September

Jehova ọ yẹ Jesu omẹgbanhon rọ nọ kwaphiẹ ebẹnbẹn ituakpọ ephian rhọ. Nyoma igbevwunu ri Jesu o ruru, no djephia taghene o vwo omẹgbanhon ro no ti ebẹnbẹn ra na ja sabu fikparobọ nie. Jerẹ udje, o vwo omẹgbanhon ro no simi ọwan nẹ esiri ebẹnbẹn ephian re rhiẹromẹrẹn, nọyẹ ọdandan ra ha riuku ọrhẹ ekwakwa re nerhumie sa, emiamo kugbe uhwu. (Matt. 9:​1-6; Rom. 5:​12, 18, 19) Igbevwunu ro ruru, o djephia taghene ọnọ sabu simi “aruẹ emiamo ephian” ji tobọ rhọmọ eri hwuru na. (Matt. 4:23; John 11:​43, 44) Habaye, o ji vwo omẹgbanhon ro suẹn ogiribo egbogbanhon, ji fiẹ ikpodje evwọkon kparobọ. (Mark 4:​37-39; Luke 8:2) Ọ merhoma re rhe taghene Jehova o tiobọnu aruẹ omẹgbanhon ọrana rẹn Ọmọyen! Ana sabu vwo imwẹro taghene ebrurhọ rẹ Uvie Osolobrugwẹ ọnọ rhua rhe ine rugba. Igbevwunu ri Jesu o ruru ọke rọ ha otọrakpọ na, e yono ọwan kpahen oborẹ ono ruo uvuẹn ọsoso otọrakpọ na, uvuẹn Uvie i Jehova. w23.04 3 ¶5-7

Wu rha ha uvuẹn ukoko ro vwo ighwoghwẹmro buebun, wu na sabu vwo ẹhẹn wu ne fiobọrhotọre orhianẹ e vwe so ne wu kpahenrhọ enọ-ọ. Ọrẹn, rha damoma rionbọ wu na kpahenrhọ enọ. Mwuegbe ẹkpahenrhọ buebun rhotọre. Orhianẹ e se owẹwẹ ne wu kpahenrhọ enọ uvuẹn ọtonrhọ uyono na-a, wu na ji sabu vwo uphẹn wu na kpahenrhọ enọ ọke uyono na o riarorhọ. We rhe mwuegbe rhẹ Uyono Oghwa Odẹrẹ na, roro kpahen oborẹ udjoghwẹ owuowu o ru surhobọmwu urhomu-ẹmro uyono na. Wu rhe ruẹ omaran, wu ne vwo oborẹ wu na kpahenrhọ uvwre ọsoso uyono na. Habaye, wu na sabu mwuegbe ẹkpahenrhọ rẹn idjaghwẹ ri ta kpahen irhomẹmro ikokodo, rọ bẹn e dje fiotọre. Mesoriẹ? Fọkime ihworho ri na rionbọ i buẹn uvuẹn oghọn ọrana-a. Ọrẹn, orhianẹ e vwe ji se owẹwẹ vwo? Bọmọke uyono na ọnọ tonrhọ, ta rẹn ọrọ nọ ha uyono na phia kpahen onọ wu guọlọ kpahenrhọ. w23.04 21-22 ¶9-10

Joseph ọ dabu ha ọkpọvi Jehova ruiruo, ọrana nọ lẹrheriẹ rhiẹ omamọ esa. Uvuẹn erhirhiẹ esa, Jehova no tiobọnu ọkpọvi riẹn kpahen ekruien. Uvuẹn erhirhiẹ erana, ọ huvwele ogege, dedevwo ono ruẹ ewene eduado. (Matt. 1:20; 2:​13-15, 19-21) Fọkime ọ nyalele ọkpọvi Jehova, Joseph nọ sabu sẹrorẹ i Mary, hobọtua ye, ji hẹrote yi. Roro kpahen oborẹ ẹguọlọ ọrhẹ ọghọ ri Mary o vwo kpahen Joseph ono kodo te fọkiẹ oborẹ o ruru na! Esa, are ina sabu hẹrokele i Joseph nyoma are ina guọlọ ọkpọvi ro nẹ i Baibol rhe kpahen ọrẹ are ina hẹrote ekrun are. Are i rha ha ọkpọvi na ruiruo, dedevwo o mevirhọ ọrẹ are ine ruẹ ewene, ọnana o djephia taghene are i vwo ẹguọlọ kpahen ane are, are na ji bọn orọnmo are gbanhan. Omizu ọmase owu rọ ha Vanuatu, rọ rọnmọ vrẹn ẹgbukpe 20 ne, nọ tare: “Esa mẹ ọrhọ guọlọ ọkpọvi Jehova ji haye ruiruo, ni mia dabu họghọ riẹn rhọ. Ni mie vwo ẹhẹn ro te otọre, ji hẹrosuẹ orhienbro yi.” w23.05 21 ¶5

Itu i Jew re nẹ Babylon sa na inẹ rhiẹ “ihworho efuanfon” rẹn Jehova. (Deut. 7:6) Ọrẹn, ọrana o mevirhọ taghene aye i rhe ruẹ ewene neneyo aye i sabu ga i Jehova-a. E vwiẹ buebun itu i Jew na uvuẹn Babylon, omarana buebun ni vwo uruemru ọrhẹ iroro itu i Babylon. Ẹgbukpe buebun ọke itu i Jew na a ghwẹrioma riẹ Israel, nọ gbe igọvunọ Nehemiah unu taghene emọ ezẹko re vwiẹre uvuẹn Israel, i vwa sabu djẹ edjadjẹ itu i Jew na-a. (Deut. 6:​6, 7; Neh. 13:​23, 24) Marhẹ emọ erana ine ru vwo ẹguọlọ kpahen Jehova ji ga ye, orhianẹ aye i sabu djẹ edjadjẹ i Hebrew—ro rhiẹ edjadjẹ ra mai ha ya Ẹmro Osolobrugwẹ-ẹ? (Ezra 10:​3, 44) Omarana, o fori nẹ itu i Jew erana i ruẹ ewene kirighwo, ọrẹn, ọnọ phẹrẹ re ne ruẹ ewene ọnana uvuẹn Israel, ro rhiẹ ekete ra ha ẹga urhomẹmro mwu bibiesuọn bibiesuọn.—Neh. 8:​8, 9. w23.05 15 ¶6-7

Ọrẹ omemwurhọ, o vwo oborẹ e sun oma ọwan, yanghene vwo omwemẹ te-e, ana ji sabu mẹrẹn egbanrhọ ezẹko. Jerẹ udje, “oborẹ e vwe fiẹrorhọ” ọnọ sabu ha nẹ ọke ra na ha wian kpahen ẹkẹ ọwan. (Eccl. 9:11) Ana sabu dẹrughwaroghwu obẹnbẹn rọ nọ lẹrhẹ ẹhẹn ọwan seriotọre, ji lẹrhẹ ọwan je vwo omẹgbanhon. (Prov. 24:10) Ijẹgba ọwan ọ ji lẹrhiẹ bẹn ra na nyamwu ẹkẹ ọwan. (Rom. 7:23) Yanghene oma ọnọ sabu rhọ ọwan. (Matt. 26:43) Me yọ nọ sabu ha userhumu rẹn ọwan fiẹ egbanrhọ erana kparobọ? Karorhọ taghene ọgbanrhọ o mevirhọ taghene wu sabu wian kpahen ẹkẹ enọ-ọ. Baibol na ọ tare taghene ana sabu rhiẹromẹrẹn ebẹnbẹn ọgbọ buebun. Ọrẹn, ọ tare taghene ana sabu fi aye kparobọ. Wu rha nyamwu ẹkẹ ọnọ udabọ ọgbanrhọ, we dje rẹn Jehova taghene wu guọlọ lẹrhẹ oma merhiẹn. Oma ọnọ dabu merhen i Jehova ọke rọ mẹruọn wa damoma nyamwu ẹkẹ wu bruru! w23.05 30 ¶14-15

Owian ọkobaro ọ ha userhumu rẹn idama yono oborẹ ono ru lele aruẹ ihworho sansan wian kugbe. Ọ ji ha userhumu riẹn brorhiẹn uchunu igho rọ nọ ghwọghọ, ji ha ẹghwanren haye ruiruo. (Phil. 4:​11-13) Oborẹ ọnọ ha userhumu riẹn vwobọrhọ owian Uvie na vuọnvuọn, yẹ ọrẹ ono rhiẹ ọkobaro ibiọke, rọ nọ ha userhumu riẹn sabu rhiẹ ọkobaro ọke ephian. Owian ọkobaro ọnọ ha userhumu rẹn aye vwo uphẹn ẹga erọrọ, jerẹ owian ebanbọn yanghene ya ga obẹ Oghọn Ukoko. Ehworhare ri rhiẹ Ilele Kristi, i bru ẹkẹ aye ina nyamwu evwan rọ nọ lẹrhẹ aye rhiẹ idibo owian yanghene ekpako ukoko. Baibol na ọ tare taghene idama ro ruẹ riaro no rhiẹ oniruo, “omamọ owian yo vwo ẹhẹn kpahen.” (1 Tim. 3:1) Ọrukaro, idama ono vi mwuovwan ro no rhiẹ odibo owian. Idibo owian a ha userhumu rẹn ekpako hẹrote imizu ukoko na. Ekpako ọrhẹ idibo owian a ha userhumu rẹn imizu ukoko na, ji vwobọrhọ owian aghwoghwo na rhẹ oruru. w23.12 28 ¶14-16

Orodje Josiah ọ ha uphuphẹn ọke rọ guọlọ i Jehova. Ọ guọlọ yono kpahen Jehova, ji ruẹ ọhọriẹ. Ọrẹn, akpọ ọ lọhọ rẹn orodje ọnana ro rhiẹ ọmọvwerhe-e. Ọye no brorhiẹn ro no mevi chochọn ogame urhomẹmro uvuẹn ọke ogame efian o gbephe. Itiọrurhomẹmro, o fiudugbere chochọn yen! Bọmọke i Josiah o te ẹgbukpe 20, no tiẹ ogame efian nẹ agbamwa na. (2 Chron. 34:​1, 2) Wu rha ha ọmọvwerhe dede, wu na sabu brorhiẹn wu na hẹrokele i Josiah, nyoma wu na guọlọ i Jehova, ji yono kpahen obọdẹn iruemru Enẹyen. Omamọ udjoghwẹ ọrana ọnọ ha userhumu wẹn homakpahontọre rẹn Jehova. Marhẹ omẹhakpahontọre ọrana ọnọ hobọte akpenyerẹn ọnọ lele kẹdẹkẹdẹ? Luke, ro bromarhame ọke rọ ha ẹgbukpe 14, nọ tare, “Nẹ ọke ọnana nyarhẹn, mi na ha ogame i Jehova karo uvuẹn akpenyerẹn mẹ, ji ruẹ oma merhiẹn.” (Mark 12:30) Wu na mẹrẹn ebrurhọ wu rhe ji vwo aruẹ oruru ọrana! w23.09 11 ¶12-13

Ọke ọnyikọ Paul ọ ya ileta ọnana, o ji te ẹgbukpe owu ra ha ukoko i Thessalonica mwu-u. Ọkezẹko, ekpako ra ha mwu na e ji te edje-e, aye ina ji sabu ruẹ orusọ ezẹko. Ọrẹn, o ji fo na họghọ rẹn aye. Ọke ukpokpogho rode na o tiẹkẹrẹ ne, ekpako yi ne rhe tiobọnu ọkpọvi buebun rẹn ọwan ọke ọrana. Ọkezẹko, a sabu mẹrẹn ọkpọvi mie Esiri Ukoko ọrhẹ Oghọn Ukoko-o; omarana, ọ ghanranren ne yono oborẹ ene ru vwo ẹguọlọ kpahen ekpako na ji mwuọghọ rẹn aye vwana. O toro oborẹ ọ phiare-e, jena sẹrorẹ iroro ọwan, a vwa tẹnrovi ijẹgba aye-e, ọrẹn a tẹnrovi oborẹ i Jehova ọ nyoma Kristi suẹn aye lele. Jerẹ oborẹ erhu ọgbogbanhon ọ sẹrorẹ urhomu isodja, omaran ifiẹrorhọ ọwan ọ sẹrorẹ iroro ọwan. E rheri taghene o vwo oborẹ akpọ na ọnọ sabu yẹ ọwa-an. (Phil. 3:8) Ifiẹrorhọ ọwan ọ ha userhumu rẹn ọwan sẹrorẹ ẹhẹn ọfọfọ. w23.06 11-12 ¶11-12

Ihworho re rhon use “ọmase ro ghẹnren” na, i vwo odjẹ: Aye ine rhiabọ ha use na gbinẹ aye ina tiẹn? O vwo iroro eghoghanren ri soriẹ o fo na kẹnoma rẹn uruemru ọfanrhiẹn. “Ọmase ro ghẹnren” na nọ ta: “Ame re sori ọ vi merhan.” (Prov. 9:17) Me yẹ “ame re sori”? Baibol na ọ ha irueruo ehware rẹ ihworho ri rọnmọ ne a riamerhiẹn, e dje ame rọ rhuọnrhuọn oma. (Prov. 5:​15-18) Esa ọrhẹ ane ina sabu mẹrẹn omamerhomẹ nẹ irueruo ehware uvuẹn orọnmo aye. Ọrẹn, ọrana ọ vẹnẹ “ame re sori.” Ame re sori ọnọ sabu mevirhọ irueruo ọfanrhiẹn. Ọgbọ buebun, e ruie uvuẹn odjahen, jerẹ oborẹ ohi o so ekwakwa uvuẹn odjahen. Ọnọ sabu họhọ taghene “ame re sori” na, ọ merhan orhianẹ ihworho re vwobọrhọ ye, e roro taghene awọrọ i vwa mẹrẹn aye-e. Ọrana ọphiẹrhọ obẹta! Jehova ọ mẹrẹn ekwakwa ephian. O vwo oborẹ ọ miamo oma ghwẹ ọrẹ ene je vwo ekwerhọ ọnẹye-en, omarana o vwo oborẹ “ọ merhan” uvuie-en.—1 Cor. 6:​9, 10. w23.06 22 ¶7-9

Me wu ne ruo orhianẹ wu vwa rha riamerhen owian aghwoghwo ọnọ-ọ, yanghene ẹrhomo ọnọ o vwo rho nẹ ẹhẹn sa-a? Wu vwe brorhiẹn taghene Jehova ọ sẹrerhumujo ne-e. Wẹwẹ ohworho rọ vwọ gba, habaye, iroro ọnana ọnọ sabu kpokpuo. Wu rha djokarhọ taghene oruru ọnọ o seriotọre, roro kpahen udje ọnyikọ Paul. Dedevwo Paul ọ damoma rọ nọ hẹrokele i Jesu, o rheri taghene ọkezẹko ẹhẹn yen ono ji seriotọre. Paul o vwo omwemẹ rọ nọ wian owian aghwoghwo na udabọ ebẹnbẹn ro rhiẹromẹrẹn. Omaran ọ ji havwọ, wu vwa lẹrhẹ iroro ijẹgba mwuo brorhiẹ-ẹn. Brorhiẹn wu ne ruẹ oborẹ ọgbare udabọ iroro wu vwori ephian. Wa rha damoma ruẹ oborẹ ọgbare ọke ephian, ọkezẹko, ọnọ lẹrhẹ iroro ọnọ serhọ.—1 Cor. 9:16. w24.03 11-12 ¶12-13

Ana sabu dje ẹguọlọ rẹn imizu ukoko na, nyoma re ne dede aye ruẹ oghwa ọwan yanghene rhiẹ uvwre igbehian ọwan. (2 Cor. 6:​11-13) Buebun ọwan i ha ukoko rẹ imizu ri nẹ ẹkwotọre sansan rhe, ri ji vwo iruemru ri vẹnẹren i havwọ. Ana sabu ruẹ ẹguọlọ re vwo kpahen aye gbanhonrhọ nyoma ra na tẹnrovi iruemru irhorhomu aye. Ọke arha ha ukẹro ri Jehova ọ ha ni awọrọ, e ni aye, ne djephia taghene e vwo ẹguọlọ kpahen aye. Ono rhiẹ oborẹ ọghanranren ne dje ẹguọlọ phia uvwre ukpokpogho rode na. Uvwrọke ukpokpogho rode na, bọgo ya na mẹrẹn usimi? Roro kpahen oborẹ i Jehova ọ ta rẹn ihworho yi nẹ aye i ru, ọke re fiuvweri haso i Babylon ọke ahwanren: “Ihworho mẹ, are i nyarhẹn riẹ ibuvun are, jeghwai kanren ighwe ze oma. Are i tiomanu ibiọke bọmọke ekwẹre mẹ ono zien.” (Isa. 26:20) Ọ họhọre taghene ẹmro erana i ji sekpahen ọwan ri na dẹrughwaroghwẹ ukpokpogho rode na. w23.07 6-7 ¶14-16

Vwo uruemru re roro te rẹn awọrọ. Nọ oma: ‘Ihworho a mẹriẹn vwrurhe taghene mie dje uruemru re roro te phia, ji kwerhọ iroro awọrọ? Gbinẹ e ni mẹ rhiẹ ohworho rọ mọrẹn urhi kokoroko, rọ djoma yanghene ro vwo kwerhọ iroro awọrọ? Mia kerhọ awọrọ ji kwerhọ oborẹ aye i tare orhianẹ oserhọ?’ Oborẹ ọwan e roro rẹn awan te, yo dje oborẹ ọwan a hẹrokele i Jehova ọrhẹ Jesu te. Uruemru re roro te o mevirhọ ọrẹ ene wene lele erhirhiẹ ọwan ro wenerin. Aruẹ ewene erana ina sabu suẹ akpọ ọgbogbanhon re vwe fiẹrorhọ rẹn ọwan. Ana sabu kpomu kpregede. Igho ọnọ sabu kanren, yanghene irueruo usuon oseghe uvuẹn ekete re rhirhiẹ ọnọ sabu wene akpenyerẹn ọwan. (Eccl. 9:11) Ewene uvuẹn ukoko i Jehova ọnọ sabu damu ọwan ni. Ana sabu nyerẹn ghele ewene ekpokpọ, arha kpare idjaghwẹ ẹne enana: (1) rhiabọ ha erhirhiẹ wu havwọ, (2) tẹnrovi obaro na, (3) djokarhọ ekwakwa irhorhomu uvuẹn akpenyerẹn ọnọ, ọrhẹ (4) ruẹ ekwakwa rẹn awọrọ. w23.07 21-22 ¶7-8

Ọmẹraro Daniel ọ ha uphuphẹn ọke itu i Babylon e mwuien, ji kpariẹ nẹ Jerusalem ro rhiẹ amwa re vwiẹ ye riẹ Babylon. Ọrẹn, ihworho ri mwu i Daniel ni djokarhọ uruemruie. Aye ni mẹrẹn oborẹ “onyakpọ ọ mẹrẹn”—taghene Daniel o “vwo upe owuorowu-u, o ji vwo erhumu,” habaye o nẹ ekrun ro titiri rhe. (1 Sam. 16:7) Fọkiẹ iroro erana, itu i Babylon ni yonirien nọ sabu wian uvuẹn egodo orodje na. (Dan. 1:​3, 4, 6) Jehova o vwo ẹguọlọ kpahen Daniel, fọkiẹ aruẹ ohworho rọ havwọ. Itiọrurhomẹmro, ọkezẹko Daniel ọ ha emrẹ ẹgbukpe 20 ọvo, ọke i Jehova ọ ta taghene Daniel ọ họhọ i Noah ọrhẹ Job, ri rhiẹ ihworho ri fuevwan ga i Jehova uvwre ẹgbukpe buebun. (Gen. 5:32; 6:​9, 10; Job 42:​16, 17; Ezek. 14:14) Jehova no ji vwo ẹguọlọ kpahen Daniel uvwre ọsoso akpenyerẹn yen.—Dan. 10:​11, 19. w23.08 2 ¶1-2

Orhianẹ wu brorhiẹn wu na dẹ oghwa, wu guọlọ ha ukẹro mẹrẹn oborẹ oghwa wu ne rhirhiẹ na ọ havwọ. Ana ji sabu ru aruẹ emru omaran ọke re se ji yono i Baibol na. Wu rhe brokpakpa seyi, wu na sabu yono ihwẹnmro ezẹko, nọyẹ “iyono erukaro sekpahen ẹmro Osolobrugwẹ.” (Heb. 5:12) Omarana, jerẹ oborẹ ene ruo rhẹ oghwa na, ofori na “ruẹ uvuẹn” i Baibol na, ji dabu ni iyẹnrẹn eghoghanren ri havwiẹ so. Izede rọ mai ghanren re ne yono i Baibol na, yẹ ọrẹ ana djokarhọ oborẹ eghọn sansan i ru surhobọmwu oborẹ a ya rhẹ eghwẹmro erọrọ. Damoma wu ne vwẹruọ irhomẹmro wu vwo imwẹro kpahen ọrhẹ oborẹ ọsoriẹ we vwo imwẹro kpahen aye. Na dabu vwẹruọ ọsoso iyẹnrẹn ri ha i Baibol na, ene vi gbẹro rhotọre yono irhomẹmro i Baibol na. Ọnyikọ Paul ọ ta rẹn Ilele Kristi erukaro na nẹ aye i dabu yono Ẹmro Osolobrugwẹ, neneyo aye i sabu “vwẹruọ oborẹ o keri te ọrhẹ oborẹ o seri te kugbe oborẹ o rhi te ọrhẹ oborẹ o kodo te fiotọre.” Ọke ọrana, aye ni na sabu vwo “esiri ọrhẹ emevigbanhon” ọgbogbanhon uvuẹn esegburhomẹmro na. (Eph. 3:​14-19) O ji fo ne ru te omaran. w23.10 18 ¶1-3

Baibol na o vwo idje ihworho buebun ri dje erhionrin phia. Ono rhomu wu rha dabu yono kpahen idje erana. Jerẹ udje, dedevwo a djẹ i David ha no rhiẹ orodje Israel ọke rọ ha uphuphẹn, ọrẹn ọ hẹrhẹ ẹgbukpe buebun ọ ki tuẹn usuon rhọ. Simeon ọrhẹ Anna i fuevwan ga i Jehova ọke aye a hẹrhẹ i Messiah re ve kpahen na. (Luke 2:​25, 36-38) Ọke we yono kpahen iyẹnrẹn erana, guọlọ ẹkpahenrhọ rẹn enọ enana: Me yọ sabu ha userhumu rẹn ohworho ọnana dje erhionrin phia? Marhẹ o ru mẹrẹn erere ọke ro dje erhionrin phia? Marhẹ mi ne ru hẹrokelie? Wu na ji sabu mẹrẹn erere ọke we rhe yono kpahen ihworho ri vwe dje erhionrin phia. (1 Sam. 13:​8-14) Wu na ji sabu nọ: ‘Me yọ soriẹ aye i vwe dje erhionrin phia? Me yo nerhumie rhe?’ w23.08 25 ¶15

Ọnyikọ Peter o vwo atamwu; ọ ha uphẹn rẹn emru owuorowu nọ lẹrhiẹ fiobọrhotọre phẹlẹphẹlẹ-ẹ. O dje atamwuiẹ phia uvuẹn erhirhiẹ owu ọke i Jesu ọ tẹmro rẹ idibo yi, i vwa dabu vwẹruọ ye. (John 6:68) Ihworho buebun ni sẹrerhumuji Jesu, aye a hẹrhiẹ no djeyi fiotọre rẹn aye-e. Ọrẹn, Peter ọ hẹrhẹre. O rheri taghene Jesu ọvo yo vwo “ẹmro rọ yẹ ohworho arhọ i bẹmẹdẹ.” Jesu o rheri taghene Peter ọrhẹ inyikọ ri hẹrhẹre, ina sẹrerhumuji vwo. Ọrẹn, Jesu o fiudugbere taghene Peter ọnọ rharhumu rhe, ji sẹrorẹ atamwuiẹ. (Luke 22:​31, 32) Jesu o vwẹruọ ye taghene “omwemẹ na ọ havwiẹ, ọrẹn ugboma na ọ vwiẹlẹre.” (Mark 14:38) Omarana, ọke i Peter ọ tobọ tiẹn Jesu hin, Jesu ọ sẹrerhumuji Peter vwo-o. Ọke ra rhọmọ i Jesu hin, nọ rharhumu homaphia rẹn Peter—ọke i Peter ọ ha ekete kologho. (Mark 16:7; Luke 24:34; 1 Cor. 15:5) Ọrana ọ ghini bọn Peter rẹ ẹhẹn yen o seriotọre gbanhon! w23.09 22 ¶9-10

Jehova ọ harhomẹ, yanghene kpariroro vrẹn edandan ihworho ri vwo esegburhomẹmro kpahiẹn. Ọ harhomu aye phẹlẹphẹlẹ, ọ vwọ ji sẹrorẹ edandan na-a. (Ps. 32:​1, 2) O se aruẹ ihworho erana evwata ri vwe vwo upe, fọkiẹ esegburhomẹmro aye. Dedevwo e se Abraham, David, ọrhẹ awọrọ ri fuevwan ga i Jehova evwata, aye jẹ iruedandan ri vwa gba. Ọrẹn, fọkiẹ esegburhomẹmro aye, Osolobrugwẹ no nirin aye rhiẹ eri vwe vwo upe, maido arha haye vwanvwọn ihworho ri vwe vwo esegburhomẹmro kpahiẹn. (Eph. 2:12) Jerẹ oborẹ ọnyikọ Paul o dje fiotọre uvuẹn ileta ye, ene vi vwo esegburhomẹmro na sabu rhiẹ ugbehian i Jehova. Abraham ọrhẹ David igbehian i Jehova fọkime aye i vwo esegburhomẹmro, ọwan ina ji sabu rhiẹ ugbehian yen. w23.12 3 ¶6-7

Inyenana, Ilele Kristi ephian i vwo uphẹn aye ine ze izobo rẹn Jehova nyoma aye ina ha ọke, omẹgbanhon ọrhẹ ekwakwa aye i vwori hobọtua owian Uvie Osolobrugwẹ. Ana sabu djephia taghene a ha ukẹro ọghoghanren ni uphẹn ra na ga i Jehova nyoma re ne ruẹ ekete omẹgbanhon ọwan o teri uvuẹn ogamiẹ. Ọnyikọ Paul nọ hunute eghọn sansan uvuẹn ogame ọwan ro vwo fo na sẹrerhumuji. (Heb. 10:​22-25) Enana i sekpahen ọrẹ ana nẹrhomo vwe i Jehova, ghwoghwo ifiẹrorhọ re vwori, vwoma kugbe uvuẹn uyono ukoko, ji ha urhebro rẹn owuowọnwan “maido rẹ ẹdẹ [i Jehova] o tiẹ kẹrẹ ne na.” Uvuẹn obẹta iyẹnrẹn ọbe i Revelation, ọmakashe i Jehova nọ kanrunumwu ẹmro ọnana ọgbeva: “Ha ẹga rẹn Osolobrugwẹ!” (Rev. 19:10; 22:9) Jena rha karorhọ urhomẹmro ọghoghanren ọnana kpahen oghwa ẹga i Jehova, ọrhẹ obọdẹn uphẹn re vwori ra na ga Osolobrugwẹ rode ọwan! w23.10 29 ¶17-18

Ọwan ephian i guọlọ “rhe vwo ẹguọlọ kpahen owuowọnwan.” Ọrẹn, ọghanranren na karorhọ taghene Jesu ọ ha orhetio phia taghene “ẹguọlọ ihworho buebun [ono] seriotọre.” (Matt. 24:12) Jesu ọ vwọ ta taghene idibo yi buebun, i rhe dje ẹguọlọ phia-a. Ọrẹn, ofori na jomarhotọre neneyo uruemru akpọ na ro vwo dje ẹguọlọ phia, nọ jọ hobọte ọwan. Omarana, jene yono kpahen onọ ọghoghanren ọnana: Me yọ nọ ha userhumu rẹn ọwan rhe sẹ ẹguọlọ re vwo kpahen imizu ukoko na, ọ gbanhonron? Izede owu ene ru rhe oborẹ ẹguọlọ ọwan ọ gbanhon te, yẹ ọrẹ ana djokarhọ oborẹ e ruẹ lele uvuẹn erhirhiẹ ezẹko uvuẹn akpenyerẹn ọwan. (2 Cor. 8:8) Ọnyikọ Peter ọ hunute aruẹ erhirhiẹ owu: “Ọrọ mai ghanren, are i vwo ẹguọlọ okokodo kpahen omomare, fọkime ẹguọlọ o rhurhu edandan buebun.” (1 Pet. 4:8) Omarana, ovwiẹlẹme ọrhẹ ijẹgba awọrọ ọnọ sabu damu ẹguọlọ ọwan ni. w23.11 10-11 ¶12-13

Ọwan i vwa huvwele akama i Jesu na-a, orhianẹ e dje guọlọ rẹn imizu na ezẹko ọvo. Itiọrurhomẹmro, ana sabu kẹrẹ imizu ezẹko ghwẹ awọrọ, jerẹ oborẹ ọ ji phia rẹn Jesu. (John 13:23; 20:2) Ọrẹn, ọnyikọ Peter ọ karorhọ ọwan taghene ofori ne dje “ẹguọlọ imizu”—ro rhiẹ aruẹ onyerẹnkugbe ekrun—phia rẹn imizu ukoko na. (1 Pet. 2:17) Peter ọ ta rẹn ọwan ne vwo “ẹguọlọ kpahen owuowọnwan nẹ ẹhẹn rhe.” (1 Pet. 1:22) Uvuẹn oghwẹmro ọnana, ne vwo ẹguọlọ “okokodo” o surhobọmwu ọre ne vwo ẹguọlọ kpahen ohworho ọrhọ tobọ bẹn re ne ru te omaran. Jerẹ udje, me ye ne ruo orhianẹ omizu owu o ruru ọwan sọ? Ẹhẹn ọwan ọnọ sabu ta rẹn ọwan ne ru kele, ukperẹ ene dje ẹguọlọ phia. Ọrẹn, Peter o yono mie i Jesu taghene orukele ọ vwọ merhen i Jehova oma-a. (John 18:​10, 11) Peter nọ yare: “Are i vwa ha ọdandan kwosa ọdanda-an, yanghene ha aruehinmo kwosa aruehinmo-o. Ukpomaran, are i ha ebrurhọ kwosa.” (1 Pet. 3:9) Ha uphẹn rẹn ẹguọlọ okokodo no mwuo dje irueruo esiri ọrhẹ uruemru re roro rẹn awọrọ phia. w23.09 28-29 ¶9-11

O gbe ọwan unu oborẹ ọmọvwerhe o ru dua phẹphẹrẹ rhiẹ omirẹghwa. Nọ họhọre taghene ọdo na ọ guọlọ omẹdamu owuorowu-u. Ọrẹn, ọdo Olele Kristi ọ guọlọ omẹdamu. (1 Cor. 13:11; Heb. 6:1) Na sabu nyamwu ẹkẹ ọrana, o fori ne vwo onyerẹnkugbe rọ kpẹnkpẹnren rhẹ Jehova. O ji fo ne vwo ẹhẹn ọfuanfon na, neneyo a sabu dje iruemru ọga Osolobrugwẹ phia, vwo ena sansan, ji mwuegbe hẹrhẹ ewian obaro na. (Prov. 1:5) Jehova ọ ma ituakpọ rhiẹ ọmase yanghene ọhworhare. (Gen. 1:27) Itiọrurhomẹmro, ehworhare ọrhẹ emẹse i vwo omẹhaphia rọ vẹnẹren, aye i ji vẹnẹ uvuẹn erhirhiẹ erọrọ. Jerẹ udje, Jehova ọ ma ehworhare ọrhẹ emẹse nẹ aye i wian ewian kirighwo, omarana, aye i guọlọ iruemru ọrhẹ ena ri na ha userhumu rẹn aye wian ewian aye sansan gba.—Gen. 2:18. w23.12 18 ¶1-2

Jesu ọ guọlọre nẹ awọrọ i ha odẹ Ọsẹ ye na ruiruo? Ee. Ilori ẹga ezẹko i tare taghene odẹ Osolobrugwẹ ọ fon phan re ne se, ọrẹn Jesu ọ ha uphẹn rẹn irueruo erana ri vwe nẹ i Baibol rhe, dobọ ye ji nọ jọ ha odẹ Ọsẹ ye na ruiruo-o. Roro kpahen ọke ro simi ọhworhare owu rẹ ikpodje e kpokpo uvuẹn amwa re se Gerasene. Ofẹn no mwu ihworho na, aye ni rẹ Jesu no nẹ amwa na, omarana ọrhọ daji-i. (Mark 5:​16, 17) Ọrẹn, Jesu ọ guọlọre ne rhe odẹ i Jehova uvuẹn amwa na. Omarana, nọ ta rẹn ọhworhare ro simirin na nọ ta rẹn ihworho kpahen oborẹ i Jehova o ru riẹn, ukperẹ ono rhiẹ oborẹ i Jesu o ruru. (Mark 5:19) Ọrana yẹ oborẹ i Jesu ọ ji guọlọ mie ọwan inyenana—ne ghwoghwo odẹ i Jehova lele akpọ na ephian! (Matt. 24:14; 28:20) Erhe ru ẹkẹ ro teri ọwan, na lẹrhẹ oma merhen Orodje ọwan, Jesu. w24.02 10 ¶10

O rhiẹ emru omamerhomẹ taghene a ha usuẹn ukoko i Jehova uvwre ẹdẹ ri koba enana. Udabọ erhirhiẹ akpọ ọnana ro biomẹrhọ na, Jehova ọ yẹrẹ ọwan ekrun ro vwo okugbe ọrhẹ ẹguọlọ. (Ps. 133:1) Ọ ha userhumu rẹn ọwan ephian uvuẹn ekrun na, vwo obọdẹn ẹguọlọ kpahen owuowọnwan. (Eph. 5:33–6:1) Ọ ji yẹ ọwan ẹghwanren ọrhẹ oniso na sabu vwo obọdẹn ufuoma. Ọrẹn, a guọlọ omẹdamu mie ọwan na sabu fuevwan ga i Jehova. Mesoriẹ? Awọrọ ina sabu ru ọwan sọ, fọkiẹ ijẹgba aye. Ọnọ ji sabu bẹn ra na harhomu oma ọwan, maido orhianẹ e ruẹ orusọ owu ọgbọ buebun ne. O fori ne fiomarhọ ogame i Jehova orhianẹ (1) omizu ukoko na o ruru ọwan sọ, (2) ohworho ra rọnmọ o ruẹ oborẹ e vwe fiẹrorhọ, ọrhẹ (3) e ruẹ oborẹ e vwe fiẹrorhọ. w24.03 14 ¶1-2

Ne ọke ya ruọke, wu ne rhon kpahen oborẹ imizu sansan i ru fiomarhọ ogame i Jehova vuọnvuọn. Ọkezẹko aye i riẹ Isukuru Ighwoghwẹmro Uvie na, yanghene ya ga uvuẹn ekete ra mai guọlọ userhumu. Wu rhe vwo uphẹn na, bru ẹkẹ ọnana tẹ oma. Oma ọ merhen ihworho i Jehova, aye ine kerabọ owian aghwoghwo aye. (Acts 16:9) Ọrẹn, wa rha sabu ru te omaran vwo? Wu vwe roro taghene wa ghanren te ihworho ri ru te omara-an. Ọ ghanranren omamọ nẹ Olele Kristi orho dje edirin phia. (Matt. 10:22) Karorhọ taghene wu rha ha ọsoso omẹgbanhon ọnọ ga i Jehova udabọ erhirhiẹ ephian wu havwọ, ọrana yọ lẹrhẹ oma merhiẹn. Ọrana izede ọghoghanren owu wu ne leli Jesu ọke ephian wu rhe bromarhame hin.—Ps. 26:1. w24.03 10 ¶11

Jehova o veri taghene arha ghwẹriẹ nẹ edandan ọwan, ọnọ harhomu ọwan. (Ps. 86:5) Omarana, ana sabu vwo imwẹro taghene oborẹ i Jehova ọ tare urhomẹmro. Karorhọ taghene Jehova o roro rẹn ọwan. O vwo fiẹrorhọ taghene ene ru vrẹn ekete omẹgbanhon ọwan o teri-i. Omarana, oma ọ merhiẹn erhe ru ekete omẹgbanhon ọwan o teri. Habaye, roro kpahen idje ihworho uvuẹn i Baibol na, ri fuevwan ga i Jehova. Udje owu yẹ ọnyikọ Paul. O fiomarhọ owian Uvie na vuọnvuọn uvwre ẹgbukpe buebun, nyoma rọ nya iroko buebun ji ha ikoko sansan mwu. Ọrẹn, ọke erhirhiẹ ye o wene, ọ vwọ rhọ sabu wian buẹn te ọke bi-i, ọrana no mevirhọ taghene oma ọ vwọ rhọ merhen Osolobrugwẹ kpahiẹ-ẹn? Ẹjo. O ruẹ ekete omẹgbanhuiẹn o teri, Jehova nọ ji ha ebrurhọ riẹn. (Acts 28:​30, 31) Omaran ọ ji havwọ, orhiẹ ọke ephian ya na sabu ru te oborẹ e ruẹ bi-i. Ọrẹn, oborẹ ọ mai ghanren rẹn i Jehova, yẹ ẹhẹn re ruie. w24.03 27 ¶7, 9

Nyoma ẹrhomo rọ nẹ vwe i Jehova, Jesu no dje udje rẹ idibo yi ine lele. Uvuẹn ọsoso owian aghwoghwo yi, Jesu ọ nẹrhomo ọgbọ buebun. Fọkime Jesu o vwo ewian buebun, habaye ihworho buebun e ji kinhariẹ ye, nọ kwaphiẹ ọke rhọ rọ nọ nẹrhomo. (Mark 6:​31, 45, 46) Jesu ọ rhọmọren igidurhiọke neneyo ọ sabu vwọ ọke kologho rọ nọ nẹrhomo. Uvuẹn erhirhiẹ owu, ọ nẹrhomo ọsoso ason na, bọmọke o ki brorhiẹn ọghoghanren owu. (Luke 6:​12, 13) Jesu ọ ji nẹrhomo ọgbọ buebun uvuẹn ason na bọmọke o ki hwu, ọke rọ tẹnrovi oborẹ ono ru wian owian yen rọ mai gbanhon uvuẹn otọrakpọ na gba. (Matt. 26:​39, 42, 44) Udje i Jesu o yonirin ọwan taghene o vwo oborẹ ewian i bun te-e, o fori ne fiẹ ọke rhotọre nẹrhomo. Jerẹ i Jesu, ana sabu kwaphiẹ ọke rhotọre nẹrhomo—ọkezẹko ana sabu rhọmọ igidurhiọke yanghene rhiotọre ibiesuọn uvuẹn owuọwọn. Erhe ruẹ omaran, ne djephia rẹn Jehova taghene e vwo ọdaremẹro kpahen ẹghẹlẹ ẹrhomo ẹnẹ. w23.05 3 ¶4-5

Djokarhọ ẹmro na ‘fi rhẹ ọmudu ọwan’ ra hunute oberun na. Ọbe owu ra rionbọrhọ, nọ ha ẹguọlọ i Jehova dje usurhẹn ame. Idjedje ọrana o ghini djeyi fiotọre taghene Jehova o vwo ẹguọlọ okokodo kpahen era djẹha na! Era djẹha na i rheri taghene “Osolobrugwẹ o vwo ẹguọlọ kpahen” aye. (Jude 1) Ọnyikọ John o dje kpahen iroro aye ọke rọ ya: “Ni oborẹ Ọsẹ na o vwo ẹguọlọ kpahen ame te, ọrẹ ene se ame emọ Osolobrugwẹ!” (1 John 3:1) Era djẹha na ọvo yi Jehova o vwo ẹguọlọ kpahen? Ẹjo, Jehova o dje ẹguọlọ ye phia rẹn ọwan ephian ne. Izede ọghoghanren ọgo yi Jehova o ru dje ẹguọlọ phia? Nyoma otan na—Jehova ọ nyoma yen dje ẹguọlọ okokodo phia!—John 3:16; Rom. 5:8. w24.01 28 ¶9-10

Oghwẹmro rọ ha oberun na o dje izede ri David o ru fiẹ ofẹn yen kparobọ. Dedevwo arhọ ye ọ ha erhirhiẹ imwofẹn, ọ dabu roro kodo kpahen oborẹ i Jehova ono ru riẹn obaro na. David o rheri taghene Jehova ono simie uvuẹn ọke ro serhọ. Fọkime i Jehova ọ tare taghene i David yẹ orodje ro no suẹn Israel. (1 Sam. 16:​1, 13) Harẹn i David, kemru kemru ri Jehova o veri ono vi rugba. Me yi Jehova o veri taghene ono ru wẹn? Ọwan i vwe fiẹrorhọ taghene i Jehova ono simi ọwan nẹ edamuni ephia-an. Ọrẹn, o toro edamuni wu na dẹrughwaroghwu uvuẹn akpọ ọnana-a, Jehova ono tiẹ aye nie uvuẹn akpọ ọkpokpọ rọ sa na. (Isa. 25:​7-9) Ọmemama ọwan o vwo omẹgbanhon rọ nọ rhọmọ eri hwuru na, simi ọwan, ji tiẹ evwreghrẹn ọwan nie.—1 John 4:4. w24.01 6 ¶12-13

Roro kpahen omẹhakpahontọre ọrhẹ omebrurhame ọnọ. Wu kpare idjaghwẹ erana fọkime wu guọlọ daji obọrẹ i Jehova. Roro kpahen oborẹ ọ ha userhumu wẹn vwo imwẹro taghene wu mẹrẹn urhomẹmro na ne. Wu dabu vwe irherhe ọgbagba kpahen Jehova, ọghọ ọrhẹ ẹguọlọ wu vwo kpahiẹn no kodorhọ. Ne wu vwo esegburhomẹmro, ọrana no mwuruon ghwẹriẹ. Ne wu tiobọnu irueruo esọsọ, ji ru lele ọhọre i Jehova. Oma ọ merhenruọn ọke we rhe taghene Jehova ọ harhomuo ne. (Ps. 32:2) Nu we riẹ uyono ukoko, ji ghwoghwo rẹn awọrọ kpahen ekwakwa irhorhomu wu yono ne. Fọkime wu homakpahontọre ji bromarhame ne, wa nya uvuẹn izede ro suẹn riẹ arhọ vwana, brorhiẹn wu ne je beghe nẹ izede ọrana. (Matt. 7:​13, 14) Jene mevigbanhon, ne je kpogho uvuẹn ogame ra harẹn Jehova, ji dje ẹguọlọ phia ọke ra nyalele irhi enẹyen. w23.07 17 ¶14; 19 ¶19

We rhe roro kodo kpahen ẹrhomo omẹhakpahontọre ọnọ rẹn i Jehova, wu ne vwo omẹgbanhon wu na tiẹn edamuni ephian. Jerẹ udje, wu lele esa yanghene ane ọwọrọ ruẹ irueruo obẹlẹme-e, gbinẹ wu ne ruie? Ẹjo! Fọkime wu ve rẹn i Jehova ne taghene wu na sẹrerhumuji ekwakwa erana. Wu rha tiẹn ojemẹ esọsọ ne, wu rhe brudu taghene aye ine kpokpo ẹhọn wu rhe bromarhame hi-in. Ọke ọrana, ne wu na sabu “kẹnoma” rẹn “izede ọvwọkon na.” (Prov. 4:​14, 15) Wu rha karorhọ omwemẹ ri Jesu o djephia nọ sabu lẹrhẹ oma merhen Ọsẹ ye, ọnọ lẹrhuọ kiki tiẹn kemru kemru ri Jehova o vwo utuoma kpahen, ro rhiẹ ohworho wu homakpahontọre riẹn ne. (Matt. 4:10; John 8:29) Itiọrurhomẹmro, ebẹnbẹn ọrhẹ edamuni a yọ uphẹn wu ne djephia taghene wu guọlọ rhe leli Jesu. We rhe ruẹ ọnana, vwo imwẹro taghene Jehova ọnọ ha userhumu wẹn. w24.03 9-10 ¶8-10