Ɛlɔlɛ Mɔɔ Ɛlɛ La Ati Kɔ Zo Ka Edwɛkɛ Ne!

1. Duzu a bɛhanle nwolɛ edwɛkɛ wɔ 2023 ɛvolɛ ayia ne abo a?

WƆ YƐ 2023 ɛvolɛ ayia ne abo,a yɛnyianle yɛ diedi ne bie mɔ anwo ndelebɛbo fofolɛ mɔɔ yɛ anyelielɛ yɛɛ yɛdele yɛ edwɛkɛhanlɛ gyima ne anwo nolobɔlɛ bie mɔ mɔɔ ka ahonle la. Kɛ neazo la, yɛnwunle kɛ bie a menli bie mɔ banyia nwolɛ adenle araboka Gyihova menli ne anwo wɔ mekɛ mɔɔ bɛzɛkye Babelɔn Kpole ne bɛwie bɔbɔ la. Eza yɛnwunle kɛ, ɔvi November 2023, ɔnrɛhyia kɛ nolobɔlɛma babu debie biala mɔɔ bɛyɛ wɔ edwɛkɛhanlɛ gyima ne anu la anwo mgbonda. Asoo nzenzaleɛ ɛhye mɔ kile kɛ yɛ ɛzonlenlɛ gyima ne anwo ɛngyia kpalɛ anzɛɛ ɛngyia ndɛndɛ kɛ dɛba ne la ɔ? Kyɛkyɛ!

2. Duzu ati a yɛ edwɛkɛhanlɛ gyima ne hyia ndɛndɛ alehyenlɛ biala ɛ? (Maake 13:10)

² Alehyenlɛ biala, yɛ edwɛkɛhanlɛ gyima ne anwo kyia ndɛndɛ kpalɛ. Duzu ati ɔ? Ɔluakɛ mekɛ ne ɛlɛwie. Suzu mɔɔ Gyisɛse hanle ye wɔ edwɛkɛhanlɛ gyima ne mɔɔ yɛbayɛ ye wɔ mekɛ mɔɔ li awieleɛ anu la anwo la anwo. (Kenga Maake 13:10.) Mateyu noko hanle kɛ Gyisɛse hanle kɛ bɛbabɔ edwɛkpa ne nolo wɔ azɛlɛ ye amuala azo kolaa na “awieleɛ ne” ara. (Mat. 24:14) Edwɛkɛ zɔhane fale Seetan ɛtane ewiade ne mɔɔ ɔbara awieleɛ bɔkɔɔ la anwo. Gyihova ɛye ninyɛne ɛhye mɔ mɔɔ ɔnrɛhyɛ bɛbasisi la anwo ‘kenle nee dɔnehwele ne’ ɛzie ɛkɛ. (Mat. 24:36; 25:13; Gyi. 1:7) Aleɛ kye biala a, ɛnee mekɛ zɔhane ɛlɛbikye kpalɛ. (Wlo. 13:11) Noko kolaa na awieleɛ ne ara la, ɔwɔ kɛ yɛkɔ zo yɛka edwɛkɛ ne.

3. Duzu a maa yɛka edwɛkɛ ne a?

³ Mekɛ mɔɔ yɛlɛsuzu yɛ edwɛkɛhanlɛ gyima ne anwo la, ɔle kpalɛ kɛ yɛbadwenle kpuya ɛhye mɔɔ anwo hyia la anwo: Duzu ati a yɛbɔ edwɛkpa ne nolo a? Ye sikalɛ nu a le kɛ, ɛlɔlɛ a maa yɛbɔ edwɛkpa ne nolo a. Mɔɔ yɛyɛ wɔ edwɛkɛhanlɛ gyima ne anu la da ɛlɔlɛ mɔɔ yɛlɛ la ali—ɛlɔlɛ mɔɔ yɛlɛ yɛmaa nɔhalɛ ne, ɛlɔlɛ mɔɔ yɛlɛ yɛmaa menli yɛɛ mɔɔ tɛla biala la, ɛlɔlɛ mɔɔ yɛlɛ yɛmaa Gyihova nee ye duma ne la. Maa yɛzuzu ninyɛne ɛhye mɔ anwo ngoko ngoko.

YƐKA EDWƐKƐ NE ƆLUAKƐ YƐKULO NƆHALƐ NE

4. Yɛte edwɛkɛ kpalɛ bie a, kɛzi yɛyɛ yɛ nyɛleɛ ɛ?

⁴ Ɛkakye kɛzi ɛdele nganeɛ wɔ mekɛ bie mɔɔ ɛdele edwɛkɛ kpalɛ bie la ɔ? Bie a wɔ busuanli bie wole anzɛɛ awie maanle wɔ gyima bie mɔɔ ɛnee ɛhyia nwolɛ kpalɛ la. Ɔbayɛ kɛ ɛnee ɛ nwo ɛlɛpele wɔ kɛ ɛbaha nwolɛ edwɛkɛ wɔahile wɔ mbusuafoɔ nee ɛ gɔnwo mɔ. Mɔɔ ɛdele edwɛkɛ kpalɛ mɔɔ tɛla biala—Nyamenle Belemgbunlililɛ ne anwo edwɛkpa ne la, asoo zɔhane a ɛdele nganeɛ ɔ?

5. Mekɛ mɔɔ ɛlimoale ɛzukoale nɔhalɛ ne mɔɔ wɔ Nyamenle Edwɛkɛ ne anu la, kɛzi ɛdele nganeɛ ɛ? (Eza nea nvoninli ne mɔ.)

⁵ Dwenle kɛzi ɛdele nganeɛ wɔ mekɛ mɔɔ ɛlimoale ɛzukoale nɔhalɛ ne mɔɔ wɔ Nyamenle Edwɛkɛ ne anu la anwo nea. Ɛnwunle kɛ wɔ anwuma Selɛ ne kulo wɔ, ɔkulo kɛ ɛbaboka ye azonvolɛ ne mɔ anwo, yebɔ ɛwɔkɛ kɛ ɔbaye nyanelilɛ nee amaneɛnwunlɛ yeavi ɛkɛ, ɛbahola wɔanyia anyelazo kɛ ɛbanwu wɔ alɔvolɛ mɔɔ bɛwu la wɔ ewiade fofolɛ ne anu, yɛɛ dɔɔnwo mɔɔ boka nwo la. (Maake 10:​29, 30; Dwɔn 5:​28, 29; Wlo. 8:​38, 39; Yek. 21:​3, 4) Nɔhalɛ zɔhane mɔ maanle ɛ nye liele. (Luku 24:32) Ɛnee ɛkulo mɔɔ ɛlɛsukoa la, na wɔangola wɔanva nɔhalɛ zɔhane mɔ mɔɔ sonle bolɛ la wɔanvea ɛ nwo!—Fa toto Gyɛlɛmaya 20:9 anwo.

6. Duzu a ɛsukoa ɛfi Ernest nee Rose anwubielɛ ne anu a?

⁶ Anwubielɛ bie ɛne. Mɔɔ adiema nrenyia bie mɔɔ bɛfɛlɛ ye Ernestb la lile kɛyɛ ɛvolɛ bulu la yɛɛ ye papa wule a. Ernest hanle kɛ: “Membizale me nwo kɛ: ‘Yehɔ anwuma ɔ? Anzɛɛ ɔ bo zo ɛminli bɔkɔɔ ɔ?’ Me nye bolole ngakula gyɛne mɔɔ ɛnee bɛ papa mɔ tɛte aze la.” Ɛnee Ernest ta kɔ azie ne azo, ɔkoto ye papa nla ne anwo na ɔyɛ asɔne kɛ: “Nyamenle mesɛlɛ wɔ, mekulo kɛ menwu ɛleka mɔɔ me papa wɔ la.” Ernest papa wule la, ɔ nzi kɛyɛ ɛvolɛ 17, awie hanle hilele ye kɛ ɔ nee ye bazukoa Baebolo ne, na ɛkɛ ne ala ɔliele ɔdole nu. Mɔɔ ɔzukoale kɛ mowuamra ɛnze ɛhwee, ɔle kɛ asɛɛ bɛlafe botoo, na Baebolo ne ɛbɔ ɛwɔkɛ kɛ bɛbadwazo mowuamra kenle bie la, ɔ nye liele kpole kpalɛ. (Nol. 9:​5, 10; Gyi. 24:15) Akee ɔnyianle kpuya ngakyile mɔɔ ɛgyegye ye mekɛ tendenle la anwo mualɛ! Ernest anye liele Baebolo nu nɔhalɛ ne mɔɔ ɛnee ɔlɛsukoa la anwo kpalɛ. Ɔ ye Rose razukoale bie, na ɔdaye noko ɔ nye liele Belemgbunlililɛ edwɛkɛ ne anwo. Bɛzɔnenle bɛ wɔ 1978. Bɛbɔ mɔdenle bɛka bɛ diedi ne mɔɔ sonle bolɛ la anwo edwɛkɛ bɛkile bɛ mbusuafoɔ, bɛ gɔnwo mɔ yɛɛ awie gyɛne biala mɔɔ ɔbadie la. Ɛhye ati, Ernest nee Rose ɛboa menli mɔɔ bo 70 la bɛmaa bɛzukoa nɔhalɛ ne na bɛzɔne bɛ.

7. Saa Baebolo nu nɔhalɛ ne sosɔ ndinli wɔ yɛ ahonle nu a, duzu a si a? (Luku 6:45)

⁷ Ɔda ali wienyi kɛ, saa Baebolo nu nɔhalɛ ne sosɔ ndinli wɔ yɛ ahonle nu a, yɛnrɛhola yɛnrɛmua yɛ nloa. (Kenga Luku 6:45.) Yɛte nganeɛ kɛ Gyisɛse ɛdoavolɛma mɔɔ limoa mɔɔ hanle kɛ: “Yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ” la. (Gyi. 4:20) Yɛkulo nɔhalɛ ne kpole kpalɛ ɔti yɛkulo kɛ yɛka nwolɛ edwɛkɛ yɛkile menli dodo biala mɔɔ yɛbahola la.

YƐKA EDWƐKƐ NE ƆLUAKƐ YƐKULO MENLI

8. Duzu a maa yɛka edwɛkpa ne yɛkile awie mɔ a? (Nea ɛlɛka, “Kulo Menli—Maa Bɛyɛ Ɛdoavolɛma.”) (Eza nea nvoninli ne.)

⁸ Yɛkulo menli kɛ mɔɔ Gyihova nee ɔ Ra ne noko kulo menli la. (Mrɛ. 8:31; Dwɔn 3:16) Yɛ kunlu yelɛyela yɛ maa bɛdabɛ mɔɔ “bɛnze Nyamenle” nee bɛdabɛ mɔɔ “bɛnlɛ anyelazo” la. (Ɛfɛ. 2:12) Ɛbɛlabɔlɛ nu ngyegyelɛ ɛmaa bɛyɛ kɛ bɛgua kuma nu la, na yɛlɛ nyɛma ne mɔɔ yɛbahola yɛava yɛahwe bɛ yɛavi kuma ne anu la—yemɔ a le Nyamenle Belemgbunlililɛ ne anwo edwɛkpa ne. Ɛlɔlɛ nee ahunluyelɛyelalɛ mɔɔ yɛlɛ yɛmaa menli ɛhye mɔ la maa yɛbɔ mɔdenle biala mɔɔ yɛbahola la yɛka edwɛkpa ne yɛkile bɛ. Edwɛkɛ zɔhane mɔɔ sonle bolɛ la bahola amaa bɛanyia anyelazo, bɛanyia asetɛnla kpalɛ ɛnɛ na bɛ nye ala kɛ bɛ sa baha “nɔhalɛ ngoane ne”—mɔɔ le dahuu ngoane wɔ Nyamenle ewiade fofolɛ ne anu la.—1 Tim. 6:19.

9. Kenle bie nwo kɔkɔ boni a yɛbɔ a, na duzu ati ɔ? (Yizikeɛle 33:​7, 8)

⁹ Ɛlɔlɛ mɔɔ yɛlɛ yɛmaa menli la eza ka yɛ maa yɛbɔ bɛ kɔkɔ wɔ ɛtane ewiade ɛhye awieleɛ ne mɔɔ ɔlɛbikye la anwo. (Kenga Yizikeɛle 33:​7, 8.) Yɛ kunlu yelɛyela yɛ maa awie mɔ nee yɛ mbusuafoɔ mɔɔ bɛnle diedima la. Menli dɔɔnwo ɛlɛbɔ bɛ ɛbɛla mɔɔ bɛnze mɔɔ ɛlɛba arazi la a—“anwongyelelɛ kpole mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ yɛɛ bieko noko ɛnrɛzi ɛlɛ la.” (Mat. 24:21) Yɛkulo kɛ bɛnwu mɔɔ ɔbazi wɔ ndɛnebualɛ mekɛ zɔhane anu la—bɛbaye adalɛ ɛzonlenlɛ bɛavi ɛkɛ na akee bɛazɛkye ɛtane ewiade ɛhye amuala wɔ Amagɛdɔn. (Yek. 16:​14, 16; 17:​16, 17; 19:​11, 19, 20) Yɛ asɔneyɛlɛ a le kɛ menli dɔɔnwo badie kɔkɔbɔlɛ ne na bɛaraboka yɛ nwo wɔ nɔhalɛ ɛzonlenlɛ nu ɛnɛ. Na bɛdabɛ mɔɔ bɛndie kɔkɔbɔlɛ ne kɛkala, mɔɔ yɛ mbusuafoɔ mɔɔ yɛkulo bɛ la boka nwo la noko ɛ?

10. Duzu ati a ɔhyia kɛ yɛkɔ zo yɛbɔ menli kɔkɔ ndɛndɛ a?

¹⁰ Kɛ mɔɔ bɛhilehilele nu wɔ edwɛkɛ mɔɔ li ɛhye anyunlu anu la, bie a ɔle Gyihova ɛhulolɛdeɛ kɛ ɔbalie menli mɔɔ bɛnwu Babelɔn Kpole ne ɛzɛkyelɛ ne a bɛbahakyi bɛ subane la. Saa ɔle zɔ a, ɛnee ɔhyia kɛ yɛkɔ zo yɛbɔ menli kɔkɔ ndɛndɛ. Suzu ɛhye anwo: Bie a edwɛkɛ mɔɔ yɛbaha yɛahile bɛ ɛnɛ la bamaa bɛahakye debie wɔ zɔhane mekɛ ne. (Fa toto Yizikeɛle 33:33 anwo.) Wɔannea a bɛbadwenledwenle kɔkɔbɔlɛ mɔɔ bɛdele bɛvile yɛ ɛkɛ la anwo na ɔbaha bɛ yeamaa bɛaraboka yɛ nwo wɔ nɔhalɛ ɛzonlenlɛ nu kolaa na yeaha amozi. Kɛ mɔɔ pilizama sinzavolɛ ne mɔɔ ɛnee wɔ Felepae la hakyile ye adwenle wɔ mekɛ mɔɔ “azɛlɛkpusulɛ kpole bie” zile la anzi la, bie a menli mɔɔ bɛndie yɛ edwɛkɛ ne ɛnɛ la bahakyi bɛ adwenle wɔ mekɛ mɔɔ bɛbazɛkye Babelɔn Kpole ne arɛlevilɛ nu la.—Gyi. 16:​25-34.

YƐKA EDWƐKƐ NE ƆLUAKƐ YƐKULO GYIHOVA NEE YE DUMA NE

11. Kɛzi yɛfa anyunlunyia, enililɛ nee tumi yɛmaa Gyihova ɛ? (Yekile 4:11) (Eza nea nvoninli ne mɔ.)

¹¹ Debie mɔɔ hyia kpalɛ mɔɔ ɔti yɛbɔ edwɛkpa ne nolo la a le kɛ yɛkulo Gyihova Nyamenle nee ye duma nwuanzanwuanza ne. Yɛbu yɛ ɛzonlenlɛ gyima ne kɛ ɔle adenle mɔɔ yɛdua zo yɛye Nyamenle ne mɔɔ yɛkulo ye la ayɛlɛ a. (Kenga Yekile 4:11.) Yɛdie yɛto nu bɔkɔɔ kɛ Gyihova Nyamenle fɛta kɛ ɔdie anyunlunyia, enililɛ nee tumi ɔfi ye azonvolɛ nɔhavoma ɛkɛ. Saa yɛka ninyɛne mɔɔ di daselɛ kɛ ɔdaye a ‘ɔbɔle ninyɛne kɔsɔɔti’ la anwo edwɛkɛ yɛkile awie mɔ na yɛmaa bɛnwu kɛ ɔdaye a yemaa yɛ ngoane a, ɛnee yɛlɛfa anyunlunyia nee enililɛ yɛamaa ye. Saa yɛfa yɛ mekɛ, yɛ anwosesebɛ nee ninyɛne mɔɔ yɛlɛ la yɛyɛ edwɛkɛhanlɛ gyima ne kɛ mɔɔ yɛ tɛnlabelɛ ne bamaa yɛ adenle la a, ɛnee yɛlɛfa tumi ne—yɛ tumi ne—yɛamaa ye. (Mat. 6:33; Luku 13:24; Kɔl. 3:23) Yɛbahola yɛapɛ ye sikalɛ kɛ, yɛ nye die nwo kɛ yɛbaha Nyamenle ne mɔɔ yɛkulo ye la anwo edwɛkɛ. Eza yɛ nye die nwo kɛ yɛbaha ye duma ne nee kɛzi ye duma ne maa yɛnwu Nyamenle holɛ ko mɔɔ ɔde la anwo edwɛkɛ yɛahile awie mɔ. Duzu ati ɔ?

12. Kɛzi yɛte Gyihova duma ne anwo wɔ yɛ ɛzonlenlɛ gyima ne anu ɛ?

¹² Ɛlɔlɛ mɔɔ yɛlɛ yɛmaa Gyihova la ka yɛ maa yɛte ye duma nwo. (Mat. 6:9) Yɛkulo kɛ yɛboa yɛmaa bɛye adalɛ edwɛkɛ mɔɔ Seetan ɛlua zo ɛzɛkye Gyihova duma ne la bɛfi ɛkɛ. (Gyn. 3:​1-5; Dwobu 2:4; Dwɔn 8:44) Yɛlɛyɛ yɛ ɛzonlenlɛ gyima ne a, yɛlɛ ɛhulolɛ kpole kɛ yɛbagyinla yɛ Nyamenle ne afoa na yɛaha ɔ nwo nɔhalɛ edwɛkɛ ne yɛahile awie biala mɔɔ ɔbadie la. Yɛkulo kɛ awie biala nwu kɛ ye subane titili kpalɛ ne a le ɛlɔlɛ, ɔdi tumi wɔ tenleneyɛlɛ nee pɛlepɛle nu yɛɛ ɔnrɛhyɛ, ye Belemgbunlililɛ ne bava amaneɛnwunlɛ kɔsɔɔti ara awieleɛ na yeamaa alesama anyia anzodwolɛ nee anyelielɛ. (Edw. 37:​10, 11, 29; 1 Dwɔn 4:8) Saa yɛka Gyihova anwo edwɛkɛ ɛhye mɔ yɛkile awie mɔ a, ɛnee yɛlɛte ye duma nwo. Eza ɔmaa yɛ kunlu dwo yɛ nwo ɔluakɛ yɛze kɛ yɛlɛbɔ duma mɔɔ la yɛ nwo zo la anwo ɛbɛla. Duzu ati a yɛkola yɛka ye zɔ a?

13. Duzu ati a ɔle enililɛ kɛ bɛfɛlɛ yɛ Gyihova Alasevolɛ a? (Ayezaya 43:​10-12)

¹³ Gyihova ɛkpa yɛ kɛ yɛyɛ ye “alasevolɛ.” (Kenga Ayezaya 43:​10-12.) Ɛvolɛ bie mɔɔ ɛze ɛhɔ la, bɛhanle ye wɔ kɛlata bie mɔɔ vi Neazo Eku ne ɛkɛ la anu kɛ: “Enililɛ mɔɔ tɛla biala mɔɔ awie bahola anyia la a le kɛ bɛbavɛlɛ ye Gyihova Dasevolɛ.” Duzu ati ɔ? Yɛyɛ ndonwo bie. Fa ye kɛ bɛlɛdi wɔ edwɛkɛ wɔ kɔɔto. Ɔti ɛhyia awie mɔɔ ɔbali daselɛ wɔ kɔɔto ɛkɛ ne kɛ ɛle sonlakpalɛ na somolɛ mɔɔ bɛbɔ wɔ la ɛnle nɔhalɛ. Nwane a ɛbavɛlɛ ye a? Ɛbavɛlɛ awie mɔɔ ɛze ye na ɛdie ye ɛdi, awie mɔɔ ɔlɛ duma kpalɛ la ati ɔbamaa bɛalie edwɛkɛ mɔɔ ɔbaha wɔ kɔɔto ɛkɛ ne la bɛali la. Kɛmɔ Gyihova ɛkpa yɛ kɛ yɛyɛ ye Alasevolɛ la ati, ɔkile kɛ ɔze yɛ kpalɛ yɛɛ ɔdie ɔdi kɛ yɛbamaa menli anwu kɛ ɔdaye ala a ɔle nɔhalɛ Nyamenle ne a. Ɔle enililɛ kpole kɛ yɛle ye Alasevolɛ la, na yɛfa nwolɛ adenle biala mɔɔ yɛbanyia la yɛmaa menli nwu ye duma ne na yɛbɔ adalɛ biala mɔɔ bɛha ye wɔ ɔ nwo la yɛgua. Yɛyɛ ye zɔ a, ɛnee yɛlɛbɔ duma mɔɔ la yɛ nwo zo mɔɔ yɛ nye die nwolɛ kpole la anwo ɛbɛla: Yɛle Gyihova Alasevolɛ!—Edw. 83:18; Wlo. 10:​13-15.

YƐBAHƆ ZO YƐAHA EDWƐKƐ NE YƐAHƆDWU AWIELEƐ NE

14. Ninyɛne mɔɔ yɛ anyelielɛ la boni a mɔ la yɛ nyunlu a?

¹⁴ Yɛ nye la ninyɛne mɔɔ yɛ anyelielɛ mɔɔ ɔbasisi kenle bie la ade. Kɛmɔ Gyihova ɛlɛyila yɛ la ati, yɛ nye la kɛ yɛbanwu kɛ menli dɔɔnwo kpalɛ ɛra nɔhalɛ ne anu kolaa na anwongyelelɛ kpole ne abɔ ɔ bo. Eza ɔyɛ yɛ anyelielɛ kɛ, wɔ anwongyelelɛ kpole ne anu, mekɛ mɔɔ anu yɛ se tɛla mekɛ biala bɔbɔ la anu, bie a yɛbanwu kɛ menli dɔɔnwo ɛlɛfi ɛtane ewiade ne mɔɔ ɛlɛsɛkye la anu na bɛaraboka yɛ nwo bɛamaa yɛaye Gyihova ayɛlɛ!—Gyi. 13:48.

15-16. Duzu a yɛbahɔ zo yɛayɛ a, na yɛbayɛ yɛahɔdwu kenlenzu?

¹⁵ Noko yɛlɛ gyima yɛyɛ. Yɛnyia nwolɛ adenle kɛ yɛbayɛ nolobɔlɛ gyima bie mɔɔ bɛnrɛyɛ ye bieko ɛlɛ la bie—Nyamenle Belemgbunlililɛ ne anwo edwɛkpa ne mɔɔ yɛbɔ ye nolo wɔ ewiade amuala la. Mekɛ ko ne ala, ɔwɔ kɛ yɛkɔ zo yɛbɔ menli kɔkɔ wɔ mɔɔ ɔbazi la anwo. Ɔhyia kɛ menli nwu kɛ ɛtane ewiade ɛhye awieleɛ ne ɛlɛbikye ndɛndɛ. Akee saa ndɛnebualɛ mekɛ ne dwu a, bɛbanwu kɛ edwɛkɛ ne mɔɔ yɛbɔle ye nolo la vi Gyihova Nyamenle ɛkɛ.—Yiz. 38:23.

¹⁶ Ɔti duzu a yɛbɔ kpɔkɛ kɛ yɛbayɛ a? Ɛlɔlɛ mɔɔ yɛlɛ yɛmaa nɔhalɛ ne, ɛlɔlɛ mɔɔ yɛlɛ yɛmaa menli yɛɛ mɔɔ tɛla biala la, ɛlɔlɛ mɔɔ yɛlɛ yɛmaa Gyihova Nyamenle nee ye duma ne la ati, yɛbahɔ zo yɛava anwowosolɛ nee mɔdenlebɔlɛ yɛaha edwɛkɛ ne anyebolo zo kɔkpula kɛ Gyihova baha kɛ, “Yeyɛ boɛ!”