Junho

Mkazi mamsiwayo akhabonera kwene-kwene, ndipo bzikhali bzakunesa kuti iye agumane bzomwe akhafunikira pa moyo wace. Tsono napo kuti bzikhali tenepo, mkaziyo adayenda pa mbuto yakucitira bzakupereka, ndipo mwakusaya kubziwonesera, iye adathusa mu thungwa tukobiri tuwiri twakucepa mphanvu tomwe pinango tulibe kulira pomwe tudagwa mu thungwamo. Jezu adawona bzomwe mkaziyo adathusa. Iye adathusa tukobiri tuwiri twakucemeredwa lepitoni tomwe tukhali tung’ono-tung’ono kwene-kwene, kusiyana na kobiri zinango zomwe zikhaphatisidwa basa pa nthawe imweyire. Tukobirito tukhakwana lini kugulira kambalame kabodzi, komwe kakhali m’gulu la tumbalame twakufewera kwene-kwene. Jezu adadabwa kwene-kwene na bzomwe mkazi mamsiwayo adacita. Ndipopa, iye adacemera anyakupfunza aciwalatiza mkaziyo, ndipo adawauza kuti: “Mkazi mamsiwa wakusaukayu, wathusa kobiri zizinji kuposa wentse.” Ndipo adawafotokozera kuti: “Wentse [maka-maka wanthu wakudala] athusa zomwe apunguza pa kobiri zizinji zomwe anazo, tsono mkaziyu mwa kusauka kwace, wathusa zentse zomwe akhanazo zomwe zingadamuthandiza pa moyo wace.” (Marko 12:43, 44) Pomwe mkazi mamsiwa akhapereka kobiri zentse zomwe iye akhanazo pa ntsiku imweyire, iye akhakhulupira kuti Yahova animusamalira. — Sal. 26:3. w21.04 6 ¶17-18

Pomwe Jezu akhali pa dziko la pantsi, iye adapitiriza kupalizira wanthu ndipo akufuna kuti ateweri wace acitembo bzibodzi-bodzi. (Ju. 4:35, 36) Pomwe Jezu akhali pabodzi na anyakupfunza wace, anyakupfunzawo akhapalizira na nyongo. (Luka 10:1, 5-11, 17) Pomwe Jezu adamangidwa na kuphedwa, anyakupfunza wacewo mu kanthawe kang’ono-ng’ono akhadasiya kupalizira. (Ju. 16:32) Tsono pomwe Jezuyo adadzalamusidwa, iye adauza anyakupfunzawo kuti apitirize kupalizira. Ndipo, pomwe iye adayenda kudzulu, anyakupfunzawo adapalizira na nyongo kwene-kwene, mwakuti anyamadulanthaka wawo adadandaula na bzimwebzi ninga momwe yakulatizira mafala ya m’vesi la leroya. Jezu adatsogolera basa lakupalizira lomwe Akristau wakuyambirira akhacita, ndipo Yahova adawasimba mwakucitisa kuti basalo likule. Mwa ciratizo, pa Pentekosite wa mu gole la 33, wanthu wakukwana 3000 adabatizidwa. (Mab. 2:41) Ndipo mbogo ya anyakupfunza idapitiriza kukula mwakuti bwerani mudzawone. (Mab. 6:7) Ndipo Jezu akhadaleweratumbo kuti mu ntsiku zakumalizira wanthu azinji angadadzabvuma bzipsa bzabwino. — Ju. 14:12; Mab. 1:8. w21.05 14 ¶1-2

Kodi imwepo mukukumbukira pomwe mudagumana cadidi ca m’Bibliya? Imwepo mudayamba kukumbuka kuti munthu ali-wentse angadakhulupirambo bzomwe imwepo mudayamba kukhulupira. Ndipo mudatsimikiza kuti mafala ya m’Bibliya, yangadathandiza wanthuwo kukhala na moyo wabwino tsapano, na kudikhira kudzakhala na moyo wabwino kutsogolo. (Sal. 119:105) Tenepo thangwe ra kukomedwa, mudafotokozerambo axamwali na adzinza wanu cadidi comwe mudacigumanaco. Tsono n’ciyani comwe cidacitika pomwe mudawafotokozerapo? Mudadabwa thangwe rakuti wanthu azinji adalamba bzomwe mudawauzabzo. Ifepano tin’funika lini kumbadabwa wanthu akambalamba mafala yomwe timbawapalizira. Pomwe Jezu akhali pa dziko la pantsi, wanthu azinji adamulamba napo kuti iye akhacita bzinthu bzakudabwisa bzakulatiza kuti iye akhadathandizidwa na Mulungu. Mwa ciratizo, Lazaro pomwe akhadafa, Jezu adamulamusa. Cimweci cikhali cinthu cakudabwisa mwakuti wale omwe akhamunyoza, alibe kugaza bzimwebzi. Napo bzikhali tenepo, atsogoleri wa Adjuda alibe kubvuma kuti Jezu akhali Mesiya. Tenepo, iwo adakhumba kupha Jezu na Lazaro kubodzi! — Ju. 11:47, 48, 53; 12:9-11. w21.05 2 ¶1-2

Citani ciri-centse comwe mungakwanise kuti mumbayende ku mitsonkhano kawiri-kawiri. Mitsonkhanoyo in’dzakulimbikisani ndipo mun’dzadziwanambo na abale na mpfumakazi zanu. Citani uxamwali na wanthu omwe angakupfunziseni bzinthu bzizinji napo akhale wale omwe mudasiyana nawo magole ayai cikhalidwe. Bibliya limbatikumbusa kuti pakati pa acikulire ‘pambagumanika nzeru.’ (Djobi 12:12) Acikulirembo angapfunze bzinthu bzizinji na maswaka yakukhulupirika. Davide akhali mng’ono kusiyana na Jonatani, tsono bzimwebzi bziribe kuphingiza kuti iwo akhale pa uxamwali bwakulimba. (1 Sam. 18:1) Davide na Jonatani akhathandizana kutumikira Yahova napo kuti akhagumana na mabvuto. (1 Sam. 23:16-18) Mpfumakazi Irina, yomwe ndiyo yokha Mboni ya Yahova m’banja mwace, idalewa kuti: “Abale na mpfumakazi zathu zacikristau angakhaledi ninga abereki wathu ayai abale wathu wa mimba ibodzi. Yahova angawaphatise basa kuti atipase bzomwe tikusaya.” Axamwali wanu akufuna kukulimbikisani na kukuthandizani. Tsono kuti acite bzimwebzi, imwepo mun’funika kuwafotokozera momwe mukubvera. w21.06 10-11 ¶9-11

Jezu adafotokoza ciratizo cakulewa bza mambo na kapolo wace. Mamboyo adalekerera kapoloyo mangawa makulu yomwe kapoloyo angadakwanisa lini kuyabweza. Na kupita kwa nthawe, kapolo m’bodzi-bodziyo adalamba kulekerera kapolo mwanzace omwe akhanaye mangawa mang’ono-ng’ono. Pakumalizira, mamboyo adafungirisa m’kawoko kapolo omwe adalamba kulekerera mwanzaceyo. Bzomwe kapolo omwe alibe kulekerera mwanzace ule adacita bziribe kuwawa iye yekha, bzidawawambo wanthu winango. Cakuyamba, kapoloyo adalatiza kuti akhalibe ntsisi, mwakuphata mwanzace acim’pitisa ‘m’kawoko mpaka abweze mangawayo.’ Caciwiri, iye adakalipisa akapolo anzace omwe adadziwa bzomwe bzikhacitikabzo. Pomwe ‘[akapolowo] adawona bzomwe bzikhadacitika, adabva ntsisi kwene-kwene.’ (Mat. 18:30, 31) Mpsibodzi-bodzimbo, bzakucita bzathu bzimbakalipisambo wanthu winango. Penu munthu an’tiphonyera ifepano ticilamba kumulekerera, kodi n’ciyani comwe cingacitike? Cakuyamba, iye angakomedwe lini thangwe ra ifepano kusaya kumulekerera, kusaya kumutetekera na kusaya kumulatiza lufoyi. Caciwiri, anzathu m’gwere angaipidwe akadziwa kuti ifepano tiri lini pa mtendere na munthuyo. w21.06 22 ¶11-12

Wanthu adalengedwa kuti ambatewezere Mulungu, tsono Sathani ambafuna kuwacitisa bzinthu bzakuipa. Pomwe Yahova ‘adawona kuti kuipa kwawanda’ pa nthawe ya Nowa, iye ‘[adakhumbula] kuti adakonza wanthu pa dziko la pantsi, ndipo bzidamuwawa kwene-kwene mu mtima mwace.’ (Ciy. 6:5, 6, 11) Kodi ntsiku zino bzinthu bzacinja bzicikhala bwino? Ne na pang’onopo! Dyabu ambakomedwa kwene-kwene na mtundu uli-wentse wa upombo bomwe bukucitika, kuphatanidzambo malume ya pa mphasa ya wanthu omwe ali lini pa banja pabodzi na malume ya pa mphasa ya amuna ayai akazi okha-okha! (Aef. 4:18, 19) Ndipo Sathani ambakomedweratu kwene-kwene akawona kuti wanthu omwe ambanamata Yahova acita pikado. Mu utongi bwa Sathani, sikuti ‘munthu [akundopweteka] munthu mwanzace pa kumutonga,’ koma iye akusamalirambo lini dziko la pantsi na bzirombo ninga momwe Yahova akhafunira kuti munthuyo acite. (Mpal. 8:9; Ciy. 1:28) Ndipo masiyentista yanango yambalewa kuti bzakucita bza wanthu bzingacitise kuti mitundu ya bzirombo na miti yakukwana midyau ibodzi bzizambazike magole yakubweraya. w21.07 12 ¶13-14

Atumiki wa Mulungu winango ambawawidwa thangwe ra kubzipasa mulandu pa bzinthu bzakuipa bzomwe adacita kale-kale. Ndipo bzimwebzi bzimbawacitisa kukumbuka kuti Yahova cipo aciwalekerera napo iwo acikungula tani. Penu imwepo mukubvambo tenepoyo, kudziwa kuti Yahova n’gwakukonzeka kulekerera atumiki wace thangwe lufoyi lace lacadidi kun’dzakuthandizani kutumikira Yahova mwakukondwa na mtima wakusaya kubzipasa mulandu. Bzimwebzi mpsakukwanisika thangwe rakuti “mulopa wa Jezu, omwe ni Mwana wace, un’dzacenesa pikado zathu.” (1 Ju. 1:7) Penu ifepano tidawofoka thangwe ra kabvuto kanango, kumbukirani kuti Yahova ngwakukonzeka kulekerera nyapikado omwe wakungula. Onani kubverana komwe Davide adafotokoza pakati pa lufoyi lacadidi na kulekerera. Iye adati: ‘Ninga momwe kudzulu kuliri padzulu kwene-kwene kuposa dziko la pantsi, lufoyi lace lacadidi ndapadzulumbo kwa wentse omwe ambamugopa. Ninga kumabvadzuwa kuli kutali na kumadokero, tenepombo iye ambafundusa bzakuphonya bzathu kutali na ife.’ — Sal. 103:11, 12. w21.11 5-6 ¶12-13

Mwamuna wacikristau an’funika kumbalemekeza mkazace. (1 Ped. 3:7) Fala lakuti kulemekeza limbathandauza kutetekera bwino-bwino wanthu akakhala akulewalewa. Mwa ciratizo, mwamuna ambalemekeza mkazace mwakumulatiza kuti ngwakufunika. Ndipo iye ambakumbira lini mkaziyo kuti acite bzinthu bzomwe angakwanise lini kubzicita. Ndipombo iye ambandendemezera lini mkazaceyo na akazi winango. Kodi mkazi ambabzibva tani mwamuna wace akambamundendemezera na wanthu winango? Mwamuna wa mpfumakazi yakucemeredwa Rosa, omwe ni Mboni lini ya Yahova, ambakhala acindendemezera mpfumakaziyo na akazi winango. Mpfumakazi Rosa imbabzibva lini bwino na mafala yakuipa yomwe bayaceyo ambalewa ndipo imbapenukira penu pana munthu omwe ambaifunambo. Mpfumakaziyo idati: “Nthawe zentse nimbafunika kutsimikiza kuti Yahova ambandiwona kuti ndine munthu wakufunika.” Mwakusiyana na bzimwebzi, mwamuna wacikristau ambalemekeza mkazace. Iye ambadziwa kuti kucita bzimwebzi kumbathandiza kuti banja lace likhale lakulimba ndipo kumbathandizambo kuti uxamwali bwawo na Yahova bukhalembo bwakulimba. Mwamuna omwe ambalemekeza mkazace ambamutumbiza, ambamuuza kuti ambamufuna na kumutenda. w21.07 22 ¶7-8

Kodi imwepo mumbacita thupo bzikakhala kuti cinthu comwe mukucifunisisa cikufika lini pa nthawe yomwe mukhaidikhirira? Tsono, tani mucidziwa kuti pana mathangwe yakubveka yomwe yakucitisa kuti cinthuco cireke kufika pa nthawe yomwe mukhaidikhirirayo? Kodi mungaleke kudikhirira mwakupirira? Ciratizo cibodzi comwe cimbalatiza kufunika kwa kupirira, cidanembedwa pa Mimwani 13:11. Cinemboci cimbati: ‘Cuma cakugumanidwa mwakusaya cirungamo cin’dzacepa, tsono cuma comwe munthu an’cigwezeka na manja yace [pan’gono na pang’ono] cin’dzawanda.’ Kodi mukukwanisa kuwona nfundo yace pamwepa? Munthu wanzeru ambacita bzinthu mwakuderekha na mwa kupirira, ndipo bzinthu bzimbamufambira bwino. Cinembo ca Mimwani 4:18 cimbalewa kuti ‘njira ya wanthu wakulungama iri ningati ceza ca kumacibese, comwe kungwerewera kwace kumbayenda kucithimizirika mpaka kungwerewera kwa ntsiku.’ Mafala yamweya yakubverana na momwe Yahova akuzimbulira bzomwe akufuna kucita na wanthu wace mwa pang’ono na pang’ono. Tsono vesi limweri limbatithandizambo kubvesesa momwe Mkristau ambacinjira bzinthu pa moyo wace acikhala wakufendererana na Yahova. Bzimbatenga nthawe kuti munthu akhale pa uxamwali bwakulimba na Yahova. w21.08 8 ¶1, 3-4

Pakuti dzikoli lasala pang’ono kumala, ifepano tina basa lizinji lakucita. (Mat. 24:14; Luka 10:2; 1 Ped. 5:2) Tentsenefe tikufuna kucita nyongo ikulu kwene-kwene pa kutumikira Yahova. Azinji akuthimizira utumiki bwawo. Winango akufuna kucita upainiya. Ndipo winango akufuna kutumikira pa Beteli ayai kuthandizira pa basa lakumanga-manga. Ndipombo abale azinji akucita ciri-centse comwe angakwanise kuti athemere kutumikira ninga atumiki wakuthandiza ayai akulu wa gwere. (1 Tim. 3:1, 8) Yahova ambakomedwa kwene-kwene akambawona atumiki wace akucita ciri-centse comwe angakwanise kuti amutumikire! (Sal. 110:3) Tsono kodi imwepo mudasunama thangwe rakuti mukanati kukwanisa kucita bzomwe mukufuna pa kutumikira Yahova? Penu n’tenepo, muuzeni Yahova momwe mukubvera. (Sal. 37:5-7) Ndipo cinthu cinango, kumbirani abale wakukhwima kuti akuthandizeni kuwona bzomwe mungacite kuti mucite bzizinji pa kutumikira Yahova. Ndipo yezerani kucita ciri-centse comwe mungakwanise kuti muphatise basa malango yawo. Mukateweza malangoyo, imwepo mun’dzakwanisa kucita bzomwe mukufunabzo. w21.08 20 ¶1; 21 ¶4

Mpolofeta wacikazi Ana omwe akhali mamsiwa, akhana magole 84, tsono “nthawe zentse akhagumanika mu templo.” Yahova adamusimba thangwe ra “kumbagumanika kawiri-kawiri mu templo,” ndipo iye adakhala na mwayi wakuwona Jezu pomwe akhali tcece. (Luka 2:36-38) Ntsiku zathu zino, acikulire azinji wakukhulupirika ni ciratizo cabwino kuna maswaka. Ndipo tin’dzagumana phindu likulu kwene-kwene tikapambula nthawe yakuceza nawo na kuwatetekera pomwe akufotokoza momwe adakhalira wakukondwa na bzomwe adagumana nabzo m’gulu la Yahova. Abale na mpfumakazi zathu zacikulire mbakufunika kwene-kwene kwa Yahova na kwa gulu lace. Iwo adawona momwe Yahova adawasimbira mu njira zakusiyana-siyana na momwe adasimbirambo gulu lace. Iwo adapfunza bzinthu bzizinji kwene-kwene kucokera pa bzinthu bzomwe adaphonya. Tenepo, mbawawonani ninga ntsantsa ya nzeru ndipo pfunzani nawo. (Mim. 18:4) Imwepo mukapambula nthawe yakuti muwadziwe, cikhulupiro canu cin’dzalimba. w21.09 3 ¶4; 4 ¶7-8; 5 ¶11, 13

Zaiya adalewa kuti wanthu wa Yahova ‘an’dzamwa mkaka wa wanthu wa mitundu.’ (Zai. 60:5, 16) Na maluso yakusiyana-siyana yomwe abale na mpfumakazi anayo m’gwere, basa lakupalizira likucitika m’madziko yakupitirira 240 ndipo mabukhu yakusanduliziridwa m’bzirewedwe bzakupitirira 1000. Ntsiku zakumalizira zino, kutekenyesa mitundu ya wanthu kukungingimiza wanthu kusankhula bzakucita. Kodi iwo an’dzathandizira Umambo bwa Mulungu, ayai an’dzathemba atongi wa dzikoli? Munthu ali-wentse ana udindo bwakusankhula yekha bzakucita. Napo kuti atumiki wa Yahova ambabvera malamulo ya boma la dziko lomwe akukhala, iwo ambapitira lini nkhani za ndale za dzikoli. (Aro. 13:1-7) Iwo ambadziwa kuti ni Umambo bokha bwa Mulungu bomwe bungakwanise kumalisa mabvuto ya wanthu. Umambobo bumbacita lini mbali ya dzikoli. — Ju. 18:36, 37. w21.09 17-18 ¶13-14

Pomwe munthu omwe mumbamufuna wasiya kutumikira Yahova, mpsabwino kwene-kwene kuna imwepo kupitiriza kubzilimbikisa na kulimbikisambo wanthu wa m’banja mwanu. Kodi mungacite tani bzimwebzi? Gumanani mphanvu kwa Yahova mwa kupitiriza kuwerenga Fala la Mulungu, kumbakumbukira bzomwe mwawerengabzo na kumbayenda ku mitsonkhano yacikristau. Mpfumakazi Joanna, yomwe pai wace na m’bale wace mkazi adasiya cadidi, idalewa kuti: “Ndikambawerenga Bibliya pa nkhani ya Abigayeli, Estere, Djobi, Zuze na Jezu, nimbatsangalazidwa kwene-kwene. Bziratizo bzawo bzimbandilimbikisa ndipo bzimbandithandiza kukhala na makumbukidwe yabwino.” Pomwe mukubzibva kuti mudasunama lekani kusiya kupemba kwa Yahova. Pitirizani kukumbira Mulungu wathu walufoyi kuti akuthandizeni kuwona bzinthu ninga momwe iye ambawonera, ndipo iye ‘an’dzakucitisani kukhala wakuzindikira na kukupfunzisani njira yomwe mun’funikira kufamba.’ (Sal. 32:6-8) Pinango bzingakuneseni kumufotokozera bwino-bwino Yahova momwe mukubvera. Koma Yahova ambabvesesa bwino-bwino kuwawa komwe mukubva mu mtima. Iye akukukumbirani kuti mumufotokozere bzomwe bziri mu mtima mwanu. — Kuf. 34:6; Sal. 62:7. w21.09 28 ¶9-10

Pomwe Paskwa ya mu gole la 32 EC idamala, mpostolo Pedru, Tiyago na Juwau adawona bzinthu bzakudabwisa. Pomwe akhali pa ntsonga ya phiri, pinango-pentse Phiri la Herimoni, Jezu adasandulika pamaso pawo. “Nkhope yace idayetima ninga dzuwa, ndipo bzakubvala bzace bzakunja bzidacena ninga ceza.” (Mat. 17:1-4) Apostolowo adabva Mulungu akulewa kuti: “Uyu ndiye Mwana wangu wakufunidwa, omwe nimbakomedwa naye. Mbamubverani.” Apostolo atatuwo adalatiza kucokera pa bzomwe adacita pa moyo wawo kuti adabvera Jezu. Ifepano tikufuna kutewezera bzomwe iwo adacita. Ifepano timbatenda thangwe rakuti Yahova ambatipasa malango mwakuphatisa basa “msolo wa gwere,” omwe ni Jezu Kristu. (Aef. 5:23) Ninga mpostolo Pedru, Tiyago na Juwau, tin’funika kutsimikiza ‘kumbamubvera.’ Mwa kucita bzimwebzi, tin’dzatambira bzisimbo bzizinji tsapano ndipo kutsogolo tin’dzakhala na mpfatso wakusaya kumala. w21.12 22 ¶1; 27 ¶19

Mkristau m’bodzi wa ku Kolinto akhacita upombo na mkazi wa pai wace. Bzimwebzi bzikhali bzakupasa manyazi kwene-kwene! Tenepo, Paulo adauza Akristau wa ku Kolinto kuti amucose m’gwere. Wanthu winango m’gwere, adakhala na makumbukidwe yakuipa thangwe ra khalidwe limweri, ndipo winango wa iwo adadzayamba kukumbuka kuti bzomwe munthuyo adacita ikhali lini pikado ikulu! (1 Ako. 5:1, 2, 13) Na kupita kwa nthawe, Paulo adadzadziwa kuti munthuyo adacinja. Iye akhadakunguladi bzacadidi! Tenepo Pauloyo adauza akulu kuti: “Imwepo mun’funika kumulekerera tsapano na mtima wentse na kumutsangalaza.” Onani bzomwe bzidacitisa Paulo kulewa mafalaya. Iye adati: “Kuti iye aleke kukundidwa na msunamo ukulu kwene-kwene.” Paulo adabvera ntsisi munthu omwe adakungulayo. Mpostolo Paulo akhafuna lini kuwona munthuyo wakusunama, wakuwawidwa mu mtima thangwe ra bzinthu bzomwe adacita thangwe bzimwebzi bzingadamucitisa kuleka kulinga kulekereredwa. (2 Ako. 2:5-8, 11) Ninga Yahova, akulu wa gwere ambafuna kubvera ntsisi wanthu. Iwo ambapereka cirango camphanvu bzikakhala kuti bzikufunikira, tsono iwo ambabverambo ntsisi munthu pakakhala kuti pana mathangwe yakucitira bzimwebzo. Akuluwo akasaya kucita bzimwebzo, ndiye kuti akubvera lini ntsisi munthuyo, koma akulekerera munthuyo kuti apitirize kucita bzinthu bzakuphonyeka. w21.10 11-12 ¶12-15

Kuwawidwa mu mtima kungandendemezeredwe na bzironda. Bzironda bzinango bzimbakhala bzing’ono; pomwe bzinango bzimbakhala bzikulu. Mwa ciratizo, pomwe tikufungula envelope, tsamba lomwe liri mkati lingaticeke pa cala cathu. Tingabve kuwawa, koma pambuyo pa ntsiku ibodzi ayai ntsiku ziwiri tingakumbukire lini mbuto yomwe tidabzicekayo. Mwakundendemerana na bzimwebzi, bzinthu bzinango bzomwe wanthu angatiphonyere bzingakhale bzing’ono. Mwa ciratizo, xamwali wathu angalewe ayai kucita cinthu mwakusaya kukumbuka bwino ndipo bzimwebzi bzingatiwawe, koma timbamulekerera mwakusaya kunesa. Tsono tikakhala na cironda cikulu, dotolo angafunike kusona cirondaco acicimanga na kalagadula. Ifepano tikambakhalira kuphata-phata pa cirondapo tingabve kuwawa kwene-kwene. Bzakupasa ntsisi mpsakuti munthu omwe waphonyeredwa cinthu cikulu angacitembo bzibodzi-bodzibzi. Iye angandokhalire kumbakumbukira bzinthu bzakuipa bzomwe adacitiridwa na momwe bzimwebzo bzikumuwawira. Tsono omwe ambakoya cakumtima ambabzipweteka okha. Ndipopa mpsabwino kwene-kwene kubvera malango yakugumanika pa vesi lathu la ntsiku ya lero. w21.12 12 ¶15

Tiyezezere kuti mkulu wa gwere akucita thupo na kabvalidwe pabodzi na kubzidekesa kwa m’bale ayai mpfumakazi inango. Mkuluyo angabzibvunze kuti: ‘Kodi pana mathangwe ya m’Bibliya kuti ndipereke malangoya?’ Pakuti mkuluyo an’funa lini kundofotokoza bzinthu bza mu msolo mwace, iye angabvunze mkulu mwanzace ayai Mkristau munango wakukhwima mwauzimu kuti adziwe kuti iye akuwonambo tani nkhaniyo. Ndipo iwo angawonembo pabodzi malango yomwe mpostolo Paulo adapereka pa nkhani ya kabvalidwe na kubzidekesa. (1 Tim. 2:9, 10) Paulo adafotokoza malango yabwino. Iye adalewa kuti Akristau an’funika kubvala mwakuthemera, mwa ulemu na mwakukumbuka bwino. Tsono Paulo alibe kuleweratu kuti n’ciyani comwe munthu angabvale na comwe angabvale lini. Iye adawona kuti Mkristau ali-wentse ana ufulu bwakusankhula yekha bzakubvala mwakubverana na bzomwe Bibliya limbapfunzisa. Ndipopa akulu an’funika kuyamba kuwonesesa penu kabvalidwe ka munthuyo kakulatiza ulemu na nzeru zabwino ayai ne. Mpsabwino kumbakumbukira kuti Akristau awiri wakukhwima angacite bzinthu bzakusiyana koma bzentsenebzo bzicikhala bzabwino. Tin’funika lini kumbangingimiza abale na mpfumakazi zathu kuti ambacite bzomwe ifepano tikuwona kuti mpsabwino. w22.02 16 ¶9-10

Tina mathangwe yakubveka yakulatizira lufoyi lacadidi kuna anzathu. Kodi mathangwe yamweyo ngaponi? Mtawiro timbaugumana pa mafala yakufuliziridwa ya Mimwani, yomwe yambati: ‘Leka kubvuma kuti lufoyi lacadidi na kukhala wakukhulupirika bzicoke pa iwepo. . . . Ukacita bzimwebzi, Mulungu an’dzakomedwa nawe ndipo un’dzakhala wanzeru.’ ‘Munthu wabwino ambabzibweresera phindu.’ ‘Omwe an’cita nyongo kuti akhale wakulungama na walufoyi lacadidi an’dzakhala na moyo.’ (Mim. 3:3, 4; 11:17; 21:21) Mafala yamweya yambalatiza mathangwe matatu yomwe timbalatizira lufoyi lacadidi. Cakuyamba, kulatiza lufoyi lacadidi kumbacitisa kuti Mulungu akomedwe nafe. Caciwiri, kulatiza lufoyi lacadidi kumbaticitisa kuti tigumane phindu. Mwa ciratizo, timbacita uxamwali bwakusaya kumala na anzathu. Cacitatu, kulatiza lufoyi lacadidi kumbaticitisa kudzatambira bzisimbo kutsogolo, kuphatanidza moyo wakusaya kumala. Kulewa cadidi, tina mathangwe yakubveka yakuti tibvere malango ya Yahova yakuti: ‘Mbacitiranani bzinthu mwa lufoyi lacadidi na mwa ntsisi.’ w21.11 8 ¶1-2

Penu mabvuto yomwe mudagumana nayo m’mbuyomu ayai tsapano yadacitisa kuti cikhulupiro canu cikhale cakusaya mphanvu, lekani kuwofoka. Onani mabvutoyo ninga mpata wakuti mulimbise cikhulupiro canu. Mbapembani kwa Yahova na mtima wentse maka-maka mukakhala mukugumana na bvuto likulu. Kumbukirani kuti Yahova an’dzakuthandizani mwakuphatisa basa adzinza wanu ayai azixamwali wanu. Imwepo mukabvuma kuti Yahova akuthandizeni kupirira mabvuto yomwe mukugumana nayo tsapano, mun’dzakwanisa kuwona kuti iye an’dzakuthandizani kupirira mabvuto yomwe mungadzagumane nayo kutsogolo. Jezu adafotokoza mbali zakusiyana-siyana za anyakupfunza wace zomwe adalatiza kuti akhana cikhulupiro cakucepa. Tsono, iye akhakhulupira kuti mwakuthandizidwa na Yahova iwo angadadzakwanisa kupirira mabvuto yomwe angadadzagumana nayo kutsogolo. (Ju. 14:1; 16:33) Iye akhakhulupirambo kuti cikhulupiro cakulimba cingadadzathandiza thimu likulu kupulumuka pa citsautso cikulu. (Apok. 7:9, 14) Mukaphatisa basa mpata uli-wentse omwe munawo wakulimbisa cikhulupiro canu, imwepo mun’dzakhalambo m’bodzi wa wanthu amwewa. — Aheb. 10:39. w21.11 25 ¶18-19

Ntsiku zino ifepano timbadikhirira lini kuti tin’khotcereredwa mwakudabwisa. Tsono timbadziwa kuti palibe munthu omwe ambathemba Yahova an’dzabonera na mabvuto mpaka kale-kale. Mwakusaya kucedwa, kuthemba kwathu luso la Yahova lakutikhotcerera kuniyezedwa. Mbverano wa mitundu ya wanthu wakucemeredwa Gogi wa Magogi ukadzaphindukira wanthu wa Mulungu, moyo wathu un’dzawoneka ninga kuti uli pa ngozi. Ifepano tin’dzafunika kukhala na citsimikizo cakuti Yahova an’dzatipulumusa. (Zakiy. 38:10-12) Tin’dzakhala tiribe bzifuzo bza nkhondo ndipo tin’dzakhala wanthu wakusaya kudziwa kumenya nkhondo. Mitundu ya wanthu in’dzatiwona ninga wanthu wakusaya kukhotcerereka. Iwo an’dzakwanisa lini kuwona bzomwe ifepano tin’dzawona na maso yathu ya cikhulupiro, bzomwe ni thimu la anjo lomwe lin’dzakhala ku mbali ya atumiki wa Mulungu kuti liwakhotcerere. Anyamadulanthaka wathuwo alibe maso yauzimu ndipopa an’dzakwanisa lini kuwona anjowo. Kulewa cadidi, iwo an’dzadzidzimuka akadzawona gulu la anyankhondo la Yahova likubwera kudzatikhotcerera! — Apok. 19:11, 14, 15. w22.01 6 ¶12-13

Abale na mpfumakazi zathu zentse, mbakufunika kwene-kwene kwa Yahova. Tenepo, an’funikambo kukhala wakufunika kuna ifepano. Tin’funika kukhala wakukonzeka kucita ciri-centse comwe tingakwanise kuti tiwathandize na kuwakhotcerera. Tikawona kuti tacita cinthu comwe munthu alibe kukomedwa naco, tin’funika lini kukhala phee ninga kuti palibe kucitika cinthu ticimbakumbuka kuti an’funika kutilekerera aciyebwa bzomwe bzacitikabzo. Thangwe ranyi wanthu winango ambawawidwa? Abale na mpfumakazi winango ambabziwona kuti alibe na basalo thangwe ra komwe iwo adakulira. Winango apfunza tsapanopa cadidi, ndipo akanati kudziwa momwe angacitire bzinthu wanthu akawaphonyera. Tsono ifepano tin’funika kucita ciri-centse comwe tingakwanise kuti tikhazikise mtendere na anzathu. Kuthimizira bzimwebzi, napo munthu omwe aphonyeredwayo an’funikambo kudziwa kuti an’funika lini kukhala acimbakalipa-kalipa. Akacita bzimwebzi an’dzakhala wakukondwa ndipo an’dzakhala pa uxamwali bwabwino na abale wace. w21.06 21 ¶7

Jezu ambabvesesa momwe mumbabvera. Tikakhala na thupo, timbakomedwa kukhala na xamwali omwe ambalatiza kuti akubvesesa momwe tikubvera, maka-maka ule omwe adagumanambo na mabvuto ninga yomwe tikugumana nayoyo. Jezu ni xamwali umweyo. Iye ambadziwa kuti kuwofoka na kufunikira thandizo n’ciyani. Iye ambadziwa bzomwe bzimbatiwofokesa ndipo an’dzawonesesa kuti tikutambira thandizo ‘pa nthawe yomwe tikufunikira thandizolo.’ (Aheb. 4:15, 16) Ninga momwe Jezu adabvumira thandizo la anjo m’zunde la Getsemani, ifepano tin’funikambo kubvuma thandizo lomwe Yahova ambapereka mwakuphatisa basa mabukhu, mavidiyo, nkhani, maulendo ya ubusa ya akulu ayai thandizo lomwe timbatambira kuna abale na mpfumakazi wakukhwima mwauzimu. Yahova an’dzakupasani “mtendere” wace. Tikambapemba kwa Yahova, timbatambira “mtendere wace omwe wanthu angaubvesese lini.” — Afil. 4:6, 7. w22.01 18-19 ¶17-19

Nthawe zentse Yahova ambacita bzinthu bzakulungama. Tsono pinango comwe cingatinese kukhulupira ni wanthu omwe iye adasankhula kuti atitsogolere. Ifepano tingambabzibvunze penu wanthu omwe ana udindo m’gulu la Yahova akucitadi bzinthu mwakubverana na bzomwe Yahova akufuna. Nkhani njakuti, tingalewe lini kuti timbakhulupira Yahova penu timbakhulupira lini wanthu omwe iye adawaikha kuti atitsogolere pa dziko la pantsi pano, omwe mbanthu omwe iye ambawathemba. Ntsiku zino Yahova akutsogolera mbali ya pa dziko la pantsi ya gulu lace mwakuphatisa basa “kapolo wakukhulupirika na wanzeru.” (Mat. 24:45) Ninga bungwe lakutonga la Akristau wakuyambirira, kapolo umweyu akutsogolera wanthu wa Mulungu pa dziko lentse la pantsi na kupereka malango kuna akulu wa magwere. Ndipo akuluwo ambaphatisa basa malango yomwe ambatambirayo mu gwere. Tingalatize kuti timbakhulupira bzinthu bzentse bzomwe Yahova ambacita mwa kubvera malango yomwe timbatambira ku gulu lace na kwa akulu. w22.02 4 ¶7-8

Ifepano tina mwayi ukulu kwene-kwene wakukhala Mboni za Yahova! Timbakomedwa tikathandiza munthu ‘omwe ana makumbukidwe yabwino yomwe yangamuthandize kukagumana moyo wakusaya kumala’ kuti akhale Mkristau. (Mab. 13:48) Ndipo timbabvambo ninga momwe Jezu adabvera. Iye adakomedwa kwene-kwene pomwe anyakupfunza wace adamufotokozera bzinthu bzabwino bzomwe adagumana nabzo pomwe akhapalizira. (Luka 10:1, 17, 21) Mpostolo Paulo adalimbikisa Timotio kuti: “Cita bzentse bzomwe ungakwanise kuti ukhale ciratizo cabwino na mpfunzisi wabwino.” Paulo adathimizira kulewa kuti: “Ukacita tenepo, un’dzabzipulumusa wekha pabodzi na wale omwe an’kutetekera.” (1 Tim. 4:16) Basa lathu lakupalizira limbapulumusa moyo wa wanthu. Ifepano timbacita bzentse bzomwe tingakwanise pa basa lakupalizira thangwe rakuti ndife nzika za Umambo bwa Mulungu. Ifepano nthawe zentse timbacita bzinthu bzomwe bzimbatumbizisa Yahova ndipo timbakhala na moyo wakubverana na mafala yabwino yomwe timbapalizira. (Afil. 1:27) Timbalatiza kuti timbacita bzentse bzomwe tingakwanise pa basa lakupalizira mwa kuyamba kukonzekera na kukumbira Yahova kuti atisimbe pomwe tikanati kuyenda kukapalizira wanthu. w21.10 24 ¶1-2

Munthu omwe ana “unthu bupsa” ambatewezera kakumbukidwe na kacitidwe ka bzinthu ka Yahova. Munthuyo ambakhala na makhalidwe yomwe yambacita mbali ya bzisapo bza mzimu ndipo ambabvuma kuti mzimu wa Mulunguyo utsogolere nzeru zace, momwe akubvera na kacitidwe kace ka bzinthu. Iye ambafuna Yahova ndipo ambafunambo wanthu wace. (Mat. 22:36-39) Iye ambapitiriza kukhala wakukondwa napo pomwe akugumana na mabvuto. (Tiy. 1:2-4) Iye ambafuna mtendere. (Mat. 5:9) Iye ambapirira ndipo ngwakudeka mtima akambacita bzinthu na anzace. (Akol. 3:13) Iye ambafuna bzabwino ndipo ambacita bzimwebzo. (Luka 6:35) Makhalidwe yace yambalatiza kuti ana cikhulupiro cakulimba kuna Baba wace wa kudzulu. (Tiy. 2:18) Iye ambakhala wakugwa mpfuwa wanthu akamucitira bzinthu bzakuipa ndipo ambakhalambo wakubziphata pomwe wanthu akuyezera kumupumpsa kuti acite bzakuipa. (1 Ako. 9:25, 27; Tito 3:2) Kuti tikhale na unthu bupsa, ifepano tin’funika kukulisa makhalidwe yomwe yadanembedwa pa Agalatiya 5:22, 23 na m’mavesi manango ya m’Bibliya. w22.03 8-9 ¶3-4

Akulu an’funika kutewezera mpostolo Paulo mwa kupalizira mui na mui. Tsono mpsimwebzi lini bzokha. Iwo an’funikambo kukhala wakukonzeka kupalizira mbuto iri-yentse na nthawe iri-yentse. (Aef. 6:14, 15) Akulu angatewezerembo Paulo mwakuphatisa basa nthawe yomwe ambamala mu utumiki kuti apfunzise abale pabodzi na atumiki wakuthandiza. (1 Ped. 5:1, 2) Tsono akulu an’funika lini kumala nthawe izinji akucita mabasa yawo ayai mabasa manango mpaka kusaya nthawe yakucita basa lakupalizira. (Mat. 28:19, 20) Kuti ambakwanise kucita bzinthu mwacikati-kati, nthawe zinango angafunike kulamba kucita mabasa manango. Pinango akayamba kupemba aciikumbukira bwino-bwino nkhaniyo, angakwanise kuzindikira kuti akabvuma basalo, an’tazira kucita mabasa manango yakufunika. Pinango angatazire kutsogolera Kunamata kwa pa Banja sumana iri-yentse, kucita basa lakupalizira bwino-bwino na kupfunzisa wana wawo basa limweri. Tsono Yahova ambabvesesa kuti iwo akucita bzimwebzi thangwe akufuna kucita bzinthu mwacikati-kati. w22.03 26-27 ¶4, 7; 28 ¶8

Kodi imwepo mukukumbukira mantha yomwe mudakhala nayo pomwe mukhakumbuka kukhala m’bodzi wa Mboni za Yahova? Pinango mukhakumbuka kuti mun’dzakwanisa lini kupalizira mui na mui, ayai pinango mudabva mantha kuti adzinza wanu ayai axamwali wanu angadaipidwa na bzimwebzo. Penu bziri tenepo, imwepo mun’dzabvesesa momwe nyakupfunza wa Bibliya akubvera. Jezu adalewa kuti wanthu winango angakhalembo na mantha ninga yamweya. Tsono iye adacenjeza ateweri wace kuti aleke kulekerera mantha yawatazise kutumikira Yahova. (Mat. 10:16, 17, 27) Pang’ono na pang’ono pfunzisani nyakupfunza wanu kuti ambauzembo winango bza cikhulupiro cace. Anyakupfunza wa Jezu pinango adacita thupo pomwe iye adawatuma kuti akapalizire. Tsono Jezu adawathandiza mwa kuwauza komwe angadakapalizira na mafala yomwe angadayapalizira. (Mat. 10:5-7) Kodi mungatewezere tani Jezu? Thandizani nyakupfunza wanu kuti adziwe komwe angakapalizire. Mwa ciratizo, mubvunzeni penu akudziwa munthu omwe angagumane phindu akapfunza cadidi cinango ca m’Bibliya. Muthandizeni kudziwa bzomwe angakalewe mwa kumufotokozera njira yakupusa ya momwe angakafotokozere cadidi ca m’Bibliya. w21.06 6 ¶15-16

“Mu mphindi zing’ono-ng’ono, maloja na nyumba bzidayamba kugwa.” “Wanthu adasaya bzakucita . . . Wanthu azinji adalewa kuti citeketekeco cidacitika m’phindi ziwiri basi. Kuna inepano cikhawoneka ninga kuti cidamala nthawe izinji cikucitika.” Yamweya ni mafala yomwe yadalewedwa na munthu omwe adapulumuka pa citeketeke comwe cidacitika ku Nepal mu 2015. Tsono lero lino, kutekenyeka kwakusiyana kwa kukucitika m’madziko mazinji. Mpolofeta Hagai adanemba kuti: ‘Ndipopa, Yahova wa anyankhondo alewa kuti: “Tsapanopapa, nin’tekenyesa pomwe kudzulu na dziko la pantsi.”’ (Hag. 2:6) Kutekenyesa komwe Hagai adalewa kuli lini ninga citeketeke caico comwe cimbandodzonga bzinthu. M’mbuto mwace, kutekenyesa komwe Hagai adakulewa kumbacitisa kuti bzinthu bzabwino bzicitike. Yahova caiyeyo adalewa kuti: ‘Nin’dzatekenyesa mitundu yentse, ndipo bzinthu bzakufunika bza mitundu yentse bzin’dzapita, ndipo nin’dzadzaza nyumbayi na mbiri.’ w21.09 14 ¶1-3

Kuti mukhale pa uxamwali bwakulimba na mwanzanu, bzimbafunika kuceza naye na kumufotokozera bza mu mtima mwanu. Mpsibodzi-bodzimbo na uxamwali bomwe tinabo na Yahova. Ifepano timbafunika kumufotokozera momwe tikubvera, bzomwe tikukumbuka, na thupo lathu pomwe tikupemba. Tikambacita bzimwebzi timbakhala tikulatiza kuti timbamukhulupira ndipo timbadziwa kuti iye ambatifuna. (Sal. 94:17-19; 1 Ju. 5:14, 15) Axamwali wakukhulupirika ni mphaso yakucokera kwa Yahova. (Tiy. 1:17) Baba wathu wakudzulu ambalatiza kuti ambafuna ali-wentse wa ifepano, mwakutipasa abale na mpfumakazi, omwe ‘[ambatifuna] nthawe zentse.’ (Mim. 17:17) Mu tsamba lomwe mpostolo Paulo adanembera Akolose, iye adaguma Akristau omwe adamuthandiza, ndipo adalewa kuti ‘iwo ni mtsangalazo ukulu kuna [iye].’ (Akol. 4:10, 11) Napo Jezu Kristu adakomedwa ndipo adatenda thandizo lomwe adalitambira kucokera kuna axamwali wace, omwe akhali wanjo na wanthu kubodzi. (Luka 22:43) Tikambaceza na Mkristau wakukhwima ticimufotokozera mabvuto yathu, bzikuthandauza lini kuti tina cikhulupiro cakusaya kulimba. M’mbuto mwace, bzimwebzi bzimbatikhotcerera. w21.04 24 ¶14-16

Kodi n’ciyani comwe mun’funika kucita penu Mkristau mwanzanu wacita bzinthu bzomwe mulibe kukomedwa nabzo? Citani nyongo kuti mupitirize kukhala pa mtendere. Pembani kwa Yahova mucimufotokozera momwe mukubvera. Mukumbireni Yahovayo kuti asimbe munthu omwe akuphonyeraniyo nakuti akuthandizeni kuwona makhalidwe yabwino yomwe Yahova ambakomedwa nayo kuna munthuyo. (Luka 6:28) Penu mun’kwanisa lini kuyebwa bzomwe m’bale wanu akuphonyerani, kumbukani njira yabwino ya momwe mungamufotokozere. Nthawe zentse bzimbakhala bwino kukumbukira kuti m’bale wanuyo alibe kukuphonyerani utowa. (Mat. 5:23, 24) Mukakhala mukuceza naye khalani na mtima wakufuna kumulekerera. Tsono mungacite tani bzikakhala kuti iye akufuna lini kuti mukhale naye pa mtendere? ‘Pitirizani’ kupirira. Lekani kuneta naye m’bale wanuyo. (Akol. 3:13) Kuposa bzentse, lekani kumukoyera cakumtima thangwe bzimwebzi bzingadzonge uxamwali bwanu na Yahova. Lekani kubvuma kuti cinthu ciri-centse cikudzongeni. Mukateweza bzimwebzi, mun’dzalatiza kuti mumbafuna kwene-kwene Yahova kuposa cinthu ciri-centse. — Sal. 119:165. w21.06 23 ¶15