbukira nkhani zomwe zimbalatiza kuti Yahova ambakufunani. Akristau winango ambakoya mu msolo bzinembo bzomwe bzimbawatsangalaza, ninga Salimo 27:10 na Zaiya 41:10. Ndipo wanthu winango ambawona kuti kubva audiyo ya nkhani yakupfunza pomwe akukonzekera mitsonkhano ayai akuwerenga Bibliya kumbawathandiza kucepesa makumbukidwe yakubzibva kuti ali okha. w21.06 9-10 ¶5-8

Kodi imwepo mwafedwa wadzinza wanu tsapanopa? Pambulani nthawe kuti mulimbise cikhulupiro canu pakulewa bza kulamusidwa kwa anyakufa mwa kuwerenga nkhani za m’Bibliya zakulewa bza wanthu omwe adalamusidwa. Kodi imwepo mukulira thangwe rakuti wadzinza wanu wacosedwa m’gwere? Pfunzani kuti mutsimikize mwekha kuti njira imweyi yomwe Mulungu ambaiphatisa basa kuti atilange njabwino. Onani bvuto liri-lentse lomwe mungagumane nalo ninga mpata wakuti mulimbise cikhulupiro canu. Uzani Yahova momwe mukubvera. Lekani kumbabzipambula, koma citani uxamwali na abale na mpfumakazi zanu. (Mim. 18:1) Citani mabasa yomwe yangakuthandizeni kupirira, napo kuti mungacite bzimwebzo uko mukukumbukira bzomwe bzidakucitikirani m’mbuyomu. (Sal. 126:5, 6) Pitirizani kumbagumanika pa mitsonkhano, kupalizira na kuwerenga Bibliya. Ndipo pitirizani kumbakumbukira bzisimbo bzomwe Yahova an’dzakupasani kutsogolo. Imwepo mukambawona momwe Yahova akukuthandizirani, cikhulupiro canu cin’dzayenda cicilimba. w21.11 23 ¶11; 24 ¶17

Kodi ni mwa njira inango iponi anyakupfunza wa Jezu ali ningati ‘wana ang’ono’? Kodi ni wanthu aponi omwe dziko limbawawona kuti mbakufunika kwene-kwene? Ni wanthu wakudala, wakubvekera na atongi. Tsono mwakusiyana na amwewa, anyakupfunza wa Jezu ambawoneka ninga kuti ni ‘wana ang’ono’ wakusaya kufunika na wakusaya basa. (1 Ako. 1:26-29) Tsono Yahova ambawawona lini tenepoyo.Thangwe ranyi Jezu adaphatisa basa mafala yakuti ‘wana ang’onowa’? Anyakupfunza wace adamubvunza kuti: ‘Kodi mbani maka-maka omwe ni mkulu mu Umambo bwa kudzulu?’ (Mat. 18:1) Adjuda azinji mu nthawe imweyire akhambafuna kuti wanthu ambawawone kuti mbakufunika kwene-kwene. Mdziwi munango adalewa kuti: “Wanthu azinji adafera kutumbizidwa, kufuna kubvekera na kufuna kulemekezedwa na wanthu winango.” Jezu akhadziwa kuti anyakupfunza wace akhafunika kucita nyongo kuti aleke kutewezera makumbukidwe yakuphonyeka yomwe Adjuda azinji akhanayo, yakuti mbani omwe akhali wakufunika pakati pawo. w21.06 20 ¶2; 21 ¶6, 8-9

Mpostolo Paulo akhali mkulu wa gwere wabwino ndipo tingamutewezere. Kumbukirani kuti pomwe Paulo akhafuna kupereka malango kuna abale wa ku Tesalonika, iye alibe kuzeza kucita bzimwebzo. Tsono pomwe akhanati kuwapasa malangoyo, mpostolo Paulo adayamba kuwatenda thangwe ra basa lomwe akhacita mwakukhulupirika, lufoyi lawo na kupirira kwawo. Iye adakumbukirambo bza moyo wawo ndipo adawauza kuti akhadziwa kuti bzinthu bzikhali lini bzakupusa kuna iwo nakuti iwo akhapirira pomwe akhazunzidwa. (1 Ates. 1:3; 2 Ates. 1:4) Ndipo iye adawauzambo kuti abale winango akhafunikambo kutewezera bzomwe iwo akhacita. (1 Ates. 1:8, 9) Iwo adakomedwa kwene-kwene thangwe Paulo adawatenda! Bzikuwonekeratu padeca kuti Paulo akhafuna abale wace. Ndipopa iye adakwanisa kupereka malango yabwino m’matsamba mawiri yomwe iye adanembera abale wace wa ku Tesalonika. — 1 Ates. 4:1, 3-5, 11; 2 Ates. 3:11, 12. w22.02 15 ¶6

Sathani ambaphatisa basa atsogoleri wa magereja yakunama kuti ambalewe kuti Yahova ngwakuipa ndipo ndiye omwe akucitisa kuti wanthu abonere. Ndipo winango ambalewa kuti mwana akasaika, Mulungu amutenga thangwe iye akufuna wanjo azinji kudzulu. Kumweku n’kunyoza Mulungu! Ifepano timbadziwa kuti Yahova ni Baba wa lufoyi. Ndipo tikaduwala mwakuti penu-penu ayai tikasaikidwa m’bale wathu, timbalewa lini kuipa Mulungu. M’mbuto mwace, ifepano timbakhulupira kuti ntsiku inango iye an’dzamalisa matenda ndipo an’dzalamusa anyakufa. Ifepano tingathandize munthu ali-wentse omwe angafune kudziwa momwe Yahova aliri Mulungu wa lufoyi. Tikacita bzimwebzi, Yahova ambakwanisa kutawira ule omwe akumunyonza. (Mim. 27:11) Yahova ni Mulungu wa ntsisi. Iye ambawawidwa kwene-kwene akatiwona tikubonera, pinango thangwe ra kuzunzidwa, matenda ayai thangwe ra kuperewera kwathu. (Sal. 22:23, 24) Yahova ambabvesesa momwe ifepano timbabvera kuwawa. Iye akufuna kumalisa kuwawako, ndipo an’dzakumalisadi. — Ndendemezerani na Kufuluka 3:7, 8; Zaiya 63:9. w21.07 9-10 ¶9-10

Tsapanopapa, wanthu wakubvera an’dzakhala na mwayi ukulu, omwe ni mwayi wakufuna Yahova na kumutumikira mpaka kale-kale! Jezu an’dzamalisa mabvuto yentse yomwe yadabwera thangwe ra kucoka kwa Adamu na Eva m’banja la Mulungu. Yahova an’dzalamusa wanthu azinji omwe adafa ndipo an’dzawapasa mwayi wakukhala na moyo wakusaya kumala na mathupi yakulungama mu paraizo pa dziko la pantsi. (Luka 23:42, 43) Wanthu omwe akutumikira Yahova akadzakhala wakulungamiratu, wentse an’dzakhala na ‘umbiri na ulemerero’ ninga momwe Davide adanembera. Penu imwepo ndimwe wa ‘thimu likulu,’ muna cidikhiro cabwino kwene-kwene. (Apok. 7:9) Mulungu ambakufunani ndipo akufuna kuti mucite mbali ya banja lace. Tenepo, citani bzentse bzomwe mungakwanise kuti iye akomedwe. Pa ntsiku iri-yentse, mbakumbukirani bzomwe Mulungu adalewa kuti an’dzacita kutsogolo. Mbatendani mwayi omwe munawo wakunamata Baba wathu wa kudzulu ndipo mbakomedwani na cidikhiro comwe munaco cakudzamutumbiza mpaka kale-kale! w21.08 7 ¶18-19

Mpolofeta Jeremiya adapalizira magole 40 napo kuti wanthu akhamutetekera lini ndipo akhamunyoza. Iye adamala mphanvu thangwe ra ‘kutukanidwa na kunyozedwa’ na wanthu, mpaka adakumbuka bzakusiya utumiki bwace. (Jer. 20:8, 9) Tsono Jeremiya alibe kubwerera m’mbuyo! Kodi n’ciyani comwe cidamuthandiza kukunda makumbukidwe yakuphonyeka acikhala wakukondwa mu utumiki bwace? Iye adakumbukira bzinthu bziwiri bzakufunika. Cakuyamba, mafala ya Mulungu, yomwe Jeremiya akhapalizira, yakhapasa wanthu ‘cidikhiro cabwino na tsogolo labwino.’ (Jer. 29:11) Caciwiri, Yahova adasankhula Jeremiya kuti akauze wanthu pakulewa bza iye. (Jer. 15:16) Ifepano timbauza wanthu mafala ya cidikhiro ndipo timbadziwisa dzina la Yahova ninga Mboni zace. Tikambakumbukira bzinthu bzakufunikabzi, tin’dzakhala wakukondwa, bziribe basa penu wanthu anibva mafala yomwe tiniwauza ayai ne. Tenepo, lekani kubva utofu ayai kubwerera m’mbuyo mukawona kuti anyakupfunza wanu akutenga nthawe ikulu kuti ayende patsogolo kuposa momwe mukhadikhirira. Kupfunzisa wanthu kuti akhale anyakupfunza kumbafuna kupirira. — Tiy. 5:7, 8. w21.10 27 ¶12-13

Bziribe basa penu tikutumikira Yahova kuyambira kale-kale ayai tsapanopa, tin’funika kupitiriza kulimbisa cikhulupiro cathu. Thangwe ranyi? Thangwe rakuti tikaleka kukhala tceru, cikhulupiro cathu cingamale mphanvu. Kumbukirani kuti cikhulupiro cimbacokera pa bzinthu caibzo napo kuti ibzo mpsakusaya kuwoneka. Cinthu comwe tikuciwona lini, bzingapuse kuciyebwa. Ndipopa Paulo adalewa kuti kusaya cikhulupiro ni ‘pikado yomwe ingatipinge mwakusaya kunesa.’ Tsono tingacite ciyani kuti cikhulupiro cathu cipitirize kukhala cakulimba? (2 Ates. 1:3) Cakuyamba, kumbirani Yahova mzimu wakucena, ndipo mbacitani bzimwebzi mwakubwereza-bwereza. Thangwe ranyi? Thangwe rakuti cikhulupiro ni mbali ya cisapo ca mzimu wakucena. (Agal. 5:22, 23) Tingakwanise lini kupitiriza kulimbisa cikhulupiro cathu cakuti Mulengi alipo tikasaya kuthandizidwa na mzimu wace wakucena. Tenepo, ifepano tikapitiriza kukumbira Yahova mzimu wace wakucena, iye an’dzatipasa. (Luka 11:13) Pomwe tikupemba, bzingakhale bwino kumbacita kulewa kuti: “Tithandizeni kukhala na cikhulupiro cakulimba.” (Luka 17:5) Kuthumizira bzimwebzi, pitirizani kumbapfunza Fala la Mulungu pamwekha. — Sal. 1:2, 3. w21.08 18-19 ¶16-18

Pana bzinthu bzizinji bzomwe acikulire angacite mu gulu la Yahova. Napo kuti iwo angakhale alibe mphanvu ninga zomwe akhanazo kale-kale, iwo ambadziwa bzinthu bzizinji thangwe rakuti adabadwa kale-kale. Yahova angapitirize kuwaphatisa basa. Mwa ciratizo, Bibliya limbalewa bza wanthu wakukhulupirika omwe adapitiriza kutumikira Yahova napo pomwe akhadakalamba. Mwa ciratizo, pomwe Mozeji adayamba kutumikira Yahova ninga mpolofeta na muimikiri kuna mtundu wa Jirayeri, iye akhana magole 80. Pomwe Daniyeli akhana magole yakupitirira 90, Yahova akhapitiriza kumuphatisa basa ninga mpolofeta. Ndipo mpostolo Juwau pinango-pentse akhana magole yakupitirira 90 pomwe iye adafuliziridwa kuti anembe bukhu la Apokalipse. Munthu “wakulungama na wakubzipereka” wakucemeredwa Simiyoni ambandogumidwa pang’ono basi m’Bibliya. Tsono Yahova akhadziwa kuti iye akhali yani, ndipo adamupasa mwayi wakuwona Jezu pomwe akhali tcece na kulewa polofesiya yakulewa bza mwanayo pabodzi na mai wace. — Luka 2:22, 25-35. w21.09 3-4 ¶5-7

Abereki an’funika kuwonesesa kuti aleke kundendemezera bzomwe mwana akucita na bzomwe mwanzace ambacita. Ayai kuuza mwana kuti acite bzinthu bzomwe angakwanise lini kucita. Abereki akacita bzimwebzi, mwanayo angagoboke m’mabondo. (Aef. 6:4) Mpfumakazi yakucemeredwa Sachiko idalewa kuti: “Mai wangu akhafuna lini kuti ndiphonye kacinthu ne na kabodziko ku xikola, bzomwe bzikhali bzakunesa kuna inepano. Napo kuti papita magole mazinji kucokera pomwe ndidamaliza xikola, nthawe zinango nimbabzibva kuti Yahova ambakomedwa lini nande, napo kuti nimbacita bzomwe nimbakwanisa pakumutumikira.” Mambo Davide adalewa kuti iye ‘[akhalinga] lini bzinthu bza padzulu’ ayai kucita bzinthu bzomwe angadakwanisa lini kucita. Kubzicepesa kwace na kuzindikira malire ‘[kudaderekhesa]’ mtima wace. (Sal. 131:2) Kodi abereki angapfunze ciyani na mafala ya Davide? Abereki angakhale wakubzicepesa na wakuzindikira malire akambasaya kudikhirira kucita bzinthu bzomwe angakwanise lini kucita na kusaya kudikhirirambo kuti wana wawo acite bzinthu bzomwe angakwanise lini kucita. Abereki angathandize mwana wawo mwakumbawona bzinthu bzomwe mwanayo ambakwanisa kucita na bzomwe ambakwanisa lini na kumuthandizambo kucita bzomwe iye asankhula kucita. w21.07 21 ¶5-6

Yahova adatipasa mphaso ya ufulu bwakusankhula. Bzimwebzi bzin’funa kulewa kuti ifepano tingasankhule kumubvera ayai kusaya kumubvera. Napo kuti wana winango adakhala na abereki omwe akhalibe ciratizo cabwino, koma iwo adasankhula kutumikira Yahova mwakukhulupirika. Tsono winango omwe adaleredwa na abereki wawo, omwe adawapfunzisa cadidi mwakubverana na Bzinembo, pomwe iwo adadzakula adasankhula kusiya kupfunza cadidico. Napo bziri tenepo, munthu ali-wentse angasankhule penu an’dzatumikira Yahova. (Djos. 24:15) Tenepo, abereki omwe adasunama thangwe rakuti wana wawo asiya kutumikira Yahova, iwo an’funika lini kubzipasa mulandu wakuti alibe kuwapfunzisa bwino. Nthawe zinango, mai ayai pai ambasiya kutumikira Yahova ndipo ambasiyambo banja lace. (Sal. 27:10) Bzimwebzi bzimbakhala bzakunesa kwene-kwene kuna wana bzikakhala kuti aberekiwo asiya kukhala ciratizo cabwino. Wanamwe, penu abereki wanu adacosedwa m’gwere, dziwani kuti Yahova akudziwa momwe imwepo mukubvera kuwawa. Iye ambakufunani ndipo ambakomedwa na kukhulupirika kwanu. Ndipo kumbukiranimbo kuti imwepo mulibe mulandu thangwe ra bzomwe abereki wanu asankhula kucita. w21.09 27 ¶5-7

Mkristau akacosedwa m’gwere, ifepano tingamuyezezere na bira omwe akuduwala matenda yakupasirana, yomwe angapasire mabira yentse. Iye akuduwala mwauzimu. (Tiy. 5:14) Kuduwala mwauzimu kuli ninga kuduwala matenda caiyo yomwe yangaphatembo wanthu winango. Mpsibodzi-bodzimbo m’gwere, mpsakufunika kupambula munthu omwe akuduwala mwauzimuyo. Cirango cimweci cimbalatiza lufoyi la Yahova kuna atumiki wace wakukhulupirika, ndipo cirangoco cingathandize munthu omwe waphonyayo kuti akungule. Napo kuti munthu wacosedwa, iye angayende ku mitsonkhano, komwe angakatambire malango kuti alimbise pomwe cikhulupiro cace. Iye angatambire mabukhu kuti ambawerenge na kupfunza pabodzi na kuwonambo programa ya JW Broadcasting^®. Akulu wa gwere an’dzawona nyongo yomwe iye akucita ndipo nthawe na nthawe iwo an’dzamupasa malango yomwe yangamuthandize kukhala pomwe pa uxamwali na Yahova acibwezeresedwa ninga Mboni ya Yahova. w21.10 10 ¶9, 11

Ntsiku zino, ifepano timbatewezera kanamatidwe ka Akristau wakuyambirira. Mwa ciratizo, gulu lathu lidalinganizidwa ninga momwe Akristau wakuyambirira akhadalinganizidwira, tina anyakunyang’anira dera, akulu wa gwere, atumiki wakuthandiza, ninga momwe iwo akhambacitira. (Afil. 1:1; Tito 1:5) Ninga iwo, ifepano timbalemekeza malamulo ya Mulungu pa nkhani ya malume ya pa mphasa, malowozi, bzomwe Mulungu ambalewa pa nkhani ya kuphatisa basa mulopa na kukhotcerera gwere kuna wanthu omwe ambalamba kuteweza malamulo ya Mulungu. (Mab. 15:28, 29; 1 Ako. 5:11-13; 6:9, 10; Aheb. 13:4) Bibliya limbatiuza kuti pana “cikhulupiro cibodzi” comwe Mulungu ambacibvuma. (Aef. 4:4-6) Ifepano tina mwayi wakukhala wanthu wa Yahova na kudziwa cadidi cakulewa bza iye na bzomwe akufuna kudzacita kutsogolo. Tenepo, bwerani ticite ciri-centse comwe tingakwanise kuti tiphatisise cadidi. w21.10 23 ¶15-17

Jewosafati adagumana na bvuto likulu. Thimu likulu la acikunda wa Amoni, Amowabe na amuna wa kumapiri ya Seiri adamugopswa, adagopswa banja lace na wanthu wace. (2 Nkha. 20:1, 2) Kodi Jewosafati adacita ciyani? Iye adakumbira Yahova kuti amuthandize na kumupasa mphanvu. Mpembo wakubzicepesa wa Jewosafati, omwe uli pa 2 Nkhani 20:5-12, umbalatiza kuti iye akhathemba Baba wace walufoyi wakudzulu. Yahova adalewalewa na Jewosafati mwakuphatisa basa Mlevi munango wakucemeredwa Jaaziyeri ndipo adamuuza mafala ya m’vesi la leroli. Pakuti akhathemba Mulungu na mtima wace wentse, Jewosafati adacita bzomwe adauzidwa. Pomwe iye na wanthu wace adayenda kuti akagumane na anyamadulanthaka wawo, Jewosafatiyo alibe kuikha acikunda wa luso kutsogolo kwa acikunda wentse, koma adaikha anyakuimba. Yahova alibe kulekerera Jewosafati kukundidwa. Iye adakunda acikunda wa anyamadulanthaka wawo. — 2 Nkha. 20:18-23. w21.11 15-16 ¶6-7

Tikakhala tikugumana na mabvuto tingatsimikize kuti Yahova an’dzacita ciri-centse kuti atithandize kuti tipitirize kukhala wakukhulupirika. (2 Ako. 4:7-9) Tingatsimikize kuti Yahova an’dzapitiriza kutilatiza lufoyi lace lacadidi thangwe nyakunemba salimo adalewa kuti: ‘Maso ya Yahova yambawona wale omwe ambamugopa, wale omwe ambadikhirira lufoyi lace lacadidi.’ (Sal. 33:18-22) Pomwe tikhanati kuyamba kutumikira Yahova, tidalatizidwa lufoyi lomwe Mulungu ambalilatiza kuna wanthu wentse. Tsono pakuti tsapano ndife atumiki wace, timbagumana phindu na lufoyi lace lacadidi. Lufoyi lace lacadidiri limbamucitisa kuti atikhotcerere. Iye nthawe zentse an’dzakhala pafupi na ifepano ndipo an’dzacita bzomwe adalewa pakulewa bza ifepano. Iye akufuna kuti bzinthu bzitifambire bwino! (Sal. 46:1, 2, 7) Tenepo, bziribe basa mabvuto yomwe tikugumana nayo, Yahova an’dzatipasa mphanvu yomwe tikufunikira kuti tipitirize kukhala wakukhulupirika. w21.11 7 ¶17-18

Azinji wa ifepano tidawona kale munthu omwe adamala magole mazinji akukoyera cakumtima mwanzace wa ku basa, mwanzace wa ku xikola, wadzinza wace, ayai munthu wa m’banja mwace! Kumbukirani kuti abale wace khumi wa Zuze akhambamukoyera cakumtima, ndipo bzimwebzi bzidacitisa kuti iwo acite cinthu cakuipa kwene-kwene. (Ciy. 37:2-8, 25-28) Koma Zuze adacita nawo bzinthu mu njira yakusiyana! Pomwe iye akhatonga, alibe kuwabwezera bzinthu bzakuipa bzomwe iwo adamucitira, koma adawabvera ntsisi. Zuze alibe kukoya cakumtima. Koma iye adacita bzinthu mwakubverana na malango yomwe yadanembedwa patsogolo pace pa Mwambo 19:18. (Ciy. 50:19-21) Kulekerera abale wace komwe Zuze adacita mwa kuleka kuwakoyera cakumtima, kumbalatiza bzomwe Akristau an’funika kucita kuti Mulungu akomedwe nawo. Jezu adatilimbikisa kumbalekerera omwe ambatiphonyera. (Mat. 6:9, 12) Ndipo mpostolo Paulo adauzambo abale wace wacikristau kuti: “Abale wangu wakufunidwa, lekani kubwezera cakuipa.” — Aro. 12:19. w21.12 11 ¶13-14

Usiku bwa 14 Nisani, mu gole la 33 EC, Jezu adayenda ku zunde la Getsemani. Kumweko iye adapemba na mtima wentse kwa Yahova. (Luka 22:39-44) Pa nthawe yakunesayi, Jezu “adacita mipembo yakudandaulira acimbalira na kugwesa misozi.” (Aheb. 5:7) Kodi Jezu adapempherera ciyani usiku bwakuti mangwana yace angadaphedwa? Iye adakumbira mphanvu kuti apitirize kukhala wakukhulupirika kwa Yahova na kucita bzomwe iye ambafuna. Yahova adabva mpembo wakudandaulira wa Mwana waceyo ndipo adatuma anjo kuti akamupase mphanvu.Iye akhadziwa kuti bzikhali bzakufunika kupitiriza kukhala wakukhulupirika kuti acenese dzina la Baba wace. Yahova adatetekera mipembo yakudandaulira ya Jezu. Thangwe ranyi? Thangwe rakuti Jezu akhafunisisa kukhala wakukhulupirika kwa Baba wace na kucenesa dzina lace. Penu thupo lathu likulu ndakucitambo bzibodzi-bodzibzo, Yahova an’dzatawira mipembo yathu yakukumbira thandizo. — Sal. 145:18, 19. w22.01 18 ¶15-17

Wanthu azinji ntsiku zino ambakomedwa lini nafe thangwe rakuti timbapitira lini nkhani za ndale. Iwo ambafuna kuti tiyende kukavota, tsono ifepano timbadziwa kuti tikasankhula munthu kuti akhale mtongi wathu, timbakhala tikulamba Yahova. (1 Sam. 8:4-7) Pinango wanthu angakumbukembo kuti tin’funika kumbamanga maxikola, kumanga maxipitali na kucitambo mabasa yomwe yangathandize wanthu wa komwe timbakhala. Iwo ambaipidwa thangwe rakuti timbaikha basa lakupalizira pa mbuto yakuyamba pa moyo wathu, sikuti kuyezera kumalisa mabvuto ya dzikoli. Kodi n’ciyani cin’dzatithandiza kuleka kuluza cikhulupiro cathu? (Mat. 7:21-23) Cinthu cakufunika kwene-kwene kuna ifepano ndico kucita basa lomwe Jezu adatiuza kuti ticite. Tin’funika lini kutanganidwa na nkhani za ndale za m’dzikoli. Timbafuna wanthu ndipo timbafuna kuwathandiza akakhala akugumana na mabvuto. Tsono timbadziwa kuti njira yabwino yakuthandizira anzathu ndiyo kuwapfunzisa bza Umambo bwa Mulungu na kuwathandiza kuti akulise uxamwali bwawo na Yahova. w21.05 7 ¶19-20

Napo kuti atongi azinji ambalewa kuti ambatumikira Mulungu, iwo akufuna lini kusiya utongi bwawobo. Tenepo ninga momwe adacitira atongi wa mu nthawe ya Jezu, atongi wa ntsiku zinombo ambanyoza Nyakudzozedwa wa Yahova mwa kuboneresa ateweri wace wakukhulupirika. (Mab. 4:25-28) Kodi Yahova ambacita ciyani na wanthu amwewa? Salimo 2:10-12 ambatawira kuti: “Tsapano imwe wamambo, latizani kuzindikira, bvumani kulungamizidwa imwe ayeruzi wa pa dziko la pantsi. Tumikirani Yahova mwa mantha, ndipo kondwani mucitetemera. Lemekezani Mwanayo kuti Mulungu aleke kukalipa na kuti muleke kufera mu njira, pakuti ukali Bwace bumbagaka mwakamfulumize. An’kondwa ni wale omwe ambathawira kwa Iye.” Yahova mwakudeka mtima akupereka nthawe kuna wanthu wakunyozawa kuti akumbuke bwino pomwe madzi yakali m’mabondo. Iwo akanawo mpata wakuti acinje nzeru zawo acibvuma Umambo bwa Yahova. Tsono nthawe ikumala. (Zai. 61:2) Ino ni nthawe yakuti wanthu asankhule mwakamfulumize kudziwa cadidi na kusankhula kutumikira Yahova. w21.09 15-16 ¶8-9

Paulo akhafuna kulewa kuti ifepano tin’funika kumbakomedwa na bzinthu bzomwe tinabzo pa moyo wathu. (Afil. 4:12) Cimweci cikhali “cintsintsi” ca Paulo kuti bzinthu bzimufambire bwino. Cinthu cakufunika kwene-kwene pa moyo wathu ni uxamwali bwathu na Mulungu, sikuti bzinthu bzomwe tinabzo. (Hab. 3:17, 18) Kumbukirani bzomwe Mozeji adauza Ajirayeri pambuyo pa magole 40 ali m’dambo. Iye adati: “Yahova Mulungu wako akusimba bzentse bzomwe ukucita. Iye akudziwa bwino momwe mwapita namo mu dambo likululi. Yahova Mulungu wanu akhanamwe magole 40 yentseya ndipo mulibe kusaya cinthu.” (Bzak. 2:7) M’magole 40 yale, Yahova adapasa Ajirayeri mana kuti ambadye. Bzakubvala bzawo bzomwe adacoka nabzo ku Edjipito bziribe kusakala. (Bzak. 8:3, 4) Yahova ambakomedwa kwene-kwene ifepano tikambatenda na kukomedwa na bzinthu bzomwe iye ambatipasa napo bzicikhala bzing’ono-ng’ono, ndipo ticimbawona bzinthubzo kuti ni bzisimbo bzakucokera kwa iye. w22.01 5 ¶10-11

Amunamwe, imwepo mungapfunze na ciratizo ca Jewosafati. Imwepo muna udindo bwakukhotcerera banja lanu. Ndipopa imwepo mumbaphata basa na nyongo kuti mukhotcerere na kuthandiza banja lanu. Pomwe mukugumana na mabvuto, pinango mungabzithembe, mucikumbuka kuti mungakwanise kumalisa mabvutoyo mwekha. Tsono citani nyongo kuti muleke kukhala na nzeru zakumbabzithemba mwekha. Koma mbapembani kwa Yahova pamwekha kuti iye akuthandizeni. Kuthimizira bzimwebzi, mbapembani na mkazanu na mtima wentse. Mbafunani malango ya Yahova mwakupfunza Bibliya na mabukhu yomwe yambakonzedwa na gulu la Mulungu, ndipo mbaphatisani basa malango yomwe mwagumanayo. Tsono dziwani kuti wanthu winango angakomedwe lini na bzomwe mwasankhula kucita. Ndipo pinango iwo angalewe kuti kobiri na bzinthu bzomwe kobirizo zingagule ndibzo bzomwe bzingakhotcerere banja lanu. Tsono kumbukirani ciratizo ca Mambo Jewosafati. (2 Nkha. 20:1-30) Bzomwe iye adacita bzimbalatiza kuti adathemba Yahova. Yahova alibe kumusiya munthu wakukhulupirikayu ndipo iye an’dzakusiyanimboni lini. — Sal. 37:28; Aheb. 13:5. w21.11 15 ¶6; 16 ¶8

Mulungu adatilenga m’cifanikiso cace, ndipopa timbawawidwa kwene-kwene tikambawona wanthu akucitiridwa bzinthu bzakuipa. (Ciy. 1:26) Tsono pakuti ndife wakuperewera, tingawone nkhani mwakuphonyeka napo pomwe tikukumbuka kuti tikuidziwa bwino nkhaniyo. Kumbukirani kuti Djona adaipidwa pomwe Yahova adalatiza ntsisi kuna wanthu wa ku Ninive. (Djobi 3:10–4:1) Tsono onani bzomwe bzidacitika thangwe ra ntsisi za Yahova. Wanthu wakupitirira 120 000 omwe akhakhala mu mzinda wa Ninive adakungula acipulumuka! Ndipo pakumalizira tikuwona kuti ni Djona omwe akhafunika kucinja nzeru zace sikuti Yahova. Yahova ana ugo bwakusaya kuuza wanthu mathangwe yakucitira bzinthu. N’cadidi kuti Yahova adabvunzambo kale atumiki wace winango m’mbuyomu kuti alewe nzeru zawo pa bzinthu bzomwe akhafuna kucita. (Ciy. 18:25; Djobi 4:2, 3) Ndipo nthawe zinango iye akhambafotokoza kuti thangwe ranyi akufuna kucita cinthu cinango. (Djobi 4:10, 11) Tsono Yahova an’funika lini kucita kutikumbira kuti acite cinthu. — Zai. 40:13, 14; 55:9. w22.02 3-4 ¶5-6

Ifepano timbakhala ninga ‘wana’ tikambawona ‘winango kukhala’ wakutiposa. (Afil. 2:3) Tikakulisa khalidwe limweri, tin’dzacepesa kukalipisa wanthu winango. Abale na mpfumakazi zathu ambatiposa pakucita bzinthu bzinango. Bzimwebzi bzimbatinesa lini kubvesesa tikambawona makhalidwe yawo yabwino. Ifepano tin’funika kuphatisisa mafala yomwe mpostolo Paulo adauza Akristau wa ku Kolinto, yomwe yambati: ‘Mbani akukucitisa kukhala wakusiyana na winango? Inde, una ciyani comwe ulibe kucita kutambira? Penu udacita kutambira bzinthu bzimwebzo, thangwe ranyi ukubzikuza ninga kuti ulibe kucita kutambira?’ (1 Ako. 4:7) Tin’funika kukhala wanthu wakupenya kuti tireke kucita bzinthu bzomwe bzingacitise wanthu winango kutiwona kuti ndife wanthu wakufunika kwene-kwene kuposa winango. Mwa ciratizo, m’bale omwe ambakwanisa kufotokoza bwino nkhani ayai mpfumakazi yomwe imbayambisa mapfunziro mwakusaya kunesa, an’funika nthawe zentse kupasa mbiri Yahova pa bzinthu bzomwe ambacitabzo. w21.06 21-22 ¶9-10

Bzimbakhala bzakunesa kwene-kwene kuna Mboni zizinji za Yahova kulewalewa na wanthu m’mii mwawo. Apalizi winango ambakhala ku mbuto komwe kuna wanthu azinji omwe ambakhala nyumba zomwe mpsakunesa kuzifika ayai zomwe zina malitsito. Nyumbazo zimbakhala na mulindiri, omwe ambabvumiza lini munthu ali-wentse omwe alibe kucemeredwa kuti afike pamuipo. M’mbuto zinango, apalizi ambakagumana lini wanthu azinji pamui ayai ambakapalizira mii yomwe ina wanthu ang’ono-ng’ono. Ndipo pinango kuti apalizi afike mui na mui, ambafamba mtantho utali. Ndipo akafika pamuipo, pinango ambagumana palibe wanthu. Tikambagumana na mphitca ninga zimwezi, tin’funika lini kubwerera m’mbuyo. Yezerani kupalizira pa nthawe yakusiyana-siyana. Tin’dzakwanisa kugumana wanthu azinji tikambapalizira pa nthawe yomwe wanthuwo ambagumanika pamui. Napo kuti nthawe zizinji wanthu ambakhala lini pamui, tsono iwo ambadzabwerera basi pa mui. Abale na mpfumakazi zizinji ambawona kuti mpsabwino kupalizira masikati ayai ku maulo, thangwe rakuti wanthu azinji ambawagumana ali pamui. Kuthimizira bzimwebzi, anekaciro mui ambakhala apuma, ndipo ambakhala adakonzeka kuceza na wanthu pa nthawe zimwezi. w21.05 15 ¶5, 7

Kodi ntsiku zino timbagumanambo na bvuto ninga limweri? Inde. Wanthu azinji ambakomedwa lini akambawona kuti Mboni za Yahova zikucita lini nawo pabodzi miyambo yomwe imbabverana lini na Bibliya, ninga kusekerera ntsiku ya kubadwa na kucita Natale. Wanthu winango ambakalipa thangwe rakuti Mboni za Yahova zimbasekerera lini ntsiku za firiyado ayai zimbacita lini misinda ya nkhawa yomwe imbabverana lini na Fala la Mulungu. Wentse omwe ambakomedwa lini na bzomwe Mboni za Yahova zimbacita pa mathangwe yamweya, ambakhulupira kuti Mulungu ambabvuma momwe iwo ambamunamatira. Kulewa cadidi Mulungu ambakomedwa lini na wanthuwo akambacita miyambo yomwe imbabverana lini na bzomwe Bibliya limbalewa. (Marko 7:8, 9) Kodi n’ciyani cin’dzatithandiza kuleka kuluza cikhulupiro cathu? Tin’funika kukulisa lufoyi lathu pa malamulo ya Yahova na mitemo yace. (Sal. 119:97, 113, 163-165) Tikambafuna Yahova, ifepano tin’dzalamba miyambo yentse yomwe imbamukondwesa lini. Ndipo tin’dzabvuma lini kuti cinthu ciri-centse cititazise kufuna Yahova. w21.05 6 ¶15-16

Kodi tingaphatise tani basa malango ya mpostolo Pauloya? Tin’funika kupitiriza kukhala na cikhulupiro cakulimba, mwa kumbapfunza Bibliya ntsiku zentse, kupitiriza kupemba na kupitiriza kukhala wakutanganidwa pa basa lomwe Yahova adatipasa kuti ticite. (2 Tim. 4:4) Tikakhala na cikhulupiro, tin’dzakhala lini na mantha tikambabva nkhani zakunama. (Zai. 28:16) Lufoyi lomwe tinalo kwa Yahova, Fala lace na kwa abale wathu lin’dzatithandiza kuleka kubvuma kupumpsidwa na wale omwe adasiya cadidi. Pomwe Jezu akhali pantsi pano, wanthu azinji adamulamba. Tsono winango adamubvuma. Wanthuwo akuphatanidzambo muyeruzi m’bodzi wa nyumba ya mphala ya Sinedriyo, na ‘antsembe azinji’ omwe adayambambo kumukhulupira. (Mab. 6:7; Mat. 27:57-60; Marko 15:43) Ninga bzomwe wanthuwo adacita, ntsiku zino wanthu azinji akubvuma lini kupumpsidwa. Thangwe ranyi? Thangwe iwo ambadziwa ndipo ambafuna cadidi comwe cimbagumanika m’Bibliya. Fala la Mulungu limbati: ‘Omwe ambafuna lamulo lanu, ambakhala na mtendere uzinji; Palibe cinthu comwe cingawakhukhumudwise.’ — Sal. 119:165. w21.05 13 ¶20-21

Mpostolo Paulo adadziwa kuti bzentse bzomwe adacita pakutumikira Yahova, adabzicita sikuti na mphanvu zace, koma na mphanvu za Mulungu. Yahova adapasa mphanvu Paulo mwakuphatisa basa mzimu wace wakucena kuti Pauloyo akwanirise utumiki bwace bwino-bwino, napo kuti akhaboneresedwa, akhadafungiridwa m’kawoko na kugumanambo na mabvuto yanango. Timotio, mwanzace wa Paulo, adathembambo mphanvu za Mulungu kuti akwanise kucita utumiki bwace. Timotio adaperekeza Paulo pomwe akhambacita maulendo ya umisiyonario. Ndipo Paulo adauzambo Timotio kuti acite ulendo bwakuyenda kukazungira magwere na kukayalimbikisa. (1 Ako. 4:17) Pinango Timotio adabzibva kuti akhalibe kuthemera kucita bzimwebzi. Ndipopa Paulo adamuuza kuti: ‘Leka kubvuma kuti ali-wentse akunyoze pakuwona kuti ndiwe mng’ono.’ (1 Tim. 4:12) Pa nthawe imweyi Timotio akhana munga wace m’thupi, komwe kukhali ‘kuduwala-duwala.’ (1 Tim. 5:23) Napo bzikhali tenepo, Timotio akhadziwa kuti mphanvu ya mzimu wakucena wa Yahova, ingadamukhwimisa acipitiriza kupalizira bzipsa bzabwino na kutumikira abale wace. — 2 Tim. 1:7. w21.05 21 ¶6-7

Mafala yomwe yali pa Tiyago 1:19 yambaphata basa kwa omwe ambapereka malango. Tiyago adanemba kuti: “Munthu ali-wentse ambafulumize kubvesesa, ambacedwe kulewalewa ndipo aleke kumbafulumiza kukalipa.” Nthawe zinango mkulu angakumbuke kuti akudziwa bzentse pa nkhani inango, pomwe bziri lini tenepo. Mimwani 18:13 ambatikumbusa kuti: “Kutawira nkhani yomwe ukanati kuibvesesa, n’kupusa ndipo umbanyala.” Mpsabwino kubvesesa nkhaniyo mwakucita kubvunza munthuyo kuti iye afotokoze yekha. Ndipopa mkulu an’funika kuyamba watetekera bwino-bwino munthuyo pomwe akanati kupereka malango. Mkulu an’funika kubvunza kuti: “Kodi mukugumana na mabvuto yaponi pa moyo wanu?” “Kodi ningakuthandizeni tani?” Sikuti kundofikira kufotokoza mavesi yomwe akhadakonzekera. Akulu akacita bzimwebzi, angakwanise kuthandiza na kulimbikisa abale na mpfumakazi. Kupereka malango kumbathandauza lini kundowerengera munthu mavesi yakucepa ayai kumuuza bzinthu bzinango bzomwe angacite. Abale na mpfumakazi zathu ambafuna kubzibva kuti timbawafuna, timbadziwa bzomwe akugumana nabzo nakuti tikufuna kuwathandiza. w22.02 17 ¶14-15