Saa Yɛbikye Yɛ Mediema A Ɔle Kpalɛ Ɔmaa Yɛ!

1-2. Debie ko mɔɔ hyia Gyihova la a le boni, na duzu a ɔkulo kɛ yɛyɛ a?

NINYƐNE mɔɔ hyia Gyihova kpalɛ la anu ko a le kɛzi yɛ nee awie mɔ di la. Gyisɛse hanle kɛ yɛhulo yɛ gɔnwo kɛ yɛdayɛ yɛ nwo la. (Mat. 22:​37-39) Bie a le kɛ yɛbala atiakunlukɛnlɛma ali yɛahile bɛdabɛ bɔbɔ mɔɔ yɛ nee bɛ ɛnlɛ diedi ko la. Saa yɛda atiakunlukɛnlɛma zɛhae ali a, ɛnee yɛlɛsukoa Gyihova Nyamenle mɔɔ ɔmaa “ye ewia fi maa ɛtanevolɛma nee kpalɛma yɛɛ ɔmaa ezule tɔ gua tenlenema nee amumuyɛma anwo zo” la.—Mat. 5:45.

² Gyihova kulo alesama amuala ɛdeɛ, noko ɔ nye die bɛdabɛ mɔɔ bɛyɛ mɔɔ le kpalɛ la dahuu la anwo kpalɛ. (Dwɔn 14:21) Ɔkulo kɛ yɛsukoa ye. Ɔti ɔse yɛnyia “ɛlɔlɛ mɔɔ anu yɛ se la” yɛmaa yɛ mediema na ‘yɛhulo’ bɛ. (1 Pita 4:8; Wlo. 12:10) Ɛlɔlɛ ɛhye le kɛ ɛlɔlɛ mɔɔ yɛlɛ yɛmaa yɛ mbusuafoɔ anzɛɛ yɛ gɔnwo kpalɛ bie la.

3. Kɛzi ɛlɔlɛ de ɛ?

³ Kɛ mɔɔ ɔwɔ kɛ yɛnea baka bie mɔɔ yɛlua ye wɔ yɛ tola nu boɛ amaa yeanyi la, zɔhane ala a ɛlɔlɛ noko de a. Ɛzoanvolɛ Pɔɔlo dule Kilisienema folɛ kɛ: “Bɛhɔ zo bɛla bɛ mediema ɛlɔlɛ ali.” (Hib. 13:1) Gyihova kulo kɛ yɛkɔ zo yɛnyia awie mɔ anwo ɛlɔlɛ. Edwɛkɛ ɛhye bahilehile deɛmɔti ɔwɔ kɛ yɛbikye yɛ mediema kpalɛ nee kɛzi yɛbahola yɛahɔ zo yɛayɛ zɔ la.

DEƐMƆTI ƆWƆ KƐ YƐBIKYE YƐ MEDIEMA KPALƐ LA

4. Kɛ mɔɔ bɛhilehile nu wɔ Edwɛne 133:1 la, kɛ ɔkɛyɛ na yɛahile kɛ yɛ nye sɔ koyɛlɛ ne mɔɔ wɔ yɛ nee yɛ mediema avinli la ɛ? (Eza nea nvoninli ne mɔ.)

⁴ Kenga Edwɛne 133:1. Yɛ nee edwɛndolɛnli ne mɔɔ hɛlɛle kɛ saa yɛ nee menli mɔɔ kulo Gyihova la fa agɔnwolɛ kyengye a ɔle “kpalɛ” yɛɛ ɔle “kɛnlɛma” la yɛ adwenle. Noko kɛ mɔɔ awie nwu felawɔse bie mɔɔ ɔyɛ ye kɛnlɛma kpalɛ la kenle ko biala a akee ɔnyɛ ye kɛnlɛma bieko la, zɔhane ala a yɛannea boɛ a yɛbabu kɛzi koyɛlɛ mɔɔ wɔ yɛ avinli la le kɛnlɛma la debie ekyi a. Yɛta yɛnwu yɛ mediema, bie a fane dɔɔnwo dapɛne biala. Kɛ ɔkɛyɛ na yɛahɔ zo yɛahile kɛ koyɛlɛ mɔɔ wɔ yɛ avinli la sonle bolɛ maa yɛ ɛ? Saa yɛdwenle kɛzi adiema biala anwo hyia wɔ asafo ne anu la anwo a, ɔbamaa yɛanyia bɛ nwo ɛlɔlɛ kpole.

5. Kɛzi ɛlɔlɛ mɔɔ wɔ yɛ avinli la kola ka awie mɔ ɛ?

⁵ Mekɛ mɔɔ limoa mɔɔ menli bie mɔ rale yɛ debiezukoalɛ ne bie la, bɛ nye liele ɛlɔlɛ mɔɔ yɛlɛ yɛmaa yɛ nwo ngoko la anwo kpalɛ. Yemɔ angomekye bɔbɔ maa bɛka kɛ bɛnwu nɔhalɛ ne. Gyisɛse hanle kɛ: “Saa bɛkulo bɛ nwo a—menli kɔsɔɔti banwu kɛ bɛle me ɛdoavolɛma.” (Dwɔn 13:35) Suzu Chaithra mɔɔ ɛnee kɔ yunivɛsiti na eza ɔ nee Gyihova Alasevolɛ sukoa debie la anwubielɛ ne anwo. Mɔɔ bɛdole ɛsalɛ bɛvɛlɛle ye kɛ ɔrɛla maanzinli nyianu bie la, ɔhɔle. Mɔɔ ɔhɔle kenle mɔɔ limoa la, ɔhanle ɔhilele ahenle mɔɔ nee ye sukoa Baebolo ne la kɛ: “Me awovolɛ ɛtɛyɛle me atuu ɛlɛ. Noko mɔɔ mengɔle bɛ nyianu ne bie la, menli 52 yɛle me atuu wɔ kenle ko ala anu! Mendele nganeɛ kɛ Gyihova ɛlɛdua ye menli ne anwo azo yeamaa meanwu kɛ ɔkulo me. Mekulo kɛ meboka abusua zɔhane anwo.” Chaithra nyianle anyuhɔlɛ na bɛzɔnenle ye wɔ 2024. Nɔhalɛ nu, saa menli fofolɛ nwu yɛ gyima kpalɛ, mɔɔ bie a le ɛlɔlɛ mɔɔ yɛlɛ yɛmaa yɛ nwo la a, ɔta ɔka bɛ ɔmaa bɛsonle Gyihova.—Mat. 5:16.

6. Kɛzi yɛbikye yɛ mediema a ɔbɔ yɛ nwo bane ɛ?

⁶ Saa yɛbikye yɛ mediema a, ɔkola ɔbɔ yɛ nwo bane. Pɔɔlo dule ɔ mediema Kilisienema folɛ kɛ: “Bɛhɔ zo bɛmaa bɛ nwo anwosesebɛ alehyenlɛ biala . . . amaa ɛtane mɛlɛbɛla ne ammaa bɛ nuhua biala amkpunli ye ahonle.” (Hib. 3:13) Saa yɛ sa nu to kpole na ɔlɛmaa yɛavi tenleneyɛlɛ adenle ne azo a, bie a Gyihova balua adiema bie mɔɔ ɛnwu tɛnlabelɛ mɔɔ yɛwɔ nu la anwo zo aboa yɛ. (Edw. 73:​2, 17, 23) Anwosesebɛmaanlɛ zɛhae le kpalɛ maa yɛ bɔkɔɔ.

7. Kɛzi ɛlɔlɛ nee koyɛlɛ lua adenle ko azo ɛ? (Kɔlɔsaema 3:​13, 14)

⁷ Yɛle ekpunli mɔɔ yɛbɔ mɔdenle ɛsesebɛ amaa yɛala ɛlɔlɛ ali yɛahile yɛ nwo ngoko a, ɔti yɛnyia nyilalɛ dɔɔnwo. (1 Dwɔn 4:11) Kɛ neazo la, ɛlɔlɛ a ka yɛ maa ‘yɛkɔ zo yɛnyia abotane yɛmaa yɛ nwo’ a, na yemɔ maa koyɛlɛ mɔɔ wɔ yɛ avinli la anu mia. (Kenga Kɔlɔsaema 3:​13, 14; Ɛfɛ. 4:​2-6) Ɛhye ati saa yɛkɔ yɛ debiezukoalɛ ne mɔ abo a, yɛnyia anzodwolɛ mɔɔ ekpunli biala mɔɔ wɔ azɛlɛ ye azo la ɛnlɛ bie la.

BƐLI BƐ NUHUA KO BIALA ENI

8. Duzu a Gyihova yɛ boa yɛ maa yɛyɛ ko a?

⁸ Koyɛlɛ mɔɔ wɔ yɛ nee yɛ mediema mɔɔ wɔ ewiade amuala avinli la le nwanwane debie. Ɔnva nwo kɛ yɛtɔ sinli la, Gyihova boa yɛ maa yɛkola yɛyɛ zɔ. (1 Kɔl. 12:25) Baebolo ne ka kɛ ‘Nyamenle ɛhilehile yɛ kɛ yɛhulo yɛ nwo ngoko.’ (1 Tɛs. 4:9) Wɔ adenle fofolɛ zo, Gyihova dua Ngɛlɛlera ne azo ka debie fɔɔnwo mɔɔ ɔhyia kɛ yɛyɛ amaa yɛabikye yɛ nwo ngoko la kile yɛ. Saa yɛtɔ alagye yɛsukoa Nyamenle Edwɛkɛ ne na yɛfa yɛbɔ yɛ ɛbɛla a, ɛnee yɛlɛmaa ‘Nyamenle ahilehile yɛ.’ (Hib. 4:12; Gye. 1:25) Na zɔhane ala a Gyihova Alasevolɛ bɔ mɔdenle kɛ bɛbayɛ a.

9. Kɛzi yɛbali yɛ gɔnwo mɔ eni la anwo debie boni a yɛsukoa yɛfi Wulomuma 12:​9-13 anu a?

⁹ Kɛzi Nyamenle Edwɛkɛ ne kilehile yɛ maa yɛbikye yɛ nwo ɛ? Suzu mɔɔ Pɔɔlo hanle ye wɔ edwɛkɛ ɛhye anwo wɔ Wulomuma 12:​9-13 la anwo. (Kenga.) Ɔwɔ kɛ yɛyɛ edwɛkɛ ɛhye mɔɔ ɔhanle la nzonlɛ: “Bɛlimoa bɛli bɛ gɔnwo mɔ eni.” Duzu a ɛhye kile a? Ɔwɔ kɛ yɛdayɛ mumua ne yɛdimoa yɛkpondɛ ndenle ngakyile yɛdua zo yɛkile kɛ ‘yɛkulo’ bɛ, bie a le kɛ yɛbava ɛtane yɛahyɛ, yɛbalie bɛ nyɛvolɛ na yɛayɛ bɛ nyele. (Ɛfɛ. 4:32) Ɔnle kɛ ɛkendɛ too kɛ ɛmaa adiema bie alimoa abikye wɔ. Ɛbahola ‘wɔalimoa’ wɔayɛ zɔ. Edwɛkɛ mɔɔ Gyisɛse hanle la le nɔhalɛ, ɔse: “Anyelielɛ dɔɔnwo wɔ ɛmaanlɛ nu tɛla ɛlielɛ.”—Gyi. 20:35.

10. Gyima ɛsesebɛ boni a ɔwɔ kɛ yɛyɛ amaa ‘yɛali yɛ gɔnwo mɔ eni’ ɛ? (Eza nea nvoninli ne.)

¹⁰ Ɔyɛ anyelielɛ kɛ mɔɔ Pɔɔlo hanle kɛ yɛlimoa yɛli yɛ gɔnwo mɔ eni wiele ala la, eza ɔdule yɛ folɛ kɛ ‘yɛyɛ gyima ɛsesebɛ, yɛmmayɛ mgbovonle.’ Awie mɔɔ yɛ gyima ɛsesebɛ la bɔ ɔ nwo mɔdenle kpalɛ. Saa bɛmaa ye gyima bie a, ɔmaa ɔ nye bolo ɔyɛ. Mrɛlɛbulɛ 3:​27, 28 maa yɛ anwosesebɛ kɛ: “Mmakpo kɛ ɛkɛyɛ kpalɛ ɛkɛmaa bɛdabɛ mɔɔ ɔwɔ kɛ ɛyɛ ɛmaa bɛ la, saa ɛlɛ tumi ɛkola ɛboa bɛ a.” Ɔti saa yɛnwu kɛ awie hyia debie a, yɛyɛ mɔɔ yɛbahola la yɛboa ye. Yɛnyɛ tusie; anzɛɛ yɛnnyia adwenle kɛ awie gyɛne bali tɛnlabelɛ ne anwo gyima.—1 Dwɔn 3:​17, 18.

11. Duzu a bahola aboa yɛ yeamaa yɛabikye yɛ nwo kpalɛ a?

¹¹ Adenle bieko mɔɔ yɛbahola yɛalua zo yɛali awie mɔ eni la a le kɛ saa bɛfo yɛ a yɛbava yɛahyɛ bɛ ndɛndɛ. Ɛfɛsɛsema 4:26 ka kɛ: “Bɛmmamaa sɛnzɛne ne tɔ bɛ ɛyavalɛ zo.” Duzu ati ɔ? Ngyɛnu 27 ne ka kɛ saa yɛyɛ ye zɔ a, ‘yɛbamaa Abɔnsam adenle.’ Gyihova ɛha ɛhile yɛ fane dɔɔnwo wɔ ye Edwɛkɛ ne anu kɛ yɛva yɛ gɔnwo mɔ ɛtane yɛhyɛ bɛ. Kɔlɔsaema 3:13 maa yɛ anwosesebɛ kɛ ‘yɛhɔ zo yɛva yɛhyɛ yɛ nwo bɔkɔɔ.’ Awie mɔ nvonleɛ mɔɔ yɛbu yɛ nye yɛgua zo la a le adenle titili ko mɔɔ yɛdua zo yɛbikye bɛ kpalɛ a. Saa yɛyɛ ye zɔ a, ɛnee yɛlɛboa yɛamaa ‘yɛava anzodwolɛ mɔɔ ka yɛ bɔ nu la yɛadɛnla sunsum nu koyɛlɛ nu.’ (Ɛfɛ. 4:3) Ye sikalɛ nu a le kɛ, ɛtanefakyɛ kola maa yɛyɛ ko na yɛtɛnla anzodwolɛ nu dahuu.

12. Duzu a Gyihova yɛ boa yɛ amaa yɛava ɛtane yɛahyɛ a?

¹² Nɔhalɛ nu, bie a ɔbayɛ se yeamaa yɛ kɛ yɛbava menli mɔɔ bɛvo yɛ la ɛtane yɛahyɛ bɛ. Noko ɔlua Nyamenle sunsum ne moalɛ zo, yɛbahola yɛava yɛahyɛ bɛ. Mɔɔ Baebolo ne hanle kɛ “bɛva mediema ɛlɔlɛ bɛhulo bɛ nwo ngoko” na “bɛyɛ gyima ɛsesebɛ” la anzi, eza ɔdule yɛ folɛ kɛ “bɛmaa sunsum ne ɛboa bɛ ɔmaa bɛbɔ mɔdenle.” Ɛhye kile kɛ Nyamenle sunsum nwuanzanwuanza ne bahola aboa yɛ yeamaa yɛamia yɛ nwo yɛayɛ mɔɔ ɔwɔ kɛ yɛyɛ la. Ɔti Nyamenle sunsum ne bahola aboa yɛ yeamaa yɛahulo yɛ nwo ngoko na yɛava yɛ gɔnwo mɔ ɛtane yɛahyɛ bɛ bɔkɔɔ. Ɛhye ati, yɛfi yɛ ahonle nu yɛsɛlɛ Gyihova kɛ ɔboa yɛ.—Luku 11:13.

“ƆNLE KƐ MGBAKYEMGBAKYENU BA BƐ AVINLI”

13. Duzu a bahola akpakyekpakye yɛ nu a?

¹³ “Menli ngakyile kɔsɔɔti” mɔɔ bɛlɛ amaamuo ngakyile la a wɔ asafo ne anu a. (1 Tim. 2:​3, 4) Kɛmɔ asolo yɛ nuhua ko biala la ati, saa yɛannea boɛ a kpɔkɛ mɔɔ awie mɔ basisi wɔ tɛladeɛwulalɛ nee anwoziezielɛ, ayileyɛlɛ anzɛɛ anyelielɛ ninyɛne nwo la bahola ava mgbakyemgbakyenu ara yɛ avinli. (Wlo. 14:4; 1 Kɔl. 1:10) Kɛmɔ Nyamenle ɛhilehile yɛ kɛ yɛhulo yɛ nwo ngoko la ati, ɔwɔ kɛ yɛnea boɛ na yɛanyɛ kyengye kɛ yɛ kpɔkɛzilɛ ɛdeɛ ne le kpalɛ tɛla awie biala.—Fel. 2:3.

14. Duzu a dahuu ɔwɔ kɛ yɛbɔ mɔdenle kɛ yɛbayɛ a, na duzu ati ɔ?

¹⁴ Saa dahuu yɛmaa awie mɔ ahonle tɔ bɛ azule nu na yɛmaa bɛ anwosesebɛ a, ɔnrɛmaa mgbakyemgbakyenu ɛnrɛra asafo ne anu. (1 Tɛs. 5:11) Kenlensa ye, menli dɔɔnwo mɔɔ bɛgyakyile debiezukoalɛ nee daselɛlilɛ ɛhɔlɛ anzɛɛ bɛyele bɛ bɛvile asafo ne anu la ɛzia ɛra. Yɛfa anyelielɛ yɛdie bɛ kɛnlɛma! (2 Kɔl. 2:8) Nea mɔɔ ɔdole adiema raalɛ bie mɔɔ ɔgyakyile debiezukoalɛ nee daselɛlilɛ ɛhɔlɛ too ɛvolɛ bulu na yeazia yeara la. Ɔhanle kɛ, “Awie biala dele ɔ nyunlu hilele me na bɛzomanle me.” (Gyi. 3:19) Kɛzi atiakunlukɛnlɛma nyɛleɛ ngyikyi zɔhane mɔɔ bɛlale ye ali bɛhilele ye la hanle ye ɛ? Ɔhanle kɛ, “Ɔmaanle mendele nganeɛ kɛ Gyihova ɛlɛboa me yeamaa me nye alie bieko.” Saa yɛmaa awie biala anwosesebɛ a, Kelaese bahola ava yɛ ali gyima yeamaa yɛaboa “bɛdabɛ mɔɔ bɛvɛ na bɛzo adesoa la” yeamaa bɛ ahonle adɔ bɛ azule nu.—Mat. 11:​28, 29.

15. Duzu bieko a yɛbahola yɛayɛ yɛamaa koyɛlɛ adɛnla asafo ne anu a? (Eza nea nvoninli ne.)

¹⁵ Yɛ ɛdendɛlɛ le adenle bieko mɔɔ yɛbahola yɛalua zo yɛamaa koyɛlɛ adɛnla asafo ne anu a. Dwobu 12:11 hanle kɛ: “Asoo tɛ ɛnzolɛ a sɔ edwɛkɛ nea a, kɛ mɔɔ ɛtafinlimalɛ sɔ aleɛ nea la ɔ?” Kɛ mɔɔ dahuu awie mɔɔ ze aleɛ to kpalɛ la dimoa sɔ ye aleɛ ne bie nea kɛ saa ɔyɛ fɛ a kolaa na yeade bie yeamaa awie mɔ la, zɔhane ala a ɔwɔ kɛ yɛdayɛ noko yɛdimoa yɛdwenle edwɛkɛ mɔɔ yɛbaha la anwo kpalɛ kolaa na yɛaha a. (Edw. 141:3) Ɔwɔ kɛ dahuu yɛfa yɛyɛ yɛ bodane kɛ yɛbaha edwɛkɛ mɔɔ “nvasoɛ wɔ zo maa bɛdabɛ mɔɔ bɛtie la” amaa yɛamaa bɛ anwosesebɛ na yɛamaa bɛ ahonle adɔ bɛ azule nu.—Ɛfɛ. 4:29.

16. Nwane mɔ titili a ɔwɔ kɛ bɛmaa bɛ edwɛkɛ maa anwosesebɛ a?

¹⁶ Ɔwɔ kɛ kunlima nee awovolɛ titili nea kɛ bɛbaha edwɛkɛ mɔɔ maa anwosesebɛ la. (Kɔl. 3:​19, 21; Tae. 2:4) Kɛ mɔɔ asafo nu mgbanyima le mboaneneavolɛma la ati, ɔwɔ kɛ bɛdabɛ noko bɛmaa bɛ ɛdendɛlɛ maa Gyihova mboane ne anwosesebɛ. (Aye. 32:​1, 2; Gal. 6:1) Baebolo ne anu ɛrɛlɛ bie kakye yɛ kɛ: “Edwɛkɛ mɔɔ bɛkɛha ye mekɛ mɔɔ fɛta la—nea kɛzi ɔle kpalɛ a!”—Mrɛ. 15:23.

BƐMAA YƐHULO MENLI “WƆ NYƐLEƐ NEE NƆHALƐ NU”

17. Kɛ ɔkɛyɛ na yɛanwu kɛ ɛlɔlɛ mɔɔ yɛlɛ yɛmaa yɛ mediema la vi yɛ ahonle nu ɛ?

¹⁷ Ɛzoanvolɛ Dwɔn maanle yɛ anwosesebɛ kɛ “bɛmmamaa yɛfa yɛ edwɛkɛhanlɛ anzɛɛ yɛ nloa mgbane yɛkulo menli, emomu bɛmaa yɛyɛ ye wɔ nyɛleɛ nee nɔhalɛ nu.” (1 Dwɔn 3:18) Yɛkulo kɛ ɛlɔlɛ mɔɔ yɛlɛ yɛmaa yɛ mediema la fi yɛ ahonle nu. Kɛ ɔkɛyɛ na yɛahola yɛayɛ ye zɔ ɛ? Saa yɛnyia mekɛ dɔɔnwo yɛ nee yɛ mediema tu a, ɔmaa yɛbikye bɛ kpalɛ na yɛnyia bɛ nwo ɛlɔlɛ kpole. Ɔti kpondɛ nwolɛ adenle ɛ nee ɛ mediema ɛbɔ nu ɛyɛ ninyɛne—kɛ neazo la, debiezukoalɛ bo nee daselɛlilɛ nu. Nyia mekɛ kɔkpɔla awie mɔ. Saa yɛyɛ ye zɔ a, yɛmaa ɔda ali kɛ ‘Nyamenle ɛhilehile yɛ kɛ yɛhulo yɛ nwo ngoko.’ (1 Tɛs. 4:9) Na ɛhye bamaa yɛanwu “kɛzi ɔle kpalɛ nee kɛnlɛma kɛ mediema babɔ nu adɛnla wɔ koyɛlɛ nu!” la.—Edw. 133:1.