Suā Kɔ Jɛhova Enɛ A Egbɔ̄nyiɛ

1. Naa baātɛ̄ kɛ̄ kɛ̄tɔɔ̄ pya Juu a bee le bu zooro bee mɛā doo.

NAA kɛɛrɛbu kɛ̄ nu bee tɔɔ̄loo pya Juu a bee le bu zooro li Babilɔn doo. Ba bee muɛ sɔ̄ a bee lu egbeesī wa buɛ̄. Nyɔɔbee wa pɔrɔ le pɔrɔ pya wa nama tɛ̄, a bee lu e’aa wa aā wa buɛ̄ kuma dɔɔ̄na buɛ̄. (2 Edoo 36:​15, 16, 20, 21) Kerewo, ba bee lu puɛ lo edoo pio nu ba wee doo sɔ̄ ba bee le wa buɛ̄. (Jer 29:​4-7) Mɛ dum naa bee wa waɛbah, e a naale buɛ̄ ba bee gbī ele lo. Wa kɛ̄tɔɔ̄ bee wa tɔɔ̄loo doodoo wa? Yere nukuādɛɛ̄ loo nu ziī aba bee kɔ: “Kpaɛ̄ dɛ̄dɛɛ̄ maā Babilɔn, lo kɛ̄ na i bee ɛŋɛtɛ̄kɛ̄ sa toto a, sɔ̄ i bee nyɛŋiabu Zaion.” (Yɔɔ 137:1) Pya a bee le bu zooro ama lo ba bee le bu biirabu bee gbī egbɔ̄nyiɛ. Mɛ, mɛ kɛ̄ na ba edap ɛrɛ aā a?

2-3. (a) Ena Jɛhova bee doo nɛ pya Juu a bee le bu zooro a? (b) Ena i gaa le nɔ bu ekobee ue ama a?

² Jɛhova na “Bari a wee nɛ egbɔ̄nyiɛ a.” (2 Kɔr 1:​3, NWT.) Doodoo Bari a ɛrɛ wereloo, a taɛ ye lo egbɔ̄nyiɛ dɛ̄dɛɛ̄ pya a ye tɔɔ̄ waɛloo. Jɛhova bee suā kɔ sɔ̄ esaa, ekiɛ̄ pio pya a bee le bu zooro ama kɔ ba bee ye lɛɛbeekɛ̄, e ba e’obia ye lu loo. (Ais 59:20) Nyɔɔwo, nu a eeloo 100 zua lɛɛ ba gae aa wa kuma bu zooro, Jɛhova bee nɛ ye edɔɔ̄ nɛɛ mɔmanudɛɛ̄ Aisaia kɔ a ɛm kpa ye bee kuealoo. Nyɔɔ e ni? Aisaia ɛm kɔ: “‘Agɛrɛaa beenyiɛ, agɛrɛaa beenyiɛ pya mdaa nɛɛ,’ bui Bari kɔ.” (Ais 40:1) Bu kaka, tɛ̄maloo nu lo nɛɛ mɔmanudɛɛ̄ bee ɛm, Jɛhova bee nɛ egbɔ̄nyiɛ a bɛɛ̄ pya Juu a bee le bu zooro.

³ Doodoo pya Juu a bee le bu zooro, egbɔ̄nyiɛ bɛɛ̄nage ili aā ziī sɔ̄ yii ziī. Bu ekobee ue ama, i gaa le nɔ kɛ̄ Jɛhova bee gbɔ̄nyiɛ pya a bee le bu zooro doo: (1) A bee yira yii lo e’aaloo pɔrɔ nɛ pya a kiiya, (2) a bee nɛ bɛābu pya ye nɛɛ, sa (3) a bee doo kɔ ba aa ɛrɛna bɔɔ. Kuma sɔ̄ i gaa kɔ ue nyɔɔ taa kpog-bee ue ama, yere nukuādɛɛ̄ loo kɛ̄ i dap ɛrɛ biī aāloo pya ue egbɔ̄nyiɛ Jɛhova bee kɔ nɛ pya nɛɛ a bee le bu zooro ama doo.

JƐHOVA AALOO PƆRƆ I NƐ

4. Bu mɛ sīdee na Jɛhova bee tɔgɛ kɔ a lue Bari toesaɛ̄ a? (Aisaia 55:7)

⁴ Jɛhova lu “Bari dɛ̄dɛɛ̄ toesaɛ̄.” (2 Kɔr 1:3) A bee tɔgɛ elap dogo ama sɔ̄ a bee yira yii kɔ e’aaeloo pɔrɔ nɛ pya a kiiya yɛɛ pya a bee le bu zooro li Babilɔn. (Buū Aisaia 55:7.) A bee kɔ: “Mɛ tɛ̄maloo wereloo a naa wee tah m gaa le ɛrɛ a toesaɛ̄ nyɔɔ.” (Ais 54:8) Bu mɛ sīdee na Jɛhova etɔgɛ ye toesaɛ̄ a? Kere pya Juu gaa le kpesī nu a sira aabu pɔrɔ ba bee si, Jɛhova bee yira yii kɔ ba naale ebia Babilɔn mmɛ deedee. Ba gaa le le bu zooro bu ziī nwīkere sɔ̄. (Ais 40:2) Ɛp kɛ̄ ue ama bee nɛ egbɔ̄nyiɛ le bɛābu pya a bee kiiya a wa le yɛɛ doo a!

5. Ena anua i suā leere kɔ Jɛhova e’aaloo i pɔrɔ i nɛ eekɛ̄ pya Juu a bee le bu zooro li Babilɔn bee suā doo a?

⁵ Ena i nɔ aāloo a? Jɛhova kpɛ̄naloo e’aaloo pɔrɔ nɛ pya ye zooro mmɛnɛ. Nii’ee, i suā leere kɔ Jɛhova e’aaloo i pɔrɔ i nɛ eekɛ̄ pya Juu a bee le bu zooro li Babilɔn bee suā doo. Ena anua a? Nyɔnɛbee i suā nu Jɛhova edoora lo e’aaloo i pɔrɔ. Sɔ̄ booboo o’oo tup zua etɛ̄na aā sɔ̄ Aisaia bee kɔ nu akiiloo kɛ̄ Jɛhova aaloo pɔrɔ doo, Jɛhova bee yere ye Nwiīnɛɛdam a wereloo nua a nyɔɔ kɛ̄nɛkɛ̄ kɔ a nɛ ye dum nyɔɔ dɛ̄dɛɛ̄ pya a kiiya aaloo wa pɔrɔ. Lo waara zɔɔ bee kpaāna dee nɛ pya a bee doo pɔrɔ kɔ alu “ezugere lɛɛ,” sa zugere dɛ̄dɛɛ̄ ɛɛ sahkɛ̄. (Doonu Pya Nɛɛ Lɛɛratam 3:19; Ais 1:18; Ɛfɛs 1:7) Mɛ dua Bari a ɛrɛ toesaɛ̄ i gaa taāŋabah sɛh!

6. Bu mɛ sīdee na i dap ɛrɛ biī aāloo sɔ̄ i ɛrɛ ekɛɛrɛ nyɔɔ toesaɛ̄ Jɛhova a? (Ɛpnage foto.)

⁶ Pya ue Jɛhova a le bu kpa Aisaia 55:7 dap i nɛ egbɔ̄nyiɛ lo a le i ekɛɛrɛ beenyiɛ gaa i bialoo bege ue. Beenyiɛ pio ii dap le gaa i bege ue nyɔɔ ekwɔ i bee tɛɛ̄ sɔ̄ akii adumɛ, kere sɔ̄ i ekiiya. I beenyiɛ dap kiisī lo ebege i ue eetɔɔ̄ na sɔ̄ i gaa tɔga nyɔɔbee pɔrɔ i bee si. Kerewo, lo i ekɔa pya i pɔrɔ siā sa ɔbɛ edoo lo pɔrɔ, i dap suā leere kɔ Jɛhova e’aaraloo i nɛ. E sɔ̄ Jɛhova i aaloo pɔrɔ nɛ, a naa wee sinakɛ̄ nyɛŋiabu lo pɔrɔ. (Dooreloo Jeremia 31:34.) Nyɔɔwo, lo a le Jɛhova naa nyɛŋiabu loo pɔrɔ i bee si sɔ̄ akii adumɛ, ili i ɔbɛnage ekɛɛrɛbu loo. Nu a kuīloo Jɛhova na nu i gaa doo anyaawo, e a naale pya ekwɔ i bee tɛɛ̄ sɔ̄ akii adumɛ. (Ezek 33:​14-16) Sɔ̄ sɔ̄ naa binia, i Tɛ a ɛrɛ toesaɛ̄ gaa le lɛɛ dɛ̄dɛɛ̄ taāŋa a tɛɛ̄ aaloo i tɛɛ̄ ekwɔ.

7. Ena ezū i kɔ i gbī yerebah lo i gaa bee gɔ̄ pɔrɔ i bee si a?

⁷ Ena i doo lo a le i ekɛɛrɛ beenyiɛ aa i bege ue kiiloo pɔrɔ i bee si sa gɔ̄ a? Baibol yere i mɛm loo kɔ i gbī yerebah aābah pya kanɛɛ. (Jem 5:​14, 15) Kerewo, a dap i agaloo ekɔ nu i bee doo wa nɛ. Mɛ i dap ɛrɛ e’agaloo lo esiloo pya kanɛɛ a bɔloo eture nyiɛ loo ama lo a le i ekiiya, le lo i nyɛŋiabu kɔ Jɛhova le pya nɛɛ ama ɛrɛ wereloo i kumaloo sa ba eto i esaɛ̄. Naa ɛp kɛ̄ toesaɛ̄ Jɛhova ɛrɛ bee gbɔ̄nyiɛ ziī wuga nɛɛdam ye bee kura Arthur doo,a lo ye ekɛɛrɛ beenyiɛ bee ye taɛ̄ŋɛ gbɛnɛ. Arthur bee kɔ: “M bee ɛp foto a tɔgɛ ekotɛ̄ nɛɛ bu nu a waɛloo ziī zua. Mɛ sɔ̄ m bee gbaɛ̄tɔ̄ ekɔaue akiiloo ekɛɛrɛ beenyiɛ, m bee kɔ na pɔrɔ siā nɛ na wa le pya kanɛɛ. Sɔ̄ m bee doo wo sah, nyiɛ mɛ bee sukɛ̄, mɛ bu mɛ bee lege aa biira loo nu m bee doo. Pya kanɛɛ bee mɛ nyɛŋiabu kɔ Jɛhova sii mɛ kiī. A wee i kāmɛnɛ nyɔɔbee a were i loo. Ue ba bee mɛ kɔ nɛ bee mɛ ina bu beenyiɛ sa doo kɔ m suā kɔ Jɛhova e’aaraloo mɛ nɛ.” Nii’ee, Arthur elua nɛɛ sɛmdee le nɛɛ yerebahtam bu bɔŋanaloo. Ɛp kɛ̄ a i gbɔ̄nyiɛ doo lo esuā kɔ Jɛhova wee i toesaɛ̄ lo a le i kiiya!

JƐHOVA NƐ I BƐĀBU

8. (a) Amunu bɛābu na Jɛhova bee nɛ pya Juu a bee le bu zooro a? (b) Dookɛ̄ Aisaia 40:​29-31 kɔ doo, amunu pah na bɛābu Jɛhova bee nɛ pya Juu a kiiya bee wa ɛrɛ nyɔɔ a?

⁸ A bee bee kɔ bɛābu naale nɛ pya Juu a bee le bu zooro. Ekpo Bɛbɛɛ Babilɔn naa wee lɛa pya wa zooro bah. (Ais 14:17) Kerewo, Jɛhova bee nɛ bɛābu pya ye nɛɛ. A bee yira yii kɔ esue pya ye nɛɛ lɛɛ bu zooro, e lɔgɔ nu naale edap ye kpaɛ̄. (Ais 44:26; 55:12) Kɛ̄dɛɛ̄ Jɛhova Babilɔn naa ɛrɛ ekpo, ba le doodoo kunɛ tɔ̄. (Ais 40:15) Aba sɔ̄ o fuuri tɔ̄, a wee pe aa. Amunu pah na bɛābu bee dap ɛrɛ nyɔɔ pya a bee le bu zooro ama a? A bee wa gbɔ̄nyiɛ. Mɛ a bee doonage nu a ee wo. Aisaia bee ɛm kɔ: “Pya a tɔɔ̄ baɛ Jɛhova gaa le sikɛ̄ ɛrɛ wa ekpo.” (Buū Aisaia 40:​29-31.) Bu kaka, bɛābu eyere wa mɛm loo kɔ ba a su “laba pɛā kuma nyɔɔ doodoo goh.”

9. Ena ebee dap doo kɔ pya Juu a bee lu e’aa kuma dɔɔ̄na buɛ̄ a dɛrɛ nyiɛ nyɔɔ pya yii Jɛhova bee yira a?

⁹ Jɛhova bee kɔ nɛ pya Juu a bee le bu zooro nu a tɔgɛ kɔ pya ye yii gaa le dooa. Bu mɛ sīdee ni? Naa kɛɛrɛbu loo pya mɔmanudɛɛ̄ ebee dooa gbɔ̄mɛɛ̄. Ba bee suā kɔ pya Asiria ebea eebah lop gā Izrɛl a le dee mmyɔɔ sa wa aa kuma wa buɛ̄. (Ais 8:4) Ba bee muɛ sɔ̄ pya Babilɔn gaa gbeesī Jerusalɛm sa aa pya a le bu kuma wa buɛ̄. (Ais 39:​5-7) Ba bee le dum sɔ̄ Mɛnɛ Babilɔn bee zimɛ dɛɛ̄ Mɛnɛ Zedikaia sa ye su kuma Babilɔn. (Jer 39:7; Ezek 12:​12, 13) Dɛ̄dɛɛ̄ nu Jɛhova bee kɔ bee dooa gbɔ̄mɛɛ̄. (Ais 42:9; 46:10) Naa ɛp kɛ̄ dɛ̄dɛɛ̄ pya nu ama ebee dap yere mɛm loo wa yira kɔ dɛ̄dɛɛ̄ yii Jɛhova bee yira lo e’agara wa gaa le dooa doo a!

10. Ena edap i yerebah nɛ kɔ i bɛābu a kiisī lo e’agatɛ̄ bu kpɛdumɛ dee ama a?

¹⁰ Ena i nɔ aāloo a? Sɔ̄ i le bu biirabu, pya yii Jɛhova yira akiiloo deesī dap i yere mɛm loo sa doo kɔ i agaloo. I tɔɔ̄dum sɔ̄ kɛ̄tɔɔ̄ aga, sa pya nɛɛ baa Bari a ɛrɛ ekpo gaa i bebeloo. Kerewo, ii le epee beenyiɛ. Jɛhova enia i ziī nyɛŋia bɛābu lo a le dum anaatah bu kaāna efɛɛloo le kpoogaloo. I ɛrɛ ekiisī lo esere nyiɛ nyɔɔ lo bɛābu. Lo ii doo wo, i bɛābu dap lu ziizii bee sɔ̄ nɛɛ gaa ɛp gbɛnɛ ekpedɛɛ̄ tɔ tɛ̄mabu kpedɛɛ̄ biaɛ le dɛɛ̄, lo a doo kɔ lo nɛɛ aa muɛ kɛ̄ lo tɔ kpedɛɛ̄ doo. I tɛɛ̄ doodoo wa doo kɔ i bɛābu a agatɛ̄, doodoo bee i gaa “siŋ dɛɛ̄ lo kpedɛɛ̄” ni? I dap wee su sɔ̄ kɛɛrɛ kɛ̄ dum ekpeloo doo bu aā nyɔuwe. I dap buū pya ekobee ue, si ee pya vidio, sa gbaɛ̄tɔ̄loo pya yɔɔ a kɔ nu akiiloo i bɛābu. E i dap kɔ dɛ̄dɛɛ̄ nu i gaa ɛmadɛɛ̄ ama kɔ esira bu Paradais nɛ Jɛhova bu kara.

11. Ena a bee yerebah nɛ ziī wuga nɛɛwa a bee ɛrɛ gbɛnɛ e’agabah dumɛloo kɔ a sikɛ̄ ɛrɛ ekpo a?

¹¹ Naa ɛp kɛ̄ bɛābu bee gbɔ̄nyiɛ sa yere mɛm loo ziī wuga nɛɛwa a kura Joy doo, lo a bee ɛrɛ ziī gbɛnɛ e’agabah dumɛloo. A bee kɔ: “Sɔ̄ na taāŋa sikɛ̄ agɛrɛbah sa doo kɔ loo mɛ a ɔ, m bee kɔ kɛ̄ a mɛ tɔɔ̄loo doo nɛ Jɛhova. Jɛhova bee agara na kara tɛ̄maloo enɛ mɛ ‘eenyɔɔ ekpo.’” (2 Kɔr 4:7) Joy bee muɛ aba ɛɛ bu aā nyɔuwe kɛ̄ “lɔgɔ nɛɛ a tɔɔ̄ bu buɛ̄ a naale ekɔ: ‘Loo mɛ dumɛ.’” (Ais 33:24) Lo ili kɔnage kɛ̄ nu i tɔɔ̄loo doo nɛ Jɛhova sa sere ekɛɛrɛ nyɔɔ i bɛābu, i dap sikɛ̄ ɛrɛ ekpo.

12. Pya ena anua i dɛrɛ nyiɛ nyɔɔ pya yii Jɛhova a? (Ɛpnage foto.)

¹² Jɛhova nɛ i gbɛnɛ-edo nu edoo kɔ i dɛrɛ nyiɛ nyɔɔ pya ye yii dookɛ̄ a bee doonage nɛ pya Juu a bee le bu zooro doo. Naa kɛɛrɛ nu akiiloo pya mɔmanudɛɛ̄ i muɛ a gaa dooa gbɔ̄mɛɛ̄ anii’ee. Bu edobah, i muɛ ekpo bɛbɛɛ nyɔuwe lo “pio sīdee . . . ɛrɛ ekpo, e pio sīdee waɛ ebuū.” (Dan 2:​42, 43) I gaa dānage kpɛa akiiloo “nyɔŋa kɛ̄nɛkɛ̄ [a legara] keekee kɛ̄,” e i gaa zue ue bu “dɛ̄dɛɛ̄ edonyɔɔ.” (Mat 24:​7, 14) Pya mɔmanudɛɛ̄ ama le gbɛnɛ-edo pya lo dɔɔ̄na doo kɔ i agɛrɛbah ɛrɛ yira bu pya yii Jɛhova a i gbɔ̄nyiɛ lo a sii dooa kɔ a ɛrɛge edooa gbɔ̄mɛɛ̄.

JƐHOVA DOO KƆ I AA ƐRƐNA BƆƆ

13. (a) Pya amunu nu finiabah na pya Juu ekpesī sɔ̄ ewaraloo sɔ̄ elu e’agara wa lɛɛ bu zooro a? (b) Dookɛ̄ alu ebaatɛ̄ bu Aisaia 41:​10-13 doo, bu mɛ sīdee na Jɛhova bee gbɔ̄nyiɛ pya Juu a bee le bu zooro a?

¹³ Kereadoo Jɛhova bee nɛ bɛābu pya Juu a bee le bu zooro sa wa nɛ egbɔ̄nyiɛ kɔ a gaa le lu e’agara wa, a bee suā kɔ ba gaa le kpesī pya kɛ̄tɔɔ̄ finiabah sɔ̄ elu e’agara wa. Jɛhova bee kɔ serekɛ̄ kɔ sɔ̄ pya Juu esaa e’aabu zooro, ziī mɛnɛ gaa le bebe loo Babilɔn le pya edonyɔɔ a ye tɛɛ̄ ɛŋɛnɛ sa su bɛbɛɛ lɛɛbah Babilɔn. (Ais 41:​2-5) Eluge ebɛɛ̄ kɔ bɔɔ a aa pya Juu ni? Jɛhova bee bagara gbɔ̄nyiɛ pya ye nɛɛ kɔ: “Bɔɔ aa a aa, nyɔnɛbee mda le a loo, o aa nyɔŋa, nyɔnɛbee mda na o Bari a.” (Buū Aisaia 41:​10-13.) Ena a gaa kɔ sɔ̄ a kɔ “mda na o Bari a”? A naa gaa bee nyɛŋiabu pya Juu kɔ ba a taāŋa ye bah nyɔnɛbee ba bee suā kɔ a bɔloo etaāŋa ye bah. Taāwo, a gaa bee wa nyɛŋiabu kɔ a le wa loo, e a gaa le yereebah wa nɛ.—Yɔɔ 118:6.

14. Bu dɔɔ̄na amunu sīdee na Jɛhova bee doo kɔ bɔɔ aa aana pya Juu a bee le bu zooro a?

¹⁴ Jɛhova bee doo kɔ pya a bee le bu zooro ama aa ɛrɛna bɔɔ tɛ̄maloo enyɛŋia wa bu nu akiiloo ye ekpo a naa ɛrɛ kuma le suānu. A bee kɔ nɛ pya Juu a bee le bu zooro kɔ ba a dana dɛɛ̄ ɛma bunyɔɔ sɔ̄ zina le. Lɛɛ a kɔ wa nɛ kɔ naale aba kɔ a bee dɛme dɛ̄dɛɛ̄ zina, mɛ a suāenage bee dɛ̄dɛɛ̄ lo zina. (Ais 40:​25-28) Lo a le Jɛhova suā bee ziī ziī ka zina, tɛɛ̄ doodoo wa na a naale esuā bee ziī ziī pya ye zooro a? E lo Jɛhova ɛrɛ ekpo lo edɛma dɛ̄dɛɛ̄ zina, a ɛrɛnage ekpo lo eyerebah nɛ pya ye nɛɛ. Bu kaka, a naa ɛrɛ lɔgɔ nu enua pya Juu a bee le bu zooro e’ɛrɛ gbɛnɛ ekɛɛrɛ ale bɔɔ.

15. Bu mɛ sīdee na Bari bee doo kɔ pya Juu a bee le bu zooro a kpɛ̄naloo baɛ nu a wa le sī a?

¹⁵ Jɛhova bee doonage kɔ pya ye nɛɛ a suā nu ba edoo sɔ̄ e’agara wa. Bɔātɛ̄ loo kpa Aisaia, Bari bee kɔ nɛ pya ye nɛɛ kɔ: “Luaa, pya na nɛɛ, yiraa bu dɛ̄dɛɛ̄ bui tɛm, sa kpaɛ̄ dɛ̄dɛɛ̄ bui bū tɛɛ̄a dumɛ; gɔā bui loo bu ziī nwī sɔ̄ mmɛ sɔ̄ gbɛnɛ saŋ etɛɛ̄.” (Ais 26:20) Ue ama bee ɛrɛ ye tuatua dooa gbɔ̄mɛɛ̄ sɔ̄ Mɛnɛ Sairus bee be eebah Babilɔn. Ziī nɛɛ ɛm eloh kere alu Grik kɔ sɔ̄ Sairus bee bebeloo buɛ̄ Babilɔn, a bee “nɛ lok [pya ye nɔ̄] kɔ ba a fɛ dɛ̄dɛɛ̄ pya ba muɛ kɛ̄-ee.” Naa kɛɛrɛ kɛ̄ bɔɔ bee dap aa pya a le buɛ̄ Babilɔn doo a! Mɛ a bee dap lu ekpɔā pya Juu a bee le bu zooro nyɔnɛbee ba bee gbaɛ̄tɔ̄loo zuurabahtɔ̄ Jɛhova.

16. Ena anua ii le e’ɛrɛ gbɛnɛ ekɛɛrɛ kumaloo deesī a? (Ɛpnage foto.)

¹⁶ Ena i nɔ aāloo a? Sɔ̄ sɔ̄ naa binia, i gaa le kpesī gbɛnɛ etɛɛrɛloo a ee dɛ̄dɛɛ̄ etɛɛrɛ miɔŋɔ nɛɛ ebee kpesī. Sɔ̄ lo gbɛnɛ etɛɛrɛloo ebɔātɛ̄, dɛ̄dɛɛ̄ nɛɛ e’ɛrɛ bɔɔ sa kwɔɔga. Mɛ pya nɛɛ Jɛhova naale e’ɛrɛ bɔɔ. I suā kɔ Jɛhova na ilii Bari a. I gaa le yira agara nyɔnɛbee i suā kɔ “[i] a’agara ewara loo.” (Luk 21:28) Kunɛ sɔ̄ dɛ̄dɛɛ̄ edonyɔɔ a gbaaloo ziī ebe i, i gaa le yiranage agɛrɛ. Jɛhova gaa le baɛ i loo tɛ̄maloo pya ɛnjɛl sa i nɛ pya zuurabahtɔ̄ ekpɔā i. Pya lo zuurabahtɔ̄ etɛɛ̄ doodoo wa i ina loo ni? I sii suā, mɛ sɔ̄ e’ina lo sɔ̄, i muɛ. Kerewo, i dap ɛrɛ pya lo zuurabahtɔ̄ tɛ̄mabu i bɔŋanaloo. Lo ama dap lu i “tɛm” bu sīdee a tɔɔ̄dɔ nu, lo a le kɛ̄ i ɛrɛ kpega aā. Bu mɛ sīdee na i dap kpɛ̄naloo baɛ nu a gaa lu li deesī a? I ɛrɛ etɔɔ̄ waɛloo pya i wuga nɛɛdam le nɛɛwa, sa kpɛ̄naloo esu zuurabahtɔ̄ a aabu bɔŋanaloo Bari, sa suā leere kɔ Jɛhova na a gaa baɛbee i bɔŋanaloo a.—Hib 10:​24, 25; 13:17.

17. Mɛ sīdee na o dap ɛrɛ egbɔ̄nyiɛ aābah Jɛhova a?

¹⁷ Kereadoo pya Juu a bee le bu zooro bee le bu e’aga kɛ̄tɔɔ̄, Jɛhova bee wa nɛ egbɔ̄nyiɛ a wa bɛɛ̄. E doonage wo nɛ ili. Nyɔɔwo, kaɛlɛɛ ɛrɛgebah nu esira li deesī, kiisī lo e’ɛrɛ egbɔ̄nyiɛ a aabah Jɛhova. Aiī, ɛrɛ yira kɔ a wee aaloo pɔrɔ kaāna nɛ pya ye zooro a ye tɔɔ̄ agara nɛ sa wa kuūdɛɛ̄loo. Doo kɔ o bɛābu a agatɛ̄. E bɔɔ aa a aa loo lɔgɔ nu, nyɔnɛbee Jɛhova na o Bari a.