Julho

Nkhani yakucosedwa kwa munthu m’gwere ni makonzedwe ya Yahova. Ni njira yabwino yomwe imbathandiza munthu ali-wentse m’gwere, kuphatanidzambo munthu omwe waphonya. Wanthu winango m’gwere angalewe kuti n’kuphonyeka kucosa munthu m’gwere, tsono kumbukirani kuti wanthu amwewa kawiri-kawiri ambafuna lini kulewa bzomwe nyakuphonyayo wacita. Bzimwebzi bzikacitika, ifepano timbakhala tiribe umboni bwentse bwakukwanira. Ndipo cinthu canzeru comwe tingacite ni kukhulupira kuti akulu omwe atonga nkhaniyo, acita nyongo yakuphatisa basa Bibliya kuti ‘ayeruzire Yahova.’ (2 Nkha. 19:6) Mukambathandizira makonzedwe ya akulu yakucosa munthu m’gwere omwe mumbamufuna, mumbakhala mukuthandiza munthuyo kuti abwerere kwa Yahova. Elizabeth, adalewa kuti: “Pomwe mwana wathu mkulu adacosedwa m’gwere, bzidakhala bzakunesa kwene-kwene kuleka kumbaceza naye. Koma pomwe iye adadzabwerera kwa Yahova, mwana wathuyo adadzalewa kuti bzidakhala bwino kucosedwako. Pomwe padapita nthawe, iye adadzalewa kuti ndidapfunza bzinthu bzizinji bzabwino.” w21.09 29 ¶11-12

Kumbukirani bza mkazi mamsiwayo. Mwakusaya kupenukira, mkaziyu akhafuna kupereka bzizinji kwa Yahova. Napo bzikhali tenepo, iye adacita bzomwe adakwanisa kucita. Mkaziyo adapasa Yahova bzomwe akhanabzo. Ndipo Jezu akhadziwa kuti cakupereka ca mkaziyu cikhali cakufunika kwene-kwene kwa Yahova. Pamwepa tikupfunza cinthu cakufunika kwene-kwene. Yahova ambakomedwa tikambamupasa bzomwe tingakwanise, bzomwe ni kumutumikira na moyo wathu wentse na mtima wathu wentse. (Mat. 22:37; Akol. 3:23) Ndipo Yahova ambakomedwambo tikambacita bzentse bzomwe timbakwanisa! Bzimwebzi bzimbaphatanidza nthawe na mphanvu zomwe timbaphatisa basa pakupalizira, kuyenda ku mitsonkhano na kucita ciri-centse comwe timbakwanisa pa kumunamata. Kodi mungaphatise tani basa pa moyo wanu nkhani yakulewa bza mkazi mamsiwa? Kumbukirani abale omwe imwepo mumbawadziwa. Winango wa iwo ambabzibva lini bwino thangwe ra kukumbukira kuti akucita lini bzizinji pa kutumikira Yahova. Pinango mungakumbukire bza mpfumakazi yacikulire yomwe iribe thanzi labwino, ayai iribe mphanvu yakucita bzizinji pa basa lakupalizira ninga momwe ikhacitira kale-kale. w21.04 6-7 ¶17, 19-20

Yahova akudziwa nthawe yabwino yomwe an’dzapfudza dziko lakuipali. Kupirira kwa Yahova kukuthandiza wanthu azinji kuti amudziwe, ndipo tsapano thimu likulu la mamidyau ya wanthu likumunamata. Ndipo wanthu wentsenewo ambatenda thangwe ra kudziwa kuti Yahova akupirira kuyambira kale-kale mpaka iwo kubadwa, acipfunza kumufuna na kubzipereka kwa iye. Wanthu an’dzabvesesa thangwe lomwe limbacitisa Yahova kuti apirire pomwe iye an’dzatipasa moyo wabwino thangwe ra kupirira kwathu mpaka kuphampha kwa dzikoli! Napo kuti pana bzinthu bzakuwawa na mabvuto yomwe Sathani adayakolomola, Yahova akupitiriza kukhala ‘Mulungu wakukondwa.’ (1 Tim. 1:11) Ifepano tingapitirize kukhala wakukondwa pomwe tikudikhirira mwakupirira kuti Yahova acenese dzina lace, amalise uipi, awonese kuti ndiye omwe adathemera kutonga na kumalisa mabvuto yentse yomwe tikugumana nayo. Tenepo, mbatitsimikizeni kupirira na kukhala na mtsangalazo ticidziwa kuti Baba wathu wa kudzulu akupirirambo. w21.07 13 ¶18-19

Wanthu azinji alibe kukhulupira Jezu pomwe akhali pa dziko la pantsi. Iwo akhambandokumbuka kuti Jezu ni mwana wa karipintero wakusauka basi. Ndipo iwo akhakumbukambo kuti Jezuyo akhali wa ku Nazaleti omwe ukhali mzinda ung’ono omwe ukhawoneka kuti ulibe na basalo. Napo Nataniyeri omwe adadzakhala nyakupfunza wa Jezu, pakuyamba adalewa kuti: ‘Kodi ku Nazaleti kungacoke cinthu cabwino? Pinango iye akhakumbukira polofesiya yomwe imbagumanika pa Mikeya 5:2 yomwe ikhadaleweratu kuti Mesiya angadadzabadwira ku Betelehemu, sikuti ku Nazaleti. Mpolofeta Zaiya akhadalewa kale kuti anyamadulanthaka wa Jezu angadadzafuna lini ‘kudziwa bza m’badwo wa [Mesiya].’ (Zai. 53:8) Tenepo, bzingadakhala kuti wanthuwo adapambula nthawe yakuti abvesese nkhani yentse, iwo angadadziwa kuti Jezu adabadwira ku Betelehemu ndipo iye akhali wa m’badwo wa Mambo Davide. (Luka 2:4-7) Na tenepo, mbuto yomwe Jezu adabadwira, ikhabverana na polofesiya ya pa Mikeya 5:2. Tsono n’ciyani comwe cikhali cakuphonyeka? Wanthuwo akhandothamanga na munyu uko nkhuku akanati kuiphata. Iwo akhalibe umboni bwakukwanira. Ndipopa iwo adalamba Jezu. w21.05 2-3 ¶4-6

M’Bibliya timbagumanambo nkhani za wanthu omwe adasimbidwa thangwe ra kubvera malango. M’bodzi wa iwo ni Djobi. Napo kuti iye akhafuna Mulungu ndipo akhafuna kuti Mulunguyo akomedwe naye, iye akhali lini wakulungama. Pomwe adagumana na mabvuto, iye adalewa bzinthu bzomwe bzikhali lini bzabwino. Thangwe ra bzimwebzi, Elihu na Yahova adamupasa malango. Kodi iye adacita ciyani? Iye adabzicepesa acibvuma malangoyo. Iye adati: “Ndalalewa mwakusaya kukumbuka bwino, ndipopa ndikubweza bzomwe ndalewa bzire. Ndikukungula m’pfumbi na m’dotha.” (Djobi 42:3-6, 12-17) Iye adalatiza kubzicepesako mwa kubvuma malango yomwe Elihu adamupasa, napo kuti Elihuyo akhali mwana na iye. (Djobi 32:6, 7) Mpsibodzi-bodzimbo na ifepano, kubzicepesa kun’dzatithandiza kuphatisa basa malango, napo pomwe tikuwona kuti tikufunikira lini malangoyo, ayai omwe watipasa malangoyo ni mwana. Tentsenefe tin’funika kukulisa cisapo ca mzimu kuti tikwanise kukhala apalizi na apfunzisi wabwino wa mafala ya Mulungu. w22.02 11 ¶8; 12 ¶12

Wentse m’gwere ana udindo bwa kuthandizira kuti gwerelo likhale mbuto ya mtendere yomwe palibe munthu ali-wentse omwe angabzibve kuti ali yekha. Bzomwe ifepano timbalewa na kucita bzingalimbikise kwene-kwene winango. Kodi imwepo mungathandize tani wale omwe ali okha m’cadidi kuti abzibve kuti ambacita mbali ya gwere? Yezerani kucita uxamwali na wanthu omwe mumbawadziwa lini. Tingayambe kucita bzimwebzi mwa kumbatambira na manja mawiri wanthu omwe ni kuyamba kubwera m’gwere. (Aro. 15:7) Tsono tin’funika kucita bzizinji sikuti kundowamusa mwa ntsangala basi. Ifepano tikufuna kucita uxamwali bomwe na kupita kwa nthawe bungadzakhale bwakulimba. Tenepo, khalani wakudeka mtima ndipo latizani kuti mumbacita thupo na wanthu omwe mumbawadziwa lini. Mwakusaya kuwapasa mibvunzo yomwe ingawacitise manyazi, yezerani kubvesesa mabvuto yomwe iwo akugumana nayo. Winango bzingawanese kufotokoza momwe akubvera, tenepo lekani kuwangingimiza kuti akufotokozereni basi. Mwakusiyana na bzimwebzi, mwakudeka mtima, citani mibvunzo mwanzeru ndipo tetekerani mitawiro yawo mwakupirira. Mwa ciratizo, imwepo mungawabvunze kuti mudziwe kuti iwo adafika tani pakudziwa cadidi. w21.06 11 ¶13-14

Timbatenda kwene-kwene mwayi omwe tinawo wakutumikira Yahova pabodzi mwakuphatana ninga ‘thimu libodzi’ lokha la mabira lakutsogoleredwa na ‘m’busa m’bodzi.’ Bukhu lakuti Gulu Lochita Chifuniro cha Yehova pa tsamba 165, limbalewa kuti: “Pomwe mukukomedwa na ciphatano cimweci, mun’funika kukumbukira kuti muna udindo bwakuthandizira ciphatanoco kuti cileke kumala.” Ndipopa ifepano tin’funika “kuyezera kumbawona abale na mpfumakazi zathu ninga momwe Yahova ambawawonera.” Kuna Yahova, tentsene ndife ‘wana ang’ono’ wakufunika. Kodi abale na mpfumakazi zanu mumbawawonambo tenepoyo? Yahova ambawona ndipo ambatenda bzentse bzomwe imwepo mumbacita kuti muthandize abalewo. (Mat. 10:42) Ifepano timbafuna abale wathu wacikristau. Tenepo, tikutsimikiza ‘kuleka kuikhira m’bale [wathu] mwala wakumukhukhumudwisa ayai cinthu cakumuphingiza.’ (Aro. 14:13) Ifepano timbawona abale na mpfumakazi zathu kukhala zakutiposa, ndipo tikufuna kuwalekerera na mtima wentse. Ndipo tireke kubvuma kukhukhumudwa na bzakucita bza anzathu. Bwerani ticite ‘bzinthu bzomwe bzimbabweresa mtendere na bzinthu bzomwe mpsakulimbikisana.’ — Aro. 14:19. w21.06 24 ¶16-17

Tikapfunza Fala la Mulungu na nyongo na kuphatisa basa malango yace pabodzi na ya gulu lace, pang’ono na pang’ono tin’dzakulisa makhalidwe yacikristau ndipo tin’dzadziwambo bzinthu bzizinji pakulewa bza Mulungu. Jezu adaphatisa basa ciratizo cinango pakufotokoza momwe mafala yomwe timbapalizira yambakulira m’mitima mwa wanthu omwe ambafuna bzinthu bzakulungama. Iye adati: ‘Mbeuzo zimbamera, zicikula. Tsono mwenekaciroyo ambadziwa lini momwe bzimwebzi bzimbacitikira. Thangwe mataka payokha pang’ono na pang’ono yambabereka bzisapo. Pakuyamba tsinde lace, patsogolo pace ngala, ndipo pakumalizira pace mumbacoka tirigu wakukhuma m’ngalazo.’ (Marko 4:27, 28) Jezu akhafuna kulewa kuti ninga momwe muti umbakulira pang’ono na pang’ono, munthu omwe ambabvuma mafala ya Umambo ambacinjambo pang’ono na pang’ono. Mwa ciratizo, anyakupfunza wathu wa Bibliya akakhala pa uxamwali na Yahova, ifepano timbayamba kuwona bzinthu bzabwino bzomwe iwo acita kuti acinje. (Aef. 4:22-24) Tsono tireke kuyebwa kuti ni Yahova omwe ambacitisa kuti mbeuyo ikule. w21.08 8-9 ¶4-5

Ifepano tingakhale wakukondwa tikambawona bzinthu mu njira yakuthemera. Munthu omwe ambakomedwa na ‘bzomwe maso yakuwona’ ambatenda bzomwe anabzo pa nthaweyo. Tsono, munthu omwe ambalinga bzomwe mtima umbakhumba iye ambakhumba cinthu comwe angakwanise lini kukhala naco. Kodi tikupfunza ciyani pamwepa? Kuti tikhale wakukondwa, tin’funika kukomedwa na bzomwe tinabzo na kukhumba kukhala na bzinthu bzomwe tingakwanise kukhala nabzo. Kodi mungakwanisedi kukhala wakukondwa na bzomwe munabzo kale? Wanthu azinji ambakumbuka kuti mpsakukwanisika lini thangwe timbakomedwa kupitiriza kupfunza momwe tingacitire bzinthu bzipsa. Tsono mpsakukwanisika. Kulewa cadidi ifepano tingakondwe na bzinthu bzomwe tinabzo pa nthawe imweyo. Kodi bzingacitike tani? Kuti tidziwe, onani ciratizo ca Jezu cakulewa bza matalento, comwe ciri pa Mateu 25:14-30 ndipo onani momwe tingakhalire wakukondwa na momwe tingathimizirire kukondwa kwathu na bzinthu bzomwe tikucita. w21.08 21 ¶5-6

Yahova ambacita thupo na wanthu ‘wakuwawidwa mu mtima na wakunyozeka.’ Tentsenefe, sikuti akulu okha, tingalimbikise abale na mpfumakazi m’gwere. Njira ibodzi ya momwe tingacitire bzimwebzi ni kuwalatiza kuti timbawafuna. Yahova ambafuna kuti ifepano tilatize abalewo kuti iye ambawafuna kwene-kwene. (Mim. 19:17) Ifepano tingathandizembo abale na mpfumakazi zathu mwa kukhala wakubzicepesa na wakuzindikira malire. Ifepano tin’funa lini kucita bzinthu bzomwe bzingacitise abale wathu kukhala na njiru. M’mbuto mwace, timbaphatisa basa luso na nzeru zathu kuti tilimbikisane. (1 Ped. 4:10, 11) Ifepano tingapfunze momwe tingacitire bzinthu na wanthu winango mwa kuwona momwe Jezu adacitira na ateweri wace. Iye akhali Munthu mkulu omwe adakhala na moyo pa dziko la pansi. Napo bzikhali tenepo, iye akhali ‘wakuderekha na wakubzicepesa.’ (Mat. 11:28-30) Pomwe iye akhapfunzisa wanthu, akhaphatisa basa mafala yakusaya kunesa kubvesesa na bziratizo bzomwe bzikhadekera wanthu wakunyozeka. — Luka 10:21. w21.07 23 ¶11-12

Mbapambulani nthawe yakuti mumbaceze na abale wacikulire. Bzingakhale bzakunesa kwa iwo kuwona, kufamba na kulewalewa bwino-bwino, tsono adabzikonzera ‘dzina labwino’ kuna Yahova. (Mpal. 7:1) Kumbukirani thangwe race Yahova ambawawona kuti iwo mbakufunika ndipo pitirizani kulatiza kuti mumbawalemekeza. Khalani ninga Elizeu. Iye adangingimira kuti akhale pabodzi na Eliya pa ntsiku yawo yakumalizira kukhala pabodzi. Katatu kentse Elizeu adalewa kuti: ‘Cipo ndicidzakusiyani.’ (2 Wam. 2:2, 4, 6) Latizani kuti mumbawakumbukira acikulire mwa kuwabvunza mibvunzo mwa kudeka mtima. (Mim. 1:5; 20:5; 1 Tim. 5:1, 2) Abvunzeni mibvunzo ninga iyi: “Pomwe imwepo mukhali tswaka, kodi n’ciyani comwe cidakutsimikizirani kuti mwagumana cadidi?” “Kodi bzomwe bzidacitika pa moyo wanu bzidakuthandizani tani kukhala pa uxamwali na Yahova?” “Kodi n’ciyani comwe cidakuthandizani kupitiriza kukhala wakukondwa pa kutumikira Yahova?” (1 Tim. 6:6-8) Mukamala atetekereni pomwe iwo akukufotokozerani bza moyo wawo. w21.09 7 ¶14-15

Imwepo mukambacita nyongo kuti mubvere lamulo lakupalizira na kupfunzisa wanthu, mumbakhala mukulatiza kuti mumbafuna Mulungu. (1 Ju. 5:3) Kumbukirani ibzi: Lufoyi lanu kwa Yahova lidakucitisani kuti mumbapalizire mui na mui. Kodi bzidakupusirani kubvera lamuloli? Pinango pentse ne. Tani pomwe mudapalizira nyumba yakuyamba, kodi mudatetemera na mantha? Tikupenukira lini kuti mudatetemeradi. Tsono mudadziwa kuti limweri ni basa lomwe Jezu akufuna kuti mucite, ndipo mudabvera lamulolo. Ndipo na kupita kwa nthawe, bzidakhala bzakupusa kucita basa lakupalizira. Tsono tani pakulewa bza kucitisa pfunziro la Bibliya? Kodi mumbacita mantha mukambakumbukira bzimwebzi? Pinango pentse. Tsono mukapemba kwa Yahova kuti akuthandizeni kukhala wakukhwimika na kugumana munthu kuti mumucitise pfunziro, iye an’dzakuthandizani kufuna kukhala na anyakupfunza. w21.07 3 ¶7

Kale-kale akapolo akhambaikhidwa cizindikiro kuti adziwike kuti mbayani. Mwakundendemerana na bzimwebzi, wanthu wentse ntsiku zino akudikhirira kudzaikhidwa cizindikiro cakuyezezera pa boko lawo ayai pa mkuma pawo. Makumbukidwe yawo na bzakucita bzawo bzin’dzalatiza kuti iwo mba ndale ndipo ambathandizira ndale. Kodi ifepano tin’dzabvuma kuikhidwa cizindikiro cakuyezezera ticithandizira ndale za maboma? Wale omwe ambalamba kuikhidwa cizindikiro an’dzagumana na mabvuto ndipo an’dzakhala pa ngozi. Ndipo bukhu la Apokalipse limbalewa kuti: “Palibe munthu omwe angadagula ayai kugulisa kupambula munthu omwe ana cizindikiro.” (Apok. 13:17) Tsono wanthu wa Mulungu ambadziwa bzomwe Mulunguyo an’dzacita na wentse omwe ana cizindikiro cakufotokozedwa pa Apokalipse 14:9, 10. Mwakusiyana na iwo, wanthu wa Mulungu an’dzabvuma lini kuikhidwa cizindikiroco. Ndipo kucita bzimwebzi kun’dzakhala ninga kulewa kuti: “Awa mba Yahova.” (Zai. 44:5) Tsapano ni nthawe yakuwona penu cikhulupiro cathu kwa Yahova n’cakulimba ayai ne. Penu n’cakulimba, Yahova an’dzakomedwa kulewa kuti ndife wace! w21.09 18 ¶15-16

Kuti ticite bwino utumiki bwathu, ifepano tin’funika thandizo la anzathu. Mpostolo Paulo adapfunzisa Timotio momwe angadapalizirira na kupfunzisa, ndipo adamuuza kuti aphatisembo basa bzomwe adapfunzabzo pakuthandiza wanthu anango. (1 Ako. 4:17) Ninga Timotio, ifepano tingapfunze na abale wathu wa m’gwere omwe ana luso. Ndipo ifepano tin’funikambo kumbapemba kwa Yahova kuti atithandize pa nthawe iri-yentse yomwe tikupalizira. Tikasaya kuthandizidwa na mphanvu ya mzimu wace wakucena, palibe ne m’bodzi wa ifepano omwe angakwanise kucita cinthu ciri-centse. (Sal. 127:1; Luka 11:13) Pomwe mukupemba kwa Yahova kuti akuthandizeni, mbalewani mwakubveka bwino bzinthu bzomwe mukufuna kuti iye akucitireni. Mwa ciratizo, mukumbireni kuti akuthandizeni kugumana wanthu omwe ana mtima wakufuna kudziwa cadidi, ndipo mbakukonzeka kukutetekerani. Tin’funika kumbapambula nthawe yakucita pfunziro la patekha. Fala la Mulungu limbati: “Mudziwe bzomwe Mulungu ambafuna, bzomwe mpsabwino, bzakubvumizika na bzakulungama.” (Aro. 12:2) Tikambapfunza Fala la Mulungu, timbafika pakumudziwa bwino Mulunguyo. Ndipo tikakhala tikuceza na wanthu pakulewa bza iye, wanthuwo ambakwanisa kuwona kuti ifepano timbakhulupiradi bzomwe tikulewabzo. w21.05 18 ¶14-16

Kodi mungabzibve tani penu mwacita nyongo yakupempherera nyakupfunza wanu kuti ayende patsogolo tsono palibe comwe cacinja ndipo mun’funika kusiya kucitisa pfunzirolo? Ayai tani penu imwepo mukanati kupfunzisa munthu mpaka kufika pa kubatizidwa? Kodi mun’funika kubzipasa mulandu mucikumbuka kuti Yahova akusimba lini basa lanu? Yahova ambawona nyongo na kupirira kwathu. Iye ambawona kuti basa lathu lakupalizira likutifambira bwino, tikambaliphata na mtima wathu wentse na lufoyi, bziribe basa penu wanthu an’titetekera ayai ne. Paulo adanemba kuti: “Mulungu ngwakulungama, iye an’dzayebwa lini basa lanu na lufoyi lomwe mudalatiza pa dzina lace, ndipo mumbalatiza bzimwebzi mwakutumikira anyakukhulupira anzanu mpaka pano.” (Aheb. 6:10) Yahova ambawona nyongo na lufoyi lathu napo paleke kucitika bzinthu bzabwino pa nyongo yomwe tacitayo. Tenepo, mafala yomwe Paulo adayalewa m’vesi la leroya yakuphatambo basa kwa imwepo. w21.10 25 ¶4-6

Kudeka mtima kwa Jezu na lufoyi lace bzikhawonekera pomwe akhambacita bzinthu na anyakupfunza wace. Iye akhadziwa kuti iwo akhadasiyana maluso na momwe adakulira. Tenepo, iwo akhambacita lini bzinthu bzibodzi-bodzi ayai kuphata basa mu utumiki mwakundendemerana. Napo bzikhali tenepo, Jezu akhambakomedwa na bzomwe wentse akhakwanisa kucita. Jezu adalatiza kuti akhatenda anyakupfunzawo pomwe adawafotokozera ciratizo ca matalento. Mu ciratizoco, mbuya adapasa basa akapolo wace ‘[mwakubverana na] nzeru’ za kapolo ali-wentse. Pa akapolo awiri, m’bodzi adagumana phindu kwene-kwene kuposa mwanzace. Tsono mbuyayo adatenda akapolo awiriwo na mafala mabodzi-bodzi, yakuti: ‘Wacita bwino, kapolo wabwino na wakukhulupirika!’ (Mat. 25:14-23) Nthawe zentse Jezu ambatilatizambo kuti ngwakudeka mtima na wa lufoyi. Iye ambadziwambo kuti ali-wentse wa ifepano ana luso lakusiyana na la mwanzace ndipo moyo wathu ngwakusiyana. Ndipo ambakomedwa akambatiwona tikucita bzentse bzomwe tingakwanise. Tin’funika kumbacitira bzinthu anzathu ninga momwe Jezu adacitira. w21.07 23 ¶12-14

Nthawe zinango Mambo Davide akhalatiza lini ntsisi. Mwa ciratizo, pomwe Nabali, munthu wakuuma mtima, adalewa mafala yakuipa na kulamba kupereka cakudya kuna acikunda wa Davide, Davideyo adakumbuka bza kupha Nabaliyo na kuphambo wanthu wentse wa pamui pace. Kubvera malango yabwino yomwe Abigayeli, mkazi wa Nabali adamuuza, kudamuthandiza kutcenkha kukhala na mulandu wa mulopa. (1 Sam. 25:9-22, 32-35) Onani kuti thangwe ra ciya, Davide akhafuna kupha Nabali na wanthu wentse wa m’banja mwace. Na kupita kwa nthawe, Davide adalewa kuti mwamuna wakudala wa mu ciratizo ca Natani akhafunika kuphedwa thangwe ra bzinthu bzomwe adacita. Pa nkhani yaciwiriyi, ifepano pinango tingabzibvunze kuti, thangwe ranyi munthu wabwino adatonga mu njira yakuuma mtima tenepayu? Kumbukirani momwe Davide akhabvera. Pa nthawe imweyo cikumbu-mtima cace cikhamuboneresa. Munthu akatonga anzace mwakuuma mtima, bzimbalatiza kuti uxamwali bwace na Yahova buli lini bwino. w21.10 12 ¶17-18; 13 ¶20

Na mafala ya m’vesi la leroli, ifepano tikupfunza kuti tingakwanise kutewezera Yahova, omwe ni ciratizo cikulu cakukhala wakucena. Ifepano tin’funika kukhalambo wakucena m’bzicito bzathu bzentse. Bzimwebzi bzingawoneke ninga kuti bzingakwanisike lini thangwe ndife wakuperewera. Napo mpostolo Pedru adacitambo bzinthu bzakuphonyeka; tsono bzomwe iye adacita bzimbalatiza kuti tingakwanise “kukhala wakucena.” Wanthu azinji ambakumbuka kuti kukhala wakucena kumbathandauza kukhala munthu wakudodoma omwe ambabvala mabatina ya gereja ndipo nthawe zentse nkhope yace imbalatiza kuti ni munthu wakupemphera. Tsono bzimwebzi mpsacadidi lini. Bibliya limbalewa kuti Yahova, omwe ngwakucena, ni “Mulungu wakukondwa.” (1 Tim. 1:11) Wentse omwe ambamunamata ambacemeredwa kuti ni wanthu “wakukondwa.” (Sal. 144:15) Jezu adatsimula wentse omwe akhabvala mabatina yakubziwonesera na kucita bzinthu bzakulungama kuti wanthu awawone. (Mat. 6:1; Marko 12:38) Ifepano ninga Akristau timbabvesesa kuti kukhala wakucena ciyani thangwe ra bzomwe tidapfunza m’Bibliya. Ifepano timbakhulupira kuti Mulungu wathu walufoyi wakudzulu angatipase lini lamulo lomwe tingakwanise lini kulibvera. w21.12 2 ¶1, 3

Pa mphaso zentse zomwe Mulungu adatipasa mwakudeka mtima, bzikuwoneka kuti mphaso yakufunika kwene-kwene ndiyo kumunamata. Ifepano timbalatiza kuti timbafuna Yahova mwa ‘[kumbabvera] malamulo yace.’ (1 Ju. 5:3) Libodzi pa malamulo yomwe Yahova akufuna kuti tibvere, ni lomwe Jezu adalipereka, lakupfunzisa wanthu na kuwabatiza. (Mat. 28:19) Ndipo iye adatipasambo lamulo lakuti timbafunane. (Ju. 13:35) Yahova an’dzawatambira na manja mawiri wale omwe ambabvera malamulo yace kuti acite mbali ya atumiki wace wa pa dziko lentse la pantsi. (Sal. 15:1, 2) Latizani kuti mumbafuna wanthu winango. Lufoyi ni khalidwe lakufunika kwene-kwene la Yahova. (1 Ju. 4:8) Yahova adalatiza kuti ambatifuna napo pomwe tikhanati kumudziwa. (1 Ju. 4:9, 10) Ndipo ifepano tikambalatiza kuti timbafuna wanthu winango timbakhala tikumutewezera. (Aef. 5:1) Njira yabwino yomwe tingalatizire kuti timbafuna wanthu winango, ndiyo kuwathandiza kupfunza bza Yahova pomwe nthawe ikalipo. (Mat. 9:36-38) Tikacita bzimwebzi, tin’dzakhala tikuwapasa mwayi wakuti adzacitembo mbali ya wanthu wa m’banja la Mulungu. w21.08 6 ¶13-14

Lufoyi lomwe Jezu akhanalo kwa Yahova lidamucitisa kuti abzipereke pa kutumikira Yahova na pa kutithandiza. (Ju. 14:31) Bzomwe Jezu adacita pomwe akhali pantsi pano bzidalatiza kuti iye akhafuna wanthu. Ntsiku iri-yentse iye akhalatiza lufoyi kuna wanthu ndipo akhawabvera ntsisi napo kuti wanthu winango akhamunyoza. Cinthu cikulu comwe Jezu adacita kuti alatize lufoyi kwa wanthu ndico kuwapfunzisa bza Umambo bwa Mulungu. (Luka 4:43, 44) Jezu adalatizambo kuti akhafuna kwene-kwene Mulungu na wanthu mwa kubvuma kubonera m’manja mwa wanthu wa pikado, acifa infa yakuwawa kwene-kwene. Ndipo bzimwebzi bzidatipasa mwayi wa kudzagumana moyo wakusaya kumala. Ifepano tidabzipereka kwa Yahova ndipo tidabatizidwa thangwe rakuti timbamufuna nakuti iye ni Baba wathu wa kudzulu. Ndipopa tin’funika kutewezera Jezu mwa kumbafuna kwene-kwene Yahova na anzathu. Mpostolo Juwau adanemba kuti: “Ule omwe ambafuna lini m’bale wace omwe ambamuwona, angakwanise lini kufuna Mulungu omwe ambamuwona lini.” — 1 Ju. 4:20. w22.03 10 ¶8-9

Napo kuti timbakomedwa kumala nthawe na Yahova, kucita bzimwebzi kulibe kupusa. Timbakhala na bzakucita bzizinji, ndipo bzimwebzi bzingatitazise kukhala na ndondomeko yabwino kuti ticite bzinthu bzauzimu. Basa lathu, banja na bzinthu bzinango bzingatimalire nthawe yathu ndipo bzingaticitise kubzibva kuti tiribe nthawe ya kupemba, kupfunza ayai kukumbukira bzomwe timbapfunza. Pana cinthu cinango pomwe comwe cingatimalire nthawe yathu. Tikasaya kukhala tceru, tingalekerere kuti bzinthu bzinango bzomwe bziribe kuipa bzitimalire nthawe yathu yomwe tingadaiphatisa basa kuti tikhale pa uxamwali bwakulimba na Yahova. Mwa ciratizo, mpsakufunika kukhala na nthawe yakucita masenzeka. Masenzeka yomwe timbacita yangakhale yabwino, koma tikambamala nthawe ikulu tikuyacita, tin’dzakhala tiribe nthawe yakucita bzinthu bzauzimu. Tenepo, tin’funika kumbaikha masenzeka pa mbuto yace. — Mim. 25:27; 1 Tim. 4:8. w22.01 26 ¶2-3

Pomwe Yahova adauza Ajirayeri kuti ambafune anzawo, iye akhathandauza lini kuti iwo akhafunika kumbandofuna wanthu wa mtundu wawo okha ayai wa dziko lawo okha basi. Iwo adauzidwambo kuti ambafune wanthu wa madziko manango omwe akhakhala pakati pawo. Bzimwebzi bzidanembedwa mwakubveka bwino pa Mwambo 19:33, 34. Munthu wa dziko linango akhafunika kucitiridwa bzinthu “ninga Mjirayeri,” ndipo Ajirayeri akhafunika “kumufuna” ninga momwe akhafunirana okha-okha. Mwa ciratizo, Ajirayeri akhafunika kulekerera kuti wanthu wa madziko manango na anyakusauka wa dziko lawo aphalasire m’minda yawo. (Mwam. 19:9, 10) Nfundo yakufuna wanthu wa m’madziko manango ikuphatambo basa kuna Akristau ntsiku zino. (Luka 10:30-37) Mwa njira iponi? Pana wanthu azinji kwene-kwene omwe adacoka m’madziko yawo ndipo ambakhala m’madziko manango, ndipo pinango winango ambakhala pafupi na imwepo. Tenepo, mpsakufunika kwa ifepano kucitira bzinthu amuna, akazi na wana amwewa mu njira yakulatiza kuti timbawafuna na kuwalemekeza. w21.12 12 ¶16

Tikambalinga Yahova kuti atitsogolere tsapano, tin’dzakhala na citsimikizo centse cakuti iye an’dzatipulumusa kutsogolo. Pambafunika cikhulupiro camphanvu kuti tithembe Yahova kuti tikumbire patrau wathu kuti atipase nthawe yakugumanika pa mtsonkhano wa dera ayai wa cigawo ayai kuti atipase nthawe yakugumanika pa mitsonkhano yentse na kumbayenda mu utumiki bwakumunda. Tsono tani patrau wathuyo acilamba mkumbiro wathu ndipo aciticosa basa? Kodi tin’dzakhala na cikhulupiro cakuti Yahova an’dzatisiya lini nakuti iye nthawe zentse an’dzatipasa bzakufunikira pa moyo wathu? (Aheb. 13:5) Atumiki azinji wa nthawe zentse angafotokoze bzomwe bzidawacitikira bzakulatiza momwe Yahova adawathandizira pomwe iwo akhafunikira thandizo lace. Kulewa cadidi Yahova ngwakukhulupirika. Na Yahova ku mbali yathu, tiribe mathangwe yakugopera bza kutsogolo. Mulungu wathu cipo acidzatisiya malinge tikapitiriza kuikha bzomwe ambafuna pa mbuto yakuyamba pa moyo wathu. w22.01 7 ¶16-17

Thangwe ranyi nthawe zinango bzingatinese kukhulupira akulu? Tiyezezere kuti munthu omwe wacosedwa m’gwere ni xamwali wathu wapamtima. Pinango tingawone ninga kuti akulu akuidziwa lini bwino nkhaniyo, ayai tingabzibvunze penu Yahova angadatongambo tenepo nkhaniyo. Kodi n’ciyani comwe cingatithandize kuleka kuipidwa na bzomwe akulu acita? Mpsabwino kukumbukira kuti kucosa munthu m’gwere ni makonzedwe ya Yahova ndipo bzimwebzi bzingathandize gwere na nyakuphonyayo. Kusaya kucosa m’gwere munthu omwe alibe kukungula, kungadzonge gwerelo. (Agal. 5:9) Ndipo iye angazindikire lini kuti waphonya kwene-kwene ndipo angadziwe lini kuti an’funika kucinja nzeru zace na bzicito bzace kuti akhale pomwe pa uxamwali na Yahova. (Mpal. 8:11) Ndipopa penu munthu an’funika kucosedwa m’gwere, akulu ambacitadi bzimwebzo. w22.02 6 ¶13-14

Kukhala wakudeka mtima na wakupirira n’kwakufunika, maka-maka bzikakhala kuti munthu akulamba kuphatisa basa malango yakucokera m’Bibliya yomwe apasidwa. Mkulu wa gwere an’funika kumbatcenkha msambo wakumbakalipa bzikakhala kuti munthu walamba kutetekera ayai kuphatisa basa malango yomwe iye wapereka. Pomwe mkulu wa gwere akucita mipembo yace ya payekha, iye angakumbire Yahova kuti athandize m’bale omwe an’funa kumupasa malango kuwona kuti n’thangwe ranyi malangoyo ngakufunika kwa iye na kuyaphatisa basa. Pinango pangafunikire nthawe kuti m’bale omwe wapasidwa malangoyo akumbukire bwino-bwino malango yomwe apasidwayo. Mkulu wa gwere akakhala wakupirira ndipo akambalewalewa mwakudeka mtima, bzin’dzakhala bzakusaya kunesa kwa m’baleyo kutetekera malango yace. Tsono nthawe zentse malangoyo yan’funika kucokera m’Fala la Mulungu. Bzomwe tikufuna ni kundocitisa lini kuti malango yathu yakhale yabwino koma tikufunambo kuti malangoyo yacitise kuti “mtima ukondwe.” — Mim. 27:9. w22.02 18 ¶17; 19 ¶19

Tikapemba kwa Yahova kuti atithandize kupirira bvuto lomwe tikugumana nalo ayai kuti atithandize kukunda makumbukidwe yakuipa, pinango pangatenge nthawe kuti Yahova atawire mipembo yathuyo. Thangwe ranyi Yahova ambatawira lini mipembo yathu yentse pa nthawe yomwe tikufuna? Iye ambawona mipembo yomwe timbayicita na mtima wentse kukhala umboni bwakuti timbamukhulupira. (Aheb. 11:6) Yahova ambafunisisambo kutiwona tikucita nyongo yakukhala na moyo mwakubverana na mipembo yathuyo na kucita bzomwe iye ambafuna. (1 Ju. 3:22) Tenepo, ifepano tin’funika kumbapirira na kucita bzinthu mwakubverana na mipembo yathu pomwe tikuyezera kukunda bzicito bzakuipa ayai kutepa. Jezu adatithandiza kubvesesa kuti mipembo yathu inango ingatawiridwe lini pa nthawe imweyoletu. Iye adalewa kuti: ‘Pitirizani kukumbira ndipo mun’dzapasidwa. Pitirizani kunyang’ana, ndipo mun’dzagumana. Pitirizani kugogodza, ndipo an’dzakufungulirani. Pakuti, munthu ali-wentse omwe an’dzapitiriza kukumbira, an’dzapasidwa; omwe an’dzapitiriza kupsaga, an’dzagumana; ndipo omwe an’dzapitiriza kugogodza, an’dzafunguliridwa.’ — Mat. 7:7, 8. w21.08 8 ¶1; 10 ¶9-10

Kuti mukulise cikhulupiro kuna Mulengi wanu, imwepo mun’funika kupitiriza kupfunza Fala la Mulungu. (Djos. 1:8) Kumbukirani bzinthu bzomwe Bibliya likhadalewa kale kuti bzin’dzacitika ndipo bzidakwanisikadi na momwe anyakunemba Bibliya wakusiyana-siyana adanembera nkhani zakundendemera. Kucita bzimwebzi kun’dzalimbisa cikhulupiro canu cakuti Mulengi walufoyi na wa nzeru ndiye omwe adatilenga, nakuti ndiye omwe adafulizira Bibliya kuti linembedwe. (2 Tim. 3:14; 2 Ped. 1:21) Pomwe mukupfunza Fala la Mulungu, onani momwe malango yace yangakuthandizireni pa moyo wanu. Mwa ciratizo, Bibliya likhadaleweratu kuti kufuna kwene-kwene kobiri kumbabweresa mabvuto na ‘bzakuwawa bzizinji.’ (1 Tim. 6:9, 10; Mim. 28:20; Mat. 6:24) Tenepo, malango ya m’Bibliya yakuti tin’funika lini kumbafuna kobiri kwene-kwene ngakuthandiza! Kodi imwepo mukukumbukira nfundo zinango za m’Bibliya zomwe zidakuthandizani kale? Tikambawona kuti nfundo za m’Bibliya n’zakuthandiza pa moyo wathu, ifepano tin’dzathemba nzeru zomwe Baba wathu walufoyi adatipasa. (Tiy. 1:5) Ndipo bzimwebzi bzin’dzacitisa kuti moyo wathu ukhale wakukondwa. — Zai. 48:17, 18. w21.08 17-18 ¶12-13

Penu imwepo mwafika pa ucikulire, tsimikizani kuti Yahova ambakumbukira basa lomwe mudalicita kale-kale. Imwepo mudapalizira na nyongo, mudapirira mazunzo napo kuti yakhali yakuwawa kwene-kwene, mudakhala na moyo mwakubverana na mitemo yakulungama ya m’Bibliya, mudakhala na maudindo makulu ndipo mudapfunzisambo winango bzinthu bzizinji. Mudacita ciri-centse pa moyo wanu kuti mucite bzinthu mwakubverana na kucinja kwa bzinthu mu gulu la Yahova ndipo mudathandiza na kulimbikisa abale winango omwe akucita utumiki bwa nthawe zentse. Dziwani kuti Yahova Mulungu ambakufunani kwene-kwene thangwe rakuti ndimwe wakukhulupirika. Iye adalewa kuti ‘an’dzalekerera lini wanthu wace wakukhulupirika’! (Sal. 37:28) Iye akukutsimikizirani kuti: “Nin’dzakusamalirani mpaka tsisi lanu litacoka invi.” (Zai. 46:4) Tenepo lekani kukumbuka kuti thangwe rakuti mwakalamba, imwepo ndimwe lini wakufunika pomwe mu gulu la Yahova. Imwepo ndimwe wakufunika kwene-kwene! w21.09 3 ¶4

Yahova ambalatiza ntsisi thangwe rakuti iye ngwanzeru kwene-kwene. Yahova nthawe zentse ambacita bzinthu bzomwe bzimbapasa phindu cirengedwe cace. Bibliya limbalewa kuti: “Nzeru yakucokera kudzulu . . . [njakudzala] na ntsisi na bzisapo bzabwino.” (Tiy. 3:17) Ninga m’bereki walufoyi, Yahova ambadziwa kuti ntsisi zimbathandiza wana wace. (Zai. 49:15) Ntsisi za Mulungu zimbacitisa kuti wanthu wakuperewera akhale na cidikhiro. Tenepo, nzeru za Yahova zakusaya malire zimbamucitisa kubvera ntsisi munthu, bzikakhala kuti pana mathangwe yakucitira bzimwebzo. Tsono Yahova ambadziwambo nthawe yomwe angabvere lini munthu ntsisi. Pakuti iye ngwanzeru, ambabvera lini ntsisi munthu omwe akucita pikado utowa. Tiyezezere kuti mtumiki wa Mulungu akucita pikado utowa. Kodi n’ciyani comwe tin’funika kucita naye? Mwakufuliziridwa, Paulo adalewa kuti: “Muleke kubverana na” munthuyo. (1 Ako. 5:11) Nyapikado omwe ambakungula lini ambacosedwa m’gwere. Kucita bzimwebzi n’kwakufunika thangwe kumbakhotcerera abale na mpfumakazi zathu zakukhulupirika ndipo kumbalatizambo kuti bzomwe Yahova ambacita mpsakucena. w21.10 9-10 ¶7-8

Tikambathandizira basa la Umambo na bzakupereka bzathu timbakhala tikunamata Yahova. Ajirayeri akhafunika lini kukawonekera kwa Yahova cimanja-manja. (Bzak. 16:16) Iwo akhafunika kunyamula bzinthu bzomwe akhanabzo kuti akabzipereke kwa Yahova. Akacita bzimwebzi, akhalatiza kuti akutenda bzentse bzomwe Yahova akhawacitira. Kodi ifepano tingalatizembo tani kuti timbatenda Yahova thangwe ra bzinthu bzabwino bzomwe ambaticitira? Cinthu cibodzi comwe tingacite ni kupereka kobiri yomwe tinayo kuti tithandizire mabasa ya pa gwere lathu na basa la pa dziko lentse. Pa nkhani imweyi, mpostolo Paulo adalewa kuti: “Kupereka na mtima wentse kumbakondwesa Mulungu thangwe iye ambafuna kuti munthu apereke mwakubverana na bzomwe anabzo.” (2 Ako. 8:4, 12) Yahova ambakomedwa kwene-kwene na bzakupereka bzomwe timbacita na mtima wentse napo kuti tingapereke kobiri zing’ono-ng’ono ayai zizinji. — Marko 12:42-44. w22.03 24 ¶13

Akulu angakwanise lini kumalisa mabvuto yentse yomwe wanthu wa Yahova akugumana nayo. Napo bziri tenepo, Yahova ambafuna kuti akulu acite ciri-centse comwe angakwanise kuti alimbikise na kukhotcerera mabira yace. Kodi akulu angacite tani kuti ambakhale na nthawe yakuthandiza abale na mpfumakazi napo kuti ana bzizinji bzakucita? Tewezerani bzomwe Paulo adacita. Paulo akhawona bzomwe angadacita kuti ambatende abale wace na kuwalimbikisa. Akulu angacite bwino kumutewezera mwa kumbacita bzinthu mwa lufoyi na mwakudeka mtima kwa abale na mpfumakazi. (1 Ates. 2:7) Paulo adatsimikizira Akristau anzace kuti akhawafuna nakuti Yahova akhawafunambo. (2 Ako. 2:4; Aef. 2:4, 5) Paulo akhambacita bzinthu na abale wa m’gwere ninga axamwali wace, ndipo akhambakhala na nthawe ya kumbaceza nawo. Iye adawalatiza kuti akhawakhulupira mwa kumbatsudzuka kuwauza bzinthu bzomwe bzikhamucitisa thupo na bzinthu bzomwe akhatazirambo kucita. (2 Ako. 7:5; 1 Tim. 1:15) Napo bzikhali tenepo, Paulo akhambandofotokoza lini mabvuto yace koma iye akhafuna kuthandiza abale wace. w22.03 28 ¶9-10