“ଆମ୍ଭେ କ୍ଳାନ୍ତ ହୋଇ ନ ଥାଉ”

୪:୧୬-୧୮

କଳ୍ପନା କରନ୍ତୁ, ଦୁଇଟି ଘର ପାଖାପାଖି ଅଛି। ଉଭୟ ଘର ପୂରାପୂରି ଭାଙ୍ଗିରୁଜି ଯାଇଛି। ଗୋଟିଏ ଘରର ଲୋକେ ବହୁତ ନିରାଶରେ ଅଛନ୍ତି, କିନ୍ତୁ ଆର ଘରର ଲୋକେ ବହୁତ ଖୁସିରେ ଅଛନ୍ତି। ସେମାନେ କାହିଁକି ଖୁସିରେ ଅଛନ୍ତି ? କାରଣ ସେମାନେ ଖୁବ୍‌ ଶୀଘ୍ର ଏକ ସୁନ୍ଦର ଘରକୁ ଯିବେ।

ଯଦିଓ ‘ସମସ୍ତ ସୃଷ୍ଟି ଆଜି ପର୍ଯ୍ୟନ୍ତ ଏକସଙ୍ଗରେ ଆର୍ତ୍ତନାଦ କରୁଅଛି ଓ ପ୍ରସବବେଦନାରେ ବ୍ୟଥିତ ହେଉଅଛି,’ ତଥାପି ସେହି ପରିବାରର ଲୋକଙ୍କ ଭଳି ଈଶ୍ୱରଙ୍କ ସେବକମାନଙ୍କ ପାଖରେ ଏକ ଆଶା ଅଛି। ତେଣୁ ସେମାନେ ନିଜ ସମସ୍ୟାଗୁଡ଼ିକୁ ସାମନା କରିପାରନ୍ତି। (ରୋମୀ ୮:୨୨) ଆମେ ଜାଣୁ ଯେ ଆଗାମୀ ନୂତନ ପୃଥିବୀରେ ଈଶ୍ୱର ଆମକୁ ଚିରକାଳ ପାଇଁ ଆଶିଷ ଦେଉଥିବେ। ତାʼ ତୁଳନାରେ ଆଜିର ଦୁଃଖକଷ୍ଟ “କ୍ଷଣକାଳସ୍ଥାୟୀ” ଓ “ଲଘୁ” ଅଟେ। ଏପରିକି ବର୍ଷ ବର୍ଷ ଧରି ଆମେ ଯେଉଁ ଦୁଃଖ ସହି ଆସୁଛୁ, ସେସବୁ ମଧ୍ୟ କିଛି ସମୟ ପାଇଁ। ଆମେ ନିଜ ଧ୍ୟାନ ଈଶ୍ୱରଙ୍କ ରାଜ୍ୟରେ ମିଳିବାକୁ ଯାଉଥିବା ଆଶିଷଗୁଡ଼ିକ ଉପରେ କେନ୍ଦ୍ରିତ କରିବା ଉଚିତ୍‌। ତେବେଯାଇ ଆମେ କିଛିଟା ଖୁସିରେ ରହିବା ଏବଂ କ୍ଳାନ୍ତ ହେବା ନାହିଁ।