Фыццаг фыстӕг Фессалоникӕгтӕм

1 Павел Силуан*+ ӕмӕ Тимофеимӕ+ фыссы Фессалоникӕйы ӕмбырдмӕ, нӕ Фыд Хуыцауимӕ ӕмӕ нӕ Хицау Йесо Чырыстиимӕ иудзинады+ чи ис, уыдонмӕ.

Хуыцауы стыр хорзӕх ӕмӕ фарнӕй хайджын ут+.

2 Хуыцаумӕ куы фӕкувӕм, уӕд алкӕддӕр бузныг фӕзӕгъӕм уе ’ппӕты тыххӕй дӕр+, 3 уымӕн ӕмӕ нӕ Хуыцау ӕмӕ нӕ Фыды раз ӕдзухдӕр нӕ зӕрдыл дарӕм, уӕ уырнындзинадӕй чи цӕуы, уыцы хъуыддӕгтӕ+, уӕ уарзондзинад уӕ кӕмӕ разӕнгард кӕны, уыцы фыдӕбон ӕмӕ, нӕ Хицау Йесо Чырыстийы ныфсӕй+ куыд фидар стут, уый. 4 Не ’фсымӕртӕ, Хуыцауӕн уарзон адӕм, мах ӕй зонӕм, Хуыцау уӕ кӕй равзӕрста+, 5 уымӕн ӕмӕ уын хорз хабар куы хъусын кодтам, уӕд нӕ ныхӕстӕ афтид ныхӕстӕ нӕ уыдысты, фӕлӕ сын уыди стыр тых+, уыцы хъуыддаджы архайдта Хуыцауы сыгъдӕг тых* дӕр, ӕмӕ сымах фидарӕй баууӕндыдыстут+. Стӕй, уӕ пайдайӕн цавӕр адӕймӕгтӕ систӕм, уый дӕр зонут+. 6 Ӕмӕ сымах бафӕзмыдтат+ мах ӕмӕ нӕ Хицауы+ – кӕд уын бирӕ зындзинӕдтӕ уыди+, уӕддӕр, Хуыцауы сыгъдӕг тых цы циндзинад+ дӕтты, уый фӕрцы Хуыцауы ныхасыл баууӕндыдыстут. 7 Ӕмӕ афтӕмӕй Македони ӕмӕ Ахайы уырнджытӕн се ’ппӕтӕн дӕр систут фӕзминаг.

8 Уӕвгӕ, Йегъовӕйы дзырд+ сымахӕй ӕрмӕст Македонимӕ ӕмӕ Ахаймӕ нӕ ахӕццӕ, фӕлӕ алы ран+ дӕр фехъуыстой, Хуыцауыл куыд ӕууӕндут+, уый тыххӕй, ӕмӕ ныр мах дзурын дӕр ницыуал хъӕуы. 9 Сӕхӕдӕг нын фӕдзурынц, уемӕ фыццаг хатт куы фембӕлдыстӕм, уӕд уӕ мӕнгхуыцӕутты куыд ныууагътат+ ӕмӕ удӕгас+, ӕцӕг+ Хуыцаумӕ куыд раздӕхтыстут, цӕмӕй йӕ цагъартӕ суат. 10 Хуыцаумӕ ма уый тыххӕй дӕр раздӕхтыстут, цӕмӕй ӕнхъӕлмӕ кӕсат+ йӕ Фырты ’рцыдмӕ уӕлӕрвтӕй+, ома мӕрдтӕй кӕй райгас кодта+ ӕмӕ мах ӕрцӕуинаг тӕрхоны азарӕй чи ирвӕзын кӕны+, уыцы Йесойы ’рцыдмӕ.

2 Не ’фсымӕртӕ, уӕхӕдӕг ӕй зонут, не ’рцыд+ уӕм дзӕгъӕлы кӕй нӕ уыд+. 2 Куыд ӕй зонут, афтӕмӕй нын Филиппты+ хъизӕмӕрттӕ куы бавзарын кодтой+ ӕмӕ нӕ куы фӕхынджылӕг кодтой+, уӕд нын уый фӕстӕ нӕ Хуыцау радта хъарутӕ, цӕмӕй уын Хуыцауы хорз хабар ныфсджынӕй дзырдтаиккам+, кӕд нӕ ныхмӕ тынг цыдысты, уӕддӕр. 3 Цы уын фӕдзӕхсӕм, уый рӕдыд зондӕй нӕ цӕуы, стӕй уӕ нӕхи пайдайӕн дӕр ницы агурӕм+ ӕмӕ сайгӕ дӕр никӕй кӕнӕм, 4 фӕлӕ нӕ Хуыцау кӕй бафӕлвӕрдта ӕмӕ нӕ уый аккагыл кӕй банымадта+, цӕмӕй нын хорз хабар хъусын кӕнын нӕ бар бакӕна, уымӕ гӕсгӕ адӕмы зӕрдӕ балхӕныны+ тыххӕй нӕ дзурӕм, фӕлӕ нӕ цӕмӕй, нӕ зӕрдӕтӕм нын чи кӕсы, уыцы Хуыцауы хорзӕх уа+.

5 Уӕхӕдӕг ӕй зонут, никуы уын кодтам зӕрдӕлхӕнӕн ныхӕстӕ+ кӕнӕ цӕстмӕ митӕ+, цӕмӕй уӕ исты расайдтаиккам+ – Хуыцау ӕвдисӕн! 6 Уӕдӕ нын адӕм кад кӕной+,– сымах уат ӕви ӕндӕр исчи,– уымӕ дӕр никуы бабӕллыдыстӕм, кӕд, Чырыстийы апостолтӕ уӕвгӕйӕ, нӕ бон уыди, ӕмӕ уын стыр хӕрдзтӕ скӕнын кодтаиккам, уӕддӕр+. 7 Фӕлӕ уӕ мах рӕвдыдтам, дзидзидарӕг мад йӕ хъӕбулты куыд фӕрӕвдауы+, афтӕ. 8 Афтӕ тынг уӕ уарзӕм+, ӕмӕ ӕрмӕст уымӕ нӕ уыдыстӕм цӕттӕ, цӕмӕй уын Хуыцауы хорз хабар фехъусын кодтаиккам, фӕлӕ ма цӕттӕ уыдыстӕм сымахӕн нӕ удтӕ* раттынмӕ дӕр+, уымӕн ӕмӕ нӕ зӕрдӕтӕн систут адджын+.

9 Не ’фсымӕртӕ, сымах ӕнӕмӕнг хъуыды кӕндзыстут нӕ фыдӕбон ӕмӕ нӕ уӕззау куыст. Хуыцауы хорз хабар уын куы хъусын кодтам, уӕд фыдӕбон кодтам+ ӕхсӕвӕй-бонӕй, цӕмӕй уӕ стыр хӕрдзтӕй макӕй батыхсын кодтаиккам+. 10 Сымахыл, уырнджытыл, куыд иузӕрдион уыдыстӕм, уӕ разы куыд раст ӕмӕ куыд ӕнӕзӕрдӕхудтӕй архайдтам+, уымӕн уӕхӕдӕг дӕр ӕмӕ Хуыцау дӕр ӕвдисӕн. 11 Хорз ӕй куы зонут, фыд+ йӕ хъӕбултӕн куыд вӕййы, мах дӕр уын афтӕ кӕй уыдыстӕм ӕмӕ уӕ алкӕмӕн дӕр зонд кӕй амыдтам+, кӕй уӕ рӕвдыдтам ӕмӕ уӕ кӕй разӕнгард кодтам, 12 цӕмӕй уӕ йӕ паддзахадмӕ+ ӕмӕ йӕ кадмӕ чи ӕрхуыдта+, уыцы Хуыцауы раз куыд ӕмбӕлы, афтӕ цӕрат+.

13 Ӕдзух Хуыцауӕн бузныг дӕр уый тыххӕй фӕдзурӕм+, ӕмӕ махӕй Хуыцауы ныхас+ куы фехъуыстат, уӕд ӕй адӕймаджы ныхасыл+ нӕ банымадтат, фӕлӕ, ӕцӕгӕй цы у, ууыл – Хуыцауы ныхасыл, ӕмӕ уыцы ныхас йӕ куыст кӕны уӕ мидӕг, уырнджыты+ мидӕг. 14 Не ’фсымӕртӕ, сымах систут, Хуыцауӕн Иудейӕйы цы ӕмбырдтӕ ис ӕмӕ Йесо Чырыстиимӕ* иудзинады чи ис, уыдоны хуызӕн, уымӕн ӕмӕ сымах дӕр ӕфхӕрд ӕййафут+ уӕхи адӕмы къухӕй, Иудейӕйы ӕфсымӕртӕ дзуттӕгты къухӕй ӕфхӕрд куыд ӕййафынц, афтӕ. 15 Уыдон суанг нӕ Хицау Йесойы+ дӕр амардтой, пехуымпарты+ куыд мардтой, афтӕ, стӕй мах фӕдыл дӕр зылдысты+. Хуыцауы зӕрдӕмӕ цы цӕуы, уый нӕ аразынц, фӕлӕ цӕуынц, ӕппӕт адӕмӕн дӕр хорз цы у, уый ныхмӕ. 16 Мах иннӕ адӕмтӕн хъусын кӕнӕм, цӕмӕй фервӕзой+, уыдон та нӕ хъыгдарынц+, ӕмӕ афтӕмӕй сӕ тӕригъӕдтыл ноджыдӕр ӕфтауынц+. Фӕлӕ уыцы рӕстӕг ӕрцыд, цӕмӕй сыл йӕ* маст ныккала+.

17 Мах та, не ’фсымӕртӕ, сымахӕй цыбыр рӕстӕгмӕ куы фӕхицӕн кодтой, уӕд дӕр зӕрдӕйӕ уыдыстӕм уемӕ, ӕмӕ ноджы тынгдӕр архайдтам уӕ феныныл, уымӕн ӕмӕ уӕ уындмӕ бӕллыдыстӕм+. 18 Ӕмӕ нӕ сымахмӕ ӕрцӕуын дӕр уый тыххӕй фӕндыд. Мӕн, Павелы, сымахмӕ дыууӕ хатты фӕндыд ӕрцӕуын, фӕлӕ та-иу нӕ Сайтан бакъуылымпы кодта. 19 Нӕ Хицау Йесо куы ’рцӕуа*+, уӕд йӕ разы чи уыдзӕн нӕ ныфс, нӕ цин, нӕ кад ӕмӕ, сӕрыстыр кӕмӕй стӕм, уыдон*?+ Сымах нӕ уыдзыстут? 20 О, сымах стут нӕ кад ӕмӕ нӕ цин.

3 Ӕмӕ нӕ бон ӕнхъӕлмӕ кӕсын куы нал уыди, уӕд сфӕнд кодтам, цӕмӕй нӕхӕдӕг Афинты+ баззайӕм, 2 не ’фсымӕр Тимофейы+ та, Чырыстийы тыххӕй хорз хабар+ хъусын кӕныны хъуыддаджы Хуыцауӕн чи лӕггад кӕны, уый, арвыстам сымахмӕ, цӕмӕй уын уӕ ныфсыл ныфс бафтыдтаид ӕмӕ уын удӕнцой ӕрхастаид, ӕмӕ уын афтӕмӕй уӕ уырнындзинад бафидар кодтаид, 3 уыцы зындзинӕдты уӕ куыд ничи фӕцудыдтаид+. Уӕхӕдӕг ӕй зонут, ахӕм хабӕрттӕ ныл ӕнӕмӕнг кӕй хъуамӕ цӕуа+. 4 Сымахмӕ куы уыдыстӕм, уӕд дӕр уын рагацау дзырдтам+, зындзинӕдтӕ нӕм кӕй ӕнхъӕлмӕ кӕсы+, ӕмӕ афтӕ кӕй рауад, уый дӕр зонут+. 5 Гъемӕ мӕ бон ӕнхъӕлмӕ кӕсын куы нал уыди, уӕд арвыстон уӕ иузӕрдиондзинады+ тыххӕй базонынмӕ, зӕгъын уӕ, мыййаг, Хӕйрӕг*+ куы фӕрӕдийын кӕна ӕмӕ нӕ фыдӕбон дзӕгъӕлы куы фӕуа+.

6 Фӕлӕ нӕм ныр Тимофей фӕстӕмӕ ӕрыздӕхт+ ӕмӕ нӕм ӕрхаста хорз хабар уӕ иузӕрдиондзинад ӕмӕ уӕ уарзондзинады+ тыххӕй, стӕй нӕ ӕдзух уӕ зӕрдыл кӕй дарут ӕмӕ нӕ хорзы кой кӕй фӕкӕнут ӕмӕ, мах уӕ фенынмӕ куыд бӕллӕм, афтӕ сымах дӕр нӕ фенынмӕ кӕй бӕллут, уый тыххӕй дӕр+. 7 Ӕмӕ кӕд хъуагдзинӕдтӕ ӕййафӕм ӕмӕ зындзинӕдтӕ ӕвзарӕм, уӕддӕр нын стыр удӕнцой ӕрхаста+, сымах иузӕрдион кӕй стут, уый+. 8 Ӕмӕ иугӕр сымах нӕ Хицауимӕ иудзинады фидар лӕуут+, уӕд та махмӕ дӕр цӕрын ӕрцыд. 9 Куыд раарфӕ кӕнӕм Хуыцауӕн сымах тыххӕй, нӕ Хуыцауы раз нын цы стыр циндзинад+ ӕрхастат, уый тыххӕй? Цӕмӕй йын ӕй бафидӕм? 10 Ӕхсӕвӕй-бонӕй йын зӕрдиагӕй фӕлӕгъстӕ кӕнӕм+, цӕмӕй уӕ фенӕм ӕмӕ, кӕм хъӕуы, уым уын уӕ уырнындзинад бафидар кӕнӕм+.

11 Гъемӕ нӕ уӕдӕ нӕ Фыд Хуыцау ӕмӕ нӕ Хицау Йесо+ сымахыл сӕмбӕлын кӕнӕнт. 12 Ӕмӕ уын нӕ Хицау ахӕм арфӕ ракӕнӕд, мах уӕ куыд зӕрдиагӕй уарзӕм, афтӕ сымах дӕр уӕ кӕрӕдзийы, стӕй алкӕй дӕр ноджы тынгдӕр+, ноджы зӕрдиагдӕрӕй куыд уарзат+, 13 цӕмӕй уын уӕ зӕрдӕтӕ бафидар кӕна ӕмӕ нӕ Хуыцау, нӕ Фыды раз алцӕмӕй дӕр ӕнаипп+ ӕмӕ сыгъдӕг уат, нӕ Хицау Йесо йе ’ппӕт сыгъдӕджытимӕ+ куы ’рцӕуа*+, уӕд.

4 Ӕппынфӕстаг, не ’фсымӕртӕ, мах уын амыдтам, куыд хъуамӕ цӕрат+, цӕмӕй Хуыцауы зӕрдӕ рухс кӕнат, ӕмӕ афтӕ кӕнгӕ дӕр кӕнут. Ӕмӕ уӕ ныр нӕ Хицау Йесойы номӕй курӕм ӕмӕ уын фӕдзӕхсӕм: афтӕ кӕнут ноджы зӕрдиагдӕрӕй+. 2 Уымӕн ӕмӕ зонут, нӕ Хицау Йесойы номӕй уын цытӕ бафӕдзӕхстам+, уый.

3 Хуыцауы фӕндон у, цӕмӕй уат сыгъдӕг+ ӕмӕ хӕтындзинадӕй уӕхи хизат+. 4 Алчидӕр уӕ зонӕд йӕ буары*+ рохтыл хӕцын, сыгъдӕг+ ӕмӕ йын кадджын куыд уа, 5 цӕмӕй, Хуыцауы чи нӕ зоны+, уыцы адӕмтау+ ӕнӕфсисӕй чъизи монцты фӕдыл ма цӕуа+. 6 Уыцы хъуыддаджы уӕ йе ’фсымӕрӕн ӕвзӕрдзинад мачи ракӕнӕд+ ӕмӕ йӕ йӕ бартӕй ӕнӕхай мачи фӕкӕнӕд, уымӕн ӕмӕ ӕппӕт ахӕм хъуыддӕгты тыххӕй+ тӕрхонгӕнӕг у Йегъовӕ – уый ма уын раздӕр дӕр дзырдтам ӕмӕ уын ӕй бӕстон бамбарын кодтам+. 7 Хуыцау нӕ уый тыххӕй не ’рхуыдта, ӕмӕ чъизи митӕ кӕнӕм, фӕлӕ цӕмӕй уӕм сыгъдӕг+. 8 Ӕмӕ уӕдӕ ацы фӕдзӕхстытӕм куыдфӕндыйы цӕстӕй чи кӕсы+, уый адӕймагмӕ нӕ кӕсы куыдфӕндыйы цӕстӕй, фӕлӕ Хуыцаумӕ+, сымах йӕ сыгъдӕг тыхӕй+ чи хайджын кӕны, уымӕ.

9 Цӕмӕй кӕрӕдзийы ӕфсымӕртау уарзат+, уый тыххӕй та уӕм фыссын дӕр нӕ хъӕуы, уымӕн ӕмӕ уӕ Хуыцау йӕхӕдӕг ахуыр кӕны+ уӕ кӕрӕдзийы уарзын+. 10 Ӕмӕ, уӕвгӕ, уарзгӕ дӕр кӕнут, ӕгас Македонийы цыдӕриддӕр ӕфсымӕртӕ ис, уыдоны. Фӕлӕ уын уый фӕдзӕхсӕм, не ’фсымӕртӕ, цӕмӕй уӕ уарзондзинад уа ноджы тыхджындӕр. 11 Уӕ разы ахӕм нысан сӕвӕрут, цӕмӕй, куыд уын фӕдзӕхстам, афтӕ сабырӕй цӕрат+, иннӕты хъуыддӕгты уӕхи ма тъыссат+ ӕмӕ уӕхи къухтӕй фыдӕбон кӕнат+, 12 цӕмӕй уын адӕм+ уыной уӕ хӕдӕфсарм цард+ ӕмӕ хъуаг мацӕмӕй уат+.

13 Стӕй нӕ, не ’фсымӕртӕ, фӕнды, цӕмӕй зонат, чи амард*+, уыдонмӕ цы ’нхъӕлмӕ кӕсы, уый, ӕмӕ уӕ зӕрдӕтӕ иннӕ адӕмау, ныфс кӕмӕн нӕй, уыдонау, ма риссой+. 14 Кӕд нӕ уырны, Йесо кӕй амард ӕмӕ кӕй райгас+, уӕд нӕ уый дӕр уырны, ӕмӕ Йесоимӕ иудзинады чи уыд ӕмӕ афтӕмӕй чи амард, уыдоны дӕр Хуыцау цардмӕ кӕй раздахдзӕн, цӕмӕй йемӕ уой+. 15 Цы уын дзурӕм, уый та у Йегъовӕйы ныхасмӕ+ гӕсгӕ: махӕй нӕ Хицауы ’рцыд*+ удӕгасӕй чи ӕрӕййафа, уыдон, мард чи у, уыдоны разӕй ницы хуызы фӕуыдзысты, 16 уымӕн ӕмӕ нӕ Хицау йӕхӕдӕг ӕрцӕудзӕн уӕларвӕй+ ӕмӕ райхъуысдзӕн йӕ барджын хъӕлӕс, хистӕр зӕды+ хъӕлӕс, ӕмӕ Хуыцауы уадындзы уаст+, ӕмӕ фыццаг райгас уыдзысты, Чырыстиимӕ иудзинады чи уыд, афтӕмӕй чи амард, уыдон+. 17 Уый фӕстӕ мах дӕр, удӕгасӕй чи баззайа, уыдон, мигътыл+ хаст ӕрцӕудзыстӕм+, цӕмӕй семӕ+ уӕм ӕмӕ уӕлдӕфы нӕ Хицауимӕ фембӕлӕм+, ӕмӕ уымӕй фӕстӕмӕ ӕдзухдӕр уыдзыстӕм нӕ Хицауимӕ+. 18 Уӕдӕ ацы ныхӕстӕй уӕ кӕрӕдзийы фидар кӕнут.

5 Ацы хабӕрттӕ кӕд ӕрцӕудзысты, уыцы рӕстӕджытӕ ӕмӕ афонты+ тыххӕй та уӕм, ме ’фсымӕртӕ, фыссын дӕр нӕ хъӕуы. 2 Уӕхӕдӕг ӕй хорз зонут, мӕнӕ давӕг ӕхсӕвыгон куыд фӕзыны+, раст афтӕ кӕй ӕрцӕудзӕн Йегъовӕйы бон+ дӕр. 3 Афтӕ куы дзурой+: «Сабырдзинад+ ӕмӕ ӕдасдзинад!», уӕд ӕнӕнхъӕлӕджы ӕрцӕудзӕн се сӕфт+, арыны афон сылгоймагӕн йӕ тухитӕ ӕнӕнхъӕлӕджы куыд райдайынц, афтӕ+, ӕмӕ ницы хуызы аирвӕздзысты+. 4 Фӕлӕ сымах, ме ’фсымӕртӕ, талынджы не стут+, цӕмӕй уӕ уыцы бон ӕнӕнхъӕлӕджы ӕрӕййафа, боны рухс давджыты куыд ӕрӕййафы, афтӕ+, 5 уымӕн ӕмӕ сымах иууылдӕр стут рухсы хъӕбултӕ+ ӕмӕ боны хъӕбултӕ+. Махӕн ӕхсӕвимӕ ӕмӕ талынгимӕ иумӕйагӕй ницы ис+.

6 Гъемӕ уӕдӕ мах иннӕты хуызӕн+ фынӕй ма кӕнӕм+, фӕлӕ уӕм цырддзаст+ ӕмӕ къӕрцхъус+. 7 Фынӕй чи кӕны+, уыдон ӕхсӕвыгон фӕфынӕй кӕнынц+, ӕмӕ нуазгӕ чи кӕны, уыдон дӕр ӕхсӕвы вӕййынц расыг. 8 Фӕлӕ мах боны хъӕбултӕ кӕй стӕм, уымӕ гӕсгӕ уӕм къӕрцхъус ӕмӕ нӕ уӕлӕ дарӕм уырнындзинады+ ӕмӕ уарзондзинады згъӕрхӕдон+, стӕй ирвӕзындзинады+ ныфсы згъӕрхуд+, 9 уымӕн ӕмӕ мах Хуыцау уый тыххӕй нӕ равзӕрста, цӕмӕй ныл йӕ маст ныккала+, фӕлӕ цӕмӕй нӕ Хицау Йесо Чырыстийы+ фӕрцы фервӕзӕм+. 10 Йесо мах тыххӕй амард+, цӕмӕй, удӕгас уӕм ӕви мард, уӕддӕр нӕ бон йемӕ цӕрын уа+. 11 Уӕдӕ ныр куыд кӕнут+, афтӕ дарддӕр дӕр уӕ кӕрӕдзийы ныфсыл ныфс ӕфтаут ӕмӕ кӕрӕдзийы фидар кӕнут+.

12 Курӕг уӕ стӕм, не ’фсымӕртӕ: чи уӕм фыдӕбон кӕны, Хицауы хъуыддаджы уын разамынд чи дӕтты+ ӕмӕ уын зонд чи амоны, уыдоны нымайут. 13 Сӕ фыдӕбоны тыххӕй сын стыр аргъ кӕнут ӕмӕ сӕ уарзут+. Уӕ кӕрӕдзиимӕ хӕларӕй цӕрут+. 14 Стӕй ма уӕ, не ’фсымӕртӕ, курӕг стӕм: уаг ӕмӕ ӕгъдау чи халы, уыдоны фӕдзӕхсут+, ныфссаст чи у, уыдоны* ныхасӕй рӕвдаут+, лӕмӕгъты фидар кӕнут, алкӕимӕ дӕр ут бирӕфӕразон+. 15 Уӕхимӕ кӕсут, цӕмӕй уӕ ӕвзӕр ӕвзӕрӕй мачи макӕмӕн фида+, фӕлӕ алкӕддӕр архайут, уӕ кӕрӕдзийӕн дӕр ӕмӕ алкӕмӕн дӕр хорз цы у, ууыл+.

16 Алкӕддӕр цин кӕнут+. 17 Ӕппынӕдзух кувут+. 18 Алцӕй тыххӕй дӕр бузныг дзурут+, уымӕн ӕмӕ Хуыцауы фӕндон Йесо Чырыстийы уылты уый у, цӕмӕй сымах афтӕ кӕнат. 19 Хуыцауы сыгъдӕг тыхы зынг ма хуыссын кӕнут+. 20 Пехуымпар-ныхасыл ӕнӕрвӕссон ма кӕнут+. 21 Алцыдӕр-иу сбӕлвырд кӕнут+, хорз цы у, ууыл фидар хӕцут+. 22 Уӕхи хизут алы ӕвзӕрдзинадӕй+.

23 Фарны Хуыцау+ уӕ алы хъуыддаджы дӕр ссыгъдӕг кӕнӕд+. Ӕмӕ нӕ Хицау Йесо Чырысти куы ’рцӕуа*, уӕд уӕ зӕрдӕ* дӕр, уӕ уд дӕр ӕмӕ уӕ буар дӕр уӕнт сыгъдӕг ӕмӕ уӕм фау ӕрхӕссӕн мацӕмӕй уӕд+. 24 Чи уӕ ӕрхуыдта, уый иузӕрдион у, ӕмӕ ацы хъуыддаг дӕр уый сараздзӕн.

25 Не ’фсымӕртӕ, мах тыххӕй дарддӕр дӕр кувут+.

26 Ӕфсымӕртӕн-иу се ’ппӕтӕн дӕр салам дӕтгӕйӕ ӕфсымӕртау апъа кӕнут+.

27 Нӕ Хицауы номӕй уӕ курӕг дӕн: ацы фыстӕг ӕфсымӕртӕн се ’ппӕтӕн дӕр бакӕсут+.

28 Нӕ Хицау Йесо Чырыстийы стыр хорзӕхӕй+ хайджын ут.

[Фиппаинӕгтӕ]