Hẹrokele Omeriotọre i Jehova

1. Me yọ merhuọn oma kpahen omeriotọre i Jehova?

IHWORHO re suẹn inyenana, e dje uruemru omeriotọre phia? Ọkezẹko. Ọrẹn, Jehova ro rhiẹ Ọrọmaigbanhon na, o vwo omeriotọre. (Ps. 113:​5-8) Jehova ọ vwọ kparoma kakaka-a. Uvuẹn urhomu-ẹmro ọnana, ene yono kpahen iruemru ẹne usuẹn iruemru ri Jehova o vwori, ọrhẹ oborẹ aye i ru djephia taghene Jehova o vwo omeriotọre. Ene ji yono kpahen oborẹ i Jesu o ru hẹrokele omeriotọre Ọsẹ ye. Erhe yono kpahen iruemru enana, ọnọ ha userhumu rẹn ọwan tikẹrẹ i Jehova rhọ, ji hẹrokele omeriotọre ọnẹyen.

JEHOVA OHWORHO RA SABU TẸMRO RIẸN

2. Me yi Psalm 62:8 ọ ta kpahen i Jehova? (Ji ni ọbe na.)

² A vwa sabu tẹmro rẹn ihworho ra kparoma-a. Habaye, ihworho ra kparoma e ruẹ awọrọ gbalogbalo, ọnana nọ lẹrhẹ ihworho kẹnoma rẹn aye. Ọrẹn, ọ merhoma omamọ taghene Jehova ọ vwọ kparoma-a! Omeriotọre i Jehova yo mwurien ha use rẹn ọwan ne tikẹriẹ, ji ta riẹn kpahen ebẹnbẹn ọwan. (Se Psalm 62:8.) Jerẹ oborẹ ọsẹ ro vwo ẹgwọlọ ọ kerhọ emọyen, omaran i Jehova ọ ji kerhọ ẹrhomo idibo yi. Itiọrurhomẹmro, o vwo ẹrhomo buebun ra nẹ iyẹnrẹn aye rhẹ i Baibol na, ri djephia taghene Jehova ọ kerhọ ẹrhomo. Ọnana o djephia taghene Jehova ohworho ra na sabu tẹmro riẹn. (Josh. 10:​12-14; 1 Sam. 1:​10-18) Ọrẹn, me ye ne ruo orhianẹ e roro taghene e mwuovwan ra na nẹrhomo vwe i Jehova-a?

3. Mesoriẹ o mwuo ẹro taghene Jehova ọ gwọlọre ne wu rha nẹrhomo vwe yi?

³ Ana sabu nẹrhomo vwe i Jehova, arha tobọ roro taghene e mwuovwan ẹgwọlọ ye-e. Mesoriẹ? Uvuẹn udje i Jesu kpahen ọmọ osoghoro na, Jesu ọ ha i Jehova dje omamọ ọsẹ ro rhiabọ dede ọmọ osoghoro na ro roro taghene o mwuovwan rẹ ọsẹ ye ọnọ harhomie-e. Me yẹ ọsẹ na o ruru ọke rọ mẹrẹn ọmọ na? Jesu nọ tare taghene ogege ọsẹ na ọ mẹrẹn ọmọ na, “nọ zẹ bruie jeghwai gbaliẹ ji fiọnfiẹn rhẹ ẹgwọlọ.” (Luke 15:​17-20) Jehova ọ họhọ ọsẹ ọrana. Ogege i Jehova orho rhon ẹrhomo ihworho ẹhẹn aye o seriotọre fọkiẹ orusọ aye i ru vrẹn ne yanghene ọfiamu akpọ, omeriotọre no mwuien kpahanrhọ ẹrhomo aye. (Lam. 3:​19, 20) Aruẹdọn ri Jehova o vwo kpahen ọwan, yo mwuien yẹ ọwan imwẹro taghene o vwo ẹgwọlọ ọrhẹ arodọmẹ kpahen ọwan. (Isa. 57:15) Marhẹ i Jehova o ru ha userhumu rẹn ọwan inyenana? Ọgbọ buebun, Jehova ọ ha ekpako ukoko, ihworho ekrun ọwan ra ga i Jehova, ọrhẹ imizu ukoko na sa ọwan erhumu. (Jas. 5:​14, 15) Jehova o tiobọnẹ userhumu rẹn ọwan, fọkime ọ gwọlọre ne tikẹriẹ.

4. Marhẹ i Jesu o ru djephia taghene ọye ohworho ra sabu tẹmro riẹn?

⁴ Jesu ọ hẹrokele udje Ọsẹ ye. Jesu o vwo omeriotọre jerẹ Ọsẹ ye. Ọrana yọ soriẹ ihworho e tikẹriẹ ọke rọ ha otọrakpọ na. Aye e ru sikẹnsikẹn aye ina nọ i Jesu enọ-ọ. (Mark 4:​10, 11) Omarana, Jesu ọrhọ nọ aye kpahen emru, aye na ta ọmudu aye phia. (Matt. 16:​13-16) Habaye, aye i rhe ji rusọ, ofẹn o vwo mwu aye taghene Jesu ọnọ van ghwu aye-e, fọkime aye i rheri taghene Jesu o dje uruemru esiri, arodọmẹ, ọrhẹ erhionrin phia. (Matt. 17:​24-27) Fọkime Jesu ọ dabu hẹrokele Ọsẹ ye gbagba, ọnana nọ ha userhumu rẹn idibo yi dabu rhe i Jehova. (John 14:9) Idibo i Jesu i rheri taghene Jehova o vwo ruẹ ihworho hwainhwain, ji kparoma jerẹ ilori ẹga ọke ọrana-a. Ukpomaran, Jehova o vwo omeriotọre, ọye jẹ ohworho ra sabu tẹmro riẹn.

5. Marhẹ omeriotọre ono ru ha userhumu rẹn ọwan rhiẹ ihworho ra sabu tẹmro riẹn?

⁵ Marhẹ ene ru hẹrokele i Jehova? Omeriotọre ọnọ ha userhumu rẹn ọwan rhiẹ ihworho ra sabu tẹmro riẹn. Ihworho a kẹnoma rẹn ihworho ra kparoma, fọkime aye a rioma kpahen awọrọ, aye i vwa ji harhomẹ-ẹ. Ọrẹn, omeriotọre ọnọ ha userhumu rẹn ọwan vwo uruemru esiri, erhionrin, ji harhomẹ awọrọ, ji lẹrhẹ awọrọ tikẹrẹ ọwan. (Col. 3:​12-14) O fori nẹ ekpako ukoko i damoma rhiẹ ihworho ra sabu tẹmro riẹn. Ọrẹn, nẹ ekpako ukoko i sabu ruẹ omaran, aye ine vi rhiẹ ihworho rẹ imizu ukoko na a mẹrẹn ọke ephian. Ọnana o mevirhọ taghene o fori nẹ aye i vwo uruemru re kwomakugbe imizu na ruẹ uyono uvuẹn Aghwẹlẹ Uvie erhirhiẹ na orho serhọ, ukperẹ ono rhiẹ nyoma itanẹti. Erhirhiẹ aye orho serhọ, o ji fo nẹ aye i kwomakugbe imizu na ruẹ aghwoghwo i nẹ oghwa riẹ oghwa. Ọke ekpako na erhe ruẹ omaran, ọnọ lẹrhiẹ phẹrẹ rẹ imizu ukoko na ina nekpẹn userhumu mie aye.

JEHOVA O RORO RẸN IHWORHO

6-7. Hunute idje ri djephia taghene Jehova o mwuegbe ro no ruẹ ewene nọ sabu kpahenrhọ orẹ idibo yi.

⁶ Ihworho buebun ra kparoma, i vwe roro rẹn awọrọ-ọ. Ọrẹn, omeriotọre i Jehova yo mwuien roro rẹn awọrọ, dedevwo ọye yẹ ohworho rọ mai rierun. Roro kpahen oborẹ i Jehova o ruẹ i Miriam lele, ro rhiẹ omizu i Moses ọmase. Miriam ọrhẹ Aaron i brenu kpahen i Moses, ri Jehova ọ ha mwu no sun ihworho yi. Oborẹ i Miriam o ruru na, o djephia taghene o mwuọghọ rẹn i Jehova-a. Fọkiẹ ọnana, Jehova nọ tuekwẹre kpahen i Miriam ji ha emiamo oti mwuien. Me yi Jehova o ruru ọke Aaron ọrhẹ i Moses a rẹ i Jehova no simie? Fọkiẹ omeriotọre i Jehova, no wene orhienbro yi kpahen i Miriam ji simie.—Num. 12:​1-15.

⁷ Jehova o ji djephia taghene o vwo omeriotọre, nyoma oborẹ o ruẹ Orodje Hezekiah lele. Jehova ọ nyoma ọmẹraro Isaiah ta riẹn taghene ono hwuo. Hezekiah nọ viẹre gbangbanhon, ji rẹ i Jehova nọ harhomie. Arodọmẹ no mwu i Jehova ha ẹgbukpe 15 ba ẹgbukpe Hezekiah. (2 Ki. 20:​1, 5, 6) Itiọrurhomẹmro, omeriotọre o mwu i Jehova dje arodọmẹ phia, ji harhomẹ.

8. Udje ọgo yo djephia taghene Jesu o roro rẹn awan? (Mark 3:​1-6)

⁸ Jesu ọ hẹrokele udje Ọsẹ ye. Ọke i Jesu ọ ha otọrakpọ na, ọ ha userhumu rẹn ihworho erhirhiẹ na orho serhọ. Jerẹ udje, Jesu o simi ihworho uvuẹn Ẹdẹ Omeronmo, dedevwo ilori ẹga na a gwọlọ no simi ihworho-o. (Se Mark 3:​1-6.) Jesu yẹ urhomu rẹn ukoko na, omarana, o roro rẹn awan nyoma ọkpọvi sansan ro tiobọnẹ. Jerẹ udje, Jesu o dje arodọmẹ rẹn ohworho ro ruẹ ọdandan ọghwaghwa uvuẹn ukoko na, nyoma rọ yẹ ọravwọ uphẹn nọ ghwẹriẹ.—Rev. 2:​2-5.

9. Marhẹ ene ru vwo uruemru re roro rẹn awan? (Ji ni ifoto na.)

⁹ Marhẹ ene ru hẹrokele i Jehova? O fori na damoma hẹrokele i Jehova rhe dje uruemru re roro rẹn awan phia nyoma oborẹ e roro ọrhẹ irueruo ọwan. (Jas. 3:17) Jerẹ udje, emiemọ ra hẹrokele i Jehova, i vwe fiẹrorhọ taghene emọ aye ine ru vrẹn ekete omẹgbanhon aye o teri-i. Jacob o dje udje ọnana phia nyoma oborẹ ọ ha uvuẹn Genesis 33:​12-14. O fo nẹ emiemọ re roro rẹn awan, i ha emọ aye vwanvwọn awọrọ-ọ. Habaye, o ji fo nẹ ekpako ukoko i rhe roro rẹn awan. Jerẹ udje, o fo nẹ ọkpako ukoko owu o roro taghene iroro yi ọvo yọ gbare-e. Ukpomaran, o fori nọ hobọtua orhienbro ekpako ukoko erọrọ orhianẹ orhienbro na ọ kparehaso iruemru-urhi Baibo-ol. (1 Tim. 3:​2, 3) O fori nẹ ọwan ephian i damoma vwẹruọ iroro awọrọ, orhianẹ iroro aye ọ vẹnẹ ọrẹ ọwan. (Rom. 14:1) Omarana, o ji fo nẹ ọwan ephian uvuẹn ukoko na, i rha damoma dje “uruemru re roro te” phia rẹn awọrọ.—Phil. 4:5.

JEHOVAH O VWO ERHIONRIN

10. Izede ego yi Jehova o ru dje erhionrin phia?

¹⁰ Ọkezẹko wu djokarhọ ye ne taghene ihworho ra kparoma i vwe vwo erhionri-in. Jehova rhẹ ohworho omara-an, o dje erhionrin phia! Jerẹ udje, Jehova ọ tare uvuẹn ọke i Noah taghene ọnọ hẹrhẹ te ẹgbukpe 120, bọmọke ọnọ ki ghwọghọ evwọkon na. (Gen. 6:3) Ọnana nọ yẹ i Noah ọke sabu mọren emọyen ghwanren, ji bọn owọ nyoma userhumu ekruien. Ọke oru, ọmakashe i Jehova owu no vwo erhionrin kerhọ Abraham ọke rọ nọ yen kpahen oghwọghọ i Sodom ọrhẹ Gomorrah. Orhianẹ ọmakashe na ohworho rọ kparoma, manẹ ọ sabu ta, ‘Wu vwa nọ mẹ enọ erana-a!’ Ọrẹn ọmakashe na ọ hẹrokele i Jehova, nyoma rọ kerhọ Abraham.—Gen. 18:​20-33.

11. Jerẹ oborẹ ọ ha uvuẹn 2 Peter 3:​9, Mesoriẹ i Jehova o ji dje erhionrin phia uvuẹn ọke ọwan na?

¹¹ Jehova o ji dje erhionrin phia uvuẹn ọke ọwan na. Ọ hẹrhẹ ọke ro no fiobarhọ enyerakpọ ọnana. Mesoriẹ i Jehova o vwo erhionrin? “Fọkime ọ gwọlọ nẹ ohworho owuorowu ọ ghwọghọ-ọ, ọrẹn ọ gwọlọre nẹ ihworho ephian i ghwẹriẹ.” (Se 2 Peter 3:9.) Jehova ọ vioja fọkiẹ erhionrin ro vwori? Ẹjo! Fọkime ihworho buebun ri vwo omamọ ẹhẹn i sabu rhiẹ ugbehian i Jehova ne. E ji fiẹrorhọ taghene awọrọ ine ru omaran. Ọrẹn, o vwo ekete erhionrin i Jehova ọ baren. Jehova o vwo ẹgwọlọ kpahen ihworho, ọrẹn o vwo nẹro rẹn orusọ-ọ. Ono tiẹ evwọkon na nie bẹmẹdẹ.—Hab. 2:3.

12. Marhẹ i Jesu o ru hẹrokele erhionrin i Jehova?

¹² Jesu ọ hẹrokele udje Ọsẹ ye. O jiri ne ri Jesu ọ hẹrokele erhionrin i Jehova. Jesu ọ mẹrẹn Echu rọ rhaphiẹ odẹ i Jehova ji mọrenfian banren idibo i Jehova ra fuephan kpahiẹn. (Gen. 3:​4, 5; Job 1:11; Rev. 12:10) Jesu ọ ji mẹrẹn ihworho ra rioja emiamiamo sansan. Itiọrurhomẹmro, o vwo omwemẹ rọ nọ “ghwọghọ ewian i Dẹbolo”! (1 John 3:8) Ọrẹn, me yọ ha userhumu rẹn i Jesu hẹrhẹ i Jehova rhẹ erhionrin, bọmọke ọnọ ki ghwọghọ ewian i Dẹbolo? Omeriotọre yẹ emru owu rọ ha userhumu rẹn i Jesu hẹrhẹ i Jehova, fọkime i Jehova ọvo yo vwo omẹgbanhon ro no brorhiẹn ọke ro no fiobarhọ enyerakpọ ọnana.—Acts 1:7.

13. Marhẹ i Jesu o ru dje erhionrin rẹn idibo yi, mesoriẹ?

¹³ Ọke i Jesu ọ ha otọrakpọ na, o vwo erhionrin kpahen idibo yi. Jerẹ udje, ọke idibo yi a frẹfro kpahen ohworho rọ maido usuẹn aye, Jesu ọ sẹrerhumuji aye-e. Ukpomaran, o vwo erhionrin kpahen aye. (Luke 9:46; 22:​24-27) Jesu o vwo imwẹro taghene aye ine ruẹ ewene. Wu ruẹ aruẹ orusọ ọrana ọgbọ buebun ne? Orhiomaran, oma ọnọ vi merhuọn taghene wu vwo Orodje ro vwo omeriotọre ro ji vwo erhionrin!

14. Me yọ nọ ha userhumu rẹn ọwan vwo erhionrin?

¹⁴ Marhẹ ene ru hẹrokele i Jehova? Erhe “vwo iroro i Kristi,” ọnọ ha userhumu rẹn ọwan hẹrokele udje i Jehova uvuẹn i kemru kemru. (1 Cor. 2:16) Marhẹ ene ru vwẹruọ iroro i Kristi? Izede owu yẹ ọrẹ ene se ekete i Baibol ri ta kpahen akpenyerẹn i Jesu. O ji fo ne roro kpahen oborẹ ekete re seri na o ru dje kpahen iroro i Kristi. Habaye, o fori na nẹrhomo vwe i Jehova nọ ha userhumu rẹn ọwan vwo iroro i Jesu. Ọnana ọnọ ha userhumu rẹn ọwan hẹrokele Osolobrugwẹ, nyoma re ne vwo erhionrin kpahen awọrọ ọrhẹ oma ọwan.—Matt. 18:​26-30, 35.

JEHOVAH O BRỌGHỌ RHẸ IHWORHO RI VWO OMERIOTỌRE

15. Izede ego yi Jehova o ru ruẹ oborẹ ọ ha uvuẹn Psalm 138:6 ne?

¹⁵ Se Psalm 138:6. Oma ọ merhenren ọwan omamọ re rhe taghene Jehova ro rhiẹ Osuinsuensun rọ mai rierun, o brọghọ rhẹ ihworho ri vwo omeriotọre oma! Roro kpahen udje ihworho ri Jehova o brọghọ rhẹ aye oma, uvwre ẹgbukpe buebun rhe na. Ọkezẹko, a sabu karorhọ aye ephia-an, ọrẹn, Jehova ọ hunute edẹ aye uvuẹn i Baibol na. Jehova ọ ta rẹn i Moses nọ nẹ iyẹnrẹn i Deborah ro nyerẹnren uvwrọke Enoch fiẹ ọke iguẹnzọn na rhẹ i Baibol. Deborah odibo uvuẹn oghwa Isaac ọrhẹ Jacob rọ ga te emrẹ ẹgbukpe 125! Dedevwo a ghwai rhe kpahen ọmase ọnana-a, ọrẹn, Jehova o rurie na ya iyẹnrẹn yen rhẹ i Baibol na, ro djephia taghene ọ ghanren rẹn i Jehova omamọ. (Gen. 24:59; 35:​8, ekete ra djokarhọ) Ẹgbukpe buebun a vrẹn, Jehova nọ djẹ i David ro rhiẹ osuingegede, no rhiẹ orodje uvuẹn agbamwa Israel. (2 Sam. 22:​1, 36) Ọke re vwiẹ i Jesu hin, Jehova no dje emakashe nẹ aye i brọghọ rhẹ ẹko isuingegede ezẹko oma, nyoma emakashe na a ta rẹn aye taghene e vwiẹ ọmọ ro no rhiẹ i Messiah na uvuẹn i Bethlehem. (Luke 2:​8-11) Ọke i Joseph ọrhẹ Mary a kpare i Jesu rhiẹ oghwa ẹga na, Jehova no brọghọ rhẹ Simeon ọrhẹ Anna ri ho ne oma, nyoma ro dje Ọmọyen rẹn aye. (Luke 2:​25-30, 36-38) “Dedevwo i Jehova o rierun, ọ djokarhọ ihworho ri homariotọre”!

16. Marhẹ i Jesu o ru hẹrokele udje Ọsẹ ye kpahen oborẹ i Jehova o ruẹ awọrọ lele?

¹⁶ Jesu ọ hẹrokele udje Ọsẹ ye. Jesu o brọghọ rhẹ ihworho ri vwo omeriotọre oma. O yono ‘ihworho ri vwe riẹ isukuru, ri ji rhiẹ ihworho kpekpa,’ urhomẹmro na kpahen Uvie Osolobrugwẹ. (Acts 4:13; Matt. 11:25) Jesu o brọghọ rhẹ ihworho oma nyoma oborẹ o simirin aye lele. (Luke 5:13) Uvuẹn ason rọ kẹta bọmọke i Jesu o ki hwu, ọ homariotọre wian owian odibo ọ wian, nyoma ro ghwe aghwẹ inyikọ ye. (John 13:5) Habaye, bọmọke i Jesu o ki riẹ odjuwu, nọ yẹ idibo yi ephian owian rọ mai ghanren, nọyẹ ọrẹ aye ine yono awọrọ nẹ aye i sabu vwo arhọ i bẹmẹdẹ.—Matt. 28:​19, 20.

17. Marhẹ ene ru brọghọ rhẹ awọrọ oma? (Ji ni ifoto na.)

¹⁷ Marhẹ ene ru hẹrokele i Jehova? Ọwan e brọghọ rhẹ awọrọ oma, nyoma re ghwoghwo iyẹnrẹn esiri na rẹn aruẹ ihworho ephian ri gwọlọ kerhọ. E ji brọghọ rhẹ imizu ọwan oma, erhe ni aye taghene aye i ghanren ghwẹ ọwan, o toro uphẹn ẹga yanghene ona re vwori-i. (Phil. 2:3) Oma ọ merhẹn i Jehova ọrhọ mẹrẹn ọwan ra “kobaro” ọghọ e djephia rẹn owuowọnwan ọke ephian.—Rom. 12:10; Zeph. 3:12.

18. Mesoriẹ o fo ne wu hẹrokele omeriotọre i Jehova?

¹⁸ Arha damoma hẹrokele Ọsẹ ọwan obẹ odjuwu ro vwo omeriotọre, ọnọ ha userhumu rẹn ọwan rhiẹ ihworho ra sabu tẹmro riẹn, re roro rẹn awan, ji vwo erhionrin rhọ. Ọke ọrana, na na sabu hẹrokele i Jehova ji brọghọ rhẹ awọrọ oma. Omarana, arha sabu ruẹ ekete omẹgbanhon ọwan o teri na sabu tikẹrẹ i Jehova rhọ, ọnọ lẹrhi Jehova ha ukẹro ọghoghanren ni ọwan!—Isa. 43:4.