Фыццаг фыстӕг Тимофеймӕ

1 Павел, Йесо Чырыстийы апостол+ нӕ Ирвӕзынгӕнӕг+ Хуыцауы+ ӕмӕ нӕ ныфс+ Йесо Чырыстийы фӕдзӕхстмӕ гӕсгӕ, 2 фыссын Тимофеймӕ+, уырнындзинады фӕрцы мын ӕцӕг хъӕбулау+ чи сси, уымӕ.

Нӕ Фыд Хуыцауы ӕмӕ нӕ Хицау Йесо Чырыстийы+ стыр хорзӕх, фӕлмӕнзӕрдӕдзинад ӕмӕ фарнӕй хайджын у.

3 Македонимӕ+ куы цыдтӕн, уӕд дын куыд дзырдтон, Ефесы баззай, зӕгъгӕ, афтӕ дын ныр дӕр дзурын: иуӕй-иутӕн бафӕдзӕхс+, цӕмӕй ӕндӕр цыдӕртӕ ма амоной+, 4 алы аргъӕуттӕм ма хъусой+ ӕмӕ мыггӕгты равзӕрд ма агурой. Уыдӕттӕ адӕймаджы ницӕмӕ ӕркӕнынц+, ӕрмӕст расайынц, рацагур-бацагур кӕй хъӕуы, ахӕм фарстатӕ, Хуыцауӕй цы цӕуы ӕмӕ уырнындзинад цы фидар кӕны, ахӕмӕй та ницы дӕттынц. 5 Ацы фӕдзӕхстӕн та йӕ нысан уый у, цӕмӕй нӕм уа, сыгъдӕг зӕрдӕйӕ+, сыгъдӕг цӕсгомӕй+ ӕмӕ ӕнӕхин уырнындзинадӕй+ чи цӕуы, ахӕм уарзондзинад+. 6 Иуӕй-иутӕ уыдӕттӕ кӕй ницӕмӕ дарынц, уый тыххӕй бафтыдысты+ ӕнӕпайда ныхӕстыл+. 7 Фӕнды сӕ, цӕмӕй закъон+ амоной+, афтӕмӕй та, цы дзурынц, уый дӕр не ’мбарынц ӕмӕ, фидар цӕуыл ныллӕууынц, уый дӕр.

8 Мах та йӕ зонӕм, Закъон хорз кӕй у+, Закъонмӕ гӕсгӕ куыд ӕмбӕлы, афтӕ куы архайай+, уӕд. 9 Ӕмбарӕм ӕй, закъон рӕстгӕнджытӕн кӕй не сфидар кӕнынц, фӕлӕ фыдгӕнджытӕн+, хивӕндтӕн+, ӕнӕхуыцау адӕмӕн, тӕригъӕдджынтӕн, мӕнгард чи у*+ ӕмӕ, сыгъдӕг цы у, уый хынджылӕггаг чи кӕны, йӕ ныййарджыты, стӕй иннӕ адӕмы дӕр чи мары, 10 хӕтгӕ чи кӕны+, уыдонӕн, нӕлгоймӕгтимӕ ӕмуат чи ’рцӕуы, уыцы нӕлгоймӕгтӕн, адӕмы чи давы, сайгӕ ӕмӕ мӕнг сомытӕ чи кӕны+, раст* ахуырады+ ныхмӕ чи у+ ӕмӕ ӕндӕр ахӕм хъуыддӕгтӕ чи аразы, уыдонӕн. 11 Раст ахуырад та баст у, амондджын+ Хуыцауӕй чи цӕуы, уыцы диссаджы хорз хабаримӕ. Ӕмӕ мын уыцы хорз хабар бакодта мӕ бар+.

12 Ӕз тынг бузныг дӕн нӕ Хицау Йесо Чырыстийӕ, хъару мын чи радта, уымӕй. Уый мӕ сӕвӕрдта лӕггадгӕнӕгӕй+, ӕмӕ мӕ афтӕмӕй иузӕрдионыл+ банымадта, 13 кӕд кӕддӕр Хуыцауы фаудтон, йӕ адӕмы йын ӕфхӕрдтон+ ӕмӕ ӕдзӕсгом+ адӕймаг уыдтӕн, уӕддӕр. Фӕлӕ мӕм Хицау фӕлмӕнзӕрдӕдзинад+ равдыста, уымӕн ӕмӕ, цы арӕзтон, уый не ’мбӕрстон+ ӕмӕ мӕм уырнындзинад нӕ уыд. 14 Фӕлӕ мын нӕ Хицау рӕдауӕй бахай кодта йе стыр хорзӕхӕй+, стӕй мын радта уырнындзинад ӕмӕ, Йесо Чырыстиимӕ иудзинады кӕй дӕн, уый фӕрцы схайджын дӕн уарзондзинадӕй+. 15 Йесо Чырысти дунемӕ ӕрцыд тӕригъӕдджынты фервӕзын кӕнынмӕ+ – ацы ныхас раст у ӕмӕ йыл ӕппындӕр дызӕрдыг кӕнын нӕ хъӕуы+. Ӕмӕ уыцы тӕригъӕдджынтӕн ӕз дӕн сӕ фыццаг+. 16 Фӕлӕ мӕм Йесо Чырысти фӕлмӕнзӕрдӕдзинад+ равдыста, цӕмӕй мӕн уылты, тӕригъӕдджынтӕн сӕ фыццаджы уылты, равдиса йӕ бирӕфӕразондзинад иууылдӕр, ӕмӕ уый уа цӕвиттонӕн, чи йыл баууӕнда+ ӕмӕ уый фӕрцы ӕнустӕм чи цӕра+, уыдонӕн.

17 Ӕнусты Паддзахӕн+, ӕнӕмӕлгӕ чи у+ ӕмӕ цӕстӕй фенӕн кӕмӕн нӕй+, уыцы иунӕг Хуыцауӕн+ та уӕд кад ӕмӕ намыс ӕнусӕй-ӕнусмӕ!+ Аммен.

18 Адӕттӕ дын, мӕ хъӕбул Тимофей, фӕдзӕхсын+, дӕумӕ чи амыдта, уыцы пехуымпар-ныхӕстӕм+ гӕсгӕ, цӕмӕй уыдоны фӕрцы хъӕбатырӕй тох кӕнай+, 19 уырнындзинадыл фидар хӕцай ӕмӕ дӕ цӕсгом сыгъдӕг уа+. Иуӕй-иутӕ сӕ сыгъдӕг цӕсгом ницӕмӕ ӕрдардтой+, ӕмӕ сӕ уырнындзинады нау ныппырх+. 20 Уыдоны ’хсӕн сты Именей+ ӕмӕ Алыксандр+, ӕмӕ сӕ ӕз Сайтаны+ бар бакодтон*, цӕмӕй сын уый уа зондзонӕн ӕмӕ Хуыцауы мауал фауой+.

2 Уӕдӕ уын фыццаджыдӕр фӕдзӕхсын: Хуыцауӕн лӕгъстӕ кӕнут, кувут+ ӕм, курут дзы ӕмӕ йын бузныг дзурут алыхуызон адӕймӕгты тыххӕй+, 2 стӕй паддзӕхты+ ӕмӕ, стыр бынӕттӕ чидӕриддӕр ахсы, уыдоны тыххӕй+, цӕмӕй нӕ бон уа нӕхицӕн ӕнцад ӕмӕ сабырӕй цӕрын, цӕмӕй алы хъуыддаджы дӕр уӕм Хуыцауыл иузӕрдион ӕмӕ уӕззау зондыл хӕст+. 3 Афтӕ кӕнат, уый хорз у нӕ Ирвӕзынгӕнӕг Хуыцауы+ цӕсты ӕмӕ йын у ӕхсызгон+. 4 Уый фӕнды, цӕмӕй алыхуызон адӕм+, рӕстдзинад*+ цы у, уый бӕлвырдӕй базоной+ ӕмӕ фервӕзой+. 5 Ис иу Хуыцау+, стӕй Хуыцау+ ӕмӕ адӕмы ’хсӕн+ дӕр ис иу ӕхсӕны лӕг+ – адӕймаг Йесо Чырысти+. 6 Уый йӕхи радта, цӕмӕй се ’ппӕты дӕр балхӕна*+, ӕмӕ уый тыххӕй хъуыстгонд ӕрцӕудзӕн йӕ рӕстӕджы. 7 Ӕз дӕр уый тыххӕй фехъусын кӕнынӕн+ ӕрцыдтӕн ӕвӕрд иннӕ адӕмтӕн хъусынгӕнӕгӕй+ ӕмӕ апостолӕй+ – ахуыргӕнӕгӕй, цӕмӕй сын баххуыс кӕнон уырнындзинад+ ӕмӕ рӕстдзинады* тыххӕй базонынӕн,– раст цы у, уый зӕгъын+, нӕ сайын.

8 Гъемӕ мӕ фӕнды, цӕмӕй, иумӕ кӕм ӕрӕмбырд вӕййут, уым-иу нӕлгоймӕгтӕ сӕ къухтӕ сдаргӕйӕ Хуыцаумӕ кувой, уой иузӕрдион+, мӕсты ма кӕной+ ӕмӕ быцӕу макӕимӕ кӕной, афтӕмӕй+. 9 Фӕнды ма мӕ, цӕмӕй сылгоймӕгтӕ сӕхи рӕсугъд кӕной*, сӕ дзыккутӕ алыхуызӕттӕ кӕй бийынц, сызгъӕрин ӕмӕ налхъуыт* кӕнӕ тынг зынаргъ дзаумӕттӕ кӕй дарынц, уымӕй нӕ+, фӕлӕ аив дарӕсӕй – сӕ дарӕсӕй хъуамӕ бӕрӕг уа, хӕдӕфсарм+ ӕмӕ ӕмбаргӕ кӕй сты. 10 Стӕй сӕхи хъуамӕ рӕсугъд кӕной, йӕхи Хуыцауыл иузӕрдион чи хоны, уыцы сылгоймӕгтӕн куыд ӕмбӕлы, афтӕ+ – хорз хъуыддӕгтӕй+.

11 Сылгоймаг ахуыр кӕнӕд ӕнӕдзургӕйӕ, алы хъуыддаджы дӕр коммӕгӕсӕй+. 12 Сылгоймагӕн уый бар нӕ дӕттын, ӕмӕ искӕй ахуыр кӕна+ кӕнӕ йӕхи нӕлгоймагӕн хицау кӕна+, фӕлӕ-иу ӕнцад хъусӕд. 13 Уымӕн ӕмӕ Хуыцау фыццаг Адамы скодта, стӕй та Евӕйы+. 14 Стӕй сайд дӕр Адамыл не ’рцыд+, фӕлӕ сылгоймагыл ахӕм сайд ӕрцыд+, ӕмӕ сси фыдгӕнӕг*+. 15 Фӕлӕ сылгоймаг зӕнӕг куы рауадза+, уӕд ӕй уый хъахъхъӕндзӕн, ӕрмӕст ӕм кӕд дарддӕр дӕр уырнындзинад ӕмӕ уарзондзинад уа, кӕд Хуыцауы цӕсты сыгъдӕг ӕмӕ ӕмбаргӕ уа, уӕд+.

3 Раст сты ацы ныхӕстӕ+. Цӕстдарӕг+ уа, уымӕ чи тырны, уый хорз хъуыддагмӕ бӕллы. 2 Цӕстдарӕгмӕ хъуамӕ фау ӕрхӕссӕн мацӕмӕй уа+, хъуамӕ йын иу ус йеддӕмӕ ма уа, хъуамӕ алцӕмӕй дӕр бӕрц зона+, уа уӕззау зонды хицау+, уаг ӕмӕ йӕм ӕгъдау уа+, уа уазӕгуарзон*+, иннӕты ахуыр кӕнынмӕ арӕхса+, 3 ма уа расыггӕнаг+, йӕ къух макӕмӕ иса*+, уа ӕмбаргӕ*+, ма уа загъдгӕнаг+, ӕхцауарзаг+, 4 йӕ бинонтӕн уа хорз уынаффӕгӕнӕг+, йӕ сывӕллӕттӕ уой коммӕгӕс ӕмӕ уӕззау зондыл хӕст+ 5 (уымӕн ӕмӕ йӕхи бинонтӕн чи нӕ зоны уынаффӕ кӕнын, уый Хуыцауы ӕмбырдӕн цы хъуамӕ баххуыс кӕна?). 6 Уый хъуамӕ ма уа, уырнӕг ӕрӕджы чи сси, ахӕм+, цӕмӕй йӕ сӕр бӕрзӕндты хӕссын ма райдайа+ ӕмӕ йӕ ма баййафа, Хӕйрӕгӕн цы тӕрхон ӕрцыд хаст, уыцы тӕрхон+. 7 Стӕй йын хъуамӕ хорз ном уа ӕддагӕтты ’хсӕн дӕр+, цӕмӕй йӕм мацы уайдзӕф ӕрхауа ӕмӕ Хӕйрӕджы къӕппӕджы+ ма бахауа.

8 Кӕстӕриуӕггӕнӕг ӕфсымӕртӕ+ дӕр хъуамӕ уой уӕззаузонд, ма уой дывзагон, нозтуарзаг*, ма уой зыд ӕмӕ хи пайда ма агурой+, 9 уырнындзинадыл, ома сусӕгдзинадыл*+, фидар хӕцой ӕмӕ сӕ цӕсгом уа сыгъдӕг+.

10 Стӕй сӕ фыццаг хъӕуы бафӕлварын+, уыцы хъуыддаг сын сӕ бар бакӕной, уый аккаг сты ӕви нӕ, ӕмӕ сӕм кӕд фау ӕрхӕссӕн ницӕмӕй уа, уӕд лӕггад кӕнӕнт+.

11 Афтӕ сылгоймӕгтӕ дӕр хъуамӕ уой уӕззаузонд, макӕй фыдкой кӕной+, алцӕмӕй дӕр бӕрц зоной+, алы хъуыддаджы дӕр уой Хуыцауыл иузӕрдион+.

12 Кӕстӕриуӕггӕнӕг ӕфсымӕрӕн иу ус йеддӕмӕ ма уӕд+, йӕ сывӕллӕттӕн ӕмӕ йӕ бинонтӕн уӕд хорз уынаффӕгӕнӕг+. 13 Хорз чи кӕстӕриуӕг кӕны, уый ӕмбырды раз йӕхицӕн скӕны хорз ном+ ӕмӕ, Йесо Чырыстийыл кӕй ӕууӕнды, уый тыххӕй йӕ бон вӕййы сӕрибарӕй дзурын+.

14 Тагъд дӕм кӕй ӕрцӕудзынӕн, уымӕй мӕ кӕд ныфс ис, уӕддӕр дӕм адӕттӕ фыссын+, 15 мыййаг, куы бафӕстиат уон, уӕд цӕмӕй зонай, Хуыцауы бинонтӕй уӕвгӕйӕ дӕ дӕхи куыд дарын хъӕуы, уый+. Уыцы бинонтӕ сты удӕгас Хуыцауы ӕмбырд – рӕстдзинады* цӕджындз ӕмӕ бындур+. 16 Хуыцауыл алы хъуыддаджы дӕр иузӕрдион чи уыдзӕн, уыцы сусӕгдзинад*+, бӕгуыдӕр, диссаг у: «Уый сси адӕймаг+, уӕларвон буары мидӕг нымад ӕрцыд рӕстгӕнӕгыл+, ӕрлӕууыд зӕдты+ раз, уый тыххӕй хъуыстгонд ӕрцыд адӕмты ’хсӕн+, дунейы йыл баууӕндыдысты+, уӕлӕрвты йыл кадимӕ сӕмбӕлдысты»+.

4 Фӕлӕ пехуымпар-ныхас бӕлвырд дзуры, кӕй ӕрцӕудзӕн ахӕм рӕстӕджытӕ+, ӕмӕ иуӕй-иутӕ уырнындзинады фӕндагӕй ахаудзысты+, уымӕн ӕмӕ хъусдзысты, адӕймаджы зонд чи зыгъуыммӕ кӕны, ахӕм пехуымпар-ныхӕстӕм+ ӕмӕ хӕйрӕджыты ахуырӕдтӕм+, 2 ӕмӕ уый уыдзӕн, гӕдыныхӕстӕ чи кӕны+, уыдоны цӕстмӕ миты тыххӕй. Уыцы адӕймӕгтӕн сӕ цӕсгом+ у, буар тӕвд ӕфсӕйнагӕй куы басудзынц, уӕд куыд ницыуал фембары, афтӕ. 3 Уыдон нӕ уадздзысты бинонтӕ кӕнын+ ӕмӕ адӕмӕн дзурдзысты, уый ма хӕр, уый дӕр ма хӕр+, зӕгъгӕ, афтӕмӕй та Хуыцау хӕринаг уый тыххӕй сфӕлдыста+, цӕмӕй дзы, уырнындзинад+ кӕмӕ ис ӕмӕ, рӕстдзинад* цы у, уый бӕлвырдӕй чи зоны, уыдон хӕрой ӕмӕ йын бузныг дзурой. 4 Хуыцау цыдӕриддӕр скодта, уыдон иууылдӕр хорз сты+. Ӕмӕ кӕд адӕймаг уыдӕттӕ бузныг зӕгъгӕйӕ фӕхӕры+, уӕд дзы афтӕ ницӕмӕй ис зӕгъӕн, ӕмӕ нӕ бӕззы+, 5 уымӕн ӕмӕ ссыгъдӕг вӕййы Хуыцауы ныхасӕй ӕмӕ, адӕймаг кӕй скувы, уымӕй.

6 Адӕттӕ ӕфсымӕртӕн амон, ӕмӕ уыдзынӕ Йесо Чырыстийы фӕзминаг лӕггадгӕнӕг, дӕ зонд ӕфсаддзынӕ уырнындзинады ныхӕстӕй ӕмӕ, дӕ цард кӕмӕ гӕсгӕ аразыс+, уыцы хорз ахуырады ныхӕстӕй+. 7 Сыгъдӕг цы у, уый хынджылӕггаг чи кӕны, дзӕгъӕл ныхӕстӕ йеддӕмӕ чи ницы сты*, уыцы аргъӕуттӕм та ма хъус+. Фӕлӕ дӕхиуыл кус, цӕмӕй Хуыцауыл иузӕрдион уай – уый уӕд дӕ нысан+. 8 Буары уӕнгтӕ фидар кӕнынӕй* бирӕ пайда нӕй, Хуыцауыл иузӕрдион уай+, уый та пайда у алцӕмӕн дӕр+ – уымӕй кӕнгӕ у нӕ цард абон дӕр ӕмӕ фидӕны дӕр+. 9 Ацы ныхӕстӕ раст сты ӕмӕ сыл ӕппындӕр дызӕрдыг кӕнын нӕ хъӕуы+. 10 Ӕмӕ мах фыдӕбон дӕр уый тыххӕй кӕнӕм ӕмӕ ӕппӕт хъарутӕй дӕр уый тыххӕй архайӕм+, уымӕн ӕмӕ нӕ ныфс+ дарӕм удӕгас Хуыцауыл – уый у алыхуызон адӕмӕн+ сӕ Ирвӕзынгӕнӕг+, уӕлдайдӕр та, иузӕрдион+ ыл чи у, уыдонӕн.

11 Адӕттӕ иннӕтӕн фӕдзӕхс+ ӕмӕ сын сӕ амон+. 12 Ӕрыгон кӕй дӕ, уый тыххӕй дыл ӕнӕрвӕссон макуы мачи кӕнӕд+. Фӕлӕ дзыхыныхасӕй, уаг ӕмӕ ӕгъдауӕй, уарзондзинадӕй, уырнындзинадӕй ӕмӕ сыгъдӕгдзинадӕй+ фӕзминаг+ у, иузӕрдион+ чи у, уыдонӕн. 13 Цалынмӕ цӕуон, уӕдмӕ дӕр ӕппӕт хъарутӕй ууыл архай, цӕмӕй иннӕтӕн хъӕрӕй+ кӕсай+, фӕдзӕхсай сӕ ӕмӕ сӕ ахуыр кӕнай. 14 Хистӕр нӕлгоймӕгтӕ дыл сӕ къухтӕ куы ӕрӕвӕрдтой+, уӕд дын пехуымпар-ныхасмӕ+ гӕсгӕ цы курдиат+ ӕрцыд лӕвӕрд, уымӕ куыдфӕндыйы цӕстӕй ма кӕс. 15 Уыдӕттыл хъуыды кӕн+, дӕ хъарутӕ иууылдӕр уыцы хъуыддӕгтӕм сараз, цӕмӕй дын де ’нтыстдзинад+ алчидӕр уына. 16 Ӕдзухдӕр дӕхимӕ кӕс+, стӕй дӕ хъус дар, иннӕтӕн куыд ӕмӕ цы амоныс+, уымӕ. Ацы хъуыддӕгты лӕуд у алкӕддӕр, уымӕн ӕмӕ афтӕмӕй дӕхи дӕр фервӕзын кӕндзынӕ ӕмӕ дӕм чи хъусы, уыдоны дӕр+.

5 Ацӕргӕ нӕлгоймагӕн карз уайдзӕф ма кӕн+, фӕлӕ йемӕ ныхас кӕн фӕлмӕнӕй, цыма дӕ фыд у, афтӕ. Ӕрыгӕттимӕ афтӕ ныхас кӕн, цыма де ’фсымӕртӕ сты. 2 Ацӕргӕ сылгоймӕгтимӕ+ афтӕ ныхас кӕн, цыма дӕ мадимӕ ныхас кӕныс. Ӕрыгон сылгоймӕгтимӕ та, цыма дӕ хотӕ+ сты, афтӕ – сыгъдӕг ӕфсармы уагыл.

3 Ӕцӕгдӕр ӕххуысхъуаг чи у, ахӕм идӕдз сылгоймӕгты+ нымай ӕмӕ сӕм дӕ хъус дар. 4 Фӕлӕ кӕд идӕдз сылгоймагӕн цот кӕнӕ цоты цот ис, уӕд уыдон фыццаджыдӕр ахуыр кӕнӕнт, Хуыцауыл иузӕрдион кӕй сты, уый сӕхи бинонты ’хсӕн ӕвдисыныл+, ӕмӕ сыл сӕ ныййарджыты+ ӕмӕ сӕ ныййарджыты ныййарджыты раз цы хӕс ис, уый ӕххӕст кӕныныл, уымӕн ӕмӕ уый раст у Хуыцауы раз+. 5 Ӕххуысхъуаг чи у ӕмӕ фӕкӕсӕг кӕмӕ нӕй+, ахӕм идӕдз сылгоймаг та йӕ ныфс фӕдары Хуыцауыл+ ӕмӕ йӕм ӕхсӕвӕй-бонӕй фӕкувы ӕмӕ йын фӕлӕгъстӕ кӕны+. 6 Фӕлӕ, идӕдз уӕвгӕйӕ, йӕ буары монцты фӕдыл чи цӕуы+, уый та у мард+, кӕд удӕгас у, уӕддӕр. 7 Уӕдӕ сын амӕй фӕстӕмӕ дӕр адӕттӕ амон+, цӕмӕй сӕм фау ӕрхӕссӕн мацӕмӕй уа+. 8 Ӕмӕ ӕцӕгдӕр, йӕхиуӕттыл+, ӕмӕ уӕлдайдӕр та йӕ бинонтыл+, чи нӕ тыхсы, уый ныууагъта+ уырнындзинад+ ӕмӕ у, уырнындзинад кӕмӕ нӕй, уымӕй фыддӕр.

9 Ӕххуыс кӕмӕн хъӕуы, уыдоны номхыгъдмӕ идӕдз сылгоймаджы бахӕссӕн ис, кӕд ыл ӕхсай азӕй къаддӕр нӕ цӕуы, кӕд йӕ лӕгыл иузӕрдион уыди*+, 10 кӕд ӕй зонынц йӕ хорз хъуыддӕгтӕй+, ома йӕ сывӕллӕтты хорз схъомыл кодта+, уыд уазӕгуарзон+, сыгъдӕджытӕн сӕ къӕхтӕ ӕхсадта+, тыхст уавӕры чи уыди, уыдонӕн ӕххуыс кодта+ ӕмӕ алы хорз хъуыддагмӕ дӕр ӕнӕзивӕг уыди, уӕд+.

11 Фӕлӕ уыцы номхыгъдмӕ ӕрыгон идӕдз сылгоймӕгты ма бахӕсс, уымӕн ӕмӕ сӕ буары монцтӕ куы стыхджын вӕййынц, уӕд сын уыдон Чырыстийӕ+ ахсджиагдӕр свӕййынц, ӕмӕ сӕ бафӕнды мой скӕнын. 12 Уыдон сӕхи кӕнынц тӕрхоны аккаг, уымӕн ӕмӕ, фыццаг цы дзырд радтой, ууыл* сӕ къух систой+. 13 Уыимӕ ма афтӕ сахуыр вӕййынц, ӕмӕ кусгӕ ницы кӕнынц, фӕлӕ иу хӕдзарӕй иннӕ хӕдзармӕ дзӕгъӕл рацу-бацу кӕнынц. Стӕй, кусгӕ кӕй ницы кӕнынц, уый иу у, фӕлӕ ма иннӕты кой дӕр кӕнынц, сӕхи адӕмы хъуыддӕгты тъыссынц+ ӕмӕ, цы не ’мбӕлы, уыдӕттӕ дзурынц. 14 Уымӕ гӕсгӕ мӕ фӕнды, цӕмӕй ӕрыгон идӕдз сылгоймӕгтӕ мой кӕной+, зӕнӕг уадзой+ ӕмӕ хӕдзары хъуыддӕгтӕ кӕной, ныхмӕлӕуджытӕн уый ӕфсон куыд нӕ уа, ӕмӕ нӕ ’фхӕрой+. 15 Уӕвгӕ, ныр дӕр идӕдз сылгоймӕгтӕй чидӕртӕ раст фӕндаг ныууагътой ӕмӕ Сайтаны фӕдыл ацыдысты. 16 Кӕд уырнӕг сылгоймагӕн йӕ хиуӕтты ’хсӕн идӕдз устытӕ ис, уӕд сын ӕххуыс кӕнӕд+, цӕмӕй уыцы уаргъ ӕмбырдыл ма ӕрӕнцайа. Уӕд ӕмбырдӕн йӕ бон уыдзӕн, ӕцӕгдӕр ӕххуысхъуаг чи у, уыцы идӕдз устытӕн ӕххуыс кӕнын+.

17 Хистӕр нӕлгоймӕгтӕ дӕттынц хорз разамынд+, ӕмӕ сӕ уымӕ гӕсгӕ нымайӕнт уӕлдай кады аккагыл+, уӕлдайдӕр та, Хуыцауы ныхас дзурын ӕмӕ амоныны хъуыддаджы чи фыдӕбон кӕны, уыдоны+. 18 Фыстад дӕр афтӕ зӕгъы: «Гал хор куы най кӕна, уӕд ын йӕ дзых бастӕй ма дар»+. Ӕмӕ ноджыдӕр: «Фыдӕбонгӕнӕг уый аккаг у, ӕмӕ йын йӕ фыдӕбонӕн бафидой»+. 19 Хистӕр нӕлгоймаджы исчи исты хъуыддаджы куы аххосджын кӕна, уӕд уыцы адӕймагмӕ ма байхъус, дыууӕ кӕнӕ йын ӕртӕ ӕвдисӕны куы нӕ уа, уӕд+. 20 Тӕригъӕдджын митӕ чи кӕны+, уыдонӕн уайдзӕф кӕн+ се ’ппӕты раз дӕр, цӕмӕй иннӕтӕ дӕр тӕрсой тӕригъӕд саразын+. 21 Хуыцау ӕмӕ Йесо Чырыстийы+ раз, стӕй дын Хуыцауы ӕвзӕрст зӕдты раз фӕдзӕхсын: цалынмӕ уынаффӕ рахӕссай, уӕдмӕ-иу алцыдӕр лӕмбынӕг равзар ӕмӕ хъулон макӕй кӕн ӕмӕ афтӕмӕй, цы дын загътон, уыдӕттӕ ӕххӕст кӕн+.

22 Искӕуыл+ дӕ къухтӕ ӕрӕвӕрынмӕ тагъд ма кӕн*+, стӕй иннӕты тӕригъӕдты аххосджын ма разын+, дӕхи фӕчъизи кӕнын ма бауадз+.

23 Дӕ ахсӕн кӕй риссы ӕмӕ арӕх рынчын кӕй вӕййыс, уымӕ гӕсгӕ ӕрмӕст дон мауал нуаз, фӕлӕ-иу сӕн+ дӕр иу гыццыл ануаз.

24 Иуӕй-иутӕн сӕ тӕригъӕдтӕ ӕргом сты+ ӕмӕ сӕ уайтагъд ӕркӕнынц тӕрхонмӕ, фӕлӕ иннӕты тӕригъӕдтӕ дӕр фӕстӕдӕр раргом уыдзысты+. 25 Афтӕ ӕргом сты хорз хъуыддӕгтӕ+ дӕр, фӕлӕ, ӕргом чи не сты, уыцы хорз хъуыддӕгтӕ дӕр нӕ басусӕг уыдзысты+.

6 Цагъартӕ* сӕ хицӕутты нымайӕнт, цы кад сӕм ӕмбӕлы, уый аккагыл+, цӕмӕй Хуыцауы ном ӕмӕ йӕ ахуырад мачи фауа+. 2 Стӕй сӕ хицӕуттӕ уырнджытӕ+ кӕмӕн сты, уыдон сыл, ӕфсымӕртӕ+ кӕй сты, уый тыххӕй ӕнӕрвӕссон ма кӕнӕнт+. Фӕлӕ сын хъуамӕ ноджы зӕрдиагдӕрӕй лӕггад кӕной, уымӕн ӕмӕ сӕ хорз лӕггадӕй пайда кӕмӕн хӕссынц, уыдон сты се ’муырнджытӕ ӕмӕ сӕ уарзон ӕфсымӕртӕ.

Адӕттӕ иннӕтӕн амон+ ӕмӕ сын сӕ фӕдзӕхс. 3 Кӕд исчи ӕндӕр цыдӕртӕ амоны+ ӕмӕ нӕ Хицау Йесо Чырыстийы раст*+ ныхӕстимӕ ӕмӕ, Хуыцауыл иузӕрдион уай+, уыимӕ баст чи у, уыцы ахуырадимӕ разы нӕу, 4 уӕд уый та у сӕрбӕрзонд+ ӕмӕ ницы ӕмбары+. Ахӕм адӕймаг фӕрынчын+ радзур-бадзурты ӕмӕ цыдӕр ныхӕстыл быцӕу кӕныны низӕй+. Уыдӕттӕ та ӕркӕнынц хӕлӕгмӕ+, хылтӕм, ӕфхӕрӕн ныхӕстӕм+, алы ӕвзӕр дызӕрдыг хъуыдытӕм, 5 стӕй уымӕ, ӕмӕ, йӕ зонд зыгъуыммӕ кӕмӕн у+ ӕмӕ рӕстдзинадӕй* йӕхи ӕнӕхай чи фӕкодта+, уыдон ницӕй тыххӕй дӕр ӕдзух быцӕу фӕкӕнынц. Уыцы адӕймӕгтӕ афтӕ хъуыды кӕнынц, цыма, Хуыцауыл иузӕрдион уай, уый цыдӕр пайда райсыны фадат у+. 6 Ӕмӕ ӕцӕгдӕр, Хуыцауыл иузӕрдион уай+, уый стыр пайда у+, кӕд, цы нӕм ис, уый фагыл нымайӕм+, уӕд. 7 Мах ацы дунемӕ ницы ӕрбахастам, ӕмӕ дзы хӕсгӕ дӕр ницы акӕндзыстӕм+. 8 Уӕдӕ нын хӕрд, уӕлӕдарӕс ӕмӕ, кӕм цӕрӕм, уый куы уа, уӕд уый фагыл нымайӕм+.

9 Схъӕздыг уа, уымӕ чи тырны, уыдон та бахауынц фӕлварӕны+ ӕмӕ къӕппӕджы, ӕмӕ сӕм фӕзыны, адӕймаджы сӕфтмӕ ӕмӕ мӕлӕтмӕ+ чи кӕны, бирӕ ахӕм ӕнӕзонд ӕмӕ фыдбылыз фӕндтӕ+. 10 Уымӕн ӕмӕ адӕймаг ӕхцауарзаг+ куы уа, уӕд уымӕй цӕуы*+ алыхуызон фыдбылызтӕ+. Ӕмӕ иуӕй-иутӕ уыцы уарзты фӕдыл кӕй ацыдысты, уый тыххӕй уырнындзинады фӕндагӕй адзӕгъӕл сты ӕмӕ сӕхи бирӕ мӕстыты хай фӕкодтой+.

11 Ды та, Хуыцауы адӕймаг, уыдӕттӕй дард лидз+. Фӕлӕ тырн рӕстдзинадмӕ, Хуыцауыл иузӕрдион уай, уымӕ, уырнындзинадмӕ, уарзондзинадмӕ, фидардзинадмӕ ӕмӕ, фӕлмӕн удыхъӕды+ хицау уай, уымӕ. 12 Хъӕбатырӕй тох кӕн уырнындзинады сӕрыл+ ӕмӕ фидар ныххӕц ӕнусон цардыл. Хуыцау дӕ уыцы цардмӕ ӕрхуыдта ӕмӕ уыцы царды тыххӕй фехъусын кодтай бирӕ ӕвдисӕнты раз+.

13 Ӕппӕт дӕр удӕгас кӕй фӕрцы у, уыцы Хуыцауы раз ӕмӕ, Понтий Пилаты+ раз хъӕбатырӕй ӕвдисӕн чи ныллӕууыд+ ӕмӕ тынг хорз чи дзырдта+, уыцы Йесо Чырыстийы раз дын зӕгъын+: 14 цалынмӕ нӕ Хицау Йесо Чырысти нӕ раргом уа+, уӕдмӕ ӕнӕзӕрдӕхудтӕй ӕххӕст кӕн, цы дын бафӕдзӕхстон, уый, фау ӕрхӕссӕн дӕм мацӕмӕй уӕд. 15 Амондджын ӕмӕ иунӕг Хъомысджын+ Хицау та йӕхи раргом кӕндзӕн, йӕ афон куы ’рцӕуа, уӕд+. Уый у паддзӕхты Паддзах+ ӕмӕ хицӕутты Хицау+, 16 иунӕг уый у ӕнӕмӕлгӕ+, уый цӕры, бацӕуӕн кӕдӕм нӕй, ахӕм рухсы+, иу адӕймаг дӕр ӕй нӕ федта, ӕмӕ йӕ йӕ бон фенын дӕр никӕмӕн у+. Уымӕн уӕд кад+, уый у стыр тыхы хицау ӕнустӕм дӕр! Аммен.

17 Ныртӕккӕ* хъӕздыг+ чи у, уыдонӕн амон, цӕмӕй сӕхицӕй хъал ма уой+ ӕмӕ сӕ зӕрдӕ, ӕууӕнк кӕуыл нӕй, уыцы хъӕздыгдзинадыл ма дарой+, фӕлӕ Хуыцауыл, циндзинад нын цыдӕриддӕр хӕссы, уый нын рӕдауӕй чи дӕтты, ууыл+. 18 Амон сын, цӕмӕй иннӕтӕн хорздзинад аразой+, хъӕздыг уой хорз хъуыддӕгтӕй+, уой цӕстуарзон ӕмӕ сӕм цы ис, уымӕй иннӕтӕн хай кӕной+, 19 ӕмӕ афтӕмӕй сӕхицӕн ӕмбырд кӕной, чи нӕ фесӕфдзӕн, ахӕм хӕзна+ – фидӕнӕн хорз бындур+, цӕмӕй фидар ныххӕцой ӕцӕг цардыл+.

20 Тимофей, дӕ бар дын цы бакодтой, уый хъахъхъӕн+ ӕмӕ дӕхи хиз, сыгъдӕг цы у, уый хынджылӕггаг чи кӕны, уыцы дзӕгъӕл ныхӕстӕй ӕмӕ мӕнг зонындзинадӕй – уыцы зонындзинад ӕркӕны, ӕцӕг цы у, уый ныхмӕ чи у, ахӕм ныхӕстӕм+. 21 Иуӕй-иутӕ сӕхицӕй ӕппӕлыдысты, ахӕм зонындзинад нӕм ис, зӕгъгӕ, ӕмӕ уырнындзинады фӕндагӕй адзӕгъӕл сты+.

Хуыцауы стыр хорзӕхӕй хайджын ут.

[Фиппаинӕгтӕ]