ଖ୍ରୀଷ୍ଟୀୟ ଜୀବନଯାପନ କରନ୍ତୁ
ଟ୍ରାକ୍ଟ ସାହାଯ୍ୟରେ କଥାବାର୍ତ୍ତା କିପରି ଆରମ୍ଭ କରିବା
ଜାନୁୟାରୀ ୨୦୧୮ ମସିହାଠାରୁ ଆମ ଖ୍ରୀଷ୍ଟୀୟ ଜୀବନ ଓ ସେବା ସଭା ପୁସ୍ତିକାର ପ୍ରଥମ ପୃଷ୍ଠାରେ ପ୍ରଚାର କରିବାର ନମୁନା ଦିଆଯିବା ଆରମ୍ଭ କରାଯାଇଛି । ଆମେ ଲୋକଙ୍କୁ କେବଳ ପ୍ରକାଶନ ଦେବା ପରିବର୍ତ୍ତେ ସେମାନଙ୍କ ସହ କଥାବାର୍ତ୍ତା ଆରମ୍ଭ କରିବାକୁ ଚେଷ୍ଟା କରିବା ପାଇଁ ଆମକୁ ପ୍ରୋତ୍ସାହିତ କରାଯାଉଛି । ପ୍ରଚାରକମାନେ ଏହି ନୂଆ ଉପାୟକୁ ଯେପରି ସହଜରେ ଆପଣାଇପାରିବେ, ସେଥିପାଇଁ ‘ପ୍ରଚାର କରିବାର ନମୁନା’ ଉପରେ ଆଧାରିତ ଭିଡିଓଗୁଡ଼ିକ ପ୍ରକାଶିତ କରାଯାଉଛି । ଏହି ଭିଡିଓଗୁଡ଼ିକରେ ଏପରି ପରାମର୍ଶ ଦିଆଯାଇଛି, ଯାହା ସାହାଯ୍ୟରେ ଜଣେ ପ୍ରଚାରକ ବାଇବଲରୁ କଥାବାର୍ତ୍ତା ଆରମ୍ଭ କରନ୍ତି । ତେବେ କʼଣ ଏହାର ଅର୍ଥ ଆମେ ଘର ଘର ଯାଇ ପ୍ରଚାର କରିବା ସମୟରେ ପ୍ରକାଶନଗୁଡ଼ିକର ବ୍ୟବହାର କରିବା ଉଚିତ୍ ନୁହେଁ ? ସେମିତି ନୁହେଁ । ଉଦାହରଣ ପାଇଁ, କଥାବାର୍ତ୍ତା ଆରମ୍ଭ କରିବା ପାଇଁ ଟ୍ରାକ୍ଟ ଫଳପ୍ରଦ ହୋଇଥାଏ । ଯେକୌଣସି ଟ୍ରାକ୍ଟକୁ ଆମେ ବ୍ୟବହାର କରିବା ସମୟରେ ତଳେ ଦିଆଯାଇଥିବା ପରାମର୍ଶଗୁଡ଼ିକୁ ଆପଣାଇପାରିବା:
୧. ଟ୍ରାକ୍ଟର ପ୍ରଥମ ପୃଷ୍ଠାରେ ଦିଆଯାଇଥିବା ମୁଖ୍ୟ ପ୍ରଶ୍ନ ପଚାରନ୍ତୁ ଏବଂ ତାʼ ତଳେ ଦିଆଯାଇଥିବା ତିନୋଟିଯାକ ଉତ୍ତର ପଢ଼ନ୍ତୁ ।
୨. ଦ୍ୱିତୀୟ ପୃଷ୍ଠାର ଆରମ୍ଭରେ ଥିବା ବାଇବଲର ଉତ୍ତର କୁହନ୍ତୁ । ଯଦି ସମୟ ହୁଏ, ତେବେ ଟ୍ରାକ୍ଟରେ ଦିଆଯାଇଥିବା କିଛି ତଥ୍ୟ ପଢ଼ନ୍ତୁ ଏବଂ ଆଲୋଚନା କରନ୍ତୁ ।
୩. ଘରମାଲିକଙ୍କୁ ଟ୍ରାକ୍ଟ ଦିଅନ୍ତୁ ଏବଂ କୁହନ୍ତୁ ଯେ ସେ ନିଜ ସୁବିଧା ଅନୁସାରେ ସମୟ ବାହାର କରି ଏହାକୁ ନିଶ୍ଚୟ ପଢ଼ିବେ ।
୪. ଯିବା ପୂର୍ବରୁ ତାଙ୍କୁ “ଏହା ଭାବି ଦେଖନ୍ତୁ” ଭାଗରେ ଥିବା ପ୍ରଶ୍ନ ଦେଖାନ୍ତୁ । ତାʼପରେ ପୁନଃସାକ୍ଷାତର ସମୟ ନିର୍ଦ୍ଧାରିତ କରନ୍ତୁ ଏବଂ ଆର ଥରକୁ ବାଇବଲରୁ ସେହି ପ୍ରଶ୍ନର ଉତ୍ତର ଦିଅନ୍ତୁ ।
ଯେତେବେଳେ ଆପଣ ପୁନଃସାକ୍ଷାତ ପାଇଁ ଯିବେ, ସେତେବେଳେ ସେହି ପ୍ରଶ୍ନର ଉତ୍ତର ଦିଅନ୍ତୁ । ଏହା ସହିତ, ଆର ଥରକୁ ଆଲୋଚନା କରିବା ପାଇଁ ଆଉ ଏକ ପ୍ରଶ୍ନ ପଚାରନ୍ତୁ । ଆପଣ ଚାହିଁଲେ ଏ ପ୍ରଶ୍ନ ଆମ ୱେବସାଇଟ୍ରୁ କିମ୍ବା ଟ୍ରାକ୍ଟର ଶେଷ ପୃଷ୍ଠାରେ ଦିଆଯାଇଥିବା ପ୍ରକାଶନରୁ ପଚାରିପାରିବେ । ଯଦି ଆପଣଙ୍କୁ ଠିକ୍ ଲାଗେ, ତେବେ ତାଙ୍କୁ ପରମେଶ୍ୱରଙ୍କ ତରଫରୁ ଖୁସିର ଖବର ! କିମ୍ବା ଶିକ୍ଷା ଉପକରଣ ବକ୍ସରୁ ଅଧ୍ୟୟନ କରିବା ପାଇଁ ବ୍ୟବହୃତ ହେଉଥିବା ଅନ୍ୟ କୌଣସି ପ୍ରକାଶନ ଦେଇପାରିବେ ।