EDWƐKƐ 15
EDWƐNE 30 Me Ze, Me Nyamenle Nee Me Gɔnwo
‘Nyamenle Mɔɔ Yɛbikye Ye La Le Kpalɛ Maa Yɛ’!
“Mame, Nyamenle mɔɔ mebikye ye la le kpalɛ maa me.”—EDW. 73:28.
BODANE
Kɛzi yɛbahola yɛabikye Gyihova nee nvasoɛ mɔɔ yɛbikye ye a yɛnyia la.
1-2. (a) Mɔdenle boni a ɔwɔ kɛ yɛbɔ amaa yɛahola yɛava awie agɔnwolɛ kyengye a? (b) Duzu a yɛbazuzu nwo wɔ edwɛkɛ ɛhye anu a?
ƐLƐ agɔnwolɛ kpalɛ bie ɔ? Kɛ ɔyɛle mɔɔ bɛrayɛle agɔnwolɛma ɛ? Bie a ɛ nee ye dule, ɛnwunle ngyegyelɛ mɔɔ ɔlɛyia, yɛɛ ɛnwunle mɔɔ ɔkulo nee mɔɔ ɔngulo. Ɛranwunle kɛ ɔlɛ subane ngɛnlɛma mɔɔ ɛkulo kɛ ɛsukoa la. Ɔmaanle ɛrahulole ɛ gɔnwo ne edwɛkɛ kpalɛ.
2 Ɔdie mekɛ nee mɔdenlebɔlɛ na wɔanyia agɔnwolɛ kpalɛ. Zɔhane ala a Gyihova Nyamenle mɔɔ yɛfa ye agɔnwolɛ la noko de a. Edwɛkɛ ɛhye bahilehile kɛzi yɛbahola yɛabikye Gyihova nee nvasoɛ mɔɔ yɛbikye ye a yɛnyia la anu. Mɔɔ limoa, suzu deɛmɔti ɔle kpalɛ kɛ yɛbabikye yɛ Gɔnwo kpalɛ Gyihova la anwo.
3. Duzu ati a ɔwɔ kɛ yɛdwenledwenle nyilalɛ mɔɔ yɛbikye Gyihova a yɛbanyia la anwo a? Maa neazo.
3 Ye biala anu, ɛdie ɛto nu kɛ Gyihova mɔɔ yɛbabikye ye la le kpalɛ maa yɛ. Noko saa yɛdwenledwenle kɛzi ɔle kpalɛ ɔmaa yɛ la anwo a, ɔbahola yeaha yɛ yeamaa yɛahɔ zo yɛabikye ye. (Edw. 63:6-8) Kɛ neazo la, yɛze kɛ saa yɛdi aleɛ kpalɛ, yɛkpundikpundi yɛ agbɔkɛ nu, yɛdie yɛ menle kpalɛ na yɛno nzule kɛ mɔɔ ɔfɛta la a, ɔ muala boa yɛ. Noko menli dɔɔnwo ɛnva ninyɛne ɛhye mɔ anwo edwɛkɛ ɛngyegye bɛ nwo, ɔti bɛnnea bɛ kpɔkɛdelɛ boɛ. Noko saa yɛta yɛdwenle kɛzi yɛnea yɛ kpɔkɛdelɛ boɛ a ɔboa yɛ la anwo a, ɔbamaa yɛahɔ zo yɛayɛ ye zɔ. Zɔhane ala a yɛze kɛ yɛbikye Gyihova a ɔle kpalɛ ɔmaa yɛ a, noko saa yɛdwenledwenle nvasoɛ mɔɔ yɛbikye Gyihova a yɛbanyia la anwo a, ɔbaha yɛ yeamaa yɛahɔ zo yɛabikye yɛ Gɔnwo ne.—Edw. 119:27-30.
4. Edwɛkɛ boni a Edwɛne 73:28 kɛlɛvolɛ ne hanle a?
4 Kenga Edwɛne 73:28. Ɛnee Edwɛne 73 kɛlɛvolɛ ne le Livaenli mɔɔ bɛkpa ye kɛ ɔdo edwɛne wɔ Gyihova ɛzonlenlɛsua ne anu a. Bie a ɛnee yeva ɛvolɛ dɔɔnwo yezonle Gyihova nɔhalɛ nu. Noko ɔnwunle ye kɛ nwolɛ hyia kɛ ɔkakye ɔ nwo kɛ ‘Nyamenle mɔɔ ɔbabikye ye’ la le kpalɛ maa ye yɛɛ ɛnee ɔkulo kɛ awie mɔ noko nwu ye kɛ ɔle kpalɛ kɛ bɛbabikye Nyamenle. Saa yɛyɛ ye zɔ a, nvasoɛ boni mɔ a yɛbanyia a?
‘NYAMENLE MƆƆ YƐBIKYE YE LA’ MAA YƐ NYE DIE
5. (a) Duzu ati a yɛbikye Gyihova kpalɛ a ɔmaa yɛ nye die a? (b) Kɛ mɔɔ Mrɛlɛbulɛ 2:6-16 kile la, maa kɛzi Gyihova nrɛlɛbɛ ne kola boa wɔ na ɔbɔ ɛ nwo bane la anwo neazo fɔɔnwo.
5 Saa yɛbikye Gyihova kpalɛ a, ɔmaa yɛ nye die kpole kpalɛ. (Edw. 65:4) Deɛmɔti yɛ nye die la zonle. Nuhua ko a le kɛ, saa yɛfa nrɛlɛbɛ mɔɔ wɔ ye Edwɛkɛ Baebolo ne anu la yɛdi gyima a, yɛnyia zolɛ nvasoɛ. Zɔhane nrɛlɛbɛ ne bɔ yɛ nwo bane fi ninyɛne mɔɔ bahola aboda yɛ la anwo yɛɛ ɔmmaa yɛnyɛ nvonleɛ mgbole. (Kenga Mrɛlɛbulɛ 2:6-16.) Ɛhye ati a Baebolo ne hanle kɛ: “Anyelielɛ a le sonla mɔɔ kɛnwu nrɛlɛbɛ nee sonla mɔɔ kɛnyia adwenlenunwunlɛ la.”—Mrɛ. 3:13.
6. Duzu ati a ɛnee akee edwɛndolɛnli ne anye ɛnlie a?
6 Nɔhalɛ nu, ɔyɛ a Gyihova azonvolɛ bɔbɔ di alɔbɔlɛ. Mɔɔ Edwɛne 73 kɛlɛvolɛ ne vale ye adwenle ziele ninyɛne mɔ ɛnee ɔsuzu kɛ ɔngɔ boɛ la azo la, ɔ nye anlie. Ɔvale ɛya yɛɛ ɔ nye bolole ɛtanevolɛma mɔɔ bɛndwenle Nyamenle anzɛɛ Ye ngyinlazo ne mɔ anwo la, ɔluakɛ wɔ ye adwenle nu, ninyɛne kɔ boɛ kpalɛ maa bɛ. Ɔnyianle adwenle mɔɔ ɛndenrɛ la kɛ dahuu menli mɔɔ bɛyɛ basabasa na bɛmemaa bɛ nwo zo la nyia bɛ nwo, bɛte kpɔkɛ yɛɛ bɛnnwu amaneɛ bɔbɔ. (Edw. 73:3-7, 12) Edwɛkɛ ne gyegyele edwɛndolɛnli ne too na ɔhɔdwule mekɛ bie la ɛnee ɔngola ɔnnwu ye saa ɔle kpalɛ kɛ ɔbazonle Gyihova a. Ɔ rɛle bɔle kpalɛ na ɔhanle kɛ: “Nɔhalɛ nu, memaa me ahonle nu ɛde mgbane, yɛɛ mewowo me sa anwo mehile kɛ me nwo ɛnlɛ edwɛkɛ mgbane.”—Edw. 73:13.
7. Kɛ ɔkɛyɛ na yɛali alɔbɔlɛ mɔɔ sɛkye yɛ anyelielɛ la azo konim ɛ? (Eza nea nvoninli ne.)
7 Edwɛndolɛnli ne ammaa alɔbɔlɛlilɛ anvo ɔ nwo zo. Ɔyɛle nwolɛ debie. ‘Ɔwolole Nyamenle ɛzonlenlɛsua kpole ne anu,’ ɛkɛ ne a Gyihova denrɛle ye adwenle a. (Edw. 73:17-19) Saa yɛlɛdi alɔbɔlɛ a, Gyihova mɔɔ le yɛ Gɔnwo kpalɛ la ze ye. Saa yɛsɛlɛ ye kɛ ɔhile yɛ adenle na yɛdie moalɛ mɔɔ ɔdua ye Edwɛkɛ nee asafo ne azo ɔfa ɔmaa yɛ la yɛto nu a, yɛbanyia anwosesebɛ yɛagyinla alɔbɔlɛlilɛ nloa. Saa adwenleadwenle bo yɛ nwo zo bɔbɔ a, Gyihova bakyekye yɛ rɛle na yeamaa yɛ ahonle adɔ yɛ azule nu.—Edw. 94:19.a
Livaenli ne mɔɔ hɛlɛle Edwɛne 73 ne la gyi “Nyamenle ɛzonlenlɛsua kpole ne anu” (Nea ɛdendɛkpunli 7)
‘NYAMENLE MƆƆ YƐBIKYE YE LA’ MAA YƐ ƐBƐLABƆLƐ YƐ KPALƐ KƐKALA NA YƐNYIA ANYELAZO
8. Ndenle gyɛne mɔɔ hyia la boni mɔ azo a Nyamenle mɔɔ yɛbikye ye la le kpalɛ maa yɛ a?
8 Nyamenle mɔɔ yɛbikye ye la le kpalɛ maa yɛ wɔ ndenle gyɛne nwiɔ bie mɔɔ hyia la azo. Mɔɔ limoa, ɔmaa yɛ ɛbɛlabɔlɛ yɛ kpalɛ. Mɔɔ tɔ zo nwiɔ, ɔmaa yɛnyia anyelazo mɔɔ gyi ye kpundii. (Gyɛ. 29:11) Maa yɛzuzu nyilalɛ ɛhye mɔ anwo yɛhɔ moa.
9. Yɛbikye Gyihova a kɛzi ɔmaa yɛ nye die kpalɛ ɛ?
9 Yɛbikye Gyihova a ɔmaa yɛ ɛbɛlabɔlɛ yɛ kpalɛ na yɛ nye die. Menli dɔɔnwo mɔɔ bɛnlie bɛnli kɛ Nyamenle wɔ ɛkɛ la suzu kɛ ɛbɛlabɔlɛ ɛnlɛ bodane biala, ɔti awieleɛ bɔkɔɔ ne alesama abo badu avi azɛlɛ ye azo. Noko Nyamenle Edwɛkɛ ne mɔɔ yɛzukoa la ɛmaa yɛnwu ye bɔkɔɔ kɛ Nyamenle wɔ “ɛkɛ na ɔmaa bɛdabɛ mɔɔ bɛ nye ɛbolo bɛlɛkpondɛ ye la ahatualɛ.” (Hib. 11:6) Ɛnɛ bɔbɔ, yɛ nye die ɔluakɛ yɛlɛyɛ mɔɔ bɛbɔle yɛ kɛ yɛyɛ la—yemɔ a le kɛ yɛbazonle yɛ anwuma Selɛ Gyihova.—Dit. 10:12, 13.
10. Ɛwɔkɛ boni a Gyihova ɛbɔ menli mɔɔ bɛlɛ ye nu anwodozo la ɛ? (Edwɛne 37:29)
10 Menli dɔɔnwo ɛnlɛ kenle bie nwo anyelazo—bɛ ɛdeɛ ala a le kɛ bɛbayɛ gyima, bɛbakyekye abusua na bɛaziezie ezukoa mɔɔ bɛkɔ pɛnhyɛne a bɛbava bɛanlea bɛ nwo la. Bɛndwenle Nyamenle anwo. Noko Gyihova azonvolɛ ɛdeɛ, bɛfa bɛ nye bɛto ɔ nwo zo. (Edw. 25:3-5; 1 Tim. 6:17) Yɛdie Nyamenle ne mɔɔ yɛbikye ye la yɛdi, yɛɛ yɛdie ɛwɔkɛ mɔɔ yebɔ yɛ la yɛdi. Nyilalɛ mɔɔ yɛbanyia ye kenle bie la bie a le kɛ yɛbanyia nwolɛ adenle yɛazonle ye dahuu wɔ Paladaese.—Kenga Edwɛne 37:29.
11. Yɛbikye Nyamenle a kɛzi ɔka yɛ ɛ, na kɛzi ɔka ɔdaye noko ɛ?
11 Nyamenle mɔɔ yɛbikye ye la le kpalɛ maa yɛ wɔ ndenle gyɛne dɔɔnwo azo. Kɛ neazo la, Gyihova ɛbɔ ɛwɔkɛ kɛ ɔbava ɛtanevolɛma mɔɔ bɛnlu bɛ nwo na bɛbikye ye la ɛtane yeahyɛ bɛ. (Aye. 1:18) Ɛhye ati ɔnle kɛ yɛmaa yɛ adwenle bua yɛ fɔlɛ dahuu wɔ ɛtane mɔɔ yɛyɛle ye dɛba la anwo. (Edw. 32:1-5) Yɛɛ ɔyɛ yɛ fɛ kɛ yɛkola yɛmaa Gyihova anye die la. (Mrɛ. 23:15) Eza ɛbahola wɔadwenle nyilalɛ gyɛne mɔɔ yɛbikye Nyamenle kpalɛ a yɛnyia la anwo. Noko kɛ ɔkɛyɛ na wɔahɔ zo wɔabikye Nyamenle ɛ?
KƐZI YƐBAHƆ ZO ‘YƐABIKYE NYAMENLE LA’
12. Duzu a wɔyɛ amaa wɔabikye Nyamenle kpalɛ a?
12 Saa ɛle Kilisienenli mɔɔ bɛzɔne wɔ a, ɔkile kɛ wɔlimoa wɔbikye Gyihova. Wɔzukoa Gyihova Nyamenle nee Kelaese Gyisɛse anwo nɔhalɛ edwɛkɛ dɔɔnwo, wɔnlu ɛ nwo wɔ ɛtane mɔɔ ɛyɛle ye dɛba la anwo, wɔnyia Nyamenle anu diedi kpole na ɛlɛbɔ mɔdenle kɛ ɛbabɔ wɔ ɛbɛla kɛ mɔɔ ɔkpondɛ la. Noko amaa yɛahola yɛabikye Nyamenle kpalɛ la, ɔwɔ kɛ yɛkɔ zo yɛyɛ ninyɛne ɛhye mɔ.—Kɔl. 2:6.
13. Ninyɛne nsa boni mɔ a baboa yɛ yeamaa yɛahɔ zo yɛabikye Gyihova kpalɛ a?
13 Duzu a baboa yɛ yeamaa yɛahɔ zo yɛabikye Gyihova kpalɛ a? (1) Ɔwɔ kɛ yɛkɔ zo yɛkenga Baebolo ne na yɛsukoa. Saa yɛlɛkenga Baebolo ne a, ɔnle kɛ yɛyɛ yɛ adwenle kɛ yɛsukoa Nyamenle anwo mɔlebɛbo ngilehilelɛ bie mɔ ala. Emomu, ɔwɔ kɛ yɛbɔ mɔdenle kɛ yɛbanwu Nyamenle ɛhulolɛdeɛ na yɛamaa ye ngyinlazo ne mɔ mɔɔ wɔ ye Edwɛkɛ ne anu la ahile yɛ adenle. (Ɛfɛ. 5:15-17) (2) Ɔwɔ kɛ yɛdwenledwenle daselɛ dɔɔnwo mɔɔ kile kɛ ɔkulo yɛ la anwo yɛfa yɛmia yɛ diedi ne anu. (3) Ɔwɔ kɛ yɛkɔ zo yɛkyi ninyɛne mɔɔ ka Gyihova ɛya la na yɛpɛ yɛ nee menli mɔɔ bɛyɛ zɔhane ninyɛne ne mɔ bie la agɔnwolɛvalɛ ne anu.—Edw. 1:1; 101:3.
14. Kɛ mɔɔ 1 Kɔlentema 10:31 kile la, ninyɛne boni mɔ a ɔwɔ kɛ yɛyɛ ye kenle ko biala amaa Gyihova alie yɛ ado nu a? (Eza nea nvoninli ne mɔ.)
14 Kenga 1 Kɔlentema 10:31. Ɔhyia kɛ dahuu yɛbayɛ ninyɛne mɔɔ Gyihova anye die nwo la. Ɛhye kile kɛ saa yɛkɔ daselɛlilɛ nee debiezukoalɛ a, ɛnee yɛtɛwiele. Ɔwɔ kɛ nyɛleɛ mɔɔ yɛda ye ali kenle ko biala la sɔ Gyihova anye. Kɛ neazo la, saa yɛdi nɔhalɛ wɔ debie biala anu na yɛ nee awie mɔ kyɛ mɔɔ yɛlɛ la a, yɛmaa Gyihova anye die. (2 Kɔl. 8:21; 9:7) Eza ɔkulo kɛ yɛbu ngoane mɔɔ yeva yehyɛ yɛ la kpole kpalɛ. Saa yɛnea yɛ aleɛlilɛ nee nza dodo mɔɔ yɛno la boɛ na yɛyɛ ninyɛne gyɛne mɔɔ bamaa yɛade kpɔkɛ dahuu la a, ɔmaa yɛbikye ngoane Maavolɛ ne kpalɛ. Saa Gyihova nwu kɛ yɛlɛbɔ mɔdenle yɛayɛ ninyɛne ngyikyi bɔbɔ mɔɔ maa ɔ nye die la a, ɔmaa yɛbikye ye.—Luku 16:10.
Ndenle mɔɔ yɛdua zo yɛyɛ mɔɔ sɔ Gyihova anye la bie mɔ a le kɛ yɛbanlea yɛ kale ɛhanlɛ boɛ, yɛbakpundikpundi yɛ agbɔkɛ nu, yɛali aleɛ kpalɛ na yɛala atiakunlukɛnlɛma ali yɛahile awie mɔ (Nea ɛdendɛkpunli 14)
15. Kɛzi Gyihova kulo kɛ yɛ nee awie mɔ di ɛ?
15 Gyihova da atiakunlukɛnlɛma ali kile tenlenema nee bɛdabɛ mɔɔ bɛnle tenlenema la amuala. (Mat. 5:45) Ɔkulo kɛ yɛdayɛ noko yɛ nee awie mɔ di ye zɔhane ala. Kɛ neazo la, ɔnle kɛ yɛka ‘awie biala anwo edwɛkɛ ɛtane, yɛkulo butule, emomu, ɔwɔ kɛ yɛda bɛtɛɛyɛlɛ ali yɛkile menli kɔsɔɔti.’ (Tae. 3:2) Ɛhye ati, saa yɛ nee awie mɔ ɛnlɛ diedi ko a, yɛnnyia adwenle kɛ yɛle kpalɛ yɛtɛla bɛ. (2 Tim. 2:23-25) Saa dahuu yɛda atiakunlukɛnlɛma ali yɛkile menli kɔsɔɔti a, ɔmaa yɛbikye Gyihova.
SAA YƐYƐ NVONLEƐ BƆBƆ A YƐBAHOLA ‘YƐABIKYE NYAMENLE’
16. Wɔ mekɛ bie anzi, kɛzi Edwɛne 73 kɛlɛvolɛ ne dele nganeɛ ɛ?
16 Na saa ɔdwu mekɛ ne bie na ɛte nganeɛ kɛ Gyihova ɛngulo wɔ bieko ɛ? Kɛ mɔɔ yɛzuzu nwo la, Edwɛne 73 kɛlɛvolɛ ne noko dele nganeɛ zɔhane bie. Ɔhanle kɛ: “Anrɛɛ mefo tenleneyɛlɛ adenle ne; ɔhale ekyii na meatele.” (Edw. 73:2) Ɔliele ɔdole nu kɛ ‘ɔlile nyane’ yɛɛ ɛnee ‘ɔnlɛ adwenle’ na ɔyɛle kɛ “nane mɔɔ ɛnlɛ adwenle la” wɔ Gyihova anye zo. (Edw. 73:21, 22) Asoo ɔhanle kɛ ye nvonleɛ ne ati ɛnee bɛfa ye bɛyɛ ɛhwee a ɔnyɛ boɛ yɛɛ ɛnee Gyihova ɛngulo ye bieko ɔ?
17. (a) Mɔɔ edwɛndolɛnli ne arɛle bɔle kpalɛ bɔbɔ la, duzu a ɔbayɛ kɛ ɔyɛle a? (b) Duzu a yɛbahola yɛazukoa yɛavi ye anwubielɛ ne anu a? (Eza nea nvoninli ne mɔ.)
17 Saa edwɛndolɛnli ne dele nganeɛ kɛ Gyihova ɛkpo ye a, bie a ɔdele zɔhane nganeɛ ne wɔ mekɛ ekyii bie ala anu. Ɔzɔho kɛ wɔ mekɛ mɔɔ ɔ rɛle bɔle kpalɛ la, ɔnwunle kɛ ɔwɔ kɛ ɔbikye Nyamenle kɛ mɔɔ ɔdaye mumua ne ɔhanle la: “Noko kɛkala me nee wɔ [Gyihova] a de dahuu a; wɔzɔ me sa fema ne anu. Ɛtu me folɛ ɛfa ɛkile me adenle, na nzinlii ɛbava me wɔahɔ anyunlunyia nu.” (Edw. 73:23, 24) Saa yɛdayɛ noko yɛte nganeɛ kɛ yɛyɛ bɛtɛɛ anzɛɛ yɛ sa nu ɛdo a, ɔwɔ kɛ yɛsɛlɛ Gyihova kɛ ɔmaa yɛ anwosesebɛ. (Edw. 73:26; 94:18) Saa yɛ gyakɛ tele ekyi bɔbɔ a, yɛbahola yɛazia yɛahɔ Gyihova ɛkɛ na yɛanyia anwodozo kɛ ɔlɛ ‘ɛhulolɛ kɛ ɔbava ɛtane yeahyɛ.’ (Edw. 86:5) Mekɛ mɔɔ yɛ rɛle babɔ kpalɛ bɔbɔ la a ɔwɔ kɛ yɛbikye Nyamenle kpalɛ a.—Edw. 103:13, 14.
Saa yɛte nganeɛ kɛ yɛyɛ bɛtɛɛ wɔ sunsum nu a, ɔwɔ kɛ yɛyɛ dɔɔnwo wɔ Gyihova ɛzonlenlɛ nu yɛfa yɛbikye ye kpalɛ (Nea ɛdendɛkpunli 17)
ƆWƆ KƐ YƐBIKYE NYAMENLE DAHUU
18. Duzu ati a Gyihova mɔɔ yɛbikye ye la ɛnlɛ ye ɛweɛne a?
18 Gyihova mɔɔ yɛbikye ye nee kɛzi yɛbahola yɛanwu ye kpalɛ la ɛnlɛ ye ɛweɛne. Baebolo ne ka kɛ “bɛngola bɛnnwu” Gyihova ndenle, ye nrɛlɛbɛ nee ye adwenle nu.—Wlo. 11:33.
19. Anwodozo boni a Edwɛne buluku ne maa yɛnyia a?
19 Edwɛne 79:13 ka kɛ: “Yɛmɛ, mɔɔ yɛle wɔ menli nee wɔ adidileka mboane la, yɛbayɛ wɔ mo dahuu; na yɛbabɔ wɔ ayɛlɛyelɛ ne nolo ɔvi awolɛndoazo zo kɔdwu awolɛndoazo zo.” Mekɛ mɔɔ ɛlɛkɔ zo wɔabikye Gyihova la, ɛdawɔ noko ɛbahola wɔanyia anwodozo kɛ ɛbanyia nyilalɛ dahuu na wɔahola wɔazi ɛ kɛnra wɔaha kɛ: “Nyamenle le bodane maa me ahonle yɛɛ me kyɛfoa dahuu.”—Edw. 73:26.
EDWƐNE 32 Kɔ Gyihova Afoa!
a Ɔwɔ kɛ menli mɔɔ adwenleadwenle anzɛɛ alɔbɔlɛlilɛ ɛdɔ bɛ nwo la kɔnwu dɔketa bɛmaa ɔboa bɛ. Saa ɛkpondɛ nwolɛ edwɛkɛ dɔɔnwo a, nea The Watchtower, No. 1 2023.