Agosto

Pinango Jezu akhalewa bza acikunda wa Roma omwe adamukhomerera manja na minyendo pa muti wakuzunzidwira. Jezu alibe kubvuma kuti bzomwe bzidamucitikirabzo bzimucitise kukhala na ukali, nakuti atazire kulekerera wanthu omwe adamuboneresawo. (1 Ped. 2:23) Ninga Jezu, ifepano tin’funika kukhala wakukonzeka kumbalekerera anzathu. (Akol. 3:13) Wanthu winango angakhale adzinza wathu, omwe angatibonerese thangwe ra kusaya kubvesesa bzomwe timbakhulupira, ayai momwe timbacitira bzinthu pa moyo wathu. Iwo angatinamizire, angatinyazise pakati pa wanthu azinji, angating’ambire mabukhu yathu, ayai angatigopswe mwakulewa kuti an’timenya. Tsono m’mbuto mwakuwakoyera cakumtima, tingakumbire Yahova kuti awafungule maso kuti ntsiku inango iwo adzapfunze cadidi. (Mat. 5:44, 45) Nthawe zinango bzingatinese kuwalekerera, maka-maka akaticitira bzinthu bzakuipa kwene-kwene. Tsono ifepano tikalekerera kuti kuwakoyera cakumtima, na ukali bzikule mu mtima mwathu, tin’dzabzipweteka tekha. (Sal. 37:8) Tikambalekerera wanthu, timbakhala tikulamba kuti bzinthu bzakuipa bzomwe wanthuwo aticitira bziticitise kupitiriza kukhala wanthu wa ukali. — Aef. 4:31, 32. w21.04 8 ¶3-4

Kodi imwepo muna wadzinza wanu omwe adacosedwa m’gwere? Penu mun’ti inde, bzimwebzi bzingakhale bzakuwawa kwene-kwene! Kumbukirani momwe Yahova adabvera pomwe anjo winango, omwe akhacita mbali ya banja lace, adasiya kumubvera! (Djuda 6) Ndipo kumbukiranimbo momwe iye adabvera kuwawa pomwe wanthu wace omwe akhawafuna, omwe ni Ajirayeri, adamupandukira kazinji-kentse. (Sal. 78:41) Tsimikizani kuti Baba wathu wa kudzulu Yahova ambabvambo kuwawa wadzinza wathu akasiya kumutumikira. Iye ambabvesesa momwe imwepo mumbabvera kuwawa bzimwebzi bzikakucitikirani. Thangwe ra ntsisi, iye an’dzakulimbikisani na kukuthandizani. Mwana akasiya kutumikira Yahova, abereki kazinji-kazinji ambakumbuka kuti pinango pana cinthu comwe iwo angadacita kuti athandize mwanayo kuti apitirize kutumikira Yahova. M’bale munango adalewa kuti: “Ndikhabzipasa mulandu ndipo ndikhasaya tulo.” Mpfumakazi inango yomwe idagumanambo na bvuto lakundendemerana na limweri, idadandaula mwakuwawidwa ndipo idalewa kuti: “Pinango ndidacita bzinthu bzakuphonyeka kuna mwananguyo. Ndidabzibva kuti ndiribe kucita bzizinji kuti ndimupfunzise kufuna Yahova.” w21.09 26 ¶1-2, 4

Wanthu winango ambakumbuka kuti atumiki wa Yahova an’funika lini kupfunzisa wanthu bzomwe Bibliya limbalewa, thangwe iwo alibe kucita mapfunziro yakulewa bza magereja. Tsono, iwo an’funika kukhala na umboni bwakukwanira pakulewa bza nkhani yomwe abva. Bzimwebzi ndibzo bzomwe munembi wa Bibliya Luka adatsimikiza kucita. Iye akhafuna kuti anyakuwerenga ‘[atsimikize bzinthu bzomwe]’ akhadabva pakulewa bza Jezu. Tenepo iye adacita nyongo ya ‘kufufudza bzinthu bzentse bwino-bwino kuyambira paciyambi.’ (Luka 1:1-4) Adjuda wa ku Bereya akhali ninga Luka. Pomwe iwo adayamba kubva bzipsa bzabwino pakulewa bza Jezu, adafufudza m’Bzinembo bza Cihebereu kuti atsimikizire kuti bzomwe iwo akhapfunzisidwabzo bzikhali bzacadidi. (Mab. 17:11) Mwa njira ibodzi-bodziyi, wanthu ntsiku zino an’funika kumbafufudzambo kuti ambakhale na umboni bwakukwanira. Iwo an’funika kumbandendemeza bzomwe ambapfunzisidwa na atumiki wa Mulungu na bzomwe Bzinembo bzimbalewa. Ndipo an’funikambo kumbapfunza nkhani za atumiki wa Yahova wa mu nthawe zathu zino. Tenepo, ninga momwe ambacitira patrau akafuna kupitisa munthu basa, iye ambayamba amufufudza kuti akhale na umboni bwakukwanira. Mpsibodzi-bodzimbo na iwo. Akambafufudza kuti akhale na umboni bwakukwanira, an’dzabvuma lini kuti tsankhulo ayai mabvera-bvera yawampsinkhe m’maso. w21.05 3 ¶7-8

Kodi m’gwere mwanu muna munthu omwe mungamulatize kuti muna mtima wakutambira alendo? Tikambapambula nthawe yakuti timbaceze na Akristau anzathu, iwo an’dzakomedwa kwene-kwene. Winango bzimbawanesa kukhala pabodzi na adzinza wawo pa nthawe yomwe adzinzawo akusekerera ntsiku za firiyado. Winango angasuname kwene-kwene pa ntsiku yomwe adzinza wawo ambakumbukira ntsiku yomwe m’bale wawo adasaika. Tenepo, tikambapambula nthawe ya kumbaceza na abale na mpfumakazi omwe akugumana na mabvuto ninga yamweya, timbalatiza kuti timbacita nawo thupo. (Afil. 2:20) Pana mathangwe mazinji yomwe yangacitise Mkristau kubzibva kuti ali yekha. Napo bziri tenepo, tin’funika lini kuyebwa kuti Yahova ambabvesesa tikabzibva kuti tiri tekha. Iye ambatipasa bzomwe ifepano timbafunikira mwakuphatisa basa Akristau anzathu. (Mat. 12:48-50) Ndipo tikambacita nyongo kuti tithandize abale na mpfumakazi zathu ifepano timbalatiza Yahova kuti timbatenda thangwe ra kutipasa gwere. Bziribe basa momwe tingabvere, ifepano tiri lini tekha thangwe Yahova nthawe zentse ali kumbali yathu. w21.06 13 ¶18-20

Jezu adapitiriza kupalizira napo kuti wanthu winango akhafuna lini kubva mafala yace. Thangwe ranyi? Thangwe rakuti iye akhadziwa kuti pakhana wanthu azinji omwe akhafuna kudziwa cadidi, ndipo akhafuna kupereka mwayi kuna wanthuwo kuti abvume mafala ya Umambo. Ndipo iye akhadziwambo kuti napo wale omwe pakuyamba akhafuna lini kubva mafala yace, angadafika pakufuna kuyabvambo mafalayo. Onani bzomwe bzidacitika na abale wace wa mimba ibodzi. Pa magole yentse matatu na meya ya utumiki bwa Jezu, palibe ne m’bale wace m’bodzi omwe adakhalambo nyakupfunza wace. (Ju. 7:5) Tsono pambuyo pa iye kulamusidwa, abale wacewo adadzakhala Akristau. (Mab. 1:14) Ifepano timbadziwa lini kuti ni wanthu aponi omwe an’bvuma cadidi ca m’Bibliya. Kuna wanthu anango, bzimbatenga nthawe kuti apfunze cadidi ca m’Bibliya, kusiyana na wanthu anango. Napo wale omwe ambafuna lini kutitetekera, akawona makhalidwe yathu yabwino pabodzi na makumbukidwe yathu, pinango pentse angafune ‘kutumbiza Mulungu.’ w21.05 18-19 ¶17-18

Pomwe Jezu akhali pa dziko la pantsi, iye adauza ateweri wace kuti acite mabasa mawiri yakusiyana. Iye adawauza kuti apalizire bzipsa bzabwino bza Umambo ndipo adawalatiza momwe angacitire bzimwebzi. (Luka 8:1) Pa bzinthu bzinango bzomwe Jezu adalewa, iye adauza anyakupfunza wace bzomwe angadacita penu wanthu angadalamba ayai kubvuma bzipsa bzabwino bza Umambo. (Luka 9:2-5) Iye adafotokozambo kuti anyakupfunza wace angadadzapalizira wanthu azinji na mbuto zizinji, pomwe adalewa kuti iwo an’dzacitira ‘umboni kwa mitundu yentse.’ (Mat. 24:14; Mab. 1:8) Kuthumizira bzimwebzi, iye adawauza kuti apfunzise wanthu azinji kubvera bzinthu bzentse bzomwe iye adalewa. Jezu adalatiza kuti basa lakufunikali lingadadzapitiriza kucitika mu nthawe yathu ino ‘mpaka kuphampha kwa dziko lino.’ (Mat. 28:18-20) Ndipo mu bukhu la Apokalipse, Jezu adathandiza Juwau kubvesesa kuti akufuna kuti anyakupfunza wace athandizembo wanthu winango kuti apfunze bza Yahova. — Apok. 22:17. w21.07 2-3 ¶3-4

Ntsiku zino m’dzikoli, wanthu azinji ambabziwona kuti mbakufunika kwene-kwene kuposa anzawo thangwe ra khalidwe la mpikisano. Mwa ciratizo, nyamalonda angafune kuti malonda yace yamufambire bwino kuposa malonda ya anzace. Tenepo iye angacite bzinthu bzomwe bzingawawe anzacewo. Nyakuthamanga mapici angapweteke utowa mwanzace kuti aganyali ndiye mapiciyo. Nyakupfunza omwe akucita mayezo kuti agumane mbuto ku universidade, angakabulari kuti apasali. Pakuti ndife Akristau, ifepano timbadziwa kuti bzimwebzi bzidaipa ndipo yamweya ni ‘mabasa ya thupi.’ (Agal. 5:19-21) Kodi m’gwere atumiki wa Yahova angayambise mpikisano mwakusaya kudziwa? Umweyu ni mbvunzo wabwino thangwe mtima wa mpikisano ungadzonge ciphatano comwe ciripo pakati pa ubale bwathu.Tenepo, bzingakhale bwino kupfunza bza amuna na akazi wakukhulupirika wakufotokozedwa m’Bibliya omwe alibe kubvuma kukhala na mtima wa mpikisano. w21.07 14 ¶1-2

Lufoyi lacadidi limbaticitisa kufuna kuthandiza wale omwe adasunama. Ntsiku zino, abale na mpfumakazi wakudeka mtima ambathandiza abale m’gwere omwe adasunama thangwe ra mabvuto. Iwo ambafuna abale na mpfumakazi zawo ndipo ambafunisisa kucita ciri-centse comwe angakwanise kuti awathandize. (Mim. 12:25; 24:10) Bzimwebzi bzikubverana na mafala ya mpostolo Paulo. Iye adalewa kuti: “Mutsangalaze anyakusunama, muthandize [anyakuwofoka] mucipirira na wanthu wentse.” (1 Ates. 5:14) Kawiri-kawiri njira yomwe mungalimbikisire munthu omwe adasunama ndiyo kumutetekera mwa tceru na kumutsimikizira kuti mumbamufuna. Kudeka mtima komwe mumbalatiza kuna mabira ya Yahova, kumbayenda lini papezi kuna iye. Cinembo ca Mimwani 19:17 cimbati: ‘Omwe anidekera mtima munthu wakusauka akukumbiza Yahova, ndipo iye an’dzamubwezera bzomwe wacitabzo.’ w21.11 10-11 ¶11-12

Kodi n’ciyani comwe tingacite tsapano kuti tikonzekere bzomwe bzikubwera kutsogolo? Ifepano tin’funika kumbakomedwa na bzomwe tinabzo ticimbakondwa thangwe ra kukhala pa uxamwali na Yahova. Tikamudziwa bwino Mulungu wathu, tin’dzakhala na citsimikizo centse cakuti iye an’dzakwanisa kutikhotcerera tikadzaphindukiridwa na Gogi wa Magogi. Mafala ya vesi la ntsiku ya lero yakulatiza thangwe lomwe likhacitisa Davide kukhulupira kuti Yahova angadamuthandiza. Nthawe zentse Davide akhathemba Yahova ndipo Yahova alibe kumusiya yekha. Pomwe Davide akhali tswaka, iye adafunika kumenyana na Mfiristi munango wakucemeredwa Goliyati ndipo adamuuza kuti: “Yahova an’kupereka m’manja mwangu lero.” (1 Sam. 17:46) Na kupita kwa nthawe, pomwe Davide akhatumikira ku nyumba ya mambo Sauli, Sauliyo adayezera kazinji-kentse kupha Davide. Tsono “Yahova akhana” Davide. (1 Sam. 18:12) Pakuti Davide akhadawona kale Yahova akumuthandiza, Davideyo akhakhulupira kuti iye angadamusiya lini pa bzineso bzomwe akhagumana nabzo pa nthawe imweyire. w22.01 5-6 ¶14-15

Yahova ngwakupirira pa bzinthu bzentse bzomwe ambacita ndipo iye ambabvuma kuti papite nthawe ikulu kuti amalize kucita basa lace. Iye ambacita bzimwebzi kuti atumbizise dzina lace na kuthandizambo wanthu winango. Mwa ciratizo, onani momwe Yahova adakonzera dzikoli pang’ono na pang’ono kuti likhalidwe na wanthu. Bibliya likambafotokoza momwe Yahova adakonzera dzikoli, iro limbalewa bza ‘mphimo yace,’ kuzika kwa ‘tsinde lace’ na momwe adafuthulira ‘mwala wace wa pakhona.’ (Djobi 38:5, 6) Ndipo Yahovayo adapambula nthawe kuti adinge mabasa yace. (Ciy. 1:10, 12) Kumbukirani momwe anjo akhabvera pomwe akhawona Yahova akulenga cinthu cipsa. Iwo akhambakomedwa kwene-kwene! Thangwe ra bzimwebzi, iwo ‘adayamba kuwombera m’manja.’ Kodi tikupfunza ciyani? Padatenga magole mazinji kuti Yahova alenge dziko, nyenyezi na bza moyo bzentse. Tsono pomwe Yahova adanyang’anisa bzinthu bzentse bzomwe iye adalenga, adalewa kuti ‘bzikhali bwino kwene-kwene.’ — Ciy. 1:31. w21.08 9 ¶6-7

M’ciratizo cace, Jezu adalewa bza munthu omwe akhafuna kucita ulendo. Akanati kuyenda ulendobo, iye adacemera akapolo wace aciwapasa matalento kuti acitire malonda. Munthuyo akhadziwa kuti akapolo wacewo adasiyana maluso, tenepo iye adapasa kapolo wakuyamba matalento maxanu, waciwiri matalento mawiri ndipo wacitatu adam’pasa talento ibodzi. Akapolo awiri adaphata basa na nyongo aciphindula kobiri zizinji kuti akapase mbuya wawo. Tsono, kapolo wacitatu alibe kucita cinthu na kobiri yomwe adapasidwa, ndipo adacosedwa basa. Kapolo wakuyamba na waciwiri adabvesesa kuti basa lomwe mbuya wawo adawapasa likhali lakufunika, ndipopa iwo adaphata basa na nyongo kuti atumikire mbuya wawoyo. Thangwe ra nyongo yomwe adacitayo, wo adaphindula matalento manango. Thangwe ra nyongo yawo, akapolowo adasimbidwa na mbuya wawo. Mbuyayo alibe kundokomedwa nawo, koma adawapasambo maudindo manango mazinji. w21.08 21 ¶7; 22 ¶9-10

Yahova akulatiza kuti akupirira kwene-kwene mu ntsiku zakumalizira zino. Iye akufuna lini kuti munthu ali-wentse adzapfudzidwe. (2 Ped. 3:9) Iye akupereka mpata kuna munthu ali-wentse kuti akungule. Tsono kupirira kwaceko kuna malire. Wentse omwe ambalamba mwayi umweyu bzinthu bzin’dzawamalira kuipa, ninga momwe bzidacitikira Farawo mu ntsiku za Mozeji. Yahova adauza Farawo kuti: ‘Mpaka pano, inepano ningadafuthula kale boko langu kuna iwepo na mbumba yako, ndicikupwetekani na matenda yakupha na kukunyemberesa pa dziko lapantsi. Ndakusiya na moyo, kuti ndikulatize mphanvu yangu na kuti ndidziwise dzina langu pa dziko lentse la pantsi.’ (Kuf. 9:15, 16) Mitundu yentse ya wanthu in’dzadziwa kuti Yahova ndiye yekha Mulungu wacadidi. (Zakiy. 38:23) Kutekenyesa komwe kukulewedwa mu vesi la leroli kun’dzathandauza kupfudza wale, omwe ninga Farawo, ambabvuma lini kuti Yahova ndiye adathemera kutonga. w21.09 18-19 ¶17-18

Kodi mtima umbakuwawani thangwe rakuti munthu omwe mumbamufuna adacosedwa m’gwere? Ndipo kodi mungacite ciyani penu munthu mu gwere mwanu akucitirani cinthu comwe mulibe kukomedwa naco? Tin’funika lini kudikhirira kuti nthawe zentse munthu an’dzalewa mafala yabwino. (Tiy. 3:2) Tentsenefe ndife wakuperewera, ndipopa tin’funika lini kudabwa munthu akambaneseka kulewalewa ayai akalewa cinthu comwe cingatidekere lini, napo kuti iye akhafuna lini kulewa bzimwebzo. Kumbukirani malango yomwe mpostolo Paulo adayalewa, iye adati: “Pitirizani kupirirana na kulekererana na mtima wentse, napo penu munayo mathangwe yakukhalira wakukalipa.” (Akol. 3:13) Pitirizani kuthandiza adzinza wa munthu omwe wacosedwa m’gwere. Iwo ambafuna kulatizidwa lufoyi na kulimbikisidwa, kuposa pa nthawe yomwe m’bale wawoyo akhanati kucosedwa m’gwere. (Aheb. 10:24, 25) Nthawe zinango wanthu wa m’banja la munthu omwe wacosedwayo ambafika pakuwona kuti abale m’gwere ambafuna lini pomwe kuceza nawo, kukhala ninga kuti iwo acosedwambo. Ifepano tikufuna lini kuti iwo ambakumbuke tenepoyo. Ifepano timbafunikira kulimbikisa wanthu maka-maka wana omwe abereki wawo adasiya kutumikira Yahova. w21.09 29 ¶13-14; 30 ¶16

M’bale wacikulire na tswaka akambaceza pabodzi, wentse ambagumana phindu. (Aro. 1:12) Imwepo maswakamwe mun’dzakulisa mtima wanu wakutenda momwe Yahova ambathandizira atumiki wace wakukhulupirika, ndipo m’bale wacikulireyo an’dzabzibva kuti ambafunidwa. Ndipo m’baleyo an’dzakufotokozerani momwe Yahova adamusimbira. Kudeka kwa munthu na kupita kwa nthawe kumbamala, tsono kwa omwe akutumikira Yahova mwakukhulupirika, kudeka kwawo kumbayenda kucithumizirika na kupita kwa magole. (1 Ates. 1:2, 3) Thangwe ranyi tikulewa tenepo? Thangwe ndakuti na kupita kwa nthawe, iwo ambabvuma kuti mzimu wa Mulungu uwapfunzise na kuwathandiza kukulisa makhalidwe yabwino. Tikawadziwa bwino-bwino abale na mpfumakazi zathu zacikulire ndipo tikambawalemekeza na kupfunza na bzomwe bzidacitika pa moyo wawo, tin’dzawawona kuti mbakufunika kwene-kwene. Gwere limbakhala lakulimba sikuti kokha maswaka yakambawona acikulire kuti mbakulimba, koma acikulirewo akambawonambo kuti maswakayo njakufunika. w21.09 7 ¶15-18

Ifepano tin’funika kutcenkha kumbacita bzinthu mwakuuma mtima, ticicita nyongo yakukhala wanthu ‘wantsisi kwene-kwene’ ninga Mulungu wathu. (Aef. 2:4) Kukhala munthu wantsisi kumbathandauza bzinthu bzizinji sikuti kundobva ntsisizo mu mtima. Munthu wantsisi ambacita cinthu kuti athandize wanthu winango. Ali-wentse wa ifepano an’funika kukhala tceru kuti awone wanthu omwe angafunikire thandizo m’banja, m’gwere ayai komwe ambakhala. Kulewa cadidi, pana njira zizinji za momwe tingalatizire ntsisi! Kodi pana munthu omwe an’funikira kutsangalazidwa? Kodi ifepano tingamuthandize mwa kumupasa cakudya ayai kumucitira cinthu cinango ca nzeru? Kodi Mkristau omwe abwezeresedwa angafunikire kutsangalazidwa na kulimbikisidwa? Kodi tingauzembo winango mafala yabwino ya nkhani zakulimbikisa? Zimwezi ni njira zinango za momwe tingalatizire ntsisi kwa munthu ali-wentse omwe tingagumane naye. (Djobi 29:12, 13; Aro. 10:14, 15; Tiy. 1:27) Ifepano tikakhala tceru, tin’dzawona kuti pana njira zakusiyana-siyana zakulatizira ntsisi. Tikambalatiza ntsisi, timbakondwesa Baba wathu wa kudzulu, Mulungu omwe “ngwantsisi kwene-kwene”! w21.10 13 ¶20-22

Mu Salimo 23, Davide adafotokoza bzinthu bzomwe mpsakufunika kwene-kwene, ninga kuwanda kwa bzisimbo bzauzimu bzomwe iye adatambira thangwe ra kubvuma Yahova kuti ni M’busa wace. Yahova adatsogolera Davide “mu njira zacilungamo,” ndipo mwakudeka mtima adamuthandiza pa nthawe zabwino na zakunesa. Davide akhadziwa kuti napo kuti ‘akhatsogoleredwa’ na Yahova, iye angadagumana na mabvuto. Nthawe zinango, pinango Davide akhasunama, bzomwe bzikhamucitisa kubva ninga kuti akufamba “m’cigwa ca mdima,” thangwe akhana anyamadulanthaka. Tsono pakukhala na Yahova ninga M’busa wace, Davide “[akhagopa] lini cinthu ciri-centse.” Kodi ni mwa njira iponi Davide alibe “[kusaya] cinthu ciri-centse cabwino”? Pakuphatisa basa makumbukidwe yauzimu, tingalewe kuti iye akhana bzentse bzomwe akhafunikira. Thangwe mpfatso wace ukhathemba lini bzinthu bzakuthupi bzokha. Koma iye akhakomedwa na bzomwe Yahova akhamupasa. Cakufunika kwene-kwene kwa iye cikhali kusimbidwa na kukhotcereredwa na Mulungu. Na mafala ya Davideya tingakwanise kuwona kuti thangwe ranyi mpsakufunika kuwona bzinthu bzakuthupi mu njira yakuthemera. w22.01 3-4 ¶5-7

Kuyambira kale-kale atumiki wa Yahova ambapalizira wanthu omwe ambafuna lini kubva. Mwa ciratizo, Nowa adakhala “mpalizi wacirungamo,” pinango-pentse magole 40 ayai 50. (2 Ped. 2:5) Mwakusaya kupenukira, iye akhakumbuka kuti wanthu angadabvuma mafala yomwe akhapalizira, koma Yahova alibe kumuuza kuti wanthuwo angadabvuma. Tsono, pomwe adamuuza kuti iye amange cingalawa, Yahova adati: ‘Iwepo udzapite m’cigalawamo pabodzi na wana wako, mkazi wako na alowola wako.’ (Ciy. 6:18) Kukumbukira kukula kwa cingalawa comwe Mulungu adamuuza kuti amange, pinango kudathandiza Nowa kudziwa kuti ni wanthu lini azinji omwe angadabvuma mafala yace. (Ciy. 6:15) Ninga momwe tikudziwira, palibe ne munthu m’bodzi pa wanthu wakuipawo omwe adabvuma mafala ya Nowa. (Ciy. 7:7) Kodi Yahova adawona Nowa kuti adatazira kupalizira? Ne, mpsimwebzo lini! Yahova adawona Nowa kuti akhali mpalizi wa nyongo thangwe rakuti iye adacita bzomwe Yahova adamuuza kuti acite mwakukhulupirika. — Ciy. 6:22. w21.10 26 ¶10-11

Ndokumbukirani momwe Rute adabvera pomwe adabva Naomi akulewa mafala yamweya! Rute adacita ciri-centse kuti athandize Naomi. Rute adalira naye, adamutsangalaza ndipo adafamba naye pabodzi ntsiku zizinji kuti afike komwe akhayenda. Napo kuti iye adacita bzentsenebzi, Naomi adalewa kuti: ‘Yahova wandicitisa kubwerera cimanja-manja.’ Napo kuti Rute akhali pabodzi na Naomi pa nthawe imweyire, mafala ya Naomiyo yadalatiza kuti iye akhatenda lini bzomwe Rute adacita pa kumuthandiza. Pinango bzimwebzi bzidamuwawa Rute! Tsono iye adapitiriza kukhala pabodzi na Naomi. (Ru. 1:3-18) Ntsiku zino, mpfumakazi yomwe ikuwawidwa mu mtima pakuyamba pinango ingafotokoze mafala yomwe yangatiwawe napo kuti tikucita nyongo kuti tiithandize. Tsono lekani kubva ciya. Tin’funika kumbathandiza mpfumakazi yathu yomwe ikufunikira thandizo ndipo tin’funikambo kumbakumbira Yahova kuti atithandize kudziwa bzomwe tingacite kuti tiitsangalaze. (Mim. 17:17) Mpfumakazi yomwe ikufunikira thandizo, pakuyamba ingalambe kuthandizidwako. Tsono, lufoyi lacadidi lin’dzaticitisa kucita ciri-centse comwe tingakwanise kuti tipitirize kumuthandiza. — Agal. 6:2. w21.11 11 ¶17-19

M’Bibliya, mafala yakuti “kucena” na “kukhala wakucena” kawiri-kawiri yambathandauza kukhala wakucena m’makumbukidwe na pakunamata kwathu Mulungu. Mafala yamweya yangathandauzembo kusankhulidwa kwa munthu kuti atumikire Mulungu. M’kalewedwe kanango, ifepano tingawonedwe kuti ndife wanthu wakucena, tikakhala na makumbukidwe yakucena, tikambanamata Yahova mu njira yomwe iye ambaibvuma, na kukhala pa uxamwali bwakulimba na iye. Mpsakudabwisa kuwona kuti napo kuti ndife wakuperewera ndipo Yahova ngwakucena kwene-kwene, iye akufuna kuti tikhale naye pa uxamwali bwakulimba. Yahova ngwakucena mu njira zentse. Timbadziwa bzimwebzi kucokera pa bzomwe anjo wakucemeredwa Aserafi, omwe ambakhala pafupi na mpando wace wa Umambo ambalewa. Winango wa iwo ambalewa kuti: “Wakucena, wakucena, wakucena ni Yahova wa anyankhondo.” (Zai. 6:3) Tsono, kuti anjowo akhale pa uxamwali bwabwino na Mulungu wawo wakucena iwombo an’funika kukhalambo wakucena, ndipo iwo mbakucenadi. w21.12 3 ¶4-5

Maswaka kawiri-kawiri yambakhala na thupo la momwe yangaphatisire bwino basa moyo wawo. Apfunzisi na adzinza wawo omwe ni Mboni lini za Yahova angawalimbikise kuti acite mapfunziro yapadzulu kuti bzinthu bzidzawafambire bwino kutsogolo. Kucita mapfunziroyo kungawatengere nthawe ikulu kwene-kwene. Mwakusiyana na amwewa, abereki na azixamwali wa m’gwere angalimbikise maswaka kuti yaphatise basa nthawe yawo pa kutumikira Yahova. Kodi n’ciyani cingathandize tswaka lomwe limbafuna Yahova kusankhula bzinthu mwa nzeru? Tswakalo lingagumane phindu likawerenga Aefezo 5:15-17 na kukumbukira bzomwe lawerengabzo. Pambuyo pa kuwerenga mavesi yamweya, tswaka lingabzibvunze kuti: ‘Kodi “kufuna kwa Yahova” n’ciyani? Kodi ni bzakusankhula bziponi bzomwe iye an’dzakomedwa nabzo? Kodi ni bzakusankhula bziponi bzomwe bzin’dzandicitisa kuphatisa bwino basa nthawe yangu?’ Kumbukirani kuti “ntsikuzi zaipa,” ndipo dziko lomwe likutongedwa na Sathani lin’mala tsapanopali. w22.01 27 ¶5

Kodi ni pa nthawe iponi yomwe Tiyago adadzakhala mteweri wakukhulupirika wa Jezu? Pomwe Jezu adalamusidwa kwa anyakufa, iye “adawonekera kwa Tiyago, acidzawonekerambo kwa apostolo wentse.” (1 Ako. 15:7) Kugumana komwe Tiyago na Jezu adacita kudacinja moyo wa Tiyagoyo. Mwa ciratizo, iye akhalipombo pa ntsiku yomwe apostolo akhadikhirira kutambira mzimu wakucena m’cipinda ca padzulu ku Jeruzalemu. (Mab. 1:13, 14) Na kupita kwa nthawe, Tiyago adadzakhala na mwayi wakutumikira ninga m’bodzi wa m’bungwe lakutonga mu nthawe ya Akristau wakuyambirira. (Mab. 15:6, 13-22; Agal. 2:9) Ndipo pa nthawe inango, pomwe likhanati kufika gole la 62 EC, mzimu wakucena udamutsogolera kunembera tsamba Akristau wakudzozedwa. Tsambalo limbatithandizambo ntsiku zino, bziribe basa penu cidikhiro cathu n’cakuyenda kudzulu ayai n’cakudzakhala pa dziko la pantsi pano. (Tiy. 1:1) Josephus, nyakunemba nkhani za Akristau wakuyambirira, adalewa kuti Mkulu wa Antsembe Wacidjuda Ananiya Mng’ono ndiye adatonga kuti Tiyago aphedwe. Tiyago adapitiriza kukhala wakukhulupirika kwa Yahova mpaka kumaliza basa lace pa dziko la pantsi pano. w22.01 8 ¶3; 9 ¶5

Cinthu cibodzi comwe tikupfunza kucokera mu vesi la leroli n’cakuti tin’funikira lini kudikhirira kuti Yahova atikhotcerere ku mayezo yentse yomwe yambayeza cikhulupiro cathu. Ninga Jezu omwe adayezedwa mpaka infa yace, ifepano tin’funikambo kulatiza kuti ndife wakukhulupirika mpaka infa, bzikafunikira. (Mat. 16:24, 25) Tenepo, Mulungu ambatitsimikizira kuti an’dzatilekerera lini ifepano kuyezedwa mpaka pomwe tingakwanise lini kupirira. (1 Ako. 10:13) Cinthu cinango comwe tapfunza n’cakuti, ninga Jezu, ifepano tin’citiridwa bzinthu bzakusaya cirungamo. (1 Ped. 2:19, 20) Wale omwe ambatiboneresa, ambacita bzimwebzi sikuti thangwe rakuti pana cinthu comwe taphonya, koma thangwe rakuti timbacita lini mbali ya dziko, ndipo timbakhotcerera cadidi. (Ju. 17:14; 1 Ped. 4:15, 16) Jezu adabvesesa kuti thangwe ranyi Yahova adalekerera kuti iye abonere. Napo bziri tenepo, mwakusiyana na iye, nthawe zinango Akristau winango wakukhulupirika bzikakhala kuti akugumana na mabvuto pa moyo wawo, iwo ambabzibvunza kuti thangwe ranyi Yahova akulekerera kuti iwo abonere. (Hab. 1:3) Mulungu wanthu ngwa ntsisi ndipo ambapirira na abalewa. Yahova ambabvesesa kuti makumbukidwe yawoya yan’funa lini kulewa kuti iwo alibe cikhulupiro, koma yakulatiza kuti iwo akufunikira mtsangalazo omwe ndiye yekha omwe angawapase. — 2 Ako. 1:3, 4. w21.04 11 ¶9-10

Yahova ambabvuma kunamata kwathu penu timbamunamata mwakubverana na kufuna kwace, thangwe ra lufoyi na kumulemekeza. Timbadziwa kuti Yahova ngwakuthemera kunamatidwa, ndipo tin’funa kuti kanamatidwe kathu kakhale kabwino kwene-kwene. Njira ibodzi ya kunamatira Yahova ndiyo kucita mpembo kwa iye. Bibliya limbalewa kuti mipembo yathu iri ninga bzakufukiza bzakununtcira bzabwino kwene-kwene bzomwe bzikhaperekedwa mu tendi la mkonkhano, bzomwe na kupita kwa nthawe bzikhadzaperekedwa mu templo. Mulungu akhakomedwa kwene-kwene na mnuntci omwe ukhacokera pa bzakununtcirisabzi. Mpsibodzi-bodzimbo na mipembo yomwe ifepano timbaicita na mtima wentse. Iye “ambakomedwa” nayo kwene-kwene napo kuti pakupembapo tingaphatise lini basa mafala mazinji ya ulemu. (Mim. 15:8; Bzak. 33:10) Yahova ambakomedwa kutiwona tikulatiza kuti timbamufuna na kutenda bzomwe iye ambaticitira. Iye ambafuna kuti timbamuuze bzomwe bzimbaticitisa thupo, bzomwe tikufuna kudzacita kutsogolo na bzomwe timbakhumba. Pomwe mukanati kupemba kwa Yahova, bzingakhale bwino kuti mumbapambule nthawe kuti muyambe mwakonzekera bzomwe mun’funa kumuuza. Mukacita bzimwebzi, mipembo yanu in’dzakhala ninga “bzakufukiza bzakununtcira” kwa Baba wanu wakudzulu. w22.03 20 ¶2; 21 ¶7

Pa Armagedo, ifepano tin’dzakhala tiribe ugo bwa kusankhula omwe an’dzathemera kucitiridwa ntsisi na Yahova na omwe an’dzathemera lini. (Mat. 25:34, 41, 46) Kodi tin’dzakhulupira katongedwe ka Yahova ayai tin’dzasiya kumutumikira thangwe rakuti tiribe kukomedwa na katongedwe kace? Bzikuwonekeratu kuti tin’funika kukhulupira kwene-kwene Yahova tsapano kuti tidzakwanise kumukhulupirambo kutsogolo. Kumbukirani kuti mun’dzabva tani mu dziko lipsa. Kun’dzakhala kulibe pomwe bzipembedzo bzakunama, anyamalonda wakuipa, ayai anyandale omwe akuboneresa wanthu. Matenda, kukalamba na kufedwa bzin’dzacita lini mbali ya moyo wathu. Ndipo Sathani na madimonyo yace an’dzamangidwa acikhala m’kawoko magole 1000. Bzinthu bzentse bzomwe bzikhacitika thangwe ra kupanduka kwawo bzin’dzacitika lini pomwe. (Apok. 20:2, 3) Tin’dzakomedwa kwene-kwene thangwe ra kukhulupira momwe Yahova ambacitira bzinthu! w22.02 6-7 ¶16-17

Jezu akhali munthu omwe akhafuna mtendere. Pomwe wanthu akhamucitira bzakuipa, iye akhabwereza lini. Tsono, iye akhandocita lini bzimwebzi basi. Iye akhacita ciri-centse kuti athandize wanthu kukhala pa mtendere na kumalisa nkhani zomwe akhanesana. Iye adapfunzisa wanthu kuti, penu iwo an’funa kukhala pa uxamwali na Mulungu an’funika kukhala pa mtendere na anzawo. (Mat. 5:9, 23, 24) Ndipo iye adathandiza apostolo wace kazinji-kentse kumalisa nkhani yomwe akhanesana yakuti mbani omwe akhali mkulu pakati pawo. (Luka 9:46-48; 22:24-27) Kuti tikwanise kukhala pa mtendere na anzathu, tin’funika kucita bzizinji kuposa kundotcenkha kunesana na wanthu. Ifepano ndife omwe tin’funika kuyamba kukhala pa mtendere na anzathu ndipo tin’funikambo kumbalimbikisa abale na mpfumakazi kumbamalisa nkhani zomwe akunesana. (Afil. 4:2, 3; Tiy. 3:17, 18) Ifepano tingabzibvunze kuti: ‘Kodi ndine wakukonzeka kucita ciri-centse kuti ndikhazikise mtendere na anzangu? Kodi nimbakoya cakumtima m’bale ayai mpfumakazi akandiphonyera? Ndikapitana na mwanzangu, kodi nimbayamba ndine kufuna kuti tikhazikane pantsi, napo penu ndikuwona kuti mwanzanguyo ndiye alibe lazau?’ w22.03 10 ¶10-11

Magole mazinji m’mbuyomu, Bibliya likhadalewa kale kuti wanthu wa Mulungu “an’dzabzipereka mwakufunisisa” pa basa la Yahova mwakutsogoleredwa na Mwana wace. (Sal. 110:3) Bzomwe polofesiyayi idalewa bzikucitikadi ntsiku zino. Gole liri-lentse, atumiki wa Yahova ambamala maora mazinji akucita basa lakupalizira. Iwo ambacita basa limweri mwakucita kufuna okha ndipo ambatambira lini kobiri. Iwo ambapambula nthawe kuti athandize abale wawo mwa kuwapasambo bzomwe akufunikira, kuwalimbikisa na kulimbisa cikhulupiro cawo kwa Yahova. Akulu na atumiki wakuthandiza ambamala maora mazinji akukonzekera mitsonkhano na kuzungira abale na mpfumakazi kuti awalimbikise. Thangwe ranyi wanthu wa Yahova ambacita basa lentseli? Iwo ambacita bzentsebzi thangwe rakuti ambafuna Yahova na anzawo. (Mat. 22:37-39) Jezu adalatiza kuti akhafuna kwene-kwene kuthandiza wanthu kusiyana na kucita bzomwe akhafuna. Ifepano tikucita nyongo kuti timutewezere. (Aro. 15:1-3) Tikacita bzimwebzi, bzinthu bzin’dzatifambira bwino. w22.02 20 ¶1-2

Pa nkhani ya malimidwe mu nthawe ya Ajirayeri, anyabasa akhapasidwiratu kobiri zawo akamaliza kuphata basa ntsiku imweyo. Kuleka kupereka kobiri kuna nyabasa, kukhacitisa kuti iye asaye cakupasa banja lace ntsiku imweyo. Ndipopa Yahova adalewa kuti: “Iye akubonera ndipo moyo wace ukuthemba kobiriyo.” (Bzak. 24:14, 15; Mat. 20:8) Nsiku zino anyabasa azinji ambapagalidwi kabodzi ayai kawiri pa mwezi, sikuti ntsiku zentse. Tsono, nfundo yakugumanika pa Mwambo 19:13 ikadapitiriza kuphata basa. Azipatrau anango ambapundiza anyabasa wawo mwa kuwapasa kobiri yakucepa kwene-kwene. Iwo ambadziwa kuti palibe bzomwe anyabasawo angacite. Ndipo ambadziwambo kuti, pakuti mabasa yakunesa, iwo an’pitiriza kuphata basalo napo kuti kobiri yomwe ambatambira njakucepa kwene-kwene. Bzomwe azipatrauwo ambacitabzo ni ‘kulamba kupereka kobiri kuna nyabasa omwe awakumbira kuti awaphatire basa.’ Mkristau omwe ambacita malonda an’funika kuikumbukira bwino nfundo imweyi. w21.12 10 ¶9-10

Pambuyo pa Jezu kupirira mabvuto mazinji, iye adabva nyota kwene-kwene. Iye akhafunikira thandizo kuti aphe nyota yomwe akhanayo. Jezu akhakumbuka lini kuti kulewa momwe iye akhabvera, cikhali cizindikiro cakuti ana cikhulupiro cakusaya kulimba. Mpsibodzi-bodzimbo na ifepano, tin’funika kumbalewa momwe tikubvera. Nthawe zizinji ifepano timbauza lini wanthu winango bzomwe tikukumbuka. Tsono tikawona kuti bzikuneseratu, tin’funika lini kuzeza kuwakumbira kuti atithandize. Mwa ciratizo, penu ndife wacikulire ayai taduwala, pinango tingakumbire xamwali kuti atithandize na buleya kuti tiyende kubazali ayai ku nyumba ya ulapi. Tikasunama ayai tikawawidwa mu mtima, tingakumbire mkulu wa gwere ayai Mkristau wakukhwima kuti atitetekere bwino-bwino ayai kuti atiuze mafala yabwino kuti yatsangalaze mtima wathu. (Mim. 12:25) Kumbukirani kuti abale na mpfumakazi zathu ambatifuna ndipo akufuna kutithandiza pakawoneka mabvuto. (Mim. 17:17) Tsono iwo angawone lini bzomwe ifepano timbakumbuka. Ndipo angadziwe lini bzomwe ifepano tikufunikira tikasaya kuwafotokozera. w21.04 11-12 ¶11-12

Azinji wa ifepano timbabva lini bwino bzinthu bzikacinja pa moyo wathu. Abale winango omwe amala magole mazinji akucita utumiki bwa nthawe zentse, adauzidwa kuti akacite utumiki bunango. Winango adafunika kusiya utumiki bwawo thangwe ra kukalamba. N’cadidi kuti bzimwebzi bzikaticitikira, ifepano tingagoboke m’mabondo. Pakuyamba, tingabvesese lini kuti thangwe ranyi bzimwebzi bzikucitika. Tingayambe kukumbuka kuti bzinthu bzikhali bwino pomwe bzinthu bzikhanati kucinja pa moyo wathu. Ndipo tingayambe kugoboka m’mabondo ticimbakumbuka kuti tin’kwanisa lini pomwe kucita bzizinji pa kutumikira Yahova. Bzingakhale bzakusaya kunesa kwa ifepano kuzolowera kucinja komwe kwacitika pa moyo wathu tikambawona bzinthu ninga momwe Yahova ambabziwonera. Iye akucita bzinthu bzizinji ntsiku zino ndipo tina mwayi wakuphata basa naye pabodzi. (1 Ako. 3:9) Yahova ambacinja lini. Ndipopa iye an’dzapitiriza kutifuna. Mukawona kuti kucinja kunango komwe gululi lacita kwacitisambo moyo wanu kucinja, tcenkhani kumbakumbuka kuti n’ciyani comwe cacitisa kucinjako. Koma mbapembani kwa Yahova kuti ambakuthandizeni kumbawona bwino bzinthu sikuti kumbakumbukira “kale-kale.” (Mpal. 7:10) Tin’funika kupitiriza kukhulupira kuti bzinthu bzin’khala bwino. Kucita bzimwebzi kun’dzatithandiza kupitiriza kukhala wakukondwa na wakukhulupirika bzinthu bzikacinja. w22.03 17 ¶11-12

Kodi Yahova ambalatiza lufoyi lacadidi kuna mbani? Bibliya limbalewa kuti tingafune bzinthu bzizinji ninga ‘kulima,’ ‘vinyu na mafuta,’ ‘cirango,’ ‘nzeru’ na ‘cidziwiso.’ (2 Nkha. 26:10; Mim. 12:1; 21:17; 29:3) Tsono, lufoyi lacadidi limbalatizidwa lini kuna bzinthu, koma limbalatizidwa kuna wanthu basi. Koma Yahova ambalatiza lini lufoyi lacadidi kuna munthu ali-wentse. Iye ambalatiza lufoyi limweri kuna wale omwe ana uxamwali bwakulimba na iye. Mulungu wathu n’gwakukhulupirika kuna axamwali wace. Iye ana cakulinga cabwino kuna iwo ndipo cipo acidzasiya kuwalatiza lufoyi. Yahova ambalatiza lufoyi kuna wanthu wentse. Jezu adauza mwamuna wakucemeredwa Nikodemo kuti: “Mulungu adafuna kwene-kwene dziko la pantsi, mwakuti adapereka Mwana wace m’bodzi yekha, kuti ali-wentse omwe an’khulupira mwanayo, aleke kudzaphedwa, koma adzakhale na moyo wakusaya kumala.” — Ju. 3:1, 16; Mat. 5:44, 45. w21.11 2 ¶3; 3 ¶6-7

Ntsiku zino, moyo wanesa, ndipo pinango ifepano kutsogoloku tingadzagumane na mabvuto mazinji pa moyo wathu. (Mat. 24:21) Ifepano tikudikhirira nthawe yomwe mabvutoya yan’dzawoneka lini pomwe ndipo ne tin’dzayakumbukira lini pomwe! (Zai. 65:16, 17) Kulewa cadidi, ifepano tin’funika kupitiriza kupfunza kuti tidzapirire. Thangwe ranyi? Thangwe Jezu adalewa kuti: ‘Mukapitiriza kupirira, mun’dzagumana moyo.’ (Luka 21:19) Kukumbukira kuti wanthu winango akupirira mabvuto ninga yathu, kungatithandize kuti tipirirembo. Kodi mbani ciratizo cabwino pa nkhani yakupirira? Ni Yahova Mulungu. Kodi mukudabwa na mtawiroyu? Pinango-pentse. Tsono dzikoli likutongedwa na Dyabu, ndipo lidadzala na mabvuto. Yahova ana mphanvu yakumalisa mabvutoya nthawe iri-yentse, tsono iye akudikhirira kudzayamalisa kutsogolo. (Aro. 9:22) Pakali pano Mulungu akadapitiriza kupirira mpaka nthawe yomwe adzapfudze dzikoli. w21.07 8 ¶2-4