Marhẹ i Baibol na Ono ru ha Userhumu mẹ?—Obọreva: Riamerhen Isese i Baibol

Uphuphẹn ọhworhare owu re se Will nọ tare taghene, “Baibol na ọ vwọ merhen ese-e, orhianẹ we rhe oborẹ wu ne seyi lele-e.”

Wu guọlọ rhe oborẹ wu ne ru riamerhen isese i Baibol? Urhomu-ẹmro ọnana ọnọ ha userhumu wẹn.

• Roro Kpahen Ihworho Ọrhẹ Erhirhiẹ Sansan Uvuẹn i Baibol na

• Guọlọ riarorhọ!

• Oborẹ otuẹdẹruọ a ta

Roro Kpahen Ihworho Ọrhẹ Erhirhiẹ Sansan Uvuẹn i Baibol na

Fiomarhọ ekete we se na. Wu na sabu ha ona ọnana ruiruo:

1. Sanọ ikuegbe i Baibol wu guọlọ yono kpahen. Wu na sabu sanọ oborẹ ọ phiare uvuẹn i Baibol yanghene ikuegbe ro sekpahen Jesu, yanghene wu na sabu sanọ ikuegbe iruẹn udje isese i Baibol rọ ha uvuẹn jw.org.

2. Se ikuegbe na. Wẹwẹ ọvo ina sabu seyi rẹn omobọ, yanghene wẹwẹ rhẹ igbehian enọ ọrhẹ ihworho ekruon ina sabu seyi kugbe. Owuọnwan ọnọ sabu ha ẹrhẹ ogbikun, nẹ awọrọ i ha ẹrhẹ erọrọ.

3. Damu owu usuẹn irorẹdjẹ enana yanghene erọrọ:

   • Sin ifoto ri dje kpahen ikuegbe na. Yanghene sin ifoto ri dje kpahen erhirhiẹ sansan ri phiare. Ha ẹmro dje oborẹ ọ phia uvuẹn erhirhiẹ owuowu.

   • Sin ekpeti. Jerẹ udje, ọke we se kpahen owuọwan rọ fuevwan, roro kpahen iruemru ohworho na ọrhẹ idjaghwẹ rọ kparare ro lele fiẹ ebrurhọ ro vwori.

   • Wene ikuegbe na riẹ iyẹnrẹn ra haphia. Nẹ iyẹnrẹn na izede sansan, jeghwai “rhonmie” ohworho rẹ ikuegbe na o vi sekpahen ọrhẹ iseri ri havwiẹ.

   • Orhianẹ owuọwan uvuẹn ikuegbe na o brorhiẹn rọ sọre, gbe roro kpahen oborẹ ọnọ phia orhianẹ o brorhiẹn ẹghwanren. Jerẹ udje, roro kpahen ọke i Peter ọ tiẹn i Jesu. (Mark 14:66-72) Me yi Peter ọ sabu ru bi no fi ọhiẹn na kparobọ?

   • Orhianẹ wu vwo omamerhomẹ kpahen iruẹn, gba ya iruẹn udje ra bọn kpahen ikuegbe i Baibol ọnọ. Hunute iyono ra na sabu yono nẹ ikuegbe na rhe.—Romans 15:4.

     

Guọlọ riarorhọ!

Wu rha dabu ni erhirhiẹ owuowu fiotọre, wu na mẹrẹn ekwakwa eghoghanren ri tiomanu uvuẹn ikuegbe na. Itiọrurhomẹmro, ọkezẹko ẹmro owu yanghene eva uvuẹn ikuegbe i Baibol na ọ ghanranren omamọ.

Jerẹ udje, ha Matthew 28:7 vwanvwọn Mark 16:7.

• Mesoriẹ i Mark ọ ta taghene Jesu ọnọ homaphia rẹn idibo na “ọrhẹ Peter”?

• Oborẹ ọnọ sa erhumu: Mark ọ ha avwaye ọke ekwakwa erana a phia-a; omarana o fiotọre taghene Peter yọ nẹ iyẹnrẹn riẹn.

• Ekwakwa eghoghanren ri tiomanu: Mesoriẹ i Peter ọ rharhumu vwo imwẹro ọke ro rhon taghene Jesu ọ guọlọ rharhumu mẹriẹn? (Mark 14:66-72) Marhẹ i Jesu o ru djephia taghene ọye obọdẹn ugbehian rẹn Peter? Marhẹ wu ne ru hẹrokele i Jesu, jeghwai rhiẹ obọdẹn ugbehian rẹn awọrọ?

Wu rhe roro kpahen ihworho ọrhẹ erhirhiẹ sansan uvuẹn i Baibol na, jeghwai guọlọ riarorhọ, isese i Baibol ọnọ nọ nọ merhoma.