Lera Sa Zū Nɛɛ

Luk 1:3

TƐƐ̄NYƆƆ: Su pya nu elua egbītɛ̄ muɛ̄ kɔ a lu kaka yeābah nɛ pya a gaa a gbaɛ̄tɔ̄ kɔ ba a dābeeloo nu o gaa kɔ.

KƐ̄ EDOO DOO:

• Su ue aā kɛ̄ elua egbī muɛ̄ kɔ a lu kaka sa lera. Doo kɔ o ue a dɛɛa nyɔɔ Muɛ̄ Ue Bari, sa buū Baibol sɔ̄ a bɔloo. Lo o gaa kɔ ue saɛns, nu a sira aā, nu a bee sira loo nɛɛ, ale pya dɔɔ̄na nu a yere kpotɛ̄ ue, dasī gbītɛ̄ sɛh lo ue luge kaka sa bɔloo edɛɛa nyɔɔ.

• Kɔ ue a yere kpotɛ̄ nu bu sīdee a bɔloo. Baatɛ̄ kpa kaɛ doo kɔ a gbaaloo nu a gaa lu ekɔ ue kumaloo, nu yube ue a le bu Baibol gaa kɔ ue kumaloo, le nu elua e’ɛm sere kɛ̄ tɛ̄mabah pya “zooro a bɔloo eture nyiɛ loo sa suā nu.” (Mat 24:45) Lo o kɔ ue a aabu dɔɔ̄na kpa a naale Baibol, kɔ doo kɔ a gbaaloo ekɛɛrɛ nɛɛ a bee ɛm lo ue sa o aa nyaana lɔgɔ nu bu.

• Nyɔɔnɛ pya o gaa kɔ ue nɛ ɛrɛ ekɛɛrɛ. Sɔ̄ elua ebuū dɔ kpa kaɛ ale kɔ kɛ̄ lo ue aa sah, su kari bima ebip ale nɛā edoba loo nu o gaa kɔ lo eyerebah nɛ pya a gaa a gbaɛ̄tɔ̄ kɔ ba a dābeeloo nu o gaa kɔ.