ENỌ IPHUPHẸN A NỌ
Marhẹ Mi Ne Ru Sabu Ha Ọke Mẹ Ruiruo Izede Ro Serhọ?
Mesoriẹ o fo ne wu ha ọke ọnọ ruiruo izede ro serhọ?
Ọkẹ ọ họhọ igho. Wu rha ghwọghiẹ fughwẹ, wu sabu mẹriẹn ha ruiruo ọke wa guọliẹ-ẹ. Ọrẹn, wu rha dabu kwaphiẹ ọkẹ ọnọ rhọ, wu na mẹrẹn uphẹn wu ne ruẹ ekwakwa wu guọlọre!
Uruemru-urhi Baibol: “Ọvwiẹlẹ o vwo edamẹ enẹyen, ọrẹn o vwo emru owuorowu-u, Ọrẹn ọgbowian ọnọ mẹrẹn evwan ẹvuọn.”—Proverbs 13:4.
Oborẹ ọ mai ghanren: Wa rha ha ọke ọnọ ruiruo izede ro serhọ, wu ne vwo ugbomọphẹ rhọ.
Ọke ẹha ruiruo izede ro serhọ oborẹ ọnọ ha userhumu wẹn tobọ te ọke wu rhe te omirẹghwa ne. Ọnọ sabu lẹrhuọ daji uvuẹn iruo ọnọ yanghene lẹrhuọ kpare iruo na fughwẹ. Jerẹ oborẹ ọ havwọ, wu rhe vwo eyi wa sua, wu na ha uphẹn rẹn ọrọ wian wẹn rọ rhiẹ iruo kerhumu ọke ephian nọ daji uvuẹn iruo na?
Uruemru-urhi Baibol: “Ohworho rọ fuevwan kpahen oborẹ ọ kamurun, ọnọ ji fuevwan kpahen oborẹ o bunrun.”—Luke 16:10.
Oborẹ ọ mai ghanren: Oborẹ wa ha ọke ruiruo lele o dje aruẹ ohworho wu havwọ phia.
Itiọrurhomẹmro, ọ lọhọ ra na ha ọke ruiruo izede ro serhọ-ọ. Roro kpahen egbogbọse enana.
Egbobọse #1: Igbehian
“Igbehian mẹ i rha ta mẹ ni mi lele aye riada, joma ọke ephian yi mia guọlọ lele aye ọrhọ tobọ rhianẹ mie vwo ọke na-a. Ni mia ta uvuẹn ẹhẹn mẹ, ‘Ẹmm, mi na wian owian na kpakpata mi rhe te oghwa.’ Orhiẹ ọke ephian yọ wia-an, ekwakwa buebun ne ji sesọ.”—Cynthia.
Egbobọse #2: Ọgbanrhọ
“Ekpetughe ọ họhọ oborẹ a ha kwerhe oghwa rọ kwrọ eyẹn ha. Ọ ha ọke ọnọ nyoma ekwakwa rẹ aye e jirẹ uvuẹn iruẹn ọrhẹ udje, ro rhiẹ oborẹ ọ bẹnren ra na sabu ten.”—Ivy.
“Mia sabu ghwọghọ inọke buebun rhẹ ifonu mẹ. Ọ da mẹ omamọ taghene ọke ibatri ifonu mẹ o hin ọvo, yi mia dobọjẹ.”—Marie.
Egbobọse #3: Uruemru ra kpare ẹdẹ
“Mia kpare ẹdẹ mi na wian owian isukuru mẹ ọrhẹ ewian erọrọ ro fori mi wian. Mia ghwọghọ ọke mẹ ruẹ ekwakwa ri vwa ghanren vwẹre mia ki ya wian owian isukuru mẹ—uruemru ọnana ọsọre omamọ.”—Beth.
Wa rha ha ọke ọnọ ruiruo izede ro serhọ, wu ne vwo ugbomọphẹ rhọ
Oborẹ wu na sabu ru
Ya owian wa guọlọ wian rhotọre. Ewian jerẹ owian oghwa ọrhẹ owian isukuru ọnọ. Ya ọke wu guọlọ ghwọghọ rhẹ owian owuowu uvuẹn ọkprughwre owu.
Uruemru-urhi Baibol: “Dabu gbẹro rhẹ ekwakwa ri mai ghanren.”—Philippians 1:10.
Ya ekwakwa wu guọlọ ru uvuẹn ọke omeronmo ọnọ rhotọre. Ọnana ọnọ sabu sekpahen itanẹti ẹha ruiruo ọrhẹ ekpetughe wu ne ni. Ọgbọrọrọ, ya inọke wa ghwọghọ rhẹ ekwakwa enana owuowu uvuẹn ọkprughwre owu.
Uruemru-urhi Baibol: ‘Rha ha ẹghwanren ruiruo . . . , ne wu ha ọke ọnọ ruiruo izede rọ mai serhọ.’—Colossians 4:5.
Vwo ẹkwaphiẹrhotọre. Rharhumu ni ekwakwa eva wu ya rhotọre na. Wu dabu nyajẹ obọdẹn ọke vwo rẹn ekwakwa ri mai ghanren? Wu na ha ibiẹ ọke nẹ ọke wu na ghwọghọ rhẹ ekwakwa erọrọ?
Urhebro: Ya oborẹ wu ne ru kẹdẹkẹdẹ rhotọre, rhe ni owuowu sua wu rhe ruie hin.
Uruemru-urhi Baibol: “Ohworho rọ dabu djẹ iroro ono fikparobọ.”—Proverbs 21:5.
Nyamwu ẹkwaphiẹrhotọre ọnọ. Itiọrurhomẹmro, neneyo wu sabu ruẹ ekwakwa ri mai ghanren, orhiẹ use akpẹriọ ephian ye wu ne kwerhọ-ọ. Obẹtaye, wu na mẹrẹnvwrurhe taghene wu vwo ọke buebun wu ne ruẹ ekwakwa erọrọ—ne wu na dabu riamerhiẹn.
Uruemru-urhi Baibol: “Are i fioma rhọ owian, are i vwa vwiẹlẹ-ẹ.”—Romans 12:11.
Ronmoma—ọrẹn o vwo jiri pha-an. Uphuphẹn ọgbọtọ re se i Tara nọ tare: “Ọkezẹko mi rhe ru ekwakwa eva mi ya rhotọre hin, ni mie roro, ‘Orhomoma, mi na sabu ni ekpetughe iminiti 15, orho ru ni mi na rharhumu ya wian.’ Iminiti 15 no riẹ iminiti 30, iminiti 30 no riẹ unọke owu, mi ki me notọre so, mi ghwọghọ inọke eva rhẹ ekpetughe ne!”
Me wu ne ruo? Ni akpẹriọ jerẹ osẹkwa wa mẹrẹn wu rha wian owian ọnọ hin ne—ukperẹ wu me nie jerẹ oborẹ ono vi rhiẹ usuẹn oborẹ wu ne ruo kẹdẹkẹdẹ.
Uruemru-urhi Baibol: “O vwo oborẹ orhomu ghwẹ ọrẹ onyakpọ ọnọ re, da jeghwai mẹrẹn omamerhomẹ uvuẹn owian ọnẹye-en.”—Ecclesiastes 2:24.