Iyẹnrẹn Ọrẹ i Matiu

5 Ọke i Jesu ọ mẹrẹn otu na, no riẹ oberun ugbenu na. Ọke ro siyẹ hin, idibo yi ni brurie rhe. 2 Omarana, nọ tuẹn ẹmro ẹta rhọ ji yono aye taghene:

3 “Omamerhomẹ ọ havwiẹ rẹn ihworho ri gwọlọ vwo irherhe Osolobrugwẹ,* fọkime Uvie idjuwu na ọrẹ aye.

4 “Omamerhomẹ ọ havwiẹ rẹn ihworho re mwuomarhọ, fọkime ene bru aye urhe.

5 “Omamerhomẹ ọ havwiẹ rẹn ihworho dẹndẹn,* fọkime aye ina ha otọrakpọ na riuku.

6 “Omamerhomẹ ọ havwiẹ rẹn ihworho orhọmo irueruo ọsoso o kpe ọrhẹ erẹ uhrun irueruo ọsoso ọ ka, fọkime ephan ọnọ vuọn aye.

7 “Omamerhomẹ ọ havwiẹ rẹn ihworho re dje arodọmẹ phia, fọkime ene gbe arodọmẹ rẹn aye.

8 “Omamerhomẹ ọ havwiẹ rẹn ihworho rẹ ọmudu aye ọ fonron, fọkime aye ina mẹrẹn Osolobrugwẹ.

9 “Omamerhomẹ ọ havwiẹ rẹn ihworho ra gwọlọ ufuoma,* fọkime ene se aye emọ Osolobrugwẹ.

10 “Omamerhomẹ ọ havwiẹ rẹn ihworho ra kparahasua fọkiẹ irueruo ọvwata, fọkime Uvie idjuwu na ọrẹ aye.

11 “Omamerhomẹ ọ havwiẹ rẹn are, ihworho i rhe phien are, kparehaso are, mọrenfian banren are, ji ta aruẹ erharhere ẹmro ephian kpahen are fọkiẹ omẹmẹ. 12 Jenẹ oma ọ merhen are, nẹ are i ji ghọghọ omamọ, fọkime osa are ọ doro omamọ obẹ idjuwu, fọkime omaran ya ji kparehaso emẹraro ri havwiẹ ọke ahwanren.

13 “Are yẹ adawun otọrakpọ na, ọrẹn orhianẹ adawun na ọ tẹ ne, marhẹ ono ru rharhumu vwo amerhen? Arha sabu haye ruẹ emru owuorowu ghwomara-an, jokpanẹ ene tue yi fughwẹ, ihworho ni ne rhe sinhien vrẹn.

14 “Are yẹ ukpẹ ọrẹ akpọ na. Amwa rọ ha oberun ugbenu ọ sabu tiomanuẹ-ẹ. 15 Ihworho i rha ha ukpẹ tu, aye i vwa bọmu okalokpọ* rhurhuie-e, ukpomaran aye a haye kpahen oborẹ ọ mọren ukpẹ, no lo mwu ihworho ephian uvuẹn oghwa na. 16 Omaran ọ ji havwọ, jenẹ ukpẹ are o lo obaro ituakpọ, neneyo aye i sabu mẹrẹn emamọ ewian are ji ha ujiri vwe Ọsẹ are obẹ idjuwu na.

17 “Are i vwe roro taghene mi rhe me fiobarhọ Urhi na yanghene eyaya Emẹraro na-a. Ọrẹn, mi rhe mọ ha aye te orugba, ukperẹ mi ne fiobarhọ aye. 18 Itiọrurhomẹmro, mia ta rẹn are taghene odjuwu ọrhẹ otọrakpọ na i rha tobọ nyavrẹn dede, ibiẹ ẹmro yanghene ukorẹmro rọ mai kamu usuẹn Urhi na ọ sabu nie-e, jokpanẹ aye ephian i rugba. 19 Omarana, kohworho kohworho rọ kparehaso owu usuẹn ekama ekokamu na ji yono awọrọ nẹ aye i kparehaso aye, o mwuovwan* Uvie idjuwu na-a. Ọrẹn, kohworho kohworho rọ ha aye ruiruo ji yono awọrọ kpahen aye, ono mwuovwan* Uvie idjuwu na. 20 Mia ta rẹn are taghene irueruo ọvwata are ọrhọ ghwẹ erẹ eyẹbe ọrhẹ itu i Farisi na-a, are i sabu ruẹ Uvie idjuwu na-a.

21 “Are i rhe oborẹ a ta rẹn ihworho ọke ahwanren taghene: ‘Wu vwe dozighẹ-ẹ,* ọrẹn kohworho kohworho ro dozighẹ, ana haye guẹnzọn uvuẹn oghwa ẹghware.’ 22 Ọrẹn, mia ta rẹn are taghene kohworho kohworho ro biomevwan gbangbanhon kpahen omizie, ana haye guẹnzọn uvuẹn oghwa ẹghware. Kohworho kohworho rọ ha ẹmro igbongbon phien omizie, ana haye guẹnzọn uvuẹn Oghwa Ẹghware rọ Mai Rierun. Ọrẹn kohworho kohworho rọ tare ‘Ọvwidjigbo obẹta!’ ene donrien rhẹ erhanren i Gẹhẹna.*

23 “Omarana, orhianẹ wa kpare izobo ọnọ rhiẹ agbarha na, ọrẹn ne wu karorhọ uvuẹn avwaye taghene omizuo o biomevwan kpahuọn, 24 gba nyaji izobo ọnọ vwo rhẹ obaro agbarha na, ne wu ye lele omizuo kwaphiẹrhọ vwẹre, orho ru gba ghwẹrioma rhe me ze izobo ọnọ.

25 “Wẹwẹ ọrhẹ ohworho i rhe vwo ẹmro uvuẹn oghwa ẹghware, brokpakpa kwaphiẹ ẹmro na rhọ ọke are a nyarhẹn uvuẹn izede, neneyo ọravwọ ọ jọ rhọ kparuọ vwe oguẹnzọn na, nẹ oguẹnzọn na ọ jọ rhọ kparuọ vwe ọlọkpa oghwa ẹghware na, ọye no no donruon rhẹ ekanron. 26 Itiọrurhomẹmro mia ta wẹn, wu sabu nẹ avwaye-e, jokpanẹ wu kwa ọsoso igho* wu riosa ye hin.

27 “Are i rhe oborẹ a tare bi taghene: ‘Wu vwa ghwọwe-e.’ 28 Ọrẹn, mia ta rẹn are taghene kohworho kohworho ro ni ọmase kiọkiọkiọ te erhirhiẹ ro vwo ẹhẹn ehware kpahiẹn, ọ ghwanreriẹn lelie ghwọwe uvuẹn ọmuduie ne. 29 Omarana, orhianẹ ukẹro obọrhen ọnọ o rhiẹ ọgbanrhọ wẹn, ghwolie nie ne wu donrien fughwẹ. Fọkime ono rhomu orhianẹ oghọn owu uvuẹn ugboma ọnọ o vruru, ghwẹ ọrẹ ene donron ọsoso ugboma ọnọ rhẹ i Gẹhẹna. 30 Habaye, orhianẹ obọrhen ọnọ o rhiẹ ọgbanrhọ wẹn, bruie nie ne wu donrien fughwẹ. Fọkime ono rhomu orhianẹ oghọn owu uvuẹn ugboma ọnọ o vruru, ghwẹ ọrẹ ọsoso ugboma ọnọ ono yo sotọre obẹ i Gẹhẹna.

31 “Riobarorhọ, a ji ta taghene: ‘Kohworho kohworho rọ fonrọnmo rhẹ aniẹ, ọ yẹ aniẹ ọbe ra fonrọnmo na.’ 32 Ọrẹn, mia ta rẹn are taghene kohworho kohworho rọ fonrọnmo rhẹ aniẹ, ọrẹn aniẹ o gbọfanrhiẹ-ẹn,* ọravwọ o fiẹ aniẹ rhẹ erhirhiẹ imwofẹn rọ nọ ghwọwe. Habaye kohworho kohworho rọ rọnmọ ọmase ra fonrọnmiẹ izede omana, ọravwọ ọ ghwọwe ne.

33 “Ọgbọrọrọ, are i rheri taghene a ta rẹn ihworho ọke ahwanren taghene: ‘Wu vwe vi dumirhonrin oborẹ wu na ja sabu nyamwu-u, ukpomaran wu na vi nyamwu oborẹ wu ve rẹn i Jehova.’ 34 Ọrẹn, mia ta rẹn are: Are i vwe dumirhonrin kakaka-a, are i vwa ha odjuwu dumirhonri-in, fọkime avwaye yẹ aga usun Osolobrugwẹ. 35 Are i vwa ha otọrakpọ na dumirhonri-in, fọkime avwaye yẹ akaba rọ kwruọ aghwẹ kpahan. Yanghene are i vwa ha i Jerusalẹm dumirhonri-in, fọkime avwaye yẹ amwa Orodje ọduado na. 36 Are i vwa ha urhomu are dumirhonri-in, fọkime are i sabu wene ẹton urhomu are owu riẹ ọfuanfon yanghene obiebi-i. 37 Are i jenẹ ẹmro are ‘Ee’ no rhiẹ ee, ‘Ẹjo’ no rhiẹ ẹjo, fọkime ọrhọ ghwẹ omaran, obẹ ọvwọkon na yo nurhe.

38 “Are i rhe oborẹ a tare bi taghene: ‘Ana ha ukẹro wene ukẹro, ji ha ukanwun wene ukanwun.’ 39 Ọrẹn, mia ta rẹn are: Are i vwe lele ọvwọkon wọnrọ-ọn, ukpomaran kohworho kohworho rọ ghwiẹ ọkwa obọrhen ọnọ, gba ha obọreva riẹn nọ ji ghwiẹ ye. 40 Orhianẹ ohworho ọ gwọlọ kparuọ riẹ oghwa ẹghware nọ sabu ha ewun wu kurhọ uvuien, gba ji yẹ ye ewun otafe ọnọ ba. 41 Orhianẹ ohworho rọ ha omẹgbanhon usun ọ gbaruọ kpare ohwan nya iroko owu, gbe lelie nya iroko eva. 42 Tiobọnu rẹn ohworho rọ nekpẹn userhumu mio, wu vwe sianron rẹn ohworho rọ gwọlọ momo* emru mio-o.

43 “Are i rhe oborẹ a tare bi taghene: ‘Wu ne vi vwo ẹgwọlọ kpahen ọreva, ji vwo utuoma kpahen ọvwreghrẹn ọnọ.’ 44 Ọrẹn, mia ta rẹn are: Are i rhe vwo ẹgwọlọ kpahen evwreghrẹn are, nẹ are i ji nẹrhomo rẹn era kparahasuẹ are. 45 Neneyo are i sabu djephia taghene are emọ Ọsẹ are obẹ idjuwu na, fọkime o ruie nẹ ọren ọnẹyen o lo mwu evwọkon ọrhẹ emamọ ihworho, o ji ruie nẹ oso ọ rhọ rẹn evwata ọrhẹ eri vwe rhiẹ evwata. 46 Orhianẹ are i vwo ẹgwọlọ kpahen ihworho ri vwo ẹgwọlọ kpahen are ọvo, erere ọgo yo teri are? Rhomaran yẹ ere vwiosa urhomu na e ji ruẹ? 47 Orhianẹ imizu are ọvo yẹ are a mroma, emru oghẹnrensan ọgo yẹ are i ruru? Rhomaran ihworho egbamwa na e ji ruẹ? 48 Omarana, are ine vi rhiẹ ihworho ri gbare,* jerẹ oborẹ Ọsẹ are obẹ odjuwu ọ gbare.