ସମ୍ବନ୍ଧିତ ପଦଗୁଡ଼ିକରୁ ଲାଭ ପାଆନ୍ତୁ

ପବିତ୍ର ଶାସ୍ତ୍ରର ନୂତନ ଜଗତ ଅନୁବାଦ ବାଇବଲରେ ଦିଆଯାଇଥିବା ସମ୍ବନ୍ଧିତ ପଦଗୁଡ଼ିକୁ ପଢ଼ିଲେ ଜଣାପଡ଼େ ଯେ ବାଇବଲରେ ଲେଖାଥିବା କଥାଗୁଡ଼ିକ ପରସ୍ପର ସହ ମେଳ ଖାଏ । ଗୋଟିଏ ପଦ ସହ ସମ୍ବନ୍ଧିତ ଅନ୍ୟ ପଦଗୁଡ଼ିକୁ ପଢ଼ିଲେ ଆମକୁ ଆହୁରି ତଥ୍ୟ ମିଳେ । ସମ୍ବନ୍ଧିତ ପଦଗୁଡ଼ିକୁ କିପରି ଖୋଜିବା ? ସର୍ବପ୍ରଥମେ ଏହା ଦେଖନ୍ତୁ ଯେ ଗୋଟିଏ ପଦରେ କୌଣସି ଶବ୍ଦ କିମ୍ବା ବାକ୍ୟର ପରେ, ଉପର ପଟେ କେଉଁ ନମ୍ବର ଦିଆଯାଇଛି । ଯଦି ଆପଣ ଛପା ଯାଇଥିବା ବାଇବଲ ବ୍ୟବହାର କରୁଛନ୍ତି, ତାହେଲେ ମଝିରେ ଦିଆଯାଇଥିବା ନମ୍ବରଗୁଡ଼ିକରେ ସେହି ନମ୍ବରକୁ ଖୋଜନ୍ତୁ । ସେହି ନମ୍ବରରେ ଦିଆଯାଇଥିବା ପଦଗୁଡ଼ିକ ସମ୍ବନ୍ଧିତ ପଦଗୁଡ଼ିକ ଅଟେ । jw.org ୱେବସାଇଟ୍‌ କିମ୍ବା JW ଲାଇବ୍ରେରୀ ଆପ୍‌ରେ ସମ୍ବନ୍ଧିତ ପଦଗୁଡ଼ିକୁ ଦେଖିବା ପାଇଁ ସେହି ନମ୍ବରରେ କ୍ଲିକ୍‌ କରନ୍ତୁ ।

ସମ୍ବନ୍ଧିତ ପଦଗୁଡ଼ିକରେ କʼଣ ତଥ୍ୟ ଦିଆଯାଇଥାଏ ? ଆସନ୍ତୁ କିଛି ଉଦାହରଣ ଉପରେ ଧ୍ୟାନ ଦେବା:

କୌଣସି ଘଟଣା ବିଷୟରେ ଆଉ କେଉଁଠି କୁହାଯାଇଛି ? କିଛି ସମ୍ବନ୍ଧିତ ପଦଗୁଡ଼ିକ ଆମକୁ ବାଇବଲର ଅନ୍ୟ ପଦଗୁଡ଼ିକ ଆଡ଼କୁ ନେଇକି ଯାଏ, ଯେଉଁଠି ସେହି ଘଟଣା ସହ ଜଡ଼ିତ ଆଉ କିଛି କଥା ଦିଆଯାଇଥିବ । ଯେପରି, ୨ ଶାମୁୟେଲ ୨୪:୧ ଏବଂ ୧ ବଂଶାବଳୀ ୨୧:୧ ଦେଖନ୍ତୁ ।

କୌଣସି କଥା କେଉଁଠୁ ନିଆଯାଇଛି ? କିଛି ସମ୍ବନ୍ଧିତ ପଦଗୁଡ଼ିକରୁ ଜଣାପଡ଼େ ଯେ ଗୋଟିଏ ପଦରେ ଲେଖାଥିବା କଥା କେଉଁଠୁ ନିଆଯାଇଛି । ଯେପରି, ମାଥିଉ ୪:୪ ଏବଂ ଦ୍ୱିତୀୟ ବିବରଣ ୮:୩ ଦେଖନ୍ତୁ ।

ଭବିଷ୍ୟତବାଣୀ କିପରି ପୂରା ହେଲା ? କିଛି ସମ୍ବନ୍ଧିତ ପଦଗୁଡ଼ିକରୁ ଜଣାପଡ଼େ ଯେ ଗୋଟିଏ ଭବିଷ୍ୟତବାଣୀ କିପରି ପୂରା ହେଲା । ଯେପରି ମାଥିଉ ୨୧:୫ ଏବଂ ଯିଖରୀୟ ୯:୯ ଦେଖନ୍ତୁ ।