Ekɔ A Ɛrɛge Nu O Dap Sikɛ̄ Nɔ Aāloo Pya Ewɛpbah Tɔgɛnu Baibol Ni?

1. A bee a ɛrɛ pah nyɔɔ doodoo wa tua sɔ̄ o bee nɔ pya ewɛpbah tɔgɛnu Baibol ni?

PYA ewɛpbah tɔgɛnu Baibol i bee nɔ edora kɔ i dum a nyaa. Bu edobah, sɔ̄ i bee dasī nɔ kɔ bee Bari kura Jɛhova, i bee bɔātɛ̄ eyii ye gbo. (Ais 42:8) Sɔ̄ i bee nɔ nu akiiloo kɛ̄tɔɔ̄ pya e’ua, ii bee kɛɛrɛna kɔ pya i nɛɛ i wereloo lo ba ebee u gaa tɔga. (Eklis 9:10) E sɔ̄ i bee nɔ nu akiiloo yii Bari eyira kiiloo Paradais a kɛ̄nɛkɛ̄, ii bee ɛrɛna gbɛnɛ ekɛɛrɛ akiiloo deesī. I bee suā sa yiga leere kɔ, ii le etɔɔ̄na dum bu aba ziī nwīkere sɔ̄—bu aba 70 ale 80 zua—mɛ i gaa le biɛ̄ dum, sa tɔɔ̄ mmɛ deedee.—Yɔɔ 37:29; 90:10.

2. Bu mɛ sīdee na 2 Pita 1:​12, 13 tɔgɛ kɔ kere Pya Nɛɛ Kraist enyima agaloo bu edɔɔ̄ dapnage ɛrɛ biī aāloo pya ewɛpbah tɔgɛnu Baibol a?

² Ii ɛrɛ e’ɛp pya ewɛpbah tɔgɛnu Baibol kumakɛ̄ doo pippip. A bee le Pya Nɛɛ Kraist lo ba bee “yira agɛrɛ bu yira” na nɛɛ lɛɛratam Pita bee ɛm ye baɛ kpa ma a. (Buū 2 Pita 1:​12, 13.) Pio nɛɛ a bee le bu bɔŋanaloo lo sɔ̄ bee lu bag sa gbī ekiira pya wuga lɛɛ loo kaka, tɛ̄maloo esah-esah tɔgɛnu. (2 Pit 2:​1-3) Pita bee gbī eyere mɛm loo sa yerebah nɛ pya ye wuga nɛɛdam le nɛɛwa lokwa ba dap kiī pya lo esah-esah tɔgɛnu. Lokwa a dap doo wo, a bee wa nyɛŋiabu pio ewɛpbah tɔgɛnu Baibol ba ebee nɔ. Pya tɔgɛnu ama gaa le yerebah wa nɛ kɔ ba a kiisī lo etɔɔ̄ agara mmɛ kuma.

3. Naa nɛ edobah nu anua dɛ̄dɛɛ̄ Pya Nɛɛ Kraist ekiisī lo e’ɛrɛ ekɛɛrɛ nyɔɔ pya ewɛpbah tɔgɛnu Baibol.

³ Kuma sɔ̄ i gaa nyim agaloo bu edɔɔ̄, i dap le gaa nɔ aā aā nu aāloo pya ewɛpbah tɔgɛnu Baibol. Bu edobah: Ziī nɛɛ a para bui nu dap su keekee nu būmanu būma ziī bee nuede, e dɔɔ̄na nɛɛ a sii para bui nu sunage aba pya lo nu būmanu būmanage aba lo bee nuede, kerewo, sɔ̄ baɛ aba ebura sah, nuede lo nɛɛ a para bui nu a ekpe ee lo nɛɛ a sii para bui nu a, nyɔnɛbee alɛ enɔā sa suā keekee kari esu būma lo nuede bu sīdee edoo kɔ a kpe. Bu aba lo sīdee, nu pya etaāŋabah Jɛhova bu nyɔɔnyɔɔ sɔ̄ nɔ aāloo pya ewɛpbah tɔgɛnu Baibol dap lu kee loo lo pya a gaa aā enɔ Baibol. Ena anua a? Nyɔɔbee pio kɛ̄tɔɔ̄ ba etɛ̄nabu ale keekee tam ba esia bu esiatam Jɛhova aā sɔ̄ ba bee liamaā. Sɔ̄ i kɛɛrɛ nu akiiloo pya tɔgɛnu Baibol i bee nɔ sɔ̄ akii adumɛ, i dap muɛ pya aā aā nu i dap nɔ aāloo lo eyerebah i nɛ. Dooraa i naa ɛp nu Pya Nɛɛ Kraist enyima agaloo dap nɔ aāloo taa ewɛpbah tɔgɛnu Baibol.

JƐHOVA NA NƐƐ DƐMNU A

4. A ɛrɛ i pah nyɔɔ doodoo wa sɔ̄ i nɔ kɔ Jɛhova na alu Nɛɛ Dɛmnu a?

⁴ “Nɛɛ a wu dɛ̄dɛɛ̄ nu na Bari.” (Hib 3:4) I suā kɔ i planɛt le dɛ̄dɛɛ̄ nu a le dum a ye le nyɔɔ bee lu edɛm tɛ̄mabah Nɛɛ Dɛmnu lo a ɛrɛ ekpo sa suānu ee dɛ̄dɛɛ̄ nɛɛ. Alɛ na a bee i dɛm a, nyɔɔwo a suā i loo kaāna. A kuū i dɛɛ̄loo sa suā taɛ nu elee i loo kaāna. Sɔ̄ i suā ewɛpbah kaka ue ama, kɔ Jɛhova na a bee dɛm dɛ̄dɛɛ̄ nu a, edora kɔ i dum a nyaa bu gbɛnɛ-edo sīdee sa doonage kɔ i dum a dɔ kaāna biī i nɛ.

5. Ena edap doo kɔ i kumalookɛ̄ a? (Aisaia 45:​9-12)

⁵ Susuā kɔ Jɛhova na a bee dɛm dɛ̄dɛɛ̄ nu a dap doo kɔ i kumalookɛ̄. Bu edobah, a ɛrɛ sɔ̄ Job bee kɔ pio nu a naa lu kaka kumaloo Jɛhova, a bee ibere nu a kuī kaāna sa kɛɛrɛ nu akiiloo aba ɛɛ, sa gbī etɔgɛ kɔ dɛ̄dɛɛ̄ nu alɛ doo lera. Kerewo, Jɛhova bee ye nyɛŋiabu kɔ alɛ na a eenyɔɔ dɛ̄dɛɛ̄ nu sa lunage Nɛɛ Dɛmnu a. (Job 38:​1-4) Nu Jɛhova bee nyɛŋiabu Job ama bee ye yerebah nɛ kɔ a muɛ kɔ kɛ̄ Bari doo nu doo kii nyɔɔ eekɛ̄ miɔŋɔ nɛɛ doo nu doo. Sɔ̄ esaa, nɛɛ mɔmanudɛɛ̄ Aisaia bee ɛm kumaloo ue ama kɔ: “Baɛ̄ dapge kɔ nɛ nɛɛ a ye kwa, ‘E na o gaa kwa ani?’”—Buū Aisaia 45:​9-12.

6. Mɛ sɔ̄ na a kuī kɔ i kɛɛrɛ kɛ̄ i Nɛɛ Dɛmnu suānu sa ɛrɛ ekpo ee dɛ̄dɛɛ̄ nɛɛ doo a? (Ɛpnage foto.)

⁶ Sɔ̄ ziī Nɛɛ Kraist etaāŋabah Jɛhova bu gbɛnɛ-edo zua, a dap bɔātɛ̄ edɛrɛ nyiɛ nyɔɔ alɛ ekɛɛrɛ beenyiɛ taā a gbī leredee aābah Jɛhova le bu ye Muɛ̄ Ue. (Job 37:​23, 24) Mɛ, ena esira lo a le lo nɛɛ kɛɛrɛ kɛ̄ Nɛɛ a bee ye dɛm ɛrɛ gbɛnɛ suānu sa kuī bu sīdee a naa ɛrɛ lɔgɔ nɛɛ o dap ye su dooreloo a? (Ais 40:22; 55:​8, 9) Edoo kɔ a kumalookɛ̄ sa muɛ kɔ ekɛɛrɛ Jɛhova lera ee lo alɛ.

7. Ena Rahela bee doo lokwa a dap su baɛbah suā aā leredeebah a?

⁷ Sɔ̄ Rahela a tɔɔ̄ Slovenia kɛɛrɛ kɛ̄ Jɛhova lu Nɛɛ Dɛmnu doo, a bee ye yerebah nɛ kɔ a su kwabahloo nu a bee lu edoo bu bɔŋanaloo Jɛhova. Rahela kɔ: “Pio sɔ̄ a naa wee mɛ waɛbah esu biaɛfii ale kwabahloo nu alu edoo tɛ̄mabah pya a gaa su zaāsī. Bu edobah, kere sɔ̄ m e’ɛba #8 Ue A Aabah Eku A Baɛbee Loo 2023 akiiloo seea firi bɛp, a bee mɛ lu ziī dua loo sa mɛ bɛā tua sɔ̄ m bee muɛ wuga nɛɛdam firi le bɛp a gaa nɛ ekɔaue. Nyɔɔwo, m bee yere kara nɛ Jɛhova lokwa m dap su baɛbah suā nyaa ama.” Sɔ̄ esaa, Rahela bee muɛ kɔ Jɛhova suā kɛ̄ eleredeebah ye bɔŋanaloo doo bu sīdee a lee eera nyɔnɛbee alɛ na a bee dɛm bunyɔɔ le kɛ̄nɛkɛ̄ a. Lo o muɛ kɔ a gaa a agaloo enyɔɔnɛ aā edaābeeloo nu ale su aā leredeebah, piiga lo esu sɔ̄ ɛā ekɛɛrɛ nyɔɔ kɛ̄ Nɛɛ Dɛmnu suānu sa ɛrɛ ekpo doo.—Rom 11:​33-36.

NU ANUA BARI LƐƐTƆDEE MƆNA TƆGA

8. A dɔbiī i nɛ doodoo wa sɔ̄ i nɔ sa suā nu anua Bari lɛɛtɔdee mɔna tɔga?

⁸ Ena anua Bari lɛɛtɔdee mɔna tɔga a? Pio pya a naa suā ture ebip ama ɛrɛ saŋ kiikɛ̄ Bari le sa kɔ kpaɛ̄ kɔ Bari naa le doo pippip! (Kam 19:3) Mɛ bu kiiyasī, olo enɔā sa suā kɔ nu a gaa doo kɔ i tɔga na pɔrɔ le i kɛ̄tɔɔ̄ kɔ ii mmana lo i ɛrɛ aābah i tua tɛ le ka Adam le Iv, e a naale Jɛhova. O enɔānage kɔ kɛ̄ Jɛhova ɛrɛ egerebu loo pya miɔŋɔ nɛɛ doo edoora kɔ gbɛnɛ-edo miliɔn pya nɛɛ a nɔ nu a ye kiiloo, sa suā kɔ Jɛhova e’mmɛ kuma loo tɔga mmɛ deedee. (2 Pit 3:​9, 15) Pya kaka ue ama egbɔā a nyiɛ kaāna sa a zuura nwamaloo Jɛhova.

9. Bu pya amunu kɛ̄tɔɔ̄ na i dap kɛɛrɛ nu anua Jɛhova lɛɛtɔdee mɔna tɔga a?

⁹ I suā kɔ alu ebɛɛ̄ kɔ i ɛrɛ egerebu kuma sɔ̄ i gaa yira baɛ sɔ̄ Jɛhova e’mmɛ kuma loo mɔna tɔga. Sɔ̄ nɛɛ i wereloo u, ale sɔ̄ ili ale pya i butɔ le bu taāŋa, ale alu e’aara i bu pɔrɔ sīdee, bu i dap biira sa i bura kɔ Jɛhova aa pee sɔ̄ lo e’mmɛ kuma loo mɔna tɔga. (Hab 1:​2, 3) Bu pya sɔ̄ a le doo wo, a bɔloo kɔ i kɛɛrɛbu nu anua Jɛhova lɛɛtɔdee kɔ pya kaāna dogo a mɔna tɔga.a (Yɔɔ 34:19) I dapnage kɛɛrɛ nu Jɛhova enɔɔna lo e’mmɛ kumaloo mɔna tɔga mmɛ deedee.

10. Ena a bee yerebah nɛ Anne sɔ̄ ye ka bee u a?

¹⁰ Sɔ̄ i suā nu anua Jɛhova lɛɛtɔdee mɔna tɔga dap i yerebah nɛ kɔ i egerebu. Anne a tɔɔ̄ buɛ̄ Mayotte lo gbɛnɛ pɛnɛ a kura Indian Ocean tɛɛ̄ ɛŋɛnɛ kɔ: “Sɔ̄ na ka bee u, m bee to gbɛnɛ. Kereadoo pio zua etɛ̄na aā lo sɔ̄, a lege gaa mɛ kiɛ̄ mmɛ nyaawo. Kerewo, aā ziī sɔ̄ yii ziī, m wee nyɛŋiabu aba mm kɔ a naale Jɛhova na a gaa doo kɔ i tɔga a. A taɛ Jɛhova lo elɛɛ dɛ̄dɛɛ̄ tɔga sa lɛɛ pya i nɛɛ kɛ̄ bu luh. Sɔ̄ m kɛɛrɛ pya kaka ue akiiloo mɔna tɔga, a wee mɛ agɛrɛloo sa doonage kɔ loo mɛ a sukɛ̄.”

11. Bu mɛ sīdee na pya nu anua Jɛhova lɛɛtɔdee mɔna tɔga dap i yerebah nɛ kɔ i kiisī lo ezue ue a?

¹¹ Sɔ̄ i suā nu anua Bari lɛɛtɔdee mɔna tɔga, a dap i zū kɔ i kiisī lo ezue ue. Sɔ̄ Pita ebaaratɛ̄ kɔ egerebu Jɛhova ɛrɛ doo kɔ pya nɛɛ a ɛrɛ dee lo ekiiya sa ɛrɛ kpɔā, a bee ɛm yereloo kɔ: Kɛɛrɛaa “dua nɛɛ . . . bɔɔlo ɛrɛ elu bu bui dum a le kaɛ le lo enwadɛɛ̄ Bari.” (2 Pit 3:11) Ziī nu a le yɛɛ pya nu a nɛ “enwadɛɛ̄ Bari” na i tam zue le yereue. I wereloo pya nɛɛ dookɛ̄ i Tɛ Jɛhova wa werenage loo doo. I gbī kɔ ba a yiibu aā nyɔuwe Bari. Jɛhova gaa egerebu lokwa pya nɛɛ a le kɛ̄ o tɔɔ̄ dap ɛrɛ dee lo etaāŋa ye bah. Naa ɛp gbɛnɛ dee o ɛrɛ lo elu nɛɛ a nyɔɔnɛ Bari siniātam sa yerebah nɛ gbɛnɛ-edo nɛɛ kɔ ba a nɔ nu a ye kiiloo lɛɛ kuma gae lu a!—1 Kɔr 3:9.

I GAA TƆƆ̄DUM BU “KPƐDUMƐ DEE”

12. Bu mɛ sīdee na a i dɔbiī nɛ sɔ̄ i suā kɔ i gaa tɔɔ̄ bu “kpɛdumɛ dee” a?

¹² Baibol baatɛ̄ leere kɛ̄ pya nɛɛ etɔɔ̄dum doo bu “kpɛdumɛ dee.” (2 Tim 3:​1-5) Dooa gbɔ̄mɛɛ̄ pya mɔmanudɛɛ̄ ama naale kɛ̄ a binia, i gaa muɛ bu tɔɔ̄dum pya nɛɛ ziī ziī biradee. Sɔ̄ i muɛ kɛ̄ elap dogo pya nɛɛ aa gbasu doo, a doo kɔ i agɛrɛbah suā sa yiga leere kɔ Muɛ̄ Ue Bari bɔloo edɛrɛ nyiɛ nyɔɔ.—2 Tim 3:​13-15.

13. Dɛɛa nyɔɔ kam Jizɔs a le bu Luk 12:​15-21, pya amunu ebip na i dap bip aba ii a?

¹³ Susuā kɔ i gaa tɔɔ̄dum bu kpɛdumɛ dee eyerebah i nɛ kɔ i su i sɔ̄ daānu leere. I dap nɔ nu anua a bɔloo kɔ i su i sɔ̄ daānu leere aāloo kam Jizɔs bee nɛ lo a le bu kpa Luk 12:​15-21. (Buū.) Ena anua a bee lu esu lo nɛɛ mɛnɛ kure “ezu” a? Naale nyɔɔbee lo gbara bee ɛrɛ gbɛnɛkpo zɔ, mɛ nyɔɔbee pya nu a bee ye kuīloo bee lu nu a naa bɔloo e’ɛp nua tuatua bu dum. A bee “bɔŋɛnɛloo zɔ nɛ ye loo, e a naa lu mɛnɛ kɛ̄ Bari le.” Ena anua a bee lu ebɛɛ̄ kɔ a nwaabah su ye sɔ̄ daānu leere a? Ye ture sira bu ue Bari bee kɔ nɛ lo nɛɛ mɛnɛ, kɔ: “Uunɛ ama na o piogi elu egbī a aābah” a. Nii’ee, kuma sɔ̄ kuma lo nyɔuwe ama gaa tɔɔ̄ waɛloo kɛ̄ a, i dap bip aba ii kɔ: ‘Ekɔ pya nu m seeasī tɔgɛge kɔ m gaa su na sɔ̄ daānu leere ni? Pya e na m gaa zū pya na nwiī kɔ ba a su seeasī a? Ekɔ tua nu m gaa su na mɛm, na sɔ̄, le pya nu m ɛrɛ daā na lo ekpoogeloo zɔ nɛ na loo sɛh lo ekpoogeloo zɔ li bunyɔɔ ni?’

14. Dookɛ̄ nu a bee siraloo Miki tɔgɛ doo, ena anua a bɔloo kɔ i kɛɛrɛ nu akiiloo pya nu a le bu Baibol a tɔgɛ kɔ i gaa tɔɔ̄ bu kpɛdumɛ dee a?

¹⁴ Sɔ̄ i kɛɛrɛ nu akiiloo pya nu a tɔgɛ kɔ bu kaka i gaa tɔɔ̄dum bu kpɛdumɛ dee, a dap i yerebah nɛ kɔ i suā kɛ̄ i dap su i dum daānu leere doo. Taɛ nu a bee siraloo ziī wuga nɛɛwa a kura Miki lo. Miki bee kɔ: “Sɔ̄ m bee aa secondary school, nu a bee mɛ taɛ enɔ na nu akiiloo nam. M bee seeanage sī lo esɛmdee bu mmɛ sɔ̄ le lo ekiikɛ̄ ebɛɛ̄ pya zue ue le. Pio pya wuga nɛɛdam le nɛɛwa a agaloo bu edɔɔ̄ bee mɛ kɔ nɛ kɔ m kɛɛrɛ kaāna lo a le ewaɛge kɔ m si gbɛnɛ tɔkpa sa aba lo sɔ̄ m lunage nɛɛ sɛmdee ale kiikɛ̄ ebɛɛ̄ pya zue ue le. Ba bee mɛ nyɛŋiabu kɔ sɔ̄ sɔ̄ naa binia, nyɔuwe ama gaa le ina kuma. Ba bee mɛ nyɛŋianage bu kɔ bu aā nyɔuwe, m gaa le ɛrɛ dee lo enɔ nu akiiloo dɛ̄dɛɛ̄ nam mmɛ deedee. Nyɔɔwo, m bee biaɛfii kɔ mm le esiena gbɛnɛ tɔkpa wee nɔ nu akiiloo nam, taāwo m nɔ pya dɔɔ̄na nu a naale esu mɛ gbɛnɛkpo sɔ̄ bah, le lo edoo kɔ m ɛrɛ pio kari m dap su daānu bu na dum. Lo ama bee doo kɔ m ɛrɛ tam m dap su yeābah nɛ aba mm bu na tam sɛmdee, e sɔ̄ m esaa, m bee kii Ecuador kɛ̄ ebɛɛ̄ pya zue ue le.” Nyaawo, Miki le ye dam aa sitam doodoo pya kuūdɛɛ̄loo sɛkuit bu lo edo.

15. Bu mɛ sīdee na edobah Jems i yerebah nɛ kɔ i muɛ nu anua a bɔloo kɔ i aa ɔɛloo i kiiloo pya nɛɛ a sii tɔgɛ taɛ bu le yereue anyaawo a? (Ɛpnage foto.)

¹⁵ A naa bɔloo kɔ loo i a ɔ sɔ̄ pya nɛɛ naa gbaɛ̄tɔ̄loo le yereue. Pya nɛɛ dap nyaa ɛrɛgebah sɔ̄. Naa ɛp nu a bee siraloo wuga Jizɔs a kura Jems. A bee muɛ sɔ̄ Jizɔs aa nyim aakɛ̄ mmɛ sɔ̄ alu Mɛsaia, sa tɔgɛnu bu sīdee lɔgɔ nɛɛ sii bee dap tɔgɛ. Kerewo, bu gbɛnɛ-edo zua Jems naa bee nyɔɔnɛ dumɛ Jizɔs. A bee le sɔ̄ Jizɔs e’aarakɛ̄ bu luh na ye wuga Jems ama bee lu nɛɛ a ye nyɔɔnɛ dumɛ a, e a naale aba kɔ a nyɔɔnɛ ye dumɛ, mɛ a bee ɛrɛ gbɛnɛ mɛm!b (Jɔn 7:5; Gal 2:9) A bɔloo kɔ i kiisī lo ezue ue nɛ pya i manamana a sii su kaka, e a bɔnage loo kɔ i kiisī lo ezue ue nɛ pya a naa bee gbaɛ̄tɔ̄ tua sɔ̄ i bee wa zue ue nɛ, sa loo i aa ɔ. O aa ibere kɔ i gaa tɔɔ̄dum bu kpɛdumɛ dee, nyɔɔwo, i tam zue le yereue lu gbaragbara kaāna. Pya nɛɛ dap kɛɛrɛ nu akiiloo nu o bee wa kɔ nɛ sɔ̄ akii adumɛ sa doo dogo kumaloo sɔ̄ ba esaa, ba dap doo wo kere sɔ̄ gbɛnɛ etɛɛrɛloo ebɔātɛ̄.c

KIISĪ LO ETƆGƐ NIALOO PYA NU JƐHOVA AA I TƆGƐ

16. Pya nu Jɛhova aa i tɔgɛ edɔabiī nɛ olo doodoo wa? (Ɛpnage ekpo a kɔ “Su Wa Yeābah Nɛ Pya Dɔɔ̄na.”)

¹⁶ Pio nu i gaa nɔ bu bɔŋanaloo Jɛhova bee lu enɔɔ bu sīdee a dap yerebah nɛ pya nɛɛ a sii suā gbɛnɛ-edo nu a le bu Baibol. Bu edobah, ekɔaue taɛkɛ̄ a wee lu enɛ bu ziī ziī kaɛ, pio ekobee ue le vidio a le nyɔɔ jw.org, le pya i magazin i wee nɛ bie uwe zue ue wee lu ekwa nɛ pya a naale Pya Ekeebee. Kerewo, ili wee ɛrɛnage biī aāloo. Pya nu ama wee doo kɔ wereloo i ɛrɛ loo Jɛhova le yira i ɛrɛ bu ye Muɛ̄ Ue a agɛrɛbah agatɛ̄, sa i yerebah nɛ kɔ i para tɔgɛ Baibol pya dɔɔ̄na.—Yɔɔ 19:7.

17. Pya ena edap doo kɔ o kɛɛrɛ nu akiiloo pya ewɛpbah tɔgɛnu Baibol a?

¹⁷ Bu ili Pya Ekeebee Jɛhova wee ɛɛ sɔ̄ i ɛrɛ ziī aā edaābeeloo nu akiiloo ziī kaka ue Baibol. Kerewo, pya ewɛpbah tɔgɛnu Baibol a bee doo kɔ i su kaka ue wee i nia kaāna. Dookɛ̄ i enɔā doo, pya kaka ue ama dapnage i yerebah nɛ anyaawo. Sɔ̄ bɔŋanaloo i nɛ leredeebah sa ili kɛɛrɛ kɔ kɛ̄ ili ɛp nu doo ale doo nu doo lee ee lo bɔŋanaloo i nɛ, elee i kumalookɛ̄ sa nyɛŋiabu kɔ Jɛhova alu i Nɛɛ Dɛmnu lo a suānu sa ɛrɛ ekpo ee dɛ̄dɛɛ̄ nɛɛ na alu nɛɛ a gaa leredeebah bɔŋanaloo ama a. Sɔ̄ ili ale ziī nɛɛ i wereloo le bu taāŋa, i dap egerebu sa kɛɛrɛ nu anua Jɛhova lɛɛtɔdee mɔna tɔga. E sɔ̄ i gaa biaɛfii nu i su i sɔ̄ le pya nu i ɛrɛ daā, elee i suā kɔ sɔ̄ i tɔɔ̄ ama lu gbaragbara. Naa lege bee pya nu Jɛhova aa i tɔgɛ kiisī lo eyere i mɛm loo, doo kɔ i ɛrɛ suānu, sa i zū kɔ i kiisī lo etaāŋa ye bah leere.