Oborẹ Ana Sabu Yono nẹ Ileta Eva ri Peter ọ Yare

1. Ibiọke bọmọke ọnyikọ Peter o ki hwu, me yi Jehova o mwurien ya?

ỌNYIKỌ Peter o rheri taghene ono hwuo phẹrẹkpẹ. Uvwre ẹgbukpe buebun rọ ga i Jehova na, ọ nyalele i Jesu, ghwoghwo uvwre ihworho ri vwe rhiẹ itu Jew, ji ga usuẹn ugboma usuon na. Ọrẹn, Peter o ji vwo ewian erọrọ. Uvwre ẹgbukpe 62-64 C.E., Jehova no mwurien ya ileta eva—ọbe i Baibol ọrẹ 1 ọrhẹ 2 Peter. O fiẹrorhọ taghene ileta enana ina ha userhumu rẹn Ilele Kristi ephian ọrhọ tobọ hwu hin.—2 Pet. 1:12-15.

2. Mesoriẹ ileta ri Peter ọ yare na e serhọ ọke?

² Peter ọ ya ileta enana uvwrọke Ilele Kristi ọke ọrana, e rhiẹromẹrẹn “edamuni sansan.” (1 Pet. 1:6) Evwọkon a damoma aye ina tuẹn iyono efian ọrhẹ irueruo ijẹfuọn rhọ uvuẹn ukoko na. (2 Pet. 2:1, 2, 14) Phẹrẹkpẹ, Ilele Kristi re rhirhiẹ Jerusalem uvwrọke ọrana, ina dẹrughwaroghwu “oba ekwakwa ephian”—oghwọghọ amwa ọrana ọrhẹ igọmẹti itu i Jew rẹ isodja i Rome e suẹn. (1 Pet. 4:7) O vwo ẹfro-o, ileta i Peter ọ ha userhumu rẹn Ilele Kristi rhe oborẹ aye ine ru diẹn ebẹnbẹn aye vwana, ọrhẹ erẹ aye ine rhiẹromẹrẹn obaro na.b

3. Mesoriẹ o fo ne yono kpahen ileta i Peter na?

³ Dedevwo Peter ọ ya Ileta na vwe Ilele Kristi ọke ọrana, Jehova nọ ji ha ileta erana ba i Baibol na. Omarana, ana sabu mẹrẹn erere nẹ ileta erana. (Rom. 15:4) Jerẹ Ilele Kristi ọke ọrana, ọwan e nyerẹn uvuẹn akpọ ro jiri uruemru ijẹfuọn, rọ lẹrhiẹ bẹn ra na ga i Jehova. Habaye, ene rhiẹromẹrẹn ukpokpogho rode phẹrẹkpẹ rọ gbanhon ghwẹ ọro fiobarhọ usuon itu i Jew ọke ọrana. Ana mẹrẹn okarorhọ eghoghanren ezẹko uvuẹn ileta eva i Peter na. Aye ina ha userhumu rẹn ọwan hẹrhẹ ẹdẹ i Jehova, fiẹ ofẹn onyakpọ kparobọ, ne ji vwo ẹguọlọ okokodo rẹn owuowọnwan. Aruẹ okarorhọ ọnana ọnọ ji sabu ha userhumu rẹn ekpako mẹrẹn oborẹ aye ine ru dabu hẹrote edamẹ imizu ukoko na.

RHE FIẸRORHỌ YE

4. Jerẹ oborẹ ọ ha 2 Peter 3:3, 4, me yọ nọ sabu lẹrhẹ esegburhomẹmro ọwan seriotọre?

⁴ Ọwan e nyerẹn uvwre ihworho ri vwe vwo imwẹro kpahen aruẹmẹrẹn i Baibol na. Evwreghrẹn ọwan ina sabu ha ọwan djechẹẹ fọkime o jiri ne ra hẹrhẹ oba akpọ ọnana. Ihworho ezẹko ina sabu ta taghene oba na ọ sa dẹ-ẹ. (Se 2 Peter 3:3, 4.) Erhe rhon aruẹ ẹmro erana mie ọrovwoghwa, ohworho re lele wian yanghene ohworho ekrun ọwan, ana sabu vwo ẹhẹn eveva. Peter o dje oborẹ ọnọ ha userhumu rẹn ọwan.

5. Me yọ nọ ha userhumu rẹn ọwan sẹrorẹ uruemru ro serhọ sekpahen oba akpọ ọnana? (2 Peter 3:8, 9)

⁵ Harẹn ihworho ezẹko, ọnọ sabu họhọ taghene ẹdẹ oba akpọ ọkon ọnana, o kpọke. Ẹmro i Peter ina sabu ha userhumu rẹn ọwan vwo uruemru ro serhọ, fọkime ọ karorhọ ọwan taghene ukẹro ri Jehova ọ ha ni ọke, ọ vẹnẹ ọrẹ ituakpọ. (Se 2 Peter 3:8, 9.) Harẹn Jehova, ẹgbukpe uriusionrin ọ họhọ ẹdẹ owu. Jehova o vwo erhionrin, fọkime ọ guọlọ nẹ ohworho owuorowu ọ ghwọghọ-ọ. Ọke ẹdẹ ye ọnọ rhiọ, akpọ ọnana no no vwoba. Uphẹn ọduado ye vwori ra na ha ọke rọ hẹrhẹre na ghwoghwo rẹn ihworho ephian.

6. Marhẹ ene ru “karorhọ ẹrhiọ” ẹdẹ i Jehova? (2 Peter 3:11, 12)

⁶ Peter ọ ta rẹn ọwan na “karorhọ ẹrhiọ” ẹdẹ i Jehova. (Se 2 Peter 3:11, 12.) Izede ọgo? Nyoma re ne roro kodo—kẹdẹkẹdẹ—kpahen ebrurhọ akpọ ọkpokpọ na. Ha ẹhẹn rorie taghene we mwu aphẹrẹ rọ fonron ha, riẹ emaren ra rhuọnrhuọn oma na, dede ihworho wu vwo ẹguọlọ kpahen ri hwuru, ji yono ihworho ri nyerẹnren ẹgbukpe uriusionrin buebun ri vrẹnren kpahen aruẹmẹrẹn i Baibol sansan. Aruẹ eroro kodo ọrana ọnọ ha userhumu wẹn rhe fiẹrorhọ akpọ ọkpokpọ na, ji lẹrhuọ je nẹro phan rẹn ọke re nyerẹn te na. Fọkime e “vwo irherhe ọnana ne” kpahen obaro akpọ ọwan, erhe “suẹn ọwan vruẹ” nyoma iyono efia-an.—2 Pet. 3:17.

FIẸ OFẸNZẸ ONYAKPỌ KPAROBỌ

7. Marhẹ ofẹnzẹ onyakpọ ono ru hobọte ọwan?

⁷ Arha sẹrorẹ ẹdẹ i Jehova rhẹ ẹhẹn, ene ghwoghwo iyẹnrẹn esiri na rẹn awọrọ. Ọrẹn, uvuẹn erhirhiẹ ezẹko ana sabu ru sikẹnsikẹn re ne ghwoghwo. Mesoriẹ? Ọkezẹko, ofẹn ọ sabu mwu ọwan. Ọrana ọ phia rẹn Peter. Uvuẹn ason na ọke ra damu i Jesu ni, Peter o kwe djoma yen taghene ọye owuọwan usuẹn idibo i Jesu-u, nọ tobọ tiẹn ọgbesa! (Matt. 26:69-75) Ọrẹn ọke oru, Peter nọ ha urhebro ọnana phia rhẹ imwẹro: “Are i vwa zofẹn oborẹ aye a zofẹn ye-en, yanghene lẹrhẹ ẹhẹn kpokpo are-e.” (1 Pet. 3:14) Ẹmro i Peter na ọ yẹre ọwan imwẹro taghene ana sabu fiẹ ofẹnzẹ onyakpọ kparobọ.

8. Me yọ nọ ha userhumu rẹn ọwan fiẹ ofẹnzẹ onyakpọ kparobọ? (1 Peter 3:15)

⁸ Me yọ nọ ha userhumu rẹn ọwan fiẹ ofẹnzẹ onyakpọ kparobọ? Peter nọ tare: “Are i ruẹ i Kristi na fon rhiẹ Ọrovwori uvuẹn ọmudu are.” (Se 1 Peter 3:15.) Ọnana o surhobọmwu ọrẹ ene roro kodo kpahen ẹrhẹ Ọrovwori ọrhẹ Orodje ọwan, Kristi Jesu. Ofẹn orho mwuo ọke uphẹn orho rhie firhọ wu ne ghwoghwo rẹn awọrọ, karorhọ Orodje ọwan. Ha ẹhẹn roro kpahen ọke ro suẹn obẹ odjuwu rhẹ emakashe buebun ri kinhariẹ ye. Karorhọ taghene a yẹriẹ “omẹgbanhon ephian obẹ odjuwu ọrhẹ uvuẹn otọrakpọ na ne,” habaye, ọye ọrhẹ ọwan i “gba havwiẹ ẹdẹ na ephian bọmọke enyerakpọ na ono ki toba.” (Matt. 28:18-20) Peter ọ ta rẹn ọwan ne “mwuegbe” ọke ephian na chochọn esegburhomẹmro ọwan. Wu guọlọ ghwoghwo obẹ iruo, isukuru yanghene uvuẹn erhirhiẹ erọrọ? Roro rhotọre kpahen oborẹ wu ne ru ruie, ne wu ji mwuegbe oborẹ wu na ta. Nẹrhomo ne wu vwo uduefigbere, hẹroso i Jehova taghene ọnọ ha userhumu wẹn fiẹ ofẹnzẹ onyakpọ kparobọ.—Acts 4:29.

“VWO ẸGUỌLỌ OKOKODO”

9. Izede ọgo yi Peter o vwo dje ẹguọlọ phia uvuẹn erhirhiẹ owu? (Ni ifoto na.)

⁹ Peter o yono oborẹ ono ru dje ẹguọlọ phia rhọ. Ọ havwiẹ ọke i Jesu ọ ta: “Mia yẹ are akama ọkpokpọ, nẹ are i vwo ẹguọlọ kpahen owuowọnwan; jerẹ oborẹ mi vwo ẹguọlọ kpahen are, are i ji vwo ẹguọlọ kpahen owuowọnwan.” (John 13:34) Udabọ ọrana, Peter nọ ha uphẹn rẹn ọhiẹn lẹrhiẹ ja riẹ emaren rhẹ ihworho egbamwa na ri rhiẹ Ilele Kristi ne. Ọnyikọ Paul o se oborẹ i Peter o ruru na “omeru,” yanghene uruemru ra gemai ruẹ. (Gal. 2:11-14) Peter o rhiabọ ha ọkpọvi na, ji yono nie. Uvuẹn ileta eva rọ yare, nọ kanrunumwuien taghene e vwe vwo ẹguọlọ ọvo-o, ọrẹn ene vi djeyi phia rẹn imizu ukoko na.

10. Me yọ ha userhumu rẹn ọwan dje “ẹguọlọ imizu rọ vabọ omeru” phia? Djeyi fiotọre. (1 Peter 1:22)

¹⁰ Peter ọ tare taghene e “vwo ẹguọlọ imizu rọ vabọ omeru” kpahen imizu ukoko na. (Se 1 Peter 1:22.) Aruẹ ẹguọlọ ọrana ọ homaphia ọke ra “huvwele urhomẹmro na.” Urhomẹmro ọrana o surhobọmwu uyono na taghene “Osolobrugwẹ o vwo ni ohworho ruẹ-ẹ.” (Acts 10:34, 35) Ọwan i vwa huvwele akama i Jesu na-a, orhianẹ e dje guọlọ rẹn imizu na ezẹko ọvo. Itiọrurhomẹmro, ana sabu kẹrẹ imizu ezẹko ghwẹ awọrọ, jerẹ oborẹ ọ ji phia rẹn Jesu. (John 13:23; 20:2) Ọrẹn, Peter ọ karorhọ ọwan taghene ofori ne dje “ẹguọlọ imizu”—ro rhiẹ aruẹ onyerẹnkugbe ekrun—phia rẹn imizu ukoko na.—1 Pet. 2:17.

11. Me yo mevirhọ re ne vwo “ẹguọlọ okokodo” kpahen awọrọ?

¹¹ Peter ọ ta rẹn ọwan ne vwo “ẹguọlọ okokodo ro nẹ ẹhẹn rhe.” Uvuẹn oghwẹmro ọnana, ne vwo ẹguọlọ “okokodo” o surhobọmwu ọre ne vwo ẹguọlọ kpahen ohworho ọrhọ tobọ bẹn re ne ru te omaran. Jerẹ udje, me ye ne ruo orhianẹ omizu owu o ruru ọwan sọ? Ẹhẹn ọwan ọnọ sabu ta rẹn ọwan ne ru kele, ukperẹ ene dje ẹguọlọ phia. Ọrẹn, Peter o yono mie i Jesu taghene orukele ọ vwọ merhen i Jehova oma-a. (John 18:10, 11) Peter nọ yare: “Are i vwa ha ọdandan kwosa ọdanda-an, yanghene ha aruehinmo kwosa aruehinmo-o. Ukpomaran, are i ha ebrurhọ kwosa.” (1 Pet. 3:9) Ha uphẹn rẹn ẹguọlọ okokodo no mwuo dje irueruo esiri ọrhẹ uruemru re roro rẹn awọrọ phia, tobọ harẹn eri ruruo sọ.

12. (a) Me yẹ ẹguọlọ okokodo ono mwu ọwan ru? (b) Me wu guọlọ damoma ru, jerẹ oborẹ e dje rhẹ ividio na Preserve the Precious Gift of Unity?

¹² Uvuẹn ileta ọrukaro ri Peter ọ yare, nọ ha ẹmro na “ẹguọlọ okokodo” ruiruo. Aruẹ ẹguọlọ ro rhurhu “edandan buebun,” orhiẹ edandan ezẹko ọvo-o. (1 Pet. 4:8) Ọkezẹko, Peter ọ karorhọ uyono kpahen ẹharhomu ri Jesu o yonirien ẹgbukpe ezẹko ri vrẹnren na. Uvwrọke ọrana, Peter o roro taghene ọye o dje uruemru ghwologhwolo phia ọke rọ ta taghene ọnọ harhomu omizie “ọgbọ irhiruẹ.” Ọrẹn, Jesu no yonirien—ọrhẹ ọwan—taghene a harhomu te “ọgbọ 77,” nọyẹ o vwoba-a. (Matt. 18:21, 22) Orhianẹ ọ bẹn wẹn wu na ha urhebro ọrana ruiruo, wu vwe fiobọrhotọre-e! Ọ bẹn rẹn idibo i Jehova ephian ri vwa gba, aye ina harhomu ọkezẹko. Oborẹ ọ mai ghanren vwana, ọrẹ ana kpare idjaghwẹ harhomu omizu ukoko na, ji kwaphiẹrhọ rhẹ ọye.c

EKPAKO, HẸROTE IMIZU UKOKO NA

13. Me yọ nọ sabu lẹrhiẹ bẹn rẹ ekpako ina hẹrote edamẹ imizu ukoko na?

¹³ Itiọrurhomẹmro, oborẹ i Jesu ọ ta rẹn Peter ọke ra rhọmiẹ nuhwu hin, ọ sẹriẹ ẹro dẹ-ẹ, nọ tare: “Hẹrote igegede ekokamu mẹ.” (John 21:16) Orhianẹ wẹwẹ ọkpako, wu rheri taghene ọkpọvi erana i ji sekpahuọn. Ọrẹn, ọnọ sabu bẹn ọkpako ọnọ guọlọ ọke rọ nọ wian owian ọghoghanren ọnana. Ekpako ina vi hẹrote edamẹ ugboma ekrun aye vwẹre, dje ẹguọlọ rẹn aye, ji ruẹ onyerẹnkugbe aye rhẹ Jehova gbanhonrhọ. Aye ya ji kobaro owian aghwoghwo na, ji ha eghọn sansan phia uvuẹn uyono ukoko, emẹvwa okinhariẹ ọrhẹ emẹvwa ẹkwotọre. Ezẹko a wian rhẹ Hospital Liaison Committee yanghene wian kugbe rhẹ Local Design/Construction Department. Ekpako a ghini wian gbanhan!

14. Me yo mwu ekpako hẹrote edamẹ imizu ukoko na? (1 Peter 5:1-4)

¹⁴ Peter nọ ta rẹn ekpako erọrọ jerẹ ọye: “Are i hẹrote igegede Osolobrugwẹ.” (Se 1 Peter 5:1-4.) Orhianẹ wẹwẹ ọkpako, e rheri taghene wu vwo ẹguọlọ kpahen imizu ukoko na, ji guọlọ hẹrote aye. Ọrẹn, wu na sabu roro ọkezẹko taghene wu vwo ewian buebun, yanghene oma ọ rhọruọ ne, omarana wu sabu hẹrote imizu na-a. Me wu na sabu ru? Ta ọsoso iroro enọ rẹn Jehova. Peter nọ yare: “Kohworho kohworho ro gbodibo, jenẹ o ruie sekpahen omẹgbanhon rẹ Osolobrugwẹ o tiobọnẹ.” (1 Pet. 4:11) Imizu ukoko na ina sabu rha dẹrughwaroghwu ebẹnbẹn ra na ja sabu kwaphiẹrhọ uvuẹn akpọ ọnana. Ọrẹn, karorhọ taghene Jesu Kristi, ọnọ sabu ha userhumu rẹn aye vrẹn oborẹ wu na sabu ru. Ọnọ sabu ruẹ omaran vwana ọrhẹ uvuẹn akpọ ọkpokpọ na. Jehova ọ ta rẹn ekpako nẹ aye i vwo ẹguọlọ kpahen imizu ukoko na, hẹrote aye, ji rhiẹ “idje harẹn igegede na.”

15. Marhẹ ọkpako owu o ru hẹrote edamẹ imizu ukoko na? (Ni ifoto na.)

¹⁵ Omizu owu ro rhiẹ ọkpako ọke jijiri ne re se William, o vwẹruọ ọghanronmẹ ra kọn bru imizu na, ji yẹ aye urhebro. Ọke emiamo i COVID-19 ọ tonrhọ, ọye ọrhẹ ekpako ri hẹrhẹre na damoma nekpẹn imizu ri ha ẹko owuowu kọkprughwre kọkprughwre. No dje oborẹ ọsoriẹ phia: “Buebun imizu na ọvo yi ha oghwa re roro kpahen oborẹ aye ine ruo, iroro aye ina sabu wene riẹ ọrẹ ọsọre phẹphẹrẹ.” Orhianẹ omizu owu o rhiẹromẹrẹn ebẹnbẹn, William nọ dabu kerhọ no vwẹruọ edamẹ yen. Orho ru, nọ guọlọ ẹmro kirighwo, ọgbọ buebun ividio ri ha iwẹbsaiti ọwan, nọ haye ha userhumu rẹn omizu na. William nọ tare: “Ofori na kọn bru imizu na vwana vrẹn ọke bi. Ọwan a wian gbanhan na sabu ha userhumu rẹn awọrọ yono kpahen Jehova; omaran o ji fo na damoma kọn bru imizu ukoko na, ji ha userhumu rẹn aye daji urhomẹmro na.”

HA UPHẸN RẸN JEHOVA NO YONUO HIN

16. Izede ego ya na sabu ha oborẹ e yono nẹ ileta i Peter na ruiruo?

¹⁶ Ọwan i yono kpahen iyono ezẹko ne nẹ ileta eva ri Peter ọ yare. Ọkezẹko, wu djokarhọ ekete wa guọlọ ru rhomurhọ ne. Jerẹ udje, wu guọlọ rhe roro kodo kpahen ebrurhọ akpọ ọkpokpọ na rhọ? Wu bru ẹkẹ te oma wu ne ghwoghwo uvuẹn ekete wa wian yanghene uvuẹn erhirhiẹ erọrọ ne? Wu djokarhọ erhirhiẹ sansan wu ne ru dje ẹguọlọ okokodo rẹn imizu ukoko na rhọ ne? Ekpako are i mwuegbe are ina hẹrote igegede i Jehova nẹ ẹhẹn rhe rhẹ oruru? Dabu ni oma so, ne wu ji djokarhọ ekete wu ne ru rhomurhọ. “Ọrovwori na ohworho esiri,” ọnọ ji ha userhumu wẹn ru rhomurhọ. (1 Pet. 2:3) Peter nọ yẹre ọwan imwẹro taghene: “Osolobrugwẹ . . . ọnọ ha uyono are te orugba. Ọnọ yẹ are omẹgbanhon, ọnọ yẹ are uriẹn nẹ are i je rhe kpogho.”—1 Pet. 5:10.

17. Me yo no nerhumie rhe ọke erhe vwo erhionrin ji ha uphẹn rẹn Jehova no yono ọwan?

¹⁷ Uvwrọke owu, Peter o roro taghene o mwuovwan ro no mevi obaro i Jesu-u. (Luke 5:8) Ọrẹn, nyoma userhumu i Jehova ọrhẹ Jesu, Peter no vwo erhionrin rhiẹ odibo i Kristi. Omarana, Peter no vwo uphẹn rọ nọ “ruẹ Uvie i bẹmẹdẹ ọrẹ Ọrovwori ọrhẹ Osimi ọwan ro rhiẹ i Jesu Kristi.” (2 Pet. 1:11) Ọrana obọdẹn ebrurhọ! Wu rhe vwo erhionrin jerẹ i Peter, ji ha uphẹn rẹn Jehova no yonuo, wu ne ji vwo osẹkwa arhọ i bẹmẹdẹ. Wu na ‘nyamwu ẹkẹ esegburhomẹmro ọnọ ro rhiẹ usimirhọ ọnọ.’—1 Pet. 1:9.