Уыдтӕн ӕфсӕрмыгӕнаг чызг, фӕлӕ сдӕн миссионер

Ӕз райгуырдтӕн 1951 азы Венӕйы (Австри). Мӕ ныййарджытӕ уыдысты католиктӕ. Ӕз Хуыцауыл ӕууӕндыдтӕн ӕмӕ-иу арӕх куывтон. 9 азы мыл куы цыд, уӕд мӕ фыд Йегъовӕйы Ӕвдисӕнтимӕ Библи ахуыр кӕнын райдыдта. Фӕстӕдӕр та йӕм мӕ мад дӕр ӕрбаиу.

Фӕстӕдӕр Венӕйы райдыдтам ӕмбырд Дёблингмӕ цӕуын. Мӕ бинонтимӕ-иу рӕстӕг иумӕ арӕх ӕрвыстам. Иумӕ-иу Библи кастыстӕм ӕмӕ-иу ӕй иртӕстам. Ӕмбырдтӕм-иу цыдыстӕм ӕмӕ-иу конгрессты ӕххуыс кодтам. Гыццылӕй мын папӕ Йегъовӕйы тынг бауарзын кодта. Фӕндыд ӕй, цӕмӕй мӕ кӕстӕр хоимӕ пионертӕй лӕггад кодтаиккам, ӕмӕ-иу уый тыххӕй арӕх куывта. Фӕлӕ мын уӕд бынтон ӕндӕр нысӕнттӕ уыд.

ӔХХӔСТРӔСТӔГ ЛӔГГАД КӔНЫН РАЙДЫДТОН

Ӕз донаргъуыд райстон 1965 азы. Уӕд мыл цыди 14 азы. Фӕлӕ мын хъусын кӕнын ӕнцон нӕ уыд, уымӕн ӕмӕ-иу ӕнӕзонгӕ адӕмимӕ сныхас кӕнын нӕ уӕндыдтӕн. Уымӕй уӕлдай ма уыдтӕн тынг ӕнӕныфсхаст. Фӕндыд мӕ, цӕмӕй ме ’мгӕрттӕй ма хицӕн кодтаин ӕмӕ мӕ уарзтаиккой. Донаргъуыд куы райстон, уый фӕстӕ мын фӕзынд, Йегъовӕйӕн чи нӕ лӕггад кодта, ахӕм ӕмбӕлттӕ. Мӕ зӕрдӕмӕ цыд семӕ рӕстӕг ӕрвитын, фӕлӕ мӕ мӕ цӕсгом хордта. Ӕмбӕрстон ӕй, Йегъовӕйӕн чи нӕ лӕггад кӕны, уыдонимӕ ӕгӕр бирӕ рӕстӕг кӕй ӕрвитын. Фӕлӕ исты фӕивынмӕ мӕ ныфс нӕ хастон. Фӕлӕ мын иу цыдӕр баххуыс кодта.

Уыцы рӕстӕг не ’мбырды иу 16-аздзыд чызг, До́роти, сси хъусынгӕнӕг. Уый хӕдзарӕй-хӕдзармӕ хъусын кӕнын тынг уарзта, ӕмӕ мӕм уый диссаг каст. Ӕз дзы гыццыл хистӕр уыдтӕн, фӕлӕ хъусын кӕнынмӕ арӕх нӕ цыдтӕн. Ӕмӕ-иу хъуыдытӕ кодтон: «Мӕ ныййарджытӕ сты Йегъовӕйы Ӕвдисӕнтӕ. Доротийы бинонтӕй та Йегъовӕйӕн ничи лӕггад кӕны. Йӕ рынчын мадмӕ кӕсы, фӕлӕ ӕппынӕдзух уацамынды вӕййы». Уымӕ кӕсгӕйӕ мӕн дӕр бафӕндыд Йегъовӕйӕн фылдӕр лӕггад кӕнын. Ӕмӕ бирӕ нӕ рацыд, афтӕ Доротиимӕ иумӕ пионертӕй лӕггад кӕнын райдыдтам. Фыццаг уал лӕггад кодтам ӕххуысгӕнӕг пионертӕй, фӕстӕдӕр та систӕм ӕххӕстрӕстӕг пионертӕ. Доротийӕ сахуыр дӕн зынгзӕрдӕйӕ лӕггад кӕнын. Стӕй мын баххуыс кодта мӕ фыццаг Библийы ахуыр райдайынӕн. Рӕстӕг куыд цыд, афтӕ мын адӕмимӕ ныхас кӕнын ӕнцондӕр сси, фӕнды хӕдзарӕй-хӕдзармӕ хъусын кодтаиккам, фӕнды уынджы кӕнӕ ӕндӕр искуы.

Пионерӕй фыццаг аз куы лӕггад кодтон, уӕд не ’мбырдмӕ рахызт иу ӕфсымӕр, Хайнц. Рӕстдзинад Канадӕйы базыдта, йе ’фсымӕры куы бӕрӕг кодта, уӕд (йе ’фсымӕр уыд Йегъовӕйы Ӕвдисӕн). Хайнцы не ’мбырдмӕ сӕрмагонд пионерӕй снысан кодтой. Куыддӕр базонгӕ стӕм, афтӕ мӕ зӕрдӕмӕ фӕцыд. Фӕлӕ Хайнцы фӕндыд миссионерӕй лӕггад кӕнын, мӕн та – нӕ. Ӕмӕ уый тыххӕй, мӕ зӕрдӕмӕ кӕй цӕуы, уый фыццаг не ’вдыстон. Фӕлӕ фӕстӕдӕр ӕмбӕлын райдыдтам, нӕ цард баиу кодтам ӕмӕ иумӕ пионертӕй лӕггад кӕнын райдыдтам.

ГЫЦЦЫЛГАЙ МӔ БАФӔНДЫД МИССИОНЕРӔЙ ЛӔГГАД КӔНЫН

Хайнц арӕх дзырдта, миссионерӕй лӕггад кӕнын ӕй кӕй фӕнды. Фӕлӕ афтӕ никуы дзырдта, уыцы хуызы лӕггад кӕнын ӕнӕмӕнг кӕй хъуамӕ райдайӕм. Уый бӕсты мын-иу ахӕм фарстатӕ радта, ӕмӕ-иу уыцы лӕггадыл хъуыды кӕнын райдыдтон. Зӕгъӕм, бафарста-иу мӕ: «Сывӕллӕттӕ нын нӕй. Ӕмӕ нӕ уӕд цы хъыгдары Йегъовӕйы хъуыддаджы фылдӕр аразын?» Кӕд ӕфсӕрмыгӕнаг уыдтӕн, уӕддӕр пионерӕй лӕггад кодтон. Фӕлӕ-иу миссионерӕй лӕггад кӕныныл хъуыды дӕр куы акодтон, уӕд-иу мӕ тас бацыд. Афтӕ мӕм каст, ӕмӕ мӕ бон нӕ бауыдзӕн. Фӕлӕ Хайнц мемӕ уыд фӕразон ӕмӕ мын ӕххуыс кодта, цӕмӕй миссионерӕй лӕггад кӕнын мӕ нысан суыдаид. Стӕй мын дзырдта, зӕгъгӕ, дам, фылдӕр хъуыды кӕн адӕмыл, цӕмӕй тӕрсыс, ууыл нӕ, фӕлӕ. Уый тынг хорз уынаффӕ уыд.

Гыццылгай мӕ бафӕндыд миссионерӕй лӕггад кӕнын, ӕмӕ Галаады скъолайы ахуыр кӕныны тыххӕй курдиат байдзаг кодтам. Фӕлӕ мын филиалы цӕстдарӕг загъта, цӕмӕй уал англисаг ӕвзаг хуыздӕр сахуыр кодтаин. Гъемӕ йӕ ӕз дӕр ӕртӕ азы дӕргъы ахуыр кодтон. Ууыл тынг архайдтон. Фӕлӕ нӕ стӕй ӕнӕнхъӕлӕджы сербаг-хорватаг ӕмбырдмӕ снысан кодтой. Уыцы ӕмбырд уыд За́льцбурджы (Австри). Авд азы дӕргъы хорз хабар хъусын кодтам сербаг-хорватаг ӕвзагыл дзурӕг адӕмӕн. Уыцы рӕстӕг Хайнцы снысан кодтой районон цӕстдарӕгӕй. Ӕмӕ иу азы дӕргъы иумӕ ӕмбырдтӕ бӕрӕг кодтам. Ӕмӕ нын кӕд сербаг-хорватаг ӕвзаг ахуыр кӕнын ӕнцон нӕ уыд, уӕддӕр нын бирӕ Библийы ахуыртӕ уыд.

1979 азы нын ӕфсымӕртӕ загътой, цӕмӕй Болгаримӕ «нӕ фӕллад уадзынмӕ» ацыдаиккам. Нӕ хъуыддаг уым ӕхгӕд уыд, ӕмӕ уымӕ гӕсгӕ, уым куы уыдыстӕм, уӕд хорз хабар нӕ хъусын кодтам. Фӕлӕ нын бантыст уыцы бӕстӕмӕ сусӕгӕй нӕ публикациты гыццыл къопитӕ баласын. Уыцы публикацитӕ хъуамӕ фӕхӕццӕ кодтаиккам, Болгарийы сӕйраг горӕт Софийӕйы цы 5 хойы цард, уыдонмӕ. Тынг тарстӕн, фӕлӕ мын Йегъовӕ баххуыс кодта уыцы хӕслӕвӕрд сӕххӕст кӕнынӕн. Уыцы хотӕ уыдысты тынг хъӕбатыр. Ӕмӕ сын кӕд тӕссаг уыд, ахӕстоны сӕ кӕй сбадын кӕндзысты, уымӕй, уӕддӕр сӕ циндзинад не ’рмынӕг. Сӕ цӕвиттон мӕ тынг бафидар кодта. Ӕмӕ мын Йегъовӕйы организаци цыфӕнды ма бахӕс кодтаид, уӕддӕр уый саразынмӕ цӕттӕ уыдтӕн.

Цасдӕры фӕстӕ та ногӕй Галаады скъолайы ахуыр кӕныны тыххӕй курдиат байдзаг кодтам. Ӕмӕ нӕ ацы хатт фӕхуыдтой. Афтӕ хъуыды кодтам, ӕмӕ ацӕудзыстӕм Иугонд Штаттӕм ӕмӕ уым скъола англисаг ӕвзагыл каст фӕуыдзыстӕм. Фӕлӕ 1981 азы ноябры Галаады скъола уадзын райдыдтой Германийы дӕр, Висба́дены цы филиал уыд, уым. Уымӕ гӕсгӕ скъола цыд немыцаг ӕвзагыл. Ӕмӕ мын уый, кӕй зӕгъын ӕй хъӕуы, ӕнцондӕр уыд. Ӕмӕ нӕ скъолайы фӕстӕ та кӕдӕм снысан кодтой?

ЛӔГГАД КӔНӔМ, ХӔСТЫТӔ КӔМ ЦӔУЫ, УЫЦЫ БӔСТӔЙЫ

Снысан нӕ кодтой Кенимӕ. Фӕлӕ нӕ Кенийы филиалӕй ӕфсымӕртӕ бафарстой, нӕ, дам, уӕ фӕндид сыхаг бӕстӕ Угандӕйы балӕггад кӕнын, зӕгъгӕ. Уымӕй 10 азы размӕ Угандӕйы ӕфсӕддонтӕ хицауады ныхмӕ рацыдысты, ӕмӕ бӕстӕйы сӕргъы ӕрлӕууыд генерал И́ди Ами́н. Хицау куы уыд, уӕд мингай адӕмы амарын кодта, милуантӕ та йӕ къухӕй ӕфхӕрд баййӕфтой. 1979 азы Иди Аминӕн йӕ бартӕ байстой. Ахъуыды-ма кӕнут, ахӕм змӕстытӕ цы бӕстӕйы цыд, уырдӕм ацӕуын куыд тынг тарстӕн! Фӕлӕ нӕ Галаады ахуыр кодтой нӕ ныфс ӕгасӕй дӕр Йегъовӕйыл дарын. Ӕмӕ мах дӕр сразы стӕм.

1982 азы Хайнцимӕ ӕрцыдыстӕм Угандӕйы сӕйраг горӕт Кампа́лӕмӕ. Бӕстӕ уыд ӕмтъеры. Уыцы рӕстӕг Угандӕ цы уавӕры уыд, уый тыххӕй Хайнц 2010 азы «Ежегодник»-ы радзырдта: «Хицауадӕн йӕ бон нӕ уыд адӕмӕн, ӕнӕмӕнг сӕ цы хъуыд, уыдӕттӕ раттын, зӕгъӕм, дон, рухс ӕмӕ афтӕ дарддӕр. Телефонтӕ дӕр нӕ куыстой. Ӕппынӕдзух-иу хъуысти гӕрӕхтӕ, адӕм кӕрӕдзи мардтой, кӕрӕдзи стыгътой. Ахӕм хабӕрттӕ-иу уӕлдайдӕр ӕхсӕвыгон цыдысты. Куы-иу ӕрталынг, уӕд-иу иууылдӕр сӕ хӕдзӕртты бадтысты ӕмӕ-иу сӕ ныфс уыд, кӕй ничи сӕм ӕрбабырсдзӕн. Уый тыххӕй чидӕртӕ кувгӕ дӕр кодтой». Кӕд хотӕ ӕмӕ ’фсымӕртӕ ахӕм уавӕрты цардысты, уӕддӕр сӕ уырнындзинад уыд фидар ӕмӕ Йегъовӕйӕн цингӕнгӕйӕ лӕггад кодтой.

Фыццаг фондз мӕйы нӕ сӕхимӕ суазӕг кодтой Сэм ӕмӕ Кристинӕ Ва́йсва. Уыдонӕн уыд фондз сывӕллоны, ӕмӕ ма семӕ цардысты сӕ хиуӕттӕ, цыппарӕй. Хатт-иу уыцы бинонтӕ бон ӕрмӕстдӕр иу хатт бахордтой, фӕлӕ нын уӕддӕр, цы сӕм уыд, уый никуы ӕвгъау кодтой. Афтӕ уазӕгуарзон кӕй уыдысты, уый нын нӕ зӕрдӕтӕ тынг бацагайдта. Семӕ цӕргӕйӕ бирӕ цӕуылдӕрты сахуыр стӕм, ӕмӕ нын уыдӕттӕ нӕ лӕггады стыр ӕххуыс уыдысты. Зӕгъӕм, сахуыр стӕм дон фӕстауӕрц кӕнын. Цӕмӕй-иу нӕхи ныхсадтаиккам, уый тыххӕй-иу нӕ дон ӕрмӕст цалдӕр литры бахъуыд. Стӕй та-иу уыцы дон уазӕгдоны бахардз кодтам. 1983 азы Хайнцимӕ ӕндӕр цӕрӕнбынат ссардтам. Уый дӕр уыд Кампалӕйы. Фӕлӕ уыцы район ӕдасдӕр уыд.

Кампалӕйы хъусын кӕнын нӕ зӕрдӕмӕ тынг цыд. Хъуыды йӕ кӕнын, иухатт иу мӕймӕ 4000 журналӕй фылдӕр кӕй байуӕрстам! Фӕлӕ ӕппӕты тынгдӕр нӕ зӕрдӕмӕ цыдысты адӕм. Хуыцау сӕ зӕрдӕты ахсджиаг бынат ахста, стӕй уарзтой Библийыл ныхас кӕнын дӕр. Арӕх-иу нын Хайнцимӕ уыд фӕйнӕ 10–15 Библийы ахуыры. Ӕмӕ Библи кӕимӕ ахуыр кодтам, уыдонӕй бирӕ цӕуылдӕрты сахуыр стӕм. Зӕгъӕм, алы къуыри дӕр-иу фембӕлдтӕм ӕмӕ фӕстӕмӕ фистӕгӕй цыдысты. Фӕлӕ-иу ницӕуыл хъуыр-хъуыр кодтой ӕмӕ-иу ӕдзух сӕ мидбылты худтысты.

Уый фӕстӕ ма Угандӕйы хӕст дыууӕ хатты бацайдагъ. Уый уыд 1985 ӕмӕ 1986 азты. Арӕх-иу федтам сывӕллӕтты хӕцӕнгарзимӕ блокпосттӕ хъахъхъӕнгӕ. Фӕлӕ уыцы рӕстӕг дӕр хорз хабар хъусын кодтам. Ӕмӕ-иу Йегъовӕмӕ куывтам, цӕмӕй нын раттаид зонд, ӕмбаргӕдзинад ӕмӕ нӕ йӕ фарнӕй схайджын кодтаид. Ӕмӕ-иу нын Йегъовӕ нӕ куывдтытӕн дзуапп радта. Искӕй-иу Йегъовӕйы тыххӕй фылдӕр базонын куы бафӕндыд, уӕд-иу арӕх нӕ тас фӕцыдӕр.

Хорз хабар ма хъусын кодтам, Угандӕмӕ ӕндӕр бӕстӕтӕй чи ’рлыгъд, ахӕм адӕмӕн дӕр. Зӕгъӕм, базонгӕ стӕм Мурат ӕмӕ Дильба́р Ибату́ллинтимӕ. Уыдон уыдысты Татарстанӕй. Мурат уыд дохтыр. Мах семӕ Библи ахуыр кӕнын райдыдтам, ӕмӕ сӕ дыууӕ дӕр донаргъуыд райстой. Ӕмӕ ныр дӕр Йегъовӕйӕн иузӕрдионӕй лӕггад кӕнынц. Фӕстӕдӕр та базонгӕ дӕн Татьянӕ Виле́йскаимӕ. Уый уыд Украинӕйӕ. Ахӕм уӕззау депресси йӕм уыд, ӕмӕ ма суанг йӕхи амарынмӕ дӕр хъавыд. Татьянӕ донаргъуыд куы райста, уӕд фӕстӕмӕ Украинӕмӕ аздӕхт ӕмӕ уым нӕ публикацитӕ украинаг ӕвзагмӕ тӕлмац кӕнынӕн ӕххуыс кодтаa.

НОГ ХӔСЛӔВӔРД

1991 азы Австрийы отпусчы куы уыдыстӕм, уӕд нӕм бынӕттон филиалӕй писмо ӕрбацыд. Фыст дзы уыд, Болгаримӕ нӕ кӕй снысан кодтой. Скӕсӕн Европӕйы коммунизмӕн йӕ кӕрон куы ’рцыд, уӕд Болгарийы Йегъовӕйы Ӕвдисӕнтӕн сӕрибарӕй лӕггад кӕныны бар радтой. Гыццыл раздӕр куыд загътон, афтӕмӕй, уыцы бӕстӕйы нӕ хъуыддаг ӕхгӕд куы уыд, уӕд Хайнцимӕ уырдӕм сусӕгӕй нӕ литературӕ аластам. Фӕлӕ нӕ ныр та уырдӕм хорз хабар хъусын кӕнынмӕ снысан кодтой.

Ӕфсымӕртӕ нын загътой, цӕмӕй Угандӕмӕ мауал аздӕхтаиккам. Гъемӕ Угандӕмӕ не ’мбӕлттӕн хӕрзбон зӕгъынмӕ ӕмӕ нӕ дзауматӕ сӕмбырд кӕнынмӕ нал ацыдыстӕм. Фыццаг уал ацыдыстӕм Германийы филиалмӕ. Уым нын машинӕ радтой. Гъемӕ уыцы машинӕйыл Болгаримӕ ацыдыстӕм. Снысан нӕ кодтой, горӕт Софийӕйы цы къорд уыд, уырдӕм. Уыди дзы 20 хъусынгӕнӕджы бӕрц.

Болгарийы сӕмбӕлдыстӕм ног зындзинӕдтыл. Фыццаг уый, ӕмӕ бынӕттон ӕвзаг нӕ зыдтам. Дыккаг уый, ӕмӕ болгайраг ӕвзагыл нӕ организацийы уагъд публикацитӕй дыууӕ йеддӕмӕ нӕ уыд – «Ӕнусон цардмӕ кӕнӕг ӕцӕгдзинад» ӕмӕ «Мӕ библион радзырдты чиныг». Ӕртыккаг зындзинад та уый мидӕг уыд, ӕмӕ нын Библийы ахуыртӕ райдайын зын уыд. Фӕлӕ уӕддӕр нӕ гыццыл къорд хорз хабар зынгзӕрдӕйӕ хъусын кодта. Уый тыххӕй православон аргъуаны цӕсты хаудыстӕм. Ӕмӕ ӕцӕг зындзинӕдтӕ уӕд райдыдтой.

1994 азы нын хицауад нӕ хъуыддаг сӕхгӕдта, ӕмӕ нӕм адӕм ахӕм цӕстӕй кӕсын райдыдтой, цыма цыдӕр тӕссаг сектӕ стӕм. Ӕфсымӕртӕй кӕйдӕрты ӕрцахстой. Газетты ӕмӕ телевизоры Йегъовӕйы Ӕвдисӕнты тыххӕй алы мӕнг ныхӕстӕ парахат кодтой, зӕгъгӕ, дам, сӕ сывӕллӕттӕн туг бауадзыныл не сразы вӕййынц, ӕмӕ, дам, сӕ афтӕмӕй амарынц. Стӕй, дам, се ’мчырыстӕтты ахӕм зондыл саразынц, ӕмӕ сӕхи амарынц. Хорз хабар хъусын кӕнын тынг зын сси. Уацамынды-иу куы уыдыстӕм, уӕд-иу нын адӕм алывыдтӕ фӕкалдтой, хъӕртӕ ныл-иу кодтой, пъӕлицӕмӕ-иу бадзырдтой ӕмӕ-иу ныл цыдӕртӕ ’хстой. Хицауад бӕстӕмӕ нӕ литературӕ ласын нӕ уагъта. Ӕмӕ, фембӕлдтӕ кӕм уагътаиккам, ахӕм бынат баххуырсын дӕр тынг зын уыд. Иухатт ма пъӕлицӕйы кусджытӕ суанг конгресмӕ дӕр ӕрбацыдысты ӕмӕ нӕ программӕ кӕронмӕ ауадзын нал бауагътой. Мах Хайнцимӕ фыццаг хатт федтам, цӕмӕй адӕм Йегъовӕйы Ӕвдисӕнтӕй афтӕ тынг се сӕфт уыной. Уыцы адӕм куыд тынг хицӕн кодтой Угандӕйы цӕрӕг адӕмӕй! Угандӕйы адӕм уыдысты хӕларзӕрдӕ, ӕмӕ бирӕты фӕндыд немӕ Библи ахуыр кӕнын. Цы нын баххуыс кодта, цӕмӕй ног уавӕртыл сахуыр уыдаиккам?

Бынӕттон хотӕ ӕмӕ ’фсымӕртимӕ-иу нӕ рӕстӕг кӕй ӕрвыстам, уый фӕрцы-иу нӕ хъарутӕ бацыд. Рӕстдзинад кӕй ссардтой, ууыл тынг цин кодтой ӕмӕ нын нӕ лӕггадӕн тынг аргъ кодтой. Кӕрӕдзийӕн уыдыстӕм хорз ӕмбӕлттӕ ӕмӕ кӕрӕдзийы фидар кодтам. Ӕппӕт уыдӕтты фӕрцы бамбӕрстам: нӕ организаци нын цыфӕнды зын хъуыддаг ма бахӕс кӕна, уӕддӕр амондджын уыдзыстӕм, сӕйраджыдӕр адӕмыл куы хъуыды кӕнӕм, нӕ зындзинӕдтыл нӕ, фӕлӕ.

Фӕстӕдӕр уавӕр фӕхуыздӕр. 1998 азы нӕ организацийӕн ногӕй регистраци скодтой, ӕмӕ болгайраг ӕвзагыл фылдӕр литературӕ фӕзынд. 2004 азы Болгарийы филиал Йегъовӕйӕн снывонд кодтой. Абон Болгарийы ис 57 ӕмбырды, ӕмӕ дзы лӕггад кӕны 2 953 хъусынгӕнӕджы. 2024 азы Ӕрымысӕн изӕрмӕ ӕрбацыд 6 475 адӕймаджы. Кӕддӕр Софийӕйы 5 хойы йеддӕмӕ нӕ уыд, ныр та дзы ис 9 ӕмбырды! Мах нӕхи цӕстӕй федтам, куыд сӕххӕст Исайы пехуымпарад: «Армыдзаг адӕмӕй равзӕрдзӕн мин» (Ис. 60:22).

ӔНӔНИЗДЗИНАДИМӔ БАСТ ЗЫНДЗИНӔДТӔ

Ме ’нӕниздзинад бынтон хорз нӕ уыд. Цалдӕр хатты мӕм рак ссардтой. Иу хатт суанг мӕ сӕры дӕр. Дзӕбӕх мӕ кодтой, лучевая терапия кӕй хонынц, ахӕм мадзалӕй. Уый фӕстӕ мын Индийы скодтой, 12 сахаты чи цыд, ахӕм операци. Операцийы фӕстӕ цасдӕр рӕстӕг цардыстӕм Индийы филиалы, цалынмӕ мӕ къахыл не слӕууыдтӕн, уӕдмӕ. Уый фӕстӕ та Болгаримӕ ӕрыздӕхтыстӕм.

Уыцы рӕстӕг рабӕрӕг, Хайнцмӕ кӕй ис, йӕ туджы кӕй рахаста, ахӕм низ. Хонынц ӕй Ха́нтингтоны низ. Цӕуын ӕмӕ йын дзурын тынг фӕзын, йӕ къухтыл ӕмӕ йӕ къӕхтыл кӕронмӕ йӕ бар нал цыд. Йӕ низ куыд тыхджындӕр кодта, афтӕ йӕ ме ’ххуыс тынгдӕр хъуыд. Хатт-иу уыдтӕн ныфссаст ӕмӕ-иу хъуыдытӕ кодтон, дарддӕр цы уыдзӕн, зӕгъгӕ. Фӕлӕ-иу иу ӕрыгон ӕфсымӕр, Бо́би, арӕх Хайнцы йемӕ хъусын кӕнынмӕ акодта. Кӕд-иу Хайнцӕн йӕ бон рӕстмӕ дзурын нӕ уыд ӕмӕ-иу йӕ къухтӕ ӕмӕ йӕ къӕхтӕ йӕ коммӕ нӕ кастысты, уӕддӕр Боби ӕппындӕр нӕ тыхст, адӕм уый тыххӕй цы ахъуыды кӕндзысты, ууыл. Хатт-иу мын ахӕм фадат нӕ уыд, цӕмӕй Хайнцы фарсмӕ уыдаин, фӕлӕ-иу мын Боби баххуыс кӕнынмӕ алкӕддӕр цӕттӕ уыд. Кӕд Хайнцимӕ рагацау аскъуыддзаг кодтам, ацы дунейы нын сывӕллӕттӕ кӕй нӕ уыдзӕн, уӕддӕр нӕм афтӕ каст, цыма нын Йегъовӕ фырт балӕвар кодта – Бобийы (Мар. 10:29, 30).

Хайнцмӕ ма уыд рак дӕр. Ӕмӕ, хъыгагӕн, 2015 азы мӕ зынаргъ цардӕмбал фӕзиан. Тынг ӕй мысыдтӕн. Кӕй амард, уый мӕ нӕ уырныдта. Фӕлӕ йыл арӕх фӕхъуыды кӕнын. Ӕмӕ мӕ хъуыдыты ныр дӕр ма удӕгас у! (Лук. 20:38). Боны дӕргъы арӕх мӕ зӕрдыл ӕрлӕууынц йӕ хъарм ныхӕстӕ ӕмӕ йӕ хорз уынаффӕтӕ. Уал азы дӕргъы Йегъовӕйӕн иумӕ иузӕрдионӕй кӕй лӕггад кодтам, уымӕн тынг аргъ кӕнын.

ЙЕГЪОВӔЙӔ ЙЕ ’ХХУЫСЫ ТЫХХӔЙ ТЫНГ БУЗНЫГ ДӔН

Цыфӕнды зындзинӕдтыл ма сӕмбӕлдаин – Йегъовӕ алкӕддӕр мӕ фарсмӕ уыд. Баххуыс мын кодта, цӕмӕй суыдаин, фыццаджыдӕр адӕмыл чи хъуыды кӕны, ахӕм миссионер, кӕд ӕфсӕрмыгӕнаг уыдтӕн, уӕддӕр (2 Тим. 1:7). Йегъовӕйӕ тынг бузныг дӕн, ӕз дӕр ӕмӕ мӕ кӕстӕр хо дӕр ӕххӕстрӕстӕг кӕй лӕггад кӕнӕм. Мӕ хойы лӕг у районон цӕстдарӕг, ӕмӕ иумӕ Европӕйы сербаг ӕмбырдтӕ фӕбӕрӕг кӕнынц. Кӕддӕр мӕ фыд куывта, цӕмӕй йӕ чызджытӕ пионертӕй лӕггад кӕнын райдыдтаиккой. Ӕмӕ йын Йегъовӕ йӕ куывдтытӕн дзуапп радта!

Библи кӕй фӕкӕсын ӕмӕ йӕ кӕй фӕиртасын, уый фӕрцы мӕ зӕрдӕйы вӕййы фарн. Зын рӕстӕджыты ӕз дӕр Йесойау «ноджы зӕрдиагдӕрӕй» фӕкувын (Лук. 22:44). Йегъовӕ мын мӕ куывдтытӕн дзуапп ратты, зӕгъӕм, ме ’мбырды мын цы уарзӕгой ӕмӕ хӕларзӕрдӕ ӕмбӕлттӕ ис, уыдоны фӕрцы. Уыдон мӕ уазӕгуаты фӕхонынц ӕмӕ мын арӕх фӕзӕгъынц, куыд тынг мӕ уарзынц ӕмӕ мын мӕ лӕггадӕн куыд тынг аргъ кӕнынц. Ӕппӕт уыдӕтты фӕрцы мыл базыртӕ базайы!

Райгасдзинадыл арӕх фӕхъуыды кӕнын. Мӕ цӕстытыл ауайын кӕнын, мӕ ныййарджытӕ, сӕ чындзӕхсӕвы бон куыд рӕсугъд уыдысты, афтӕ рӕсугъдӕй нӕ хӕдзары раз куыд лӕууынц; мӕ хо хӕринаг куыд кӕны; Хайнц бӕхыл куыд бады. Уыдӕттыл куы фӕхъуыды кӕнын, уӕд афтӕ тынг нал фӕтыхсын ӕмӕ мӕ зӕрдӕ цинӕй байдзаг вӕййы. Йегъовӕйӕ тынг бузныг дӕн, ахӕм диссаджы фидӕн мын кӕй ӕрцӕттӕ кодта, уый тыххӕй!

Мӕ цардыл ӕмӕ мӕ фидӕныл куы фӕхъуыды кӕнын, уӕд мӕм фӕзыны, Давидмӕ цы ’нкъарӕнтӕ уыд, ахӕм ӕнкъарӕнтӕ. Уый загъта: «Ныр кӕм уаин, Йегъовӕйы хорздзинад удӕгӕсты зӕххыл кӕй фендзынӕн, уый мӕ куы нӕ уырныдтаид, уӕд? Дӕ ныфс дар Йегъовӕйыл, хъӕбатыр у ӕмӕ дӕ зӕрдӕ фидар уӕд. О, дӕ ныфс дар Йегъовӕйыл» (Пс. 27:13, 14).