Setembro

Kwa winango, bzinthu bzabwino bzomwe Jezu akhawapfunzisa, bzikhawakwanira lini. Iwo akhafuna bzizinji. Tsono pomwe Jezuyo adalamba kuwapasa cizindikiro comwe iwo akhafuna, wanthuwo adalamba kuti iye akhali Mesiya. (Mat. 16:4) Kodi Bzinembo bzimbalewa ciyani? Pakulewa bza Mesiya, mpolofeta Zaiya adanemba kuti: ‘Iye an’dzakuwa lini ayai kubveka mafala yace, ndipo mafala yace yan’dzabvedwa lini mu mseu.’ (Zai. 42:1, 2) Jezu adacita utumiki bwace mwakusaya kubziwonesa. Ndipo iye alibe kumanga templo, alibe kubvala bzakubvala bzakuumira ayai kucemeredwa na madzina yakusiyana-siyana ya magereja. Pomwe Jezu akhatongedwa mulandu, iye alibe kucita cinthu cakudabwisa kuti akondwese Mambo Herode, napo kuti moyo wace ukhali pa ngozi. (Luka 23:8-11) Jezu adacita bzinthu bzinango bzakudabwisa, tsono cinthu cakufunika kwene-kwene kwa iye, cikhali kupalizira bzipsa bzabwino. Ndipopa iye adauza anyakupfunza wace kuti: ‘Ndidabwerera cakulinga cimweci.’ — Marko 1:38. w21.05 4 ¶9-10

Ifepano tikunyang’ana wanthu omwe ana ‘makumbukidwe yabwino yomwe [yangawathandize] kukagumana moyo wakusaya kumala.’ (Mab. 13:48) Kuti tithandize wanthu kuti akhale anyakupfunza, ifepano tin’funika kuwathandiza (1) kubvesesa, (2) kubvuma na (3) kuphatisa basa bzinthu bzomwe akupfunza m’Bibliya. (Akol. 2:6, 7; 1 Ates. 2:13) Wentse m’gwere angathandize anyakupfunza wa Bibliya mwakuwalatiza lufoyi na kuwatambira na manja mawiri pomwe iwo akubwera pa mitsonkhano. (Ju. 13:35) Omwe akucitisa pfunziro la Bibliya an’funika kumala nthawe izinji akuthandiza nyakupfunza wace wa Bibliya kuti asiye makhalidwe yakuipa, ayai bzinthu bzomwe ambakhulupira, bzomwe ‘bzamera mizi’ mu mtima mwace. (2 Ako. 10:4, 5) Pangatenge minyezi mizinji kuti tithandize munthu kucita bzimwebzi acifika pa kubatizidwa. Tsono munthuyo akacinja ambagumana phindu. w21.07 3 ¶6

Kodi ifepano timbatsimikiza na mtima wentse kuti bzomwe timbapfunzisa mpsacadidi ndipo kanamatidwe komwe Mboni za Yahova zimbacita ntsiku zino Yahova ambakomedwa nako? Mpostolo Paulo akhambatsimikiza na mtima wentse kuti bzomwe akhakhulupira bzikhali bzacadidi. (1 Ates. 1:5) Iye akhandokhulupira lini mafalayo thangwe rakuti yakhamudekera. M’mbuto mwace, Paulo akhapfunza bwino-bwino Fala la Mulungu. Iye akhakhulupira kuti “Bzinembo bzentse bzidafuliziridwa na Mulungu.” (2 Tim. 3:16) Kodi iye adapfunza ciyani? M’Bzinembo, Paulo adagumana umboni bwakusaya kugazika bwakuti Jezu akhali Mesiya, umboni bomwe atsogoleri wa Adjuda adabulamba. Atsogoleri wapezi-peziwa akhalewa kuti akhapfunzisa wanthu mafala ya Mulungu, tsono akhacita lini bzomwe Mulunguyo akhafuna. (Tito 1:16) Mwakusiyana na iwo, Paulo alibe kusankhula kuti ni mbali iponi ya Fala la Mulungu yomwe iye an’funika kukhulupira. Iye akhali wakukonzeka kupfunzisa na kuphatisa basa ‘malango yentse ya Mulungu.’ — Mab. 20:27. w21.10 18 ¶1-2

Pomwe ifepano tikubzala na kuthirizira, tin’funika kukumbukira kuti ni Mulungu omwe ambakulisa. (1 Ako. 3:6, 7) Yahova ambawona kuti moyo wa munthu ali-wentse ngwakufunika. Iye adatipasa mwayi wakuphata basa pabodzi na Mwana wace kuti tikontceze wanthu wa mitundu yentse pomwe dzikoli likanati kumala. (Hag. 2:7) Basa lathu lakupalizira tingalindendemezere na basa lomwe anyakupulumusa moyo ambalicita pakacitika ngozi. Ndipo ifepano tiri ninga thimu la wanthu omwe atumidwa kuti akapulumuse wanthu omwe ali mu mgodi omwe wadirika. Napo mu mgodimo mugumanike wanthu ang’ono-ng’ono omwe ana moyo, wentse ambakhala aphata basa lakufunika. Mpsibodzi-bodzimbo na basa lomwe timbacita mu upalizi. Ifepano tikudziwa lini kuti mbanthu angasi omwe tingawapulumuse, pomwe dziko la Sathaniri likanati kupfudzidwa. Tsono Yahova angaphatise basa ali-wentse wa ifepano kuti tiwathandize. Andreas, omwe ambakhala ku Bolívia, adalewa kuti: “Ndikawona munthu omwe apfunza cadidi ca m’Bibliya, ndipo afika pakubatizidwa, nimbadziwa kuti bzentsenebzi bzakwanisika thangwe ra nyongo yomwe abale wentse acita.” Tenepo, ifepano tin’funikambo kukhala na makumbukidwe mabodzi-bodziya pomwe tikupitiriza kucita utumiki bwathu. Tikacita bzimwebzi, Yahova an’dzatisimba, ndipo tin’dzakhala wakukondwa pomwe tikupitiriza kupalizira. w21.05 19 ¶19-20

Msodzi ambafuna kuphata ayai kupha cirombo comwe ateya. Iye ambaphatisa basa magango yakusiyana-siyana, ninga libodzi lomwe lidawonekera kuna axamwali wakunama wa Djobi. (Djobi 18:8-10) Kodi msodzi angapumpse tani cirombo kuti cipite m’gango? Iye ambacipfunzira ciromboco kuti awone kuti angacimange tani. Kodi ciromboco cimbazungira kuponi? Kodi ico cimbafuna ciyani maka-maka? Kodi n’cifuzo ciponi comwe angaphatise basa? Sathani ali ninga msodzi umweyu. Iye ambatipfunzira. Iye ambawona komwe timbazungira na bzomwe timbafuna kwene-kwene. Iye ambateya gango ndipo ambadikhira kuti gangolo litimange mwakusaya kudziwa. Tsono napo bziri tenepo, Bibliya limbatiuza kuti ifepano tingamangidwa, tingakwanise kupsidimula. Ndipo iro limbatipfunzisambo momwe tingatcenkhere kumangidwa na magango ya Sathani. Magango mawiri yomwe Sathani ambayaphatisa basa kawiri-kawiri ni kubzikuza na kusirira kwakuipa. Kuyambira kale-kale Sathani akuphatisa basa njira zakuipazi, ndipo bzinthu bzikumufambira bwino. Iye ali ninga munthu wakupha mbalame, omwe ambapumpsa mbalameyo kuti ipite m’gango. (Sal. 91:3) Tsono ifepano tin’funika lini kuphatidwa na Sathani. Thangwe ranyi? Thangwe Yahova adatizimbulira kale njira zomwe Sathani ambaziphatisa basa. — 2 Ako. 2:11. w21.06 14 ¶1-2

Abale wathu wacikulire mbakufunika kwene-kwene. Fala la Mulungu limbandendemezera invi zawo na korowa. (Mim. 20:29) Tsono, tingasiye kuwawona kuti mbakufunika mwakusaya kunesa. Maswaka yomwe yambazindikira kufunika kwa acikulire, yangagumane phindu likulu kuposa cuma. Acikulire omwe mbakukhulupirika mbakufunika kwa Yahova Mulungu. Iye ambadziwa kuti iwo adakhala tani, ndipo ambakomedwa na makhalidwe yawo yabwino. Iye ambakomedwambo kuwona acikulire akupasa maswaka cidziwiso comwe acigumana pomwe akhala akucita utumiki bwawo mwakukhulupirika magole mazinji. (Djobi 12:12; Mim. 1:1-4) Yahova ambakomedwambo na kupirira kwawo. (Malak. 3:16) Napo kuti iwo adagumana mabvuto pa moyo wawo, cikhulupiro cawo kwa Yahova ciribe kutekenyeka ndipo cidikhiro cawo pakulewa bza kutsogolo n‘cakulimba kwene-kwene kuposa pomwe adapfunza cadidi. Ndipo Yahova ambawafuna thangwe rakuti akupitiriza kudziwisa dzina lace napo kuti iwo akalamba. — Sal. 92:12-15. w21.09 2 ¶2-3

Mpsabwino kuti ntsiku na ntsiku timbabzidinge tekha. Tenepo tingacite bzimwebzi mwa kubzibvunza kuti: ‘Kodi nimbakomedwa ndikawona kuti ndina moyo wabwino kuposa wanthu winango? Kodi m’gwere inepano nimbaphata basa na nyongo na mtima wakuti wanthu andiwone kuti ndine wabwino kwene-kwene kuposa winango? Ayai nimbaphata basa na nyongo thangwe ra kufuna kuti Yahova akomedwe?’ Bibliya limbaticenjeza kuti tileke kucita mpikisano na wanthu winango. Thangwe ranyi? Thangwe ifepano tikakumbuka kuti timbacita bwino bzinthu kuposa abale wathu, tingakhale wakubzikuza. Tsono, tikakumbukambo kuti abale wathu ambacita bwino bzinthu kuposa ifepano, tingasuname. (Aro. 12:3) Ifepano tin’funika kukumbukira kuti Yahova adatikwewera kwa iye sikuti thangwe ra kudeka, luso lakudziwa kulewalewa ayai kubvekera, koma adatikwewa thangwe ndife wakukonzeka kumufuna na kubvera Mwana wace. — Ju. 6:44; 1 Ako. 1:26-31. w21.07 14-15 ¶3-4

Kuti tikwanise kukhala wapsa mu mphanvu yakutsogolera makumbukidwe yathu, ifepano tin’funika kumbapemba, kupfunza Fala la Mulungu na kumbakumbukira bzomwe tapfunzabzo. Phatisani basa bzinthu bzimwebzi, ndipo kumbirani Yahova kuti akupaseni mphanvu. Mzimu wace wakucena un’dzakuthandizani kumalisa makumbukidwe yentse yakumbabzindendemezera na wanthu winango. Yahova an’dzakuthandizani kudziwa penu mwayamba kukhala wanthu wa njiru ayai wakubzikuza ndipo iye an’dzakuthandizanimbo kucinja mwakamfulumize. (2 Nkha. 6:29, 30) Yahova ambaidziwa mitima yathu. Ndipo ambadziwambo kuti tikucita nyongo yakuleka kutewezera makhalidwe yakuipa ya dzikoli, pabodzi na kuperewera kwathu. Pakuti Yahova ambawona nyongo yomwe tikucita kuti tileke kukhala na makhalidwe yakuipa, iye ambatifuna kwene-kwene. Kuti Yahova atithandize kubvesesa momwe ambabvera na ifepano, iye ambaphatisa basa ciratizo ca lufoyi lomwe liripo pakati pa mai na mwana wace. (Zai. 49:15) Mpsakutsangalaza kudziwa kuti Yahova ambabvambo bzibodzi-bodzi akatiwona tikucita nyongo kuti timutumikire na mtima wathu wentse! w21.07 24-25 ¶17-19

Ifepano tingathimizire kukondwa kwathu tikambaphata basa na nyongo pa bzentse bzomwe tingakumbiridwe pa basa la Yahova. Khalani ‘wakutanganidwa kwene-kwene’ pa basa lakupalizira, ndipo mbaphatani mabasa ya pa gwere na nyongo. (Mab. 18:5; Aheb. 10:24, 25) Mbakonzekerani bwino mitsonkhano kuti mumbapereke mitawiro yakulimbikisa. Mbakonzekerani bwino mbali ya nyakupfunza yomwe mwapasidwa pa mtsonkhano wa pakati pa mdzinga. Mukakumbiridwa kuti mukathandizire basa linango la gwere, mbafikani na nthawe yabwino ndipo mbakhalani wakukhulupirika. Lekani kumbakumbuka kuti basalo ndakusaya kufunika, ndipo lekanimbo kumbakumbuka kuti mukudzonga nthawe yanu papezi mukakhala mukucita basalo. Citani nyongo kuti mukulise luso lanu pa basalo. (Mim. 22:29) Mukambatumikira Yahova na nyongo, uxamwali bwanu na iye bun’dzalimba ndipo mun’dzakhala wakukondwa kwene-kwene na bzomwe mukucita. (Agal. 6:4) Ndipo mun’dzakomedwambo na anzanu akatambira udindo bomwe imwepo mukhabufuna. — Agal. 5:26. w21.08 23 ¶11

Tin’funika kutcenkha kubzikuza ndipo timbakhale wakupfunzisika. Ninga matenda yomwe yambafunga uzingo yacicitisa kuti mulopa uleke kufika mu mtima ndipo mtimayo ucitaza kuphata basa, kubzikuza kungacitise mtima wathu wakuyezezera kutazira kuphatisa basa malango yomwe Yahova ambatipasa. Afarizeu adabvuma kuti mitima yawo ikhale yakuuma ndipo bzimwebzi bzidacitisa kuti alambe umboni bwa padeca bomwe bukhalatizidwa kwa iwo na mzimu wa Mulungu. (Ju. 12:37-40) Imweyi ikhali ngozi kuna iwo thangwe akhadzonga tsogolo lawo. (Mat. 23:13, 33) Kulewa cadidi, mpsakufunika kuna ifepano kupitiriza kubvuma kuti Fala la Mulungu licinje makhalidwe yathu na kuticitisa kumbakumbuka bwino na kumbasankhula bwino bzakucita! Pakuti Tiyago akhali munthu wakubzicepesa, iye adabvuma kupfunzisidwa na Yahova. Ndipo kubzicepesa kwaceko ndiko kudamucitisa kukhala mpfunzisi waluso. w22.01 10 ¶7

‘Tikapitiriza kupemba,’ tingakhale na citsimikizo centse cakuti Baba wathu wa kudzulu ambatibva ndipo an’dzatawira mipembo yathu. (Akol. 4:2) Napo kuti mtawiro wa mpembo ungawoneke ninga kuti ukucedwa, Yahova akulewa kuti an’dzatawira mpembo wathu ‘pa nthawe yomwe tikufunikira thandizo.’ (Aheb. 4:16) Ndipopa ifepano tin’funika lini kukumbuka kuti Yahova ayebwa, penu iye akutitawira lini mpembo mwakamfulumize ninga momwe tikhakumbukirira. Mwa ciratizo, kuyambira kale-kale wanthu azinji akupemba kuti Umambo bwa Mulungu bupfudze dziko lakuipali. Napo Jezu adalewambo kuti tin’funika kumbapempherera bzinthu bzimwebzi. (Mat. 6:10) Bzingakhale bzakusaya nzeru kubvuma kuti cikhulupiro cathu kwa Mulungu citepe thangwe rakuti iye alibe kupfudza dziko pa nthawe yomwe ifepano tikhadikhirira! (Hab. 2:3; Mat. 24:44) Mpsanzeru kuna ifepano kupitiriza kudikhirira Yahova na kupemba kwa iye na cikhulupiro cakuti an’dzatitawira. Yahova an’dzapfudza dzikoli pa nthawe yomwe adaikhazikisa, thangwe iye adasankhula kale ‘ntsiku na nthawe’ kuti adzacite bzimwebzi. Ndipo imweyo in’dzakhala nthawe yabwino kwene-kwene kuna wanthu wentse. — Mat. 24:36; 2 Ped. 3:15. w21.08 10 ¶10-11

Acikulire wakubzicepesa ambadziwa kuti thangwe ra kukalamba, iwo angakwanise lini kucita bzinthu bzizinji ninga momwe akhacitira kale-kale. Mwa ciratizo, kumbukirani bza anyakunyang’anira dera wathu. Iwo akapfitsa magole 70 yakubadwa, utumiki bwawo bumbacinja. Bzimwebzi bzimbakhala bzakunesa kwa iwo, thangwe iwo ambakhala akukomedwa kutumikira abale wawo. Tsono iwo ambabvesesa kuti mpsabwino kuti maswaka yacite basalo. Bzomwe abale wacikulirewa ambacitabzi bzikundendemerana na bzomwe Alevi wa mu nthawe ya Ajirayeri akhacitambo. Iwo akapfitsa magole 50, akhakumbiridwa kuti asiye kutumikira pa tendi la mkonkhano. Aleviwo akhandokomedwa lini thangwe ra mwayi omwe akhanawo wakutumikira pa tendi. Koma iwo akhaphatisa basa mpata uli-wentse omwe akhanawo kuti athandize maswaka. (Mirew. 8:25, 26) Ntsiku zino, anyakunyang’anira dera akapfitsa magole 70 yakubadwa, iwo ambasiya kuzungira magwere. Tsono ambacita bzizinji bzomwe angakwanise kuti athandize na kulimbikisa gwere lawo. w21.09 8-9 ¶3-4

Jezu adalewa ciratizo cakulimbikisa cakulewa bza mwana wakutaika comwe ciri pa Luka 15:11-32. Mwanayo adapandukira pai wace, adacoka pamui ndipo adacita ulendo aciyenda ku “dziko lakutali.” Komwe iye adayendako adakakhala na moyo wakuipa kwene-kwene. Tsono pomwe bzinthu pa moyo wace bzidayamba kunesa, iye adayamba kukumbukira bzinthu bzomwe adacita. Mwanayo adazindikira kuti moyo wace ukhali bwino kwene-kwene pomwe akhali kumui kwa pai wace. Pakulewa bza mwana wakutaikayo, Jezu adalewa kuti “nzeru zidamubwerera.” Iye adakumbuka bza kubwerera kumui acikakumbira pai wace kuti amulekerere. Bzikhali bzakufunika kwene-kwene kwa mwanayo kuzindikira bzinthu bzakuphonyeka bzizinji bzomwe akhadacita. Ndipo iye akhafunika kucinja makhalidwe yace. Mwana wakutaika ule adalatiza kuti akhadakunguladi na mtima wentse pa bzomwe akhadacita ndipo adalatiza kuti akhafuna kukhala pomwe pa uxamwali na Yahova. Imweyi ni nkhani yakuthandiza kwene-kwene. Iyo ingathandize akulu wa m’gwere akakhala kuti akufuna kudziwa penu munthu omwe wacita pikado ikulu wakunguladi ayai ne. w21.10 5 ¶14-15

Kodi n’ciyani comwe cin’dzatekenyesedwa lini, ayai kucosedwa? Mpostolo Paulo adanemba kuti: “Pakuti tatambira Umambo bomwe bungatekenyeke lini mbatipitirizeni . . . kutumikira Mulunguyo mu njira yakubvumizika. Ndipo ticite bzimwebzi mwa kumugopa na kumulemekeza.” (Aheb. 12:28) Kutekenyesa kwakumaliziraku kukadzamala, ni Umambo bwa Mulungu bokha bomwe bun’dzakhala bulipo. (Sal. 110:5, 6; Dan. 2:44) Tin’funika lini kudzonga nthawe yathu papezi! Wanthu an’funika kusankhula: Iwo akasankhula kupitiriza kuthandizira dziko, an’dzapfudzidwa. Tsono iwo akasankhula kutumikira Yahova, acicinja moyo wawo kuti uthemere na bzomwe iye ambafuna, an’dzatambira moyo wakusaya kumala. (Aheb. 12:25) Na basa lathu lakupalizira, ifepano tingathandize wanthu kusankhula mbali yomwe angakhale. Ndipo bwerani tipitirize kukumbukira mafala ya Mbuya wathu Jezu. Iye adati: “Mafala yabwino ya Umambo yan’dzapaliziridwa pa dziko lentse la pantsi komwe kuna wanthu ninga umboni kwa mitundu yentse pamwepo cimaliziro cin’dzafika.” — Mat. 24:14. w21.09 19 ¶18-20

Akulu wa gwere, imwepo muna ugo bwa kutsangalaza wale omwe m’bale wawo asiya kutumikira Yahova. (1 Ates. 5:14) Pomwe mitsonkhano ikanati kuyamba ayai pomwe yamala, yambani ndimwepo kumbawalimbikisa. Ndipo nthawe zinango mbawazungirani ndipo mbapembani nawo pabodzi. Mbapalizirani nawo pabodzi ayai mbawacemerani kuti adzakhale namwe pa kunamata kwanu kwa pa banja. Akulu wa gwere an’funika kumbathandiza wale omwe adasunama, kuwabvera ntsisi, kuwafuna na kuwatetekera. (1 Ates. 2:7, 8) Yahova “an’funa lini kuti munthu ali-wentse adzapfudzidwe, koma an’funa kuti wanthu wentse akungule.” (2 Ped. 3:9) Napo kuti munthu angacite pikado ikulu, moyo wace umbapitiriza kukhala wakufunika kwa Mulungu. Kumbukirani kuti Yahova adapagali pereso yakuumira, yomwe ni moyo wa Mwana wace, kupagaliri ali-wentse wa ifepano. Yahova mwa lufoyi ambayezera kuthandiza wale omwe adasiya kumutumikira kuti abwerere kwa iye. Iye akudikhirira kuti wanthuwo acite bzimwebzi ninga momwe timbawonera mu ciratizo ca Jezu cakulewa bza mwana wakutaika. — Luka 15:11-32. w21.09 30-31 ¶17-19

Tani penu mukukwanisa lini kupalizira kwene-kwene ninga momwe mukhacitira kale-kale thangwe ra bvuto la thanzi? Imwepo mungakhale wakukondwa thangwe ra bzomwe mukukwanisa kucita pa basa lakupalizira. Kumbukirani bzomwe bzidacitika pomwe Mambo Davide na acikunda wace adalombola mabanja yawo yomwe yakhadatengedwa na Amaleki na kubambo bzinthu bzawo. Acikunda 200 akhadaneta kwene-kwene ndipo angadakwanisa lini kumenya nkhondo. Tenepo, iwo adasala kuti alindire bzinthu bzawo. Pambuyo pakukunda nkhondoyo, Davide adauza wanthu wace kuti agawane bzinthu bzomwe adatengera Amalekiwo ndendende na omwe akhadasalawo. (1 Sam. 30:21-25) Bzimwebzi bzikundendemeranambo na basa lathu lakupalizira na kupfunzisa wanthu lomwe likucitika pa dziko lentse la pantsi. Wale omwe ambakwanisa lini kucita bzizinji na omwe ambacita bzizinji, wentse ambakomedwa akawona kuti nyakupfunza wa Bibliya wafika pa kubatizidwa. Yahova ambawona momwe timbacitira nyongo pa basa lace na momwe timbamufunira ndipo iye ambatisimba. Iye ambatipfunzisambo momwe tingakhalire wakukondwa pa cinthu ciri-centse comwe tingacite pa basa lakupalizira. (Ju. 14:12) Tenepo, mbatitsimikizeni kuti Mulungu an’dzakomedwa na bzomwe tikucita tikaleka kubwerera m’mbuyo! w21.10 27-28 ¶15-17

Pomwe tikukalamba ifepano tingacite mantha kuti tingakwanise lini kucita bzinthu bzizinji pa kutumikira Yahova ninga momwe tikhacitira kale-kale. Napo kuti tina mphanvu zakucepa kusiyana na kale-kale, ifepano tingaphatise basa nzeru na maluso yathu kuti tithandize maswaka kuti yathemere kuphatisidwa basa mu gulu la Yahova na kupasidwa maudindo yakuthimizirika. Abale wacikulire an’funika kukhala wakubzicepesa kuti akwanise kuthandiza maswaka. Munthu wakubzicepesa ambawona winango kukhala wakufunika kwene-kwene kuposa iye. (Afil. 2:3, 4) Acikulire omwe ambalatiza khalidwe limweri, ambabvesesa kuti maswaka yangacite cinthu mwa njira zakusiyana-siyana koma bzentse bzicibverana na bzomwe Bibliya limbapfunzisa. Tenepo, iwo ambadikhira lini kuti munthu acite bzinthu ndendende ninga momwe iwo akhacitira kale-kale. (Mpal. 7:10) Napo kuti acikulire ambadziwa bzinthu bzizinji bzomwe angauze maswaka, iwo ambadziwa kuti “bzakucitika bza m’dzikoli bzikucinja” ndipo an’funika kupfunza njira zipsa zakucitira bzinthu. — 1 Ako. 7:31. w21.09 8 ¶1, 3

Yahova angafune lini kuti anamati wace acite cinthu comwe cingawadzonge. Iye ni kucena. Ajirayeri akhakwanisa kubvesesa bzimwebzi na mafala yomwe yakhadanemba pa kalata ka oro komwe kakhaikhidwa pa duku lomwe likhamangiriridwa pa mkuma wa mkulu wa antsembe. Pa kalatako pakhadanemba kuti: “Kucena ni kwa Yahova.” (Kuf. 28:36-38) Mafala ya pa kalatayo yakhatsimikizira ali-wentse omwe akhakawona kuti Yahova ngwakucenadi. Tsono tani kuna Ajirayeri wale omwe akhakwanisa lini kuwona kalatako thangwe ra kusaya kukwanisa kufenderera mkulu wa antsembeyo? Kodi bzingadakwanisika lini kuti adziwe mafala yakufunikaya? Ne! Mjirayeri ali-wentse akhabva mafala yamweya pomwe Lamulo likhawerengedwa kuna amuna, akazi na wana. (Bzak. 31:9-12) Mungadakhala mulipombo pa nthawe imweyo, mungadabva mafala yakuti: “Ine ndine Yahova, Mulungu wanu, ndipo imwepo mun’funika . . . [kukhala] wakucena, thangwe ine ndine wakucena.” “Imwepo mun’funika kukhala wakucena kwa ine, thangwe ine Yahova, ndine wakucena.” — Mwam. 11:44, 45; 20:7, 26. w21.12 3 ¶6-7

Wanthu winango angakhale na thupo thangwe ra bzomwe akufunikira pa moyo wawo. Pinango iwo ambakhala mu dziko la kusauka. Ndipo bzingakhale bzakunesa kuti agumane kobiri kuti akwanise kudyesa banja lawo. Ayai pinango munthu omwe akhadyesa banjalo wasaika, ndipo banjalo lasala pa usiwa. Bzimwebzi bzikaticitikira, ifepano tingacite bwino kulimbisa cikhulupiro cathu m’mbuto mwakucita thupo. Kumbukirani kuti Baba wathu wakudzulu, Yahova, ambatitsimikizira kuti an’dzatipasa bzomwe tikufunikira pa moyo wathu tikaikha bzinthu bza Umambo pa mbuto yakuyamba. (Mat. 6:32, 33) Nthawe zentse iye ambacita bzomwe ambalewa. (Bzak. 8:4, 15, 16; Sal. 37:25) Penu Yahova ambadyesa mbalame na maluwa, kulewa cadidi ifepano tin’funika lini kucita thupo kuti tin’dzadya ciyani ayai tin’dzabvala ciyani! (Mat. 6:26-30; Afil. 4:6, 7) Ninga momwe lufoyi limbacitisira kuti abereki acite ciri-centse kuti adyese wana wawo, lufoyi limbacitisambo kuti Baba wathu wakudzulu apereke bzinthu bzakufunikira kuna wanthu wace. w21.12 16-17 ¶4-5; 18 ¶8

Kodi imwepo mudaphonyeredwa kale na munthu ayai na Mkristau mwanzanu? Onani ciratizo ca Zuze, omwe adacitiridwa bzinthu bzakusaya cirungamo na abale wace caiwo. Iye adapitiriza kutumikira Yahova, ndipo Yahovayo adamusimba thangwe ra kudikhirira mwakupirira. Na kupita kwa nthawe, Zuze adadzalekerera abale wace omwe adamuphonyera, ndipo adawonambo momwe Yahova adamusimbira. (Ciy. 45:5) Ninga Zuze, ifepano timbatsangalazidwa tikafenderera Yahova na kudikhirira kuti iye adzamalise kusaya cirungamo pa nthawe yace. (Sal. 7:17; 73:28) Penu imwepo mukupirira bzinthu bzakusaya cirungamo bzomwe munthu wakucitirani, kumbukirani kuti Yahova ali pafupi na wale omwe akuwawidwa mu mtima. (Sal. 34:18) Iye ambakufunani thangwe ra kupirira kwanu na kukuwonanimbo mukumufotokozera thupo lanu. (Sal. 55:22) Yahova ni Muyeruzi wa dziko lentse la pantsi. Iye ambawona bzinthu bzentse bzomwe bzikucitika. (1 Ped. 3:12) Tenepo, mukakhala na bvuto likulu lomwe mukukwanisa lini kulimalisa mwekha, kumbukirani kuti mpsakufunika kudikhirira Yahova kuti amalise bvutolo. w21.08 12 ¶14; 12 ¶16

Bzin’dzakhala bza nzeru kuphatisa basa nthawe yathu pakucita bzinthu bzomwe Yahova ambakomedwa nabzo. Tin’funika kumbawona kuti bzinthu bzakufunika mpsiponi. Nthawe zinango, kuphatisa bwino basa nthawe yathu kumbathandauza kusankhula bzakucita pakati pa bzinthu bziwiri bzomwe mpsakuphonyeka lini. Nkhani yakudziwika bwino yomwe imbatithandiza kubvesesa nfundo imweyi nja Jezu pomwe adayenda kukazunga kumui kwa Mariya na Marta. Marta adakomedwa kwene-kwene kutambira Jezu ninga mulendo wace, ndipopa iye adamuphikira cakudya cabwino. Tsono Mariya adakhala pantsi acimbatetekera bzomwe Jezu akhalewa. Bzomwe Marta adacita bzikhali lini bzakuphonyeka, tsono Jezu adalewa kuti, Mariya “wasankhula cinthu cakufunika.” (Luka 10:38-42) Pa nthawe yakucepa, Mariya pinango adayebwa cakudya comwe adadya, koma bzomwe tingatsimikize mpsakuti iye alibe kuyebwa bzomwe adapfunza na Jezu pa ntsiku imweyo. Ninga Mariya omwe adakomedwa kumala nthawe na Jezu ntsiku imweyire, ifepano tin’funikambo kukomedwa na nthawe yomwe timbamala na Yahova. w22.01 27 ¶5-6

Napo kuti Akabe adabzicepesa pamaso pa Yahova, na kupita kwa nthawe bzakucita bzace bzidadzalatiza kuti iye akhalibe kukungula na mtima wentse. Iye alibe kumalisa kunamata Baala komwe wanthu akhacita mu umambo bwace. Ndipo iye alibembo kulimbikisa wanthu kuti ambanamate Yahova. Pambuyo pa Akabe kufa, Yahova adalewa momwe akhambamuwonera Akabeyo. Mpolofeta wa Yahova adalewa kuti iye akhali “munthu wakuipa.” (2 Nkha. 19:1, 2) Onani, bzingadakhala kuti Akabe adakunguladi na mtima wentse, mpolofetayu angadalewa lini kuti iye akhali munthu wakuipa omwe akhawenga Yahova. Kulewa cadidi, napo kuti Akabe adalatiza kukhumbula, koma iye alibe kukungula na mtima wentse. Kodi tingapfunze ciyani na bzomwe Akabe adacita? Pomwe Akabe adauzidwa kuti iye na banja lace angadalangidwa, adabzicepesa. Iye adacita bwino kubzicepesako. Tsono bzomwe adadzacita na kupita kwa nthawe bzidalatiza kuti iye akhalibe kukungula na mtima wace wentse. Kukungula kumbathandauza bzinthu bzizinji sikuti kundokhumbula pang’ono pa bzomwe tacita. w21.10 3 ¶4-5, 7-8

Zaiya akhali mpolofeta, ndipo bzikuwoneka kuti mkazace akhacitambo basa la upolofeta, ndipopa iye akhacemeredwa ‘mpolofeta wacikazi.’ (Zai. 8:1-4) Ninga banja, bzikuwoneka kuti Zaiya na mkazace akhaikha nzeru zawo pa kunamata Yahova. Ntsiku zino mabanja yangaikhembo nzeru zawo pa kutumikira Yahova mwa kucita ciri-centse comwe yangakwanise pa basa lace. Comwe cimbawathandiza kupitiriza kuthemba Yahova ndico kupfunza mapolofesiya ya m’Bibliya pabodzi na kuwona momwe mapolofesiyayo yambalatizira kuti njacadidi nthawe zentse. (Tito 1:2) Iwo angakumbukire bzomwe angacite kuti athandizire pa kukwanirisidwa kwa mapolofesiyayo. Mwa ciratizo, iwo angacite mbali pa kukwanisidwa kwa polofesiya ya Jezu yakulewa bza kupaliziridwa kwa mafala yabwino pa dziko lentse la pantsi pomwe cimaliziro cikanati kufika. Banja likatsimikizira kuti mapolofesiya ya m’Bibliya yakukwanirisidwa, nyongo yawo yakufuna kucita bzizinji kwa Yahova in’dzathimizirika. w21.11 16 ¶9-10

Jezu akhana thupo na mai wace, omwe bzikuwoneka kuti akhali mamsiwa. Thangwe ra lufoyi na thupo lomwe akhanalo kuna Mariya, Jezu adakumbira Juwau kuti asamalire Mariyayo, thangwe ra kudziwa kuti Juwauyo angadathandiza mai wacewo kupitiriza kutumikira Yahova. Kucokera ntsiku imweyire kuyenda kutsogolo, Juwau adakhala ninga mwana wa Mariya ndipo akhamusamalira ninga momwe angadasamalirira mai wace caiwo. Tenepo, Jezu akhana mathangwe yakubveka yakulatizira lufoyi mkazi wakufunikayu, omwe adamusamalira mwa lufoyi, kucokera pa ntsiku yomwe adabadwa. Ndipo napo pa ntsiku yomwe Jezuyo adafa Mariyayo akhadaima pafupi na iye! Kodi tingapfunze ciyani na mafala ya Jezu? Uxamwali bomwe tinabo na abale na mpfumakazi zathu zacikristau, bungakhale bwamphanvu kwene-kwene kuposa uxamwali bomwe tinabo na adzinza wathu. Adzinza wanthu angatibonerese ayai kutisiya tekha, tsono Jezu adalewa kuti tikakhala paciphatano na Yahova, pabodzi na gulu lace, ‘tin’dzatambira bzizinji kubwerezera maulendo dzana’ kuposa bzomwe tidaluza. Abale wathu wacikristau an’dzakhala ninga mwana wacimuna, mwana wacikazi, mai ayai pai kuna ifepano. (Marko 10:29, 30) Kodi mumbabzibva tani thangwe ra kucita mbali ya Akristau wakuphatana pa cikhulupiro na lufoyi lomwe analo kuna Yahova na kuna abale wawo? — Akol. 3:14; 1 Ped. 2:17. w21.04 9-11 ¶7-8

Lufoyi lacadidi limbacitisa munthu kucita nyongo kuti athandize wanthu winango. Mwakundendemerana na kale-kale, ntsiku zino, abale na mpfumakazi zizinji ambalatiza lufoyi lacadidi kuna Akristau anzawo napo kuti winango ambawadziwa lini. Mwa ciratizo, akabva kuti ku mbuto inango kwacitika malengwa ya pantsi, mwakamfulumize iwo ambafuna kudziwa momwe angathandizire. Munthu wa m’gwere akagumana na mabvuto, iwo ambanyang’ana njira ya momwe angamuthandizire. Ninga Akristau wakuyambirira wa ku Masedoniya, iwo ambacita bzizinji kuposa bzomwe bzikhadikhiririka. Iwo ambacita nyongo kuti apereke bzinthu “bzizinji kuposa bzomwe [anabzo]” kuti athandize abale omwe akugumana na mabvuto. (2 Ako. 8:3) Akulu wa gwere ntsiku zino ambawona ndipo ambatenda thandizo lomwe abale na mpfumakazi ambapereka kuna anzawo. Kutenda komwe iwo ambacita, kumbawathandiza kuti akhale na mphanvu kuti apitirize kuthandiza abale wawo omwe akufunikira thandizo. — Zai. 32:1, 2. w21.11 11 ¶14; 12 ¶21

Malango ngakufunika kwa ifepano. Nthawe zinango, ifepano ndife timbayamba kukumbira munthu omwe timbamuthemba kuti atipase malango, tsono nthawe zinango, m’bale omwe akucita nafe thupo angabwere acitiuza kuti tayamba kupambuka ndipo tikucita cinthu comwe tingadzakhumbule naco kutsogolo. (Agal. 6:1) Ndipo nthawe zinango, tikatsimulidwa thangwe rakuti tacita cinthu cakuphonyeka, timbakhala tikutambira malango. Bziribe basa kuti malangoyo yabwera tani, ifepano tin’funika kuyatetekera. Tikacita bzimwebzi, bzinthu bzin’dzatifambira bwino ndipo tingapulumuse moyo wathu. (Mim. 6:23) Vesi la ntsiku ya leroli likutiuza kuti tin’funika ‘kumbatetekera mafala ya wanthu wanzeru.’ Palibe munthu omwe ambadziwa bzentse, ndipo alipo wanthu omwe ambadziwa bzizinji kuposa ifepano. (Mim. 12:15) Ndipopa tikambatetekera malango timbalatiza kuti ndife wakubzicepesa. Ndipo timbalatizambo kuti timbadziwa kuti pana bzinthu bzomwe tingakwanise lini kucita ndipo timbafuna kuti anzathu atithandize. Mambo Salomau, omwe akhali wanzeru kwene-kwene, adanemba kuti: “Bzakulinga bzimbakwanisika . . . ‘alangizi’ akawanda.” — Mim. 15:22. w22.02 8 ¶1-2

Mpsakukwanira lini kuna nyakucita pikado kundolewa kuti wakungula pambuyo pakucita pikado ikulu. Iye an’funika kucinja momwe ambakumbukirira, momwe ambabvera na kucita bzinthu bzakulatiza kuti wakunguladi. Bzimwebzi bzikuphatanidza kusiya bzinthu bzakuipa bzomwe akhacita, aciyamba pomwe kubvera mitemo ya Yahova. (Zakiy. 33:14-16) Thupo lakuyambirira lomwe nyakucita pikado an’funika kukhala nalo ndiro kukhala pomwe pa uxamwali bwabwino na Yahova. Kodi tin’funika kucita ciyani tikadziwa kuti xamwali wathu wacita pikado ikulu? Ifepano tingamupweteke xamwali wathuyo tikasaya kuuza akulu wa gwere pikado yomwe wacitayo. Bzimwebzi bzingayende lini patali, thangwe Yahova akuwona. (Mim. 5:21, 22) Imwepo mungamuthandize xamwali wanu mwa kumukumbusa kuti akulu wa gwere an’funa kumuthandiza. Xamwali wanuyo akalamba kukauza akuluwo, imwepo mun’funika kukawauza bza nkhaniyo. Mukacita bzimwebzi, mun’dzalatiza kuti mukufunadi kumuthandiza. w21.10 7 ¶19-21

Tentsenefe tingatewezere Jezu mwa kumbaikha pa mbuto yakuyamba bzomwe winango ambafuna. Bibliya limbalewa kuti iye “adakhala ninga kapolo.” (Afil. 2:7) Kapolo wabwino ayai nyabasa ambacita ciri-centse kuti mbuya wace akomedwe naye. Pakuti ifepano ndife akapolo wa Yahova ndipo timbatumikira abale wathu, tikufunisisa kuti tikhale wakufunika kwene-kwene kwa Yahovayo na kuna abale wathuwo. Bzibvunzeni kuti: ‘Kodi ndine wakukonzeka kuphatisa basa nthawe na mphanvu zangu kuti ndithandize wanthu winango? Kodi nimbabzipereka kuti ndicitembo basa la kupsaira pa mbuto yakucitira mitsonkhano mikulu-mikulu ayai basa lakukonza bzinthu bzomwe bzadzongeka pa Nyumba ya Umambo?’ Tiyezezere kuti mwazindikira kuti mun’funika kucinja cinthu cinango, tsono bzikukunesani kucita bzimwebzo. Kodi n’ciyani comwe mun’funika kucita? Pembani kwa Yahova na mtima wentse. Muuzeni Yahova kuti mukubva tani ndipo mukumbireni kuti akupaseni “mphanvu na cikhumbo kuti mucite bzomwe iye akufuna.” — Afil. 2:13. w22.02 22-23 ¶9-11

Jezu adalatiza kudeka mtima mwa kusaya kukhala wakunesa, napo pa nthawe yomwe bzinthu bzikhali lini bwino. (Mat. 11:29, 30) Kumbukirani bzomwe bzidacitika pomwe mkazi wa ku Fenisiya adamukumbira kuti alimbise mwana wace omwe akhaduwala. Pakuyamba, Jezu adalamba bzomwe mkaziyo adakumbira. Tsono pomwe mkaziyo adalatiza cikhulupiro camphanvu, iye adamudekera mtima acilimbisa mwanaceyo. (Mat. 15:22-28) Jezu akhazeza lini kupereka malango, napo kuti akhali wakudeka mtima. Ndipo nthawe zinango iye akhalatiza kudeka mtimako mwa kutsimula wale omwe iye ambawafuna. Kumbukirani bzomwe bzidacitika pomwe Pedru adayezera kumugobola mabondo kuti atazire kucita bzomwe Yahova akhafuna. Jezu adamutsimula patsogolo pa apostolo wentse. (Marko 8:32, 33) Iye adacita bzimwebzi kuti apfunzise Pedru na kucenjeza anyakupfunza winangowo kuti aleke kumbakhala wanthu wakubzikuza. Ndipo alibe kucita bzimwebzo pakufuna kunyazisa Pedruyo. N’cadidi kuti Pedru adabva manyazi, tsono iye adagumana phindu na malango yomwe adapasidwa. Nthawe zinango imwepo mungafunike kupereka malango kwa anzanu kuti mulatize kuti ndimwe wakudeka mtima. Pakucita bzimwebzi, tewezerani Jezu mwa kupereka malango yakucokera m’Fala la Mulungu. w22.03 11 ¶12-13

Tikatumbiza Yahova timbakhala tikumunamata. (Sal. 34:1) Ifepano tikambauza anzathu makhalidwe yakudabwisa ya Yahova na bzomwe ambacita, timbakhala tikumutumbiza. Ifepano tin’dzakwanisa kutumbiza Yahova tikambatenda bzomwe ambaticitira. Tikambapambula nthawe kuti tikumbukire bzinthu bzentse bzabwino bzomwe iye ambaticitira tin’dzawona kuti mpsakufunika kwene-kwene kumbamutumbiza. Basa lakupalizira limbatipasa mwayi wa “[kumbapereka] nthawe zentse ntsembe zacitumbizo kwa Mulungu” zomwe “ni mafala yakucokera pa mulomo pathu.” Ifepano tin’funika kukonzekera bwino-bwino bzomwe tin’funa kukalewalewa na wanthu mu upalizi ninga momwe timbacitira tikafuna kupemba kwa Yahova. Tikufuna kuti “ntsembe zathu zacitumbizo” zikhale zabwino kwene-kwene. Ndipopa timbakomedwa kwene-kwene tikakhala tikupfunzisa wanthu cadidi. w22.03 21 ¶8