Jezu ni Mkulu Wathu wa Antsembe Omwe Ambatibvesesa

1-2. (a) Thangwe ranyi Yahova adatumiza Mwana wace pantsi pano? (b) Kodi tiniwona ciyani mu nkhani ino? (Ahebereu 5:7-9)

MAGOLE 2000 m’mbuyomu, Yahova adatumiza Mwana wace wakufunidwa pa dziko la pantsi. Thangwe ranyi? Thangwe libodzi likhali lakufuna kutsudzula wanthu ku pikado na infa na kucitisa kuti bzikhale bzakukwanisika kucosa mabvuto yentse yomwe yadayambisidwa na Sathani. (Juwau 3:16; 1 Juwau 3:8) Yahova akhadziwa kuti bzomwe Jezu angadagumana nabzo pantsi pano, bzingadamukonzekeresa kuti adzakhale Mkulu wa Antsembe wantsisi kwa ifepano. Jezu adayamba kutumikira ninga Mkulu wa Antsembe pomwe adabatizidwa mu gole la 29 EC.a

² Mu nkhani ino, tiniwona momwe bzomwe Jezu adagumana nabzo pa dziko la pantsi bzidamuthandizira kukhala wakukonzeka kudzatumikira ninga Mkulu wa Antsembe omwe ambatibvesesa. Mpsakufunika kwene-kwene ifepano kubvesesa bzimwebzi thangwe kubzidziwa kun’dzacitisa kuti bzikhale bzakupusa kwa ifepano kupemba na kukhala wakufendererana na Yahova maka-maka tikakhala tidasunama thangwe ra bzakuphonya bzathu. — Werengani Ahebereu 5:7-9.

MWANA WAKUFUNIDWA WA MULUNGU ADABWERA PA DZIKO LA PANTSI

3-4. Kodi Jezu akhafunikira kucinja bzinthu bziponi pomwe adabwera pa dziko la pantsi?

³ Tentsenefe bzinthu bzidacinja kale pa moyo wathu, pinango tidafunikira kucoka ku mbuto komwe tikhakufuna ndipo tidafunikirambo kusiyana na adzinza wathu pabodzi na axamwali wathu. Bzimwebzi bzingakhale lini bzakupusa. Tsono palibe m’bodzi wa ifepano omwe adafunikira kale kucinja bzinthu bzizinji pa moyo wace ninga momwe Jezu adacitira. Iye akhali anjo wakuyamba na wakufunika kwene-kwene kudzulu. Iye akhafunidwa kwene-kwene na Yahova ndipo nthawe zentse akhali wakukondwa thangwe akhaphata basa pabodzi na Pai wace. (Salimo 16:11; Mimwani 8:30) Tsono pa Afilipi 2:7 pambalewa kuti “iye adasiya bzentse bzomwe akhanabzo” kudzulu kuti abwere kudzakhala na wanthu wakuperewera pa dziko la pantsi.

⁴ Kumbukirani bzomwe bzidacitika kumayambiriro kwa moyo wa Jezu pa dziko la pantsi. Iye adabadwira m’banja la wanthu wakusauka. Timbadziwa bzimwebzi thangwe rakuti pomwe Jezu adabadwa, abereki wace adandopereka tumbalame tuwiri ku templo. (Levitiko 12:8; Luka 2:24) Pomwe mambo wakuipa Herode adadziwa bza kubadwa kwa Jezu, iye akhafuna kumupha. Kuti apulumuse moyo wa Jezu, abereki wace adathawira ku Edjipito kwa kanthawe kakucepa. (Mateu 2:13, 15) Moyo omwe Jezu akhanawo pantsi pano ukhali wakusiyana kwene-kwene na moyo omwe akhanawo kudzulu!

5. Kodi n’ciyani comwe Jezu adawona pomwe akhali pantsi pano, ndipo bzimwebzi bzidamukonzekeresa tani kukhala Mkulu wa Antsembe omwe ambatibvesesa? (Onanimbo cithunzi-thunzi.)

⁵ Pomwe Jezu akhali pa dziko la pantsi, iye adawona mabvuto yomwe wanthu akhagumana nayo. Kulewa cadidi, Jezu adabvambo kuwawa thangwe ra kuluza wanthu omwe akhawafuna kuphatanidzambo pai wace Zuze. Pomwe akhacita utumiki bwace, Jezu adawonambo anyamapere, azimola, anyakupunduka minyendo na abereki omwe akhabonera thangwe ra kufedwa wana wawo. Ndipo Jezu akhawabvera tsisi wanthu amwewa. (Mateu 9:2, 6; 15:30; 20:34; Marko 1:40, 41; Luka 7:13) N’cadidi kuti Jezu adawona wanthu akubonera pomwe akhali kudzulu. Tsono pomwe iye akhali pa dziko la pantsi, akhakwanisa kubvesesa bwino-bwino momwe wanthu akhabvera akakhala akubonera. (Zaiya 53:4) Bzinthu bzomwe Jezu adagumana nabzo pantsi pano bzidamuthandiza kubvesesa momwe wanthu akhabvera pa nkhani zakusiyana-siyana na kuwawa komwe akhabva thangwe ra mabvuto yakusiya-siyana yomwe akhagumana nayo. Ninga munthu ali-wentse, iye akhanetambo, akhacitambo thupo na kusunama.

JEZU ADALATIZA NTSISI KUNA WANTHU

6. Kodi bziratizo bzomwe Zaiya adabziphatisa basa bzimbatipfunzisa ciyani pakulewa bza ntsisi za Jezu? (Zaiya 42:3)

⁶ Pomwe akhacita utumiki bwace, Jezu adalatiza ntsisi kwa wanthu omwe akhaboneresedwa. Na bzimwebzi, iye adakwanirisa profesiya yomwe Yahova adailewa mwakuphatisa basa mprofeta Zaiya. Bzinembo bza Cihebereu bzimbalewa kuti wale omwe ana cikhulupiro cakulimba nthawe zinango ambandendemezeredwa na zunde lomwe lidathiriziridwa bwino na miti mikulu-mikulu yakulimba. (Salimo 92:12; Zaiya 61:3; Jeremiya 31:12) Tsono kwa wale omwe mbakusaya kukhotcerereka na omwe ambacitiridwa bzinthu mwakusaya cirungamo ambandendemezeredwa na phesi lomwe ndakutcoka na kandiyero yomwe yasala pang’ono kuthima. (Werengani Zaiya 42:3; Mateu 12:20) Yahova adaphatisa basa bziratizo bzimwebzi kuti alatize lufoyi na ntsisi zomwe Jezu angadadzalatiza kwa wanthu omwe akhawoneka ninga wakusaya basa kwa wanthu winango.

7-8. Kodi Jezu adakwanirisa tani profesiya ya pa Zaiya?

⁷ Mateu adalatiza kuti Jezu adakwanirisa profesiya ya Zaiya yakuti: “Iye an’dzamaliza lini kutcola phesi lomwe ndakutcoka kale pang’ono, ndipo an’dzathimisa lini kandiyero yomwe ikadacoka utsi.” Bzakudabwisa bza Jezu bzidathandiza wanthu omwe akhaboneresedwa, omwe pinango akhabzibva ninga phesi lakutcoka na wanthu wakusaya cidikhiro omwe akhali ninga kandiyero yomwe yasala pang’ono kuthima. Pakati pa wanthu amwewa, Jezu adagumana mwamuna munango omwe akhabonera na mapere. Mwamuna umweyu akhalibe cidikhiro ciri-centse cakuti angadadzalimba acikakhala pomwe na wanthu wa m’banja lace pabodzi na axamwali wace. (Luka 5:12, 13) Pa nthawe inango, Jezu adagumanambo na mwamuna munango omwe akhali nkhuthu omwe akhakwanisa lini kulewalewa bwino-bwino. Kumbukirani momwe mwamuna umweyu akhabvera pomwe akhawona wanthu winango ali wakukondwa, acimbaceza pomwe iye akhakwanisambo lini kucita bzimwebzo. (Marko 7:32, 33) Tsono pana bzinthu pomwe bzinango bzomwe bzikhacitika.

⁸ Mu ntsiku za Jezu, Adjuda azinji akhakhulupira kuti wanthu omwe akhaduwala ayai omwe akhadapunduka akhalangidwa thangwe ra pikado zawo ayai thangwe ra pikado za abereki wawo. (Juwau 9:2) Thangwe ra makumbukidwe yakuphonyeka yamweya, wanthu amwewa akhanyozedwa na wanthu winango ndipo akhabzibva kuti akhalibe na basalo. Pakukwanirisa profesiya ya Zaiya, Jezu adapoza wanthu amwewa ndipo adawalatiza kuti Mulungu akhacita nawo thupo. Kodi bzimwebzi bzikutitsimikizira ciyani?

9. Mwakubverana na Ahebereu 4:15, 16, timbadziwa tani kuti Mkulu wathu wa Antsembe ambabvesesa wanthu wakuperewera?

⁹ Werengani Ahebereu 4:15, 16. Tingakhale na citsimikizo cakuti nthawe zentse Jezu an’dzatibvesesa. Kodi bzimwebzi bzin’funa kulewa ciyani? Fala la Cigerego lomwe lidasanduliziridwa kuti “kubvesesa” limbathandauza kubvesesa msunamo na kuwawidwa komwe winango akubva. Ndipo bzikuwoneka kuti Paulo adaphatisambo basa fala la Cigerego libodzi-bodziri pa Ahebereu 10:34 kuti alatize kuti timbabvera ntsisi wale omwe ali m’kawoko. Tikambawerenga m’Bibliya pakulewa bza bzakudabwisa bza Jezu, tingakwanise kuwona kuti iye akhana ntsisi kwene-kwene na wanthu. Iye akhacita lini bzimwebzo thangwe ra kukumbuka kuti ndibzo bzomwe akhafunikira kucita. Koma akhacita bzimwebzo thangwe rakuti akhacitadi thupo na wanthuwo na kufuna kuwathandiza. Mwa ciratizo, pomwe iye adapoza mwamuna omwe akhana mapere, iye angadacita bzimwebzo na patali, tsono adawona kuti bzikhali bwino kucita kumukhuya mwamunayo. Ndipo bzikuwoneka kuti kadakhala kakuyamba mwamuna ule kukhuidwa pambuyo pakupita magole mazinji! Kumbukiranimbo pomwe Jezu adapoza mwamuna omwe akhali nkhuthu. Iye mwakudeka mtima adatenga mwamunayo aciyenda naye pa mbuto yomwe pakhalibe baludya na pomwe pakhalibe wanthu. Kuthumizira bzimwebzi, pomwe Mfarizeu munango alibe kucita bzinthu mwakudeka mtima na mkazi munango, omwe akhadakungula na kutsuka nzayo za Jezu na misozi yace acipukuta na tsisi lace, Jezu adamukhotcerera. (Mateu 8:3; Marko 7:33; Luka 7:44) Jezu akhatcenkha lini wale omwe akhaduwala ayai wale omwe akhadacita pikado ikulu. M’mbuto mwace, iye akhafuna kuti wanthu amwewa abwere kuna iye ndipo akhawalatiza lufoyi lomwe akhanalo kwa iwo. Tingakhale na citsimikizo centse cakuti Jezu ambatibvesesambo mu njira ibodzi-bodziyi.

MOMWE TINGATEWEZERERE MKULU WATHU WA ANTSEMBE NTSIKU ZINO

10. Kodi tingaphatise basa ciyani ntsiku zino kuti tithandize ankhuthu na azimola? (Onanimbo bzithunzi-thunzi.)

¹⁰ Ninga ateweri wa Jezu, ifepano timbacita nyongo ya kumutewezera mwakulatiza lufoyi na ntsisi kwa wanthu winango. (1 Pedru 2:21; 3:8) N’cadidi kuti tingakwanise lini kupoza ankhuthu na azimola, tsono tingawathandize kupfunza bza Yahova na kukhala pa uxamwali na iye. Mwa ciratizo, mabukhu yathu yomwe yambalewa bza Bibliya, tsapano yakugumanika m’bzirewedwe bza manja bzakupitirira 100. Kuna wale omwe ambawona lini bwino-bwino ayai azimola, pana mabukhu ya cibraille m’bzirewedwe bzakupitirira 60 ndipo panambo maaudiyo ya m’mavidiyo yathu m’bzirewedwe bzakupitirira 100. Bzentsenebzi bzidakonzedwa na cakulinga cakuthandiza ankhuthu na azimola kukhala pa uxamwali na Yahova pabodzi na Mwana wace Jezu.

11. Kodi gulu la Yahova limbalatiza tani ntsisi ninga momwe Jezu adalatizira kwa wanthu? (Mabasa 2:5-7, 33) (Onanimbo bzithunzi-thunzi.)

¹¹ Gulu la Yahova likucita nyongo yakuthandiza wanthu wa mtundu uli-wentse. Kumbukirani kuti pambuyo pa Jezu kulamusidwa, iye adathululira mzimu wakucena wanthu wentse omwe akhalipo pa phwando la Pentekoste kuti akwanise kubva mafala yabwino ‘n’cirewedwe cawo.’ (Werengani Mabasa 2:5-7, 33.) Mwakutsogoleredwa na Jezu, gulu lathu limbakonza mabukhu yakulewa bza Bibliya m’bzirewedwe bzakupitirira 1000 na bzinango bzomwe bzimbalalewedwa na wanthu ang’ono-ng’ono. Mwa ciratizo, bzirewedwe bzinango bzimbalalewedwa na wanthu ang’ono-ng’ono ku América do Norte na ku América do Sul. Napo bziri tenepo, gulu lathu lidakonza mabukhu m’bzirewedwe bzimwebzi yakupitirira 160 kuti wanthu omwe ambalewalewa bzirewedwe bzimwebzi akwanise kubva mafala yabwino. Mabukhu yathu ambagumanikambo m’bzirewedwe bza Ciromany bzakupitirira 20. Ndipo wanthu azinji omwe ambalewalewa bzirewedwe bzimwebzi adayamba kutumikira Yahova.

12. Kodi n’ciyani cinango comwe gulu la Yahova limbacita kuti lithandize wanthu ntsiku zino?

¹² Kuthumizira pa kuthandiza wanthu kubva mafala yabwino, gulu la Yahova limbathandizambo wale omwe agwedwa na malengwa ya pantsi. Kuti bzimwebzi bzikwanisike, abale na mpfumakazi azinji ambabzipereka kuti athandize abale omwe agwedwa na malengwa ya pantsiyo. Gulu lathu limbakonzambo mbuto zakucitira mitsonkhano kuti wanthu apfunze bzizinji bza lufoyi la Mulungu acimutumikira.

MKULU WATHU WA ANTSEMBE ANGAKUTHANDIZENI

13. Kodi Jezu ambatithandiza mu njira zinango ziponi?

¹³ Pakuti Jezu ni makabusa wathu wabwino, iye nthawe zentse ambawonesesa kuti tinabzo bzomwe timbafunikira kuti tikhale pa uxamwali bwakulimba na Yahova. (Juwau 10:14; Aefezo 4:7) Nthawe zinango, bzinthu bzomwe bzimbacitika pa moyo wathu bzingaticitise kubzibva ninga kandiyero yomwe yasala pang’ono kuthima ayai ninga phesi lakutcoka. Pinango tingasuname thangwe ra matenda makulu yomwe tikuduwala, pikado yomwe tidacita ayai kusaya kubvesesana na m’bale ayai mpfumakazi. Bzimwebzi bzingatitazise kumbakumbukira bza cidikhiro cathu ticimbandokumbukira bza mabvuto yomwe tikugumana nayo tsapano. Tsono kumbukirani kuti Jezu ambawona bzomwe mukugumana nabzo ndipo ambabvesesa momwe mukubvera. Thangwe ra ntsisi zomwe iye anazo kwa imwepo, iye akufunisisa kukuthandizani. Mwa ciratizo, iye angaphatise basa mzimu wakucena kuti akupaseni mphanvu pa nthawe yomwe mudasunama. (Juwau 16:7; Tito 3:6) Kuthumizira bzimwebzi, Jezu angaphatise basa “amuna ninga mphaso” ayai akulu wa gwere pabodzi na abale na mpfumakazi kuti akulimbikiseni na kukuthandizani. — Aefezo 4:8.

14. N’ciyani comwe tingacite tikakhala tidasunama?

¹⁴ Penu imwepo mudasunama, kumbukirani kuti Jezu ni Mkulu wathu wa Antsembe ndipo kumbukiranimbo momwe bzimwebzi bzimbathandauza kwa imwepo. Kumbukirani kuti Yahova alibe kundotumiza Jezu pa dziko la pantsi kuti adzapereke moyo wace ninga cakulombolera, koma kuti amuthandizembo kubvesesa mabvuto yomwe wanthu wakuperewera ambagumana nayo. Tikakhala kuti tidasunama thangwe ra bzakuphonya bzathu, Jezu nthawe zentse ngwakukonzeka kutithandiza “pa nthawe yomwe tikufunikira thandizo.” — Ahebereu 4:15, 16.

15. N’ciyani comwe cidathandiza m’bale munango kubwerera m’gwere?

¹⁵ Jezu ambatsogolera wanthu wace kuti athandize wale omwe adasiya Yahova kubwerera pomwe kwa iye. (Mateu 18:12, 13) Onani bzomwe bzidacitikira Stefano.b Pambuyo pa kucosedwa m’gwere kwa magole 12, iye adayamba pomwe kutsonkhana. Iye adati: “Bziribe kukhala bzakupusa kwa inepano, tsono ndikhafunisisa kucita pomwe mbali ya banja la lufoyi la Yahova. Akulu omwe adaceza nande adandicitisa kuti ndikhale wakutsudzuka. Nthawe zinango, inepano ndikhasunama thangwe ra kukumbukira kuti ndikhadasiya Yahova ndipo ndikhafuna kubwerera m’mbuyo. Tsono abalewo adandikumbusa kuti Yahova na Jezu akhafuna kuti inepano ndipirire. Pomwe inepano ndidabwerera, gwere lentse lidatambira inepano pabodzi na banja langu na manja mawiri. Patsogolo pace, mkazi wangu adayamba kupfunza Bibliya ndipo tentse pabodzi tikutumikira ninga banja.” Mkulu wathu wa Antsembe walufoyi ambakomedwa kwene-kwene akawona wanthu omwe akhadasiya kutumikira Yahova akuthandizidwa kubwerera pomwe m’gwere!

16. Thangwe ranyi imwepo mumbatenda thangwe ra kukhala na Mkulu wa Antsembe omwe ambatibvesesa?

¹⁶ Pomwe Jezu akhali pa dziko la pantsi, iye adathandiza wanthu azinji omwe akhafunikira thandizolo. Ntsiku zino, tingakhale na citsimikizo centse cakuti iye nthawe zentse an’dzatithandiza pa nthawe yomwe tikufunikira thandizo. Tsapanopali mu dziko lipsa, iye an’dzathandiza wanthu wakuperewera kutsudzulidwa ku pikado. Timbatenda kwene-kwene Yahova thangwe rakuti iye ambatifuna kwene-kwene mwakuti adatipasa Mwana wace ninga Mkulu wa Antsembe!