Outubro

Mafala ya m’nyantsi. Bzomwe ifepano timbapfunzisa na kukhulupira bzimbacokera m’Bibliya. Tsono napo bziri tenepo, wanthu azinji ntsiku zino ambalamba mafala yomwe timbawapalizira, thangwe rakuti tiribe bzakucita-cita bzizinji pa mitsonkhano yathu. Ndipo bzomwe ifepano timbapfunzisa ni bzinthu lini bzomwe wanthu ambadikhirira kubva. Kodi n’ciyani comwe cin’dzatithandiza kuleka kuluza cikhulupiro cathu? Mpostolo Paulo adauza Akristau wa ku Roma kuti: ‘Cikhulupiro cimbabwera pambuyo pa kubva bzinthu, ndipo bzinthu bzakubvedwabzo bzimbakhala bzakucokera m’mafala yakulewa bza Kristu.’ (Aro. 10:17) Tenepo, ifepano timbakulisa cikhulupiro cathu mwakupfunza Fala la Mulungu sikuti na kanamatidwe komwe kambabverana lini na bzomwe Bibliya limbapfunzisa, napo kanamatidweko kawoneke ninga kuti n’kabwino ayai kakudekeza. Tin’funika kukulisa cikhulupiro cathu kucokera pa cidziwiso ca cadidi, thangwe ‘mwakusaya cikhulupiro, bzingakwanisike lini kukondwesa Mulungu.’ (Aheb. 11:1, 6) Tenepo, tin’funika lini kucita kuwona cizindikiro cakucokera kudzulu kuti titsimikize kuti tagumana cadidi. Kupfunza bwino-bwino bzinthu bzakulimbikisa bza m’Bibliya n’kwakukwanira kuti titsimikizire kuti tagumana cadidi, ticileka kupenukira. w21.05 4-5 ¶11-12

Mpostolo Paulo adagumana na mabvuto mazinji. Iye akhafunikira mphanvu, maka-maka pomwe adamenyedwa, adabomedwa na minyala na pomwe adaikhidwa m’kawoko. (2 Ako. 11:23-25) Paulo alibe kubva manyazi kulewa kuti iye nthawe zinango akhacita nyongo kuti amalise makumbukidwe yakuipa. (Aro. 7:18, 19, 24) Iye adapirirambo matenda yomwe yakhali ninga ‘munga m’thupi’ omwe akhafunisisa kuti Mulungu amucosere. (2 Ako. 12:7, 8) Yahova adapasa mphanvu Paulo kuti apitirize kucita utumiki bwace, napo kuti akhagumana na mabvuto. Onani bzomwe Paulo adacita. Mwa ciratizo, pa nthawe yomwe Paulo akhali m’kawoko ku Roma, iye adacita nyongo yakukhotcerera mafala ya Mulungu pakati pa akulu-akulu wa Adjuda ndipo pinango pakati pa akulu-akulu wa boma. (Mab. 28:17; Afil. 4:21, 22) Iye adapalizirambo alindiri wa m’kawoko azinji na wentse omwe akhabwera kudzamuwona m’kawokomo. (Mab. 28:30, 31; Afil. 1:13) Pa nthawe ibodzi-bodziyo, Mulungu adaphatisa basa Paulo kuti anembe matsamba yomwe yadathandiza Akristau wacadidi wakale-kale ndipo yakupitiriza kuthandizambo Akristau wa ntsiku zino. w21.05 21 ¶4-5

Kubzikuza kudacitisa Mambo wa Djuda, Uziya, kulamba malango yomwe adapasidwa na wanthu winango, ndipo adacita bzinthu bzomwe akhathemera lini kucita. Pakuyamba, Uziya akhali munthu omwe akhacita bzinthu bzabwino. Iye adakunda nkhondo zizinji, adamanga mizinda mizinji, ndipo akhana minda mizinji. ‘Mulungu wacadidi akhacitisa kuti bzinthu bzimufambire bwino.’ (2 Nkha. 26:3-7, 10) Bibliya limbalewa kuti: ‘Tsono, pomwe adakhala wamphanvu, mtima wace udabzikuza mpaka kufika pa kumudzonga.’ Yahova akhadalewa kale kuti antsembe ndiwo akhathemera kupereka ntsembe mu templo. Tsono Mambo Uziya, thangwe ra kubzikuza, adapita mu templo acipereka ntsembe. Yahova alibe kukomedwa ndipo adalanga mwamuna wakubzikuzayu na mapere. (2 Nkha. 26:16-21) Kodi ifepano tingakhale wakubzikuza ticicita pikado ninga momwe Uziya adacitira? Inde, bzingaticitikire, tikambakumbukira bza ife tekha mwakunyanyira. Lekani kuyebwa kuti luso liri-lentse lomwe tinalo, ayai mwayi omwe tinawo m’gwere, mpsakucokera kwa Yahova. (1 Ako. 4:7) Ifepano tikakhala wakubzikuza, Yahova an’dzatiphatisa lini basa. w21.06 16 ¶7-8

Jezu akhadziwa kuti ni nthawe lini zentse pomwe anyakupfunza wace bzinthu bzingadawafambira bwino mu utumiki bwawo. Bzimwebzi n’cadidi, thangwe rakuti tikudziwa lini kuti ni wanthu angasi omwe adakhala Akristau pa wanthu omwe anyakupfunzawo adawapalizira. Anyakupfunzawo akhafunika lini kukondwa thangwe ra bzinthu bzomwe adakwanisa kucita, koma akhafunika kukondwa thangwe ra kudziwa kuti Yahova adakomedwa na nyongo yawoyo. Tikambapirira mu utumiki bwathu, tin’dzatambira moyo wakusaya kumala. Tikambacita nyongo pa basa lakupalizira na kupfunzisa mafala ya Mulungu, timbakhala ‘tikubzala mwakubverana na mzimu wakucena’ ndipo timbakhala tikubvumambo kuti mzimu wa Mulunguyo uphate basa pa moyo wathu. “Tikasaya kuneta,” Yahova akutiuza kuti an’dzatipasa moyo wakusaya kumala, bziribe basa penu takwanisa kuthandiza anyakupfunza kubzipereka kwa Mulungu ayai ne. — Agal. 6:7-9. w21.10 26 ¶8-9

Pa nthawe inango, Jezu na anyakupfunza wace akhadaneta thangwe ra kupalizira kwene-kwene. Iwo adayenda ku mbuto inango kuti akapume, tsono pomwe adafika ku mbutoko thimu la wanthu likhali kale kumweko. Thangwe ra ntsisi, Jezu adayamba kuwapfunzisa wanthuwo ‘bzinthu bzizinji.’ Jezu akhadziwa momwe wanthuwo akhabvera. Iye adawona kubonera komwe wanthuwo akhacita, na mtsangalazo omwe wanthuwo akhafunikira. Ndipopa iye akhafunisisa kuwathandiza. Umu ni momwe wanthu ntsiku zino aliri. Lekani kukumbuka kuti bzinthu bzikuwafambira bwino pa moyo wawo. Iwo ali ninga mabira yomwe yadzungaira, yomwe yalibe makabusa kuti ayatsogolere. Mpostolo Paulo adalewa kuti wanthu amwewa ambamudziwa lini Mulungu ndipo alibe mwayi wakudzakhala na moyo wakusaya kumala. (Aef. 2:12) Tikakumbukira momwe wanthu aliri ku mbuto komwe timbapalizira, lufoyi na ntsisi bzin’dzaticitisa kuti tiwathandize wanthuwo kudziwa Mulungu. Ndipo cinthu comwe tingacite kuti tiwathandize ni kupfunza nawo Bibliya. w21.07 5 ¶8

Munthu wakubzikuza ambasamwa ndipo ambakhala alibe basa na anzace. Ndipo munthu wa njiru ambandokhumba lini kukhala na cinthu ca mwanzace, koma ambaphingiza kuti mwanzaceyo aleke kukhala na cinthuco. Tenepo, munthu akakhala akucitira njiru mwanzace, bzin’funa kulewa kuti iye ambawenga mwanzaceyo. Makhalidwe yakuipa yakubzikuza na njiru yali ninga mabvundu yomwe yambapswipiza mafuta ya ndeke. Ndekeyo ingambuluke tsono mabvunduyo yangafunge matubu yomwe yambapita mafutayo ndipo ndekeyo ingagwe. Mpsibodzi-bodzimbo, munthu angamale nthawe akutumikira Yahova, tsono iye akakhala wakubzikuza ayai wa njiru an’dzagwa. (Mim. 16:18) Iye an’dzasiya kutumikira Yahova ndipo an’dzabzidzonga yekha acidzongambo anzace. Ifepano tingakunde khalidwe la kubzikuza mwa kupitiriza kukumbukira mafala yomwe mpostolo Paulo adanemba kuti: ‘Lekani kucita ciri-centse na ndewo ayai na dyera, koma mwa kubzicepesa, mbawonani winango kukhala wakukuposani.’ — Afil. 2:3. w21.07 15-16 ¶6-8

Wanthu winango ambakumbuka kuti gereja yacadidi in’funika kutawira mibvunzo yentse napo mibvunzo yomwe mitawiro yace imbagumanika lini m’Bibliya. Kodi makumbukidwe yamweya ngabwino? Onani bzomwe mpostolo Paulo adalewa. Iye adauza Akristau anzace kuti ambawonesese “bzinthu bzentse,” tsono iye adabvuma kuti pakhana bzinthu bzizinji bzomwe akhabvesesa lini. (1 Ates. 5:21) Ndipo iye adalewa pomwe kuti: “Tina cidziwiso cakuperewera” ndipo “tikuwona lini bwino-bwino” thangwe tikuphatisa basa supedyo. (1 Ako. 13:9, 12) Paulo akhabvesesa lini bzinthu bzentse, ndipo ifepano timbabvesesambo lini. Tsono Paulo akhabvesesa cadidi cakulewa bza Yahova na bzomwe an’funa kudzacita kutsogolo. Bzomwe akhadziwabzo bzidamuthandiza kukhulupira kuti iye akhadagumana cadidi! Njira ibodzi yomwe ingatithandize kulimbisa cikhulupiro cathu kuti tacigumana cadidi ndiyo kundendemezera kunamata komwe Jezu adasiya na kanamatidwe komwe Mboni za Yahova zimbacita ntsiku zino. w21.10 18-19 ¶2-4

Abale wacikulire, dziwani kuti imwepo mungacite bzizinji kuti muthandize winango napo penu mukucita utumiki bwa nthawe zentse ayai ne. Kodi mungacite tani bzimwebzi? Bvumani kuti bzinthu bzacinja pa moyo wanu, khalani na bzakulinga bzipsa ndipo kumbukirani kucita bzomwe mungakwanise sikuti bzomwe mungakwanise lini. Mambo Davide adalatizambo kuti akhali wakuzindikira malire. Na mtima wace wentse, iye akhafuna kumangira nyumba Yahova. Tsono pomwe Yahova adamuuza kuti mwana wace Salomau ndiye omwe angadamanga nyumbayo, Davide adabvuma bzomwe Yahova adalewabzo ndipo adathandizira basalo na mtima wace wentse. (1 Nkha. 17:4; 22:5) Davide alibe kubzibva kuti ndiye omwe akhadathemera kucita basalo thangwe rakuti Salomau akhali mwana ndipo ‘akhadziwa lini bzinthu bzizinji.’ (1 Nkha. 29:1) Davide akhadziwa kuti Yahova ndiye omwe angadacitisa kuti basalo lifambe bwino, sikuti magole ayai luso la wanthu omwe angadatsogolera basalo. Abale wacikulire ntsiku zino akutewezera Davide mwakupitiriza kutumikira Yahova na nyongo napo kuti utumiki bwawo bwacinja. Ndipo iwo ambadziwa kuti Yahova an’simba maswaka yomwe yakucita basa lomwe iwo akhacita. w21.09 9 ¶4; 10 ¶5, 8

Tikambakhala na bzakulinga pa kutumikira Yahova, moyo wathu umbakhala wabwino na wathandauzo. Tsono comwe cingatithandize ni kukhala na bzakulinga mwakubverana na luso lathu pabodzi na momwe bzinthu bziriri pa moyo wathu, sikuti kutewezera wanthu winango. Thangwe tikawatewezera, ifepano tingasuname ndipo tingamale mphanvu. (Luka 14:28) Ninga mtumiki wakukhulupirika wa Yahova, imwepo ndimwe wakufunika m’banja lace ndipo ndimwe wakusiyana na munthu ali-wentse. Yahova alibe kukukwewerani kwa iye thangwe rakuti mumbadziwa bzinthu bzizinji kuposa anzanu. Iye adakukwewani thangwe rakuti pomwe adanyang’anisa mu mtima mwanu adawona kuti ndimwe wakuderekha nakuti mukapfunzisidwa mungacinje. Tsimikizani kuti iye ambakomedwa imwepo mukacita ciri-centse comwe mungakwanise kuti mumutumikire. Kupirira na kukhulupirika kwanu kumbalatiza kuti imwepo muna ‘mtima wabwino.’ (Luka 8:15) Tenepo, pitirizani kucita ciri-centse comwe mungakwanise pa kutumikira Yahova. Mukacita bzimwebzi, imwepo mun’dzakhala wakukondwa. — Agal. 6:4. w21.07 24 ¶15; 25 ¶20

Kawiri-kawiri ifepano timbafunika kupirira pomwe tikudikhira kuti cirungamo cicitike. Tsono, akulu wa gwere akadziwa kuti munthu wacita pikado ikulu, iwo ambapemba kuti akhale na ‘nzeru zakucokera kudzulu’ kuti akwanise kuwona nkhaniyo ninga momwe Yahova akuiwonera. (Tiy. 3:17) Iwo ambacita bzimwebzi thangwe an’funa kuthandiza omwe acita pikadoyo kuti ‘asiye njira yace yakuphonyeka’ bzikakwanisika. (Tiy. 5:19, 20) Ndipo iwo ambafunambo kucita ciri-centse comwe angakwanise kuti akhotcerere gwere na kutsangalaza wale omwe awawidwa. (2 Ako. 1:3, 4) Akulu akadziwa kuti munthu acita pikado ikulu, cakuyamba, iwo an’funika kufufudza kuti akhale na umboni bwentse bwa nkhaniyo, bzomwe bzimbatenga nthawe. Ndipo akamala ambapemba ndipo ambapereka malango yakucokera m’Bibliya na kulanga munthu omwe acita pikadoyo mwakubverana ‘na mphimo yakuthemera.’ (Jer. 30:11) Akuluwo ambacedwa lini kutonga nkhani ndipo ambatongambo lini nkhaniyo pomwe akanati kuibvesesa. Akulu wa gwere akambacita bzinthu mwakutsogoleredwa na Yahova, gwere lentse lin’dzagumana phindu. w21.08 11 ¶12-13

Thangwe ra njala yomwe idacitika mu Jirayeri, Naomi, bayace na wana wace awiri adafuluka aciyenda kukakhala ku Moabe. Pomwe akhali kumweko, bayace wa Naomi adasaika. Wana wace awiri adalowola, koma bzakupasa ntsisi mpsakuti wanawo adadzafambo. (Ru. 1:3-5; 2:1) Bzomwe bzidacitikabzo bzidacitisa Naomi kusunama kwene-kwene. Pakuti iye akhana thupo ndipo akhadasunama, adakumbuka kuti Yahova wamuphindukira. Onani bzomwe iye adalewa thangwe ra kubva kuwawa mu mtima. Iye adati: ‘Boko la Yahova landiphindukira. Wamphanvu-zentse acitisa moyo wangu kukhala wakuwawa kwene-kwene.’ Iye adalewa pomwe kuti: ‘Yahova wandiphindukira ndipo Wamphanvu-zentse wandicitisa kuti ndigumane na tsoka.’ (Ru. 1:13, 20, 21) Yahova ambabvesesa kuti ‘[kubonera] kungacitise munthu wanzeru kucita bzinthu mwakusaya kukumbuka.’ (Mpal. 7:7) Naomi akhafunikira thandizo kuti akwanise kuwona kuti Yahova akhali ku mbali yace. Tenepo, iye adacitisa kuti Rute alatize lufoyi lacadidi kuna Naomi. Rute mwakudeka mtima, adathandiza amibzala wace kuleka kukhala wakusunama na kudziwa kuti Yahova akhawafuna kwene-kwene. w21.11 9 ¶9; 10 ¶10, 13

Penu tikucita kale nyongo pa basa la kutumikira Yahova, kodi bzikufuna kulewa kuti tin’funika lini kucita pomwe bzinthu bzinango? Nee, n’tenepo lini! Tin’funika kukhala na bzakulinga bzomwe bzingatithandize kukhala apalizi na apfunzisi wabwino kuti tithandize abale na mpfumakazi zathu. Tin’dzakwanisa kucita bzimwebzi tikakhala wanzeru na wakubzicepesa pakuthandiza winango, sikuti kumbabzikumbukira tekha basi. (Mim. 11:2; Mab. 20:35) Kodi ni bzakulinga bziponi bzomwe mungakhale nabzo? Mukumbireni Yahova kuti akuthandizeni kuwona bzomwe mungakwanisedi kucita. (Mim. 16:3) Kodi imwepo mungakwanirise cakulinga cakukhala mpainiya wakuthandiza ayai wakukhazikika, kutumikira pa Beteli, ayai kuthandizira basa lakumanga-manga? Pinango imwepo mungapfunze cirewedwe cipsa kuti mukwanise kumwaza bzipsa bzabwino ayai kuti mukapalizire ku mbuto inango. w21.08 23 ¶14-15

Yahova ambakomedwa kulatiza lufoyi lacadidi. (Oze. 6:6) Iye ambalimbikisa atumiki wace kuti acitembo bzibodzi-bodzi. Mwakuphatisa basa mpolofeta Mikeya, Mulungu akutiuza kuti ‘timbalatize lufoyi lacadidi.’ (Mik. 6:8) Tikanati kucita bzimwebzi, ifepano tin’funika kudziwa thandauzo la lufoyi lacadidi. Kodi lufoyi lacadidi n’ciyani? Mafala yakuti ‘lufoyi lacadidi’ yambagumanika maulendo 230 mu Bibliya Lakusanduliziridwa la Dziko Lipsa. Kodi lufoyi limweri lacadidi n’ciyani? Mwakubverana na “Kafotokozedwe ka Mafala Manango ya m’Bibliya” mu Bibliya limweri, “limbathandauza kukhulupirika na kuphatisisa cinthu, komwe ni kufunisisa munthu na kupitiriza kukhala ku mbali yace. Mafala yamweya yambaphatisidwa basa pa kufotokoza lufoyi lomwe Mulungu analo kuna wanthu na lufoyi lomwe wanthu ambalatizana.” Yahova ni ciratizo cabwino kwene-kwene pakulatiza lufoyi lacadidi. Ndipopa Mambo Davide adalewa kuti: ‘Imwe Yahova, lufoyi lanu lacadidi limbafika kudzulu . . . Imwe Mulungu, lufoyi lanu lacadidi ndapadzulu kwene-kwene!’ (Sal. 36:5, 7) Ninga Davide, kodi ifepano timbatenda lufoyi lacadidi la Mulungu? w21.11 2 ¶1-2; 3 ¶4

Atumiki wa Yahova omwe ambacita mbali ya banja lace akuphatanidza Jezu, omwe ni “wakuyamba kubadwa m’cirengedwe centse,” na anjo azinji. (Akol. 1:15; Sal. 103:20) Pomwe Jezu akhali pa dziko la pantsi, iye adalatiza kuti wanthu wakukhulupirika angakwanise kuwona Yahova ninga Baba wawo. Pomwe iye akhaceza na anyakupfunza wace, adawauza kuti Yahova ni “Baba wangu omwe ni Baba wanumbo.” (Ju. 20:17) Ifepano tikabzipereka kwa Yahova ticibatizidwa, timbacita mbali ya banja la lufoyi la abale na mpfumakazi. (Marko 10:29, 30) Yahova ni Baba walufoyi. Jezu akufuna kuti ifepano tiwone Yahova ninga momwe iye ambamuwonera, kumuwona ninga m’bereki walufoyi, wakudeka mtima na omwe tingaceze naye nthawe iri-yentse, sikuti kumuwona ninga munthu wakunesa omwe mpsakunesa kuceza naye. Iye adayamba mpembo wa ciratizo na mafala yakuti: “Baba wathu.” Jezu angadafuna angadatiuza kuti ticemere Yahova kuti “Wamphanvu-zentse,” “Mulengi” ayai “Mambo wa nthawe zentse” thangwe rakuti yamweya ni madzina yace ya ulemu yomwe yambagumanika m’Bibliya. (Ciy. 49:25; Zai. 40:28; 1 Tim. 1:17) Tsono Jezu adatiuza kuti timbacemere Yahova kuti “Baba.” w21.09 20 ¶1, 3

Mambo Manase akhana mtimbo ndipo adalamba kutetekera mafala yomwe mpolofeta wa Yahova adamuuza. Pakumalizira “Yahova adabweresera Djuda akulu-akulu wa acikunda wa mambo wa Asiriya ndipo iwo adaphata Manase pomwe akhadabisalika m’cidindi. Adamumanga na bzingwe bza mkuwa ndipo adamutenga aciyenda naye ku Babiloniya.” Pomwe Manase akhali m’kawoko ku Babiloniya, adakumbukira kwene-kwene bzomwe adacita. Iye ‘adapitiriza kubzicepesa kwene-kwene kwa Mulungu wa makolo yace’ ndipo adacita bzizinji kuposa bzimwebzo. ‘Iye adadandaulira Yahova Mulungu wace kuti amubvere ntsisi.’ Kulewa cadidi, Manase ‘adapitiriza kupemba kwa iye.’ Mwamuna wakuipayu, akhacinja makhalidwe yace. Iye adayamba kuwona kuti Yahova ni ‘Mulungu wace,’ ndipo alibe kulekeza kupemba kwa iye. (2 Nkha. 33:10-12) Na kupita kwa nthawe, Yahova adatawira mipembo ya Manase. Yahova adakwanisa kuwona kuti Manase akhadacinjadi thangwe ra bzinthu bzomwe iye akhalewa mu mpembo. Tenepo, Yahova adatetekera Manase pomwe iye adakumbira kuti amulekerere na kumubvumiza kukhala pomwe mambo. Manase adalokotera mpata umweyo kuti alatize kuti akhadakunguladi. w21.10 4 ¶10-11

Akila na Prisila akhafunika kusiyana na wanthu omwe akhadazolowerana nawo na kusiyambo nyumba yawo, acikayamba moyo upsa wakukonza na kugulisa matendi ku mbuto inango. Kodi moyo upsa omwe iwo adakakhala nawo udawatazisa kucita bzizinji pa kutumikira Yahova? Pinango imwepo mukudziwa mtawiro wa mbvunzoyu. Mu mzinda wa Kolinto, omwe adakakhala, Akila na Prisila adakakhala wakuphatana na gwere la kumweko ndipo adaphatambo basa pabodzi na Paulo pakulimbikisa abale wa kumweko. Patsogolo pace, iwo adafulukira ku mzinda unango omwe ukhafunikira apalizi azinji. (Mab. 18:18-21; Aro. 16:3-5) Banjalo lidakhala na moyo wakukondwa kwene-kwene. Mabanja ntsiku zino yangatewezerembo Akila na Prisila mwa kuikha Umambo pa mbuto yakuyamba. Nthawe yabwino yomwe mabanja yangambacezerane cakulinga cawo pa moyo ni pomwe akali pa umakhadzi. Mabanja yakambacita pabodzi bzinthu bzauzimu, yambakhala na mwayi wakuwona mzimu wa Yahova ukuphata basa pa moyo wawo. — Mpal. 4:12. w21.11 17 ¶11-12

Bzikuwoneka kuti tin’funika kumbakumbukira malango ya Mulungu yakuti timbalemekeze abereki wathu. Mbakumbukirani kuti mafala yomwe yambagumanika pa Mwambo 19:3, yakuti timbalemekeze mai wathu na pai wathu, yambabwera patsogolo pa mafala yakuti: “Mun’funika kukhala wakucena, thangwe ine Yahova Mulungu wanu, ndine wakucena.” (Mwam. 19:2) Mwakubverana na malango ya Yahova yakuti timbalemekeze abereki wathu, tin’funika kubzibvunza tekha kuti, ‘Kodi bzinthu bzikundifambira tani pa nkhani imweyi?’ Mukawona kuti mukhafunika kucita bzizinji m’mbuyomu, imwepo mungafunike kucinja bzinthu pa moyo wanu. Napo kuti mungacinje lini bzomwe mudacita m’mbuyo, koma mungaphatise basa bzomwe mudaphonyabzo kuti mucite bzinthu bzizinji kuna abereki wanu tsapano. Pinango imwepo mungakonze bzakuti mumbamale nthawe na iwo. Ayai tani pa nkhani ya kubzipereka kuti muwathandize pa bzomwe akufunikira pa moyo wawo wakuthupi, wauzimu ayai makumbukidwe yawo? Kucita bzimwebzi kukubverana na bzomwe Mwambo 19:3 ambalewa. w21.12 4-5 ¶10-12

Mambo Davide adacita bzinthu bzizinji bzakuipa. Mwa ciratizo, iye adacita upombo na Bateseba, ndipo iye adacita ciri-centse kuti mwamuna wace aphedwe. (2 Sam. 11:2-4, 14, 15, 24) Thangwe ra bzimwebzi, Davide alibe kundobzibweresera mabvuto yekha, koma adabwereserambo mabvuto akazace winango. (2 Sam. 12:10, 11) Pa nthawe inango, iye alibe kuthemba Yahova pomwe adacita kanembera wa acikunda wace. Pinango iye adacita bzimwebzo thangwe ra kubzikuza na kuthemba kuwanda kwa acikunda wace. Tsono bzimwebzi bzidacitisa kuti Ajirayeri wakukwana 70 000 afe! (2 Sam. 24:1-4, 10-15) Kodi imwepo mungadamuwona tani Davide? Kodi mungadalewa kuti iye ngwakusaya kuthemera kubveredwa ntsisi na Yahova? Yahova alibe kuwona tenepoyo. Iye adawona bzinthu bzakusiyana-siyana bzomwe Davide adacita bzakulatiza kuti akhali munthu wakukhulupirika pabodzi na kukungula na mtima wentse komwe iye adacita. Thangwe ra bzimwebzi, Yahova adalekerera Davide napo kuti iye adacita pikado zikulu. Yahova akhadziwa kuti Davide ambamufuna kwene-kwene ndipo akhafuna kucita bzinthu bzabwino. Kodi imwepo mukutenda lini Mulungu wathu thangwe ra kudziwa kuti iye ambandowona bzinthu bzabwino bzomwe timbacita? — 1 Wam. 9:4; 1 Nkha. 29:10, 17. w21.12 19 ¶11-13

Jezu adalatiza ntsisi kuna wanthu wakupunduka. Kumbukirani mafala yomwe iye adatumiza kuna Juwau Batista. Iye adati: “Azimola akuwona, anyakupunduka akufamba, anyamapere akupozedwa, ankhuthu akubva, anyakufa akulamusidwa.” Pakuwona bzakudabwisa bzomwe Jezu akhacita, “wanthu wentse . . . adatumbizambo Mulungu.” (Luka 7:20-22) Akristau ambakomedwambo kutewezera Jezu pakulatiza ntsisi kuna wanthu wakupunduka. Tenepo, ndife wakudeka mtima, wa lufoyi na wakupirira na wanthu amwewa. Inde, tikudziwa kuti Yahova alibe kutipasa mphanvu yakucita bzakudabwisa. Koma ifepano tina mwayi wakufotokozera azimola wakuthupi ayai wauzimu mafala yabwino yakulewa bza paraizo yomwe wanthu omwe an’dzakhala m’mwemo an’dzakhala na manungo yabwino na moyo wabwino wauzimu. (Luka 4:18) Mafala yabwinoya yakucitisa kale wanthu azinji kutumbiza Mulungu. w21.12 9 ¶5

Tiyago adaphatisa basa Bzinembo pakupfunzisa. Iye adaphatisa basa Fala la Mulungu kuti athandize abveseri wace kuwona kuti Yahova nthawe zentse ambabaira wale omwe ambakhala wakukhulupirika kwa iye ninga momwe adacitira na Djobi. Tiyago adapfunzisa nfundo imweyi mwakuphatisa basa mafala yakusaya kunesa kubvesesa. Mwa njira imweyi, iye adapasa ulemerero Yahova m’mbuto mwakubzipasa ulemerero yekha. Bzomwe tikupfunza: Mbapfunzisani mu njira yakusaya kunesa kubvesesa ndipo mbaphatisani basa Fala la Mulungu. Tikambapfunzisa wanthu, tin’funika lini kumbawalatiza kuti timbadziwa bzinthu kwene-kwene, koma timbawalatize nzeru ya Yahova na momwe iye ambawathandizira. (Aro. 11:33) Ifepano tingacite bzimwebzi mwa kumbaphatisa basa Bzinembo nthawe zentse pomwe tikupfunzisa. Mwa ciratizo, m’mbuto mwa kumbauza anyakupfunza wathu wa Bibliya bzomwe tingadacita pa nkhani inango tingadakhala iwo, mwakuphatisa basa bziratizo bza m’Bibliya, ifepano tin’funika kuwathandiza kubvesesa momwe Yahova ambabvera na kuwonera nkhaniyo. Mwa njira imweyi, iwo an’dzafuna kukondwesa Yahova sikuti kukondwesa ifepano. w22.01 11 ¶9-10

Mulungu ambawona momwe timbacitira bzinthu na anzathu; iye ambafuna kuti timbacite bzizinji sikuti kundoleka kuwacitira bzakuipa. Ndipo kumbafuna mwanzathu ninga momwe timbabzifunira n’kwakufunika kwene-kwene kuna Mkristau omwe akufuna kuti Mulungu akomedwe naye. Onani momwe Jezu adatsindikira kufunika kwa lamulo lakugumanika pa Mwambo 19:18. Pa nthawe inango Mfarizeu adabvunza Jezu kuti: “Kodi ndiponi lamulo likulu pa Malamulo yentse?” Jezu adamutawira kuti “lamulo likulu na lakuyamba” ni kufuna Yahova na mtima wathu wentse, moyo wathu wentse na nzeru zathu zentse. Patsogolo pace, Jezu adalewa mafala ya pa Mwambo 19:18, yakuti: “Laciwiri lakundendemerana na limweri, ndakuti: ‘Umbafune mwanzako ninga momwe umbabzifunira wekha.’” (Mat. 22:35-40) Pana njira zizinji zakulatizira lufoyi kuna anzathu. Njira ibodzi yakulatizira lufoyi kuna anzathu ndiyo kuphatisa basa mafala ya pa Mwambo 19:18, pomwe pambalewa kuti: “Leka kumbabwezera cakuipa ayai kumbakoyera cakumtima wana wa mtundu wako.” w21.12 10-11 ¶11-13

Jezu adafuthula boko lace acimupulumusa mpostolo Pedru. Pomwe Pedru akhanyang’anisa Jezu iye adakwanisa kufamba padzaulu pa mabimbi ya madzi. Tsono pomwe Pedru adanyang’anisa conzi, iye adacita thupo thangwe ra mantha ndipo adayamba kumira. (Mat. 14:24-31) Ifepano tingapfunze kucokera pa bzomwe bzidacitikira Pedru. Pomwe Pedru adacoka m’mwadiya acipita m’madzi, iye akhadikhirira lini kuti angadagumana mphitca yomwe ingadamucitisa kuyamba kumira. Iye akhafuna kufamba padzaulu pa madzi mpaka kugumana na Mbuya wace. Tsono iye adatazira kucita bzomwe akhafuna. Ntsiku zino ifepano tingafambe lini padzaulu pa madzi, tsono timbagumana na mabvuto yomwe yambayeza cikhulupiro cathu. Ifepano tikasiya kunyang’anisa Yahova na kumbakumbukira bzomwe adalewa kuti an’dzaticitira kutsogolo, tingayambe kumira mwauzimu. Bziribe basa bzomwe bzingaticitikire pa moyo wathu, tin’funika kupitiriza kuikha makumbukidwe yathu pa Yahova na mphanvu yomwe anayo yakutithandiza. w21.12 17-18 ¶6-7

Kupemba, kupfunza na kukumbukira bzomwe tapfunza kumbacita mbali ya kunamata kwathu. Tikambapemba timbakhala tikulewalewa na Baba wathu wakudzulu, omwe ambatifuna kwene-kwene. Tikambapfunza Bibliya, timbakhala tikupfunza “na Mulungu,” omwe Ngwanzeru kwene-kwene. (Mim. 2:1-5) Tikambakumbukira bzomwe tapfunza, timbakhala tikukumbukira makhalidwe yace yabwino na bzinthu bzabwino bzomwe an’funa kudzaticitira na kucitira wanthu wentse. Imweyi ndiyo njira yabwino yakuphatisira bwino basa nthawe yathu. Tsono n’ciyani cingatithandize kucita bzimwebzi? Penu mpsakukwanisika, sankhulani mbuto yakuderekha. Kumbukirani ciratizo ca Jezu. Pomwe akhanati kuyamba utumiki bwace bwa pa dziko la pantsi, iye adamala ntsiku 40 ali mu dambo. (Luka 4:1, 2) Pa mbuto yakuderekhayo, Jezu adapemba kwa Yahova na kukumbukira bzomwe Baba wace akhafuna kuti iye acite. Bzimwebzi bzidathandiza Jezu kutsimikizira kuti iye akhali wakukonzeka kugumana na mayezo ya kutsogolo. w22.01 27-28 ¶7-8

Mkulu wa gwere ayai m’bale munango wakukhwima mwauzimu angatiuze cinthu cinango comwe tin’funika kucinja. Munthu omwe ambatifuna akatilatiza malango kucokera m’Bibliya tin’funika kuphatisa basa malangoyo. Kulewa cadidi, bzingatinese kubvuma malango yakucita kupasidwa, ndipo tingakomedwe lini na malangoyo. Thangwe ranyi? Thangwe napo timbadziwa kuti ndife wakuperewera, bzingatinese kubvuma malango, munthu akatiuza kuti taphonya cakuti. (Mpal. 7:9) Tingayambe kubziwonesa ninga kuti tina lazau ndipo tingayambe kukumbukira kuipa munthu omwe watipasa malangoyo ayai kukalipa na momwe malangoyo yaperekedwera. Ndipo tingafike pakulewa kuipa omwe watipasa malangoyo ticiti: ‘Kodi ni mbani iye kuti andipase malango? Kodi iye ambaphonyambo lini?’ Ndipo cinthu cinango n’cakuti malangoyo yakasaya kutidekera, tingayaphatise lini basa, ayai tinganyang’ane munthu munango omwe an’tiuza bzinthu bzomwe bzin’tidekera. w22.02 8-9 ¶2-4

Kodi pana bzinthu bzinango bzomwe bzingadzatitazise kukhulupira Yahova mu dziko lipsa? Mwa ciratizo, kumbukirani bzomwe Ajirayeri adacita pomwe adandoti cokeni ku Edjipito komwe akhali akapolo. Winango wa iwo adayamba kudandaula kuti asuwa cakudya comwe akhambadya ku Edjipito acimbanyozera cakudya comwe Yahova adawapasa cakucemeredwa mana. (Mirew. 11:4-6; 21:5) Kodi tin’dzakumbukambo tenepoyo citsautso cikulu cikadzamala? Tikudziwa lini kukula kwa basa lomwe tin’dzakhala nalo kuti ticenese dziko lentseneli kuti likhale paraizo. Pinango tin’dzakhala na basa likulu kuti ticite ndipo pinango pan’dzawoneka bzinthu bzomwe tingadzakomedwe lini nabzo. Kodi tin’dzadandaula na bzinthu bzomwe Yahova an’dzatipasa pa nthawe imweyo? Tikudziwa lini. Tsono comwe tikudziwa n’cakuti: Tikambatenda bzentse bzomwe Yahova ambaticitira tsapano, tin’dzatendambo bzomwe iye an’dzaticitira kutsogolo. w22.02 7 ¶18-19

Mu polofesiya ya pa Zakariya 8:23, mafala yakuti “Mdjuda” na “tiniyenda namwe” yambalewa bza thimu libodzi, lomwe ni anyakudzozedwa wakusala. (Aro. 2:28, 29) “Amuna khumi wa bzirewedwe bzentse bza wanthu wa mitundu” ambaimira mabira manango. Iwo “an’dzaphatirira mkanjo,” ayai kuti an’dzapitiriza kukhala wakuphatana mwakukhulupirika na anyakudzozedwa pa kunamata kwacadidi. Mpsibodzi-bodzimbo na polofesiya ya pa Zakiyeri 37:15-19, 24, 25. Yahova akuteweza polofesiya imweyi mwa kucitisa anyakudzozedwa na mabira manango kuphata basa pabodzi mwakuphatana. Polofesiyayi imbalewa bza mpsimbo ziwiri. Omwe ana cidikhiro cakuyenda kudzulu ali ninga mpsimbo “ya Djuda” (Djuda likhali dzinza lomwe kukhacokera amambo wa Jirayeri), ndipo wale omwe ana cidikhiro cakudzakhala pa dziko la pantsi ali ninga mpsimbo “ya Efraimu.” Yahova angadadzaphatanidza mathimu mawiriyo yacikhala “mpsimbo ibodzi.” Bzimwebzi bzin’funa kulewa kuti iwo angadadzatumikira Mambo wawo m’bodzi, Jezu Kristu, mwakuphatana. — Ju. 10:16. w22.01 22 ¶9-10

Jezu adalewa kuti akhalipo wanthu omwe akhathandiza wanthu wakusauka. Tsono akamala, akhacita ciri-centse kuti anzawo adziwe bzomwe iwo acitabzo kuti awatumbize. Bzikuwonekeratu padeca kuti mphaso zimwezi, zikhali zakusaya basa kwa Yahova. (Mat. 6:2-4) Kuti ifepano tilatize kuti ndife wanthu wabwino, tin’funika kucita bzinthu bzabwino na mathangwe yabwino. Ndipopa mungabzibvunze kuti: ‘Kodi inepano nimbadziwa comwe n’cabwino, koma nimbapitiriza kucita comwe n’cakuphonyeka? Kodi nimbacita bzinthu bzabwino na thangwe liponi?’ Yahova ni Mulungu lini omwe ambandolewa koma ambacita bzomwe ambalewabzo. Ndipo iye ambaphatisa basa mzimu wace kuti atithandize. (Ciy. 1:2) Ndipopa khalidwe liri-lentse lomwe limbacita mbali ya bzisapo bza mzimu lingaticitise kucita bzinthu bzabwino. Kumbukirani mafala yomwe Tiyago adanemba. Iye adati: “[Cikhulupiro] cikasaya mabasa n’cakufa.” (Tiy. 2:26) Mpsibodzi-bodzimbo na makhalidwe yentse yomwe yambacita mbali ya bzisapo bza mzimu wa Mulungu. Tikambalatiza makhalidweya, timbalatiza kuti mzimu wa Mulunguyo ukuphata basa mwa ifepano. w22.03 11-12 ¶14-16

Napo kuti tingacite bzinthu bzizinji bzauzimu na kucita mabasa mazinji yabwino, mpostolo Pedru adafotokoza cinthu cibodzi cakufunika kwene-kwene. Pakufotokoza kufunika kwa kukhala wakucena m’bzicito bzathu bzentse, Pedru adatilimbikisa kuti: “Konzekeresani makumbukidwe yanu kuti muphate basa.” (1 Ped. 1:13) Kodi basa limweri likuphatanidza ciyani? Pedru adalewa kuti abale wakudzozedwa wa Kristu akhafunika “[kudziwisa] kuli-kwentse bza kudeka mtima kwa Mulungu.” (1 Ped. 2:9) Napo bziri tenepo, Akristau wentse ntsiku zino ana mwayi wakucita basa limweri, lomwe ndakufunika kwene-kwene pa mabasa yentse yabwino. Ni mwayi ukulu kwene-kwene kuna wanthu wakucena kuphata basa lakupalizira na kupfunzisa wanthu nthawe zentse! (Marko 13:10) Tikacita nyongo yakuphatisa basa nfundo zakugumanika pa Mwambo kapitulo 19, timbalatiza kuti timbafuna Mulungu wathu na anzathu. Ndipo timbalatizambo kuti tikufuna “kukhala wakucena” m’bzicito bzathu bzentse. w21.12 13 ¶18

Nthawe zentse mpostolo Paulo akhambakumbukira bzinthu bzabwino bzomwe abale na mpfumakazi akhambacita. Iye akhadziwa kuti iwo akhaphonya ndipo nthawe zinango bzomwe iwo akhaphonyabzo bzikhamuwawa. Napo bzikhali tenepo iye akhadziwa kuti munthu akaphonya bzin’funa lini kulewa kuti munthuyo ngwakuipa. Iye akhafuna abale na mpfumakazi ndipo akhambawona makhalidwe yawo yabwino. Akawona kuti iwo akutazira kucita cinthu cabwino, iye akhadziwa kuti iwo akufuna kucita cinthu cabwinoco koma akundofunika kuthandizidwa basi. Kumbukirani bzomwe Paulo adacita na mpfumakazi ziwiri za ku gwere la ku Filipi. (Afil. 4:1-3) Bzikuwoneka kuti Evodiya na Sintike akhadanesana ndipo bzimwebzi bzidadzonga uxamwali bwawo. Paulo alibe kubva nawo ciya ayai kuwalewa kuipa; iye adakumbukira makhalidwe yawo yabwino. Mpfumakazizi zikhali zakukhulupirika ndipo zikhana mbiri yabwino. Paulo akhadziwa kuti Yahova akhakomedwa na mpfumakazizi. Kudziwa bzimwebzi kudacitisa Paulo kulimbikisa mpfumakazizi kuti zikhazikane pantsi kuti zibverane. Ndipo cinthu cinango n’cakuti iye adapitiriza kukhala wakukondwa na kukhalambo pa uxamwali bwakulimba na abale na mpfumakazi wa m’gwere limweri. w22.03 30 ¶16-18

Mtendere omwe Yahova ambatipasa umbadjedjeresa mitima yathu ndipo umbatithandiza kukumbuka bwino. Bzimwebzi mpsacadidi. Onani bzomwe mpfumakazi inango yakucemeredwa Luz idalewa. Iyo idati: “Nthawe zizinji ndikhabzibva wakupswoma ndipo bzimwebzi bzikhambandicitisa kukumbuka kuti Yahova ambandifuna lini. Tsono bzimwebzi bzikambacitika, nthawe imweyoletu ndikhambamuuza Yahova momwe ndikubvera. Mpembo ukhandithandiza kubva bwino.” Ninga momwe mpfumakaziyi yalewera, mpembo ungatipase mtendere. Timbadziwa kuti Yahova na Mwana wace ambabvesesa momwe timbabvera, ambatibvesesa tikakhala tidawofoka ndipo akufuna kutithandiza kupirira. Mbatipitirizeni kuphatisa basa bzomwe tapfunza mpaka pa ntsiku yomwe Yahova “an’dzapukuta misozi yentse m’maso [mwathu]”! — Apok. 21:4. w22.01 15 ¶7; 19 ¶19-20

Jezu adalewa bza misuwo miwiri yomwe imbatiyendesa ku miseu miwiri yakusiyana, mseu “wakhwankhwa” na mseu “wakupsindiza.” (Mat. 7:14) Palibe mseu wacitatu. Ifepano tin’funika kusankhula kuti tin’dzafamba mu mseu uponi. Cimweci ni cakusankhula cakufunika kwene-kwene comwe ifepano tingacite, thangwe moyo wathu ukuthemba bzimwebzo. Mseu “wakhwankhwa” una wanthu azinji thangwe udapusa kufamba. Bzakupasa ntsisi mpsakuti wanthu azinji akupitiriza kufamba mu mseu umweyu thangwe ra kutewera mthithi wa wanthu omwe akufambambo mu mseuyu. Iwo akuzindikira lini kuti Sathani Dyabu ndiye akucitisa kuti wanthu afambe mu mseu umweyu nakuti mseuyo ukuwayendesa ku infa. (1 Ako. 6:9, 10; 1 Ju. 5:19) Mwakusiyana na mseu “wakhwankhwa,” pana mseu winango “wakupsindiza,” ndipo Jezu adalewa kuti ni wanthu ang’ono-ng’ono omwe angakwanise kuugumana. Thangwe ranyi? Onani kuti pa vesi lakutewera, Jezu akucenjeza ateweri wace bza apolofeta wakunama. — Mat. 7:15. w21.12 22-23 ¶3-5