Дӕ бон у, ӕмӕ ӕвзӕр фӕндтыл фӕуӕлахиз уай

1. Не ’ппӕт дӕр цавӕр тохы архайӕм?

ИСКУЫ дын афтӕ уыди, ӕмӕ дӕ тынг фӕндыд, Йегъовӕйы зӕрдӕмӕ цы нӕ цӕуы, ахӕм цыдӕр саразын? Кӕд о, уӕд дӕхимӕ ма ныхъхъус, ӕрмӕст дӕуӕн нӕ уыд афтӕ. Библийы фыст ис: «Сымах цы фӕлварӕнты бахаут, уыдоны иннӕ адӕм дӕр бахауынц» (1 Кор. 10:13). Уӕдӕ кӕд ӕвзӕр фӕндтимӕ тох кӕныс, уӕд дӕ зӕрдыл дар, иннӕтӕ дӕр ахӕм тохы кӕй архайынц. Йегъовӕйы фӕрцы ӕнӕмӕнг фӕуӕлахиз уыдзынӕ!

2. Чырыстӕттӕй ӕмӕ, Библи чи ахуыр кӕны, уыдонӕй иуӕй-иутӕ цавӕр ӕвзӕр фӕндтимӕ тох кӕнынц? (Кӕс нывтӕм дӕр.)

² Библийы ма ноджыдӕр фыст ис: «Алкӕмӕн дӕр фӕлварӕн вӕййы, йӕхи зӕрдӕйы фӕнд ӕй кӕй сцырен кӕны ӕмӕ йӕ фӕдыл кӕй ацӕуы, уый» (Иак. 1:14). Ацы стихӕй куыд зыны, афтӕмӕй кӕмӕндӕр иу цыдӕр свӕййы фӕлварӕн, кӕмӕндӕр та – ӕндӕр цыдӕр. Зӕгъӕм, чырыстӕттӕй ӕмӕ, Библи чи ахуыр кӕны, уыдонӕй кӕйдӕрты фӕцыбӕл кӕны искӕимӕ ӕмуат ӕрцӕуыны монц. Вӕййы афтӕ дӕр, ӕмӕ чидӕр, сылгоймаг уӕвгӕйӕ, сылгоймагмӕ фӕцыбӕл кӕны, нӕлгоймаг уӕвгӕйӕ – нӕлгоймагмӕ. Чидӕртӕ та раздӕр порнографимӕ кастысты, ӕмӕ сӕ тынг фӕфӕнды, цӕмӕй та йӕм ногӕй бакӕсой. Афтӕ вӕййы сӕ хабар, раздӕр наркотиктӕ ӕмӕ фыднозт чи кодта, уыдонӕн дӕр – хатт сӕ фӕфӕнды сӕ раздӕры хъуыддӕгтӕм раздӕхын. Ӕмӕ, ӕвӕццӕгӕн, махӕй алкӕмӕ дӕр уыди, апостол Павелмӕ цы ӕнкъарӕнтӕ уыд, ахӕм ӕнкъарӕнтӕ. Уый ныффыста: «Раст цы у, уый саразын мӕ куы фӕфӕнды, уӕд мӕ разы ӕрбалӕууы ӕвзӕрдзинад» (Ром. 7:21).

3. Ӕдзух уыцы иу ӕвзӕр фӕндимӕ чи тох кӕны, уыдонӕй кӕмӕдӕрты цавӕр хъуыдытӕ фӕзыны?

³ Кӕд ӕдзух уыцы иу ӕвзӕр фӕндимӕ тох кӕныс, уӕд дӕм, чи зоны, афтӕ кӕсы, ӕмӕ дӕм йӕ ныхмӕ тох кӕнынӕн тых ӕппындӕр нӕй. Стӕй дӕ, гӕнӕн ис, ныфс ницӕмӕйуал ис, ӕмӕ хъуыды кӕныс, ӕвзӕр фӕнд мӕм кӕй ис, ӕрмӕст уый тыххӕй дӕр мӕ Йегъовӕ райгонд нӕу, зӕгъгӕ. Фӕлӕ уыдон раст хъуыдытӕ не сты. Ацы статьяйы ӕркӕсдзыстӕм: 1) ахӕм хъуыдытӕ нӕм цӕмӕн фӕзыны; 2) цы нын баххуыс кӕндзӕн, цӕмӕй ӕвзӕр фӕндты ныхмӕ тох кӕнӕм.

ХӔЙРӔГ НЫН ЦАВӔР ХЪУЫДЫТӔ ХЪАРЫ

4. а) Хӕйрӕджы цӕмӕн фӕнды, цӕмӕй афтӕ хъуыды кӕнӕм, ӕмӕ нӕм ӕвзӕр фӕндтимӕ тох кӕнынӕн фаг тых нӕй? б) Афтӕ зӕгъӕн цӕмӕн ис, ӕмӕ нӕ бон у ӕвзӕр фӕндты ныхмӕ фидар фӕлӕууын?

⁴ Хӕйрӕджы фӕнды, цӕмӕй хъуыды кӕнӕм, ӕвзӕр фӕндты ныхмӕ фидар фӕлӕууын нӕ бон кӕй нӕу, уый фаг нӕм тых кӕй нӕй. Йесо уый зыдта, ӕмӕ йӕ фӕдылдзӕуджыты ахуыр кодта афтӕ кувын: «Ма нӕ баппар фӕлварӕны ӕмӕ нӕ Фыдбылызӕй фервӕзын кӕн» (Матф. 6:13). Хӕйрӕг афтӕ дзуры, ӕмӕ адӕймаджы исты куы рӕдийын кӕна, уӕд Йегъовӕйы коммӕ нӕ бакӕсдзӕн (Иов 2:4, 5). Фӕлӕ Хӕйрӕг йӕхӕдӕг цы у, махӕй дӕр уый ӕнхъӕлы. Йе ’взӕр фӕндты фӕдыл фыццаг Хӕйрӕг ацыди. Уый нӕ бафӕндыд Йегъовӕйыл иузӕрдионӕй баззайын. Афтӕ йӕм кӕсы, ӕмӕ мах дӕр уый хуызӕн стӕм, ӕмӕ нӕ исты куы рӕдийын кӕна, уӕд уайтагъд Йегъовӕйы ныууадздзыстӕм. Хӕйрӕг ма суанг афтӕ дӕр хъуыды кодта, ӕмӕ йӕ бон бауыдзӕн Хуыцауы ӕххӕст Фырты фӕрӕдийын кӕнын (Матф. 4:8, 9). Фӕлӕ-ма ахъуыды кӕн: ӕцӕгдӕр афтӕ у, ӕмӕ нӕ бон нӕу ӕвзӕр фӕндты ныхмӕ фидар фӕлӕууын? Нӕ, уый афтӕ нӕу. Мах разы стӕм апостол Павелы ныхӕстимӕ. Уый загъта: «Алцыдӕр у мӕ бон, хъару мын чи дӕтты, уый фӕрцы» (Фил. 4:13).

5. Кӕцӕй йӕ зонӕм, Йегъовӕ кӕй нӕ дызӕрдыг кӕны, нӕ бон не ’взӕр фӕндты ныхмӕ фидар фӕлӕууын кӕй у?

⁵ Хӕйрӕгӕй уӕлдай Йегъовӕ ӕппындӕр нӕ дызӕрдыг кӕны, нӕ бон кӕй у ӕвзӕр фӕндты ныхмӕ фидар фӕлӕууын. Уый кӕцӕй зонӕм? Йегъовӕ загъта, тынг бирӕ адӕм ыл иузӕрдионӕй кӕй баззайдзысты ӕмӕ стыр бӕллӕхы сӕрты кӕй ахиздзысты. Ахъуыды-ма кӕн, уый цӕуыл дзурӕг у. Йӕ бон сайын кӕмӕн нӕу, уыцы Хуыцау загъта, цалдӕр адӕймаджы нӕ, фӕлӕ тынг бирӕ адӕм кӕй бацӕудзысты ног дунемӕ «даргъ урс дарӕсты» (Рарг. 7:9, 13, 14). Уый ууыл дзурӕг у, ӕмӕ йӕ цӕсты уыдзысты сыгъдӕг. Уӕдӕ бӕрӕг у, Йегъовӕ кӕй зоны, не ’взӕр фӕндтимӕ тох кӕнгӕйӕ нӕ бон кӕй у, ӕмӕ фӕуӕлахиз уӕм.

6, 7. Хӕйрӕг ма нӕ ноджыдӕр цӕуыл хъавы баууӕндын кӕнынмӕ?

⁶ Хӕйрӕджы ӕрмӕст уый нӕ фӕнды, цӕмӕй нӕхимӕ ӕдых кӕсӕм. Уый фӕнды, цӕмӕй нӕ ныфс мацӕмӕйуал уа, ӕмӕ афтӕ хъуыды кӕнӕм, зӕгъгӕ нӕм ӕвзӕр фӕндтӕ кӕй фӕзыны, ӕрмӕст уый тыххӕй дӕр нӕ Йегъовӕ райгонд нӕу. Фӕлӕ ма йӕ иу хатт зӕгъӕм: Хӕйрӕг йӕхӕдӕг цы у, махӕй дӕр уый ӕнхъӕлы. Ныфс кӕмӕн нӕй, уый Хӕйрӕгӕн. Йегъовӕ йын ахӕм тӕрхон рахаста, ӕмӕ ӕнусон царды аккаг нӕу (Райд. 3:15; Рарг. 20:10). Хӕйрӕджы фӕнды, цӕмӕй мах дӕр ныфс мацӕмӕй уа. Цӕмӕн? Уымӕн ӕмӕ мах хайджын стӕм, уый цы арфӕдзинадӕй фӕци ӕнӕхай, уымӕй – ис нын фидӕнӕй ныфс. Фӕлӕ махӕн нӕ уавӕр Хӕйрӕджы уавӕры хуызӕн нӕу. Библийы фыст ис, Йегъовӕйы кӕй фӕнды, цӕмӕй ӕнустӕм цӕрӕм. Уый «нӕ фӕнды, цӕмӕй исчи фесӕфа, фӕлӕ йӕ фӕнды, цӕмӕй се ’ппӕтӕн дӕр уа ӕрфӕсмон кӕныны фадат» (2 Пет. 3:9).

⁷ Кӕд нӕм афтӕ кӕсы, ӕмӕ нӕм ӕвзӕр фӕндтимӕ тох кӕнынӕн фаг тыхтӕ нӕй ӕмӕ нӕ кӕд ныфс ницӕмӕйуал ис, уӕд уый ууыл дзурӕг у, ӕмӕ Хӕйрӕгӕн йӕ нысан йӕ къухы бафтыд. Уый нӕ зӕрдыл куы дарӕм, уӕд-иу йӕ ныхмӕ фидар фӕлӕудзыстӕм (1 Пет. 5:8, 9).

ӔНӔХХӔСТ КӔЙ СТӔМ, УЫЙ ТЫХХӔЙ НӔМ ЦАВӔР ӔНКЪАРӔНТӔ ФӔЗЫНЫ

8. Ӕвзӕр фӕндтимӕ тох кӕнын ма нын ноджыдӕр зын цӕмӕн вӕййы? (Псалом 51:5). (Кӕс фиппаинаг дӕр «Ацы ныхӕстӕн сӕ хъуыды цы у».)

⁸ Ӕвзӕр фӕндтимӕ тох кӕнгӕйӕ, нӕхимӕ ӕдых куы фӕкӕсӕм ӕмӕ нӕ ныфс куы ницӕмӕйуал вӕййы, уӕд уый ӕрмӕст Хӕйрӕджы аххос нӕ вӕййы. Уӕдӕ ма цӕй аххос? Ӕнӕххӕст кӕй стӕм, ома Адам ӕмӕ Евӕйӕ нӕ туджы тӕригъӕдa кӕй рахастам, уый аххос (Иов 14:4; бакӕс Псалом 51:5).

9, 10. а) Адам ӕмӕ Евӕ тӕригъӕд куы сарӕзтой, уӕд сӕм цавӕр ӕнкъарӕнтӕ фӕзынд? (Кӕс нывмӕ дӕр.) б) Нӕ туджы тӕригъӕд кӕй рахастам, уый ныл куыд фӕзынд?

⁹ Ӕркӕсӕм-ма, Адам ӕмӕ Евӕ тӕригъӕд куы сарӕзтой, уӕд сӕм цавӕр ӕнкъарӕнтӕ фӕзынд. Йегъовӕйы ныхасы сӕрты куы ахызтысты, уӕд дзы сӕхи бамбӕхстой ӕмӕ бацархайдтой сӕ буар бамбӕрзыныл. Чиныджы «Понимание Писания» уый тыххӕй фыст ис: «Тӕригъӕд кӕй сарӕзтой, уый сыл афтӕ фӕзынд, ӕмӕ сӕ сӕ цӕсгом хордта, худинаг сӕм каст, цыдӕр тас сӕ бацыд». Уый афтӕ уыд, цыма сӕ, уыцы ӕртӕ къомнӕты йеддӕмӕ кӕм ницы ис, ахӕм хӕдзары сӕхгӕдтой. Сӕ бон уыд иу къомнӕтӕй иннӕмӕ цӕуын, фӕлӕ хӕдзарӕй ӕддӕмӕ рацӕуын сӕ бон нӕ уыд, ома сӕ бон нӕ уыд тӕригъӕдӕй фервӕзын.

¹⁰ Махӕн нӕ уавӕр Адам ӕмӕ Евӕйы уавӕры хуызӕн нӕу. Уыдонӕй уӕлдай махӕн нӕ бон у, ӕмӕ тӕригъӕдӕй ссыгъдӕг уӕм ӕмӕ нын уа сыгъдӕг цӕсгом, Чырысти йӕхи нывондӕн кӕй ӕрхаста, уый фӕрцы (1 Кор. 6:11). Фӕлӕ уӕддӕр нӕ туджы рахастам тӕригъӕд ӕмӕ ӕнӕххӕстдзинад. Уӕдӕ диссаг нӕу, мах дӕр нӕ цӕсгом кӕй фӕхӕры, худинаг нӕм кӕй фӕкӕсы ӕмӕ нӕхицӕн ӕнцой кӕй нӕ фӕарӕм. Библийы фыст ис, тӕригъӕд ныр дӕр адӕмы хӕрдмӕ скӕсын кӕй нӕ уадзы, «Адам цы тӕригъӕд ракодта, ахӕм тӕригъӕд чи нӕ ракодта», суанг уыдоны дӕр (Ром. 5:14). Фӕлӕ афтӕ хъуамӕ ма хъуыды кӕнӕм, ӕмӕ, иугӕр тӕригъӕдджынтӕй райгуырдыстӕм, уӕд нӕ бон никуы бауыдзӕн, раст цы у, уый аразын ӕмӕ нын фидӕнӕй ныфс нӕй. Ахӕм хъуыдытӕ нӕм куы фӕзыны, уӕд-иу хъуамӕ семӕ тох кӕнӕм. Уымӕн нын цы баххуыс кӕндзӕн?

11. Кӕд дӕм афтӕ кӕсы, ӕмӕ дӕм ӕвзӕр фӕндтимӕ тох кӕнынӕн тых ӕппындӕр нӕй, уӕд Ромӕгтӕм 6:12 стихмӕ гӕсгӕ, цы хъуамӕ аразай?

¹¹ Кӕд дӕм афтӕ кӕсы, ӕмӕ дӕ бон нӕ бауыдзӕн ӕвзӕр фӕндтимӕ тох кӕнын, уый фаг тыхтӕ дӕм нӕй, уӕд дын уый, ӕвӕццӕгӕн, де ’нӕххӕстдзинад «дзуры». Ӕмӕ йын хъуамӕ йӕ хъӕлӕсмӕ ма хъусай. Цӕуылнӕ? Уымӕн ӕмӕ Библийы фыст ис, цӕмӕй тӕригъӕдӕн уый бар ма дӕттӕм, ӕмӕ нын паддзах уа. (Бакӕс Ромӕгтӕм 6:12.) Уый ууыл дзурӕг у, ӕмӕ дӕхи бон у равзарын, де ’взӕр фӕндты фӕдыл цӕудзынӕ ӕви нӕ (Гал. 5:16). Йегъовӕ ӕппындӕр нӕ дызӕрдыг кӕны, исты нӕ куы рӕдийын кӕна, уӕд-иу нӕ бон кӕй уыдзӕн фидар фӕлӕууын. Афтӕ куы нӕ уаид, уӕд нын уый фӕдзӕхсгӕ дӕр нӕ бакодтаид (Дык. з. 30:11–14; Ром. 6:6; 1 Фес. 4:3). Уӕдӕ бӕрӕг у, ӕдых кӕй не стӕм – нӕ бон у ӕвзӕр фӕндтимӕ тох кӕнын.

12. Кӕд дӕ ныфс ницӕмӕйуал ис, уӕд цы хъуамӕ аразай ӕмӕ цӕмӕн?

¹² Кӕд дӕ ныфс ницӕмӕйуал ис, ӕмӕ афтӕ хъуыды кӕныс, зӕгъгӕ мӕм ӕвзӕр фӕндтӕ кӕй фӕзыны, ӕрмӕст уый тыххӕй дӕр мӕ Йегъовӕ райгонд нӕу, уӕд та? Уыдӕттӕ дӕр дын, ӕвӕццӕгӕн, де ’нӕххӕстдзинад «дзуры». Ӕмӕ йын хъуамӕ йӕ хъӕлӕсмӕ ма хъусай. Цӕуылнӕ? Библийы фыст ис, Йегъовӕ мах тыххӕй «алцыдӕр [кӕй] зоны» ӕмӕ хорз кӕй ӕмбары, тӕригъӕд ныл куыд ӕндавы, уый (Пс. 103:13, 14; 1 Иоан. 3:19, 20). Кӕд ӕвзӕр фӕндтимӕ тох кӕнӕм ӕмӕ сӕ фӕдыл нӕ ацӕуӕм, уӕд Йегъовӕйы цӕсты стӕм сыгъдӕг. Афтӕ зӕгъӕн цӕмӕн ис?

13, 14. Ӕвзӕр фӕндтӕ нӕм кӕй фӕзыны, уый ууыл дзурӕг у, ӕмӕ нӕ Йегъовӕ райгонд нӕу? Дӕ дзуапп бамбарын кӕн.

¹³ Библимӕ гӕсгӕ, ӕвзӕр хъуыддӕгтӕ (уыдоныл нӕ бар фӕцӕуы) ӕмӕ ӕвзӕр фӕндтӕ (уыдон, гӕнӕн ис, сӕхигъӕдӕй фӕзыной) иу не сты. Зӕгъӕм, 1 ӕнусы Коринфы ӕмбырдӕй чидӕртӕ, цалынмӕ чырыстӕттӕ нӕ систы, уӕдмӕ гомосексуалисттӕ уыдысты. Павел ныффыста: «Сымахӕй дӕр иуӕй-иутӕ ахӕмтӕ уыдысты». Цымӕ уый ууыл дзурӕг у, ӕмӕ донаргъуыд куы райстой, уый фӕстӕ сӕм ахӕм ӕнӕгъдау фӕндтӕ никуыуал фӕзынд? Ӕвӕццӕгӕн, нӕ, уымӕн ӕмӕ ахӕм фӕндтӕ арф уидӕгтӕ ауадзынц, ӕмӕ уыцы хъуыддӕгтӕ ныууадзын тынг зын вӕййы. Фӕлӕ-иу уыцы чырыстӕттӕ хиуылхӕцындзинад куы равдыстой ӕмӕ-иу сӕ буары монцты фӕдыл куы нӕ ацыдысты, уӕд-иу сӕ Йегъовӕ райгонд уыд. Йегъовӕ сӕм ахӕм цӕстӕй каст, цыма «ӕхсад ӕрцыдысты» (1 Кор. 6:9–11). Ӕмӕ абон дӕр хабар афтӕ у.

¹⁴ Цыфӕнды ӕвзӕр фӕндтӕ нӕм ма фӕзына, уӕддӕр уый гӕнӕн ис, ӕмӕ сыл фӕуӕлахиз уӕм. Чи зоны сӕ кӕронмӕ нӕ фервӕздзыстӕм, фӕлӕ нӕ бон у хиуылхӕцындзинад ӕвдисын ӕмӕ архайын, цӕмӕй «нӕ буары фӕндтӕ ӕмӕ нӕ зонды фӕдыл» ма цӕуӕм (Еф. 2:3). Ныртӕккӕ ӕркӕсдзыстӕм цалдӕр уынаффӕмӕ. Уыдон нын баххуыс кӕндзысты, цӕмӕй ӕвзӕр фӕндтимӕ тох кӕнгӕйӕ фӕуӕлахиз уӕм.

ЦЫ ДЫН БАХХУЫС КӔНДЗӔН, ЦӔМӔЙ ФӔУӔЛАХИЗ УАЙ?

15. Нӕхи куы нӕ сайӕм, уӕд нын уый ӕвзӕр фӕндтимӕ тох кӕнынӕн куыд баххуыс кӕндзӕн?

¹⁵ Цы дын баххуыс кӕндзӕн, цӕмӕй ӕвзӕр фӕндтыл фӕуӕлахиз уай? Хъуамӕ дӕхи ма сайай, ӕмӕ дӕ лӕмӕгъдзинӕдтыл басӕттай. Дӕхи-иу «алы мӕнг хъуыдытӕй» ма сай (Иак. 1:22). Афтӕ, гӕнӕн ис, куыд рауайа? Зӕгъӕм, адӕймаг йӕ лӕмӕгъдзинадмӕ, гӕнӕн ис, уӕлӕнгай цӕстӕй кӕса ӕмӕ афтӕ хъуыды кӕна: «Иннӕтӕ мӕнӕй фылдӕр нуазынц». Чидӕр та, гӕнӕн ис, кӕйдӕр аххосджын кӕна, цавӕрдӕр лӕмӕгъдзинад ӕм кӕй ис, уый тыххӕй. Зӕгъӕм, лӕг, гӕнӕн ис, афтӕ хъуыды кӕна: «Порнографимӕ нӕ кӕсин, мӕ ус мыл фылдӕр куы узӕлид, уӕд». Фӕлӕ нын ахӕм хъуыдыты тыххӕй фӕрӕдийынӕй ноджы тӕссагдӕр уыдзӕн. Уӕдӕ-иу ӕвзӕр хъуыддӕгтӕ саразынӕн ӕфсӕнттӕ ма агур ӕмӕ-иу суанг дӕ хъуыдыты мидӕг дӕр дӕхи ма рӕстытӕ кӕн. Иннӕты аххосджын кӕныны бӕсты дӕхимӕ кӕс (Гал. 6:7).

16. Ноджыдӕр ма нын цы баххуыс кӕндзӕн, цӕмӕй, раст цы у, уый аразӕм?

¹⁶ Цавӕрдӕр лӕмӕгъдзинӕдтӕ дӕм кӕй ис, ууыл басӕттай, уый хорз у. Фӕлӕ ма дӕ бон цы у ноджыдӕр саразын? Дӕхицӕн фидарӕй зӕгъ, ӕвзӕр фӕндты ныхмӕ кӕй тох кӕндзынӕ (1 Кор. 9:26, 27; 1 Фес. 4:4; 1 Пет. 1:15, 16). Ахъуыды кӕн, ӕвзӕр хъуыдытӕ дӕм арӕхдӕр цӕй тыххӕй фӕзыны ӕмӕ дӕм кӕд фӕзынынц. Чи зоны, ис ахӕм хъуыддӕгтӕ, ӕмӕ дын дӕ буары монцтӕ сцырен кӕнынц. Кӕнӕ дын фӕрӕдийынӕй тӕссаг вӕййы ӕхсӕвыгон йе та, фӕллад куы вӕййыс, уӕд. Уӕдӕ-иу ахӕм уавӕртӕм дӕхи бацӕттӕ кӕн ӕмӕ-иу, куыд архайдзынӕ, ууыл ахъуыды кӕн. Хуыздӕр уыдзӕн, ууыл рагацау куы ахъуыды кӕнай, цалынмӕ фӕлварӕны нӕ бахаудтӕ, уӕдмӕ (Ӕмб. 22:3).

17. Иосифы хабарӕй цӕуыл ахуыр кӕнӕм? (Райдиан 39:7–9). (Кӕс нывтӕм дӕр.)

¹⁷ Ӕрхъуыды-ма кӕнӕм, Иосиф куыд бакодта, Потифары ус ӕй куы рӕдийын кодта, уӕд. Уый йын ӕнӕ ракӕ-бакӕйӕ «нӕ», зӕгъгӕ, загъта. (Бакӕс Райдиан 39:7–9.) Уый цӕуыл дзурӕг у? Иосиф, цалынмӕ ахӕм уавӕры нӕ бахауд, уӕдмӕ дӕр ӕй зыдта, куыд бакӕндзӕн, уый. Раст афтӕ, дӕуӕн дӕр дӕ бон у рагацау аскъуыддзаг кӕнын, фӕлварӕны бахаугӕйӕ куыд архайдзынӕ, уый. Уӕд дын фӕлварӕны рӕстӕг ӕнцондӕр уыдзӕн, раст куыд у, афтӕ бакӕнын.

ДӔ ЗӔРДӔМӔ-ИУ НЫККӔС

18. Ноджыдӕр ма нын цы баххуыс кӕндзӕн ӕвзӕр фӕндтимӕ тох кӕнынӕн? (2 Коринфӕгтӕм 13:5).

¹⁸ Цы ма нын баххуыс кӕндзӕн ӕвзӕр фӕндтимӕ тох кӕнынӕн? Хъуамӕ-иу нӕ зӕрдӕтӕм ныккӕсӕм. (Бакӕс 2 Коринфӕгтӕм 13:5.) Рӕстӕгӕй-рӕстӕгмӕ-иу ахъуыды кӕн, арӕхдӕр цӕуыл фӕхъуыды кӕныс ӕмӕ цавӕрдӕр уавӕрты куыд фӕархайыс, ууыл. Мыййаг дӕ ницы хъӕуы фӕивын? Зӕгъӕм, кӕд фӕлварӕны рӕстӕг фидар фӕлӕууыдтӕ, уӕддӕр ахъуыды кӕн: «„Нӕ“ уайтагъд загътон ӕви ракӕ-бакӕ кодтон?» Кӕд «нӕ» уайтагъд нӕ загътай, уӕд-иу дӕ къухтӕ ма ’руадз. Ахъуыды кӕн, дӕ бон цы у саразын, цӕмӕй иннӕ хатт ӕвӕстиатӕй архайай. Ахъуыды кӕн ахӕм фарстатыл: «Ӕвзӕр хъуыдытӕ мӕм куы фӕзыны, уӕд сӕ уайтагъд фӕсурын? Мӕ бон у бацархайын, цӕмӕй-иу сӕ ноджы тагъддӕр фӕсурон? Цы ирхӕфсӕнтӕ ӕвзарын, уыдоны тыххӕй мын зындӕр нӕ вӕййы фидар фӕлӕууын? Ӕнӕгъдау нывтӕ куы фенын, уӕд уайтагъд иннӕрдӕм азилын? Ӕмбарын ӕй, Йегъовӕйы закъӕттӕ ӕмӕ уагӕвӕрдтӕм гӕсгӕ цӕрын ӕппӕты хуыздӕр кӕй у, кӕд уый тыххӕй хатт цӕмӕндӕрты „нӕ“ зӕгъын фӕхъӕуы, уӕддӕр?» (Пс. 101:3).

19. Афтӕ ахсджиаг нӕм чи нӕ кӕсы, уыцы фарстаты фӕдыл ӕвзӕр уынаффӕтӕ куы хӕссӕм, уӕд нын зындӕр цӕмӕн уыдзӕн не ’взӕр фӕндтимӕ тох кӕнын?

¹⁹ Стӕй-иу дӕхи ма рӕстытӕ кӕн. Библийы фыст ис: «Зӕрдӕйӕ мӕнгарддӕр ӕмӕ фыдбылыздӕр ницы ис» (Йер. 17:9). Йесо загъта, зӕгъгӕ, «зӕрдӕйӕ цӕуынц фыдвӕндтӕ» (Матф. 15:19). Зӕгъӕм, раздӕр порнографимӕ чи каст, фӕлӕ йе ’взӕр ахуыр чи ныууагъта, ахӕм чырыстон фӕстӕдӕр, гӕнӕн ис, хъуыды кӕнын райдайа, зӕгъгӕ, буары монцтӕ чи сцырен кӕны ахӕм къамтӕм кӕсын мын тӕссаг нӕу, бынтон бӕгънӕг адӕмы къамтӕ ма уӕнт, ӕндӕр. Кӕнӕ, гӕнӕн ис, хъуыды кӕна: «Ӕвзӕр хъуыддӕгтӕ куыд аразын, уый мӕ цӕстытыл уайын кӕнон, уым ӕвзӕрӕй ницы ис. Ӕцӕгӕй сӕ куы нӕ аразын». Зӕгъӕн ис, ахӕм адӕймаг йӕ зӕрдӕйы мидӕг пълан кӕны «тӕригъӕдджын буары фӕндтӕ» куыд ӕххӕст кӕндзӕн, уый (Ром. 13:14). Дӕ бон куыд у дӕхи ахӕм тӕссаг хъуыдытӕй бахизын? Гыццыл хъуыддӕгты фӕдыл дӕр-иу раст уынаффӕтӕ хӕсс. Дӕ зӕрдыл дар: афтӕ ахсджиаг дӕм чи нӕ кӕсы, уыцы фарстаты фӕдыл ӕвзӕр уынаффӕтӕ куы хӕссай, уӕд дӕ уый, гӕнӕн ис, ӕркӕна стыр тӕригъӕдмӕb. Ахӕм хъуыдытӕ-иу дӕм куы фӕзына, зӕгъгӕ, ӕвзӕрӕй исты саразай, уым ахӕмӕй ницы ис, уӕд-иу сӕ дӕхицӕй фӕсур.

20. Йегъовӕ нын цавӕр фидӕнӕй ӕвӕры ныфс ӕмӕ нын ныр дӕр куыд ӕххуыс кӕны?

²⁰ Куыд базыдтам, афтӕмӕй Йегъовӕйы фӕрцы нӕ бон у ӕвзӕр фӕндты ныхмӕ фидар фӕлӕууын. Стӕй нын Чырыстийы нывонды фӕрцы ис ног дунейы ӕнустӕм цӕрыны ныфс. Уым нӕ ӕвзӕр фӕндтимӕ тох кӕнын нал хъӕудзӕн. Ӕмӕ куыд амондджын уыдзыстӕм! Фӕлӕ цалынмӕ уыцы рӕстӕг нӕ ралӕууыд, уӕдмӕ нӕ дарддӕр дӕр хъӕуы нӕ тӕригъӕдджын буары фӕндтимӕ тох кӕнын. Ӕмӕ йӕ зонӕм, Йегъовӕйы фӕрцы сыл ӕнӕмӕнг кӕй фӕуӕлахиз уыдзыстӕм!